16. ஸோளஸமவக்³கோ³

(156) 1. நிக்³க³ஹகதா²

743. பரோ பரஸ்ஸ சித்தம் நிக்³க³ண்ஹாதீதி? ஆமந்தா. பரோ பரஸ்ஸ சித்தம் ‘‘மா ரஜ்ஜி’’, ‘‘மா து³ஸ்ஸி’’, ‘‘மா முய்ஹி’’, ‘‘மா கிலிஸ்ஸீ’’தி நிக்³க³ண்ஹாதீதி? ந ஹேவம் வத்தப்³பே³…பே… பரோ பரஸ்ஸ சித்தம் நிக்³க³ண்ஹாதீதி? ஆமந்தா. பரோ பரஸ்ஸ உப்பன்னோ ப²ஸ்ஸோ ‘‘மா நிருஜ்ஜீ²’’தி நிக்³க³ண்ஹாதீதி? ந ஹேவம் வத்தப்³பே³…பே… பரோ பரஸ்ஸ உப்பன்னா வேத³னா…பே… உப்பன்னா ஸஞ்ஞா… உப்பன்னா சேதனா… உப்பன்னம் சித்தம்… உப்பன்னா ஸத்³தா⁴… உப்பன்னம் வீரியம் … உப்பன்னா ஸதி… உப்பன்னோ ஸமாதி⁴…பே… உப்பன்னா பஞ்ஞா ‘‘மா நிருஜ்ஜீ²’’தி நிக்³க³ண்ஹாதீதி? ந ஹேவம் வத்தப்³பே³…பே….

பரோ பரஸ்ஸ சித்தம் நிக்³க³ண்ஹாதீதி? ஆமந்தா. பரோ பரஸ்ஸ அத்தா²ய ராக³ம் பஜஹதி… தோ³ஸம் பஜஹதி…பே… அனோத்தப்பம் பஜஹதீதி? ந ஹேவம் வத்தப்³பே³…பே….

பரோ பரஸ்ஸ சித்தம் நிக்³க³ண்ஹாதீதி? ஆமந்தா. பரோ பரஸ்ஸ அத்தா²ய மக்³க³ம் பா⁴வேதி… ஸதிபட்டா²னம் பா⁴வேதி…பே… போ³ஜ்ஜ²ங்க³ம் பா⁴வேதீதி? ந ஹேவம் வத்தப்³பே³…பே….

பரோ பரஸ்ஸ சித்தம் நிக்³க³ண்ஹாதீதி? ஆமந்தா. பரோ பரஸ்ஸ அத்தா²ய து³க்க²ம் பரிஜானாதி, ஸமுத³யம் பஜஹதி, நிரோத⁴ம் ஸச்சி²கரோதி, மக்³க³ம் பா⁴வேதீதி? ந ஹேவம் வத்தப்³பே³…பே….

பரோ பரஸ்ஸ சித்தம் நிக்³க³ண்ஹாதீதி? ஆமந்தா. அஞ்ஞோ அஞ்ஞஸ்ஸ காரகோ, பரங்கதம் ஸுக²ம் து³க்க²ம் அஞ்ஞோ கரோதி அஞ்ஞோ படிஸம்வேதே³தீதி? ந ஹேவம் வத்தப்³பே³…பே….

பரோ பரஸ்ஸ சித்தம் நிக்³க³ண்ஹாதீதி? ஆமந்தா. நனு வுத்தம் ப⁴க³வதா –

‘‘அத்தனாவ கதம் பாபம், அத்தனா ஸம்கிலிஸ்ஸதி;

அத்தனா அகதம் பாபம், அத்தனாவ விஸுஜ்ஜ²தி;

ஸுத்³தி⁴ அஸுத்³தி⁴ பச்சத்தம், நாஞ்ஞோ அஞ்ஞம் விஸோத⁴யே’’தி [த⁴. ப. 165].

அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘பரோ பரஸ்ஸ சித்தம் நிக்³க³ண்ஹாதீ’’தி.

744. ந வத்தப்³ப³ம் – ‘‘பரோ பரஸ்ஸ சித்தம் நிக்³க³ண்ஹாதீ’’தி? ஆமந்தா. நனு அத்தி² ப³லப்பத்தா, அத்தி² வஸீபூ⁴தாதி? ஆமந்தா. ஹஞ்சி அத்தி² ப³லப்பத்தா, அத்தி² வஸீபூ⁴தா, தேன வத ரே வத்தப்³பே³ – ‘‘பரோ பரஸ்ஸ சித்தம் நிக்³க³ண்ஹாதீ’’தி.

நிக்³க³ஹகதா² நிட்டி²தா.

16. ஸோளஸமவக்³கோ³

(157) 2. பக்³க³ஹகதா²

745. பரோ பரஸ்ஸ சித்தம் பக்³க³ண்ஹாதீதி? ஆமந்தா. பரோ பரஸ்ஸ சித்தம் ‘‘மா ரஜ்ஜி,’’‘‘மா து³ஸ்ஸி,’’‘‘மா முய்ஹி,’’‘‘மா கிலிஸ்ஸீ’’தி பக்³க³ண்ஹாதீதி? ந ஹேவம் வத்தப்³பே³…பே… பரோ பரஸ்ஸ சித்தம் பக்³க³ண்ஹாதீதி? ஆமந்தா. பரோ பரஸ்ஸ அலோப⁴ம் குஸலமூலம் ஜனேதி… அதோ³ஸம் குஸலமூலம் ஜனேதி… அமோஹம் குஸலமூலம் ஜனேதி… ஸத்³த⁴ம் ஜனேதி… வீரியம் ஜனேதி… ஸதிம் ஜனேதி… ஸமாதி⁴ம் ஜனேதி… பஞ்ஞம் ஜனேதீதி? ந ஹேவம் வத்தப்³பே³…பே… பரோ பரஸ்ஸ சித்தம் பக்³க³ண்ஹாதீதி? ஆமந்தா. பரோ பரஸ்ஸ உப்பன்னோ ப²ஸ்ஸோ ‘‘மா நிருஜ்ஜீ²’’தி பக்³க³ண்ஹாதீதி? ந ஹேவம் வத்தப்³பே³…பே… பரோ பரஸ்ஸ உப்பன்னா வேத³னா…பே… உப்பன்னா பஞ்ஞா ‘‘மா நிருஜ்ஜீ²’’தி பக்³க³ண்ஹாதீதி? ந ஹேவம் வத்தப்³பே³…பே….

