1. ஸப்³ப³ஸங்கா³ஹிகவாரோ

978. கதி க²ந்தா⁴, கதி ஆயதனானி, கதி தா⁴துயோ, கதி ஸச்சானி, கதி இந்த்³ரியானி, கதி ஹேதூ, கதி ஆஹாரா, கதி ப²ஸ்ஸா, கதி வேத³னா, கதி ஸஞ்ஞா, கதி சேதனா, கதி சித்தானி?

பஞ்சக்க²ந்தா⁴, த்³வாத³ஸாயதனானி, அட்டா²ரஸ தா⁴துயோ, சத்தாரி ஸச்சானி, பா³வீஸதிந்த்³ரியானி, நவ ஹேதூ, சத்தாரோ ஆஹாரா, ஸத்த ப²ஸ்ஸா, ஸத்த வேத³னா, ஸத்த ஸஞ்ஞா, ஸத்த சேதனா, ஸத்த சித்தானி.

979. தத்த² கதமே பஞ்சக்க²ந்தா⁴? ரூபக்க²ந்தோ⁴, வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴, விஞ்ஞாணக்க²ந்தோ⁴ – இமே வுச்சந்தி ‘‘பஞ்சக்க²ந்தா⁴’’.

980. தத்த² கதமானி த்³வாத³ஸாயதனானி? சக்கா²யதனம், ரூபாயதனம், ஸோதாயதனம், ஸத்³தா³யதனம், கா⁴னாயதனம், க³ந்தா⁴யதனம், ஜிவ்ஹாயதனம், ரஸாயதனம், காயாயதனம், போ²ட்ட²ப்³பா³யதனம், மனாயதனம், த⁴ம்மாயதனம் – இமானி வுச்சந்தி ‘‘த்³வாத³ஸாயதனானி’’.

981. தத்த² கதமா அட்டா²ரஸ தா⁴துயோ? சக்கு²தா⁴து, ரூபதா⁴து, சக்கு²விஞ்ஞாணதா⁴து, ஸோததா⁴து, ஸத்³த³தா⁴து, ஸோதவிஞ்ஞாணதா⁴து, கா⁴னதா⁴து, க³ந்த⁴தா⁴து, கா⁴னவிஞ்ஞாணதா⁴து, ஜிவ்ஹாதா⁴து, ரஸதா⁴து, ஜிவ்ஹாவிஞ்ஞாணதா⁴து, காயதா⁴து, போ²ட்ட²ப்³ப³தா⁴து, காயவிஞ்ஞாணதா⁴து, மனோதா⁴து, த⁴ம்மதா⁴து, மனோவிஞ்ஞாணதா⁴து – இமா வுச்சந்தி ‘‘அட்டா²ரஸ தா⁴துயோ’’.

982. தத்த² கதமானி சத்தாரி ஸச்சானி? து³க்க²ஸச்சம், ஸமுத³யஸச்சம், நிரோத⁴ஸச்சம், மக்³க³ஸச்சம் – இமானி வுச்சந்தி ‘‘சத்தாரி ஸச்சானி’’.

983. தத்த² கதமானி பா³வீஸதிந்த்³ரியானி? சக்கு²ந்த்³ரியம், ஸோதிந்த்³ரியம், கா⁴னிந்த்³ரியம், ஜிவ்ஹிந்த்³ரியம், காயிந்த்³ரியம், மனிந்த்³ரியம், இத்தி²ந்த்³ரியம், புரிஸிந்த்³ரியம், ஜீவிதிந்த்³ரியம், ஸுகி²ந்த்³ரியம், து³க்கி²ந்த்³ரியம், ஸோமனஸ்ஸிந்த்³ரியம், தோ³மனஸ்ஸிந்த்³ரியம், உபேக்கி²ந்த்³ரியம், ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம், அனஞ்ஞாதஞ்ஞஸ்ஸாமீதிந்த்³ரியம், அஞ்ஞிந்த்³ரியம், அஞ்ஞாதாவிந்த்³ரியம் – இமானி வுச்சந்தி ‘‘பா³வீஸதிந்த்³ரியானி’’.

984. தத்த² கதமே நவ ஹேதூ? தயோ குஸலஹேதூ, தயோ அகுஸலஹேதூ, தயோ அப்³யாகதஹேதூ.

தத்த² கதமே தயோ குஸலஹேதூ? அலோபோ⁴ குஸலஹேது, அதோ³ஸோ குஸலஹேது, அமோஹோ குஸலஹேது – இமே தயோ குஸலஹேதூ.

