11. மக்³க³ங்க³விப⁴ங்கோ³

1. ஸுத்தந்தபா⁴ஜனீயம்

486. அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴.

487. தத்த² கதமா ஸம்மாதி³ட்டி²? து³க்கே² ஞாணம், து³க்க²ஸமுத³யே ஞாணம், து³க்க²னிரோதே⁴ ஞாணம், து³க்க²னிரோத⁴கா³மினியா படிபதா³ய ஞாணம் – அயம் வுச்சதி ‘‘ஸம்மாதி³ட்டி²’’.

தத்த² கதமோ ஸம்மாஸங்கப்போ? நேக்க²ம்மஸங்கப்போ, அப்³யாபாத³ஸங்கப்போ, அவிஹிம்ஸாஸங்கப்போ – அயம் வுச்சதி ‘‘ஸம்மாஸங்கப்போ’’.

தத்த² கதமா ஸம்மாவாசா? முஸாவாதா³ வேரமணீ, பிஸுணாய வாசாய வேரமணீ, ப²ருஸாய வாசாய வேரமணீ, ஸம்ப²ப்பலாபா வேரமணீ – அயம் வுச்சதி ‘‘ஸம்மாவாசா’’.

தத்த² கதமோ ஸம்மாகம்மந்தோ? பாணாதிபாதா வேரமணீ, அதி³ன்னாதா³னா வேரமணீ, காமேஸுமிச்சா²சாரா வேரமணீ – அயம் வுச்சதி ‘‘ஸம்மாகம்மந்தோ’’.

தத்த² கதமோ ஸம்மாஆஜீவோ? இத⁴ அரியஸாவகோ மிச்சா²ஆஜீவம் பஹாய ஸம்மாஆஜீவேன ஜீவிகம் கப்பேதி – அயம் வுச்சதி ‘‘ஸம்மாஆஜீவோ’’.

தத்த² கதமோ ஸம்மாவாயாமோ? இத⁴ பி⁴க்கு² அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி, உப்பன்னானம் பாபகானம் அகுஸலானம் த⁴ம்மானம் பஹானாய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி, அனுப்பன்னானம் குஸலானம் த⁴ம்மானம் உப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி, உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி – அயம் வுச்சதி ‘‘ஸம்மாவாயாமோ’’.

தத்த² கதமா ஸம்மாஸதி? இத⁴ பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம், வேத³னாஸு வேத³னானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம், சித்தே சித்தானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம், த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம் – அயம் வுச்சதி ‘‘ஸம்மாஸதி’’.

தத்த² கதமோ ஸம்மாஸமாதி⁴? இத⁴ பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி; விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரதி; பீதியா ச விராகா³ உபேக்க²கோ ச விஹரதி ஸதோ ச ஸம்பஜானோ ஸுக²ஞ்ச காயேன படிஸம்வேதே³தி, யம் தம் அரியா ஆசிக்க²ந்தி ‘‘உபேக்க²கோ ஸதிமா ஸுக²விஹாரீ’’தி ததியம் ஜா²னம் உபஸம்பஜ்ஜ விஹரதி; ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி – அயம் வுச்சதி ‘‘ஸம்மாஸமாதி⁴’’.

488. அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴.

489. தத்த² கதமா ஸம்மாதி³ட்டி²? இத⁴ பி⁴க்கு² ஸம்மாதி³ட்டி²ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம், ஸம்மாஸங்கப்பம் பா⁴வேதி…பே… ஸம்மாவாசம் பா⁴வேதி…பே… ஸம்மாகம்மந்தம் பா⁴வேதி…பே… ஸம்மாஆஜீவம் பா⁴வேதி…பே… ஸம்மாவாயாமம் பா⁴வேதி…பே… ஸம்மாஸதிம் பா⁴வேதி…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்.

ஸுத்தந்தபா⁴ஜனீயம்.

2. அபி⁴த⁴ம்மபா⁴ஜனீயம்

490. அட்ட²ங்கி³கோ மக்³கோ³ – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴.

491. தத்த² கதமோ அட்ட²ங்கி³கோ மக்³கோ³? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், தஸ்மிம் ஸமயே அட்ட²ங்கி³கோ மக்³கோ³ ஹோதி – ஸம்மாதி³ட்டி²…பே… ஸம்மாஸமாதி⁴.

492. தத்த² கதமா ஸம்மாதி³ட்டி²? யா பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி² த⁴ம்மவிசயஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாதி³ட்டி²’’.

