நித்³தே³ஸோ

1. ஏககபுக்³க³லபஞ்ஞத்தி

1. கதமோ ச புக்³க³லோ ஸமயவிமுத்தோ? இதே⁴கச்சோ புக்³க³லோ காலேன காலம் ஸமயேன ஸமயம் அட்ட² விமோக்கே² காயேன பு²ஸித்வா [ப²ஸ்ஸித்வா (ஸீ. பீ.)] விஹரதி, பஞ்ஞாய சஸ்ஸ தி³ஸ்வா ஏகச்சே ஆஸவா பரிக்கீ²ணா ஹோந்தி – அயம் வுச்சதி புக்³க³லோ ‘‘ஸமயவிமுத்தோ’’.

2. கதமோ ச புக்³க³லோ அஸமயவிமுத்தோ? இதே⁴கச்சோ புக்³க³லோ ந ஹேவ கோ² காலேன காலம் ஸமயேன ஸமயம் அட்ட² விமோக்கே² காயேன பு²ஸித்வா விஹரதி, பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தி – அயம் வுச்சதி புக்³க³லோ ‘‘அஸமயவிமுத்தோ’’. ஸப்³பே³பி அரியபுக்³க³லா அரியே விமோக்கே² அஸமயவிமுத்தா.

3. கதமோ ச புக்³க³லோ குப்பத⁴ம்மோ? இதே⁴கச்சோ புக்³க³லோ லாபீ⁴ ஹோதி ரூபஸஹக³தானம் வா அரூபஸஹக³தானம் வா ஸமாபத்தீனம். ஸோ ச கோ² ந நிகாமலாபீ⁴ ஹோதி ந அகிச்ச²லாபீ⁴ ந அகஸிரலாபீ⁴; ந யத்தி²ச்ச²கம் யதி³ச்ச²கம் யாவதிச்ச²கம் ஸமாபஜ்ஜதிபி வுட்டா²திபி. டா²னம் கோ² பனேதம் விஜ்ஜதி, யம் தஸ்ஸ புக்³க³லஸ்ஸ பமாத³மாக³ம்ம தா ஸமாபத்தியோ குப்பேய்யும் – அயம் வுச்சதி புக்³க³லோ ‘‘குப்பத⁴ம்மோ’’.

4. கதமோ ச புக்³க³லோ அகுப்பத⁴ம்மோ? இதே⁴கச்சோ புக்³க³லோ லாபீ⁴ ஹோதி ரூபஸஹக³தானம் வா அரூபஸஹக³தானம் வா ஸமாபத்தீனம். ஸோ ச கோ² நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴; யத்தி²ச்ச²கம் யதி³ச்ச²கம் யாவதிச்ச²கம் ஸமாபஜ்ஜதிபி வுட்டா²திபி. அட்டா²னமேதம் அனவகாஸோ யம் தஸ்ஸ புக்³க³லஸ்ஸ பமாத³மாக³ம்ம தா ஸமாபத்தியோ குப்பேய்யும் – அயம் வுச்சதி புக்³க³லோ ‘‘அகுப்பத⁴ம்மோ’’. ஸப்³பே³பி அரியபுக்³க³லா அரியே விமோக்கே² அகுப்பத⁴ம்மா.

5. கதமோ ச புக்³க³லோ பரிஹானத⁴ம்மோ? இதே⁴கச்சோ புக்³க³லோ லாபீ⁴ ஹோதி ரூபஸஹக³தானம் வா அரூபஸஹக³தானம் வா ஸமாபத்தீனம். ஸோ ச கோ² ந நிகாமலாபீ⁴ ஹோதி ந அகிச்ச²லாபீ⁴ ந அகஸிரலாபீ⁴; ந யத்தி²ச்ச²கம் யதி³ச்ச²கம் யாவதிச்ச²கம் ஸமாபஜ்ஜதிபி வுட்டா²திபி. டா²னம் கோ² பனேதம் விஜ்ஜதி, யம் ஸோ புக்³க³லோ பமாத³மாக³ம்ம தாஹி ஸமாபத்தீஹி பரிஹாயேய்ய – அயம் வுச்சதி புக்³க³லோ ‘‘பரிஹானத⁴ம்மோ’’.

6. கதமோ ச புக்³க³லோ அபரிஹானத⁴ம்மோ? இதே⁴கச்சோ புக்³க³லோ லாபீ⁴ ஹோதி ரூபஸஹக³தானம் வா அரூபஸஹக³தானம் வா ஸமாபத்தீனம். ஸோ ச கோ² நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴; யத்தி²ச்ச²கம் யதி³ச்ச²கம் யாவதிச்ச²கம் ஸமாபஜ்ஜதிபி வுட்டா²திபி. அட்டா²னமேதம் அனவகாஸோ யம் ஸோ புக்³க³லோ பமாத³மாக³ம்ம தாஹி ஸமாபத்தீஹி பரிஹாயேய்ய – அயம் வுச்சதி புக்³க³லோ ‘‘அபரிஹானத⁴ம்மோ’’. ஸப்³பே³பி அரியபுக்³க³லா அரியே விமோக்கே² அபரிஹானத⁴ம்மா.

7. கதமோ ச புக்³க³லோ சேதனாப⁴ப்³போ³? இதே⁴கச்சோ புக்³க³லோ லாபீ⁴ ஹோதி ரூபஸஹக³தானம் வா அரூபஸஹக³தானம் வா ஸமாபத்தீனம். ஸோ ச கோ² ந நிகாமலாபீ⁴ ஹோதி ந அகிச்ச²லாபீ⁴ ந அகஸிரலாபீ⁴; ந யத்தி²ச்ச²கம் யதி³ச்ச²கம் யாவதிச்ச²கம் ஸமாபஜ்ஜதிபி வுட்டா²திபி. ஸசே அனுஸஞ்சேதேதி, ந பரிஹாயதி தாஹி ஸமாபத்தீஹி. ஸசே ந அனுஸஞ்சேதேதி, பரிஹாயதி தாஹி ஸமாபத்தீஹி – அயம் வுச்சதி புக்³க³லோ ‘‘சேதனாப⁴ப்³போ³’’.

8. கதமோ ச புக்³க³லோ அனுரக்க²ணாப⁴ப்³போ³? இதே⁴கச்சோ புக்³க³லோ லாபீ⁴ ஹோதி ரூபஸஹக³தானம் வா அரூபஸஹக³தானம் வா ஸமாபத்தீனம். ஸோ ச கோ² ந நிகாமலாபீ⁴ ஹோதி ந அகிச்ச²லாபீ⁴ ந அகஸிரலாபீ⁴; ந யத்தி²ச்ச²கம் யதி³ச்ச²கம் யாவதிச்ச²கம் ஸமாபஜ்ஜதிபி வுட்டா²திபி. ஸசே அனுரக்க²தி, ந பரிஹாயதி தாஹி ஸமாபத்தீஹி. ஸசே ந அனுரக்க²தி, பரிஹாயதி தாஹி ஸமாபத்தீஹி – அயம் வுச்சதி புக்³க³லோ ‘‘அனுரக்க²ணாப⁴ப்³போ³’’.

9. கதமோ ச புக்³க³லோ புது²ஜ்ஜனோ? யஸ்ஸ புக்³க³லஸ்ஸ தீணி ஸம்யோஜனானி அப்பஹீனானி; ந ச தேஸம் த⁴ம்மானம் பஹானாய படிபன்னோ – அயம் வுச்சதி புக்³க³லோ ‘‘புது²ஜ்ஜனோ’’.

10. கதமோ ச புக்³க³லோ கோ³த்ரபூ⁴? யேஸம் த⁴ம்மானம் ஸமனந்தரா அரியத⁴ம்மஸ்ஸ அவக்கந்தி ஹோதி தேஹி த⁴ம்மேஹி ஸமன்னாக³தோ – அயம் வுச்சதி புக்³க³லோ ‘‘கோ³த்ரபூ⁴’’.

11. கதமோ ச புக்³க³லோ ப⁴யூபரதோ? ஸத்த ஸேக்கா² ப⁴யூபரதா, யே ச புது²ஜ்ஜனா ஸீலவந்தோ. அரஹா அப⁴யூபரதோ.

12. கதமோ ச புக்³க³லோ அப⁴ப்³பா³க³மனோ? யே தே புக்³க³லா கம்மாவரணேன ஸமன்னாக³தா, கிலேஸாவரணேன ஸமன்னாக³தா, விபாகாவரணேன ஸமன்னாக³தா, அஸ்ஸத்³தா⁴ அச்ச²ந்தி³கா து³ப்பஞ்ஞா ஏளா, அப⁴ப்³பா³ நியாமம் ஓக்கமிதும் குஸலேஸு த⁴ம்மேஸு ஸம்மத்தம் – இமே வுச்சந்தி புக்³க³லா ‘‘அப⁴ப்³பா³க³மனா’’.

13. கதமோ ச புக்³க³லோ ப⁴ப்³பா³க³மனோ? யே தே புக்³க³லா ந கம்மாவரணேன ஸமன்னாக³தா, ந கிலேஸாவரணேன ஸமன்னாக³தா, ந விபாகாவரணேன ஸமன்னாக³தா, ஸத்³தா⁴ ச²ந்தி³கா பஞ்ஞவந்தோ [பஞ்ஞவந்தா (ஸீ.)] அனேளா, ப⁴ப்³பா³ நியாமம் ஓக்கமிதும் குஸலேஸு த⁴ம்மேஸு ஸம்மத்தம் – இமே வுச்சந்தி புக்³க³லா ‘‘ப⁴ப்³பா³க³மனா’’.

14. கதமோ ச புக்³க³லோ நியதோ? பஞ்ச புக்³க³லா ஆனந்தரிகா, யே ச மிச்சா²தி³ட்டி²கா நியதா, அட்ட² ச அரியபுக்³க³லா நியதா. அவஸேஸா புக்³க³லா அனியதா.

15. கதமோ ச புக்³க³லோ படிபன்னகோ? சத்தாரோ மக்³க³ஸமங்கி³னோ புக்³க³லா படிபன்னகா, சத்தாரோ ப²லஸமங்கி³னோ புக்³க³லா ப²லே டி²தா.

16. கதமோ ச புக்³க³லோ ஸமஸீஸீ? யஸ்ஸ புக்³க³லஸ்ஸ அபுப்³ப³ம் அசரிமம் ஆஸவபரியாதா³னஞ்ச ஹோதி ஜீவிதபரியாதா³னஞ்ச – அயம் வுச்சதி புக்³க³லோ ‘‘ஸமஸீஸீ’’.

17. கதமோ ச புக்³க³லோ டி²தகப்பீ? அயஞ்ச புக்³க³லோ ஸோதாபத்திப²லஸச்சி²கிரியாய படிபன்னோ அஸ்ஸ, கப்பஸ்ஸ ச உட்³ட³ய்ஹனவேலா அஸ்ஸ, நேவ தாவ கப்போ உட்³ட³ய்ஹேய்ய யாவாயம் புக்³க³லோ ந ஸோதாபத்திப²லம் ஸச்சி²கரோதி. அயம் வுச்சதி புக்³க³லோ ‘‘டி²தகப்பீ’’. ஸப்³பே³பி மக்³க³ஸமங்கி³னோ புக்³க³லா டி²தகப்பினோ.

18. கதமோ ச புக்³க³லோ அரியோ? அட்ட² அரியபுக்³க³லா அரியா. அவஸேஸா புக்³க³லா அனரியா.

19. கதமோ ச புக்³க³லோ ஸேக்கோ²? சத்தாரோ மக்³க³ஸமங்கி³னோ தயோ ப²லஸமங்கி³னோ புக்³க³லா ‘‘ஸேக்கா²’’. அரஹா அஸேக்கோ². அவஸேஸா புக்³க³லா நேவஸேக்க²னாஸேக்கா².

20. கதமோ ச புக்³க³லோ தேவிஜ்ஜோ? தீஹி விஜ்ஜாஹி ஸமன்னாக³தோ புக்³க³லோ ‘‘தேவிஜ்ஜோ’’.

21. கதமோ ச புக்³க³லோ ச²ளபி⁴ஞ்ஞோ? ச²ஹி அபி⁴ஞ்ஞாஹி ஸமன்னாக³தோ புக்³க³லோ ‘‘ச²ளபி⁴ஞ்ஞோ’’.

22. கதமோ ச புக்³க³லோ ஸம்மாஸம்பு³த்³தோ⁴? இதே⁴கச்சோ புக்³க³லோ புப்³பே³ அனனுஸ்ஸுதேஸு த⁴ம்மேஸு ஸாமம் ஸச்சானி அபி⁴ஸம்பு³ஜ்ஜ²தி; தத்த² ச ஸப்³ப³ஞ்ஞுதம் பாபுணாதி, ப³லேஸு ச வஸீபா⁴வம் – அயம் வுச்சதி புக்³க³லோ ‘‘ஸம்மாஸம்பு³த்³தோ⁴’’.

23. கதமோ ச புக்³க³லோ பச்சேகஸம்பு³த்³தோ⁴? இதே⁴கச்சோ புக்³க³லோ புப்³பே³ அனனுஸ்ஸுதேஸு த⁴ம்மேஸு ஸாமம் ஸச்சானி அபி⁴ஸம்பு³ஜ்ஜ²தி; ந ச தத்த² ஸப்³ப³ஞ்ஞுதம் பாபுணாதி, ந ச ப³லேஸு வஸீபா⁴வம் – அயம் வுச்சதி புக்³க³லோ ‘‘பச்சேகஸம்பு³த்³தோ⁴’’.

24. கதமோ ச புக்³க³லோ உப⁴தோபா⁴க³விமுத்தோ? இதே⁴கச்சோ புக்³க³லோ அட்ட² விமோக்கே² காயேன பு²ஸித்வா விஹரதி; பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தி – அயம் வுச்சதி புக்³க³லோ ‘‘உப⁴தோபா⁴க³விமுத்தோ’’.

25. கதமோ ச புக்³க³லோ பஞ்ஞாவிமுத்தோ? இதே⁴கச்சோ புக்³க³லோ ந ஹேவ கோ² அட்ட² விமோக்கே² காயேன பு²ஸித்வா விஹரதி; பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தி. அயம் வுச்சதி புக்³க³லோ ‘‘பஞ்ஞாவிமுத்தோ’’.

26. கதமோ ச புக்³க³லோ காயஸக்கீ²? இதே⁴கச்சோ புக்³க³லோ அட்ட² விமோக்கே² காயேன பு²ஸித்வா விஹரதி; பஞ்ஞாய சஸ்ஸ தி³ஸ்வா ஏகச்சே ஆஸவா பரிக்கீ²ணா ஹோந்தி. அயம் வுச்சதி புக்³க³லோ ‘‘காயஸக்கீ²’’.

