1. ஸுத்தந்தபா⁴ஜனீயம்

1. பஞ்சக்க²ந்தா⁴ – ரூபக்க²ந்தோ⁴, வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴, விஞ்ஞாணக்க²ந்தோ⁴.

1. ரூபக்க²ந்தோ⁴

2. தத்த² கதமோ ரூபக்க²ந்தோ⁴? யம் கிஞ்சி ரூபம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா – அயம் வுச்சதி ரூபக்க²ந்தோ⁴.

3. தத்த² கதமம் ரூபம் அதீதம்? யம் ரூபம் அதீதம் நிருத்³த⁴ம் விக³தம் விபரிணதம் அத்த²ங்க³தம் அப்³ப⁴த்த²ங்க³தம் உப்பஜ்ஜித்வா விக³தம் அதீதம் அதீதம்ஸேன ஸங்க³ஹிதம், சத்தாரோ ச மஹாபூ⁴தா சதுன்னஞ்ச மஹாபூ⁴தானம் உபாதா³யரூபம் – இத³ம் வுச்சதி ரூபம் அதீதம்.

தத்த² கதமம் ரூபம் அனாக³தம்? யம் ரூபம் அஜாதம் அபூ⁴தம் அஸஞ்ஜாதம் அனிப்³ப³த்தம் அனபி⁴னிப்³ப³த்தம் அபாதுபூ⁴தம் அனுப்பன்னம் அஸமுப்பன்னம் அனுட்டி²தம் அஸமுட்டி²தம் அனாக³தம் அனாக³தம்ஸேன ஸங்க³ஹிதம், சத்தாரோ ச மஹாபூ⁴தா சதுன்னஞ்ச மஹாபூ⁴தானம் உபாதா³யரூபம் – இத³ம் வுச்சதி ரூபம் அனாக³தம்.

தத்த² கதமம் ரூபம் பச்சுப்பன்னம்? யம் ரூபம் ஜாதம் பூ⁴தம் ஸஞ்ஜாதம் நிப்³ப³த்தம் அபி⁴னிப்³ப³த்தம் பாதுபூ⁴தம் உப்பன்னம் ஸமுப்பன்னம் உட்டி²தம் ஸமுட்டி²தம் பச்சுப்பன்னம் பச்சுப்பன்னம்ஸேன ஸங்க³ஹிதம், சத்தாரோ ச மஹாபூ⁴தா சதுன்னஞ்ச மஹாபூ⁴தானம் உபாதா³யரூபம் – இத³ம் வுச்சதி ரூபம் பச்சுப்பன்னம்.

4. தத்த² கதமம் ரூபம் அஜ்ஜ²த்தம்? யம் ரூபம் தேஸம் தேஸம் ஸத்தானம் அஜ்ஜ²த்தம் பச்சத்தம் நியகம் பாடிபுக்³க³லிகம் உபாதி³ன்னம், சத்தாரோ ச மஹாபூ⁴தா சதுன்னஞ்ச மஹாபூ⁴தானம் உபாதா³யரூபம் – இத³ம் வுச்சதி ரூபம் அஜ்ஜ²த்தம்.

தத்த² கதமம் ரூபம் ப³ஹித்³தா⁴? யம் ரூபம் தேஸம் தேஸம் பரஸத்தானம் பரபுக்³க³லானம் அஜ்ஜ²த்தம் பச்சத்தம் நியகம் பாடிபுக்³க³லிகம் உபாதி³ன்னம், சத்தாரோ ச மஹாபூ⁴தா சதுன்னஞ்ச மஹாபூ⁴தானம் உபாதா³யரூபம் – இத³ம் வுச்சதி ரூபம் ப³ஹித்³தா⁴.

5. தத்த² கதமம் ரூபம் ஓளாரிகம்? சக்கா²யதனம்…பே… போ²ட்ட²ப்³பா³யதனம் – இத³ம் வுச்சதி ரூபம் ஓளாரிகம்.

தத்த² கதமம் ரூபம் ஸுகு²மம்? இத்தி²ந்த்³ரியம்…பே… கப³ளீகாரோ [கப³ளிம்காரோ (ஸீ. ஸ்யா.)] ஆஹாரோ – இத³ம் வுச்சதி ரூபம் ஸுகு²மம்.

6. தத்த² கதமம் ரூபம் ஹீனம்? யம் ரூபம் தேஸம் தேஸம் ஸத்தானம் உஞ்ஞாதம் அவஞ்ஞாதம் ஹீளிதம் பரிபூ⁴தம் அசித்தீகதம் ஹீனம் ஹீனமதம் ஹீனஸம்மதம் அனிட்ட²ம் அகந்தம் அமனாபம், ரூபா ஸத்³தா³ க³ந்தா⁴ ரஸா போ²ட்ட²ப்³பா³ – இத³ம் வுச்சதி ரூபம் ஹீனம்.

தத்த² கதமம் ரூபம் பணீதம்? யம் ரூபம் தேஸம் தேஸம் ஸத்தானம் அனுஞ்ஞாதம் அனவஞ்ஞாதம் அஹீளிதம் அபரிபூ⁴தம் சித்தீகதம் பணீதம் பணீதமதம் பணீதஸம்மதம் இட்ட²ம் கந்தம் மனாபம், ரூபா ஸத்³தா³ க³ந்தா⁴ ரஸா போ²ட்ட²ப்³பா³ – இத³ம் வுச்சதி ரூபம் பணீதம். தம் தம் வா பன ரூபம் உபாதா³யுபாதா³ய ரூபம் ஹீனம் பணீதம் த³ட்ட²ப்³ப³ம்.

7. தத்த² கதமம் ரூபம் தூ³ரே? இத்தி²ந்த்³ரியம்…பே… கப³ளீகாரோ ஆஹாரோ, யம் வா பனஞ்ஞம்பி அத்தி² ரூபம் அனாஸன்னே அனுபகட்டே² தூ³ரே அஸந்திகே – இத³ம் வுச்சதி ரூபம் தூ³ரே.

தத்த² கதமம் ரூபம் ஸந்திகே? சக்கா²யதனம்…பே… போ²ட்ட²ப்³பா³யதனம், யம் வா பனஞ்ஞம்பி அத்தி² ரூபம் ஆஸன்னே உபகட்டே² அவிதூ³ரே ஸந்திகே – இத³ம் வுச்சதி ரூபம் ஸந்திகே. தம் தம் வா பன ரூபம் உபாதா³யுபாதா³ய ரூபம் தூ³ரே ஸந்திகே த³ட்ட²ப்³ப³ம்.

2. வேத³னாக்க²ந்தோ⁴

8. தத்த² கதமோ வேத³னாக்க²ந்தோ⁴? யா காசி வேத³னா அதீதானாக³தபச்சுப்பன்னா அஜ்ஜ²த்தா வா ப³ஹித்³தா⁴ வா ஓளாரிகா வா ஸுகு²மா வா ஹீனா வா பணீதா வா யா தூ³ரே ஸந்திகே வா, ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா – அயம் வுச்சதி வேத³னாக்க²ந்தோ⁴.

