(186) 1. கிலேஸஜஹனகதா²

828. அதீதே கிலேஸே ஜஹதீதி? ஆமந்தா. நிருத்³த⁴ம் நிரோதே⁴தி, விக³தம் விக³மேதி, கீ²ணம் கே²பேதி, அத்த²ங்க³தம் அத்த²ங்க³மேதி, அப்³ப⁴த்த²ங்க³தம் அப்³ப⁴த்த²ங்க³மேதீதி? ந ஹேவம் வத்தப்³பே³…பே… அதீதே கிலேஸே ஜஹதீதி? ஆமந்தா. நனு அதீதம் நிருத்³த⁴ந்தி? ஆமந்தா. ஹஞ்சி அதீதம் நிருத்³த⁴ம், நோ ச வத ரே வத்தப்³பே³ – ‘‘அதீதே கிலேஸே ஜஹதீ’’தி. அதீதே கிலேஸே ஜஹதீதி? ஆமந்தா. நனு அதீதம் நத்தீ²தி? ஆமந்தா. ஹஞ்சி அதீதம் நத்தி², நோ ச வத ரே வத்தப்³பே³ – ‘‘அதீதே கிலேஸே ஜஹதீ’’தி.

829. அனாக³தே கிலேஸே ஜஹதீதி? ஆமந்தா. அஜாதம் அஜனேதி, அஸஞ்ஜாதம் அஸஞ்ஜனேதி, அனிப்³ப³த்தம் அனிப்³ப³த்தேதி, அபாதுபூ⁴தம் அபாதுபா⁴வேதீதி? ந ஹேவம் வத்தப்³பே³…பே… அனாக³தே கிலேஸே ஜஹதீதி? ஆமந்தா. நனு அனாக³தம் அஜாதந்தி? ஆமந்தா. ஹஞ்சி அனாக³தம் அஜாதம், நோ ச வத ரே வத்தப்³பே³ – ‘‘அனாக³தே கிலேஸே ஜஹதீ’’தி. அனாக³தே கிலேஸே ஜஹதீதி? ஆமந்தா. நனு அனாக³தம் நத்தீ²தி? ஆமந்தா. ஹஞ்சி அனாக³தம் நத்தி², நோ ச வத ரே வத்தப்³பே³ – ‘‘அனாக³தே கிலேஸே ஜஹதீ’’தி.

830. பச்சுப்பன்னே கிலேஸே ஜஹதீதி? ஆமந்தா. ரத்தோ ராக³ம் ஜஹதி, து³ட்டோ² தோ³ஸம் ஜஹதி, மூள்ஹோ மோஹம் ஜஹதி, கிலிட்டோ² கிலேஸே ஜஹதீதி? ந ஹேவம் வத்தப்³பே³…பே… ராகே³ன ராக³ம் ஜஹதி, தோ³ஸேன தோ³ஸம் ஜஹதி, மோஹேன மோஹம் ஜஹதி, கிலேஸேஹி கிலேஸே ஜஹதீதி? ந ஹேவம் வத்தப்³பே³…பே….

ராகோ³ சித்தஸம்பயுத்தோ, மக்³கோ³ சித்தஸம்பயுத்தோதி? ஆமந்தா. த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே….

ராகோ³ அகுஸலோ, மக்³கோ³ குஸலோதி? ஆமந்தா. குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வம் ஆக³ச்ச²ந்தீதி? ந ஹேவம் வத்தப்³பே³…பே….

குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வம் ஆக³ச்ச²ந்தீதி? ஆமந்தா. நனு வுத்தம் ப⁴க³வதா – ‘‘சத்தாரிமானி, பி⁴க்க²வே, ஸுவிதூ³ரவிதூ³ரானி! கதமானி சத்தாரி? நப⁴ஞ்ச, பி⁴க்க²வே, பத²வீ ச – இத³ம் பட²மம் ஸுவிதூ³ரவிதூ³ரம்…பே… தஸ்மா ஸதம் த⁴ம்மோ அஸப்³பி⁴ ஆரகா’’தி. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘குஸலாகுஸலா…பே… ஸம்முகீ²பா⁴வம் ஆக³ச்ச²ந்தீ’’தி.

831. ந வத்தப்³ப³ம் – ‘‘அதீதே கிலேஸே ஜஹதி, அனாக³தே கிலேஸே ஜஹதி, பச்சுப்பன்னே கிலேஸே ஜஹதீ’’தி? ஆமந்தா. நத்தி² கிலேஸே ஜஹதீதி? ந ஹேவம் வத்தப்³பே³…பே… தேன ஹி அதீதே கிலேஸே ஜஹதி, அனாக³தே கிலேஸே ஜஹதி, பச்சுப்பன்னே கிலேஸே ஜஹதீதி.

கிலேஸஜஹனகதா² நிட்டி²தா.