பரோ பரஸ்ஸ சித்தம் பக்³க³ண்ஹாதீதி? ஆமந்தா. பரோ பரஸ்ஸ அத்தா²ய ராக³ம் பஜஹதி… தோ³ஸம் பஜஹதி… மோஹம் பஜஹதி…பே… அனோத்தப்பம் பஜஹதீதி? ந ஹேவம் வத்தப்³பே³…பே….

பரோ பரஸ்ஸ சித்தம் பக்³க³ண்ஹாதீதி? ஆமந்தா. பரோ பரஸ்ஸ அத்தா²ய மக்³க³ம் பா⁴வேதி… ஸதிபட்டா²னம் பா⁴வேதி…பே… போ³ஜ்ஜ²ங்க³ம் பா⁴வேதீதி? ந ஹேவம் வத்தப்³பே³…பே….

பரோ பரஸ்ஸ சித்தம் பக்³க³ண்ஹாதீதி? ஆமந்தா. பரோ பரஸ்ஸ அத்தா²ய து³க்க²ம் பரிஜானாதி…பே… மக்³க³ம் பா⁴வேதீதி? ந ஹேவம் வத்தப்³பே³…பே….

பரோ பரஸ்ஸ சித்தம் பக்³க³ண்ஹாதீதி? ஆமந்தா. அஞ்ஞோ அஞ்ஞஸ்ஸ காரகோ, பரங்கதம் ஸுக²ம் து³க்க²ம் அஞ்ஞோ கரோதி அஞ்ஞோ படிஸம்வேதே³தீதி? ந ஹேவம் வத்தப்³பே³…பே….

பரோ பரஸ்ஸ சித்தம் பக்³க³ண்ஹாதீதி? ஆமந்தா. நனு வுத்தம் ப⁴க³வதா – ‘‘அத்தனாவ கதம் பாபம்…பே… நாஞ்ஞோ அஞ்ஞம் விஸோத⁴யே’’தி. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘பரோ பரஸ்ஸ சித்தம் பக்³க³ண்ஹாதீ’’தி.

746. ந வத்தப்³ப³ம் – ‘‘பரோ பரஸ்ஸ சித்தம் பக்³க³ண்ஹாதீ’’தி? ஆமந்தா. நனு அத்தி² ப³லப்பத்தா, அத்தி² வஸீபூ⁴தாதி? ஆமந்தா. ஹஞ்சி அத்தி² ப³லப்பத்தா, அத்தி² வஸீபூ⁴தா, தேன வத ரே வத்தப்³பே³ – ‘‘பரோ பரஸ்ஸ சித்தம் பக்³க³ண்ஹாதீ’’தி.

பக்³க³ஹகதா² நிட்டி²தா.

16. ஸோளஸமவக்³கோ³

(158) 3. ஸுகா²னுப்பதா³னகதா²

747. பரோ பரஸ்ஸ ஸுக²ம் அனுப்பதே³தீதி? ஆமந்தா. பரோ பரஸ்ஸ து³க்க²ம் அனுப்பதே³தீதி? ந ஹேவம் வத்தப்³பே³…பே… பரோ பரஸ்ஸ து³க்க²ம் ந அனுப்பதே³தீதி? ஆமந்தா. பரோ பரஸ்ஸ ஸுக²ம் ந அனுப்பதே³தீதி? ந ஹேவம் வத்தப்³பே³…பே… பரோ பரஸ்ஸ ஸுக²ம் அனுப்பதே³தீதி? ஆமந்தா. பரோ பரஸ்ஸ அத்தனோ ஸுக²ம் அனுப்பதே³தி, அஞ்ஞேஸம் ஸுக²ம் அனுப்பதே³தி, தஸ்ஸ ஸுக²ம் அனுப்பதே³தீதி? ந ஹேவம் வத்தப்³பே³…பே… பரோ பரஸ்ஸ நேவத்தனோ, ந அஞ்ஞேஸம், ந தஸ்ஸ ஸுக²ம் அனுப்பதே³தீதி? ஆமந்தா. ஹஞ்சி பரோ பரஸ்ஸ நேவத்தனோ, ந அஞ்ஞேஸம், ந தஸ்ஸ ஸுக²ம் அனுப்பதே³தி, நோ ச வத ரே வத்தப்³பே³ – ‘‘பரோ பரஸ்ஸ ஸுக²ம் அனுப்பதே³தீ’’தி.

பரோ பரஸ்ஸ ஸுக²ம் அனுப்பதே³தீதி? ஆமந்தா. அஞ்ஞோ அஞ்ஞஸ்ஸ காரகோ, பரங்கதம் ஸுக²ம் து³க்க²ம் அஞ்ஞோ கரோதி அஞ்ஞோ படிஸம்வேதே³தீதி? ந ஹேவம் வத்தப்³பே³…பே….