9. தத்த² கதமா வேத³னா அதீதா? யா வேத³னா அதீதா நிருத்³தா⁴ விக³தா விபரிணதா அத்த²ங்க³தா அப்³ப⁴த்த²ங்க³தா உப்பஜ்ஜித்வா விக³தா அதீதா அதீதம்ஸேன ஸங்க³ஹிதா, ஸுகா² வேத³னா து³க்கா² வேத³னா அது³க்க²மஸுகா² வேத³னா – அயம் வுச்சதி வேத³னா அதீதா.

தத்த² கதமா வேத³னா அனாக³தா? யா வேத³னா அஜாதா அபூ⁴தா அஸஞ்ஜாதா அனிப்³ப³த்தா அனபி⁴னிப்³ப³த்தா அபாதுபூ⁴தா அனுப்பன்னா அஸமுப்பன்னா அனுட்டி²தா அஸமுட்டி²தா அனாக³தா அனாக³தம்ஸேன ஸங்க³ஹிதா, ஸுகா² வேத³னா து³க்கா² வேத³னா அது³க்க²மஸுகா² வேத³னா – அயம் வுச்சதி வேத³னா அனாக³தா.

தத்த² கதமா வேத³னா பச்சுப்பன்னா? யா வேத³னா ஜாதா பூ⁴தா ஸஞ்ஜாதா நிப்³ப³த்தா அபி⁴னிப்³ப³த்தா பாதுபூ⁴தா உப்பன்னா ஸமுப்பன்னா உட்டி²தா ஸமுட்டி²தா பச்சுப்பன்னா பச்சுப்பன்னம்ஸேன ஸங்க³ஹிதா, ஸுகா² வேத³னா து³க்கா² வேத³னா அது³க்க²மஸுகா² வேத³னா – அயம் வுச்சதி வேத³னா பச்சுப்பன்னா.

10. தத்த² கதமா வேத³னா அஜ்ஜ²த்தா? யா வேத³னா தேஸம் தேஸம் ஸத்தானம் அஜ்ஜ²த்தம் பச்சத்தம் நியகா பாடிபுக்³க³லிகா உபாதி³ன்னா, ஸுகா² வேத³னா து³க்கா² வேத³னா அது³க்க²மஸுகா² வேத³னா – அயம் வுச்சதி வேத³னா அஜ்ஜ²த்தா.

தத்த² கதமா வேத³னா ப³ஹித்³தா⁴? யா வேத³னா தேஸம் தேஸம் பரஸத்தானம் பரபுக்³க³லானம் அஜ்ஜ²த்தம் பச்சத்தம் நியகா பாடிபுக்³க³லிகா உபாதி³ன்னா, ஸுகா² வேத³னா து³க்கா² வேத³னா அது³க்க²மஸுகா² வேத³னா – அயம் வுச்சதி வேத³னா ப³ஹித்³தா⁴.

11. தத்த² கதமா வேத³னா ஓளாரிகா ஸுகு²மா? அகுஸலா வேத³னா ஓளாரிகா, குஸலாப்³யாகதா வேத³னா ஸுகு²மா. குஸலாகுஸலா வேத³னா ஓளாரிகா, அப்³யாகதா வேத³னா ஸுகு²மா. து³க்கா² வேத³னா ஓளாரிகா, ஸுகா² ச அது³க்க²மஸுகா² ச வேத³னா ஸுகு²மா. ஸுக²து³க்கா² வேத³னா ஓளாரிகா, அது³க்க²மஸுகா² வேத³னா ஸுகு²மா. அஸமாபன்னஸ்ஸ வேத³னா ஓளாரிகா, ஸமாபன்னஸ்ஸ வேத³னா ஸுகு²மா. ஸாஸவா வேத³னா ஓளாரிகா, அனாஸவா வேத³னா ஸுகு²மா. தம் தம் வா பன வேத³னம் உபாதா³யுபாதா³ய வேத³னா ஓளாரிகா ஸுகு²மா த³ட்ட²ப்³பா³.

12. தத்த² கதமா வேத³னா ஹீனா பணீதா? அகுஸலா வேத³னா ஹீனா, குஸலாப்³யாகதா வேத³னா பணீதா. குஸலாகுஸலா வேத³னா ஹீனா, அப்³யாகதா வேத³னா பணீதா. து³க்கா² வேத³னா ஹீனா, ஸுகா² ச அது³க்க²மஸுகா² ச வேத³னா பணீதா. ஸுக²து³க்கா² வேத³னா ஹீனா, அது³க்க²மஸுகா² வேத³னா பணீதா. அஸமாபன்னஸ்ஸ வேத³னா ஹீனா, ஸமாபன்னஸ்ஸ வேத³னா பணீதா. ஸாஸவா வேத³னா ஹீனா, அனாஸவா வேத³னா பணீதா. தம் தம் வா பன வேத³னம் உபாதா³யுபாதா³ய வேத³னா ஹீனா பணீதா த³ட்ட²ப்³பா³.

13. தத்த² கதமா வேத³னா தூ³ரே? அகுஸலா வேத³னா குஸலாப்³யாகதாஹி வேத³னாஹி தூ³ரே; குஸலாப்³யாகதா வேத³னா அகுஸலாய வேத³னாய தூ³ரே; குஸலா வேத³னா அகுஸலாப்³யாகதாஹி வேத³னாஹி தூ³ரே; அகுஸலாப்³யாகதா வேத³னா குஸலாய வேத³னாய தூ³ரே; அப்³யாகதா வேத³னா குஸலாகுஸலாஹி வேத³னாஹி தூ³ரே; குஸலாகுஸலா வேத³னா அப்³யாகதாய வேத³னாய தூ³ரே. து³க்கா² வேத³னா ஸுகா²ய ச அது³க்க²மஸுகா²ய ச வேத³னாஹி தூ³ரே; ஸுகா² ச அது³க்க²மஸுகா² ச வேத³னா து³க்கா²ய வேத³னாய தூ³ரே; ஸுகா² வேத³னா து³க்கா²ய ச அது³க்க²மஸுகா²ய ச வேத³னாஹி தூ³ரே; து³க்கா² ச அது³க்க²மஸுகா² ச வேத³னா ஸுகா²ய வேத³னாய தூ³ரே; அது³க்க²மஸுகா² வேத³னா ஸுக²து³க்கா²ஹி வேத³னாஹி தூ³ரே; ஸுக²து³க்கா² வேத³னா அது³க்க²மஸுகா²ய வேத³னாய தூ³ரே. அஸமாபன்னஸ்ஸ வேத³னா ஸமாபன்னஸ்ஸ வேத³னாய தூ³ரே; ஸமாபன்னஸ்ஸ வேத³னா அஸமாபன்னஸ்ஸ வேத³னாய தூ³ரே. ஸாஸவா வேத³னா அனாஸவாய வேத³னாய தூ³ரே; அனாஸவா வேத³னா ஸாஸவாய வேத³னாய தூ³ரே – அயம் வுச்சதி வேத³னா தூ³ரே.

