22. பா³வீஸதிமவக்³கோ³

(208) 1. பரினிப்³பா³னகதா²

892. அத்தி² கிஞ்சி ஸம்யோஜனம் அப்பஹாய பரினிப்³பா³னந்தி? ஆமந்தா. அத்தி² கிஞ்சி ஸக்காயதி³ட்டி²ம் அப்பஹாய…பே… அனோத்தப்பம் அப்பஹாய பரினிப்³பா³னந்தி? ந ஹேவம் வத்தப்³பே³…பே….

அத்தி² கிஞ்சி ஸம்யோஜனம் அப்பஹாய பரினிப்³பா³னந்தி? ஆமந்தா. அரஹா ஸராகோ³…பே… ஸகிலேஸோதி? ந ஹேவம் வத்தப்³பே³…பே… நனு அரஹா நிராகோ³…பே… நிக்கிலேஸோதி? ஆமந்தா. ஹஞ்சி அரஹா நிராகோ³…பே… நிக்கிலேஸோ, நோ ச வத ரே வத்தப்³பே³ – ‘‘அத்தி² கிஞ்சி ஸம்யோஜனம் அப்பஹாய பரினிப்³பா³ன’’ந்தி.

893. ந வத்தப்³ப³ம் – ‘‘அத்தி² கிஞ்சி ஸம்யோஜனம் அப்பஹாய பரினிப்³பா³ன’’ந்தி? ஆமந்தா. அரஹா ஸப்³ப³ம் பு³த்³த⁴விஸயம் ஜானாதீதி? ந ஹேவம் வத்தப்³பே³. தேன ஹி அத்தி² கிஞ்சி ஸம்யோஜனம் அப்பஹாய பரினிப்³பா³னந்தி.

பரினிப்³பா³னகதா² நிட்டி²தா.

22. பா³வீஸதிமவக்³கோ³

(209) 2. குஸலசித்தகதா²

894. அரஹா குஸலசித்தோ பரினிப்³பா³யதீதி? ஆமந்தா. அரஹா புஞ்ஞாபி⁴ஸங்கா²ரம் அபி⁴ஸங்க²ரோந்தோ… ஆனேஞ்ஜாபி⁴ஸங்கா²ரம் அபி⁴ஸங்க²ரோந்தோ… க³திஸம்வத்தனியம் கம்மம் கரோந்தோ… ப⁴வஸம்வத்தனியம் கம்மம் கரோந்தோ… இஸ்ஸரியஸம்வத்தனியம் கம்மம் கரோந்தோ… அதி⁴பச்சஸம்வத்தனியம் கம்மம் கரோந்தோ… மஹாபோ⁴க³ஸம்வத்தனியம் கம்மம் கரோந்தோ… மஹாபரிவாரஸம்வத்தனியம் கம்மம் கரோந்தோ… தே³வஸோப⁴க்³யஸம்வத்தனியம் கம்மம் கரோந்தோ… மனுஸ்ஸஸோப⁴க்³யஸம்வத்தனியம் கம்மம் கரோந்தோ பரினிப்³பா³யதீதி? ந ஹேவம் வத்தப்³பே³…பே….

அரஹா குஸலசித்தோ பரினிப்³பா³யதீதி? ஆமந்தா. அரஹா ஆசினந்தோ அபசினந்தோ பஜஹந்தோ உபாதி³யந்தோ விஸினேந்தோ உஸ்ஸினேந்தோ விதூ⁴பேந்தோ ஸந்தூ⁴பேந்தோ பரினிப்³பா³யதீதி? ந ஹேவம் வத்தப்³பே³ …பே… நனு அரஹா நேவாசினாதி ந அபசினாதி அபசினித்வா டி²தோதி? ஆமந்தா. ஹஞ்சி அரஹா நேவாசினாதி ந அபசினாதி அபசினித்வா டி²தோ, நோ ச வத ரே வத்தப்³பே³ – ‘‘அரஹா குஸலசித்தோ பரினிப்³பா³யதீ’’தி. நனு அரஹா நேவ பஜஹதி ந உபாதி³யதி பஜஹித்வா டி²தோ, நேவ விஸினேதி ந உஸ்ஸினேதி விஸினேத்வா டி²தோ; நனு அரஹா நேவ விதூ⁴பேதி ந ஸந்தூ⁴பேதி விதூ⁴பேத்வா டி²தோதி? ஆமந்தா. ஹஞ்சி அரஹா நேவ விதூ⁴பேதி ந ஸந்தூ⁴பேதி விதூ⁴பேத்வா டி²தோ, நோ ச வத ரே வத்தப்³பே³ – ‘‘அரஹா குஸலசித்தோ பரினிப்³பா³யதீ’’தி.

