21. ஏகவீஸதிமவக்³கோ³

(200) 1. ஸாஸனகதா²

878. ஸாஸனம் நவம் கதந்தி? ஆமந்தா. ஸதிபட்டா²னா நவம் கதாதி? ந ஹேவம் வத்தப்³பே³…பே… ஸாஸனம் நவம் கதந்தி? ஆமந்தா. ஸம்மப்பதா⁴னா…பே… இத்³தி⁴பாதா³…பே… இந்த்³ரியா…பே… ப³லா…பே… போ³ஜ்ஜ²ங்கா³ நவம் கதாதி? ந ஹேவம் வத்தப்³பே³…பே… புப்³பே³ அகுஸலம் பச்சா² குஸலம் கதந்தி? ந ஹேவம் வத்தப்³பே³…பே… புப்³பே³ ஸாஸவம்…பே… ஸம்யோஜனியம் க³ந்த²னியம் ஓக⁴னியம் யோக³னியம் நீவரணியம் பராமட்ட²ம் உபாதா³னியம்…பே… ஸம்கிலேஸிகம் பச்சா² அஸம்கிலேஸிகம் கதந்தி? ந ஹேவம் வத்தப்³பே³…பே….

அத்தி² கோசி ததா²க³தஸ்ஸ ஸாஸனம் நவம் கரோதீதி? ஆமந்தா. அத்தி² கோசி ஸதிபட்டா²னே நவம் கரோதீதி? ந ஹேவம் வத்தப்³பே³…பே… அத்தி² கோசி ஸம்மப்பதா⁴னே…பே… இத்³தி⁴பாதே³…பே… இந்த்³ரியே…பே… ப³லே…பே… போ³ஜ்ஜ²ங்கே³ நவம் கரோதீதி? ந ஹேவம் வத்தப்³பே³…பே… அத்தி² கோசி புப்³பே³ அகுஸலம் பச்சா² குஸலம் கரோதீதி? ந ஹேவம் வத்தப்³பே³…பே… அத்தி² கோசி புப்³பே³ ஸாஸவம்…பே… ஸம்கிலேஸிகம் பச்சா² அஸம்கிலேஸியம் கரோதீதி? ந ஹேவம் வத்தப்³பே³…பே….

லப்³பா⁴ ததா²க³தஸ்ஸ ஸாஸனம் புன நவம் காதுந்தி? ஆமந்தா. லப்³பா⁴ ஸதிபட்டா²னா புன நவம் காதுந்தி? ந ஹேவம் வத்தப்³பே³…பே… லப்³பா⁴ ஸம்மப்பதா⁴னா…பே… இத்³தி⁴பாதா³…பே… இந்த்³ரியா…பே… ப³லா…பே… போ³ஜ்ஜ²ங்கா³ புன நவம் காதுந்தி? ந ஹேவம் வத்தப்³பே³…பே… லப்³பா⁴ புப்³பே³ அகுஸலம் பச்சா² குஸலம் காதுந்தி? ந ஹேவம் வத்தப்³பே³…பே… லப்³பா⁴ புப்³பே³ ஸாஸவம்…பே… ஸம்கிலேஸியம் பச்சா² அஸம்கிலேஸியம் காதுந்தி? ந ஹேவம் வத்தப்³பே³…பே….

ஸாஸனகதா² நிட்டி²தா.

21. ஏகவீஸதிமவக்³கோ³

(201) 2. அவிவித்தகதா²

879. புது²ஜ்ஜனோ தேதா⁴துகேஹி த⁴ம்மேஹி அவிவித்தோதி? ஆமந்தா. புது²ஜ்ஜனோ தேதா⁴துகேஹி ப²ஸ்ஸேஹி…பே… தேதா⁴துகாஹி வேத³னாஹி… ஸஞ்ஞாஹி … சேதனாஹி… சித்தேஹி… ஸத்³தா⁴ஹி… வீரியேஹி… ஸதீஹி… ஸமாதீ⁴ஹி…பே… தேதா⁴துகாஹி பஞ்ஞாஹி அவிவித்தோதி? ந ஹேவம் வத்தப்³பே³…பே….