தத்த² கதமா வேத³னா ஸந்திகே? அகுஸலா வேத³னா அகுஸலாய வேத³னாய ஸந்திகே; குஸலா வேத³னா குஸலாய வேத³னாய ஸந்திகே; அப்³யாகதா வேத³னா அப்³யாகதாய வேத³னாய ஸந்திகே. து³க்கா² வேத³னா து³க்கா²ய வேத³னாய ஸந்திகே; ஸுகா² வேத³னா ஸுகா²ய வேத³னாய ஸந்திகே; அது³க்க²மஸுகா² வேத³னா அது³க்க²மஸுகா²ய வேத³னாய ஸந்திகே. அஸமாபன்னஸ்ஸ வேத³னா அஸமாபன்னஸ்ஸ வேத³னாய ஸந்திகே; ஸமாபன்னஸ்ஸ வேத³னா ஸமாபன்னஸ்ஸ வேத³னாய ஸந்திகே. ஸாஸவா வேத³னா ஸாஸவாய வேத³னாய ஸந்திகே; அனாஸவா வேத³னா அனாஸவாய வேத³னாய ஸந்திகே. அயம் வுச்சதி வேத³னா ஸந்திகே. தம் தம் வா பன வேத³னம் உபாதா³யுபாதா³ய வேத³னா தூ³ரே ஸந்திகே த³ட்ட²ப்³பா³.

3. ஸஞ்ஞாக்க²ந்தோ⁴

14. தத்த² கதமோ ஸஞ்ஞாக்க²ந்தோ⁴? யா காசி ஸஞ்ஞா அதீதானாக³தபச்சுப்பன்னா அஜ்ஜ²த்தா வா ப³ஹித்³தா⁴ வா ஓளாரிகா வா ஸுகு²மா வா ஹீனா வா பணீதா வா யா தூ³ரே ஸந்திகே வா ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா – அயம் வுச்சதி ஸஞ்ஞாக்க²ந்தோ⁴.

15. தத்த² கதமா ஸஞ்ஞா அதீதா? யா ஸஞ்ஞா அதீதா நிருத்³தா⁴ விக³தா விபரிணதா அத்த²ங்க³தா அப்³ப⁴த்த²ங்க³தா உப்பஜ்ஜித்வா விக³தா அதீதா அதீதம்ஸேன ஸங்க³ஹிதா, சக்கு²ஸம்ப²ஸ்ஸஜா ஸஞ்ஞா ஸோதஸம்ப²ஸ்ஸஜா ஸஞ்ஞா கா⁴னஸம்ப²ஸ்ஸஜா ஸஞ்ஞா ஜிவ்ஹாஸம்ப²ஸ்ஸஜா ஸஞ்ஞா காயஸம்ப²ஸ்ஸஜா ஸஞ்ஞா மனோஸம்ப²ஸ்ஸஜா ஸஞ்ஞா – அயம் வுச்சதி ஸஞ்ஞா அதீதா.

தத்த² கதமா ஸஞ்ஞா அனாக³தா? யா ஸஞ்ஞா அஜாதா அபூ⁴தா அஸஞ்ஜாதா அனிப்³ப³த்தா அனபி⁴னிப்³ப³த்தா அபாதுபூ⁴தா அனுப்பன்னா அஸமுப்பன்னா அனுட்டி²தா அஸமுட்டி²தா அனாக³தா அனாக³தம்ஸேன ஸங்க³ஹிதா, சக்கு²ஸம்ப²ஸ்ஸஜா ஸஞ்ஞா ஸோதஸம்ப²ஸ்ஸஜா ஸஞ்ஞா கா⁴னஸம்ப²ஸ்ஸஜா ஸஞ்ஞா ஜிவ்ஹாஸம்ப²ஸ்ஸஜா ஸஞ்ஞா காயஸம்ப²ஸ்ஸஜா ஸஞ்ஞா மனோஸம்ப²ஸ்ஸஜா ஸஞ்ஞா – அயம் வுச்சதி ஸஞ்ஞா அனாக³தா.

தத்த² கதமா ஸஞ்ஞா பச்சுப்பன்னா? யா ஸஞ்ஞா ஜாதா பூ⁴தா ஸஞ்ஜாதா நிப்³ப³த்தா அபி⁴னிப்³ப³த்தா பாதுபூ⁴தா உப்பன்னா ஸமுப்பன்னா உட்டி²தா ஸமுட்டி²தா பச்சுப்பன்னா பச்சுப்பன்னம்ஸேன ஸங்க³ஹிதா, சக்கு²ஸம்ப²ஸ்ஸஜா ஸஞ்ஞா ஸோதஸம்ப²ஸ்ஸஜா ஸஞ்ஞா கா⁴னஸம்ப²ஸ்ஸஜா ஸஞ்ஞா ஜிவ்ஹாஸம்ப²ஸ்ஸஜா ஸஞ்ஞா காயஸம்ப²ஸ்ஸஜா ஸஞ்ஞா மனோஸம்ப²ஸ்ஸஜா ஸஞ்ஞா – அயம் வுச்சதி ஸஞ்ஞா பச்சுப்பன்னா.

16. தத்த² கதமா ஸஞ்ஞா அஜ்ஜ²த்தா? யா ஸஞ்ஞா தேஸம் தேஸம் ஸத்தானம் அஜ்ஜ²த்தம் பச்சத்தம் நியகா பாடிபுக்³க³லிகா உபாதி³ன்னா, சக்கு²ஸம்ப²ஸ்ஸஜா ஸஞ்ஞா ஸோதஸம்ப²ஸ்ஸஜா ஸஞ்ஞா கா⁴னஸம்ப²ஸ்ஸஜா ஸஞ்ஞா ஜிவ்ஹாஸம்ப²ஸ்ஸஜா ஸஞ்ஞா காயஸம்ப²ஸ்ஸஜா ஸஞ்ஞா மனோஸம்ப²ஸ்ஸஜா ஸஞ்ஞா – அயம் வுச்சதி ஸஞ்ஞா அஜ்ஜ²த்தா.

தத்த² கதமா ஸஞ்ஞா ப³ஹித்³தா⁴? யா ஸஞ்ஞா தேஸம் தேஸம் பரஸத்தானம் பரபுக்³க³லானம் அஜ்ஜ²த்தம் பச்சத்தம் நியகா பாடிபுக்³க³லிகா உபாதி³ன்னா, சக்கு²ஸம்ப²ஸ்ஸஜா ஸஞ்ஞா ஸோதஸம்ப²ஸ்ஸஜா ஸஞ்ஞா கா⁴னஸம்ப²ஸ்ஸஜா ஸஞ்ஞா ஜிவ்ஹாஸம்ப²ஸ்ஸஜா ஸஞ்ஞா காயஸம்ப²ஸ்ஸஜா ஸஞ்ஞா மனோஸம்ப²ஸ்ஸஜா ஸஞ்ஞா – அயம் வுச்சதி ஸஞ்ஞா ப³ஹித்³தா⁴.