27. கதமோ ச புக்³க³லோ தி³ட்டி²ப்பத்தோ? இதே⁴கச்சோ புக்³க³லோ ‘‘இத³ம் து³க்க²’’ந்தி யதா²பூ⁴தம் பஜானாதி, ‘‘அயம் து³க்க²ஸமுத³யோ’’தி யதா²பூ⁴தம் பஜானாதி, ‘‘அயம் து³க்க²னிரோதோ⁴’’தி யதா²பூ⁴தம் பஜானாதி, ‘‘அயம் து³க்க²னிரோத⁴கா³மினீ படிபதா³’’தி யதா²பூ⁴தம் பஜானாதி. ததா²க³தப்பவேதி³தா சஸ்ஸ த⁴ம்மா பஞ்ஞாய வோதி³ட்டா² ஹோந்தி வோசரிதா. பஞ்ஞாய சஸ்ஸ தி³ஸ்வா ஏகச்சே ஆஸவா பரிக்கீ²ணா ஹோந்தி – அயம் வுச்சதி புக்³க³லோ ‘‘தி³ட்டி²ப்பத்தோ’’.

28. கதமோ ச புக்³க³லோ ஸத்³தா⁴விமுத்தோ? இதே⁴கச்சோ புக்³க³லோ ‘‘இத³ம் து³க்க²’’ந்தி யதா²பூ⁴தம் பஜானாதி, ‘‘அயம் து³க்க²ஸமுத³யோ’’தி யதா²பூ⁴தம் பஜானாதி, ‘‘அயம் து³க்க²னிரோதோ⁴’’தி யதா²பூ⁴தம் பஜானாதி, ‘‘அயம் து³க்க²னிரோத⁴கா³மினீ படிபதா³’’தி யதா²பூ⁴தம் பஜானாதி. ததா²க³தப்பவேதி³தா சஸ்ஸ த⁴ம்மா பஞ்ஞாய வோதி³ட்டா² ஹோந்தி வோசரிதா. பஞ்ஞாய சஸ்ஸ தி³ஸ்வா ஏகச்சே ஆஸவா பரிக்கீ²ணா ஹோந்தி, நோ ச கோ² யதா² தி³ட்டி²ப்பத்தஸ்ஸ – அயம் வுச்சதி புக்³க³லோ ‘‘ஸத்³தா⁴விமுத்தோ’’.

29. கதமோ ச புக்³க³லோ த⁴ம்மானுஸாரீ? யஸ்ஸ புக்³க³லஸ்ஸ ஸோதாபத்திப²லஸச்சி²கிரியாய படிபன்னஸ்ஸ பஞ்ஞிந்த்³ரியம் அதி⁴மத்தம் ஹோதி, பஞ்ஞாவாஹிம் பஞ்ஞாபுப்³ப³ங்க³மம் அரியமக்³க³ம் பா⁴வேதி – அயம் வுச்சதி புக்³க³லோ ‘‘த⁴ம்மானுஸாரீ’’. ஸோதாபத்திப²லஸச்சி²கிரியாய படிபன்னோ புக்³க³லோ த⁴ம்மானுஸாரீ ப²லே டி²தோ தி³ட்டி²ப்பத்தோ.

30. கதமோ ச புக்³க³லோ ஸத்³தா⁴னுஸாரீ? யஸ்ஸ புக்³க³லஸ்ஸ ஸோதாபத்திப²லஸச்சி²கிரியாய படிபன்னஸ்ஸ ஸத்³தி⁴ந்த்³ரியம் அதி⁴மத்தம் ஹோதி, ஸத்³தா⁴வாஹிம் ஸத்³தா⁴புப்³ப³ங்க³மம் அரியமக்³க³ம் பா⁴வேதி – அயம் வுச்சதி புக்³க³லோ ‘‘ஸத்³தா⁴னுஸாரீ’’. ஸோதாபத்திப²லஸச்சி²கிரியாய படிபன்னோ புக்³க³லோ ஸத்³தா⁴னுஸாரீ ப²லே டி²தோ ஸத்³தா⁴விமுத்தோ.

31. கதமோ ச புக்³க³லோ ஸத்தக்க²த்துபரமோ? இதே⁴கச்சோ புக்³க³லோ திண்ணம் ஸம்யோஜனானம் பரிக்க²யா ஸோதாபன்னோ ஹோதி அவினிபாதத⁴ம்மோ நியதோ ஸம்போ³தி⁴பராயனோ [ஸம்போ³தி⁴பராயணோ (ஸீ. க.)]. ஸோ ஸத்தக்க²த்தும் தே³வே ச மானுஸே ச ஸந்தா⁴வித்வா ஸம்ஸரித்வா து³க்க²ஸ்ஸந்தம் கரோதி – அயம் வுச்சதி புக்³க³லோ ‘‘ஸத்தக்க²த்துபரமோ’’.

32. கதமோ ச புக்³க³லோ கோலங்கோலோ? இதே⁴கச்சோ புக்³க³லோ திண்ணம் ஸம்யோஜனானம் பரிக்க²யா ஸோதாபன்னோ ஹோதி அவினிபாதத⁴ம்மோ நியதோ ஸம்போ³தி⁴பராயனோ. ஸோ த்³வே வா தீணி வா குலானி ஸந்தா⁴வித்வா ஸம்ஸரித்வா து³க்க²ஸ்ஸந்தம் கரோதி – அயம் வுச்சதி புக்³க³லோ ‘‘கோலங்கோலோ’’.

33. கதமோ ச புக்³க³லோ ஏகபீ³ஜீ? இதே⁴கச்சோ புக்³க³லோ திண்ணம் ஸம்யோஜனானம் பரிக்க²யா ஸோதாபன்னோ ஹோதி அவினிபாதத⁴ம்மோ நியதோ ஸம்போ³தி⁴பராயனோ. ஸோ ஏகம்யேவ மானுஸகம் ப⁴வம் நிப்³ப³த்தேத்வா து³க்க²ஸ்ஸந்தம் கரோதி – அயம் வுச்சதி புக்³க³லோ ‘‘ஏகபீ³ஜீ’’.

34. கதமோ ச புக்³க³லோ ஸகதா³கா³மீ? இதே⁴கச்சோ புக்³க³லோ திண்ணம் ஸம்யோஜனானம் பரிக்க²யா ராக³தோ³ஸமோஹானம் தனுத்தா ஸகதா³கா³மீ ஹோதி, ஸகிதே³வ இமம் லோகம் ஆக³ந்த்வா து³க்க²ஸ்ஸந்தம் கரோதி – அயம் வுச்சதி புக்³க³லோ ‘‘ஸகதா³கா³மீ’’.

35. கதமோ ச புக்³க³லோ அனாகா³மீ? இதே⁴கச்சோ புக்³க³லோ பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி, தத்த² பரினிப்³பா³யீ அனாவத்தித⁴ம்மோ தஸ்மா லோகா – அயம் வுச்சதி புக்³க³லோ ‘‘அனாகா³மீ’’.

36. கதமோ ச புக்³க³லோ அந்தராபரினிப்³பா³யீ? இதே⁴கச்சோ புக்³க³லோ பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி, தத்த² பரினிப்³பா³யீ அனாவத்தித⁴ம்மோ தஸ்மா லோகா. ஸோ உபபன்னம் வா ஸமனந்தரா அப்பத்தம் வா வேமஜ்ஜ²ம் ஆயுப்பமாணம் அரியமக்³க³ம் ஸஞ்ஜனேதி உபரிட்டி²மானம் ஸம்யோஜனானம் பஹானாய – அயம் வுச்சதி புக்³க³லோ ‘‘அந்தராபரினிப்³பா³யீ’’.

37. கதமோ ச புக்³க³லோ உபஹச்சபரினிப்³பா³யீ? இதே⁴கச்சோ புக்³க³லோ பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி, தத்த² பரினிப்³பா³யீ அனாவத்தித⁴ம்மோ தஸ்மா லோகா. ஸோ அதிக்கமித்வா வேமஜ்ஜ²ம் ஆயுப்பமாணம் உபஹச்ச வா காலகிரியம் [காலம் கிரியம் (க.)] அரியமக்³க³ம் ஸஞ்ஜனேதி உபரிட்டி²மானம் ஸம்யோஜனானம் பஹானாய – அயம் வுச்சதி புக்³க³லோ ‘‘உபஹச்சபரினிப்³பா³யீ’’.

38. கதமோ ச புக்³க³லோ அஸங்கா²ரபரினிப்³பா³யீ? இதே⁴கச்சோ புக்³க³லோ பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி, தத்த² பரினிப்³பா³யீ அனாவத்தித⁴ம்மோ தஸ்மா லோகா. ஸோ அஸங்கா²ரேன அரியமக்³க³ம் ஸஞ்ஜனேதி உபரிட்டி²மானம் ஸம்யோஜனானம் பஹானாய – அயம் வுச்சதி புக்³க³லோ ‘‘அஸங்கா²ரபரினிப்³பா³யீ’’.

39. கதமோ ச புக்³க³லோ ஸஸங்கா²ரபரினிப்³பா³யீ? இதே⁴கச்சோ புக்³க³லோ பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி, தத்த² பரினிப்³பா³யீ அனாவத்தித⁴ம்மோ தஸ்மா லோகா. ஸோ ஸஸங்கா²ரேன அரியமக்³க³ம் ஸஞ்ஜனேதி உபரிட்டி²மானம் ஸம்யோஜனானம் பஹானாய – அயம் வுச்சதி புக்³க³லோ ‘‘ஸஸங்கா²ரபரினிப்³பா³யீ’’.

40. கதமோ ச புக்³க³லோ உத்³த⁴ம்ஸோதோ அகனிட்ட²கா³மீ? இதே⁴கச்சோ புக்³க³லோ பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி, தத்த² பரினிப்³பா³யீ அனாவத்தித⁴ம்மோ தஸ்மா லோகா. ஸோ அவிஹா சுதோ அதப்பம் க³ச்ச²தி, அதப்பா சுதோ ஸுத³ஸ்ஸம் க³ச்ச²தி, ஸுத³ஸ்ஸா சுதோ ஸுத³ஸ்ஸிம் க³ச்ச²தி, ஸுத³ஸ்ஸியா சுதோ அகனிட்ட²ம் க³ச்ச²தி; அகனிட்டே² அரியமக்³க³ம் ஸஞ்ஜனேதி உபரிட்டி²மானம் ஸம்யோஜனானம் பஹானாய – அயம் வுச்சதி புக்³க³லோ ‘‘உத்³த⁴ம்ஸோதோ அகனிட்ட²கா³மீ’’.

41. கதமோ ச புக்³க³லோ ஸோதாபன்னோ ஸோதாபத்திப²லஸச்சி²கிரியாய படிபன்னோ? திண்ணம் ஸம்யோஜனானம் பஹானாய படிபன்னோ புக்³க³லோ ஸோதாபத்திப²லஸச்சி²கிரியாய படிபன்னோ. யஸ்ஸ புக்³க³லஸ்ஸ தீணி ஸம்யோஜனானி பஹீனானி – அயம் வுச்சதி புக்³க³லோ ‘‘ஸோதாபன்னோ’’.

42. காமராக³ப்³யாபாதா³னம் தனுபா⁴வாய படிபன்னோ புக்³க³லோ ஸகதா³கா³மிப²லஸச்சி²கிரியாய படிபன்னோ. யஸ்ஸ புக்³க³லஸ்ஸ காமராக³ப்³யாபாதா³ தனுபூ⁴தா – அயம் வுச்சதி புக்³க³லோ ‘‘ஸகதா³கா³மீ’’.

43. காமராக³ப்³யாபாதா³னம் அனவஸேஸப்பஹானாய படிபன்னோ புக்³க³லோ அனாகா³மிப²லஸச்சி²கிரியாய படிபன்னோ. யஸ்ஸ புக்³க³லஸ்ஸ காமராக³ப்³யாபாதா³ அனவஸேஸா பஹீனா – அயம் வுச்சதி புக்³க³லோ ‘‘அனாகா³மீ’’.

44. ரூபராக³அரூபராக³மானஉத்³த⁴ச்சஅவிஜ்ஜாய அனவஸேஸப்பஹானாய படிபன்னோ புக்³க³லோ அரஹத்தப²லஸச்சி²கிரியாய படிபன்னோ. யஸ்ஸ புக்³க³லஸ்ஸ ரூபராகோ³ அரூபராகோ³ மானோ உத்³த⁴ச்சம் அவிஜ்ஜா அனவஸேஸா பஹீனா – அயம் வுச்சதி புக்³க³லோ ‘‘அரஹா’’.

ஏககனித்³தே³ஸோ.

2. து³கபுக்³க³லபஞ்ஞத்தி

45. கதமோ ச புக்³க³லோ கோத⁴னோ? தத்த² கதமோ கோதோ⁴? யோ கோதோ⁴ குஜ்ஜ²னா குஜ்ஜி²தத்தம் தோ³ஸோ து³ஸ்ஸனா து³ஸ்ஸிதத்தம் [தூ³ஸனா தூ³ஸிதத்தம் (ஸ்யா.)] ப்³யாபத்தி ப்³யாபஜ்ஜனா ப்³யாபஜ்ஜிதத்தம் விரோதோ⁴ படிவிரோதோ⁴ சண்டி³க்கம் அஸுரோபோ அனத்தமனதா சித்தஸ்ஸ – அயம் வுச்சதி கோதோ⁴. யஸ்ஸ புக்³க³லஸ்ஸ அயம் கோதோ⁴ அப்பஹீனோ – அயம் வுச்சதி புக்³க³லோ ‘‘கோத⁴னோ’’.

46. கதமோ ச புக்³க³லோ உபனாஹீ? தத்த² கதமோ உபனாஹோ? புப்³ப³காலம் கோதோ⁴ அபரகாலம் உபனாஹோ. யோ ஏவரூபோ உபனாஹோ உபனய்ஹனா உபனய்ஹிதத்தம் அட்ட²பனா [ஆட²பனா (க.) விப⁴. 891] ட²பனா ஸண்ட²பனா அனுஸம்ஸந்த³னா அனுப்பப³ந்த⁴னா த³ள்ஹீகம்மம் கோத⁴ஸ்ஸ – அயம் வுச்சதி உபனாஹோ. யஸ்ஸ புக்³க³லஸ்ஸ அயம் உபனாஹோ அப்பஹீனோ – அயம் வுச்சதி புக்³க³லோ ‘‘உபனாஹீ’’.

47. கதமோ ச புக்³க³லோ மக்கீ²? தத்த² கதமோ மக்கோ²? யோ மக்கோ² மக்கா²யனா மக்கா²யிதத்தம் [மக்கீ²யனா மக்கீ²யிதத்தம் (ஸீ.), மக்கி²யனா மக்கி²யிதத்தம் (க.)] நிட்டு²ரியம் நிட்டு²ரியகம்மம் – அயம் வுச்சதி மக்கோ². யஸ்ஸ புக்³க³லஸ்ஸ அயம் மக்கோ² அப்பஹீனோ – அயம் வுச்சதி புக்³க³லோ ‘‘மக்கீ²’’.

48. கதமோ ச புக்³க³லோ பளாஸீ? தத்த² கதமோ பளாஸோ? யோ பளாஸோ பளாஸாயனா பளாஸாயிதத்தம் பளாஸாஹாரோ விவாத³ட்டா²னம் யுக³க்³கா³ஹோ அப்படினிஸ்ஸக்³கோ³ – அயம் வுச்சதி பளாஸோ. யஸ்ஸ புக்³க³லஸ்ஸ அயம் பளாஸோ அப்பஹீனோ – அயம் வுச்சதி புக்³க³லோ ‘‘பளாஸீ’’.