895. ந வத்தப்³ப³ம் – ‘‘அரஹா குஸலசித்தோ பரினிப்³பா³யதீ’’தி? ஆமந்தா. நனு அரஹா உபட்டி²தஸ்ஸதி ஸதோ ஸம்பஜானோ பரினிப்³பா³யதீதி? ஆமந்தா. ஹஞ்சி அரஹா உபட்டி²தஸ்ஸதி ஸதோ ஸம்பஜானோ பரினிப்³பா³யதி, தேன வத ரே வத்தப்³பே³ – ‘‘அரஹா குஸலசித்தோ பரினிப்³பா³யதீ’’தி.

குஸலசித்தகதா² நிட்டி²தா.

22. பா³வீஸதிமவக்³கோ³

(210) 3. ஆனேஞ்ஜகதா²

896. அரஹா ஆனேஞ்ஜே டி²தோ பரினிப்³பா³யதீதி? ஆமந்தா. நனு அரஹா பகதிசித்தே டி²தோ பரினிப்³பா³யதீதி? ஆமந்தா. ஹஞ்சி அரஹா பகதிசித்தே டி²தோ பரினிப்³பா³யதி, நோ ச வத ரே வத்தப்³பே³ – ‘‘அரஹா ஆனேஞ்ஜே டி²தோ பரினிப்³பா³யதீ’’தி.

அரஹா ஆனேஞ்ஜே டி²தோ பரினிப்³பா³யதீதி? ஆமந்தா. அரஹா கிரியமயே சித்தே டி²தோ பரினிப்³பா³யதீதி? ந ஹேவம் வத்தப்³பே³…பே… நனு அரஹா விபாகசித்தே டி²தோ பரினிப்³பா³யதீதி? ஆமந்தா. ஹஞ்சி அரஹா விபாகசித்தே டி²தோ பரினிப்³பா³யதி, நோ ச வத ரே வத்தப்³பே³ – ‘‘அரஹா ஆனேஞ்ஜே டி²தோ பரினிப்³பா³யதீ’’தி.

அரஹா ஆனேஞ்ஜே டி²தோ பரினிப்³பா³யதீதி? ஆமந்தா. அரஹா கிரியாப்³யாகதே சித்தே டி²தோ பரினிப்³பா³யதீதி? ந ஹேவம் வத்தப்³பே³…பே… நனு அரஹா விபாகாப்³யாகதே சித்தே டி²தோ பரினிப்³பா³யதீதி? ஆமந்தா. ஹஞ்சி அரஹா விபாகாப்³யாகதே சித்தே டி²தோ பரினிப்³பா³யதி, நோ ச வத ரே வத்தப்³பே³ – ‘‘அரஹா ஆனேஞ்ஜே டி²தோ பரினிப்³பா³யதீ’’தி.

அரஹா ஆனேஞ்ஜே டி²தோ பரினிப்³பா³யதீதி? ஆமந்தா. நனு ப⁴க³வா சதுத்த²ஜ்ஜா²னா வுட்ட²ஹித்வா ஸமனந்தரா பரினிப்³பு³தோதி [தீ³. நி. 2.219]? ஆமந்தா. ஹஞ்சி ப⁴க³வா சதுத்த²ஜ்ஜா²னா வுட்ட²ஹித்வா ஸமனந்தரா பரினிப்³பு³தோ, நோ ச வத ரே வத்தப்³பே³ – ‘‘அரஹா ஆனேஞ்ஜே டி²தோ பரினிப்³பா³யதீ’’தி.

ஆனேஞ்ஜகதா² நிட்டி²தா.

