1. ஸுத்தந்தபா⁴ஜனீயம்

1. ஸங்க³ஹவாரோ

718. சதஸ்ஸோ படிஸம்பி⁴தா³ – அத்த²படிஸம்பி⁴தா³, த⁴ம்மபடிஸம்பி⁴தா³, நிருத்திபடிஸம்பி⁴தா³, படிபா⁴னபடிஸம்பி⁴தா³ [படிபா⁴ணபடிஸம்பி⁴தா³ (ஸ்யா.) ஏவமுபரிபி]. அத்தே² ஞாணம் அத்த²படிஸம்பி⁴தா³, த⁴ம்மே ஞாணம் த⁴ம்மபடிஸம்பி⁴தா³, தத்ர த⁴ம்மனிருத்தாபி⁴லாபே ஞாணம் நிருத்திபடிஸம்பி⁴தா³, ஞாணேஸு ஞாணம் படிபா⁴னபடிஸம்பி⁴தா³. அயம் ஸங்க³ஹவாரோ.

2. ஸச்சவாரோ

719. சதஸ்ஸோ படிஸம்பி⁴தா³ – அத்த²படிஸம்பி⁴தா³, த⁴ம்மபடிஸம்பி⁴தா³, நிருத்திபடிஸம்பி⁴தா³, படிபா⁴னபடிஸம்பி⁴தா³. து³க்கே² ஞாணம் அத்த²படிஸம்பி⁴தா³, து³க்க²ஸமுத³யே ஞாணம் த⁴ம்மபடிஸம்பி⁴தா³, து³க்க²னிரோதே⁴ ஞாணம் அத்த²படிஸம்பி⁴தா³, து³க்க²னிரோத⁴கா³மினியா படிபதா³ய ஞாணம் த⁴ம்மபடிஸம்பி⁴தா³, தத்ர த⁴ம்மனிருத்தாபி⁴லாபே ஞாணம் நிருத்திபடிஸம்பி⁴தா³, ஞாணேஸு ஞாணம் படிபா⁴னபடிஸம்பி⁴தா³. அயம் ஸச்சவாரோ.

3. ஹேதுவாரோ

720. சதஸ்ஸோ படிஸம்பி⁴தா³ – அத்த²படிஸம்பி⁴தா³, த⁴ம்மபடிஸம்பி⁴தா³ நிருத்திபடிஸம்பி⁴தா³, படிபா⁴னபடிஸம்பி⁴தா³. ஹேதும்ஹி ஞாணம் த⁴ம்மபடிஸம்பி⁴தா³, ஹேதுப²லே ஞாணம் அத்த²படிஸம்பி⁴தா³, தத்ர த⁴ம்மனிருத்தாபி⁴லாபே ஞாணம் நிருத்திபடிஸம்பி⁴தா³, ஞாணேஸு ஞாணம் படிபா⁴னபடிஸம்பி⁴தா³. அயம் ஹேதுவாரோ.

4. த⁴ம்மவாரோ

721. சதஸ்ஸோ படிஸம்பி⁴தா³ – அத்த²படிஸம்பி⁴தா³, த⁴ம்மபடிஸம்பி⁴தா³, நிருத்திபடிஸம்பி⁴தா³, படிபா⁴னபடிஸம்பி⁴தா³. யே த⁴ம்மா ஜாதா பூ⁴தா ஸஞ்ஜாதா நிப்³ப³த்தா அபி⁴னிப்³ப³த்தா பாதுபூ⁴தா, இமேஸு த⁴ம்மேஸு ஞாணம் அத்த²படிஸம்பி⁴தா³; யம்ஹா த⁴ம்மா தே த⁴ம்மா ஜாதா பூ⁴தா ஸஞ்ஜாதா நிப்³ப³த்தா அபி⁴னிப்³ப³த்தா பாதுபூ⁴தா, தேஸு த⁴ம்மேஸு ஞாணம் த⁴ம்மபடிஸம்பி⁴தா³; தத்ர த⁴ம்மனிருத்தாபி⁴லாபே ஞாணம் நிருத்திபடிஸம்பி⁴தா³; ஞாணேஸு ஞாணம் படிபா⁴னபடிஸம்பி⁴தா³. அயம் த⁴ம்மவாரோ.