புது²ஜ்ஜனோ தேதா⁴துகேஹி கம்மேஹி அவிவித்தோதி? ஆமந்தா. யஸ்மிம் க²ணே புது²ஜ்ஜனோ சீவரம் தே³தி, தஸ்மிம் க²ணே பட²மம் ஜா²னம் உபஸம்பஜ்ஜ விஹரதி…பே… ஆகாஸானஞ்சாயதனம் உபஸம்பஜ்ஜ விஹரதீதி? ந ஹேவம் வத்தப்³பே³…பே… யஸ்மிம் க²ணே புது²ஜ்ஜனோ பிண்ட³பாதம் தே³தி…பே… ஸேனாஸனம் தே³தி…பே… கி³லானபச்சயபே⁴ஸஜ்ஜபரிக்கா²ரம் தே³தி, தஸ்மிம் க²ணே சதுத்த²ம் ஜா²னம் உபஸம்பஜ்ஜ விஹரதி… நேவஸஞ்ஞானாஸஞ்ஞாயதனம் உபஸம்பஜ்ஜ விஹரதீதி? ந ஹேவம் வத்தப்³பே³…பே….

880. ந வத்தப்³ப³ம் – ‘‘புது²ஜ்ஜனோ தேதா⁴துகேஹி கம்மேஹி அவிவித்தோ’’தி? ஆமந்தா. புது²ஜ்ஜனஸ்ஸ ரூபதா⁴துஅரூபதா⁴தூபக³ம் கம்மம் பரிஞ்ஞாதந்தி? ந ஹேவம் வத்தப்³பே³. தேன ஹி புது²ஜ்ஜனோ தேதா⁴துகேஹி கம்மேஹி அவிவித்தோதி…பே….

அவிவித்தகதா² நிட்டி²தா.

21. ஏகவீஸதிமவக்³கோ³

(202) 3. ஸம்யோஜனகதா²

881. அத்தி² கிஞ்சி ஸம்யோஜனம் அப்பஹாய அரஹத்தப்பத்தீதி? ஆமந்தா. அத்தி² கிஞ்சி ஸக்காயதி³ட்டி²ம் அப்பஹாய…பே… விசிகிச்ச²ம் அப்பஹாய…பே… ஸீலப்³ப³தபராமாஸம் அப்பஹாய… ராக³ம் அப்பஹாய… தோ³ஸம் அப்பஹாய… மோஹம் அப்பஹாய… அனோத்தப்பம் அப்பஹாய அரஹத்தப்பத்தீதி? ந ஹேவம் வத்தப்³பே³…பே….

அத்தி² கிஞ்சி ஸம்யோஜனம் அப்பஹாய அரஹத்தப்பத்தீதி? ஆமந்தா. அரஹா ஸராகோ³ ஸதோ³ஸோ ஸமோஹோ ஸமானோ ஸமக்கோ² ஸபளாஸோ ஸஉபாயாஸோ ஸகிலேஸோதி? ந ஹேவம் வத்தப்³பே³…பே… நனு அரஹா நிராகோ³ நித்³தோ³ஸோ நிம்மோஹோ நிம்மானோ நிம்மக்கோ² நிப்பளாஸோ நிருபாயாஸோ நிக்கிலேஸோதி? ஆமந்தா. ஹஞ்சி அரஹா நிராகோ³…பே… நிக்கிலேஸோ, நோ ச வத ரே வத்தப்³பே³ – ‘‘அத்தி² கிஞ்சி ஸம்யோஜனம் அப்பஹாய அரஹத்தப்பத்தீ’’தி.

882. ந வத்தப்³ப³ம் – ‘‘அத்தி² கிஞ்சி ஸம்யோஜனம் அப்பஹாய அரஹத்தப்பத்தீ’’தி? ஆமந்தா. அரஹா ஸப்³ப³ம் பு³த்³த⁴விஸயம் ஜானாதீதி? ந ஹேவம் வத்தப்³பே³. தேன ஹி அத்தி² கிஞ்சி ஸம்யோஜனம் அப்பஹாய அரஹத்தப்பத்தீதி.

ஸம்யோஜனகதா² நிட்டி²தா.