49. கதமோ ச புக்³க³லோ இஸ்ஸுகீ? தத்த² கதமா இஸ்ஸா? யா பரலாப⁴ஸக்காரக³ருகாரமானனவந்த³னபூஜனாஸு இஸ்ஸா இஸ்ஸாயனா இஸ்ஸாயிதத்தம் உஸூயா உஸூயனா [உஸ்ஸுயா உஸ்ஸுயனா (க.) விப⁴. 893] உஸூயிதத்தம் – அயம் வுச்சதி இஸ்ஸா. யஸ்ஸ புக்³க³லஸ்ஸ அயம் இஸ்ஸா அப்பஹீனா – அயம் வுச்சதி புக்³க³லோ ‘‘இஸ்ஸுகீ’’.

50. கதமோ ச புக்³க³லோ மச்ச²ரீ? தத்த² கதமம் மச்ச²ரியம்? பஞ்ச மச்ச²ரியானி – ஆவாஸமச்ச²ரியம், குலமச்ச²ரியம், லாப⁴மச்ச²ரியம், வண்ணமச்ச²ரியம், த⁴ம்மமச்ச²ரியம். யம் ஏவரூபம் மச்சே²ரம் மச்ச²ராயனா மச்ச²ராயிதத்தம் வேவிச்ச²ம் கத³ரியம் கடுகஞ்சுகதா அக்³க³ஹிதத்தம் சித்தஸ்ஸ – இத³ம் வுச்சதி மச்ச²ரியம். யஸ்ஸ புக்³க³லஸ்ஸ இத³ம் மச்ச²ரியம் அப்பஹீனம் – அயம் வுச்சதி புக்³க³லோ ‘‘மச்ச²ரீ’’.

51. கதமோ ச புக்³க³லோ ஸடோ²? தத்த² கதமம் ஸாடே²ய்யம்? இதே⁴கச்சோ ஸடோ² ஹோதி பரிஸடோ². யம் தத்த² ஸட²ம் ஸட²தா ஸாடே²ய்யம் கக்கரதா கக்கரியம் [கக்க²ளதா கக்க²ளியம் (ஸ்யா.) ஏவம் கு²த்³த³கவிப⁴ங்க³து³கனித்³தே³ஸேபி] பரிக்க²த்தத்தா பாரிக்க²த்தியம் – இத³ம் வுச்சதி ஸாடே²ய்யம். யஸ்ஸ புக்³க³லஸ்ஸ இத³ம் ஸாடே²ய்யம் அப்பஹீனம் – அயம் வுச்சதி புக்³க³லோ ‘‘ஸடோ²’’.

52. கதமோ ச புக்³க³லோ மாயாவீ? தத்த² கதமா மாயா? இதே⁴கச்சோ காயேன து³ச்சரிதம் சரித்வா வாசாய து³ச்சரிதம் சரித்வா மனஸா து³ச்சரிதம் சரித்வா தஸ்ஸ படிச்சா²த³னஹேது பாபிகம் இச்ச²ம் பணித³ஹதி – ‘‘மா மம் ஜஞ்ஞா’’தி இச்ச²தி, ‘‘மா மம் ஜஞ்ஞா’’தி ஸங்கப்பதி ‘‘மா மம் ஜஞ்ஞா’’தி வாசம் பா⁴ஸதி, ‘‘மா மம் ஜஞ்ஞா’’தி காயேன பரக்கமதி. யா ஏவரூபா மாயா மாயாவிதா அச்சாஸரா வஞ்சனா நிகதி விகிரணா பரிஹரணா கூ³ஹனா பரிகூ³ஹனா சா²த³னா படிச்சா²த³னா அனுத்தானீகம்மம் அனாவிகம்மம் வோச்சா²த³னா பாபகிரியா – அயம் வுச்சதி மாயா. யஸ்ஸ புக்³க³லஸ்ஸ அயம் மாயா அப்பஹீனா – அயம் வுச்சதி புக்³க³லோ ‘‘மாயாவீ’’.

53. கதமோ ச புக்³க³லோ அஹிரிகோ? தத்த² கதமம் அஹிரிகம்? யம் ந ஹிரீயதி ஹிரியிதப்³பே³ன ந ஹிரீயதி பாபகானம் அகுஸலானம் த⁴ம்மானம் ஸமாபத்தியா – இத³ம் வுச்சதி அஹிரிகம். இமினா அஹிரிகேன ஸமன்னாக³தோ புக்³க³லோ ‘‘அஹிரிகோ’’.

54. கதமோ ச புக்³க³லோ அனோத்தப்பீ? தத்த² கதமம் அனோத்தப்பம்? யம் ந ஓத்தப்பதி ஓத்தப்பிதப்³பே³ன ந ஓத்தப்பதி பாபகானம் அகுஸலானம் த⁴ம்மானம் ஸமாபத்தியா – இத³ம் வுச்சதி அனோத்தப்பம். இமினா அனோத்தப்பேன ஸமன்னாக³தோ புக்³க³லோ ‘‘அனோத்தப்பீ’’.

55. கதமோ ச புக்³க³லோ து³ப்³ப³சோ? தத்த² கதமோ தோ³வசஸ்ஸதா? ஸஹத⁴ம்மிகே வுச்சமானே தோ³வசஸ்ஸாயம் தோ³வசஸ்ஸியம் தோ³வசஸ்ஸதா விப்படிகுலக்³கா³ஹிதா விபச்சனீகஸாததா அனாத³ரியம் அனாத³ரியதா அகா³ரவதா அப்பதிஸ்ஸவதா – அயம் வுச்சதி தோ³வசஸ்ஸதா. இமாய தோ³வசஸ்ஸதாய ஸமன்னாக³தோ புக்³க³லோ ‘‘து³ப்³ப³சோ’’.

56. கதமோ ச புக்³க³லோ பாபமித்தோ? தத்த² கதமா பாபமித்ததா? யே தே புக்³க³லா அஸ்ஸத்³தா⁴ து³ஸ்ஸீலா அப்பஸ்ஸுதா மச்ச²ரினோ து³ப்பஞ்ஞா, யா தேஸம் ஸேவனா நிஸேவனா ஸம்ஸேவனா ப⁴ஜனா ஸம்ப⁴ஜனா ப⁴த்தி ஸம்ப⁴த்தி ஸம்பவங்கதா – அயம் வுச்சதி பாபமித்ததா. இமாய பாபமித்ததாய ஸமன்னாக³தோ புக்³க³லோ ‘‘பாபமித்தோ’’.

57. கதமோ ச புக்³க³லோ இந்த்³ரியேஸு அகு³த்தத்³வாரோ? தத்த² கதமா இந்த்³ரியேஸு அகு³த்தத்³வாரதா? இதே⁴கச்சோ புக்³க³லோ சக்கு²னா ரூபம் தி³ஸ்வா நிமித்தக்³கா³ஹீ ஹோதி அனுப்³யஞ்ஜனக்³கா³ஹீ; யத்வாதி⁴கரணமேனம் சக்கு²ந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய ந படிபஜ்ஜதி, ந ரக்க²தி சக்கு²ந்த்³ரியம், சக்கு²ந்த்³ரியே ந ஸம்வரம் ஆபஜ்ஜதி. ஸோதேன ஸத்³த³ம் ஸுத்வா…பே… கா⁴னேன க³ந்த⁴ம் கா⁴யித்வா…பே… ஜிவ்ஹாய ரஸம் ஸாயித்வா…பே… காயேன போ²ட்ட²ப்³ப³ம் பு²ஸித்வா…பே… மனஸா த⁴ம்மம் விஞ்ஞாய நிமித்தக்³கா³ஹீ ஹோதி அனுப்³யஞ்ஜனக்³கா³ஹீ; யத்வாதி⁴கரணமேனம் மனிந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய ந படிபஜ்ஜதி, ந ரக்க²தி மனிந்த்³ரியம், மனிந்த்³ரியே ந ஸம்வரம் ஆபஜ்ஜதி. யா இமேஸம் ச²ன்னம் இந்த்³ரியானம் அகு³த்தி அகோ³பனா அனாரக்கோ² அஸம்வரோ – அயம் வுச்சதி இந்த்³ரியேஸு அகு³த்தத்³வாரதா. இமாய இந்த்³ரியேஸு அகு³த்தத்³வாரதாய ஸமன்னாக³தோ புக்³க³லோ ‘‘இந்த்³ரியேஸு அகு³த்தத்³வாரோ’’.

58. கதமோ ச புக்³க³லோ போ⁴ஜனே அமத்தஞ்ஞூ? தத்த² கதமா போ⁴ஜனே அமத்தஞ்ஞுதா? இதே⁴கச்சோ புக்³க³லோ அப்படிஸங்கா² அயோனிஸோ ஆஹாரம் ஆஹாரேதி த³வாய மதா³ய மண்ட³னாய விபூ⁴ஸனாய, யா தத்த² அஸந்துட்டி²தா அமத்தஞ்ஞுதா அப்படிஸங்கா² போ⁴ஜனே – அயம் வுச்சதி போ⁴ஜனே அமத்தஞ்ஞுதா. இமாய போ⁴ஜனே அமத்தஞ்ஞுதாய ஸமன்னாக³தோ புக்³க³லோ ‘‘போ⁴ஜனே அமத்தஞ்ஞூ’’.

59. கதமோ ச புக்³க³லோ முட்ட²ஸ்ஸதி? தத்த² கதமம் முட்ட²ஸ்ஸச்சம்? யா அஸ்ஸதி அனனுஸ்ஸதி அப்படிஸ்ஸதி அஸ்ஸதி அஸ்ஸரணதா அதா⁴ரணதா பிலாபனதா ஸம்முஸனதா – இத³ம் வுச்சதி முட்ட²ஸ்ஸச்சம். இமினா முட்ட²ஸ்ஸச்சேன ஸமன்னாக³தோ புக்³க³லோ ‘‘முட்ட²ஸ்ஸதி’’.

60. கதமோ ச புக்³க³லோ அஸம்பஜானோ? தத்த² கதமம் அஸம்பஜஞ்ஞம்? யம் அஞ்ஞாணம் அத³ஸ்ஸனம் அனபி⁴ஸமயோ அனனுபோ³தோ⁴ அஸம்போ³தோ⁴ அப்படிவேதோ⁴ அஸங்கா³ஹணா அபரியோகா³ஹணா [அஸம்கா³ஹனா அபரியோகா³ஹனா (ஸீ. ஸ்யா. க.)] அஸமபேக்க²ணா அபச்சவேக்க²ணா அபச்சக்க²கம்மம் து³ம்மேஜ்ஜ²ம் பா³ல்யம் அஸம்பஜஞ்ஞம் மோஹோ பமோஹோ ஸம்மோஹோ அவிஜ்ஜா அவிஜ்ஜோகோ⁴ அவிஜ்ஜாயோகோ³ அவிஜ்ஜானுஸயோ அவிஜ்ஜாபரியுட்டா²னம் அவிஜ்ஜாலங்கீ³ மோஹோ அகுஸலமூலம் – இத³ம் வுச்சதி அஸம்பஜஞ்ஞம். இமினா அஸம்பஜஞ்ஞேன ஸமன்னாக³தோ புக்³க³லோ ‘‘அஸம்பஜானோ’’.

61. கதமோ ச புக்³க³லோ ஸீலவிபன்னோ? தத்த² கதமா ஸீலவிபத்தி? காயிகோ வீதிக்கமோ வாசஸிகோ வீதிக்கமோ காயிகவாசஸிகோ வீதிக்கமோ – அயம் வுச்சதி ஸீலவிபத்தி. ஸப்³ப³ம்பி து³ஸ்ஸில்யம் ஸீலவிபத்தி. இமாய ஸீலவிபத்தியா ஸமன்னாக³தோ புக்³க³லோ ‘‘ஸீலவிபன்னோ’’.

62. கதமோ ச புக்³க³லோ தி³ட்டி²விபன்னோ? தத்த² கதமா தி³ட்டி²விபத்தி? ‘‘நத்தி² தி³ன்னம், நத்தி² யிட்ட²ம், நத்தி² ஹுதம், நத்தி² ஸுகதது³க்கடானம் [ஸுகடது³க்கடானம் (ஸீ.)] கம்மானம் ப²லம் விபாகோ, நத்தி² அயம் லோகோ, நத்தி² பரோ லோகோ, நத்தி² மாதா, நத்தி² பிதா, நத்தி² ஸத்தா ஓபபாதிகா, நத்தி² லோகே ஸமணப்³ராஹ்மணா ஸம்மக்³க³தா [ஸமக்³க³தா (க.)] ஸம்மாபடிபன்னா யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’’தி. யா ஏவரூபா தி³ட்டி² தி³ட்டி²க³தம் தி³ட்டி²க³ஹனம் தி³ட்டி²கந்தாரோ தி³ட்டி²விஸூகாயிகம் தி³ட்டி²விப்ப²ந்தி³தம் தி³ட்டி²ஸம்யோஜனம் கா³ஹோ படிக்³கா³ஹோ அபி⁴னிவேஸோ பராமாஸோ கும்மக்³கோ³ மிச்சா²பதோ² மிச்ச²த்தம் தித்தா²யதனம் விபரியாஸக்³கா³ஹோ [விபரியேஸக்³கா³ஹோ (ஸப்³ப³த்த²) பத³ஸித்³தி⁴ சிந்தேதப்³பா³], அயம் வுச்சதி தி³ட்டி²விபத்தி. ஸப்³பா³பி மிச்சா²தி³ட்டி² தி³ட்டி²விபத்தி. இமாய தி³ட்டி²விபத்தியா ஸமன்னாக³தோ புக்³க³லோ ‘‘தி³ட்டி²விபன்னோ’’.

63. கதமோ ச புக்³க³லோ அஜ்ஜ²த்தஸம்யோஜனோ? யஸ்ஸ புக்³க³லஸ்ஸ பஞ்சோரம்பா⁴கி³யானி ஸம்யோஜனானி அப்பஹீனானி – அயம் வுச்சதி புக்³க³லோ ‘‘அஜ்ஜ²த்தஸம்யோஜனோ’’.

64. கதமோ ச புக்³க³லோ ப³ஹித்³தா⁴ஸம்யோஜனோ? யஸ்ஸ புக்³க³லஸ்ஸ பஞ்சுத்³த⁴ம்பா⁴கி³யானி ஸம்யோஜனானி அப்பஹீனானி – அயம் வுச்சதி புக்³க³லோ ‘‘ப³ஹித்³தா⁴ஸம்யோஜனோ’’.

65. கதமோ ச புக்³க³லோ அக்கோத⁴னோ? தத்த² கதமோ கோதோ⁴? யோ கோதோ⁴ குஜ்ஜ²னா குஜ்ஜி²தத்தம் தோ³ஸோ து³ஸ்ஸனா து³ஸ்ஸிதத்தம் ப்³யாபத்தி ப்³யாபஜ்ஜனா ப்³யாபஜ்ஜிதத்தம் விரோதோ⁴ படிவிரோதோ⁴ சண்டி³க்கம் அஸுரோபோ அனத்தமனதா சித்தஸ்ஸ – அயம் வுச்சதி கோதோ⁴. யஸ்ஸ புக்³க³லஸ்ஸ அயம் கோதோ⁴ பஹீனோ – அயம் வுச்சதி புக்³க³லோ ‘‘அக்கோத⁴னோ’’.