17. தத்த² கதமா ஸஞ்ஞா ஓளாரிகா ஸுகு²மா? படிக⁴ஸம்ப²ஸ்ஸஜா ஸஞ்ஞா ஓளாரிகா, அதி⁴வசனஸம்ப²ஸ்ஸஜா ஸஞ்ஞா ஸுகு²மா. அகுஸலா ஸஞ்ஞா ஓளாரிகா, குஸலாப்³யாகதா ஸஞ்ஞா ஸுகு²மா. குஸலாகுஸலா ஸஞ்ஞா ஓளாரிகா, அப்³யாகதா ஸஞ்ஞா ஸுகு²மா. து³க்கா²ய வேத³னாய ஸம்பயுத்தா ஸஞ்ஞா ஓளாரிகா, ஸுகா²ய ச அது³க்க²மஸுகா²ய ச வேத³னாஹி ஸம்பயுத்தா ஸஞ்ஞா ஸுகு²மா. ஸுக²து³க்கா²ஹி வேத³னாஹி ஸம்பயுத்தா ஸஞ்ஞா ஓளாரிகா, அது³க்க²மஸுகா²ய வேத³னாய ஸம்பயுத்தா ஸஞ்ஞா ஸுகு²மா. அஸமாபன்னஸ்ஸ ஸஞ்ஞா ஓளாரிகா, ஸமாபன்னஸ்ஸ ஸஞ்ஞா ஸுகு²மா. ஸாஸவா ஸஞ்ஞா ஓளாரிகா, அனாஸவா ஸஞ்ஞா ஸுகு²மா. தம் தம் வா பன ஸஞ்ஞம் உபாதா³யுபாதா³ய ஸஞ்ஞா ஓளாரிகா ஸுகு²மா த³ட்ட²ப்³பா³.

18. தத்த² கதமா ஸஞ்ஞா ஹீனா பணீதா? அகுஸலா ஸஞ்ஞா ஹீனா, குஸலாப்³யாகதா ஸஞ்ஞா பணீதா. குஸலாகுஸலா ஸஞ்ஞா ஹீனா, அப்³யாகதா ஸஞ்ஞா பணீதா. து³க்கா²ய வேத³னாய ஸம்பயுத்தா ஸஞ்ஞா ஹீனா, ஸுகா²ய ச அது³க்க²மஸுகா²ய ச வேத³னாஹி ஸம்பயுத்தா ஸஞ்ஞா பணீதா. ஸுக²து³க்கா²ஹி வேத³னாஹி ஸம்பயுத்தா ஸஞ்ஞா ஹீனா, அது³க்க²மஸுகா²ய வேத³னாய ஸம்பயுத்தா ஸஞ்ஞா பணீதா. அஸமாபன்னஸ்ஸ ஸஞ்ஞா ஹீனா, ஸமாபன்னஸ்ஸ ஸஞ்ஞா பணீதா. ஸாஸவா ஸஞ்ஞா ஹீனா, அனாஸவா ஸஞ்ஞா பணீதா. தம் தம் வா பன ஸஞ்ஞம் உபாதா³யுபாதா³ய ஸஞ்ஞா ஹீனா பணீதா த³ட்ட²ப்³பா³.

19. தத்த² கதமா ஸஞ்ஞா தூ³ரே? அகுஸலா ஸஞ்ஞா குஸலாப்³யாகதாஹி ஸஞ்ஞாஹி தூ³ரே; குஸலாப்³யாகதா ஸஞ்ஞா அகுஸலாய ஸஞ்ஞாய தூ³ரே; குஸலா ஸஞ்ஞா அகுஸலாப்³யாகதாஹி ஸஞ்ஞாஹி தூ³ரே; அகுஸலாப்³யாகதா ஸஞ்ஞா குஸலாய ஸஞ்ஞாய தூ³ரே. அப்³யாகதா ஸஞ்ஞா குஸலாகுஸலாஹி ஸஞ்ஞாஹி தூ³ரே; குஸலாகுஸலா ஸஞ்ஞா அப்³யாகதாய ஸஞ்ஞாய தூ³ரே. து³க்கா²ய வேத³னாய ஸம்பயுத்தா ஸஞ்ஞா ஸுகா²ய ச அது³க்க²மஸுகா²ய ச வேத³னாஹி ஸம்பயுத்தாஹி ஸஞ்ஞாஹி தூ³ரே; ஸுகா²ய ச அது³க்க²மஸுகா²ய ச வேத³னாஹி ஸம்பயுத்தா ஸஞ்ஞா து³க்கா²ய வேத³னாய ஸம்பயுத்தாய ஸஞ்ஞாய தூ³ரே; ஸுகா²ய வேத³னாய ஸம்பயுத்தா ஸஞ்ஞா து³க்கா²ய ச அது³க்க²மஸுகா²ய ச வேத³னாஹி ஸம்பயுத்தாஹி ஸஞ்ஞாஹி தூ³ரே; து³க்கா²ய ச அது³க்க²மஸுகா²ய ச வேத³னாஹி ஸம்பயுத்தா ஸஞ்ஞா ஸுகா²ய வேத³னாய ஸம்பயுத்தாய ஸஞ்ஞாய தூ³ரே; அது³க்க²மஸுகா²ய வேத³னாய ஸம்பயுத்தா ஸஞ்ஞா ஸுக²து³க்கா²ஹி வேத³னாஹி ஸம்பயுத்தாஹி ஸஞ்ஞாஹி தூ³ரே; ஸுக²து³க்கா²ஹி வேத³னாஹி ஸம்பயுத்தா ஸஞ்ஞா அது³க்க²மஸுகா²ய வேத³னாய ஸம்பயுத்தாய ஸஞ்ஞாய தூ³ரே. அஸமாபன்னஸ்ஸ ஸஞ்ஞா ஸமாபன்னஸ்ஸ ஸஞ்ஞாய தூ³ரே; ஸமாபன்னஸ்ஸ ஸஞ்ஞா அஸமாபன்னஸ்ஸ ஸஞ்ஞாய தூ³ரே. ஸாஸவா ஸஞ்ஞா அனாஸவாய ஸஞ்ஞாய தூ³ரே; அனாஸவா ஸஞ்ஞா ஸாஸவாய ஸஞ்ஞாய தூ³ரே – அயம் வுச்சதி ஸஞ்ஞா தூ³ரே.

