17. ஸத்தரஸமவக்³கோ³

(169) 4. இந்த்³ரியப³த்³த⁴கதா²

786. இந்த்³ரியப³த்³த⁴ஞ்ஞேவ து³க்க²ந்தி? ஆமந்தா. இந்த்³ரியப³த்³த⁴ஞ்ஞேவ அனிச்சம் ஸங்க²தம் படிச்சஸமுப்பன்னம் க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மம் விபரிணாமத⁴ம்மந்தி? ந ஹேவம் வத்தப்³பே³…பே… நனு அனிந்த்³ரியப³த்³த⁴ம் அனிச்சம் ஸங்க²தம் படிச்சஸமுப்பன்னம் க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மம் விபரிணாமத⁴ம்மந்தி? ஆமந்தா. ஹஞ்சி அனிந்த்³ரியப³த்³த⁴ம் அனிச்சம் ஸங்க²தம் படிச்சஸமுப்பன்னம் க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மம் விபரிணாமத⁴ம்மம், நோ ச வத ரே வத்தப்³பே³ – ‘‘இந்த்³ரியப³த்³த⁴ஞ்ஞேவ து³க்க²’’ந்தி.

அனிந்த்³ரியப³த்³த⁴ம் அனிச்சம் ஸங்க²தம் படிச்சஸமுப்பன்னம்…பே… விபரிணாமத⁴ம்மம், தஞ்ச ந து³க்க²ந்தி? ஆமந்தா. இந்த்³ரியப³த்³த⁴ம் அனிச்சம் ஸங்க²தம்…பே… விபரிணாமத⁴ம்மம், தஞ்ச ந து³க்க²ந்தி? ந ஹேவம் வத்தப்³பே³…பே….

இந்த்³ரியப³த்³த⁴ம் அனிச்சம் ஸங்க²தம்…பே… விபரிணாமத⁴ம்மம், தஞ்ச து³க்க²ந்தி [இத³ம்-புச்சா²த்³வயேன புரிமபுச்சா²த்³வயஸ்ஸ புரதோ ப⁴விதப்³ப³ம்]? ஆமந்தா. அனிந்த்³ரியப³த்³த⁴ம் அனிச்சம் ஸங்க²தம்…பே… விபரிணாமத⁴ம்மம், தஞ்ச து³க்க²ந்தி [இத³ம்-புச்சா²த்³வயேன புரிமபுச்சா²த்³வயஸ்ஸ புரதோ ப⁴விதப்³ப³ம்]? ந ஹேவம் வத்தப்³பே³…பே….

787. இந்த்³ரியப³த்³த⁴ஞ்ஞேவ து³க்க²ந்தி? ஆமந்தா. நனு யத³னிச்சம் தம் து³க்க²ம் [ஸம். நி. 3.15] வுத்தம் ப⁴க³வதா – ‘‘அனிந்த்³ரியப³த்³த⁴ம் அனிச்ச’’ந்தி? ஆமந்தா. ஹஞ்சி யத³னிச்சம் தம் து³க்க²ம் [ஸம். நி. 3.15] வுத்தம் ப⁴க³வதா – அனிந்த்³ரியப³த்³த⁴ம் அனிச்சம், நோ ச வத ரே வத்தப்³பே³ – ‘‘இந்த்³ரியப³த்³த⁴ஞ்ஞேவ து³க்க²’’ந்தி.

788. ந வத்தப்³ப³ம் – ‘‘இந்த்³ரியப³த்³த⁴ஞ்ஞேவ து³க்க²’’ந்தி? ஆமந்தா. யதா² இந்த்³ரியப³த்³த⁴ஸ்ஸ து³க்க²ஸ்ஸ பரிஞ்ஞாய ப⁴க³வதி ப்³ரஹ்மசரியம் வுஸ்ஸதி, ஏவமேவம் அனிந்த்³ரியப³த்³த⁴ஸ்ஸ து³க்க²ஸ்ஸ பரிஞ்ஞாய ப⁴க³வதி ப்³ரஹ்மசரியம் வுஸ்ஸதீதி? ந ஹேவம் வத்தப்³பே³…பே… யதா² இந்த்³ரியப³த்³த⁴ம் து³க்க²ம் பரிஞ்ஞாதம் ந புன உப்பஜ்ஜதி, ஏவமேவம் அனிந்த்³ரியப³த்³த⁴ம் து³க்க²ம் பரிஞ்ஞாதம் ந புன உப்பஜ்ஜதீதி? ந ஹேவம் வத்தப்³பே³. தேன ஹி இந்த்³ரியப³த்³த⁴ஞ்ஞேவ து³க்க²ந்தி.

இந்த்³ரியப³த்³த⁴கதா² நிட்டி²தா.