23. தேவீஸதிமவக்³கோ³

(218) 1. ஏகாதி⁴ப்பாயகதா²

908. ஏகாதி⁴ப்பாயேன மேது²னோ த⁴ம்மோ படிஸேவிதப்³போ³தி? ஆமந்தா. ஏகாதி⁴ப்பாயேன அஸ்ஸமணேன ஹோதப்³ப³ம், அபி⁴க்கு²னா ஹோதப்³ப³ம், சி²ன்னமூலேன ஹோதப்³ப³ம் பாராஜிகேன ஹோதப்³ப³ந்தி? ந ஹேவம் வத்தப்³பே³…பே… ஏகாதி⁴ப்பாயேன மேது²னோ த⁴ம்மோ படிஸேவிதப்³போ³தி? ஆமந்தா. ஏகாதி⁴ப்பாயேன பாணோ ஹந்தப்³போ³, அதி³ன்னம் ஆதி³யிதப்³ப³ம், முஸா ப⁴ணிதப்³பா³, பிஸுணம் ப⁴ணிதப்³ப³ம், ப²ருஸம் ப⁴ணிதப்³ப³ம், ஸம்ப²ம் பலபிதப்³ப³ம், ஸந்தி⁴ சே²தி³தப்³போ³, நில்லோபம் ஹாதப்³ப³ம், ஏகாகா³ரிகம் காதப்³ப³ம், பரிபந்தே² டா²தப்³ப³ம், பரதா³ரோ க³ந்தப்³போ³, கா³மகா⁴தகோ காதப்³போ³, நிக³மகா⁴தகோ காதப்³போ³தி? ந ஹேவம் வத்தப்³பே³…பே….

ஏகாதி⁴ப்பாயகதா² நிட்டி²தா.

23. தேவீஸதிமவக்³கோ³

(219) 2. அரஹந்தவண்ணகதா²

909. அரஹந்தானம் வண்ணேன அமனுஸ்ஸா மேது²னம் த⁴ம்மம் படிஸேவந்தீதி? ஆமந்தா. அரஹந்தானம் வண்ணேன அமனுஸ்ஸா பாணம் ஹனந்தி…பே… அதி³ன்னம் ஆதி³யந்தி, முஸா ப⁴ணந்தி, பிஸுணம் ப⁴ணந்தி, ப²ருஸம் ப⁴ணந்தி, ஸம்ப²ம் பலபந்தி, ஸந்தி⁴ம் சி²ந்த³ந்தி, நில்லோபம் ஹரந்தி, ஏகாகா³ரிகம் கரோந்தி, பரிபந்தே² திட்ட²ந்தி, பரதா³ரம் க³ச்ச²ந்தி, கா³மகா⁴தகம் கரோந்தி…பே… நிக³மகா⁴தகம் கரோந்தீதி? ந ஹேவம் வத்தப்³பே³…பே….

அரஹந்தவண்ணகதா² நிட்டி²தா.

23. தேவீஸதிமவக்³கோ³

(220-4) 3-7. இஸ்ஸரியகாமகாரிகாதி³கதா²

910. போ³தி⁴ஸத்தோ இஸ்ஸரியகாமகாரிகாஹேது வினிபாதம் க³ச்ச²தீதி? ஆமந்தா. போ³தி⁴ஸத்தோ இஸ்ஸரியகாமகாரிகாஹேது நிரயம் க³ச்ச²தி, ஸஞ்ஜீவம் க³ச்ச²தி, காலஸுத்தம் க³ச்ச²தி, தாபனம் க³ச்ச²தி, மஹாதாபனம் [பதாபனம் (ஸீ. ஸ்யா. கம். பீ.)] க³ச்ச²தி, ஸங்கா⁴தகம் க³ச்ச²தி, ரோருவம் க³ச்ச²தி…பே… அவீசிம் க³ச்ச²தீதி? ந ஹேவம் வத்தப்³பே³…பே….

போ³தி⁴ஸத்தோ இஸ்ஸரியகாமகாரிகாஹேது வினிபாதம் க³ச்ச²தீதி? ஆமந்தா. ‘‘போ³தி⁴ஸத்தோ இஸ்ஸரியகாமகாரிகாஹேது வினிபாதம் க³ச்ச²தீ’’தி – அத்தே²வ ஸுத்தந்தோதி? நத்தி². ஹஞ்சி ‘‘போ³தி⁴ஸத்தோ இஸ்ஸரியகாமகாரிகாஹேது வினிபாதம் க³ச்ச²தீ’’தி – நத்தே²வ ஸுத்தந்தோ, நோ ச வத ரே வத்தப்³பே³ – ‘‘போ³தி⁴ஸத்தோ இஸ்ஸரியகாமகாரிகாஹேது வினிபாதம் க³ச்ச²தீ’’தி.