தத்த² கதமா ஸஞ்ஞா ஸந்திகே? அகுஸலா ஸஞ்ஞா அகுஸலாய ஸஞ்ஞாய ஸந்திகே; குஸலா ஸஞ்ஞா குஸலாய ஸஞ்ஞாய ஸந்திகே; அப்³யாகதா ஸஞ்ஞா அப்³யாகதாய ஸஞ்ஞாய ஸந்திகே. து³க்கா²ய வேத³னாய ஸம்பயுத்தா ஸஞ்ஞா து³க்கா²ய வேத³னாய ஸம்பயுத்தாய ஸஞ்ஞாய ஸந்திகே; ஸுகா²ய வேத³னாய ஸம்பயுத்தா ஸஞ்ஞா ஸுகா²ய வேத³னாய ஸம்பயுத்தாய ஸஞ்ஞாய ஸந்திகே; அது³க்க²மஸுகா²ய வேத³னாய ஸம்பயுத்தா ஸஞ்ஞா அது³க்க²மஸுகா²ய வேத³னாய ஸம்பயுத்தாய ஸஞ்ஞாய ஸந்திகே. அஸமாபன்னஸ்ஸ ஸஞ்ஞா அஸமாபன்னஸ்ஸ ஸஞ்ஞாய ஸந்திகே; ஸமாபன்னஸ்ஸ ஸஞ்ஞா ஸமாபன்னஸ்ஸ ஸஞ்ஞாய ஸந்திகே. ஸாஸவா ஸஞ்ஞா ஸாஸவாய ஸஞ்ஞாய ஸந்திகே; அனாஸவா ஸஞ்ஞா அனாஸவாய ஸஞ்ஞாய ஸந்திகே. அயம் வுச்சதி ஸஞ்ஞா ஸந்திகே. தம் தம் வா பன ஸஞ்ஞம் உபாதா³யுபாதா³ய ஸஞ்ஞா தூ³ரே ஸந்திகே த³ட்ட²ப்³பா³.

4. ஸங்கா²ரக்க²ந்தோ⁴

20. தத்த² கதமோ ஸங்கா²ரக்க²ந்தோ⁴? யே கேசி ஸங்கா²ரா அதீதானாக³தபச்சுப்பன்னா அஜ்ஜ²த்தா வா ப³ஹித்³தா⁴ வா ஓளாரிகா வா ஸுகு²மா வா ஹீனா வா பணீதா வா யே தூ³ரே ஸந்திகே வா, ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா – அயம் வுச்சதி ஸங்கா²ரக்க²ந்தோ⁴.

21. தத்த² கதமே ஸங்கா²ரா அதீதா? யே ஸங்கா²ரா அதீதா நிருத்³தா⁴ விக³தா விபரிணதா அத்த²ங்க³தா அப்³ப⁴த்த²ங்க³தா உப்பஜ்ஜித்வா விக³தா அதீதா அதீதம்ஸேன ஸங்க³ஹிதா, சக்கு²ஸம்ப²ஸ்ஸஜா சேதனா ஸோதஸம்ப²ஸ்ஸஜா சேதனா கா⁴னஸம்ப²ஸ்ஸஜா சேதனா ஜிவ்ஹாஸம்ப²ஸ்ஸஜா சேதனா காயஸம்ப²ஸ்ஸஜா சேதனா மனோஸம்ப²ஸ்ஸஜா சேதனா – இமே வுச்சந்தி ஸங்கா²ரா அதீதா.

தத்த² கதமே ஸங்கா²ரா அனாக³தா? யே ஸங்கா²ரா அஜாதா அபூ⁴தா அஸஞ்ஜாதா அனிப்³ப³த்தா அனபி⁴னிப்³ப³த்தா அபாதுபூ⁴தா அனுப்பன்னா அஸமுப்பன்னா அனுட்டி²தா அஸமுட்டி²தா அனாக³தா அனாக³தம்ஸேன ஸங்க³ஹிதா, சக்கு²ஸம்ப²ஸ்ஸஜா சேதனா ஸோதஸம்ப²ஸ்ஸஜா சேதனா கா⁴னஸம்ப²ஸ்ஸஜா சேதனா ஜிவ்ஹாஸம்ப²ஸ்ஸஜா சேதனா காயஸம்ப²ஸ்ஸஜா சேதனா மனோஸம்ப²ஸ்ஸஜா சேதனா – இமே வுச்சந்தி ஸங்கா²ரா அனாக³தா.

தத்த² கதமே ஸங்கா²ரா பச்சுப்பன்னா? யே ஸங்கா²ரா ஜாதா பூ⁴தா ஸஞ்ஜாதா நிப்³ப³த்தா அபி⁴னிப்³ப³த்தா பாதுபூ⁴தா உப்பன்னா ஸமுப்பன்னா உட்டி²தா ஸமுட்டி²தா பச்சுப்பன்னா பச்சுப்பன்னம்ஸேன ஸங்க³ஹிதா, சக்கு²ஸம்ப²ஸ்ஸஜா சேதனா ஸோதஸம்ப²ஸ்ஸஜா சேதனா கா⁴னஸம்ப²ஸ்ஸஜா சேதனா ஜிவ்ஹாஸம்ப²ஸ்ஸஜா சேதனா காயஸம்ப²ஸ்ஸஜா சேதனா மனோஸம்ப²ஸ்ஸஜா சேதனா – இமே வுச்சந்தி ஸங்கா²ரா பச்சுப்பன்னா.

22. தத்த² கதமே ஸங்கா²ரா அஜ்ஜ²த்தா? யே ஸங்கா²ரா தேஸம் தேஸம் ஸத்தானம் அஜ்ஜ²த்தம் பச்சத்தம் நியகா பாடிபுக்³க³லிகா உபாதி³ன்னா, சக்கு²ஸம்ப²ஸ்ஸஜா சேதனா ஸோதஸம்ப²ஸ்ஸஜா சேதனா கா⁴னஸம்ப²ஸ்ஸஜா சேதனா ஜிவ்ஹாஸம்ப²ஸ்ஸஜா சேதனா காயஸம்ப²ஸ்ஸஜா சேதனா மனோஸம்ப²ஸ்ஸஜா சேதனா – இமே வுச்சந்தி ஸங்கா²ரா அஜ்ஜ²த்தா.

தத்த² கதமே ஸங்கா²ரா ப³ஹித்³தா⁴? யே ஸங்கா²ரா தேஸம் தேஸம் பரஸத்தானம் பரபுக்³க³லானம் அஜ்ஜ²த்தம் பச்சத்தம் நியகா பாடிபுக்³க³லிகா உபாதி³ன்னா, சக்கு²ஸம்ப²ஸ்ஸஜா சேதனா ஸோதஸம்ப²ஸ்ஸஜா சேதனா கா⁴னஸம்ப²ஸ்ஸஜா சேதனா ஜிவ்ஹாஸம்ப²ஸ்ஸஜா சேதனா காயஸம்ப²ஸ்ஸஜா சேதனா மனோஸம்ப²ஸ்ஸஜா சேதனா – இமே வுச்சந்தி ஸங்கா²ரா ப³ஹித்³தா⁴.