21. ஏகவீஸதிமவக்³கோ³

(203) 4. இத்³தி⁴கதா²

883. அத்தி² அதி⁴ப்பாயஇத்³தி⁴ பு³த்³தா⁴னம் வா ஸாவகானம் வாதி? ஆமந்தா. ‘‘நிச்சபண்ணா ருக்கா² ஹோந்தூ’’தி – அத்தி² அதி⁴ப்பாயஇத்³தி⁴ பு³த்³தா⁴னம் வா ஸாவகானம் வாதி? ந ஹேவம் வத்தப்³பே³…பே… நிச்சபுப்பா² ருக்கா² ஹோந்து…பே… நிச்சப²லிகா ருக்கா² ஹோந்து… நிச்சம் ஜுண்ஹம் ஹோது… நிச்சம் கே²மம் ஹோது… நிச்சம் ஸுபி⁴க்க²ம் ஹோது… ‘‘நிச்சம் ஸுவத்தி² [ஸுவுட்டி²கம் (ஸ்யா.)] ஹோதூ’’தி – அத்தி² அதி⁴ப்பாயஇத்³தி⁴ பு³த்³தா⁴னம் வா ஸாவகானம் வாதி? ந ஹேவம் வத்தப்³பே³…பே….

அத்தி² அதி⁴ப்பாயஇத்³தி⁴ பு³த்³தா⁴னம் வா ஸாவகானம் வாதி? ஆமந்தா. ‘‘உப்பன்னோ ப²ஸ்ஸோ மா நிருஜ்ஜீ²’’தி – அத்தி² அதி⁴ப்பாயஇத்³தி⁴ பு³த்³தா⁴னம் வா ஸாவகானம் வாதி? ந ஹேவம் வத்தப்³பே³…பே….

உப்பன்னா வேத³னா…பே… ஸஞ்ஞா… சேதனா… சித்தம்… ஸத்³தா⁴… வீரியம்… ஸதி… ஸமாதி⁴…பே… பஞ்ஞா மா நிருஜ்ஜீ²தி – அத்தி² அதி⁴ப்பாயஇத்³தி⁴ பு³த்³தா⁴னம் வா ஸாவகானம் வாதி? ந ஹேவம் வத்தப்³பே³…பே….

அத்தி² அதி⁴ப்பாயஇத்³தி⁴ பு³த்³தா⁴னம் வா ஸாவகானம் வாதி? ஆமந்தா. ‘‘ரூபம் நிச்சம் ஹோதூ’’தி – அத்தி² அதி⁴ப்பாயஇத்³தி⁴… வேத³னா…பே… ஸஞ்ஞா…பே… ஸங்கா²ரா…பே… ‘‘விஞ்ஞாணம் நிச்சம் ஹோதூ’’தி – அத்தி² அதி⁴ப்பாயஇத்³தி⁴ பு³த்³தா⁴னம் வா ஸாவகானம் வாதி? ந ஹேவம் வத்தப்³பே³…பே….

அத்தி² அதி⁴ப்பாயஇத்³தி⁴ பு³த்³தா⁴னம் வா ஸாவகானம் வாதி? ஆமந்தா. ‘‘ஜாதித⁴ம்மா ஸத்தா மா ஜாயிம்ஸூ’’தி அத்தி²…பே… ‘‘ஜராத⁴ம்மா ஸத்தா மா ஜீரிம்ஸூ’’தி…பே… ‘‘ப்³யாதி⁴த⁴ம்மா ஸத்தா மா ப்³யாதி⁴யிம்ஸூ’’தி…பே… ‘‘மரணத⁴ம்மா ஸத்தா மா மீயிம்ஸூ’’தி – அத்தி² அதி⁴ப்பாயஇத்³தி⁴ பு³த்³தா⁴னம் வா ஸாவகானம் வாதி? ந ஹேவம் வத்தப்³பே³…பே….

