16. ஸோளஸமவக்³கோ³

(163) 8. ரூபம் விபாகோதிகதா²

765. ரூபம் விபாகோதி? ஆமந்தா. ரூபம் ஸுக²வேத³னியம் து³க்க²வேத³னியம் அது³க்க²மஸுக²வேத³னியம், ஸுகா²ய வேத³னாய ஸம்பயுத்தம், து³க்கா²ய வேத³னாய ஸம்பயுத்தம், அது³க்க²மஸுகா²ய வேத³னாய ஸம்பயுத்தம், ப²ஸ்ஸேன ஸம்பயுத்தம்…பே… சித்தேன ஸம்பயுத்தம், ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே… நனு ந ஸுக²வேத³னியம் ந து³க்க²வேத³னியம்…பே… அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. ஹஞ்சி ந ஸுக²வேத³னியம் ந து³க்க²வேத³னியம்…பே… அனாரம்மணம், நத்தி² தஸ்ஸ ஆவட்டனா…பே… பணிதி⁴, நோ ச வத ரே வத்தப்³பே³ – ‘‘ரூபம் விபாகோ’’தி.

766. ப²ஸ்ஸோ விபாகோ, ப²ஸ்ஸோ ஸுக²வேத³னியோ து³க்க²வேத³னியோ…பே… ஸாரம்மணோ, அத்தி² தஸ்ஸ ஆவட்டனா…பே… பணிதீ⁴தி? ஆமந்தா. ரூபம் விபாகோ, ரூபம் ஸுக²வேத³னியம் து³க்க²வேத³னியம்…பே… ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே….

ரூபம் விபாகோ, ரூபம் ந ஸுக²வேத³னியம் ந து³க்க²வேத³னியம்…பே… அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. ப²ஸ்ஸோ விபாகோ, ப²ஸ்ஸோ ந ஸுக²வேத³னியோ ந து³க்க²வேத³னியோ…பே… அனாரம்மணோ, நத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே….

767. ந வத்தப்³ப³ம் – ‘‘ரூபம் விபாகோ’’தி? ஆமந்தா. நனு கம்மஸ்ஸ கதத்தா உப்பன்னா சித்தசேதஸிகா த⁴ம்மா விபாகோதி? ஆமந்தா. ஹஞ்சி கம்மஸ்ஸ கதத்தா உப்பன்னா சித்தசேதஸிகா த⁴ம்மா விபாகோ, தேன வத ரே வத்தப்³பே³ – ‘‘கம்மஸ்ஸ கதத்தா உப்பன்னம் ரூபம் விபாகோ’’தி.

ரூபம் விபாகோதிகதா² நிட்டி²தா.