1. ஸுத்தந்தபா⁴ஜனீயம்

466. ஸத்த போ³ஜ்ஜ²ங்கா³ – ஸதிஸம்போ³ஜ்ஜ²ங்கோ³, த⁴ம்மவிசயஸம்போ³ஜ்ஜ²ங்கோ³, வீரியஸம்போ³ஜ்ஜ²ங்கோ³, பீதிஸம்போ³ஜ்ஜ²ங்கோ³, பஸ்ஸத்³தி⁴ஸம்போ³ஜ்ஜ²ங்கோ³, ஸமாதி⁴ஸம்போ³ஜ்ஜ²ங்கோ³, உபேக்கா²ஸம்போ³ஜ்ஜ²ங்கோ³.

467. தத்த² கதமோ ஸதிஸம்போ³ஜ்ஜ²ங்கோ³? இத⁴ பி⁴க்கு² ஸதிமா ஹோதி பரமேன ஸதினேபக்கேன ஸமன்னாக³தோ, சிரகதம்பி சிரபா⁴ஸிதம்பி ஸரிதா ஹோதி அனுஸ்ஸரிதா – அயம் வுச்சதி ‘‘ஸதிஸம்போ³ஜ்ஜ²ங்கோ³’’.

ஸோ ததா² ஸதோ விஹரந்தோ தம் த⁴ம்மம் பஞ்ஞாய பவிசினதி பவிசரதி பரிவீமம்ஸமாபஜ்ஜதி – அயம் வுச்சதி ‘‘த⁴ம்மவிசயஸம்போ³ஜ்ஜ²ங்கோ³’’.

தஸ்ஸ தம் த⁴ம்மம் பஞ்ஞாய பவிசினதோ பவிசரதோ பரிவீமம்ஸமாபஜ்ஜதோ ஆரத்³த⁴ம் ஹோதி வீரியம் அஸல்லீனம் – அயம் வுச்சதி ‘‘வீரியஸம்போ³ஜ்ஜ²ங்கோ³’’.

ஆரத்³த⁴வீரியஸ்ஸ உப்பஜ்ஜதி பீதி நிராமிஸா – அயம் வுச்சதி ‘‘பீதிஸம்போ³ஜ்ஜ²ங்கோ³’’.

பீதிமனஸ்ஸ காயோபி பஸ்ஸம்ப⁴தி, சித்தம்பி பஸ்ஸம்ப⁴தி – அயம் வுச்சதி ‘‘பஸ்ஸத்³தி⁴ஸம்போ³ஜ்ஜ²ங்கோ³’’.

பஸ்ஸத்³த⁴காயஸ்ஸ ஸுகி²னோ சித்தம் ஸமாதி⁴யதி – அயம் வுச்சதி ‘‘ஸமாதி⁴ஸம்போ³ஜ்ஜ²ங்கோ³’’.

ஸோ ததா² ஸமாஹிதம் சித்தம் ஸாது⁴கம் அஜ்ஜு²பேக்கி²தா ஹோதி – அயம் வுச்சதி ‘‘உபேக்கா²ஸம்போ³ஜ்ஜ²ங்கோ³’’.

468. ஸத்த போ³ஜ்ஜ²ங்கா³ – ஸதிஸம்போ³ஜ்ஜ²ங்கோ³, த⁴ம்மவிசயஸம்போ³ஜ்ஜ²ங்கோ³, வீரியஸம்போ³ஜ்ஜ²ங்கோ³, பீதிஸம்போ³ஜ்ஜ²ங்கோ³, பஸ்ஸத்³தி⁴ஸம்போ³ஜ்ஜ²ங்கோ³, ஸமாதி⁴ஸம்போ³ஜ்ஜ²ங்கோ³, உபேக்கா²ஸம்போ³ஜ்ஜ²ங்கோ³.

469. தத்த² கதமோ ஸதிஸம்போ³ஜ்ஜ²ங்கோ³? அத்தி² அஜ்ஜ²த்தம் த⁴ம்மேஸு ஸதி, அத்தி² ப³ஹித்³தா⁴ த⁴ம்மேஸு ஸதி. யத³பி அஜ்ஜ²த்தம் த⁴ம்மேஸு ஸதி தத³பி ஸதிஸம்போ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி. யத³பி ப³ஹித்³தா⁴ த⁴ம்மேஸு ஸதி தத³பி ஸதிஸம்போ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி.