884. ந வத்தப்³ப³ம் – ‘‘அத்தி² அதி⁴ப்பாயஇத்³தி⁴ பு³த்³தா⁴னம் வா ஸாவகானம் வா’’தி? ஆமந்தா. நனு ஆயஸ்மா பிலிந்த³வச்சோ² ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ பாஸாத³ம் ‘‘ஸுவண்ண’’ந்த்வேவ அதி⁴முச்சி, ஸுவண்ணோ ச பன ஆஸீதி [பாரா. 621; மஹாவ. 271]? ஆமந்தா. ஹஞ்சி ஆயஸ்மா பிலிந்த³வச்சோ² ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ பாஸாத³ம் ஸுவண்ணந்த்வேவ அதி⁴முச்சி, ஸுவண்ணோ ச பன ஆஸி, தேன வத ரே வத்தப்³பே³ – ‘‘அத்தி² அதி⁴ப்பாயஇத்³தி⁴ பு³த்³தா⁴னம் வா ஸாவகானம் வா’’தி.

இத்³தி⁴கதா² நிட்டி²தா.

21. ஏகவீஸதிமவக்³கோ³

(204) 5. பு³த்³த⁴கதா²

885. அத்தி² பு³த்³தா⁴னம் பு³த்³தே⁴ஹி ஹீனாதிரேகதாதி? ஆமந்தா. ஸதிபட்டா²னதோதி? ந ஹேவம் வத்தப்³பே³ …பே… ஸம்மப்பதா⁴னதோ…பே… இத்³தி⁴பாத³தோ… இந்த்³ரியதோ… ப³லதோ… போ³ஜ்ஜ²ங்க³தோ… வஸிபா⁴வதோ…பே… ஸப்³ப³ஞ்ஞுதஞாணத³ஸ்ஸனதோதி? ந ஹேவம் வத்தப்³பே³…பே….

பு³த்³த⁴கதா² நிட்டி²தா.

21. ஏகவீஸதிமவக்³கோ³

(205) 6. ஸப்³ப³தி³ஸாகதா²

886. ஸப்³பா³ தி³ஸா பு³த்³தா⁴ திட்ட²ந்தீதி? ஆமந்தா. புரத்தி²மாய தி³ஸாய பு³த்³தோ⁴ திட்ட²தீதி? ந ஹேவம் வத்தப்³பே³…பே… புரத்தி²மாய தி³ஸாய பு³த்³தோ⁴ திட்ட²தீதி? ஆமந்தா. கின்னாமோ ஸோ ப⁴க³வா, கிம்ஜச்சோ, கிம்கோ³த்தோ, கின்னாமா தஸ்ஸ ப⁴க³வதோ மாதாபிதரோ, கின்னாமம் தஸ்ஸ ப⁴க³வதோ ஸாவகயுக³ம், கோனாமோ தஸ்ஸ ப⁴க³வதோ உபட்டா²கோ, கீதி³ஸம் சீவரம் தா⁴ரேதி, கீதி³ஸம் பத்தம் தா⁴ரேதி, கதரஸ்மிம் கா³மே வா நிக³மே வா நக³ரே வா ரட்டே² வா ஜனபதே³ வாதி? ந ஹேவம் வத்தப்³பே³…பே….

த³க்கி²ணாய தி³ஸாய…பே… பச்சி²மாய தி³ஸாய…பே… உத்தராய தி³ஸாய…பே… ஹேட்டி²மாய தி³ஸாய பு³த்³தோ⁴ திட்ட²தீதி? ந ஹேவம் வத்தப்³பே³…பே… ஹேட்டி²மாய தி³ஸாய பு³த்³தோ⁴ திட்ட²தீதி? ஆமந்தா. கின்னாமோ ஸோ ப⁴க³வா…பே… ஜனபதே³ வாதி? ந ஹேவம் வத்தப்³பே³…பே….

உபரிமாய தி³ஸாய பு³த்³தோ⁴ திட்ட²தீதி? ந ஹேவம் வத்தப்³பே³…பே…. உபரிமாய தி³ஸாய பு³த்³தோ⁴ திட்ட²தீதி? ஆமந்தா. சாதுமஹாராஜிகே திட்ட²தி…பே… தாவதிம்ஸே திட்ட²தி…பே… யாமே திட்ட²தி…பே… துஸிதே திட்ட²தி…பே… நிம்மானரதியா திட்ட²தி…பே… பரனிம்மிதவஸவத்தியா திட்ட²தி…பே… ப்³ரஹ்மலோகே திட்ட²தீதி? ந ஹேவம் வத்தப்³பே³…பே….

ஸப்³ப³தி³ஸாகதா² நிட்டி²தா.