66. கதமோ ச புக்³க³லோ அனுபனாஹீ? தத்த² கதமோ உபனாஹோ? புப்³ப³காலம் கோதோ⁴ அபரகாலம் உபனாஹோ யோ ஏவரூபோ உபனாஹோ உபனய்ஹனா உபனய்ஹிதத்தம் அட்ட²பனா ட²பனா ஸண்ட²பனா அனுஸம்ஸந்த³னா அனுப்பப³ந்த⁴னா த³ள்ஹீகம்மம் கோத⁴ஸ்ஸ – அயம் வுச்சதி உபனாஹோ. யஸ்ஸ புக்³க³லஸ்ஸ அயம் உபனாஹோ பஹீனோ – அயம் வுச்சதி புக்³க³லோ ‘‘அனுபனாஹீ’’.

67. கதமோ ச புக்³க³லோ அமக்கீ²? தத்த² கதமோ மக்கோ²? யோ மக்கோ² மக்கா²யனா மக்கா²யிதத்தம் நிட்டு²ரியம் நிட்டு²ரியகம்மம் – அயம் வுச்சதி மக்கோ². யஸ்ஸ புக்³க³லஸ்ஸ அயம் மக்கோ² பஹீனோ – அயம் வுச்சதி புக்³க³லோ ‘‘அமக்கீ²’’.

68. கதமோ ச புக்³க³லோ அபளாஸீ? தத்த² கதமோ பளாஸோ? யோ பளாஸோ பளாஸாயனா பளாஸாயிதத்தம் பளாஸாஹாரோ விவாத³ட்டா²னம் யுக³க்³கா³ஹோ அப்படினிஸ்ஸக்³கோ³ – அயம் வுச்சதி பளாஸோ. யஸ்ஸ புக்³க³லஸ்ஸ அயம் பளாஸோ பஹீனோ – அயம் வுச்சதி புக்³க³லோ ‘‘அபளாஸீ’’.

69. கதமோ ச புக்³க³லோ அனிஸ்ஸுகீ? தத்த² கதமா இஸ்ஸா? யா பரலாப⁴ஸக்காரக³ருகாரமானனவந்த³னபூஜனாஸு இஸ்ஸா இஸ்ஸாயனா இஸ்ஸாயிதத்தம் உஸூயா உஸூயனா உஸூயிதத்தம் – அயம் வுச்சதி இஸ்ஸா. யஸ்ஸ புக்³க³லஸ்ஸ அயம் இஸ்ஸா பஹீனா – அயம் வுச்சதி புக்³க³லோ ‘‘அனிஸ்ஸுகீ’’.

70. கதமோ ச புக³லோ அமச்ச²ரீ? தத்த² கதமம் மச்ச²ரியம்? பஞ்ச மச்ச²ரியானி – ஆவாஸமச்ச²ரியம், குலமச்ச²ரியம், லாப⁴மச்ச²ரியம், வண்ணமச்ச²ரியம், த⁴ம்மமச்ச²ரியம். யம் ஏவரூபம் மச்சே²ரம் மச்ச²ராயனா மச்ச²ராயிதத்தம் வேவிச்ச²ம் கத³ரியம் கடுகஞ்சுகதா அக்³க³ஹிதத்தம் சித்தஸ்ஸ – இத³ம் வுச்சதி மச்ச²ரியம். யஸ்ஸ புக்³க³லஸ்ஸ இத³ம் மச்ச²ரியம் பஹீனம் – அயம் வுச்சதி புக்³க³லோ ‘‘அமச்ச²ரீ’’.

71. கதமோ ச புக்³க³லோ அஸடோ²? தத்த² கதமம் ஸாடே²ய்யம்? இதே⁴கச்சோ ஸடோ² ஹோதி பரிஸடோ². யம் தத்த² ஸட²ம் ஸட²தா ஸாடே²ய்யம் கக்கரதா கக்கரியம் பரிக்க²த்ததா பாரிக்க²த்தியம் – இத³ம் வுச்சதி ஸாடே²ய்யம். யஸ்ஸ புக்³க³லஸ்ஸ இத³ம் ஸாடே²ய்யம் பஹீனம் – அயம் வுச்சதி புக்³க³லோ ‘‘அஸடோ²’’.

72. கதமோ ச புக்³க³லோ அமாயாவீ? தத்த² கதமா மாயா? இதே⁴கச்சோ புக்³க³லோ காயேன து³ச்சரிதம் சரித்வா வாசாய து³ச்சரிதம் சரித்வா மனஸா து³ச்சரிதம் சரித்வா தஸ்ஸ படிச்சா²த³னஹேது பாபிகம் இச்ச²ம் பணித³ஹதி – ‘‘மா மம் ஜஞ்ஞா’’தி இச்ச²தி, ‘‘மா மம் ஜஞ்ஞா’’தி ஸங்கப்பதி, ‘‘மா மம் ஜஞ்ஞா’’தி வாசம் பா⁴ஸதி, ‘‘மா மம் ஜஞ்ஞா’’தி காயேன பரக்கமதி. யா ஏவரூபா மாயா மாயாவிதா அச்சாஸரா வஞ்சனா நிகதி விகிரணா பரிஹரணா கூ³ஹனா பரிகூ³ஹனா சா²த³னா படிச்சா²த³னா அனுத்தானீகம்மம் அனாவிகம்மம் வோச்சா²த³னா பாபகிரியா – அயம் வுச்சதி மாயா. யஸ்ஸ புக்³க³லஸ்ஸ அயம் மாயா பஹீனா – அயம் வுச்சதி புக்³க³லோ ‘‘அமாயாவீ’’.

73. கதமோ ச புக்³க³லோ ஹிரிமா? தத்த² கதமா ஹிரீ? யம் ஹிரீயதி ஹிரியிதப்³பே³ன ஹிரீயதி பாபகானம் அகுஸலானம் த⁴ம்மானம் ஸமாபத்தியா – அயம் வுச்சதி ஹிரீ. இமாய ஹிரியா ஸமன்னாக³தோ புக்³க³லோ ‘‘ஹிரிமா’’.

74. கதமோ ச புக்³க³லோ ஓத்தப்பீ? தத்த² கதமம் ஓத்தப்பம்? யம் ஓத்தப்பதி ஓத்தப்பிதப்³பே³ன ஓத்தப்பதி பாபகானம் அகுஸலானம் த⁴ம்மானம் ஸமாபத்தியா – இத³ம் வுச்சதி ஓத்தப்பம். இமினா ஓத்தப்பேன ஸமன்னாக³தோ புக்³க³லோ ‘‘ஓத்தப்பீ’’.

75. கதமோ ச புக்³க³லோ ஸுவசோ? தத்த² கதமா ஸோவசஸ்ஸதா? ஸஹத⁴ம்மிகே வுச்சமானே ஸோவசஸ்ஸாயம் ஸோவசஸ்ஸியம் ஸோவசஸ்ஸதா அவிப்படிகுலக்³கா³ஹிதா அவிபச்சனீகஸாததா ஸாத³ரியம் ஸாத³ரியதா ஸகா³ரவதா ஸப்பதிஸ்ஸவதா – அயம் வுச்சதி ஸோவசஸ்ஸதா. இமாய ஸோவசஸ்ஸதாய ஸமன்னாக³தோ புக்³க³லோ ‘‘ஸுவசோ’’.

76. கதமோ ச புக்³க³லோ கல்யாணமித்தோ? தத்த² கதமா கல்யாணமித்ததா? யே தே புக்³க³லா ஸத்³தா⁴ ஸீலவந்தோ ப³ஹுஸ்ஸுதா சாக³வந்தோ பஞ்ஞவந்தோ, யா தேஸம் ஸேவனா நிஸேவனா ஸம்ஸேவனா ப⁴ஜனா ஸம்ப⁴ஜனா ப⁴த்தி ஸம்ப⁴த்தி ஸம்பவங்கதா – அயம் வுச்சதி கல்யாணமித்ததா. இமாய கல்யாணமித்ததாய ஸமன்னாக³தோ புக்³க³லோ ‘‘கல்யாணமித்தோ’’.

77. கதமோ ச புக்³க³லோ இந்த்³ரியேஸு கு³த்தத்³வாரோ? தத்த² கதமா இந்த்³ரியேஸு கு³த்தத்³வாரதா? இதே⁴கச்சோ புக்³க³லோ சக்கு²னா ரூபம் தி³ஸ்வா ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ; யத்வாதி⁴கரணமேனம் சக்கு²ந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜதி, ரக்க²தி சக்கு²ந்த்³ரியம் சக்கு²ந்த்³ரியே ஸம்வரம் ஆபஜ்ஜதி. ஸோதேன ஸத்³த³ம் ஸுத்வா…பே… கா⁴னேன க³ந்த⁴ம் கா⁴யித்வா…பே… ஜிவ்ஹாய ரஸம் ஸாயித்வா…பே… காயேன போ²ட்ட²ப்³ப³ம் பு²ஸித்வா…பே… மனஸா த⁴ம்மம் விஞ்ஞாய ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ; யத்வாதி⁴கரணமேனம் மனிந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜதி, ரக்க²தி மனிந்த்³ரியம், மனிந்த்³ரியே ஸம்வரம் ஆபஜ்ஜதி. யா இமேஸம் ச²ன்னம் இந்த்³ரியானம் கு³த்தி கோ³பனா ஆரக்கோ² ஸம்வரோ – அயம் வுச்சதி இந்த்³ரியேஸு கு³த்தத்³வாரதா. இமாய இந்த்³ரியேஸு கு³த்தத்³வாரதாய ஸமன்னாக³தோ புக்³க³லோ ‘‘இந்த்³ரியேஸு கு³த்தத்³வாரோ’’.

78. கதமோ ச புக்³க³லோ போ⁴ஜனே மத்தஞ்ஞூ? தத்த² கதமா போ⁴ஜனே மத்தஞ்ஞுதா? இதே⁴கச்சோ புக்³க³லோ படிஸங்கா² யோனிஸோ ஆஹாரம் ஆஹாரேதி – ‘‘நேவ த³வாய, ந மதா³ய, ந மண்ட³னாய, ந விபூ⁴ஸனாய; யாவதே³வ இமஸ்ஸ காயஸ்ஸ டி²தியா யாபனாய விஹிம்ஸூபரதியா ப்³ரஹ்மசரியானுக்³க³ஹாய. இதி புராணஞ்ச வேத³னம் படிஹங்கா²மி, நவஞ்ச வேத³னம் ந உப்பாதே³ஸ்ஸாமி, யாத்ரா ச மே ப⁴விஸ்ஸதி அனவஜ்ஜதா ச பா²ஸுவிஹாரோ சா’’தி. யா தத்த² ஸந்துட்டி²தா மத்தஞ்ஞுதா படிஸங்கா² போ⁴ஜனே – அயம் வுச்சதி போ⁴ஜனே மத்தஞ்ஞுதா. இமாய போ⁴ஜனே மத்தஞ்ஞுதாய ஸமன்னாக³தோ புக்³க³லோ ‘‘போ⁴ஜனே மத்தஞ்ஞூ’’.

79. கதமோ ச புக்³க³லோ உபட்டி²தஸ்ஸதி? தத்த² கதமா ஸதி? யா ஸதி அனுஸ்ஸதி படிஸ்ஸதி ஸதி ஸரணதா தா⁴ரணதா அபிலாபனதா அஸம்முஸனதா ஸதி ஸதிந்த்³ரியம் ஸதிப³லம் ஸம்மாஸதி – அயம் வுச்சதி ஸதி. இமாய ஸதியா ஸமன்னாக³தோ புக்³க³லோ ‘‘உபட்டி²தஸ்ஸதி’’.

80. கதமோ ச புக்³க³லோ ஸம்பஜானோ? தத்த² கதமம் ஸம்பஜஞ்ஞம்? யா பஞ்ஞா பஜானனா விசயோ பவிசயோ த⁴ம்மவிசயோ ஸல்லக்க²ணா உபலக்க²ணா பச்சுபலக்க²ணா பண்டி³ச்சம் கோஸல்லம் நேபுஞ்ஞம் வேப⁴ப்³யா சிந்தா உபபரிக்கா² பூ⁴ரீ மேதா⁴ பரிணாயிகா விபஸ்ஸனா ஸம்பஜஞ்ஞம் பதோதோ³ பஞ்ஞா பஞ்ஞிந்த்³ரியம் பஞ்ஞாப³லம் பஞ்ஞாஸத்த²ம் பஞ்ஞாபாஸாதோ³ பஞ்ஞாஆலோகோ பஞ்ஞாஓபா⁴ஸோ பஞ்ஞாபஜ்ஜோதோ பஞ்ஞாரதனம் அமோஹோ த⁴ம்மவிசயோ ஸம்மாதி³ட்டி² – இத³ம் வுச்சதி ஸம்பஜஞ்ஞம். இமினா ஸம்பஜஞ்ஞேன ஸமன்னாக³தோ புக்³க³லோ ‘‘ஸம்பஜானோ’’.

81. கதமோ ச புக்³க³லோ ஸீலஸம்பன்னோ? தத்த² கதமா ஸீலஸம்பதா³? காயிகோ அவீதிக்கமோ வாசஸிகோ அவீதிக்கமோ காயிகவாசஸிகோ அவீதிக்கமோ – அயம் வுச்சதி ஸீலஸம்பதா³. ஸப்³போ³பி ஸீலஸம்வரோ ஸீலஸம்பதா³. இமாய ஸீலஸம்பதா³ய ஸமன்னாக³தோ புக்³க³லோ ‘‘ஸீலஸம்பன்னோ’’.

82. கதமோ ச புக்³க³லோ தி³ட்டி²ஸம்பன்னோ? தத்த² கதமா தி³ட்டி²ஸம்பதா³? ‘‘அத்தி² தி³ன்னம், அத்தி² யிட்ட²ம், அத்தி² ஹுதம், அத்தி² ஸுகதது³க்கடானம் கம்மானம் ப²லம் விபாகோ, அத்தி² அயம் லோகோ, அத்தி² பரோ லோகோ, அத்தி² மாதா, அத்தி² பிதா, அத்தி² ஸத்தா ஓபபாதிகா, அத்தி² லோகே ஸமணப்³ராஹ்மணா ஸம்மக்³க³தா ஸம்மாபடிபன்னா யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’’தி. யா ஏவரூபா பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி² – அயம் வுச்சதி தி³ட்டி²ஸம்பதா³. ஸப்³பா³பி ஸம்மாதி³ட்டி² தி³ட்டி²ஸம்பதா³. இமாய தி³ட்டி²ஸம்பதா³ய ஸமன்னாக³தோ புக்³க³லோ ‘‘தி³ட்டி²ஸம்பன்னோ’’.

83. கதமே த்³வே புக்³க³லா து³ல்லபா⁴ லோகஸ்மிம்? யோ ச புப்³ப³காரீ, யோ ச கதஞ்ஞூ கதவேதீ³ – இமே த்³வே புக்³க³லா து³ல்லபா⁴ லோகஸ்மிம்.

