18. அட்டா²ரஸமவக்³கோ³

(181) 5. ஏகமக்³க³கதா²

810. ஏகேன அரியமக்³கே³ன சத்தாரி ஸாமஞ்ஞப²லானி ஸச்சி²கரோதீதி? ஆமந்தா. சதுன்னம் ப²ஸ்ஸானம்…பே… சதுன்னம் ஸஞ்ஞானம் ஸமோதா⁴னம் ஹோதீதி? ந ஹேவம் வத்தப்³பே³…பே… ஏகேன அரியமக்³கே³ன சத்தாரி ஸாமஞ்ஞப²லானி ஸச்சி²கரோதீதி? ஆமந்தா. ஸோதாபத்திமக்³கே³னாதி? ந ஹேவம் வத்தப்³பே³…பே… ஸகதா³கா³மி…பே… அனாகா³மிமக்³கே³னாதி? ந ஹேவம் வத்தப்³பே³…பே….

கதமேன மக்³கே³னாதி? அரஹத்தமக்³கே³னாதி. அரஹத்தமக்³கே³ன ஸக்காயதி³ட்டி²ம் விசிகிச்ச²ம் ஸீலப்³ப³தபராமாஸம் ஜஹதீதி? ந ஹேவம் வத்தப்³பே³…பே… அரஹத்தமக்³கே³ன ஸக்காயதி³ட்டி²ம் விசிகிச்ச²ம் ஸீலப்³ப³தபராமாஸம் ஜஹதீதி? ஆமந்தா. நனு திண்ணம் ஸம்யோஜனானம் பஹானம் ஸோதாபத்திப²லம் வுத்தம் ப⁴க³வதாதி? ஆமந்தா. ஹஞ்சி திண்ணம் ஸம்யோஜனானம் பஹானம் ஸோதாபத்திப²லம் வுத்தம் ப⁴க³வதா, நோ ச வத ரே வத்தப்³பே³ – ‘‘அரஹத்தமக்³கே³ன ஸக்காயதி³ட்டி²ம் விசிகிச்ச²ம் ஸீலப்³ப³தபராமாஸம் ஜஹதீ’’தி.

அரஹத்தமக்³கே³ன ஓளாரிகம் காமராக³ம் ஓளாரிகம் ப்³யாபாத³ம் ஜஹதீதி? ந ஹேவம் வத்தப்³பே³…பே… அரஹத்தமக்³கே³ன ஓளாரிகம் காமராக³ம் ஓளாரிகம் ப்³யாபாத³ம் ஜஹதீதி? ஆமந்தா. நனு காமராக³ப்³யாபாதா³னம் தனுபா⁴வம் ஸகதா³கா³மிப²லம் வுத்தம் ப⁴க³வதாதி? ஆமந்தா. ஹஞ்சி காமராக³ப்³யாபாதா³னம் தனுபா⁴வம் ஸகதா³கா³மிப²லம் வுத்தம் ப⁴க³வதா, நோ ச வத ரே வத்தப்³பே³ – ‘‘அரஹத்தமக்³கே³ன ஓளாரிகம் காமராக³ம் ஓளாரிகம் ப்³யாபாத³ம் ஜஹதீ’’தி.

அரஹத்தமக்³கே³ன அணுஸஹக³தம் காமராக³ம் அணுஸஹக³தம் ப்³யாபாத³ம் ஜஹதீதி? ந ஹேவம் வத்தப்³பே³…பே… அரஹத்தமக்³கே³ன அணுஸஹக³தம் காமராக³ம் அணுஸஹக³தம் ப்³யாபாத³ம் ஜஹதீதி? ஆமந்தா. நனு காமராக³ப்³யாபாதா³னம் அனவஸேஸப்பஹானம் அனாகா³மிப²லம் வுத்தம் ப⁴க³வதாதி? ஆமந்தா. ஹஞ்சி காமராக³ப்³யாபாதா³னம் அனவஸேஸப்பஹானம் அனாகா³மிப²லம் வுத்தம் ப⁴க³வதா, நோ ச வத ரே வத்தப்³பே³ – ‘‘அரஹத்தமக்³கே³ன அணுஸஹக³தம் காமராக³ம் அணுஸஹக³தம் ப்³யாபாத³ம் ஜஹதீ’’தி.

811. ந வத்தப்³ப³ம் – ‘‘ஏகேன அரியமக்³கே³ன சத்தாரி ஸாமஞ்ஞப²லானி ஸச்சி²கரோதீ’’தி? ஆமந்தா. ப⁴க³வதா ஸோதாபத்திமக்³கோ³ பா⁴விதோதி? ஆமந்தா. ப⁴க³வா ஸோதாபன்னோதி? ந ஹேவம் வத்தப்³பே³…பே… ப⁴க³வதா ஸகதா³கா³மி…பே… அனாகா³மிமக்³கோ³ பா⁴விதோதி? ஆமந்தா. ப⁴க³வா அனாகா³மீதி? ந ஹேவம் வத்தப்³பே³…பே….

812. ப⁴க³வா ஏகேன அரியமக்³கே³ன சத்தாரி ஸாமஞ்ஞப²லானி ஸச்சி²கரோதி, ஸாவகா சதூஹி அரியமக்³கே³ஹி சத்தாரி ஸாமஞ்ஞப²லானி ஸச்சி²கரோந்தீதி? ஆமந்தா. ஸாவகா பு³த்³த⁴ஸ்ஸ ப⁴க³வதோ அதி³ட்ட²ம் த³க்க²ந்தி அனதி⁴க³தம் அதி⁴க³ச்ச²ந்தி அஸச்சி²கதம் ஸச்சி²கரோந்தீதி? ந ஹேவம் வத்தப்³பே³…பே….

ஏகமக்³க³கதா² நிட்டி²தா.