22. பா³வீஸதிமவக்³கோ³

(211) 4. த⁴ம்மாபி⁴ஸமயகதா²

897. அத்தி² க³ப்³ப⁴ஸேய்யாய த⁴ம்மாபி⁴ஸமயோதி? ஆமந்தா. அத்தி² க³ப்³ப⁴ஸேய்யாய த⁴ம்மதே³ஸனா, த⁴ம்மஸ்ஸவனம், த⁴ம்மஸாகச்சா², பரிபுச்சா², ஸீலஸமாதா³னம், இந்த்³ரியேஸு கு³த்தத்³வாரதா, போ⁴ஜனே மத்தஞ்ஞுதா, புப்³ப³ரத்தாபரரத்தம் ஜாக³ரியானுயோகோ³தி? ந ஹேவம் வத்தப்³பே³…பே… நத்தி² க³ப்³ப⁴ஸேய்யாய த⁴ம்மதே³ஸனா, த⁴ம்மஸ்ஸவனம்…பே… புப்³ப³ரத்தாபரரத்தம் ஜாக³ரியானுயோகோ³தி? ஆமந்தா. ஹஞ்சி நத்தி² க³ப்³ப⁴ஸேய்யாய த⁴ம்மதே³ஸனா, த⁴ம்மஸ்ஸவனம்…பே… புப்³ப³ரத்தாபரரத்தம் ஜாக³ரியானுயோகோ³, நோ ச வத ரே வத்தப்³பே³ – ‘‘அத்தி² க³ப்³ப⁴ஸேய்யாய த⁴ம்மாபி⁴ஸமயோ’’தி.

அத்தி² க³ப்³ப⁴ஸேய்யாய த⁴ம்மாபி⁴ஸமயோதி? ஆமந்தா. நனு த்³வே பச்சயா ஸம்மாதி³ட்டி²யா உப்பாதா³ய – பரதோ ச கோ⁴ஸோ, யோனிஸோ ச மனஸிகாரோதி? ஆமந்தா. ஹஞ்சி த்³வே பச்சயா ஸம்மாதி³ட்டி²யா உப்பாதா³ய – பரதோ ச கோ⁴ஸோ, யோனிஸோ ச மனஸிகாரோ, நோ ச வத ரே வத்தப்³பே³ – ‘‘அத்தி² க³ப்³ப⁴ஸேய்யாய த⁴ம்மாபி⁴ஸமயோ’’தி.

அத்தி² க³ப்³ப⁴ஸேய்யாய த⁴ம்மாபி⁴ஸமயோதி? ஆமந்தா. ஸுத்தஸ்ஸ பமத்தஸ்ஸ முட்ட²ஸ்ஸதிஸ்ஸ அஸம்பஜானஸ்ஸ த⁴ம்மாபி⁴ஸமயோதி? ந ஹேவம் வத்தப்³பே³…பே….

த⁴ம்மாபி⁴ஸமயகதா² நிட்டி²தா.

22. பா³வீஸதிமவக்³கோ³

(212-4) 5-7. திஸ்ஸோபிகதா²

898. அத்தி² க³ப்³ப⁴ஸேய்யாய அரஹத்தப்பத்தீதி? ஆமந்தா. ஸுத்தஸ்ஸ பமத்தஸ்ஸ முட்ட²ஸ்ஸதிஸ்ஸ அஸம்பஜானஸ்ஸ அரஹத்தப்பத்தீதி? ந ஹேவம் வத்தப்³பே³…பே….

899. அத்தி² ஸுபினக³தஸ்ஸ த⁴ம்மாபி⁴ஸமயோதி? ஆமந்தா. ஸுத்தஸ்ஸ பமத்தஸ்ஸ முட்ட²ஸ்ஸதிஸ்ஸ அஸம்பஜானஸ்ஸ த⁴ம்மாபி⁴ஸமயோதி? ந ஹேவம் வத்தப்³பே³…பே….

900. அத்தி² ஸுபினக³தஸ்ஸ அரஹத்தப்பத்தீதி? ஆமந்தா. ஸுத்தஸ்ஸ பமத்தஸ்ஸ முட்ட²ஸ்ஸதிஸ்ஸ அஸம்பஜானஸ்ஸ அரஹத்தப்பத்தீதி? ந ஹேவம் வத்தப்³பே³…பே….