5. படிச்சஸமுப்பாத³வாரோ

722. சதஸ்ஸோ படிஸம்பி⁴தா³ – அத்த²படிஸம்பி⁴தா³, த⁴ம்மபடிஸம்பி⁴தா³, நிருத்திபடிஸம்பி⁴தா³, படிபா⁴னபடிஸம்பி⁴தா³. ஜராமரணே ஞாணம் அத்த²படிஸம்பி⁴தா³, ஜராமரணஸமுத³யே ஞாணம் த⁴ம்மபடிஸம்பி⁴தா³, ஜராமரணனிரோதே⁴ ஞாணம் அத்த²படிஸம்பி⁴தா³, ஜராமரணனிரோத⁴கா³மினியா படிபதா³ய ஞாணம் த⁴ம்மபடிஸம்பி⁴தா³, தத்ர த⁴ம்மனிருத்தாபி⁴லாபே ஞாணம் நிருத்திபடிஸம்பி⁴தா³, ஞாணேஸு ஞாணம் படிபா⁴னபடிஸம்பி⁴தா³.

723. சதஸ்ஸோ படிஸம்பி⁴தா³ – அத்த²படிஸம்பி⁴தா³, த⁴ம்மபடிஸம்பி⁴தா³, நிருத்திபடிஸம்பி⁴தா³, படிபா⁴னபடிஸம்பி⁴தா³. ஜாதியா ஞாணம்…பே… ப⁴வே ஞாணம்…பே… உபாதா³னே ஞாணம்…பே… தண்ஹாய ஞாணம்…பே… வேத³னாய ஞாணம்…பே… ப²ஸ்ஸே ஞாணம்…பே… ஸளாயதனே ஞாணம்…பே… நாமரூபே ஞாணம்…பே… விஞ்ஞாணே ஞாணம்…பே… ஸங்கா²ரேஸு ஞாணம் அத்த²படிஸம்பி⁴தா³, ஸங்கா²ரஸமுத³யே ஞாணம் த⁴ம்மபடிஸம்பி⁴தா³, ஸங்கா²ரனிரோதே⁴ ஞாணம் அத்த²படிஸம்பி⁴தா³, ஸங்கா²ரனிரோத⁴கா³மினியா படிபதா³ய ஞாணம் த⁴ம்மபடிஸம்பி⁴தா³, தத்ர த⁴ம்மனிருத்தாபி⁴லாபே ஞாணம் நிருத்திபடிஸம்பி⁴தா³, ஞாணேஸு ஞாணம் படிபா⁴னபடிஸம்பி⁴தா³. அயம் படிச்சஸமுப்பாத³வாரோ.

6. பரியத்திவாரோ

724. சதஸ்ஸோ படிஸம்பி⁴தா³ – அத்த²படிஸம்பி⁴தா³, த⁴ம்மபடிஸம்பி⁴தா³, நிருத்திபடிஸம்பி⁴தா³, படிபா⁴னபடிஸம்பி⁴தா³.

தத்த² கதமா த⁴ம்மபடிஸம்பி⁴தா³? இத⁴ பி⁴க்கு² த⁴ம்மம் ஜானாதி – ஸுத்தம் கே³ய்யம் வேய்யாகரணம் கா³த²ம் உதா³னம் இதிவுத்தகம் ஜாதகம் அப்³பு⁴தத⁴ம்மம் வேத³ல்லம். அயம் வுச்சதி ‘‘த⁴ம்மபடிஸம்பி⁴தா³’’. ஸோ தஸ்ஸ தஸ்ஸேவ பா⁴ஸிதஸ்ஸ அத்த²ம் ஜானாதி – ‘‘அயம் இமஸ்ஸ பா⁴ஸிதஸ்ஸ அத்தோ², அயம் இமஸ்ஸ பா⁴ஸிதஸ்ஸ அத்தோ²’’தி. அயம் வுச்சதி ‘‘அத்த²படிஸம்பி⁴தா³’’. தத்ர த⁴ம்மனிருத்தாபி⁴லாபே ஞாணம் நிருத்திபடிஸம்பி⁴தா³. ஞாணேஸு ஞாணம் படிபா⁴னபடிஸம்பி⁴தா³. அயம் பரியத்திவாரோ.

ஸுத்தந்தபா⁴ஜனீயம்.