84. கதமே த்³வே புக்³க³லா து³த்தப்பயா? யோ ச லத்³த⁴ம் லத்³த⁴ம் நிக்கி²பதி, யோ ச லத்³த⁴ம் லத்³த⁴ம் விஸ்ஸஜ்ஜேதி – இமே த்³வே புக்³க³லா ‘‘து³த்தப்பயா’’.

85. கதமே த்³வே புக்³க³லா ஸுதப்பயா? யோ ச லத்³த⁴ம் லத்³த⁴ம் ந நிக்கி²பதி, யோ ச லத்³த⁴ம் லத்³த⁴ம் ந விஸ்ஸஜ்ஜேதி – இமே த்³வே புக்³க³லா ‘‘ஸுதப்பயா’’.

86. கதமேஸம் த்³வின்னம் புக்³க³லானம் ஆஸவா வட்³ட⁴ந்தி? யோ ச ந குக்குச்சாயிதப்³ப³ம் குக்குச்சாயதி, யோ ச குக்குச்சாயிதப்³ப³ம் ந குக்குச்சாயதி – இமேஸம் த்³வின்னம் புக்³க³லானம் ஆஸவா வட்³ட⁴ந்தி.

87. கதமேஸம் த்³வின்னம் புக்³க³லானம் ஆஸவா ந வட்³ட⁴ந்தி? யோ ச ந குக்குச்சாயிதப்³ப³ம் ந குக்குச்சாயதி, யோ ச குக்குச்சாயிதப்³ப³ம் குக்குச்சாயதி – இமேஸம் த்³வின்னம் புக்³க³லானம் ஆஸவா ந வட்³ட⁴ந்தி.

88. கதமோ ச புக்³க³லோ ஹீனாதி⁴முத்தோ? இதே⁴கச்சோ புக்³க³லோ து³ஸ்ஸீலோ ஹோதி பாபத⁴ம்மோ, ஸோ அஞ்ஞம் து³ஸ்ஸீலம் பாபத⁴ம்மம் ஸேவதி ப⁴ஜதி பயிருபாஸதி – அயம் வுச்சதி புக்³க³லோ ‘‘ஹீனாதி⁴முத்தோ’’.

89. கதமோ ச புக்³க³லோ பணீதாதி⁴முத்தோ? இதே⁴கச்சோ புக்³க³லோ ஸீலவா ஹோதி கல்யாணத⁴ம்மோ, ஸோ அஞ்ஞம் ஸீலவந்தம் கல்யாணத⁴ம்மம் ஸேவதி ப⁴ஜதி பயிருபாஸதி – அயம் வுச்சதி புக்³க³லோ ‘‘பணீதாதி⁴முத்தோ’’.

90. கதமோ ச புக்³க³லோ தித்தோ? பச்சேகஸம்பு³த்³தா⁴ [பச்சேகபு³த்³தோ⁴ (ஸீ.)] யே ச ததா²க³தஸ்ஸ ஸாவகா அரஹந்தோ தித்தா. ஸம்மாஸம்பு³த்³தோ⁴ தித்தோ ச தப்பேதா ச [தப்பேதா ச, அயம் வுச்சதி புக்³க³லோ தித்தோ (ஸீ.)].

து³கனித்³தே³ஸோ.

3. திகபுக்³க³லபஞ்ஞத்தி

91. கதமோ ச புக்³க³லோ நிராஸோ? இதே⁴கச்சோ புக்³க³லோ து³ஸ்ஸீலோ ஹோதி பாபத⁴ம்மோ அஸுசி ஸங்கஸ்ஸரஸமாசாரோ படிச்ச²ன்னகம்மந்தோ அஸ்ஸமணோ ஸமணபடிஞ்ஞோ அப்³ரஹ்மசாரீ ப்³ரஹ்மசாரிபடிஞ்ஞோ அந்தோபூதி அவஸ்ஸுதோ கஸம்பு³ஜாதோ. ஸோ ஸுணாதி – ‘‘இத்த²ன்னாமோ கிர பி⁴க்கு² ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’’தி. தஸ்ஸ ந ஏவம் ஹோதி – ‘‘குதா³ஸ்ஸு நாமாஹம்பி ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸாமீ’’தி. அயம் வுச்சதி புக்³க³லோ ‘‘நிராஸோ’’.

92. கதமோ ச புக்³க³லோ ஆஸம்ஸோ? இதே⁴கச்சோ புக்³க³லோ ஸீலவா ஹோதி கல்யாணத⁴ம்மோ. ஸோ ஸுணாதி – ‘‘இத்த²ன்னாமோ கிர பி⁴க்கு² ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’’தி. தஸ்ஸ ஏவம் ஹோதி – ‘‘குதா³ஸ்ஸு நாமாஹம்பி ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸாமீ’’தி. அயம் வுச்சதி புக்³க³லோ ‘‘ஆஸம்ஸோ’’.

93. கதமோ ச புக்³க³லோ விக³தாஸோ? இதே⁴கச்சோ புக்³க³லோ ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. ஸோ ஸுணாதி – ‘‘இத்த²ன்னாமோ கிர பி⁴க்கு² ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’’தி. தஸ்ஸ ந ஏவம் ஹோதி – ‘‘குதா³ஸ்ஸு நாமாஹம்பி ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸாமீ’’தி. தம் கிஸ்ஸ ஹேது? யா ஹிஸ்ஸ புப்³பே³ அவிமுத்தஸ்ஸ விமுத்தாஸா, ஸா படிப்பஸ்ஸத்³தா⁴. அயம் வுச்சதி புக்³க³லோ ‘‘விக³தாஸோ’’.

94. தத்த² கதமே தயோ கி³லானூபமா புக்³க³லா? தயோ கி³லானா – இதே⁴கச்சோ கி³லானோ லப⁴ந்தோ வா ஸப்பாயானி போ⁴ஜனானி அலப⁴ந்தோ வா ஸப்பாயானி போ⁴ஜனானி, லப⁴ந்தோ வா ஸப்பாயானி பே⁴ஸஜ்ஜானி அலப⁴ந்தோ வா ஸப்பாயானி பே⁴ஸஜ்ஜானி, லப⁴ந்தோ வா பதிரூபம் உபட்டா²கம் அலப⁴ந்தோ வா பதிரூபம் உபட்டா²கம், நேவ வுட்டா²தி தம்ஹா ஆபா³தா⁴. (1)

இத⁴ பனேகச்சோ கி³லானோ லப⁴ந்தோ வா ஸப்பாயானி போ⁴ஜனானி அலப⁴ந்தோ வா ஸப்பாயானி போ⁴ஜனானி, லப⁴ந்தோ வா ஸப்பாயானி பே⁴ஸஜ்ஜானி அலப⁴ந்தோ வா ஸப்பாயானி பே⁴ஸஜ்ஜானி, லப⁴ந்தோ வா பதிரூபம் உபட்டா²கம் அலப⁴ந்தோ வா பதிரூபம் உபட்டா²கம், வுட்டா²தி தம்ஹா ஆபா³தா⁴. (2)

இத⁴ பனேகச்சோ கி³லானோ லப⁴ந்தோ ஸப்பாயானி போ⁴ஜனானி நோ அலப⁴ந்தோ, லப⁴ந்தோ ஸப்பாயானி பே⁴ஸஜ்ஜானி நோ அலப⁴ந்தோ, லப⁴ந்தோ பதிரூபம் உபட்டா²கம் நோ அலப⁴ந்தோ, வுட்டா²தி தம்ஹா ஆபா³தா⁴. (3)

தத்ர ய்வாயம் கி³லானோ லப⁴ந்தோ ஸப்பாயானி போ⁴ஜனானி நோ அலப⁴ந்தோ, லப⁴ந்தோ ஸப்பாயானி பே⁴ஸஜ்ஜானி நோ அலப⁴ந்தோ, லப⁴ந்தோ பதிரூபம் உபட்டா²கம் நோ அலப⁴ந்தோ, வுட்டா²தி தம்ஹா ஆபா³தா⁴, இமம் கி³லானம் படிச்ச ப⁴க³வதா கி³லானப⁴த்தம் அனுஞ்ஞாதம் கி³லானபே⁴ஸஜ்ஜம் அனுஞ்ஞாதம் கி³லானுபட்டா²கோ அனுஞ்ஞாதோ. இமஞ்ச பன கி³லானம் படிச்ச அஞ்ஞேபி கி³லானா உபட்டா²தப்³பா³.

ஏவமேவம் [ஏவமேவ (ஸீ.)] தயோ கி³லானூபமா புக்³க³லா ஸந்தோ ஸம்விஜ்ஜமானா லோகஸ்மிம். கதமே தயோ? இதே⁴கச்சோ புக்³க³லோ லப⁴ந்தோ வா ததா²க³தம் த³ஸ்ஸனாய அலப⁴ந்தோ வா ததா²க³தம் த³ஸ்ஸனாய, லப⁴ந்தோ வா ததா²க³தப்பவேதி³தம் த⁴ம்மவினயம் ஸவணாய அலப⁴ந்தோ வா ததா²க³தப்பவேதி³தம் த⁴ம்மவினயம் ஸவணாய, நேவ ஓக்கமதி நியாமம் குஸலேஸு த⁴ம்மேஸு ஸம்மத்தம். (1)

இத⁴ பனேகச்சோ புக்³க³லோ லப⁴ந்தோ வா ததா²க³தம் த³ஸ்ஸனாய அலப⁴ந்தோ வா ததா²க³தம் த³ஸ்ஸனாய, லப⁴ந்தோ வா ததா²க³தப்பவேதி³தம் த⁴ம்மவினயம் ஸவணாய அலப⁴ந்தோ வா ததா²க³தப்பவேதி³தம் த⁴ம்மவினயம் ஸவணாய, ஓக்கமதி நியாமம் குஸலேஸு த⁴ம்மேஸு ஸம்மத்தம். (2)

இத⁴ பனேகச்சோ புக்³க³லோ லப⁴ந்தோ ததா²க³தம் த³ஸ்ஸனாய நோ அலப⁴ந்தோ, லப⁴ந்தோ ததா²க³தப்பவேதி³தம் த⁴ம்மவினயம் ஸவணாய நோ அலப⁴ந்தோ, ஓக்கமதி நியாமம் குஸலேஸு த⁴ம்மேஸு ஸம்மத்தம். (3)

தத்ர ய்வாயம் புக்³க³லோ லப⁴ந்தோ ததா²க³தம் த³ஸ்ஸனாய நோ அலப⁴ந்தோ, லப⁴ந்தோ ததா²க³தப்பவேதி³தம் த⁴ம்மவினயம் ஸவணாய நோ அலப⁴ந்தோ, ஓக்கமதி நியாமம் குஸலேஸு த⁴ம்மேஸு ஸம்மத்தம், இமம் புக்³க³லம் படிச்ச ப⁴க³வதா த⁴ம்மதே³ஸனா அனுஞ்ஞாதா, இமஞ்ச புக்³க³லம் படிச்ச அஞ்ஞேஸம்பி த⁴ம்மோ தே³ஸேதப்³போ³. இமே தயோ கி³லானூபமா புக்³க³லா ஸந்தோ ஸம்விஜ்ஜமானா லோகஸ்மிம்.

95. கதமோ ச புக்³க³லோ காயஸக்கீ²? இதே⁴கச்சோ புக்³க³லோ அட்ட² விமோக்கே² காயேன பு²ஸித்வா விஹரதி, பஞ்ஞாய சஸ்ஸ தி³ஸ்வா ஏகச்சே ஆஸவா பரிக்கீ²ணா ஹோந்தி – அயம் வுச்சதி புக்³க³லோ ‘‘காயஸக்கீ²’’.

96. கதமோ ச புக்³க³லோ தி³ட்டி²ப்பத்தோ? இதே⁴கச்சோ புக்³க³லோ ‘‘இத³ம் து³க்க²’’ந்தி யதா²பூ⁴தம் பஜானாதி, ‘‘அயம் து³க்க²ஸமுத³யோ’’தி யதா²பூ⁴தம் பஜானாதி, ‘‘அயம் து³க்க²னிரோதோ⁴’’தி யதா²பூ⁴தம் பஜானாதி, ‘‘அயம் து³க்க²னிரோத⁴கா³மினீ படிபதா³’’தி யதா²பூ⁴தம் பஜானாதி, ததா²க³தப்பவேதி³தா சஸ்ஸ த⁴ம்மா பஞ்ஞாய வோதி³ட்டா² ஹோந்தி வோசரிதா, பஞ்ஞாய சஸ்ஸ தி³ஸ்வா ஏகச்சே ஆஸவா பரிக்கீ²ணா ஹோந்தி – அயம் வுச்சதி புக்³க³லோ ‘‘தி³ட்டி²ப்பத்தோ’’.

97. கதமோ ச புக்³க³லோ ஸத்³தா⁴விமுத்தோ? இதே⁴கச்சோ புக்³க³லோ ‘‘இத³ம் து³க்க²’’ந்தி யதா²பூ⁴தம் பஜானாதி…பே… ததா²க³தப்பவேதி³தா சஸ்ஸ த⁴ம்மா பஞ்ஞாய வோதி³ட்டா² ஹோந்தி வோசரிதா, பஞ்ஞாய சஸ்ஸ தி³ஸ்வா ஏகச்சே ஆஸவா பரிக்கீ²ணா ஹோந்தி, நோ ச கோ² யதா²தி³ட்டி²ப்பத்தஸ்ஸ – அயம் வுச்சதி புக்³க³லோ ‘‘ஸத்³தா⁴விமுத்தோ’’.

98. கதமோ ச புக்³க³லோ கூ³த²பா⁴ணீ? இதே⁴கச்சோ புக்³க³லோ முஸாவாதீ³ ஹோதி ஸப⁴க்³க³தோ வா பரிஸக்³க³தோ வா ஞாதிமஜ்ஜ²க³தோ வா பூக³மஜ்ஜ²க³தோ வா ராஜகுலமஜ்ஜ²க³தோ வா அபி⁴னீதோ ஸக்கி²புட்டோ² – ‘‘ஏஹம்போ⁴ [ஏஹி போ⁴ (ஸ்யா. க.) ம. நி. 1.440; அ. நி. 3.28], புரிஸ, யம் ஜானாஸி தம் வதே³ஹீ’’தி, ஸோ அஜானம் வா ஆஹ – ‘‘ஜானாமீ’’தி, ஜானம் வா ஆஹ – ‘‘ந ஜானாமீ’’தி, அபஸ்ஸம் வா ஆஹ – ‘‘பஸ்ஸாமீ’’தி, பஸ்ஸம் வா ஆஹ – ‘‘ந பஸ்ஸாமீ’’தி. இதி அத்தஹேது வா பரஹேது வா ஆமிஸகிஞ்சிக்க²ஹேது வா ஸம்பஜானமுஸா பா⁴ஸிதா ஹோதி – அயம் வுச்சதி புக்³க³லோ ‘‘கூ³த²பா⁴ணீ’’.