748. ந வத்தப்³ப³ம் – ‘‘பரோ பரஸ்ஸ ஸுக²ம் அனுப்பதே³தீ’’தி? ஆமந்தா. நனு ஆயஸ்மா உதா³யீ ஏதத³வோச – ‘‘ப³ஹூனம் வத நோ ப⁴க³வா து³க்க²த⁴ம்மானம் அபஹத்தா, ப³ஹூனம் வத நோ ப⁴க³வா ஸுக²த⁴ம்மானம் உபஹத்தா, ப³ஹூனம் வத நோ ப⁴க³வா அகுஸலானம் த⁴ம்மானம் அபஹத்தா, ப³ஹூனம் வத நோ ப⁴க³வா குஸலானம் த⁴ம்மானம் உபஹத்தா’’தி [ம. நி. 2.148 லடுகிகோபமே]! அத்தே²வ ஸுத்தந்தோதி? ஆமந்தா. தேன ஹி பரோ பரஸ்ஸ ஸுக²ம் அனுப்பதே³தீதி.

ஸுகா²னுப்பதா³னகதா² நிட்டி²தா.

16. ஸோளஸமவக்³கோ³

(159) 4. அதி⁴க³ய்ஹமனஸிகாரகதா²

749. அதி⁴க³ய்ஹ மனஸி கரோதீதி? ஆமந்தா. தேன சித்தேன தம் சித்தம் பஜானாதீதி? ந ஹேவம் வத்தப்³பே³…பே… தேன சித்தேன தம் சித்தம் பஜானாதீதி? ஆமந்தா. தேன சித்தேன தம் சித்தம் ‘‘சித்த’’ந்தி பஜானாதீதி? ந ஹேவம் வத்தப்³பே³…பே… தேன சித்தேன தம் சித்தம் ‘‘சித்த’’ந்தி பஜானாதீதி? ஆமந்தா. தம் சித்தம் தஸ்ஸ சித்தஸ்ஸ ஆரம்மணந்தி? ந ஹேவம் வத்தப்³பே³…பே….

தம் சித்தம் தஸ்ஸ சித்தஸ்ஸ ஆரம்மணந்தி? ஆமந்தா. தேன ப²ஸ்ஸேன தம் ப²ஸ்ஸம் பு²ஸதி, தாய வேத³னாய…பே… தாய ஸஞ்ஞாய… தாய சேதனாய… தேன சித்தேன… தேன விதக்கேன… தேன விசாரேன… தாய பீதியா… தாய ஸதியா… தாய பஞ்ஞாய தம் பஞ்ஞம் பஜானாதீதி? ந ஹேவம் வத்தப்³பே³…பே….

750. அதீதம் ‘‘அதீத’’ந்தி மனஸிகரோந்தோ, அனாக³தம் ‘‘அனாக³த’’ந்தி மனஸி கரோதீதி? ந ஹேவம் வத்தப்³பே³…பே… அதீதம் ‘‘அதீத’’ந்தி மனஸிகரோந்தோ, அனாக³தம் ‘‘அனாக³த’’ந்தி மனஸி கரோதீதி? ஆமந்தா. த்³வின்னம் ப²ஸ்ஸானம்…பே… த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே….

அதீதம் ‘‘அதீத’’ந்தி மனஸிகரோந்தோ, பச்சுப்பன்னம் ‘‘பச்சுப்பன்ன’’ந்தி மனஸி கரோதீதி? ந ஹேவம் வத்தப்³பே³…பே… அதீதம் ‘‘அதீத’’ந்தி மனஸிகரோந்தோ, பச்சுப்பன்னம் ‘‘பச்சுப்பன்ன’’ந்தி மனஸி கரோதீதி? ஆமந்தா. த்³வின்னம் ப²ஸ்ஸானம்…பே… த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே….

அதீதம் ‘‘அதீத’’ந்தி மனஸிகரோந்தோ, அனாக³தம் ‘‘அனாக³த’’ந்தி மனஸி கரோதி, பச்சுப்பன்னம் ‘‘பச்சுப்பன்ன’’ந்தி மனஸி கரோதீதி? ந ஹேவம் வத்தப்³பே³…பே… அதீதம் ‘‘அதீத’’ந்தி மனஸிகரோந்தோ, அனாக³தம் ‘‘அனாக³த’’ந்தி மனஸி கரோதி, பச்சுப்பன்னம் ‘‘பச்சுப்பன்ன’’ந்தி மனஸி கரோதீதி? ஆமந்தா. திண்ணம் ப²ஸ்ஸானம்…பே… திண்ணம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே….

751. அனாக³தம் ‘‘அனாக³த’’ந்தி மனஸிகரோந்தோ, அதீதம் ‘‘அதீத’’ந்தி மனஸி கரோதீதி? ந ஹேவம் வத்தப்³பே³…பே… அனாக³தம் ‘‘அனாக³த’’ந்தி மனஸிகரோந்தோ, அதீதம் ‘‘அதீத’’ந்தி மனஸி கரோதீதி? ஆமந்தா. த்³வின்னம் ப²ஸ்ஸானம்…பே… த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே….

அனாக³தம் ‘‘அனாக³த’’ந்தி மனஸிகரோந்தோ, பச்சுப்பன்னம் ‘‘பச்சுப்பன்ன’’ந்தி மனஸி கரோதீதி? ந ஹேவம் வத்தப்³பே³…பே… அனாக³தம் ‘‘அனாக³த’’ந்தி மனஸிகரோந்தோ, பச்சுப்பன்னம் ‘‘பச்சுப்பன்ன’’ந்தி மனஸி கரோதீதி? ஆமந்தா. த்³வின்னம் ப²ஸ்ஸானம்…பே… த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே….