21. ஏகவீஸதிமவக்³கோ³

(206) 7. த⁴ம்மகதா²

887. ஸப்³பே³ த⁴ம்மா நியதாதி? ஆமந்தா. மிச்ச²த்தனியதாதி? ந ஹேவம் வத்தப்³பே³…பே… ஸம்மத்தனியதாதி? ந ஹேவம் வத்தப்³பே³…பே… நத்தி² அனியதோ ராஸீதி? ந ஹேவம் வத்தப்³பே³…பே… நனு அத்தி² அனியதோ ராஸீதி? ஆமந்தா. ஹஞ்சி அத்தி² அனியதோ ராஸி, நோ ச வத ரே வத்தப்³பே³ – ‘‘ஸப்³பே³ த⁴ம்மா நியதா’’தி.

ஸப்³பே³ த⁴ம்மா நியதாதி? ஆமந்தா. நனு தயோ ராஸீ வுத்தா ப⁴க³வதா – மிச்ச²த்தனியதோ ராஸி, ஸம்மத்தனியதோ ராஸி, அனியதோ ராஸீதி [த⁴. ஸ. திகமாதிகா 15]? ஆமந்தா. ஹஞ்சி தயோ ராஸீ வுத்தா ப⁴க³வதா – மிச்ச²த்தனியதோ ராஸி, ஸம்மத்தனியதோ ராஸி, அனியதோ ராஸி, நோ ச வத ரே வத்தப்³பே³ – ‘‘ஸப்³பே³ த⁴ம்மா நியதா’’தி.

ரூபம் ரூபட்டே²ன நியதந்தி? ஆமந்தா. மிச்ச²த்தனியதந்தி? ந ஹேவம் வத்தப்³பே³…பே… ஸம்மத்தனியதந்தி? ந ஹேவம் வத்தப்³பே³…பே… வேத³னா…பே… ஸஞ்ஞா…பே… ஸங்கா²ரா…பே… விஞ்ஞாணம் விஞ்ஞாணட்டே²ன நியதந்தி? ஆமந்தா. மிச்ச²த்தனியதந்தி? ந ஹேவம் வத்தப்³பே³…பே… ஸம்மத்தனியதந்தி? ந ஹேவம் வத்தப்³பே³…பே….

888. ந வத்தப்³ப³ம் – ரூபம் ரூபட்டே²ன நியதம்…பே… வேத³னா…பே… ஸஞ்ஞா…பே… ஸங்கா²ரா…பே… விஞ்ஞாணம் விஞ்ஞாணட்டே²ன நியதந்தி? ஆமந்தா. ரூபம் வேத³னா ஹோதி…பே… ஸஞ்ஞா ஹோதி… ஸங்கா²ரா ஹோந்தி… விஞ்ஞாணம் ஹோதி… வேத³னா…பே… ஸஞ்ஞா…பே… ஸங்கா²ரா…பே… விஞ்ஞாணம் ரூபம் ஹோதி…பே… வேத³னா ஹோதி… ஸஞ்ஞா ஹோதி… ஸங்கா²ரா ஹோந்தீதி? ந ஹேவம் வத்தப்³பே³. தேன ஹி ரூபம் ரூபட்டே²ன நியதம், வேத³னா…பே… ஸஞ்ஞா…பே… ஸங்கா²ரா…பே… விஞ்ஞாணம் விஞ்ஞாணட்டே²ன நியதந்தி.

த⁴ம்மகதா² நிட்டி²தா.

21. ஏகவீஸதிமவக்³கோ³

(207) 8. கம்மகதா²

889. ஸப்³பே³ கம்மா நியதாதி? ஆமந்தா. மிச்ச²த்தனியதாதி? ந ஹேவம் வத்தப்³பே³…பே… ஸம்மத்தனியதாதி? ந ஹேவம் வத்தப்³பே³…பே… நத்தி² அனியதோ ராஸீதி? ந ஹேவம் வத்தப்³பே³…பே… நனு அத்தி² அனியதோ ராஸீதி? ஆமந்தா. ஹஞ்சி அத்தி² அனியதோ ராஸி, நோ ச வத ரே வத்தப்³பே³ – ‘‘ஸப்³பே³ கம்மா நியதா’’தி.