911. போ³தி⁴ஸத்தோ இஸ்ஸரியகாமகாரிகாஹேது க³ப்³ப⁴ஸேய்யம் ஓக்கமதீதி? ஆமந்தா. போ³தி⁴ஸத்தோ இஸ்ஸரியகாமகாரிகாஹேது நிரயம் உபபஜ்ஜேய்ய, திரச்சா²னயோனிம் உபபஜ்ஜேய்யாதி? ந ஹேவம் வத்தப்³பே³…பே….

போ³தி⁴ஸத்தோ இஸ்ஸரியகாமகாரிகாஹேது க³ப்³ப⁴ஸேய்யம் ஓக்கமதீதி? ஆமந்தா. போ³தி⁴ஸத்தோ இத்³தி⁴மாதி? ந ஹேவம் வத்தப்³பே³…பே… போ³தி⁴ஸத்தோ இத்³தி⁴மாதி? ஆமந்தா. போ³தி⁴ஸத்தேன ச²ந்தி³த்³தி⁴பாதோ³ பா⁴விதோ…பே… வீரியித்³தி⁴பாதோ³…பே… சித்தித்³தி⁴பாதோ³…பே… வீமம்ஸித்³தி⁴பாதோ³ பா⁴விதோதி? ந ஹேவம் வத்தப்³பே³…பே….

போ³தி⁴ஸத்தோ இஸ்ஸரியகாமகாரிகாஹேது க³ப்³ப⁴ஸேய்யம் ஓக்கமதீதி? ஆமந்தா. ‘‘போ³தி⁴ஸத்தோ இஸ்ஸரியகாமகாரிகாஹேது க³ப்³ப⁴ஸேய்யம் ஓக்கமதீ’’தி – அத்தே²வ ஸுத்தந்தோதி? நத்தி². ஹஞ்சி ‘‘போ³தி⁴ஸத்தோ இஸ்ஸரியகாமகாரிகாஹேது க³ப்³ப⁴ஸேய்யம் ஓக்கமதீ’’தி – நத்தே²வ ஸுத்தந்தோ, நோ ச வத ரே வத்தப்³பே³ – ‘‘போ³தி⁴ஸத்தோ இஸ்ஸரியகாமகாரிகாஹேது க³ப்³ப⁴ஸேய்யம் ஓக்கமதீ’’தி.

912. போ³தி⁴ஸத்தோ இஸ்ஸரியகாமகாரிகாஹேது து³க்கரகாரிகம் அகாஸீதி? ஆமந்தா. போ³தி⁴ஸத்தோ இஸ்ஸரியகாமகாரிகாஹேது ‘‘ஸஸ்ஸதோ லோகோ’’தி பச்சாக³ச்சி², ‘‘அஸஸ்ஸதோ லோகோ’’தி…பே… ‘‘அந்தவா லோகோ’’தி…பே… ‘‘அனந்தவா லோகோ’’தி… ‘‘தம் ஜீவம் தம் ஸரீர’’ந்தி … ‘‘அஞ்ஞம் ஜீவம் அஞ்ஞம் ஸரீர’’ந்தி… ‘‘ஹோதி ததா²க³தோ பரம் மரணா’’தி… ‘‘ந ஹோதி ததா²க³தோ பரம் மரணா’’தி… ‘‘ஹோதி ச ந ச ஹோதி ததா²க³தோ பரம் மரணா’’தி…பே… ‘‘நேவ ஹோதி ந ந ஹோதி ததா²க³தோ பரம் மரணா’’தி பச்சாக³ச்சீ²தி? ந ஹேவம் வத்தப்³பே³…பே….

போ³தி⁴ஸத்தோ இஸ்ஸரியகாமகாரிகாஹேது து³க்கரகாரிகம் அகாஸீதி? ஆமந்தா. ‘‘போ³தி⁴ஸத்தோ இஸ்ஸரியகாமகாரிகாஹேது து³க்கரகாரிகம் அகாஸீ’’தி – அத்தே²வ ஸுத்தந்தோதி? நத்தி². ஹஞ்சி ‘‘போ³தி⁴ஸத்தோ இஸ்ஸரியகாமகாரிகாஹேது து³க்கரகாரிகம் அகாஸீ’’தி – நத்தே²வ ஸுத்தந்தோ, நோ ச வத ரே வத்தப்³பே³ – ‘‘போ³தி⁴ஸத்தோ இஸ்ஸரியகாமகாரிகாஹேது து³க்கரகாரிகம் அகாஸீ’’தி.