23. தத்த² கதமே ஸங்கா²ரா ஓளாரிகா ஸுகு²மா? அகுஸலா ஸங்கா²ரா ஓளாரிகா, குஸலாப்³யாகதா ஸங்கா²ரா ஸுகு²மா. குஸலாகுஸலா ஸங்கா²ரா ஓளாரிகா, அப்³யாகதா ஸங்கா²ரா ஸுகு²மா. து³க்கா²ய வேத³னாய ஸம்பயுத்தா ஸங்கா²ரா ஓளாரிகா, ஸுகா²ய ச அது³க்க²மஸுகா²ய ச வேத³னாஹி ஸம்பயுத்தா ஸங்கா²ரா ஸுகு²மா. ஸுக²து³க்கா²ஹி வேத³னாஹி ஸம்பயுத்தா ஸங்கா²ரா ஓளாரிகா, அது³க்க²மஸுகா²ய வேத³னாய ஸம்பயுத்தா ஸங்கா²ரா ஸுகு²மா. அஸமாபன்னஸ்ஸ ஸங்கா²ரா ஓளாரிகா, ஸமாபன்னஸ்ஸ ஸங்கா²ரா ஸுகு²மா. ஸாஸவா ஸங்கா²ரா ஓளாரிகா, அனாஸவா ஸங்கா²ரா ஸுகு²மா. தே தே வா பன ஸங்கா²ரே உபாதா³யுபாதா³ய ஸங்கா²ரா ஓளாரிகா ஸுகு²மா த³ட்ட²ப்³பா³.

24. தத்த² கதமே ஸங்கா²ரா ஹீனா பணீதா? அகுஸலா ஸங்கா²ரா ஹீனா, குஸலாப்³யாகதா ஸங்கா²ரா பணீதா. குஸலாகுஸலா ஸங்கா²ரா ஹீனா, அப்³யாகதா ஸங்கா²ரா பணீதா. து³க்கா²ய வேத³னாய ஸம்பயுத்தா ஸங்கா²ரா ஹீனா, ஸுகா²ய ச அது³க்க²மஸுகா²ய ச வேத³னாஹி ஸம்பயுத்தா ஸங்கா²ரா பணீதா. ஸுக²து³க்கா²ஹி வேத³னாஹி ஸம்பயுத்தா ஸங்கா²ரா ஹீனா, அது³க்க²மஸுகா²ய வேத³னாய ஸம்பயுத்தா ஸங்கா²ரா பணீதா. அஸமாபன்னஸ்ஸ ஸங்கா²ரா ஹீனா, ஸமாபன்னஸ்ஸ ஸங்கா²ரா பணீதா. ஸாஸவா ஸங்கா²ரா ஹீனா, அனாஸவா ஸங்கா²ரா பணீதா. தே தே வா பன ஸங்கா²ரே உபாதா³யுபாதா³ய ஸங்கா²ரா ஹீனா பணீதா த³ட்ட²ப்³பா³.

25. தத்த² கதமே ஸங்கா²ரா தூ³ரே? அகுஸலா ஸங்கா²ரா குஸலாப்³யாகதேஹி ஸங்கா²ரேஹி தூ³ரே; குஸலாப்³யாகதா ஸங்கா²ரா அகுஸலேஹி ஸங்கா²ரேஹி தூ³ரே; குஸலா ஸங்கா²ரா அகுஸலாப்³யாகதேஹி ஸங்கா²ரேஹி தூ³ரே; அகுஸலாப்³யாகதா ஸங்கா²ரா குஸலேஹி ஸங்கா²ரேஹி தூ³ரே; அப்³யாகதா ஸங்கா²ரா குஸலாகுஸலேஹி ஸங்கா²ரேஹி தூ³ரே; குஸலாகுஸலா ஸங்கா²ரா அப்³யாகதேஹி ஸங்கா²ரேஹி தூ³ரே. து³க்கா²ய வேத³னாய ஸம்பயுத்தா ஸங்கா²ரா ஸுகா²ய ச அது³க்க²மஸுகா²ய ச வேத³னாஹி ஸம்பயுத்தேஹி ஸங்கா²ரேஹி தூ³ரே; ஸுகா²ய ச அது³க்க²மஸுகா²ய ச வேத³னாஹி ஸம்பயுத்தா ஸங்கா²ரா து³க்கா²ய வேத³னாய ஸம்பயுத்தேஹி ஸங்கா²ரேஹி தூ³ரே; ஸுகா²ய வேத³னாய ஸம்பயுத்தா ஸங்கா²ரா து³க்கா²ய ச அது³க்க²மஸுகா²ய ச வேத³னாஹி ஸம்பயுத்தேஹி ஸங்கா²ரேஹி தூ³ரே; து³க்கா²ய ச அது³க்க²மஸுகா²ய ச வேத³னாஹி ஸம்பயுத்தா ஸங்கா²ரா ஸுகா²ய வேத³னாய ஸம்பயுத்தேஹி ஸங்கா²ரேஹி தூ³ரே; அது³க்க²மஸுகா²ய வேத³னாய ஸம்பயுத்தா ஸங்கா²ரா ஸுக²து³க்கா²ஹி வேத³னாஹி ஸம்பயுத்தேஹி ஸங்கா²ரேஹி தூ³ரே; ஸுக²து³க்கா²ஹி வேத³னாஹி ஸம்பயுத்தா ஸங்கா²ரா அது³க்க²மஸுகா²ய வேத³னாய ஸம்பயுத்தேஹி ஸங்கா²ரேஹி தூ³ரே. அஸமாபன்னஸ்ஸ ஸங்கா²ரா ஸமாபன்னஸ்ஸ ஸங்கா²ரேஹி தூ³ரே; ஸமாபன்னஸ்ஸ ஸங்கா²ரா அஸமாபன்னஸ்ஸ ஸங்கா²ரேஹி தூ³ரே. ஸாஸவா ஸங்கா²ரா அனாஸவேஹி ஸங்கா²ரேஹி தூ³ரே; அனாஸவா ஸங்கா²ரா ஸாஸவேஹி ஸங்கா²ரேஹி தூ³ரே. இமே வுச்சந்தி ஸங்கா²ரா தூ³ரே.

தத்த² கதமே ஸங்கா²ரா ஸந்திகே? அகுஸலா ஸங்கா²ரா அகுஸலானம் ஸங்கா²ரானம் ஸந்திகே; குஸலா ஸங்கா²ரா குஸலானம் ஸங்கா²ரானம் ஸந்திகே; அப்³யாகதா ஸங்கா²ரா அப்³யாகதானம் ஸங்கா²ரானம் ஸந்திகே. து³க்கா²ய வேத³னாய ஸம்பயுத்தா ஸங்கா²ரா து³க்கா²ய வேத³னாய ஸம்பயுத்தானம் ஸங்கா²ரானம் ஸந்திகே; ஸுகா²ய வேத³னாய ஸம்பயுத்தா ஸங்கா²ரா ஸுகா²ய வேத³னாய ஸம்பயுத்தானம் ஸங்கா²ரானம் ஸந்திகே; அது³க்க²மஸுகா²ய வேத³னாய ஸம்பயுத்தா ஸங்கா²ரா அது³க்க²மஸுகா²ய வேத³னாய ஸம்பயுத்தானம் ஸங்கா²ரானம் ஸந்திகே. அஸமாபன்னஸ்ஸ ஸங்கா²ரா அஸமாபன்னஸ்ஸ ஸங்கா²ரானம் ஸந்திகே; ஸமாபன்னஸ்ஸ ஸங்கா²ரா ஸமாபன்னஸ்ஸ ஸங்கா²ரானம் ஸந்திகே. ஸாஸவா ஸங்கா²ரா ஸாஸவானம் ஸங்கா²ரானம் ஸந்திகே; அனாஸவா ஸங்கா²ரா அனாஸவானம் ஸங்கா²ரானம் ஸந்திகே. இமே வுச்சந்தி ஸங்கா²ரா ஸந்திகே. தே தே வா பன ஸங்கா²ரே உபாதா³யுபாதா³ய ஸங்கா²ரா தூ³ரே ஸந்திகே த³ட்ட²ப்³பா³.