தத்த² கதமோ ஸம்மாஸங்கப்போ? யோ தக்கோ விதக்கோ ஸங்கப்போ அப்பனா ப்³யப்பனா சேதஸோ அபி⁴னிரோபனா ஸம்மாஸங்கப்போ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாஸங்கப்போ’’.

தத்த² கதமா ஸம்மாவாசா? யா சதூஹி வசீது³ச்சரிதேஹி ஆரதி விரதி படிவிரதி வேரமணீ அகிரியா அகரணம் அனஜ்ஜா²பத்தி வேலாஅனதிக்கமோ ஸேதுகா⁴தோ ஸம்மாவாசா மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாவாசா’’.

தத்த² கதமோ ஸம்மாகம்மந்தோ? யா தீஹி காயது³ச்சரிதேஹி ஆரதி விரதி படிவிரதி வேரமணீ அகிரியா அகரணம் அனஜ்ஜா²பத்தி வேலாஅனதிக்கமோ ஸேதுகா⁴தோ ஸம்மாகம்மந்தோ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாகம்மந்தோ’’.

தத்த² கதமோ ஸம்மாஆஜீவோ? யா மிச்சா²ஆஜீவா ஆரதி விரதி படிவிரதி வேரமணீ அகிரியா அகரணம் அனஜ்ஜா²பத்தி வேலாஅனதிக்கமோ ஸேதுகா⁴தோ ஸம்மாஆஜீவோ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாஆஜீவோ’’.

தத்த² கதமோ ஸம்மாவாயாமோ? யோ சேதஸிகோ வீரியாரம்போ⁴…பே… ஸம்மாவாயாமோ வீரியஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாவாயாமோ’’.

தத்த² கதமா ஸம்மாஸதி? யா ஸதி அனுஸ்ஸதி…பே… ஸம்மாஸதி ஸதிஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாஸதி’’.

தத்த² கதமோ ஸம்மாஸமாதி⁴? யா சித்தஸ்ஸ டி²தி…பே… ஸம்மாஸமாதி⁴ ஸமாதி⁴ஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாஸமாதி⁴’’. அயம் வுச்சதி ‘‘அட்ட²ங்கி³கோ மக்³கோ³’’. அவஸேஸா த⁴ம்மா அட்ட²ங்கி³கேன மக்³கே³ன ஸம்பயுத்தா.

493. பஞ்சங்கி³கோ மக்³கோ³ – ஸம்மாதி³ட்டி², ஸம்மாஸங்கப்போ, ஸம்மாவாயாமோ, ஸம்மாஸதி, ஸம்மாஸமாதி⁴.

494. தத்த² கதமோ பஞ்சங்கி³கோ மக்³கோ³? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், தஸ்மிம் ஸமயே பஞ்சங்கி³கோ மக்³கோ³ ஹோதி – ஸம்மாதி³ட்டி², ஸம்மாஸங்கப்போ, ஸம்மாவாயாமோ, ஸம்மாஸதி, ஸம்மாஸமாதி⁴.

495. தத்த² கதமா ஸம்மாதி³ட்டி²? யா பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி² த⁴ம்மவிசயஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாதி³ட்டி²’’.

தத்த² கதமோ ஸம்மாஸங்கப்போ? யோ தக்கோ விதக்கோ…பே… ஸம்மாஸங்கப்போ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாஸங்கப்போ’’.

தத்த² கதமோ ஸம்மாவாயாமோ? யோ சேதஸிகோ வீரியாரம்போ⁴…பே… ஸம்மாவாயாமோ வீரியஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாவாயாமோ’’.

தத்த² கதமா ஸம்மாஸதி? யா ஸதி அனுஸ்ஸதி…பே… ஸம்மாஸதி ஸதிஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாஸதி’’.

தத்த² கதமோ ஸம்மாஸமாதி⁴? யா சித்தஸ்ஸ டி²தி…பே… ஸம்மாஸமாதி⁴ ஸமாதி⁴ஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாஸமாதி⁴’’. அயம் வுச்சதி ‘‘பஞ்சங்கி³கோ மக்³கோ³’’. அவஸேஸா த⁴ம்மா பஞ்சங்கி³கேன மக்³கே³ன ஸம்பயுத்தா.

496. பஞ்சங்கி³கோ மக்³கோ³ – ஸம்மாதி³ட்டி², ஸம்மாஸங்கப்போ, ஸம்மாவாயாமோ, ஸம்மாஸதி, ஸம்மாஸமாதி⁴.