திஸ்ஸோபிகதா² நிட்டி²தா.

22. பா³வீஸதிமவக்³கோ³

(215) 8. அப்³யாகதகதா²

901. ஸப்³ப³ம் ஸுபினக³தஸ்ஸ சித்தம் அப்³யாகதந்தி? ஆமந்தா. ஸுபினந்தேன பாணம் ஹனேய்யாதி? ஆமந்தா. ஹஞ்சி ஸுபினந்தேன பாணம் ஹனேய்ய, நோ ச வத ரே வத்தப்³பே³ – ‘‘ஸப்³ப³ம் ஸுபினக³தஸ்ஸ சித்தம் அப்³யாகத’’ந்தி.

ஸுபினந்தேன அதி³ன்னம் ஆதி³யேய்ய…பே… முஸா ப⁴ணேய்ய, பிஸுணம் ப⁴ணேய்ய, ப²ருஸம் ப⁴ணேய்ய, ஸம்ப²ம் பலபேய்ய, ஸந்தி⁴ம் சி²ந்தே³ய்ய, நில்லோபம் ஹரேய்ய, ஏகாகா³ரிகம் கரேய்ய, பரிபந்தே² திட்டே²ய்ய, பரதா³ரம் க³ச்சே²ய்ய, கா³மகா⁴தகம் கரேய்ய, நிக³மகா⁴தகம் கரேய்ய, ஸுபினந்தேன மேது²னம் த⁴ம்மம் படிஸேவேய்ய, ஸுபினக³தஸ்ஸ அஸுசி முச்சேய்ய, ஸுபினந்தேன தா³னம் த³தே³ய்ய, சீவரம் த³தே³ய்ய, பிண்ட³பாதம் த³தே³ய்ய, ஸேனாஸனம் த³தே³ய்ய, கி³லானபச்சயபே⁴ஸஜ்ஜபரிக்கா²ரம் த³தே³ய்ய, கா²த³னீயம் த³தே³ய்ய, போ⁴ஜனீயம் த³தே³ய்ய, பானீயம் த³தே³ய்ய, சேதியம் வந்தே³ய்ய, சேதியே மாலம் ஆரோபேய்ய, க³ந்த⁴ம் ஆரோபேய்ய, விலேபனம் ஆரோபேய்ய…பே… சேதியம் அபி⁴த³க்கி²ணம் கரேய்யாதி? ஆமந்தா. ஹஞ்சி ஸுபினந்தேன சேதியம் அபி⁴த³க்கி²ணம் கரேய்ய, நோ ச வத ரே வத்தப்³பே³ – ‘‘ஸப்³ப³ம் ஸுபினக³தஸ்ஸ சித்தம் அப்³யாகத’’ந்தி.

902. ந வத்தப்³ப³ம் – ‘‘ஸப்³ப³ம் ஸுபினக³தஸ்ஸ சித்தம் அப்³யாகத’’ந்தி? ஆமந்தா. நனு ஸுபினக³தஸ்ஸ சித்தம் அப்³போ³ஹாரியம் வுத்தம் ப⁴க³வதாதி? ஆமந்தா. ஹஞ்சி ஸுபினக³தஸ்ஸ சித்தம் அப்³போ³ஹாரியம் வுத்தம் ப⁴க³வதா, தேன வத ரே வத்தப்³பே³ – ‘‘ஸப்³ப³ம் ஸுபினக³தஸ்ஸ சித்தம் அப்³யாகத’’ந்தி.

அப்³யாகதகதா² நிட்டி²தா.