99. கதமோ ச புக்³க³லோ புப்ப²பா⁴ணீ? இதே⁴கச்சோ புக்³க³லோ முஸாவாத³ம் பஹாய முஸாவாதா³ படிவிரதோ ஹோதி ஸப⁴க்³க³தோ வா பரிஸக்³க³தோ வா ஞாதிமஜ்ஜ²க³தோ வா பூக³மஜ்ஜ²க³தோ வா ராஜகுலமஜ்ஜ²க³தோ வா அபி⁴னீதோ ஸக்கி²புட்டோ² – ‘‘ஏஹம்போ⁴, புரிஸ, யம் ஜானாஸி தம் வதே³ஹீ’’தி, ஸோ அஜானம் வா ஆஹ – ‘‘ந ஜானாமீ’’தி, ஜானம் வா ஆஹ – ‘‘ஜானாமீ’’தி, அபஸ்ஸம் வா ஆஹ – ‘‘ந பஸ்ஸாமீ’’தி, பஸ்ஸம் வா ஆஹ – ‘‘பஸ்ஸாமீ’’தி. இதி அத்தஹேது வா பரஹேது வா ஆமிஸகிஞ்சிக்க²ஹேது வா ந ஸம்பஜானமுஸா பா⁴ஸிதா ஹோதி – அயம் வுச்சதி புக்³க³லோ ‘‘புப்ப²பா⁴ணீ’’.

100. கதமோ ச புக்³க³லோ மது⁴பா⁴ணீ? இதே⁴கச்சோ புக்³க³லோ யா ஸா வாசா நேலா கண்ணஸுகா² பேமனியா ஹத³யங்க³மா போரீ ப³ஹுஜனகந்தா ப³ஹுஜனமனாபா, ததா²ரூபிம் வாசம் பா⁴ஸிதா ஹோதி – அயம் வுச்சதி புக்³க³லோ ‘‘மது⁴பா⁴ணீ’’.

101. கதமோ ச புக்³க³லோ அருகூபமசித்தோ? இதே⁴கச்சோ புக்³க³லோ கோத⁴னோ ஹோதி உபாயாஸப³ஹுலோ, அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி [பதிட்டீ²யதி (ஸ்யா. க.) அ. நி. 3.25], கோபஞ்ச தோ³ஸஞ்ச அப்பச்சயஞ்ச பாதுகரோதி. ஸேய்யதா²பி நாம து³ட்டா²ருகோ கட்டே²ன வா கட²லாய [கத²லாய (க.), கத²லேன (அட்ட²கதா²) அ. நி. 3.25] வா க⁴ட்டிதோ பி⁴ய்யோஸோ மத்தாய ஆஸவம் தே³தி [அஸ்ஸவனோதி (ஸீ.)], ஏவமேவம் இதே⁴கச்சோ புக்³க³லோ கோத⁴னோ ஹோதி உபாயாஸப³ஹுலோ, அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி, கோபஞ்ச தோ³ஸஞ்ச அப்பச்சயஞ்ச பாதுகரோதி – அயம் வுச்சதி புக்³க³லோ ‘‘அருகூபமசித்தோ’’.

102. கதமோ ச புக்³க³லோ விஜ்ஜூபமசித்தோ? இதே⁴கச்சோ புக்³க³லோ ‘‘இத³ம் து³க்க²’’ந்தி யதா²பூ⁴தம் பஜானாதி, ‘‘அயம் து³க்க²ஸமுத³யோ’’தி யதா²பூ⁴தம் பஜானாதி, ‘‘அயம் து³க்க²னிரோதோ⁴’’தி யதா²பூ⁴தம் பஜானாதி, ‘‘அயம் து³க்க²னிரோத⁴கா³மினீ படிபதா³’’தி யதா²பூ⁴தம் பஜானாதி. ஸேய்யதா²பி நாம சக்கு²மா புரிஸோ ரத்தந்த⁴காரதிமிஸாய விஜ்ஜந்தரிகாய ரூபானி பஸ்ஸேய்ய, ஏவமேவம் இதே⁴கச்சோ புக்³க³லோ ‘‘இத³ம் து³க்க²’’ந்தி யதா²பூ⁴தம் பஜானாதி, ‘‘அயம் து³க்க²ஸமுத³யோ’’தி யதா²பூ⁴தம் பஜானாதி, ‘‘அயம் து³க்க²னிரோதோ⁴’’தி யதா²பூ⁴தம் பஜானாதி, ‘‘அயம் து³க்க²னிரோத⁴கா³மினீ படிபதா³’’தி யதா²பூ⁴தம் பஜானாதி – அயம் வுச்சதி புக்³க³லோ ‘‘விஜ்ஜூபமசித்தோ’’.

103. கதமோ ச புக்³க³லோ வஜிரூபமசித்தோ? இதே⁴கச்சோ புக்³க³லோ ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. ஸேய்யதா²பி நாம வஜிரஸ்ஸ நத்தி² கிஞ்சி அபே⁴ஜ்ஜம் மணி வா பாஸாணோ வா, ஏவமேவம் இதே⁴கச்சோ புக்³க³லோ ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி – அயம் வுச்சதி புக்³க³லோ ‘‘வஜிரூபமசித்தோ’’.

104. கதமோ ச புக்³க³லோ அந்தோ⁴? இதே⁴கச்சஸ்ஸ புக்³க³லஸ்ஸ ததா²ரூபம் சக்கு² ந ஹோதி யதா²ரூபேன சக்கு²னா அனதி⁴க³தம் வா போ⁴க³ம் அதி⁴க³ச்சே²ய்ய, அதி⁴க³தம் வா போ⁴க³ம் பா²திம் கரேய்ய; ததா²ரூபம்பிஸ்ஸ சக்கு² ந ஹோதி யதா²ரூபேன சக்கு²னா குஸலாகுஸலே த⁴ம்மே ஜானேய்ய, ஸாவஜ்ஜானவஜ்ஜே த⁴ம்மே ஜானேய்ய, ஹீனப்பணீதே த⁴ம்மே ஜானேய்ய, கண்ஹஸுக்கஸப்படிபா⁴கே³ த⁴ம்மே ஜானேய்ய – அயம் வுச்சதி புக்³க³லோ ‘‘அந்தோ⁴’’.

105. கதமோ ச புக்³க³லோ ஏகசக்கு²? இதே⁴கச்சஸ்ஸ புக்³க³லஸ்ஸ ததா²ரூபம் சக்கு² ஹோதி, யதா²ரூபேன சக்கு²னா அனதி⁴க³தம் வா போ⁴க³ம் அதி⁴க³ச்சே²ய்ய, அதி⁴க³தம் வா போ⁴க³ம் பா²திம் கரேய்ய; ததா²ரூபம்பிஸ்ஸ சக்கு² ந ஹோதி யதா²ரூபேன சக்கு²னா குஸலாகுஸலே த⁴ம்மே ஜானேய்ய, ஸாவஜ்ஜானவஜ்ஜே த⁴ம்மே ஜானேய்ய, ஹீனப்பணீதே த⁴ம்மே ஜானேய்ய, கண்ஹஸுக்கஸப்படிபா⁴கே³ த⁴ம்மே ஜானேய்ய – அயம் வுச்சதி புக்³க³லோ ‘‘ஏகசக்கு²’’.

106. கதமோ ச புக்³க³லோ த்³விசக்கு²? இதே⁴கச்சஸ்ஸ புக்³க³லஸ்ஸ ததா²ரூபம் சக்கு² ஹோதி யதா²ரூபேன சக்கு²னா அனதி⁴க³தம் வா போ⁴க³ம் அதி⁴க³ச்சே²ய்ய, அதி⁴க³தம் வா போ⁴க³ம் பா²திம் கரேய்ய; ததா²ரூபம்பிஸ்ஸ சக்கு² ஹோதி யதா²ரூபேன சக்கு²னா குஸலாகுஸலே த⁴ம்மே ஜானேய்ய, ஸாவஜ்ஜானவஜ்ஜே த⁴ம்மே ஜானேய்ய, ஹீனப்பணீதே த⁴ம்மே ஜானேய்ய, கண்ஹஸுக்கஸப்படிபா⁴கே³ த⁴ம்மே ஜானேய்ய – அயம் வுச்சதி புக்³க³லோ ‘‘த்³விசக்கு²’’.

107. கதமோ ச புக்³க³லோ அவகுஜ்ஜபஞ்ஞோ? இதே⁴கச்சோ புக்³க³லோ ஆராமம் க³ந்தா [க³தோ (ஸீ.), க³ந்த்வா (ஸ்யா.)] ஹோதி அபி⁴க்க²ணம் பி⁴க்கூ²னம் ஸந்திகே த⁴ம்மஸ்ஸவணாய [த⁴ம்மஸ்ஸவனாய (ஸ்யா.)]. தஸ்ஸ பி⁴க்கூ² த⁴ம்மம் தே³ஸேந்தி ஆதி³கல்யாணம் மஜ்ஜே²கல்யாணம் பரியோஸானகல்யாணம் ஸாத்த²ம் ஸப்³யஞ்ஜனம் கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேந்தி. ஸோ தஸ்மிம் ஆஸனே நிஸின்னோ தஸ்ஸா கதா²ய நேவ ஆதி³ம் மனஸி கரோதி, ந மஜ்ஜ²ம் மனஸி கரோதி, ந பரியோஸானம் மனஸி கரோதி. வுட்டி²தோபி தம்ஹா ஆஸனா தஸ்ஸா கதா²ய நேவ ஆதி³ம் மனஸி கரோதி, ந மஜ்ஜ²ம் மனஸி கரோதி, ந பரியோஸானம் மனஸி கரோதி. ஸேய்யதா²பி நாம கும்போ⁴ நிக்குஜ்ஜோ [நிகுஜ்ஜோ (ஸ்யா.) அ. நி. 3.30] தத்ர உத³கம் ஆஸித்தம் விவட்டதி, நோ ஸண்டா²தி; ஏவமேவம் இதே⁴கச்சோ புக்³க³லோ ஆராமம் க³ந்தா ஹோதி அபி⁴க்க²ணம் பி⁴க்கூ²னம் ஸந்திகே த⁴ம்மஸ்ஸவணாய. தஸ்ஸ பி⁴க்கூ² த⁴ம்மம் தே³ஸேந்தி ஆதி³கல்யாணம் மஜ்ஜே²கல்யாணம் பரியோஸானகல்யாணம் ஸாத்த²ம் ஸப்³யஞ்ஜனம் கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேந்தி. ஸோ தஸ்மிம் ஆஸனே நிஸின்னோ தஸ்ஸா கதா²ய நேவ ஆதி³ம் மனஸி கரோதி, ந மஜ்ஜ²ம் மனஸி கரோதி, ந பரியோஸானம் மனஸி கரோதி. வுட்டி²தோபி தம்ஹா ஆஸனா தஸ்ஸா கதா²ய நேவ ஆதி³ம் மனஸி கரோதி, ந மஜ்ஜ²ம் மனஸி கரோதி, ந பரியோஸானம் மனஸி கரோதி – அயம் வுச்சதி புக்³க³லோ ‘‘அவகுஜ்ஜபஞ்ஞோ’’.

108. கதமோ ச புக்³க³லோ உச்ச²ங்க³பஞ்ஞோ? இதே⁴கச்சோ புக்³க³லோ ஆராமம் க³ந்தா ஹோதி அபி⁴க்க²ணம் பி⁴க்கூ²னம் ஸந்திகே த⁴ம்மஸ்ஸவணாய. தஸ்ஸ பி⁴க்கூ² த⁴ம்மம் தே³ஸேந்தி ஆதி³கல்யாணம் மஜ்ஜே²கல்யாணம் பரியோஸானகல்யாணம் ஸாத்த²ம் ஸப்³யஞ்ஜனம் கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேந்தி. ஸோ தஸ்மிம் ஆஸனே நிஸின்னோ தஸ்ஸா கதா²ய ஆதி³ம்பி மனஸி கரோதி, மஜ்ஜ²ம்பி மனஸி கரோதி, பரியோஸானம்பி மனஸி கரோதி. வுட்டி²தோ ச கோ² தம்ஹா ஆஸனா தஸ்ஸா கதா²ய நேவ ஆதி³ம் மனஸி கரோதி, ந மஜ்ஜ²ம் மனஸி கரோதி, ந பரியோஸானம் மனஸி கரோதி. ஸேய்யதா²பி நாம புரிஸஸ்ஸ உச்ச²ங்கே³ நானாக²ஜ்ஜகானி ஆகிண்ணானி – திலா தண்டு³லா [திலதண்டு³லா (க.) அ. நி. 3.30] மோத³கா ப³த³ரா. ஸோ தம்ஹா ஆஸனா வுட்ட²ஹந்தோ ஸதிஸம்மோஸா பகிரேய்ய. ஏவமேவம் இதே⁴கச்சோ புக்³க³லோ ஆராமம் க³ந்தா ஹோதி அபி⁴க்க²ணம் பி⁴க்கூ²னம் ஸந்திகே த⁴ம்மஸ்ஸவணாய. தஸ்ஸ பி⁴க்கூ² த⁴ம்மம் தே³ஸேந்தி ஆதி³கல்யாணம் மஜ்ஜே²கல்யாணம் பரியோஸானகல்யாணம் ஸாத்த²ம் ஸப்³யஞ்ஜனம் கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேந்தி. ஸோ தஸ்மிம் ஆஸனே நிஸின்னோ தஸ்ஸா கதா²ய ஆதி³ம்பி மனஸி கரோதி, மஜ்ஜ²ம்பி மனஸி கரோதி, பரியோஸானம்பி மனஸி கரோதி. வுட்டி²தோ ச கோ² தம்ஹா ஆஸனா தஸ்ஸா கதா²ய நேவ ஆதி³ம்பி மனஸி கரோதி, ந மஜ்ஜ²ம்பி மனஸி கரோதி, ந பரியோஸானம்பி மனஸி கரோதி – அயம் வுச்சதி புக்³க³லோ ‘‘உச்ச²ங்க³பஞ்ஞோ’’.