497. தத்த² கதமா ஸம்மாதி³ட்டி²? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், யா தஸ்மிம் ஸமயே பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி² த⁴ம்மவிசயஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாதி³ட்டி²’’. அவஸேஸா த⁴ம்மா ஸம்மாதி³ட்டி²யா ஸம்பயுத்தா…பே… அவஸேஸா த⁴ம்மா ஸம்மாஸங்கப்பேன ஸம்பயுத்தா…பே… அவஸேஸா த⁴ம்மா ஸம்மாவாயாமேன ஸம்பயுத்தா…பே… அவஸேஸா த⁴ம்மா ஸம்மாஸதியா ஸம்பயுத்தா.

தத்த² கதமோ ஸம்மாஸமாதி⁴? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், யா தஸ்மிம் ஸமயே சித்தஸ்ஸ டி²தி…பே… ஸம்மாஸமாதி⁴ ஸமாதி⁴ஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாஸமாதி⁴’’. அவஸேஸா த⁴ம்மா ஸம்மாஸமாதி⁴னா ஸம்பயுத்தா.

498. அட்ட²ங்கி³கோ மக்³கோ³ – ஸம்மாதி³ட்டி²…பே… ஸம்மாஸமாதி⁴.

499. தத்த² கதமோ அட்ட²ங்கி³கோ மக்³கோ³? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், தஸ்மிம் ஸமயே ப²ஸ்ஸோ ஹோதி…பே… அவிக்கே²போ ஹோதி. இமே த⁴ம்மா குஸலா. தஸ்ஸேவ லோகுத்தரஸ்ஸ குஸலஸ்ஸ ஜா²னஸ்ஸ கதத்தா பா⁴விதத்தா விபாகம் விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம் ஸுஞ்ஞதம், தஸ்மிம் ஸமயே அட்ட²ங்கி³கோ மக்³கோ³ ஹோதி – ஸம்மாதி³ட்டி²…பே… ஸம்மாஸமாதி⁴. அயம் வுச்சதி ‘‘அட்ட²ங்கி³கோ மக்³கோ³’’. அவஸேஸா த⁴ம்மா அட்ட²ங்கி³கேன மக்³கே³ன ஸம்பயுத்தா.

500. பஞ்சங்கி³கோ மக்³கோ³ – ஸம்மாதி³ட்டி², ஸம்மாஸங்கப்போ, ஸம்மாவாயாமோ, ஸம்மாஸதி, ஸம்மாஸமாதி⁴.

501. தத்த² கதமோ பஞ்சங்கி³கோ மக்³கோ³? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், தஸ்மிம் ஸமயே ப²ஸ்ஸோ ஹோதி…பே… அவிக்கே²போ ஹோதி. இமே த⁴ம்மா குஸலா. தஸ்ஸேவ லோகுத்தரஸ்ஸ குஸலஸ்ஸ ஜா²னஸ்ஸ கதத்தா பா⁴விதத்தா விபாகம் விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம் ஸுஞ்ஞதம், தஸ்மிம் ஸமயே பஞ்சங்கி³கோ மக்³கோ³ ஹோதி – ஸம்மாதி³ட்டி², ஸம்மாஸங்கப்போ, ஸம்மாவாயாமோ, ஸம்மாஸதி, ஸம்மாஸமாதி⁴. அயம் வுச்சதி ‘‘பஞ்சங்கி³கோ மக்³கோ³’’. அவஸேஸா த⁴ம்மா பஞ்சங்கி³கேன மக்³கே³ன ஸம்பயுத்தா.

502. பஞ்சங்கி³கோ மக்³கோ³ – ஸம்மாதி³ட்டி², ஸம்மாஸங்கப்போ, ஸம்மாவாயாமோ, ஸம்மாஸதி, ஸம்மாஸமாதி⁴.

503. தத்த² கதமா ஸம்மாதி³ட்டி²? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், தஸ்மிம் ஸமயே ப²ஸ்ஸோ ஹோதி…பே… அவிக்கே²போ ஹோதி. இமே த⁴ம்மா குஸலா. தஸ்ஸேவ லோகுத்தரஸ்ஸ குஸலஸ்ஸ ஜா²னஸ்ஸ கதத்தா பா⁴விதத்தா விபாகம் விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம் ஸுஞ்ஞதம், யா தஸ்மிம் ஸமயே பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி² த⁴ம்மவிசயஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாதி³ட்டி²’’. அவஸேஸா த⁴ம்மா ஸம்மாதி³ட்டி²யா ஸம்பயுத்தா…பே… அவஸேஸா த⁴ம்மா ஸம்மாஸங்கப்பேன ஸம்பயுத்தா…பே… அவஸேஸா த⁴ம்மா ஸம்மாவாயாமேன ஸம்பயுத்தா…பே… அவஸேஸா த⁴ம்மா ஸம்மாஸதியா ஸம்பயுத்தா.