அனாக³தம் ‘‘அனாக³த’’ந்தி மனஸிகரோந்தோ, அதீதம் ‘‘அதீத’’ந்தி மனஸி கரோதி, பச்சுப்பன்னம் ‘‘பச்சுப்பன்ன’’ந்தி மனஸி கரோதீதி? ந ஹேவம் வத்தப்³பே³…பே… அனாக³தம் ‘‘அனாக³த’’ந்தி மனஸிகரோந்தோ, அதீதம் ‘‘அதீத’’ந்தி மனஸி கரோதி, பச்சுப்பன்னம் ‘‘பச்சுப்பன்ன’’ந்தி மனஸி கரோதீதி? ஆமந்தா. திண்ணம் ப²ஸ்ஸானம்…பே… திண்ணம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே….

752. பச்சுப்பன்னம் ‘‘பச்சுப்பன்ன’’ந்தி மனஸிகரோந்தோ, அதீதம் ‘‘அதீத’’ந்தி மனஸி கரோதீதி? ந ஹேவம் வத்தப்³பே³…பே… பச்சுப்பன்னம் ‘‘பச்சுப்பன்ன’’ந்தி மனஸிகரோந்தோ, அதீதம் ‘‘அதீத’’ந்தி மனஸி கரோதீதி? ஆமந்தா. த்³வின்னம் ப²ஸ்ஸானம்…பே… த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே….

பச்சுப்பன்னம் ‘‘பச்சுப்பன்ன’’ந்தி மனஸிகரோந்தோ, அனாக³தம் ‘‘அனாக³த’’ந்தி மனஸி கரோதீதி? ந ஹேவம் வத்தப்³பே³…பே… பச்சுப்பன்னம் ‘‘பச்சுப்பன்ன’’ந்தி மனஸிகரோந்தோ, அனாக³தம் ‘‘அனாக³த’’ந்தி மனஸி கரோதீதி? ஆமந்தா. த்³வின்னம் ப²ஸ்ஸானம்…பே… த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே….

பச்சுப்பன்னம் ‘‘பச்சுப்பன்ன’’ந்தி மனஸிகரோந்தோ, அதீதம் ‘‘அதீத’’ந்தி மனஸி கரோதி, அனாக³தம் ‘‘அனாக³த’’ந்தி மனஸி கரோதீதி? ந ஹேவம் வத்தப்³பே³…பே… பச்சுப்பன்னம் ‘‘பச்சுப்பன்ன’’ந்தி மனஸிகரோந்தோ, அதீதம் ‘‘அதீத’’ந்தி மனஸி கரோதி, அனாக³தம் ‘‘அனாக³த’’ந்தி மனஸி கரோதீதி? ஆமந்தா. திண்ணம் ப²ஸ்ஸானம்…பே… திண்ணம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே….

753. ந வத்தப்³ப³ம் – ‘‘அதி⁴க³ய்ஹ மனஸி கரோதீ’’தி? ஆமந்தா. நனு வுத்தம் ப⁴க³வதா –

‘‘ஸப்³பே³ ஸங்கா²ரா அனிச்சாதி, யதா³ பஞ்ஞாய பஸ்ஸதி;

அத² நிப்³பி³ந்த³தி து³க்கே², ஏஸ மக்³கோ³ விஸுத்³தி⁴யா.

‘‘ஸப்³பே³ ஸங்கா²ரா து³க்கா²தி, யதா³ பஞ்ஞாய பஸ்ஸதி;

அத² நிப்³பி³ந்த³தி து³க்கே², ஏஸ மக்³கோ³ விஸுத்³தி⁴யா.

‘‘ஸப்³பே³ த⁴ம்மா அனத்தாதி, யதா³ பஞ்ஞாய பஸ்ஸதி;

அத² நிப்³பி³ந்த³தி து³க்கே², ஏஸ மக்³கோ³ விஸுத்³தி⁴யா’’தி [த⁴. ப. 277-279].

அத்தே²வ ஸுத்தந்தோதி? ஆமந்தா. தேன ஹி அதி⁴க³ய்ஹ மனஸி கரோதீதி.

அதி⁴க³ய்ஹமனஸிகாரகதா² நிட்டி²தா.

16. ஸோளஸமவக்³கோ³

(160) 5. ரூபம் ஹேதூதிகதா²

754. ரூபம் ஹேதூதி? ஆமந்தா. அலோபோ⁴ ஹேதூதி? ந ஹேவம் வத்தப்³பே³…பே… அதோ³ஸோ ஹேது…பே… அமோஹோ ஹேது… லோபோ⁴ ஹேது… தோ³ஸோ ஹேது… மோஹோ ஹேதூதி? ந ஹேவம் வத்தப்³பே³…பே….

ரூபம் ஹேதூதி? ஆமந்தா. ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே… நனு அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. ஹஞ்சி அனாரம்மணம், நத்தி² தஸ்ஸ ஆவட்டனா…பே… பணிதி⁴, நோ ச வத ரே வத்தப்³பே³ – ‘‘ரூபம் ஹேதூ’’தி.

755. அலோபோ⁴ ஹேது ஸாரம்மணோ, அத்தி² தஸ்ஸ ஆவட்டனா…பே… பணிதீ⁴தி? ஆமந்தா. ரூபம் ஹேது ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே… அதோ³ஸோ ஹேது… அமோஹோ ஹேது… லோபோ⁴ ஹேது… தோ³ஸோ ஹேது… மோஹோ ஹேது ஸாரம்மணோ, அத்தி² தஸ்ஸ ஆவட்டனா…பே… பணிதீ⁴தி? ஆமந்தா. ரூபம் ஹேது ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே….

