1. திகம்

152. ரூபக்க²ந்தோ⁴ அப்³யாகதோ. சத்தாரோ க²ந்தா⁴ ஸியா குஸலா, ஸியா அகுஸலா, ஸியா அப்³யாகதா. த்³வே க²ந்தா⁴ ந வத்தப்³பா³ – ‘‘ஸுகா²ய வேத³னாய ஸம்பயுத்தா’’திபி, ‘‘து³க்கா²ய வேத³னாய ஸம்பயுத்தா’’திபி, ‘‘அது³க்க²மஸுகா²ய வேத³னாய ஸம்பயுத்தா’’திபி. தயோ க²ந்தா⁴ ஸியா ஸுகா²ய வேத³னாய ஸம்பயுத்தா, ஸியா து³க்கா²ய வேத³னாய ஸம்பயுத்தா, ஸியா அது³க்க²மஸுகா²ய வேத³னாய ஸம்பயுத்தா. ரூபக்க²ந்தோ⁴ நேவவிபாகனவிபாகத⁴ம்மத⁴ம்மோ. சத்தாரோ க²ந்தா⁴ ஸியா விபாகா, ஸியா விபாகத⁴ம்மத⁴ம்மா, ஸியா நேவவிபாகனவிபாகத⁴ம்மத⁴ம்மா. ரூபக்க²ந்தோ⁴ ஸியா உபாதி³ன்னுபாதா³னியோ, ஸியா அனுபாதி³ன்னுபாதா³னியோ. சத்தாரோ க²ந்தா⁴ ஸியா உபாதி³ன்னுபாதா³னியா, ஸியா அனுபாதி³ன்னுபாதா³னியா, ஸியா அனுபாதி³ன்னஅனுபாதா³னியா.

ரூபக்க²ந்தோ⁴ அஸம்கிலிட்ட²ஸம்கிலேஸிகோ. சத்தாரோ க²ந்தா⁴ ஸியா ஸம்கிலிட்ட²ஸம்கிலேஸிகா, ஸியா அஸம்கிலிட்ட²ஸம்கிலேஸிகா, ஸியா அஸம்கிலிட்ட²அஸம்கிலேஸிகா. ரூபக்க²ந்தோ⁴ அவிதக்கஅவிசாரோ. தயோ க²ந்தா⁴ ஸியா ஸவிதக்கஸவிசாரா, ஸியா அவிதக்கவிசாரமத்தா, ஸியா அவிதக்கஅவிசாரா. ஸங்கா²ரக்க²ந்தோ⁴ ஸியா ஸவிதக்கஸவிசாரோ, ஸியா அவிதக்கவிசாரமத்தோ, ஸியா அவிதக்கஅவிசாரோ, ஸியா ந வத்தப்³போ³ – ‘‘ஸவிதக்கஸவிசாரோ’’திபி, ‘‘அவிதக்கவிசாரமத்தோ’’திபி, ‘‘அவிதக்கஅவிசாரோ’’திபி. ரூபக்க²ந்தோ⁴ ந வத்தப்³போ³ – ‘‘பீதிஸஹக³தோ’’திபி, ‘‘ஸுக²ஸஹக³தோ’’திபி, ‘‘உபேக்கா²ஸஹக³தோ’’திபி. வேத³னாக்க²ந்தோ⁴ ஸியா பீதிஸஹக³தோ ந ஸுக²ஸஹக³தோ ந உபேக்கா²ஸஹக³தோ, ஸியா ந வத்தப்³போ³ – ‘‘பீதிஸஹக³தோ’’தி. தயோ க²ந்தா⁴ ஸியா பீதிஸஹக³தா, ஸியா ஸுக²ஸஹக³தா, ஸியா உபேக்கா²ஸஹக³தா, ஸியா ந வத்தப்³பா³ – ‘‘பீதிஸஹக³தா’’திபி, ‘‘ஸுக²ஸஹக³தா’’திபி, ‘‘உபேக்கா²ஸஹக³தா’’திபி.