22. பா³வீஸதிமவக்³கோ³

(216) 9. ஆஸேவனபச்சயகதா²

903. நத்தி² காசி ஆஸேவனபச்சயதாதி? ஆமந்தா. நனு வுத்தம் ப⁴க³வதா – ‘‘பாணாதிபாதோ, பி⁴க்க²வே, ஆஸேவிதோ பா⁴விதோ ப³ஹுலீகதோ நிரயஸம்வத்தனிகோ திரச்சா²னயோனிஸம்வத்தனிகோ பேத்திவிஸயஸம்வத்தனிகோ, யோ ஸப்³ப³லஹுஸோ பாணாதிபாதஸ்ஸ விபாகோ மனுஸ்ஸபூ⁴தஸ்ஸ அப்பாயுகஸம்வத்தனிகோ ஹோதீ’’தி [அ. நி. 8.40]. அத்தே²வ ஸுத்தந்தோதி? ஆமந்தா. தேன ஹி அத்தி² காசி ஆஸேவனபச்சயதாதி.

நத்தி² காசி ஆஸேவனபச்சயதாதி? ஆமந்தா. நனு வுத்தம் ப⁴க³வதா – ‘‘அதி³ன்னாதா³னம், பி⁴க்க²வே, ஆஸேவிதம் பா⁴விதம் ப³ஹுலீகதம் நிரயஸம்வத்தனிகம் திரச்சா²னயோனிஸம்வத்தனிகம் பேத்திவிஸயஸம்வத்தனிகம், யோ ஸப்³ப³லஹுஸோ அதி³ன்னாதா³னஸ்ஸ விபாகோ மனுஸ்ஸபூ⁴தஸ்ஸ போ⁴க³ப்³யஸனஸம்வத்தனிகோ ஹோதி…பே… யோ ஸப்³ப³லஹுஸோ காமேஸுமிச்சா²சாரஸ்ஸ விபாகோ மனுஸ்ஸபூ⁴தஸ்ஸ ஸபத்தவேரஸம்வத்தனிகோ ஹோதி…பே… யோ ஸப்³ப³லஹுஸோ முஸாவாத³ஸ்ஸ விபாகோ மனுஸ்ஸபூ⁴தஸ்ஸ அப்³பூ⁴தப்³ப⁴க்கா²னஸம்வத்தனிகோ ஹோதி…பே… யோ ஸப்³ப³லஹுஸோ பிஸுணாய வாசாய விபாகோ மனுஸ்ஸபூ⁴தஸ்ஸ மித்தேஹி பே⁴த³னஸம்வத்தனிகோ ஹோதி…பே… யோ ஸப்³ப³லஹுஸோ ப²ருஸாய வாசாய விபாகோ மனுஸ்ஸபூ⁴தஸ்ஸ அமனாபஸத்³த³ஸம்வத்தனிகோ ஹோதி…பே… யோ ஸப்³ப³லஹுஸோ ஸம்ப²ப்பலாபஸ்ஸ விபாகோ மனுஸ்ஸபூ⁴தஸ்ஸ அனாதே³ய்யவாசாஸம்வத்தனிகோ ஹோதி, ஸுராமேரயபானம், பி⁴க்க²வே, ஆஸேவிதம்…பே… யோ ஸப்³ப³லஹுஸோ ஸுராமேரயபானஸ்ஸ விபாகோ மனுஸ்ஸபூ⁴தஸ்ஸ உம்மத்தகஸம்வத்தனிகோ ஹோதீ’’தி [அ. நி. 8.40]! அத்தே²வ ஸுத்தந்தோதி? ஆமந்தா. தேன ஹி அத்தி² காசி ஆஸேவனபச்சயதாதி.

904. நத்தி² காசி ஆஸேவனபச்சயதாதி? ஆமந்தா. நனு வுத்தம் ப⁴க³வதா – ‘‘மிச்சா²தி³ட்டி², பி⁴க்க²வே, ஆஸேவிதா பா⁴விதா ப³ஹுலீகதா நிரயஸம்வத்தனிகா திரச்சா²னயோனிஸம்வத்தனிகா பேத்திவிஸயஸம்வத்தனிகா’’தி. அத்தே²வ ஸுத்தந்தோதி? ஆமந்தா. தேன ஹி அத்தி² காசி ஆஸேவனபச்சயதாதி.