5. விஞ்ஞாணக்க²ந்தோ⁴

26. தத்த² கதமோ விஞ்ஞாணக்க²ந்தோ⁴? யம் கிஞ்சி விஞ்ஞாணம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா – அயம் வுச்சதி விஞ்ஞாணக்க²ந்தோ⁴.

27. தத்த² கதமம் விஞ்ஞாணம் அதீதம்? யம் விஞ்ஞாணம் அதீதம் நிருத்³த⁴ம் விக³தம் விபரிணதம் அத்த²ங்க³தம் அப்³ப⁴த்த²ங்க³தம் உப்பஜ்ஜித்வா விக³தம் அதீதம் அதீதம்ஸேன ஸங்க³ஹிதம், சக்கு²விஞ்ஞாணம் ஸோதவிஞ்ஞாணம் கா⁴னவிஞ்ஞாணம் ஜிவ்ஹாவிஞ்ஞாணம் காயவிஞ்ஞாணம் மனோவிஞ்ஞாணம் – இத³ம் வுச்சதி விஞ்ஞாணம் அதீதம்.

தத்த² கதமம் விஞ்ஞாணம் அனாக³தம்? யம் விஞ்ஞாணம் அஜாதம் அபூ⁴தம் அஸஞ்ஜாதம் அனிப்³ப³த்தம் அனபி⁴னிப்³ப³த்தம் அபாதுபூ⁴தம் அனுப்பன்னம் அஸமுப்பன்னம் அனுட்டி²தம் அஸமுட்டி²தம் அனாக³தம் அனாக³தம்ஸேன ஸங்க³ஹிதம், சக்கு²விஞ்ஞாணம் ஸோதவிஞ்ஞாணம் கா⁴னவிஞ்ஞாணம் ஜிவ்ஹாவிஞ்ஞாணம் காயவிஞ்ஞாணம் மனோவிஞ்ஞாணம் – இத³ம் வுச்சதி விஞ்ஞாணம் அனாக³தம்.

தத்த² கதமம் விஞ்ஞாணம் பச்சுப்பன்னம்? யம் விஞ்ஞாணம் ஜாதம் பூ⁴தம் ஸஞ்ஜாதம் நிப்³ப³த்தம் அபி⁴னிப்³ப³த்தம் பாதுபூ⁴தம் உப்பன்னம் ஸமுப்பன்னம் உட்டி²தம் ஸமுட்டி²தம் பச்சுப்பன்னம் பச்சுப்பன்னம்ஸேன ஸங்க³ஹிதம், சக்கு²விஞ்ஞாணம் ஸோதவிஞ்ஞாணம் கா⁴னவிஞ்ஞாணம் ஜிவ்ஹாவிஞ்ஞாணம் காயவிஞ்ஞாணம் மனோவிஞ்ஞாணம் – இத³ம் வுச்சதி விஞ்ஞாணம் பச்சுப்பன்னம்.

28. தத்த² கதமம் விஞ்ஞாணம் அஜ்ஜ²த்தம்? யம் விஞ்ஞாணம் தேஸம் தேஸம் ஸத்தானம் அஜ்ஜ²த்தம் பச்சத்தம் நியகம் பாடிபுக்³க³லிகம் உபாதி³ன்னம், சக்கு²விஞ்ஞாணம் ஸோதவிஞ்ஞாணம் கா⁴னவிஞ்ஞாணம் ஜிவ்ஹாவிஞ்ஞாணம் காயவிஞ்ஞாணம் மனோவிஞ்ஞாணம் – இத³ம் வுச்சதி விஞ்ஞாணம் அஜ்ஜ²த்தம்.

தத்த² கதமம் விஞ்ஞாணம் ப³ஹித்³தா⁴? யம் விஞ்ஞாணம் தேஸம் தேஸம் பரஸத்தானம் பரபுக்³க³லானம் அஜ்ஜ²த்தம் பச்சத்தம் நியகம் பாடிபுக்³க³லிகம் உபாதி³ன்னம், சக்கு²விஞ்ஞாணம் ஸோதவிஞ்ஞாணம் கா⁴னவிஞ்ஞாணம் ஜிவ்ஹாவிஞ்ஞாணம் காயவிஞ்ஞாணம் மனோவிஞ்ஞாணம் – இத³ம் வுச்சதி விஞ்ஞாணம் ப³ஹித்³தா⁴.

29. தத்த² கதமம் விஞ்ஞாணம் ஓளாரிகம் ஸுகு²மம்? அகுஸலம் விஞ்ஞாணம் ஓளாரிகம், குஸலாப்³யாகதா விஞ்ஞாணா ஸுகு²மா. குஸலாகுஸலா விஞ்ஞாணா ஓளாரிகா, அப்³யாகதம் விஞ்ஞாணம் ஸுகு²மம். து³க்கா²ய வேத³னாய ஸம்பயுத்தம் விஞ்ஞாணம் ஓளாரிகம், ஸுகா²ய ச அது³க்க²மஸுகா²ய ச வேத³னாஹி ஸம்பயுத்தா விஞ்ஞாணா ஸுகு²மா. ஸுக²து³க்கா²ஹி வேத³னாஹி ஸம்பயுத்தா விஞ்ஞாணா ஓளாரிகா, அது³க்க²மஸுகா²ய வேத³னாய ஸம்பயுத்தம் விஞ்ஞாணம் ஸுகு²மம். அஸமாபன்னஸ்ஸ விஞ்ஞாணம் ஓளாரிகம், ஸமாபன்னஸ்ஸ விஞ்ஞாணம் ஸுகு²மம். ஸாஸவம் விஞ்ஞாணம் ஓளாரிகம், அனாஸவம் விஞ்ஞாணம் ஸுகு²மம். தம் தம் வா பன விஞ்ஞாணம் உபாதா³யுபாதா³ய விஞ்ஞாணம் ஓளாரிகம் ஸுகு²மம் த³ட்ட²ப்³ப³ம்.