தத்த² கதமோ ஸம்மாஸமாதி⁴? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், தஸ்மிம் ஸமயே ப²ஸ்ஸோ ஹோதி…பே… அவிக்கே²போ ஹோதி. இமே த⁴ம்மா குஸலா. தஸ்ஸேவ லோகுத்தரஸ்ஸ குஸலஸ்ஸ ஜா²னஸ்ஸ கதத்தா பா⁴விதத்தா விபாகம் விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம் ஸுஞ்ஞதம், யா தஸ்மிம் ஸமயே சித்தஸ்ஸ டி²தி ஸண்டி²தி அவட்டி²தி அவிஸாஹாரோ அவிக்கே²போ அவிஸாஹடமானஸதா ஸமதோ² ஸமாதி⁴ந்த்³ரியம் ஸமாதி⁴ப³லம் ஸம்மாஸமாதி⁴ ஸமாதி⁴ஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாஸமாதி⁴’’. அவஸேஸா த⁴ம்மா ஸம்மாஸமாதி⁴னா ஸம்பயுத்தா.

அபி⁴த⁴ம்மபா⁴ஜனீயம்.

3. பஞ்ஹாபுச்ச²கம்

504. அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴.

505. அட்ட²ன்னம் மக்³க³ங்கா³னம் கதி குஸலா, கதி அகுஸலா, கதி அப்³யாகதா…பே… கதி ஸரணா, கதி அரணா?

1. திகம்

506. ஸியா குஸலா, ஸியா அப்³யாகதா. ஸம்மாஸங்கப்போ ஸுகா²ய வேத³னாய ஸம்பயுத்தோ; ஸத்த மக்³க³ங்கா³ ஸியா ஸுகா²ய வேத³னாய ஸம்பயுத்தா, ஸியா அது³க்க²மஸுகா²ய வேத³னாய ஸம்பயுத்தா. ஸியா விபாகா, ஸியா விபாகத⁴ம்மத⁴ம்மா. அனுபாதி³ன்னஅனுபாதா³னியா. அஸம்கிலிட்ட²அஸம்கிலேஸிகா. ஸம்மாஸங்கப்போ அவிதக்கவிசாரமத்தோ; ஸத்த மக்³க³ங்கா³ ஸியா ஸவிதக்கஸவிசாரா, ஸியா அவிதக்கவிசாரமத்தா, ஸியா அவிதக்கஅவிசாரா. ஸம்மாஸங்கப்போ பீதிஸஹக³தோ, ஸுக²ஸஹக³தோ, ந உபேக்கா²ஸஹக³தோ; ஸத்த மக்³க³ங்கா³ ஸியா பீதிஸஹக³தா, ஸியா ஸுக²ஸஹக³தா, ஸியா உபேக்கா²ஸஹக³தா. நேவ த³ஸ்ஸனேன ந பா⁴வனாய பஹாதப்³பா³. நேவ த³ஸ்ஸனேன ந பா⁴வனாய பஹாதப்³ப³ஹேதுகா. ஸியா அபசயகா³மினோ, ஸியா நேவாசயகா³மினாபசயகா³மினோ. ஸியா ஸேக்கா², ஸியா அஸேக்கா². அப்பமாணா. அப்பமாணாரம்மணா. பணீதா. ஸியா ஸம்மத்தனியதா, ஸியா அனியதா. ந மக்³கா³ரம்மணா, ஸியா மக்³க³ஹேதுகா, ஸியா மக்³கா³தி⁴பதினோ; ஸியா ந வத்தப்³பா³ மக்³க³ஹேதுகாதிபி, மக்³கா³தி⁴பதினோதிபி. ஸியா உப்பன்னா, ஸியா அனுப்பன்னா, ஸியா உப்பாதி³னோ. ஸியா அதீதா, ஸியா அனாக³தா, ஸியா பச்சுப்பன்னா. ந வத்தப்³பா³ அதீதாரம்மணாதிபி, அனாக³தாரம்மணாதிபி, பச்சுப்பன்னாரம்மணாதிபி. ஸியா அஜ்ஜ²த்தா, ஸியா ப³ஹித்³தா⁴, ஸியா அஜ்ஜ²த்தப³ஹித்³தா⁴. ப³ஹித்³தா⁴ரம்மணா. அனித³ஸ்ஸனஅப்படிகா⁴.