நத்தி² காசி ஆஸேவனபச்சயதாதி? ஆமந்தா. நனு வுத்தம் ப⁴க³வதா – ‘‘மிச்சா²ஸங்கப்போ…பே… மிச்சா²ஸமாதி⁴, பி⁴க்க²வே, ஆஸேவிதோ பா⁴விதோ…பே… பேத்திவிஸயஸம்வத்தனிகோ’’தி! அத்தே²வ ஸுத்தந்தோதி? ஆமந்தா. தேன ஹி அத்தி² காசி ஆஸேவனபச்சயதாதி.

905. நத்தி² காசி ஆஸேவனபச்சயதாதி? ஆமந்தா. நனு வுத்தம் ப⁴க³வதா – ‘‘ஸம்மாதி³ட்டி², பி⁴க்க²வே, ஆஸேவிதா பா⁴விதா ப³ஹுலீகதா அமதோக³தா⁴ ஹோதி அமதபராயனா அமதபரியோஸானா’’தி! அத்தே²வ ஸுத்தந்தோதி? ஆமந்தா. தேன ஹி அத்தி² காசி ஆஸேவனபச்சயதாதி.

நத்தி² காசி ஆஸேவனபச்சயதாதி? ஆமந்தா. நனு வுத்தம் ப⁴க³வதா – ‘‘ஸம்மாஸங்கப்போ, பி⁴க்க²வே, ஆஸேவிதோ பா⁴விதோ ப³ஹுலீகதோ…பே… ஸம்மாஸமாதி⁴, பி⁴க்க²வே, ஆஸேவிதோ பா⁴விதோ ப³ஹுலீகதோ அமதோக³தோ⁴ ஹோதி அமதபராயனோ அமதபரியோஸானோ’’தி அத்தே²வ ஸுத்தந்தோதி, ஆமந்தா. தேன ஹி அத்தி² காசி ஆஸேவனபச்சயதாதி.

ஆஸேவனபச்சயகதா² நிட்டி²தா.

22. பா³வீஸதிமவக்³கோ³

(217) 10. க²ணிககதா²

906. ஏகசித்தக்க²ணிகா ஸப்³பே³ த⁴ம்மாதி? ஆமந்தா. சித்தே மஹாபத²வீ ஸண்டா²தி, மஹாஸமுத்³தோ³ ஸண்டா²தி, ஸினேருபப்³ப³தராஜா ஸண்டா²தி, ஆபோ ஸண்டா²தி, தேஜோ ஸண்டா²தி, வாயோ ஸண்டா²தி, திணகட்ட²வனப்பதயோ ஸண்ட²ஹந்தீதி? ந ஹேவம் வத்தப்³பே³…பே….

ஏகசித்தக்க²ணிகா ஸப்³பே³ த⁴ம்மாதி? ஆமந்தா. சக்கா²யதனம் சக்கு²விஞ்ஞாணேன ஸஹஜாதந்தி? ந ஹேவம் வத்தப்³பே³…பே… சக்கா²யதனம் சக்கு²விஞ்ஞாணேன ஸஹஜாதந்தி? ஆமந்தா. நனு ஆயஸ்மா ஸாரிபுத்தோ ஏதத³வோச – ‘‘அஜ்ஜ²த்திகஞ்சேவ, ஆவுஸோ, சக்கு²ம் அபரிபி⁴ன்னம் ஹோதி, பா³ஹிரா ச ரூபா ந ஆபாத²ம் ஆக³ச்ச²ந்தி, நோ ச தஜ்ஜோ ஸமன்னாஹாரோ ஹோதி, நேவ தாவ தஜ்ஜஸ்ஸ விஞ்ஞாணபா⁴க³ஸ்ஸ [விஞ்ஞாணபா⁴வஸ்ஸ (ப³ஹூஸு)] பாதுபா⁴வோ ஹோதி. அஜ்ஜ²த்திகஞ்சேவ, ஆவுஸோ, சக்கு²ம் அபரிபி⁴ன்னம் ஹோதி, பா³ஹிரா ச ரூபா ஆபாத²ம் ஆக³ச்ச²ந்தி, நோ ச தஜ்ஜோ ஸமன்னாஹாரோ ஹோதி, நேவ தாவ தஜ்ஜஸ்ஸ விஞ்ஞாணபா⁴க³ஸ்ஸ பாதுபா⁴வோ ஹோதி. யதோ ச கோ², ஆவுஸோ, அஜ்ஜ²த்திகஞ்சேவ சக்கு²ம் அபரிபி⁴ன்னம் ஹோதி, பா³ஹிரா ச ரூபா ஆபாத²ம் ஆக³ச்ச²ந்தி, தஜ்ஜோ ச ஸமன்னாஹாரோ ஹோதி, ஏவம் தஜ்ஜஸ்ஸ விஞ்ஞாணபா⁴க³ஸ்ஸ பாதுபா⁴வோ ஹோதீ’’தி [ம. நி. 1.306]! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘சக்கா²யதனம் சக்கு²விஞ்ஞாணேன ஸஹஜாத’’ந்தி.