தத்த² கதமே தயோ அகுஸலஹேதூ? லோபோ⁴ அகுஸலஹேது, தோ³ஸோ அகுஸலஹேது, மோஹோ அகுஸலஹேது – இமே தயோ அகுஸலஹேதூ.

தத்த² கதமே தயோ அப்³யாகதஹேதூ? குஸலானம் வா த⁴ம்மானம் விபாகதோ கிரியாப்³யாகதேஸு வா த⁴ம்மேஸு அலோபோ⁴, அதோ³ஸோ, அமோஹோ – இமே தயோ அப்³யாகதஹேதூ. இமே வுச்சந்தி ‘‘நவ ஹேதூ’’.

985. தத்த² கதமே சத்தாரோ ஆஹாரா? கப³ளீகாராஹாரோ [கப³ளிம்காரோ ஆஹாரோ (ஸீ. ஸ்யா.)], ப²ஸ்ஸாஹாரோ, மனோஸஞ்சேதனாஹாரோ, விஞ்ஞாணாஹாரோ – இமே வுச்சந்தி ‘‘சத்தாரோ ஆஹாரா’’.

986. தத்த² கதமே ஸத்த ப²ஸ்ஸா? சக்கு²ஸம்ப²ஸ்ஸோ, ஸோதஸம்ப²ஸ்ஸோ, கா⁴னஸம்ப²ஸ்ஸோ, ஜிவ்ஹாஸம்ப²ஸ்ஸோ, காயஸம்ப²ஸ்ஸோ, மனோதா⁴துஸம்ப²ஸ்ஸோ, மனோவிஞ்ஞாணதா⁴துஸம்ப²ஸ்ஸோ – இமே வுச்சந்தி ‘‘ஸத்த ப²ஸ்ஸா’’.

987. தத்த² கதமா ஸத்த வேத³னா? சக்கு²ஸம்ப²ஸ்ஸஜா வேத³னா, ஸோதஸம்ப²ஸ்ஸஜா வேத³னா, கா⁴னஸம்ப²ஸ்ஸஜா வேத³னா, ஜிவ்ஹாஸம்ப²ஸ்ஸஜா வேத³னா, காயஸம்ப²ஸ்ஸஜா வேத³னா, மனோதா⁴துஸம்ப²ஸ்ஸஜா வேத³னா, மனோவிஞ்ஞாணதா⁴துஸம்ப²ஸ்ஸஜா வேத³னா – இமா வுச்சந்தி ‘‘ஸத்த வேத³னா’’.

988. தத்த² கதமா ஸத்த ஸஞ்ஞா? சக்கு²ஸம்ப²ஸ்ஸஜா ஸஞ்ஞா, ஸோதஸம்ப²ஸ்ஸஜா ஸஞ்ஞா, கா⁴னஸம்ப²ஸ்ஸஜா ஸஞ்ஞா, ஜிவ்ஹாஸம்ப²ஸ்ஸஜா ஸஞ்ஞா, காயஸம்ப²ஸ்ஸஜா ஸஞ்ஞா, மனோதா⁴துஸம்ப²ஸ்ஸஜா ஸஞ்ஞா, மனோவிஞ்ஞாணதா⁴துஸம்ப²ஸ்ஸஜா ஸஞ்ஞா – இமா வுச்சந்தி ‘‘ஸத்த ஸஞ்ஞா’’.

989. தத்த² கதமா ஸத்த சேதனா? சக்கு²ஸம்ப²ஸ்ஸஜா சேதனா, ஸோதஸம்ப²ஸ்ஸஜா சேதனா, கா⁴னஸம்ப²ஸ்ஸஜா சேதனா, ஜிவ்ஹாஸம்ப²ஸ்ஸஜா சேதனா, காயஸம்ப²ஸ்ஸஜா சேதனா, மனோதா⁴துஸம்ப²ஸ்ஸஜா சேதனா, மனோவிஞ்ஞாணதா⁴துஸம்ப²ஸ்ஸஜா சேதனா – இமா வுச்சந்தி ‘‘ஸத்த சேதனா’’.

990. தத்த² கதமானி ஸத்த சித்தானி? சக்கு²விஞ்ஞாணம், ஸோதவிஞ்ஞாணம், கா⁴னவிஞ்ஞாணம், ஜிவ்ஹாவிஞ்ஞாணம், காயவிஞ்ஞாணம், மனோதா⁴து, மனோவிஞ்ஞாணதா⁴து – இமானி வுச்சந்தி ‘‘ஸத்த சித்தானி’’.