913. போ³தி⁴ஸத்தோ இஸ்ஸரியகாமகாரிகாஹேது அபரந்தபம் [அமரம் தபம் (ஸம். நி. 1.137)] அகாஸி, அஞ்ஞம் ஸத்தா²ரம் உத்³தி³ஸீதி? ஆமந்தா. போ³தி⁴ஸத்தோ இஸ்ஸரியகாமகாரிகாஹேது ‘‘ஸஸ்ஸதோ லோகோ’’தி பச்சாக³ச்சி²…பே… ‘‘நேவ ஹோதி ந ந ஹோதி ததா²க³தோ பரம் மரணா’’தி பச்சாக³ச்சீ²தி? ந ஹேவம் வத்தப்³பே³…பே….

914. போ³தி⁴ஸத்தோ இஸ்ஸரியகாமகாரிகாஹேது அஞ்ஞம் ஸத்தா²ரம் உத்³தி³ஸீதி? ஆமந்தா. ‘‘போ³தி⁴ஸத்தோ இஸ்ஸரியகாமகாரிகாஹேது அஞ்ஞம் ஸத்தா²ரம் உத்³தி³ஸீ’’தி – அத்தே²வ ஸுத்தந்தோதி? நத்தி². ஹஞ்சி ‘‘போ³தி⁴ஸத்தோ இஸ்ஸரியகாமகாரிகாஹேது அஞ்ஞம் ஸத்தா²ரம் உத்³தி³ஸீ’’தி – நத்தே²வ ஸுத்தந்தோ, நோ ச வத ரே வத்தப்³பே³ – ‘‘போ³தி⁴ஸத்தோ இஸ்ஸரியகாமகாரிகாஹேது அஞ்ஞம் ஸத்தா²ரம் உத்³தி³ஸீ’’தி.

இஸ்ஸரியகாமகாரிகாகதா² நிட்டி²தா.

23. தேவீஸதிமவக்³கோ³

(225) 8. பதிரூபகதா²

915. அத்தி² ந ராகோ³ ராக³பதிரூபகோதி? ஆமந்தா. அத்தி² ந ப²ஸ்ஸோ ப²ஸ்ஸபதிரூபகோ, அத்தி² ந வேத³னா வேத³னாபதிரூபிகா, அத்தி² ந ஸஞ்ஞா ஸஞ்ஞாபதிரூபிகா, அத்தி² ந சேதனா சேதனாபதிரூபிகா, அத்தி² ந சித்தம் சித்தபதிரூபகம், அத்தி² ந ஸத்³தா⁴ ஸத்³தா⁴பதிரூபிகா, அத்தி² ந வீரியம் வீரியபதிரூபகம், அத்தி² ந ஸதி ஸதிபதிரூபிகா, அத்தி² ந ஸமாதி⁴ ஸமாதி⁴பதிரூபகோ, அத்தி² ந பஞ்ஞா பஞ்ஞாபதிரூபிகாதி? ந ஹேவம் வத்தப்³பே³…பே….

916. அத்தி² ந தோ³ஸோ தோ³ஸபதிரூபகோ, அத்தி² ந மோஹோ மோஹபதிரூபகோ, அத்தி² ந கிலேஸோ கிலேஸபதிரூபகோதி? ஆமந்தா. அத்தி² ந ப²ஸ்ஸோ ப²ஸ்ஸபதிரூபகோ…பே… அத்தி² ந பஞ்ஞா பஞ்ஞாபதிரூபிகாதி? ந ஹேவம் வத்தப்³பே³…பே….

பதிரூபகதா² நிட்டி²தா.

23. தேவீஸதிமவக்³கோ³

(226) 9. அபரினிப்ப²ன்னகதா²

917. ரூபம் அபரினிப்ப²ன்னந்தி? ஆமந்தா. ரூபம் ந அனிச்சம் ந ஸங்க²தம் ந படிச்சஸமுப்பன்னம் ந க²யத⁴ம்மம் ந வயத⁴ம்மம் ந விராக³த⁴ம்மம் ந நிரோத⁴த⁴ம்மம் ந விபரிணாமத⁴ம்மந்தி? ந ஹேவம் வத்தப்³பே³…பே… நனு ரூபம் அனிச்சம் ஸங்க²தம் படிச்சஸமுப்பன்னம் க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மம் விபரிணாமத⁴ம்மந்தி? ஆமந்தா. ஹஞ்சி ரூபம் அனிச்சம் ஸங்க²தம்…பே… விபரிணாமத⁴ம்மம், நோ ச வத ரே வத்தப்³பே³ – ‘‘ரூபம் அபரினிப்ப²ன்ன’’ந்தி.