ஸப்³பே³ கம்மா நியதாதி? ஆமந்தா. நனு தயோ ராஸீ வுத்தா ப⁴க³வதா – மிச்ச²த்தனியதோ ராஸி, ஸம்மத்தனியதோ ராஸி, அனியதோ ராஸீதி? ஆமந்தா. ஹஞ்சி தயோ ராஸீ வுத்தா ப⁴க³வதா – மிச்ச²த்தனியதோ ராஸி, ஸம்மத்தனியதோ ராஸி, அனியதோ ராஸி, நோ ச வத ரே வத்தப்³பே³ – ‘‘ஸப்³பே³ கம்மா நியதா’’தி.

890. தி³ட்ட²த⁴ம்மவேத³னீயம் கம்மம் தி³ட்ட²த⁴ம்மவேத³னீயட்டே²ன நியதந்தி? ஆமந்தா. மிச்ச²த்தனியதந்தி? ந ஹேவம் வத்தப்³பே³…பே… ஸம்மத்தனியதந்தி? ந ஹேவம் வத்தப்³பே³…பே…. உபபஜ்ஜவேத³னீயம் கம்மம்…பே… அபராபரியவேத³னீயம் கம்மம் அபராபரியவேத³னீயட்டே²ன நியதந்தி? ஆமந்தா. மிச்ச²த்தனியதந்தி? ந ஹேவம் வத்தப்³பே³…பே… ஸம்மத்தனியதந்தி? ந ஹேவம் வத்தப்³பே³…பே….

891. ந வத்தப்³ப³ம் – தி³ட்ட²த⁴ம்மவேத³னீயம் கம்மம் தி³ட்ட²த⁴ம்மவேத³னீயட்டே²ன நியதம், உபபஜ்ஜவேத³னீயம் கம்மம்…பே… அபராபரியவேத³னீயம் கம்மம் அபராபரியவேத³னீயட்டே²ன நியதந்தி? ஆமந்தா. தி³ட்ட²த⁴ம்மவேத³னீயம் கம்மம் உபபஜ்ஜவேத³னீயம் ஹோதி, அபராபரியவேத³னீயம் ஹோதி…பே… உபபஜ்ஜவேத³னீயம் கம்மம் தி³ட்ட²த⁴ம்மவேத³னீயம் ஹோதி, அபராபரியவேத³னீயம் ஹோதி…பே… அபராபரியவேத³னீயம் கம்மம் தி³ட்ட²த⁴ம்மவேத³னீயம் ஹோதி, உபபஜ்ஜவேத³னீயம் ஹோதீதி? ந ஹேவம் வத்தப்³பே³. தேன ஹி தி³ட்ட²த⁴ம்மவேத³னீயம் கம்மம் தி³ட்ட²த⁴ம்மவேத³னீயட்டே²ன நியதம், உபபஜ்ஜவேத³னீயம் கம்மம்…பே… அபராபரியவேத³னீயம் கம்மம் அபராபரியவேத³னீயட்டே²ன நியதந்தி.

கம்மகதா² நிட்டி²தா.

ஏகவீஸதிமவக்³கோ³.

தஸ்ஸுத்³தா³னம் –

ஸாஸனம் நவம் கதம் அத்தி² கோசி ததா²க³தஸ்ஸ ஸாஸனம் நவம் கரோதி லப்³பா⁴ ததா²க³தஸ்ஸ ஸாஸனம் புன நவம் காதும், புது²ஜ்ஜனோ தேதா⁴துகேஹி த⁴ம்மேஹி அவிவித்தோ, அத்தி² கிஞ்சி ஸம்யோஜனம் அப்பஹாய அரஹத்தப்பத்தி, அத்தி² அதி⁴ப்பாயித்³தி⁴ பு³த்³தா⁴னம் வா ஸாவகானம் வா, அத்தி² பு³த்³தா⁴னம் பு³த்³தே⁴ஹி ஹீனாதிரேகதா, ஸப்³பா³ தி³ஸா பு³த்³தா⁴ திட்ட²ந்தி, ஸப்³பே³ த⁴ம்மா நியதா, ஸப்³பே³ கம்மா நியதாதி.