ரூபக்க²ந்தோ⁴ நேவ த³ஸ்ஸனேன ந பா⁴வனாய பஹாதப்³போ³. சத்தாரோ க²ந்தா⁴ ஸியா த³ஸ்ஸனேன பஹாதப்³பா³, ஸியா பா⁴வனாய பஹாதப்³பா³, ஸியா நேவ த³ஸ்ஸனேன ந பா⁴வனாய பஹாதப்³பா³. ரூபக்க²ந்தோ⁴ நேவ த³ஸ்ஸனேன ந பா⁴வனாய பஹாதப்³ப³ஹேதுகோ. சத்தாரோ க²ந்தா⁴ ஸியா த³ஸ்ஸனேன பஹாதப்³ப³ஹேதுகா, ஸியா பா⁴வனாய பஹாதப்³ப³ஹேதுகா, ஸியா நேவ த³ஸ்ஸனேன ந பா⁴வனாய பஹாதப்³ப³ஹேதுகா. ரூபக்க²ந்தோ⁴ நேவாசயகா³மினாபசயகா³மீ. சத்தாரோ க²ந்தா⁴ ஸியா ஆசயகா³மினோ, ஸியா அபசயகா³மினோ, ஸியா நேவாசயகா³மினாபசயகா³மினோ. ரூபக்க²ந்தோ⁴ நேவஸேக்க²னாஸேக்கோ². சத்தாரோ க²ந்தா⁴ ஸியா ஸேக்கா², ஸியா அஸேக்கா², ஸியா நேவஸேக்க²னாஸேக்கா². ரூபக்க²ந்தோ⁴ பரித்தோ. சத்தாரோ க²ந்தா⁴ ஸியா பரித்தா, ஸியா மஹக்³க³தா, ஸியா அப்பமாணா. ரூபக்க²ந்தோ⁴ அனாரம்மணோ. சத்தாரோ க²ந்தா⁴ ஸியா பரித்தாரம்மணா, ஸியா மஹக்³க³தாரம்மணா, ஸியா அப்பமாணாரம்மணா, ஸியா ந வத்தப்³பா³ – ‘‘பரித்தாரம்மணா’’திபி, ‘‘மஹக்³க³தாரம்மணா’’திபி, ‘‘அப்பமாணாரம்மணா’’திபி. ரூபக்க²ந்தோ⁴ மஜ்ஜி²மோ. சத்தாரோ க²ந்தா⁴ ஸியா ஹீனா, ஸியா மஜ்ஜி²மா, ஸியா பணீதா. ரூபக்க²ந்தோ⁴ அனியதோ. சத்தாரோ க²ந்தா⁴ ஸியா மிச்ச²த்தனியதா, ஸியா ஸம்மத்தனியதா, ஸியா அனியதா.

ரூபக்க²ந்தோ⁴ அனாரம்மணோ. சத்தாரோ க²ந்தா⁴ ஸியா மக்³கா³ரம்மணா, ஸியா மக்³க³ஹேதுகா, ஸியா மக்³கா³தி⁴பதினோ, ஸியா ந வத்தப்³பா³ – ‘‘மக்³கா³ரம்மணா’’திபி, ‘‘மக்³க³ஹேதுகா’’திபி, ‘‘மக்³கா³தி⁴பதினோ’’திபி; ஸியா உப்பன்னா, ஸியா அனுப்பன்னா, ஸியா உப்பாதி³னோ; ஸியா அதீதா, ஸியா அனாக³தா, ஸியா பச்சுப்பன்னா. ரூபக்க²ந்தோ⁴ அனாரம்மணோ. சத்தாரோ க²ந்தா⁴ ஸியா அதீதாரம்மணா, ஸியா அனாக³தாரம்மணா, ஸியா பச்சுப்பன்னாரம்மணா, ஸியா ந வத்தப்³பா³ – ‘‘அதீதாரம்மணா’’திபி, ‘‘அனாக³தாரம்மணா’’திபி, ‘‘பச்சுப்பன்னாரம்மணா’’திபி; ஸியா அஜ்ஜ²த்தா, ஸியா ப³ஹித்³தா⁴, ஸியா அஜ்ஜ²த்தப³ஹித்³தா⁴. ரூபக்க²ந்தோ⁴ அனாரம்மணோ. சத்தாரோ க²ந்தா⁴ ஸியா அஜ்ஜ²த்தாரம்மணா, ஸியா ப³ஹித்³தா⁴ரம்மணா, ஸியா அஜ்ஜ²த்தப³ஹித்³தா⁴ரம்மணா, ஸியா ந வத்தப்³பா³ – ‘‘அஜ்ஜ²த்தாரம்மணா’’திபி, ‘‘ப³ஹித்³தா⁴ரம்மணா’’திபி, ‘‘அஜ்ஜ²த்தப³ஹித்³தா⁴ரம்மணா’’திபி. சத்தாரோ க²ந்தா⁴ அனித³ஸ்ஸனஅப்படிகா⁴. ரூபக்க²ந்தோ⁴ ஸியா ஸனித³ஸ்ஸனஸப்படிகோ⁴, ஸியா அனித³ஸ்ஸனஸப்படிகோ⁴, ஸியா அனித³ஸ்ஸனஅப்படிகோ⁴.