2. து³கம்

507. ஸம்மாதி³ட்டி² ஹேது, ஸத்த மக்³க³ங்கா³ ந ஹேதூ. ஸஹேதுகா. ஹேதுஸம்பயுத்தா. ஸம்மாதி³ட்டி² ஹேது சேவ ஸஹேதுகா ச, ஸத்த மக்³க³ங்கா³ ந வத்தப்³பா³ ஹேதூ சேவ ஸஹேதுகா சாதி, ஸஹேதுகா சேவ ந ச ஹேதூ. ஸம்மாதி³ட்டி² ஹேது சேவ ஹேதுஸம்பயுத்தா ச, ஸத்த மக்³க³ங்கா³ ந வத்தப்³பா³ ஹேதூ சேவ ஹேதுஸம்பயுத்தா சாதி, ஹேதுஸம்பயுத்தா சேவ ந ச ஹேதூ. ஸத்த மக்³க³ங்கா³ ந ஹேதூ ஸஹேதுகா, ஸம்மாதி³ட்டி² ந வத்தப்³பா³ ந ஹேது ஸஹேதுகாதிபி, ந ஹேது அஹேதுகாதிபி.

ஸப்பச்சயா. ஸங்க²தா. அனித³ஸ்ஸனா. அப்படிகா⁴. அரூபா. லோகுத்தரா. கேனசி விஞ்ஞேய்யா, கேனசி ந விஞ்ஞேய்யா.

நோ ஆஸவா. அனாஸவா. ஆஸவவிப்பயுத்தா. ந வத்தப்³பா³ ஆஸவா சேவ ஸாஸவா சாதிபி, ஸாஸவா சேவ நோ ச ஆஸவாதிபி. ந வத்தப்³பா³ ஆஸவா சேவ ஆஸவஸம்பயுத்தா சாதிபி, ஆஸவஸம்பயுத்தா சேவ நோ ச ஆஸவாதிபி. ஆஸவவிப்பயுத்தா. அனாஸவா.

நோ ஸம்யோஜனா…பே… நோ க³ந்தா²…பே… நோ ஓகா⁴…பே… நோ யோகா³…பே… நோ நீவரணா…பே… நோ பராமாஸா…பே… ஸாரம்மணா. நோ சித்தா. சேதஸிகா. சித்தஸம்பயுத்தா. சித்தஸம்ஸட்டா². சித்தஸமுட்டா²னா. சித்தஸஹபு⁴னோ. சித்தானுபரிவத்தினோ. சித்தஸம்ஸட்ட²ஸமுட்டா²னா. சித்தஸம்ஸட்ட²ஸமுட்டா²னஸஹபு⁴னோ. சித்தஸம்ஸட்ட²ஸமுட்டா²னானுபரிவத்தினோ. பா³ஹிரா. நோ உபாதா³. அனுபாதி³ன்னா.

நோ உபாதா³னா…பே… நோ கிலேஸா…பே… ந த³ஸ்ஸனேன பஹாதப்³பா³. ந பா⁴வனாய பஹாதப்³பா³. ந த³ஸ்ஸனேன பஹாதப்³ப³ஹேதுகா. ந பா⁴வனாய பஹாதப்³ப³ஹேதுகா. ஸம்மாஸங்கப்போ அவிதக்கோ, ஸத்த மக்³க³ங்கா³ ஸியா ஸவிதக்கா, ஸியா அவிதக்கா. ஸம்மாஸங்கப்போ ஸவிசாரோ, ஸத்த மக்³க³ங்கா³ ஸியா ஸவிசாரா, ஸியா அவிசாரா. ஸம்மாஸங்கப்போ ஸப்பீதிகோ, ஸத்த மக்³க³ங்கா³ ஸியா ஸப்பீதிகா, ஸியா அப்பீதிகா. ஸம்மாஸங்கப்போ பீதிஸஹக³தோ, ஸத்த மக்³க³ங்கா³ ஸியா பீதிஸஹக³தா, ஸியா ந பீதிஸஹக³தா. ஸம்மாஸங்கப்போ ஸுக²ஸஹக³தோ, ஸத்த மக்³க³ங்கா³ ஸியா ஸுக²ஸஹக³தா, ஸியா ந ஸுக²ஸஹக³தா. ஸம்மாஸங்கப்போ ந உபேக்கா²ஸஹக³தோ, ஸத்த மக்³க³ங்கா³ ஸியா உபேக்கா²ஸஹக³தா, ஸியா ந உபேக்கா²ஸஹக³தா. ந காமாவசரா. ந ரூபாவசரா. ந அரூபாவசரா. அபரியாபன்னா. ஸியா நிய்யானிகா, ஸியா அனிய்யானிகா. ஸியா நியதா, ஸியா அனியதா. அனுத்தரா. அரணாதி.

பஞ்ஹாபுச்ச²கம்.

மக்³க³ங்க³விப⁴ங்கோ³ நிட்டி²தோ.