30. தத்த² கதமம் விஞ்ஞாணம் ஹீனம் பணீதம்? அகுஸலம் விஞ்ஞாணம் ஹீனம், குஸலாப்³யாகதா விஞ்ஞாணா பணீதா. குஸலாகுஸலா விஞ்ஞாணா ஹீனா, அப்³யாகதம் விஞ்ஞாணம் பணீதம். து³க்கா²ய வேத³னாய ஸம்பயுத்தம் விஞ்ஞாணம் ஹீனம், ஸுகா²ய ச அது³க்க²மஸுகா²ய ச வேத³னாஹி ஸம்பயுத்தா விஞ்ஞாணா பணீதா. ஸுக²து³க்கா²ஹி வேத³னாஹி ஸம்பயுத்தா விஞ்ஞாணா ஹீனா, அது³க்க²மஸுகா²ய வேத³னாய ஸம்பயுத்தம் விஞ்ஞாணம் பணீதம். அஸமாபன்னஸ்ஸ விஞ்ஞாணம் ஹீனம், ஸமாபன்னஸ்ஸ விஞ்ஞாணம் பணீதம். ஸாஸவம் விஞ்ஞாணம் ஹீனம், அனாஸவம் விஞ்ஞாணம் பணீதம். தம் தம் வா பன விஞ்ஞாணம் உபாதா³யுபாதா³ய விஞ்ஞாணம் ஹீனம் பணீதம் த³ட்ட²ப்³ப³ம்.

31. தத்த² கதமம் விஞ்ஞாணம் தூ³ரே? அகுஸலம் விஞ்ஞாணம் குஸலாப்³யாகதேஹி விஞ்ஞாணேஹி தூ³ரே; குஸலாப்³யாகதா விஞ்ஞாணா அகுஸலா விஞ்ஞாணா தூ³ரே; குஸலம் விஞ்ஞாணம் அகுஸலாப்³யாகதேஹி விஞ்ஞாணேஹி தூ³ரே; அகுஸலாப்³யாகதா விஞ்ஞாணா குஸலா விஞ்ஞாணா தூ³ரே; அப்³யாகதம் விஞ்ஞாணம் குஸலாகுஸலேஹி விஞ்ஞாணேஹி தூ³ரே; குஸலாகுஸலா விஞ்ஞாணா அப்³யாகதா விஞ்ஞாணா தூ³ரே. து³க்கா²ய வேத³னாய ஸம்பயுத்தம் விஞ்ஞாணம் ஸுகா²ய ச அது³க்க²மஸுகா²ய ச வேத³னாஹி ஸம்பயுத்தேஹி விஞ்ஞாணேஹி தூ³ரே; ஸுகா²ய ச அது³க்க²மஸுகா²ய ச வேத³னாஹி ஸம்பயுத்தா விஞ்ஞாணா து³க்கா²ய வேத³னாய ஸம்பயுத்தா விஞ்ஞாணா தூ³ரே; ஸுகா²ய வேத³னாய ஸம்பயுத்தம் விஞ்ஞாணம் து³க்கா²ய ச அது³க்க²மஸுகா²ய ச வேத³னாஹி ஸம்பயுத்தேஹி விஞ்ஞாணேஹி தூ³ரே; து³க்கா²ய ச அது³க்க²மஸுகா²ய ச வேத³னாஹி ஸம்பயுத்தா விஞ்ஞாணா ஸுகா²ய வேத³னாய ஸம்பயுத்தா விஞ்ஞாணா தூ³ரே; அது³க்க²மஸுகா²ய வேத³னாய ஸம்பயுத்தம் விஞ்ஞாணம் ஸுக²து³க்கா²ஹி வேத³னாஹி ஸம்பயுத்தேஹி விஞ்ஞாணேஹி தூ³ரே; ஸுக²து³க்கா²ஹி வேத³னாஹி ஸம்பயுத்தா விஞ்ஞாணா அது³க்க²மஸுகா²ய வேத³னாய ஸம்பயுத்தா விஞ்ஞாணா தூ³ரே. அஸமாபன்னஸ்ஸ விஞ்ஞாணம் ஸமாபன்னஸ்ஸ விஞ்ஞாணா தூ³ரே; ஸமாபன்னஸ்ஸ விஞ்ஞாணம் அஸமாபன்னஸ்ஸ விஞ்ஞாணா தூ³ரே. ஸாஸவம் விஞ்ஞாணம் அனாஸவா விஞ்ஞாணா தூ³ரே; அனாஸவம் விஞ்ஞாணம் ஸாஸவா விஞ்ஞாணா தூ³ரே – இத³ம் வுச்சதி விஞ்ஞாணம் தூ³ரே.

தத்த² கதமம் விஞ்ஞாணம் ஸந்திகே? அகுஸலம் விஞ்ஞாணம் அகுஸலஸ்ஸ விஞ்ஞாணஸ்ஸ ஸந்திகே; குஸலம் விஞ்ஞாணம் குஸலஸ்ஸ விஞ்ஞாணஸ்ஸ ஸந்திகே; அப்³யாகதம் விஞ்ஞாணம் அப்³யாகதஸ்ஸ விஞ்ஞாணஸ்ஸ ஸந்திகே. து³க்கா²ய வேத³னாய ஸம்பயுத்தம் விஞ்ஞாணம் து³க்கா²ய வேத³னாய ஸம்பயுத்தஸ்ஸ விஞ்ஞாணஸ்ஸ ஸந்திகே; ஸுகா²ய வேத³னாய ஸம்பயுத்தம் விஞ்ஞாணம் ஸுகா²ய வேத³னாய ஸம்பயுத்தஸ்ஸ விஞ்ஞாணஸ்ஸ ஸந்திகே; அது³க்க²மஸுகா²ய வேத³னாய ஸம்பயுத்தம் விஞ்ஞாணம் அது³க்க²மஸுகா²ய வேத³னாய ஸம்பயுத்தஸ்ஸ விஞ்ஞாணஸ்ஸ ஸந்திகே. அஸமாபன்னஸ்ஸ விஞ்ஞாணம் அஸமாபன்னஸ்ஸ விஞ்ஞாணஸ்ஸ ஸந்திகே; ஸமாபன்னஸ்ஸ விஞ்ஞாணம் ஸமாபன்னஸ்ஸ விஞ்ஞாணஸ்ஸ ஸந்திகே. ஸாஸவம் விஞ்ஞாணம் ஸாஸவஸ்ஸ விஞ்ஞாணஸ்ஸ ஸந்திகே; அனாஸவம் விஞ்ஞாணம் அனாஸவஸ்ஸ விஞ்ஞாணஸ்ஸ ஸந்திகே – இத³ம் வுச்சதி விஞ்ஞாணம் ஸந்திகே. தம் தம் வா பன விஞ்ஞாணம் உபாதா³யுபாதா³ய விஞ்ஞாணம் தூ³ரே ஸந்திகே த³ட்ட²ப்³ப³ம்.

ஸுத்தந்தபா⁴ஜனீயம்.