ரூபம் ஹேது அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. அலோபோ⁴ ஹேது அனாரம்மணோ, நத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே… ரூபம் ஹேது அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. அதோ³ஸோ ஹேது… அமோஹோ ஹேது… லோபோ⁴ ஹேது… தோ³ஸோ ஹேது… மோஹோ ஹேது அனாரம்மணோ, நத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே….

756. ந வத்தப்³ப³ம் – ‘‘ரூபம் ஹேதூ’’தி? ஆமந்தா. நனு மஹாபூ⁴தா உபாதா³யரூபானம் [உபாதா³ரூபானம் (ஸீ. பீ. க.)] உபாதா³யஹேதூதி? ஆமந்தா. ஹஞ்சி மஹாபூ⁴தா உபாதா³யரூபானம் உபாதா³யஹேது, தேன வத ரே வத்தப்³பே³ – ‘‘ரூபம் ஹேதூ’’தி.

ரூபம் ஹேதூதிகதா² நிட்டி²தா.

16. ஸோளஸமவக்³கோ³

(161) 6. ரூபம் ஸஹேதுகந்திகதா²

757. ரூபம் ஸஹேதுகந்தி? ஆமந்தா. அலோப⁴ஹேதுனாதி? ந ஹேவம் வத்தப்³பே³…பே… அதோ³ஸஹேதுனாதி …பே… அமோஹஹேதுனாதி…பே… லோப⁴ஹேதுனா…பே… தோ³ஸஹேதுனா…பே… மோஹஹேதுனாதி? ந ஹேவம் வத்தப்³பே³…பே….

ரூபம் ஸஹேதுகந்தி? ஆமந்தா. ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே… நனு அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. ஹஞ்சி அனாரம்மணம், நத்தி² தஸ்ஸ ஆவட்டனா…பே… பணிதி⁴, நோ ச வத ரே வத்தப்³பே³ – ‘‘ரூபம் ஸஹேதுக’’ந்தி.

758. அலோபோ⁴ ஸஹேதுகோ ஸாரம்மணோ, அத்தி² தஸ்ஸ ஆவட்டனா…பே… பணிதீ⁴தி? ஆமந்தா. ரூபம் ஸஹேதுகம் ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே… அதோ³ஸோ ஸஹேதுகோ…பே… அமோஹோ… ஸத்³தா⁴… வீரியம்… ஸதி… ஸமாதி⁴… பஞ்ஞா… லோபோ⁴… தோ³ஸோ… மோஹோ… மானோ… தி³ட்டி²… விசிகிச்சா²… தி²னம்… உத்³த⁴ச்சம்… அஹிரிகம்… அனோத்தப்பம் ஸஹேதுகம் ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ஆமந்தா. ரூபம் ஸஹேதுகம் ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே….

ரூபம் ஸஹேதுகம் அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. அலோபோ⁴ ஸஹேதுகோ அனாரம்மணோ, நத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே… ரூபம் ஸஹேதுகம் அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. அதோ³ஸோ ஸஹேதுகோ…பே… அனோத்தப்பம் ஸஹேதுகம் அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே….

759. ந வத்தப்³ப³ம் – ‘‘ரூபம் ஸஹேதுக’’ந்தி? ஆமந்தா. நனு ரூபம் ஸப்பச்சயந்தி? ஆமந்தா. ஹஞ்சி ரூபம் ஸப்பச்சயம், தேன வத ரே வத்தப்³பே³ – ‘‘ரூபம் ஸஹேதுக’’ந்தி.

ரூபம் ஸஹேதுகந்திகதா² நிட்டி²தா.

16. ஸோளஸமவக்³கோ³

(162) 7. ரூபம் குஸலாகுஸலந்திகதா²

760. ரூபம் குஸலந்தி? ஆமந்தா. ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே… நனு அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. ஹஞ்சி அனாரம்மணம், நத்தி² தஸ்ஸ ஆவட்டனா…பே… பணிதி⁴, நோ ச வத ரே வத்தப்³பே³ – ‘‘ரூபம் குஸல’’ந்தி.

761. அலோபோ⁴ குஸலோ ஸாரம்மணோ, அத்தி² தஸ்ஸ ஆவட்டனா…பே… பணிதீ⁴தி? ஆமந்தா. ரூபம் குஸலம் ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே….

அதோ³ஸோ குஸலோ…பே… அமோஹோ குஸலோ…பே… ஸத்³தா⁴… வீரியம்… ஸதி… ஸமாதி⁴…பே… பஞ்ஞா குஸலா ஸாரம்மணா, அத்தி² தாய ஆவட்டனா…பே… பணிதீ⁴தி? ஆமந்தா. ரூபம் குஸலம் ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே….

ரூபம் குஸலம் அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. அலோபோ⁴ குஸலோ அனாரம்மணோ, நத்தி² தஸ்ஸ ஆவட்டனா …பே… பணிதீ⁴தி? ந ஹேவம் வத்தப்³பே³…பே….

ரூபம் குஸலம் அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. அதோ³ஸோ குஸலோ…பே… பஞ்ஞா குஸலா அனாரம்மணா, நத்தி² தாய ஆவட்டனா…பே… பணிதீ⁴தி? ந ஹேவம் வத்தப்³பே³…பே….

