2. அகுஸலவாரோ

730. சதஸ்ஸோ படிஸம்பி⁴தா³ – அத்த²படிஸம்பி⁴தா³, த⁴ம்மபடிஸம்பி⁴தா³, நிருத்திபடிஸம்பி⁴தா³, படிபா⁴னபடிஸம்பி⁴தா³.

கதமே த⁴ம்மா அகுஸலா? யஸ்மிம் ஸமயே அகுஸலம் சித்தம் உப்பன்னம் ஹோதி ஸோமனஸ்ஸஸஹக³தம் தி³ட்டி²க³தஸம்பயுத்தம் ரூபாரம்மணம் வா…பே… த⁴ம்மாரம்மணம் வா யம் யம் வா பனாரப்³ப⁴, தஸ்மிம் ஸமயே ப²ஸ்ஸோ ஹோதி…பே… அவிக்கே²போ ஹோதி. இமே த⁴ம்மா அகுஸலா. இமேஸு த⁴ம்மேஸு ஞாணம் த⁴ம்மபடிஸம்பி⁴தா³. தேஸம் விபாகே ஞாணம் அத்த²படிஸம்பி⁴தா³. யாய நிருத்தியா தேஸம் த⁴ம்மானம் பஞ்ஞத்தி ஹோதி தத்ர த⁴ம்மனிருத்தாபி⁴லாபே ஞாணம் நிருத்திபடிஸம்பி⁴தா³. யேன ஞாணேன தானி ஞாணானி ஜானாதி – ‘‘இமானி ஞாணானி இத³மத்த²ஜோதகானீ’’தி, ஞாணேஸு ஞாணம் படிபா⁴னபடிஸம்பி⁴தா³.

731. சதஸ்ஸோ படிஸம்பி⁴தா³ – அத்த²படிஸம்பி⁴தா³, த⁴ம்மபடிஸம்பி⁴தா³, நிருத்திபடிஸம்பி⁴தா³, படிபா⁴னபடிஸம்பி⁴தா³.

கதமே த⁴ம்மா அகுஸலா? யஸ்மிம் ஸமயே அகுஸலம் சித்தம் உப்பன்னம் ஹோதி ஸோமனஸ்ஸஸஹக³தம் தி³ட்டி²க³தஸம்பயுத்தம் ஸஸங்கா²ரேன…பே… ஸோமனஸ்ஸஸஹக³தம் தி³ட்டி²க³தவிப்பயுத்தம்…பே… ஸோமனஸ்ஸஸஹக³தம் தி³ட்டி²க³தவிப்பயுத்தம் ஸஸங்கா²ரேன…பே… உபேக்கா²ஸஹக³தம் தி³ட்டி²க³தஸம்பயுத்தம்…பே… உபேக்கா²ஸஹக³தம் தி³ட்டி²க³தஸம்பயுத்தம் ஸஸங்கா²ரேன…பே… உபேக்கா²ஸஹக³தம் தி³ட்டி²க³தவிப்பயுத்தம்…பே… உபேக்கா²ஸஹக³தம் தி³ட்டி²க³தவிப்பயுத்தம் ஸஸங்கா²ரேன…பே… தோ³மனஸ்ஸஸஹக³தம் படிக⁴ஸம்பயுத்தம்…பே… தோ³மனஸ்ஸஸஹக³தம் படிக⁴ஸம்பயுத்தம் ஸஸங்கா²ரேன…பே… உபேக்கா²ஸஹக³தம் விசிகிச்சா²ஸம்பயுத்தம்…பே… உபேக்கா²ஸஹக³தம் உத்³த⁴ச்சஸம்பயுத்தம் ரூபாரம்மணம் வா…பே… த⁴ம்மாரம்மணம் வா யம் யம் வா பனாரப்³ப⁴, தஸ்மிம் ஸமயே ப²ஸ்ஸோ ஹோதி…பே… அவிக்கே²போ ஹோதி. இமே த⁴ம்மா அகுஸலா. இமேஸு த⁴ம்மேஸு ஞாணம் த⁴ம்மபடிஸம்பி⁴தா³. தேஸம் விபாகே ஞாணம் அத்த²படிஸம்பி⁴தா³. யாய நிருத்தியா தேஸம் த⁴ம்மானம் பஞ்ஞத்தி ஹோதி தத்ர த⁴ம்மனிருத்தாபி⁴லாபே ஞாணம் நிருத்திபடிஸம்பி⁴தா³. யேன ஞாணேன தானி ஞாணானி ஜானாதி – ‘‘இமானி ஞாணானி இத³மத்த²ஜோதகானீ’’தி, ஞாணேஸு ஞாணம் படிபா⁴னபடிஸம்பி⁴தா³.