109. கதமோ ச புக்³க³லோ புது²பஞ்ஞோ? இதே⁴கச்சோ புக்³க³லோ ஆராமம் க³ந்தா ஹோதி அபி⁴க்க²ணம் பி⁴க்கூ²னம் ஸந்திகே த⁴ம்மஸ்ஸவணாய. தஸ்ஸ பி⁴க்கூ² த⁴ம்மம் தே³ஸேந்தி ஆதி³கல்யாணம் மஜ்ஜே²கல்யாணம் பரியோஸானகல்யாணம் ஸாத்த²ம் ஸப்³யஞ்ஜனம் கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேந்தி. ஸோ தஸ்மிம் ஆஸனே நிஸின்னோ தஸ்ஸா கதா²ய ஆதி³ம்பி மனஸி கரோதி, மஜ்ஜ²ம்பி மனஸி கரோதி, பரியோஸானம்பி மனஸி கரோதி. வுட்டி²தோபி தம்ஹா ஆஸனா தஸ்ஸா கதா²ய ஆதி³ம்பி மனஸி கரோதி, மஜ்ஜ²ம்பி மனஸி கரோதி, பரியோஸானம்பி மனஸி கரோதி. ஸேய்யதா²பி நாம கும்போ⁴ உக்குஜ்ஜோ தத்ர உத³கம் ஆஸித்தம் ஸண்டா²தி, நோ விவட்டதி; ஏவமேவம் இதே⁴கச்சோ புக்³க³லோ ஆராமம் க³ந்தா ஹோந்தி அபி⁴க்க²ணம் பி⁴க்கூ²னம் ஸந்திகே த⁴ம்மஸ்ஸவணாய. தஸ்ஸ பி⁴க்கூ² த⁴ம்மம் தே³ஸேந்தி ஆதி³கல்யாணம் மஜ்ஜே²கல்யாணம் பரியோஸானகல்யாணம் ஸாத்த²ம் ஸப்³யஞ்ஜனம் கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேந்தி. ஸோ தஸ்மிம் ஆஸனே நிஸின்னோ தஸ்ஸா கதா²ய ஆதி³ம்பி மனஸி கரோதி, மஜ்ஜ²ம்பி மனஸி கரோதி, பரியோஸானம்பி மனஸி கரோதி. வுட்டி²தோபி தம்ஹா ஆஸனா தஸ்ஸா கதா²ய ஆதி³ம்பி மனஸி கரோதி, மஜ்ஜ²ம்பி மனஸி கரோதி, பரியோஸானம்பி மனஸி கரோதி – அயம் வுச்சதி புக்³க³லோ ‘‘புது²பஞ்ஞோ’’.

110. கதமோ ச புக்³க³லோ காமேஸு ச ப⁴வேஸு ச அவீதராகோ³? ஸோதாபன்னஸகதா³கா³மினோ – இமே வுச்சந்தி புக்³க³லா ‘‘காமேஸு ச ப⁴வேஸு ச அவீதராகா³’’.

111. கதமோ ச புக்³க³லோ காமேஸு வீதராகோ³, ப⁴வேஸு அவீதராகோ³? அனாகா³மீ – அயம் வுச்சதி புக்³க³லோ ‘‘காமேஸு வீதராகோ³, ப⁴வேஸு அவீதராகோ³’’.

112. கதமோ ச புக்³க³லோ காமேஸு ச ப⁴வேஸு ச வீதராகோ³? அரஹா – அயம் வுச்சதி புக்³க³லோ ‘‘காமேஸு ச ப⁴வேஸு ச வீதராகோ³’’.

113. கதமோ ச புக்³க³லோ பாஸாணலேகூ²பமோ? இதே⁴கச்சோ புக்³க³லோ அபி⁴ண்ஹம் குஜ்ஜ²தி. ஸோ ச க்²வஸ்ஸ கோதோ⁴ சிரம் தீ³க⁴ரத்தம் அனுஸேதி. ஸேய்யதா²பி நாம பாஸாணே லேகா² ந கி²ப்பம் லுஜ்ஜதி வாதேன வா உத³கேன வா, சிரட்டி²திகா ஹோதி; ஏவமேவம் இதே⁴கச்சோ புக்³க³லோ அபி⁴ண்ஹம் குஜ்ஜ²தி. ஸோ ச க்²வஸ்ஸ கோதோ⁴ சிரம் தீ³க⁴ரத்தம் அனுஸேதி – அயம் வுச்சதி புக்³க³லோ ‘‘பாஸாணலேகூ²பமோ’’.

114. கதமோ ச புக்³க³லோ பத²விலேகூ²பமோ? இதே⁴கச்சோ புக்³க³லோ அபி⁴ண்ஹம் குஜ்ஜ²தி. ஸோ ச க்²வஸ்ஸ கோதோ⁴ ந சிரம் தீ³க⁴ரத்தம் அனுஸேதி. ஸேய்யதா²பி நாம பத²வியா [பட²வியா (ஸீ. ஸ்யா.)] லேகா² கி²ப்பம் லுஜ்ஜதி வாதேன வா உத³கேன வா, ந சிரட்டி²திகா ஹோதி; ஏவமேவம் இதே⁴கச்சோ புக்³க³லோ அபி⁴ண்ஹம் குஜ்ஜ²தி. ஸோ ச க்²வஸ்ஸ கோதோ⁴ ந சிரம் தீ³க⁴ரத்தம் அனுஸேதி – அயம் வுச்சதி புக்³க³லோ ‘‘பத²விலேகூ²பமோ’’.

115. கதமோ ச புக்³க³லோ உத³கலேகூ²பமோ? இதே⁴கச்சோ புக்³க³லோ ஆகா³ள்ஹேனபி வுச்சமானோ ப²ருஸேனபி வுச்சமானோ அமனாபேனபி வுச்சமானோ ஸம்ஸந்த³திமேவ [… சேவ (ஸ்யா.) அ. நி. 3.133] ஸந்தி⁴யதிமேவ [… சேவ (ஸ்யா.) அ. நி. 3.133] ஸம்மோத³திமேவ [… சேவ (ஸ்யா.) அ. நி. 3.133]. ஸேய்யதா²பி நாம உத³கே லேகா² கி²ப்பம் லுஜ்ஜதி, ந சிரட்டி²திகா ஹோதி; ஏவமேவம் இதே⁴கச்சோ புக்³க³லோ ஆகா³ள்ஹேனபி வுச்சமானோ ப²ருஸேனபி வுச்சமானோ அமனாபேனபி வுச்சமானோ ஸம்ஸந்த³திமேவ ஸந்தி⁴யதிமேவ ஸம்மோத³திமேவ – அயம் வுச்சதி புக்³க³லோ ‘‘உத³கலேகூ²பமோ’’.

116. தத்த² கதமே தயோ போத்த²கூபமா புக்³க³லா? தயோ போத்த²கா – நவோபி போத்த²கோ து³ப்³ப³ண்ணோ சேவ ஹோதி து³க்க²ஸம்ப²ஸ்ஸோ ச அப்பக்³கோ⁴ ச, மஜ்ஜி²மோபி போத்த²கோ து³ப்³ப³ண்ணோ சேவ ஹோதி து³க்க²ஸம்ப²ஸ்ஸோ ச அப்பக்³கோ⁴ ச, ஜிண்ணோபி போத்த²கோ து³ப்³ப³ண்ணோ சேவ ஹோதி து³க்க²ஸம்ப²ஸ்ஸோ ச அப்பக்³கோ⁴ ச. ஜிண்ணம்பி போத்த²கம் உக்க²லிபரிமஜ்ஜனம் வா கரோந்தி ஸங்காரகூடே வா நம் ச²ட்³டே³ந்தி. ஏவமேவம் தயோமே போத்த²கூபமா புக்³க³லா ஸந்தோ ஸம்விஜ்ஜமானா பி⁴க்கூ²ஸு. கதமே தயோ? நவோ சேபி பி⁴க்கு² ஹோதி து³ஸ்ஸீலோ பாபத⁴ம்மோ, இத³மஸ்ஸ து³ப்³ப³ண்ணதாய. ஸேய்யதா²பி ஸோ போத்த²கோ து³ப்³ப³ண்ணோ, ததூ²பமோ அயம் புக்³க³லோ. யே கோ² பனஸ்ஸ ஸேவந்தி ப⁴ஜந்தி பயிருபாஸந்தி தி³ட்டா²னுக³திம் ஆபஜ்ஜந்தி, தேஸம் தம் ஹோதி தீ³க⁴ரத்தம் அஹிதாய து³க்கா²ய. இத³மஸ்ஸ து³க்க²ஸம்ப²ஸ்ஸதாய. ஸேய்யதா²பி ஸோ போத்த²கோ து³க்க²ஸம்ப²ஸ்ஸோ, ததூ²பமோ அயம் புக்³க³லோ. யேஸம் கோ² பன ஸோ படிக்³க³ண்ஹாதி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம், தேஸம் தம் ந மஹப்ப²லம் ஹோதி ந மஹானிஸம்ஸம். இத³மஸ்ஸ அப்பக்³க⁴தாய. ஸேய்யதா²பி ஸோ போத்த²கோ அப்பக்³கோ⁴, ததூ²பமோ அயம் புக்³க³லோ.

மஜ்ஜி²மோ சேபி பி⁴க்கு² ஹோதி…பே… தே²ரோ சேபி பி⁴க்கு² ஹோதி து³ஸ்ஸீலோ பாபத⁴ம்மோ, இத³மஸ்ஸ து³ப்³ப³ண்ணதாய. ஸேய்யதா²பி ஸோ போத்த²கோ து³ப்³ப³ண்ணோ, ததூ²பமோ அயம் புக்³க³லோ. யே கோ² பனஸ்ஸ ஸேவந்தி ப⁴ஜந்தி பயிருபாஸந்தி தி³ட்டா²னுக³திம் ஆபஜ்ஜந்தி, தேஸம் தம் ஹோதி தீ³க⁴ரத்தம் அஹிதாய து³க்கா²ய. இத³மஸ்ஸ து³க்க²ஸம்ப²ஸ்ஸதாய. ஸேய்யதா²பி ஸோ போத்த²கோ து³க்க²ஸம்ப²ஸ்ஸோ, ததூ²பமோ அயம் புக்³க³லோ. யேஸம் கோ² பன ஸோ படிக்³க³ண்ஹாதி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம், தேஸம் தம் ந மஹப்ப²லம் ஹோதி ந மஹானிஸம்ஸம். இத³மஸ்ஸ அப்பக்³க⁴தாய. ஸேய்யதா²பி ஸோ போத்த²கோ அப்பக்³கோ⁴, ததூ²பமோ அயம் புக்³க³லோ.

ஏவரூபோ சே தே²ரோ பி⁴க்கு² ஸங்க⁴மஜ்ஜே² ப⁴ணதி. தமேனம் பி⁴க்கூ² ஏவமாஹம்ஸு – ‘‘கிம் நு கோ² துய்ஹம் பா³லஸ்ஸ அப்³யத்தஸ்ஸ ப⁴ணிதேன, த்வம்பி நாம ப⁴ணிதப்³ப³ம் மஞ்ஞஸீ’’தி! ஸோ குபிதோ அனத்தமனோ ததா²ரூபிம் வாசம் நிச்சா²ரேதி யதா²ரூபாய வாசாய ஸங்கோ⁴ தம் உக்கி²பதி, ஸங்காரகூடேவ நம் போத்த²கம். இமே தயோ போத்த²கூபமா புக்³க³லா ஸந்தோ ஸம்விஜ்ஜமானா பி⁴க்கூ²ஸு.

117. தத்த² கதமே தயோ காஸிகவத்தூ²பமா புக்³க³லா? தீணி காஸிகவத்தா²னி – நவம்பி காஸிகவத்த²ம் வண்ணவந்தஞ்சேவ ஹோதி ஸுக²ஸம்ப²ஸ்ஸஞ்ச மஹக்³க⁴ஞ்ச, மஜ்ஜி²மம்பி காஸிகவத்த²ம் வண்ணவந்தஞ்சேவ ஹோதி ஸுக²ஸம்ப²ஸ்ஸஞ்ச மஹக்³க⁴ஞ்ச, ஜிண்ணம்பி காஸிகவத்த²ம் வண்ணவந்தஞ்சேவ ஹோதி ஸுக²ஸம்ப²ஸ்ஸஞ்ச மஹக்³க⁴ஞ்ச. ஜிண்ணம்பி காஸிகவத்த²ம் ரதனபலிவேட²னம் வா கரோந்தி க³ந்த⁴கரண்ட³கே வா நம் நிக்கி²பந்தி.

ஏவமேவம் தயோமே காஸிகவத்தூ²பமா புக்³க³லா ஸந்தோ ஸம்விஜ்ஜமானா பி⁴க்கூ²ஸு. கதமே தயோ? நவோ சேபி பி⁴க்கு² ஹோதி ஸீலவா கல்யாணத⁴ம்மோ, இத³மஸ்ஸ ஸுவண்ணதாய. ஸேய்யதா²பி தம் காஸிகவத்த²ம் வண்ணவந்தம், ததூ²பமோ அயம் புக்³க³லோ. யே கோ² பனஸ்ஸ ஸேவந்தி ப⁴ஜந்தி பயிருபாஸந்தி தி³ட்டா²னுக³திம் ஆபஜ்ஜந்தி, தேஸம் தம் ஹோதி தீ³க⁴ரத்தம் ஹிதாய ஸுகா²ய. இத³மஸ்ஸ ஸுக²ஸம்ப²ஸ்ஸதாய. ஸேய்யதா²பி தம் காஸிகவத்த²ம் ஸுக²ஸம்ப²ஸ்ஸம், ததூ²பமோ அயம் புக்³க³லோ. யேஸம் கோ² பன ஸோ [யேஸம் கோ² பன (ஸப்³ப³த்த²) அ. நி. 3.100] படிக்³க³ண்ஹாதி [பதிக³ண்ஹாதி (ஸீ.) ரூபஸித்³தி⁴டீகாய பன ஸமேதி] சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம், தேஸம் தம் மஹப்ப²லம் ஹோதி மஹானிஸம்ஸம். இத³மஸ்ஸ மஹக்³க⁴தாய. ஸேய்யதா²பி தம் காஸிகவத்த²ம் மஹக்³க⁴ம், ததூ²பமோ அயம் புக்³க³லோ.

மஜ்ஜி²மோ சேபி பி⁴க்கு²…பே… தே²ரோ சேபி பி⁴க்கு² ஹோதி ஸீலவா கல்யாணத⁴ம்மோ, இத³மஸ்ஸ ஸுவண்ணதாய. ஸேய்யதா²பி தம் காஸிகவத்த²ம் வண்ணவந்தம், ததூ²பமோ அயம் புக்³க³லோ. யே கோ² பனஸ்ஸ ஸேவந்தி ப⁴ஜந்தி பயிருபாஸந்தி தி³ட்டா²னுக³திம் ஆபஜ்ஜந்தி, தேஸம் தம் ஹோதி தீ³க⁴ரத்தம் ஹிதாய ஸுகா²ய. இத³மஸ்ஸ ஸுக²ஸம்ப²ஸ்ஸதாய. ஸேய்யதா²பி தம் காஸிகவத்த²ம் ஸுக²ஸம்ப²ஸ்ஸம், ததூ²பமோ அயம் புக்³க³லோ. யேஸம் கோ² பன ஸோ படிக்³க³ண்ஹாதி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம், தேஸம் தம் மஹப்ப²லம் ஹோதி மஹானிஸம்ஸம். இத³மஸ்ஸ மஹக்³க⁴தாய. ஸேய்யதா²பி தம் காஸிகவத்த²ம் மஹக்³க⁴ம், ததூ²பமோ அயம் புக்³க³லோ.

ஏவரூபோ சே தே²ரோ பி⁴க்கு² ஸங்க⁴மஜ்ஜே² ப⁴ணதி, தமேனம் பி⁴க்கூ² ஏவமாஹம்ஸு – ‘‘அப்பஸத்³தா³ ஆயஸ்மந்தோ ஹோத², தே²ரோ பி⁴க்கு² த⁴ம்மஞ்ச வினயஞ்ச ப⁴ணதீ’’தி. தஸ்ஸ தம் வசனம் ஆதே⁴ய்யம் க³ச்ச²தி, க³ந்த⁴கரண்ட³கேவ நம் காஸிகவத்த²ம். இமே தயோ காஸிகவத்தூ²பமா புக்³க³லா ஸந்தோ ஸம்விஜ்ஜமானா பி⁴க்கூ²ஸு.