762. ரூபம் அகுஸலந்தி? ஆமந்தா. ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே… நனு அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. ஹஞ்சி அனாரம்மணம், நத்தி² தஸ்ஸ ஆவட்டனா…பே… பணிதி⁴, நோ ச வத ரே வத்தப்³பே³ – ‘‘ரூபம் அகுஸல’’ந்தி…பே….

763. லோபோ⁴ அகுஸலோ ஸாரம்மணோ, அத்தி² தஸ்ஸ ஆவட்டனா…பே… பணிதீ⁴தி? ஆமந்தா. ரூபம் அகுஸலம் ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே… தோ³ஸோ… மோஹோ… மானோ…பே… அனோத்தப்பம் அகுஸலம் ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ஆமந்தா. ரூபம் அகுஸலம் ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே….

ரூபம் அகுஸலம் அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. லோபோ⁴ அகுஸலோ அனாரம்மணோ, நத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே… ரூபம் அகுஸலம் அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. தோ³ஸோ… மோஹோ…பே… அனோத்தப்பம் அகுஸலம் அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே….

764. ந வத்தப்³ப³ம் – ‘‘ரூபம் குஸலம்பி அகுஸலம்பீ’’தி? ஆமந்தா. நனு காயகம்மம் வசீகம்மம் குஸலம்பி அகுஸலம்பீதி? ஆமந்தா. ஹஞ்சி காயகம்மம் வசீகம்மம் குஸலம்பி அகுஸலம்பி, தேன வத ரே வத்தப்³பே³ – ‘‘ரூபம் குஸலம்பி அகுஸலம்பீ’’தி.

ரூபம் குஸலாகுஸலந்திகதா² நிட்டி²தா.

16. ஸோளஸமவக்³கோ³

(163) 8. ரூபம் விபாகோதிகதா²

765. ரூபம் விபாகோதி? ஆமந்தா. ரூபம் ஸுக²வேத³னியம் து³க்க²வேத³னியம் அது³க்க²மஸுக²வேத³னியம், ஸுகா²ய வேத³னாய ஸம்பயுத்தம், து³க்கா²ய வேத³னாய ஸம்பயுத்தம், அது³க்க²மஸுகா²ய வேத³னாய ஸம்பயுத்தம், ப²ஸ்ஸேன ஸம்பயுத்தம்…பே… சித்தேன ஸம்பயுத்தம், ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே… நனு ந ஸுக²வேத³னியம் ந து³க்க²வேத³னியம்…பே… அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. ஹஞ்சி ந ஸுக²வேத³னியம் ந து³க்க²வேத³னியம்…பே… அனாரம்மணம், நத்தி² தஸ்ஸ ஆவட்டனா…பே… பணிதி⁴, நோ ச வத ரே வத்தப்³பே³ – ‘‘ரூபம் விபாகோ’’தி.

766. ப²ஸ்ஸோ விபாகோ, ப²ஸ்ஸோ ஸுக²வேத³னியோ து³க்க²வேத³னியோ…பே… ஸாரம்மணோ, அத்தி² தஸ்ஸ ஆவட்டனா…பே… பணிதீ⁴தி? ஆமந்தா. ரூபம் விபாகோ, ரூபம் ஸுக²வேத³னியம் து³க்க²வேத³னியம்…பே… ஸாரம்மணம், அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே….

ரூபம் விபாகோ, ரூபம் ந ஸுக²வேத³னியம் ந து³க்க²வேத³னியம்…பே… அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. ப²ஸ்ஸோ விபாகோ, ப²ஸ்ஸோ ந ஸுக²வேத³னியோ ந து³க்க²வேத³னியோ…பே… அனாரம்மணோ, நத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே….

767. ந வத்தப்³ப³ம் – ‘‘ரூபம் விபாகோ’’தி? ஆமந்தா. நனு கம்மஸ்ஸ கதத்தா உப்பன்னா சித்தசேதஸிகா த⁴ம்மா விபாகோதி? ஆமந்தா. ஹஞ்சி கம்மஸ்ஸ கதத்தா உப்பன்னா சித்தசேதஸிகா த⁴ம்மா விபாகோ, தேன வத ரே வத்தப்³பே³ – ‘‘கம்மஸ்ஸ கதத்தா உப்பன்னம் ரூபம் விபாகோ’’தி.

ரூபம் விபாகோதிகதா² நிட்டி²தா.

16. ஸோளஸமவக்³கோ³

(164) 9. ரூபம் ரூபாவசராரூபாவசரந்திகதா²

768. அத்தி² ரூபம் ரூபாவசரந்தி? ஆமந்தா. ஸமாபத்தேஸியம் உபபத்தேஸியம் தி³ட்ட²த⁴ம்மஸுக²விஹாரம், ஸமாபத்தேஸியேன சித்தேன உபபத்தேஸியேன சித்தேன தி³ட்ட²த⁴ம்மஸுக²விஹாரேன சித்தேன ஸஹக³தம் ஸஹஜாதம் ஸம்ஸட்ட²ம் ஸம்பயுத்தம் ஏகுப்பாத³ம் ஏகனிரோத⁴ம் ஏகவத்து²கம் ஏகாரம்மணந்தி? ந ஹேவம் வத்தப்³பே³…பே… நனு ந ஸமாபத்தேஸியம் ந உபபத்தேஸியம் ந தி³ட்ட²த⁴ம்மஸுக²விஹாரம், ந ஸமாபத்தேஸியேன சித்தேன ந உபபத்தேஸியேன சித்தேன ந தி³ட்ட²த⁴ம்மஸுக²விஹாரேன சித்தேன ஸஹக³தம் ஸஹஜாதம் ஸம்ஸட்ட²ம் ஸம்பயுத்தம் ஏகுப்பாத³ம் ஏகனிரோத⁴ம் ஏகவத்து²கம் ஏகாரம்மணந்தி? ஆமந்தா. ஹஞ்சி ந ஸமாபத்தேஸியம் ந உபபத்தேஸியம் ந தி³ட்ட²த⁴ம்மஸுக²விஹாரம், ந ஸமாபத்தேஸியேன சித்தேன…பே… ஏகாரம்மணம், நோ ச வத ரே வத்தப்³பே³ – ‘‘அத்தி² ரூபம் ரூபாவசர’’ந்தி.