து³க்க²ஞ்ஞேவ பரினிப்ப²ன்னந்தி? ஆமந்தா. நனு யத³னிச்சம் தம் து³க்க²ம் [ஸம். நி. 3.15] வுத்தம் ப⁴க³வதா – ‘‘ரூபம் அனிச்ச’’ந்தி? ஆமந்தா. ஹஞ்சி யத³னிச்சம் தம் து³க்க²ம் வுத்தம் ப⁴க³வதா – ‘‘ரூபம் அனிச்சம்’’, நோ ச வத ரே வத்தப்³பே³ – ‘‘து³க்க²ஞ்ஞேவ பரினிப்ப²ன்ன’’ந்தி…பே….

918. வேத³னா …பே… ஸஞ்ஞா… ஸங்கா²ரா… விஞ்ஞாணம்… சக்கா²யதனம்…பே… த⁴ம்மாயதனம்… சக்கு²தா⁴து… த⁴ம்மதா⁴து… சக்கு²ந்த்³ரியம்…பே… அஞ்ஞாதாவிந்த்³ரியம் அபரினிப்ப²ன்னந்தி? ஆமந்தா. அஞ்ஞாதாவிந்த்³ரியம் ந அனிச்சம்…பே… ந விபரிணாமத⁴ம்மந்தி? ந ஹேவம் வத்தப்³பே³…பே… நனு அஞ்ஞாதாவிந்த்³ரியம் அனிச்சம் ஸங்க²தம்…பே… விபரிணாமத⁴ம்மந்தி? ஆமந்தா. ஹஞ்சி அஞ்ஞாதாவிந்த்³ரியம் அனிச்சம் ஸங்க²தம் படிச்சஸமுப்பன்னம் க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மம் விபரிணாமத⁴ம்மம், நோ ச வத ரே வத்தப்³பே³ – ‘‘அஞ்ஞாதாவிந்த்³ரியம் அபரினிப்ப²ன்ன’’ந்தி.

து³க்க²ஞ்ஞேவ பரினிப்ப²ன்னந்தி? ஆமந்தா. நனு யத³னிச்சம் தம் து³க்க²ம் வுத்தம் ப⁴க³வதா – ‘‘அஞ்ஞாதாவிந்த்³ரியம் அனிச்ச’’ந்தி? ஆமந்தா. ஹஞ்சி யத³னிச்சம் தம் து³க்க²ம் வுத்தம் ப⁴க³வதா – ‘‘அஞ்ஞாதாவிந்த்³ரியம் அனிச்சம்’’, நோ ச வத ரே வத்தப்³பே³ – ‘‘து³க்க²ஞ்ஞேவ பரினிப்ப²ன்ன’’ந்தி.

அபரினிப்ப²ன்னகதா² நிட்டி²தா.

தேவீஸதிமவக்³கோ³.

தஸ்ஸுத்³தா³னம் –

ஏகாதி⁴ப்பாயேன மேது²னோ த⁴ம்மோ படிஸேவிதப்³போ³, அரஹந்தானம் வண்ணேன அமனுஸ்ஸா மேது²னம் த⁴ம்மம் படிஸேவந்தி, போ³தி⁴ஸத்தோ இஸ்ஸரியகாமகாரிகாஹேது வினிபாதம் க³ச்ச²தி, க³ப்³ப⁴ஸேய்யம் ஓக்கமதி, து³க்கரகாரிகம் அகாஸி, அபரந்தபம் அகாஸி, அஞ்ஞம் ஸத்தா²ரம் உத்³தி³ஸி, அத்தி² ந ராகோ³ ராக³பதிரூபகோ அத்தி² ந தோ³ஸோ தோ³ஸபதிரூபகோ அத்தி² ந மோஹோ மோஹபதிரூபகோ அத்தி² ந கிலேஸோ கிலேஸபதிரூபகோ, ரூபம் அபரினிப்ப²ன்னம் அஞ்ஞாதாவிந்த்³ரியம் அபரினிப்ப²ன்னந்தி.

கு²த்³த³கோ அட்³ட⁴பண்ணாஸகோ.

தஸ்ஸுத்³தா³னம் –

நவம், நிப்³பு³தி, ஏகாதி⁴ப்பாயோதி.

பண்ணாஸகுத்³தா³னம் –

மஹானியாமோ, அனுஸயா, நிக்³க³ஹோ, கு²த்³த³கபஞ்சமோ;

பரப்பவாத³மத்³த³னா, ஸுத்தமூலஸமாஹிதா;

உஜ்ஜோதனா ஸத்து²ஸமயே, கதா²வத்து²பகரணேதி.

பஞ்சத்திம்ஸபா⁴ணவாரம்

கதா²வத்து²பகரணம் நிட்டி²தம்.