தத்த² கதமோ த⁴ம்மவிசயஸம்போ³ஜ்ஜ²ங்கோ³? அத்தி² அஜ்ஜ²த்தம் த⁴ம்மேஸு பவிசயோ, அத்தி² ப³ஹித்³தா⁴ த⁴ம்மேஸு பவிசயோ. யத³பி அஜ்ஜ²த்தம் த⁴ம்மேஸு பவிசயோ தத³பி த⁴ம்மவிசயஸம்போ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி. யத³பி ப³ஹித்³தா⁴ த⁴ம்மேஸு பவிசயோ தத³பி த⁴ம்மவிசயஸம்போ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி.

தத்த² கதமோ வீரியஸம்போ³ஜ்ஜ²ங்கோ³? அத்தி² காயிகம் வீரியம், அத்தி² சேதஸிகம் வீரியம். யத³பி காயிகம் வீரியம் தத³பி வீரியஸம்போ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி. யத³பி சேதஸிகம் வீரியம் தத³பி வீரியஸம்போ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி.

தத்த² கதமோ பீதிஸம்போ³ஜ்ஜ²ங்கோ³? அத்தி² ஸவிதக்கஸவிசாரா பீதி, அத்தி² அவிதக்கஅவிசாரா பீதி. யத³பி ஸவிதக்கஸவிசாரா பீதி தத³பி பீதிஸம்போ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி. யத³பி அவிதக்கஅவிசாரா பீதி தத³பி பீதிஸம்போ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி.

தத்த² கதமோ பஸ்ஸத்³தி⁴ஸம்போ³ஜ்ஜ²ங்கோ³? அத்தி² காயபஸ்ஸத்³தி⁴ [காயப்பஸ்ஸத்³தி⁴ (ஸ்யா. க.)], அத்தி² சித்தபஸ்ஸத்³தி⁴ [சித்தப்பஸ்ஸத்³தி⁴ (ஸ்யா. க.)]. யத³பி காயபஸ்ஸத்³தி⁴ தத³பி பஸ்ஸத்³தி⁴ஸம்போ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி. யத³பி சித்தபஸ்ஸத்³தி⁴ தத³பி பஸ்ஸத்³தி⁴ஸம்போ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி.

தத்த² கதமோ ஸமாதி⁴ஸம்போ³ஜ்ஜ²ங்கோ³? அத்தி² ஸவிதக்கோ ஸவிசாரோ ஸமாதி⁴, அத்தி² அவிதக்கோ அவிசாரோ ஸமாதி⁴. யத³பி ஸவிதக்கோ ஸவிசாரோ ஸமாதி⁴ தத³பி ஸமாதி⁴ஸம்போ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி. யத³பி அவிதக்கோ அவிசாரோ ஸமாதி⁴ தத³பி ஸமாதி⁴ஸம்போ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி.

தத்த² கதமோ உபேக்கா²ஸம்போ³ஜ்ஜ²ங்கோ³? அத்தி² அஜ்ஜ²த்தம் த⁴ம்மேஸு உபேக்கா², அத்தி² ப³ஹித்³தா⁴ த⁴ம்மேஸு உபேக்கா². யத³பி அஜ்ஜ²த்தம் த⁴ம்மேஸு உபேக்கா² தத³பி உபேக்கா²ஸம்போ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி. யத³பி ப³ஹித்³தா⁴ த⁴ம்மேஸு உபேக்கா² தத³பி உபேக்கா²ஸம்போ³ஜ்ஜ²ங்கோ³ அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி.

470. ஸத்த போ³ஜ்ஜ²ங்கா³ – ஸதிஸம்போ³ஜ்ஜ²ங்கோ³, த⁴ம்மவிசயஸம்போ³ஜ்ஜ²ங்கோ³, வீரியஸம்போ³ஜ்ஜ²ங்கோ³, பீதிஸம்போ³ஜ்ஜ²ங்கோ³, பஸ்ஸத்³தி⁴ஸம்போ³ஜ்ஜ²ங்கோ³, ஸமாதி⁴ஸம்போ³ஜ்ஜ²ங்கோ³, உபேக்கா²ஸம்போ³ஜ்ஜ²ங்கோ³.

471. தத்த² கதமோ ஸதிஸம்போ³ஜ்ஜ²ங்கோ³? இத⁴ பி⁴க்கு² ஸதிஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம், த⁴ம்மவிசயஸம்போ³ஜ்ஜ²ங்க³ம் பா⁴வேதி…பே… வீரியஸம்போ³ஜ்ஜ²ங்க³ம் பா⁴வேதி… பீதிஸம்போ³ஜ்ஜ²ங்க³ம் பா⁴வேதி… பஸ்ஸத்³தி⁴ஸம்போ³ஜ்ஜ²ங்க³ம் பா⁴வேதி… ஸமாதி⁴ஸம்போ³ஜ்ஜ²ங்க³ம் பா⁴வேதி… உபேக்கா²ஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்.

ஸுத்தந்தபா⁴ஜனீயம்.