769. அத்தி² ரூபம் அரூபாவசரந்தி? ஆமந்தா. ஸமாபத்தேஸியம் உபபத்தேஸியம் தி³ட்ட²த⁴ம்மஸுக²விஹாரம், ஸமாபத்தேஸியேன சித்தேன உபபத்தேஸியேன சித்தேன தி³ட்ட²த⁴ம்மஸுக²விஹாரேன சித்தேன ஸஹக³தம் ஸஹஜாதம் ஸம்ஸட்ட²ம் ஸம்பயுத்தம் ஏகுப்பாத³ம் ஏகனிரோத⁴ம் ஏகவத்து²கம் ஏகாரம்மணந்தி? ந ஹேவம் வத்தப்³பே³…பே… நனு ந ஸமாபத்தேஸியம் ந உபபத்தேஸியம் ந தி³ட்ட²த⁴ம்மஸுக²விஹாரம், ந ஸமாபத்தேஸியேன சித்தேன …பே… ஏகாரம்மணந்தி? ஆமந்தா. ஹஞ்சி ந ஸமாபத்தேஸியம் ந உபபத்தேஸியம்…பே… ஏகவத்து²கம் ஏகாரம்மணம், நோ ச வத ரே வத்தப்³பே³ – ‘‘அத்தி² ரூபம் அரூபாவசர’’ந்தி.

770. ந வத்தப்³ப³ம் – ‘‘அத்தி² ரூபம் ரூபாவசரம், அத்தி² ரூபம் அரூபாவசர’’ந்தி? ஆமந்தா. நனு காமாவசரகம்மஸ்ஸ கதத்தா ரூபம் காமாவசரந்தி? ஆமந்தா. ஹஞ்சி காமாவசரகம்மஸ்ஸ கதத்தா ரூபம் காமாவசரம், தேன வத ரே வத்தப்³பே³ – ‘‘ரூபாவசரகம்மஸ்ஸ கதத்தா ரூபம் ரூபாவசரம், அரூபாவசரகம்மஸ்ஸ கதத்தா ரூபம் அரூபாவசர’’ந்தி.

ரூபம் ரூபாவசராரூபாவசரந்திகதா² நிட்டி²தா.

16. ஸோளஸமவக்³கோ³

(165) 10. ரூபாரூபதா⁴துபரியாபன்னகதா²

771. ரூபராகோ³ ரூபதா⁴துபரியாபன்னோதி? ஆமந்தா. ஸமாபத்தேஸியோ உபபத்தேஸியோ தி³ட்ட²த⁴ம்மஸுக²விஹாரோ, ஸமாபத்தேஸியேன சித்தேன உபபத்தேஸியேன சித்தேன தி³ட்ட²த⁴ம்மஸுக²விஹாரேன சித்தேன ஸஹக³தோ ஸஹஜாதோ ஸம்ஸட்டோ² ஸம்பயுத்தோ ஏகுப்பாதோ³ ஏகனிரோதோ⁴ ஏகவத்து²கோ ஏகாரம்மணோதி? ந ஹேவம் வத்தப்³பே³…பே… நனு ந ஸமாபத்தேஸியோ ந உபபத்தேஸியோ ந தி³ட்ட²த⁴ம்மஸுக²விஹாரோ, ந ஸமாபத்தேஸியேன சித்தேன…பே… ஏகவத்து²கோ ஏகாரம்மணோதி? ஆமந்தா. ஹஞ்சி ந ஸமாபத்தேஸியோ ந உபபத்தேஸியோ ந தி³ட்ட²த⁴ம்மஸுக²விஹாரோ, ந ஸமாபத்தேஸியேன சித்தேன…பே… ஏகவத்து²கோ ஏகாரம்மணோ, நோ ச வத ரே வத்தப்³பே³ – ‘‘ரூபராகோ³ ரூபதா⁴துபரியாபன்னோ’’தி.

772. ரூபராகோ³ ரூபதா⁴துபரியாபன்னோதி? ஆமந்தா. ஸத்³த³ராகோ³ ஸத்³த³தா⁴துபரியாபன்னோதி? ந ஹேவம் வத்தப்³பே³ …பே… ரூபராகோ³ ரூபதா⁴துபரியாபன்னோதி? ஆமந்தா. க³ந்த⁴ராகோ³…பே… ரஸராகோ³…பே… போ²ட்ட²ப்³ப³ராகோ³ போ²ட்ட²ப்³ப³தா⁴துபரியாபன்னோதி? ந ஹேவம் வத்தப்³பே³…பே….

ஸத்³த³ராகோ³ ந வத்தப்³ப³ம் – ‘‘ஸத்³த³தா⁴துபரியாபன்னோ’’தி? ஆமந்தா. ரூபராகோ³ ந வத்தப்³ப³ம் – ‘‘ரூபதா⁴துபரியாபன்னோ’’தி? ந ஹேவம் வத்தப்³பே³…பே… க³ந்த⁴ராகோ³…பே… ரஸராகோ³…பே… போ²ட்ட²ப்³ப³ராகோ³ ந வத்தப்³ப³ம் – ‘‘போ²ட்ட²ப்³ப³தா⁴துபரியாபன்னோ’’தி? ஆமந்தா. ரூபராகோ³ ந வத்தப்³ப³ம் – ‘‘ரூபதா⁴துபரியாபன்னோ’’தி? ந ஹேவம் வத்தப்³பே³…பே….