118. கதமோ ச புக்³க³லோ ஸுப்பமேய்யோ? இதே⁴கச்சோ புக்³க³லோ உத்³த⁴தோ ஹோதி உன்னளோ சபலோ முக²ரோ விகிண்ணவாசோ முட்ட²ஸ்ஸதி அஸம்பஜானோ அஸமாஹிதோ விப்³ப⁴ந்தசித்தோ பாகடிந்த்³ரியோ – அயம் வுச்சதி புக்³க³லோ ‘‘ஸுப்பமேய்யோ’’.

119. கதமோ ச புக்³க³லோ து³ப்பமேய்யோ? இதே⁴கச்சோ புக்³க³லோ அனுத்³த⁴தோ ஹோதி அனுன்னளோ அசபலோ அமுக²ரோ அவிகிண்ணவாசோ உபட்டி²தஸ்ஸதி ஸம்பஜானோ ஸமாஹிதோ ஏகக்³க³சித்தோ ஸம்வுதிந்த்³ரியோ – அயம் வுச்சதி புக்³க³லோ ‘‘து³ப்பமேய்யோ’’.

120. கதமோ ச புக்³க³லோ அப்பமேய்யோ? இதே⁴கச்சோ புக்³க³லோ ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி – அயம் வுச்சதி புக்³க³லோ ‘‘அப்பமேய்யோ’’.

121. கதமோ ச புக்³க³லோ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³? இதே⁴கச்சோ புக்³க³லோ ஹீனோ ஹோதி ஸீலேன ஸமாதி⁴னா பஞ்ஞாய. ஏவரூபோ புக்³க³லோ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³, அஞ்ஞத்ர அனுத்³த³யா அஞ்ஞத்ர அனுகம்பா.

122. கதமோ ச புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³? இதே⁴கச்சோ புக்³க³லோ ஸதி³ஸோ ஹோதி ஸீலேன ஸமாதி⁴னா பஞ்ஞாய. ஏவரூபோ புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³. தம் கிஸ்ஸ ஹேது? ‘‘ஸீலஸாமஞ்ஞக³தானம் ஸதம் ஸீலகதா² ச நோ ப⁴விஸ்ஸதி, ஸா ச நோ பா²ஸு ப⁴விஸ்ஸதி, ஸா ச நோ பவத்தினீ ப⁴விஸ்ஸதி; ஸமாதி⁴ஸாமஞ்ஞக³தானம் ஸதம் ஸமாதி⁴கதா² ச நோ ப⁴விஸ்ஸதி, ஸா ச நோ பா²ஸு ப⁴விஸ்ஸதி, ஸா ச நோ பவத்தினீ [பவத்தனீ (ஸீ.) அ. நி. 3.26] ப⁴விஸ்ஸதி; பஞ்ஞாஸாமஞ்ஞக³தானம் ஸதம் பஞ்ஞாகதா² ச நோ ப⁴விஸ்ஸதி, ஸா ச நோ பா²ஸு ப⁴விஸ்ஸதி, ஸா ச நோ பவத்தினீ ப⁴விஸ்ஸதீ’’தி. தஸ்மா ஏவரூபோ புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³.

123. கதமோ ச புக்³க³லோ ஸக்கத்வா க³ரும் கத்வா ஸேவிதப்³போ³ ப⁴ஜிதப்³போ³ பயிருபாஸிதப்³போ³? இதே⁴கச்சோ புக்³க³லோ அதி⁴கோ ஹோதி ஸீலேன ஸமாதி⁴னா பஞ்ஞாய. ஏவரூபோ புக்³க³லோ ஸக்கத்வா க³ரும் கத்வா ஸேவிதப்³போ³ ப⁴ஜிதப்³போ³ பயிருபாஸிதப்³போ³. தம் கிஸ்ஸ ஹேது? ‘‘அபரிபூரம் வா ஸீலக்க²ந்த⁴ம் பரிபூரேஸ்ஸாமி, பரிபூரம் வா ஸீலக்க²ந்த⁴ம் தத்த² தத்த² பஞ்ஞாய அனுக்³க³ஹேஸ்ஸாமி; அபரிபூரம் வா ஸமாதி⁴க்க²ந்த⁴ம் பரிபூரேஸ்ஸாமி, பரிபூரம் வா ஸமாதி⁴க்க²ந்த⁴ம் தத்த² தத்த² பஞ்ஞாய அனுக்³க³ஹேஸ்ஸாமி; அபரிபூரம் வா பஞ்ஞாக்க²ந்த⁴ம் பரிபூரேஸ்ஸாமி, பரிபூரம் வா பஞ்ஞாக்க²ந்த⁴ம் தத்த² தத்த² பஞ்ஞாய அனுக்³க³ஹேஸ்ஸாமீ’’தி. தஸ்மா ஏவரூபோ புக்³க³லோ ஸக்கத்வா க³ரும் கத்வா ஸேவிதப்³போ³ ப⁴ஜிதப்³போ³ பயிருபாஸிதப்³போ³.

124. கதமோ ச புக்³க³லோ ஜிகு³ச்சி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³? இதே⁴கச்சோ புக்³க³லோ து³ஸ்ஸீலோ ஹோதி பாபத⁴ம்மோ அஸுசி ஸங்கஸ்ஸரஸமாசாரோ படிச்ச²ன்னகம்மந்தோ அஸ்ஸமணோ ஸமணபடிஞ்ஞோ அப்³ரஹ்மசாரீ ப்³ரஹ்மசாரிபடிஞ்ஞோ அந்தோபூதி அவஸ்ஸுதோ கஸம்பு³ஜாதோ. ஏவரூபோ புக்³க³லோ ஜிகு³ச்சி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³. தம் கிஸ்ஸ ஹேது? கிஞ்சாபி ஏவரூபஸ்ஸ புக்³க³லஸ்ஸ ந தி³ட்டா²னுக³திம் ஆபஜ்ஜதி, அத² கோ² நம் பாபகோ கித்திஸத்³தோ³ அப்³பு⁴க்³க³ச்ச²தி – ‘‘பாபமித்தோ புரிஸபுக்³க³லோ பாபஸஹாயோ பாபஸம்பவங்கோ’’தி. ஸேய்யதா²பி நாம அஹி கூ³த²க³தோ கிஞ்சாபி ந ட³ம்ஸதி, அத² கோ² நம் மக்கே²தி; ஏவமேவம் கிஞ்சாபி ஏவரூபஸ்ஸ புக்³க³லஸ்ஸ ந தி³ட்டா²னுக³திம் ஆபஜ்ஜதி, அத² கோ² நம் பாபகோ கித்திஸத்³தோ³ அப்³பு⁴க்³க³ச்ச²தி – ‘‘பாபமித்தோ புரிஸபுக்³க³லோ பாபஸஹாயோ பாபஸம்பவங்கோ’’தி! தஸ்மா ஏவரூபோ புக்³க³லோ ஜிகு³ச்சி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³.

125. கதமோ ச புக்³க³லோ அஜ்ஜு²பேக்கி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³? இதே⁴கச்சோ புக்³க³லோ கோத⁴னோ ஹோதி உபாயாஸப³ஹுலோ, அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி, கோபஞ்ச தோ³ஸஞ்ச அப்பச்சயஞ்ச பாதுகரோதி. ஸேய்யதா²பி நாம து³ட்டா²ருகோ கட்டே²ன வா கட²லாய வா க⁴ட்டிதோ பி⁴ய்யோஸோ மத்தாய ஆஸவம் தே³தி, ஏவமேவம் இதே⁴கச்சோ புக்³க³லோ கோத⁴னோ ஹோதி உபாயாஸப³ஹுலோ, அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி, கோபஞ்ச தோ³ஸஞ்ச அப்பச்சயஞ்ச பாதுகரோதி. ஸேய்யதா²பி நாம திந்து³காலாதம் கட்டே²ன வா கட²லாய வா க⁴ட்டிதம் பி⁴ய்யோஸோ மத்தாய சிச்சிடாயதி சிடிசிடாயதி, ஏவமேவம் இதே⁴கச்சோ புக்³க³லோ கோத⁴னோ ஹோதி உபாயாஸப³ஹுலோ, அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி, கோபஞ்ச தோ³ஸஞ்ச அப்பச்சயஞ்ச பாதுகரோதி. ஸேய்யதா²பி நாம கூ³த²கூபோ கட்டே²ன வா கட²லாய வா க⁴ட்டிதோ பி⁴ய்யோஸோ மத்தாய து³க்³க³ந்தோ⁴ ஹோதி, ஏவமேவம் இதே⁴கச்சோ புக்³க³லோ கோத⁴னோ ஹோதி உபாயாஸப³ஹுலோ, அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி, கோபஞ்ச தோ³ஸஞ்ச அப்பச்சயஞ்ச பாதுகரோதி; ஏவரூபோ புக்³க³லோ அஜ்ஜு²பேக்கி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³. தம் கிஸ்ஸ ஹேது? ‘‘அக்கோஸேய்யபி மம் பரிபா⁴ஸேய்யபி மம் அனத்த²ம்பி மே கரேய்யா’’தி! தஸ்மா ஏவரூபோ புக்³க³லோ அஜ்ஜு²பேக்கி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³.

126. கதமோ ச புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³? இதே⁴கச்சோ புக்³க³லோ ஸீலவா ஹோதி கல்யாணத⁴ம்மோ – ஏவரூபோ புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³. தம் கிஸ்ஸ ஹேது? கிஞ்சாபி ஏவரூபஸ்ஸ புக்³க³லஸ்ஸ ந தி³ட்டா²னுக³திம் ஆபஜ்ஜதி, அத² கோ² நம் கல்யாணோ கித்திஸத்³தோ³ அப்³பு⁴க்³க³ச்ச²தி – ‘‘கல்யாணமித்தோ புரிஸபுக்³க³லோ கல்யாணஸஹாயோ கல்யாணஸம்பவங்கோ’’தி! தஸ்மா ஏவரூபோ புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³.

127. கதமோ ச புக்³க³லோ ஸீலேஸு பரிபூரகாரீ, ஸமாதி⁴ஸ்மிம் மத்தஸோ காரீ, பஞ்ஞாய மத்தஸோ காரீ? ஸோதாபன்னஸகதா³கா³மினோ – இமே வுச்சந்தி புக்³க³லா ஸீலேஸு பரிபூரகாரினோ, ஸமாதி⁴ஸ்மிம் மத்தஸோ காரினோ, பஞ்ஞாய மத்தஸோ காரினோ.

128. கதமோ ச புக்³க³லோ ஸீலேஸு ச பரிபூரகாரீ, ஸமாதி⁴ஸ்மிஞ்ச பரிபூரகாரீ, பஞ்ஞாய மத்தஸோ காரீ? அனாகா³மீ – அயம் வுச்சதி புக்³க³லோ ஸீலேஸு ச பரிபூரகாரீ, ஸமாதி⁴ஸ்மிஞ்ச பரிபூரகாரீ, பஞ்ஞாய மத்தஸோ காரீ.

129. கதமோ ச புக்³க³லோ ஸீலேஸு ச பரிபூரகாரீ, ஸமாதி⁴ஸ்மிஞ்ச பரிபூரகாரீ, பஞ்ஞாய ச பரிபூரகாரீ? அரஹா – அயம் வுச்சதி புக்³க³லோ ஸீலேஸு ச பரிபூரகாரீ, ஸமாதி⁴ஸ்மிஞ்ச பரிபூரகாரீ, பஞ்ஞாய ச பரிபூரகாரீ.

130. தத்த² கதமே தயோ ஸத்தா²ரோ? இதே⁴கச்சோ ஸத்தா² காமானம் பரிஞ்ஞம் பஞ்ஞபேதி [பஞ்ஞாபேதி (ஸீ. ஸ்யா.)], ந ரூபானம் பரிஞ்ஞம் பஞ்ஞபேதி, ந வேத³னானம் பரிஞ்ஞம் பஞ்ஞபேதி. இத⁴ பனேகச்சோ ஸத்தா² காமானஞ்ச பரிஞ்ஞம் பஞ்ஞபேதி, ரூபானஞ்ச பரிஞ்ஞம் பஞ்ஞபேதி, ந வேத³னானம் பரிஞ்ஞம் பஞ்ஞபேதி. இத⁴ பனேகச்சோ ஸத்தா² காமானஞ்ச பரிஞ்ஞம் பஞ்ஞபேதி, ரூபானஞ்ச பரிஞ்ஞம் பஞ்ஞபேதி, வேத³னானஞ்ச பரிஞ்ஞம் பஞ்ஞபேதி.

தத்ர ய்வாயம் ஸத்தா² காமானம் பரிஞ்ஞம் பஞ்ஞபேதி, ந ரூபானம் பரிஞ்ஞம் பஞ்ஞபேதி, ந வேத³னானம் பரிஞ்ஞம் பஞ்ஞபேதி, ரூபாவசரஸமாபத்தியா லாபீ⁴ ஸத்தா² தேன த³ட்ட²ப்³போ³. தத்ர ய்வாயம் ஸத்தா² காமானஞ்ச பரிஞ்ஞம் பஞ்ஞபேதி, ரூபானஞ்ச பரிஞ்ஞம் பஞ்ஞபேதி, ந வேத³னானம் பரிஞ்ஞம் பஞ்ஞபேதி, அரூபாவசரஸமாபத்தியா லாபீ⁴ ஸத்தா² தேன த³ட்ட²ப்³போ³. தத்ர ய்வாயம் ஸத்தா² காமானஞ்ச பரிஞ்ஞம் பஞ்ஞபேதி, ரூபானஞ்ச பரிஞ்ஞம் பஞ்ஞபேதி, வேத³னானஞ்ச பரிஞ்ஞம் பஞ்ஞபேதி, ஸம்மாஸம்பு³த்³தோ⁴ ஸத்தா² தேன த³ட்ட²ப்³போ³. இமே தயோ ஸத்தா²ரோ.

131. தத்த² கதமே அபரேபி தயோ ஸத்தா²ரோ? இதே⁴கச்சோ ஸத்தா² தி³ட்டே² சேவ த⁴ம்மே அத்தானம் ஸச்சதோ தே²ததோ பஞ்ஞபேதி, அபி⁴ஸம்பராயஞ்ச அத்தானம் ஸச்சதோ தே²ததோ பஞ்ஞபேதி. இத⁴ பனேகச்சோ ஸத்தா² தி³ட்டே² சேவ த⁴ம்மே அத்தானம் ஸச்சதோ தே²ததோ பஞ்ஞபேதி, நோ ச கோ² அபி⁴ஸம்பராயம் அத்தானம் ஸச்சதோ தே²ததோ பஞ்ஞபேதி. இத⁴ பனேகச்சோ ஸத்தா² தி³ட்டே² சேவ த⁴ம்மே அத்தானம் ஸச்சதோ தே²ததோ ந பஞ்ஞபேதி, அபி⁴ஸம்பராயஞ்ச அத்தானம் ஸச்சதோ தே²ததோ ந பஞ்ஞபேதி.