ஸோதாயதனம்…பே… கா⁴னாயதனம்…பே… ஜிவ்ஹாயதனம்…பே… காயாயதனம் காயவிஞ்ஞாணேன ஸஹஜாதந்தி? ந ஹேவம் வத்தப்³பே³…பே… காயாயதனம் காயவிஞ்ஞாணேன ஸஹஜாதந்தி? ஆமந்தா. நனு ஆயஸ்மா ஸாரிபுத்தோ ஏதத³வோச – ‘‘அஜ்ஜ²த்திகோ சேவ, ஆவுஸோ, காயோ அபரிபி⁴ன்னோ ஹோதி, பா³ஹிரா ச போ²ட்ட²ப்³பா³ ந ஆபாத²ம் ஆக³ச்ச²ந்தி, நோ ச…பே… அஜ்ஜ²த்திகோ சேவ, ஆவுஸோ, காயோ அபரிபி⁴ன்னோ ஹோதி, பா³ஹிரா ச போ²ட்ட²ப்³பா³ ஆபாத²ம் ஆக³ச்ச²ந்தி, நோ ச…பே… யதோ ச கோ², ஆவுஸோ, அஜ்ஜ²த்திகோ சேவ காயோ அபரிபி⁴ன்னோ ஹோதி, பா³ஹிரா ச போ²ட்ட²ப்³பா³ ஆபாத²ம் ஆக³ச்ச²ந்தி, தஜ்ஜோ ச ஸமன்னாஹாரோ ஹோதி, ஏவம் தஜ்ஜஸ்ஸ விஞ்ஞாணபா⁴க³ஸ்ஸ பாதுபா⁴வோ ஹோதீ’’தி [ம. நி. 1.306]! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘காயாயதனம் காயவிஞ்ஞாணேன ஸஹஜாத’’ந்தி.

907. ந வத்தப்³ப³ம் – ‘‘ஏகசித்தக்க²ணிகா ஸப்³பே³ த⁴ம்மா’’தி? ஆமந்தா. ஸப்³பே³ த⁴ம்மா நிச்சா து⁴வா ஸஸ்ஸதா அவிபரிணாமத⁴ம்மாதி? ந ஹேவம் வத்தப்³பே³. தேன ஹி ஏகசித்தக்க²ணிகா ஸப்³பே³ த⁴ம்மாதி.

க²ணிககதா² நிட்டி²தா.

பா³வீஸதிமவக்³கோ³.

தஸ்ஸுத்³தா³னம் –

அத்தி² கிஞ்சி ஸம்யோஜனம் அப்பஹாய பரினிப்³பா³னம், அரஹா குஸலசித்தோ பரினிப்³பா³யதி, அரஹா ஆனேஞ்ஜே டி²தோ பரினிப்³பா³யதி, அத்தி² க³ப்³ப⁴ஸேய்யாய த⁴ம்மாபி⁴ஸமயோ, அத்தி² க³ப்³ப⁴ஸேய்யாய அரஹத்தப்பத்தி, அத்தி² ஸுபினக³தஸ்ஸ த⁴ம்மாபி⁴ஸமயோ, அத்தி² ஸுபினக³தஸ்ஸ அரஹத்தப்பத்தி, ஸப்³ப³ம் ஸுபினக³தஸ்ஸ சித்தம் அப்³யாகதம், நத்தி² காசி ஆஸேவனபச்சயதா, ஏகசித்தக்க²ணிகா ஸப்³பே³ த⁴ம்மாதி.