773. அரூபராகோ³ அரூபதா⁴துபரியாபன்னோதி? ஆமந்தா. அரூபராகோ³ ந வத்தப்³ப³ம் – ‘‘அரூபதா⁴துபரியாபன்னோ’’தி? ந ஹேவம் வத்தப்³பே³…பே… அரூபராகோ³ அரூபதா⁴துபரியாபன்னோதி? ஆமந்தா. ஸமாபத்தேஸியோ உபபத்தேஸியோ தி³ட்ட²த⁴ம்மஸுக²விஹாரோ, ஸமாபத்தேஸியேன சித்தேன உபபத்தேஸியேன சித்தேன தி³ட்ட²த⁴ம்மஸுக²விஹாரேன சித்தேன ஸஹக³தோ ஸஹஜாதோ ஸம்ஸட்டோ² ஸம்பயுத்தோ ஏகுப்பாதோ³ ஏகனிரோதோ⁴ ஏகவத்து²கோ ஏகாரம்மணோதி? ந ஹேவம் வத்தப்³பே³…பே… நனு ந ஸமாபத்தேஸியோ ந உபபத்தேஸியோ ந தி³ட்ட²த⁴ம்மஸுக²விஹாரோ, ந ஸமாபத்தேஸியேன சித்தேன…பே… ஏகவத்து²கோ ஏகாரம்மணோதி? ஆமந்தா. ஹஞ்சி ந ஸமாபத்தேஸியோ ந உபபத்தேஸியோ ந தி³ட்ட²த⁴ம்மஸுக²விஹாரோ, ந ஸமாபத்தேஸியேன சித்தேன ந உபபத்தேஸியேன சித்தேன ந தி³ட்ட²த⁴ம்மஸுக²விஹாரேன சித்தேன ஸஹக³தோ ஸஹஜாதோ ஸம்ஸட்டோ² ஸம்பயுத்தோ ஏகுப்பாதோ³ ஏகனிரோதோ⁴ ஏகவத்து²கோ ஏகாரம்மணோ, நோ ச வத ரே வத்தப்³பே³ – ‘‘அரூபராகோ³ அரூபதா⁴துபரியாபன்னோ’’தி.

774. அரூபராகோ³ அரூபதா⁴துபரியாபன்னோதி? ஆமந்தா. ஸத்³த³ராகோ³ ஸத்³த³தா⁴துபரியாபன்னோதி? ந ஹேவம் வத்தப்³பே³…பே… அரூபராகோ³ அரூபதா⁴துபரியாபன்னோதி? ஆமந்தா. க³ந்த⁴ராகோ³…பே… ரஸராகோ³…பே… போ²ட்ட²ப்³ப³ராகோ³ போ²ட்ட²ப்³ப³தா⁴துபரியாபன்னோதி? ந ஹேவம் வத்தப்³பே³…பே….

ஸத்³த³ராகோ³ ந வத்தப்³ப³ம் – ‘‘ஸத்³த³தா⁴துபரியாபன்னோ’’தி? ஆமந்தா. அரூபராகோ³ ந வத்தப்³ப³ம் – ‘‘அரூபதா⁴துபரியாபன்னோ’’தி? ந ஹேவம் வத்தப்³பே³…பே… க³ந்த⁴ராகோ³…பே… ரஸராகோ³…பே… போ²ட்ட²ப்³ப³ராகோ³ ந வத்தப்³ப³ம் – ‘‘போ²ட்ட²ப்³ப³தா⁴துபரியாபன்னோ’’தி? ஆமந்தா. அரூபராகோ³ ந வத்தப்³ப³ம் – ‘‘அரூபதா⁴துபரியாபன்னோ’’தி? ந ஹேவம் வத்தப்³பே³…பே….

775. ந வத்தப்³ப³ம் – ‘‘ரூபராகோ³ ரூபதா⁴துபரியாபன்னோ, அரூபராகோ³ அரூபதா⁴துபரியாபன்னோ’’தி? ஆமந்தா. நனு காமராகோ³ காமதா⁴துபரியாபன்னோதி? ஆமந்தா. ஹஞ்சி காமராகோ³ காமதா⁴துபரியாபன்னோ, தேன வத ரே வத்தப்³பே³ – ‘‘ரூபராகோ³ ரூபதா⁴துபரியாபன்னோ, அரூபராகோ³ அரூபதா⁴துபரியாபன்னோ’’தி.

ரூபராகோ³ ரூபதா⁴துபரியாபன்னோ அரூபராகோ³ அரூபதா⁴துபரியாபன்னோதிகதா² நிட்டி²தா.

ரூபாரூபதா⁴துபரியாபன்னகதா² நிட்டி²தா.

ஸோளஸமவக்³கோ³.

தஸ்ஸுத்³தா³னம் –

சித்தனிக்³க³ஹோ, சித்தபக்³க³ஹோ, ஸுகா²னுப்பதா³னம், அதி⁴க³ய்ஹ மனஸிகாரோ, ரூபம் ஹேது, ரூபம் ஸஹேதுகம், ரூபம் குஸலம்பி அகுஸலம்பி, ரூபம் விபாகோ, அத்தி² ரூபம் ரூபாவசரம் அத்தி² ரூபம் அரூபாவசரம், ஸப்³பே³ கிலேஸா காமதா⁴துபரியாபன்னாதி.