15. பன்னரஸமவக்³கோ³

(155) 11. கம்மூபசயகதா²

737. அஞ்ஞம் கம்மம் அஞ்ஞோ கம்மூபசயோதி? ஆமந்தா. அஞ்ஞோ ப²ஸ்ஸோ, அஞ்ஞோ ப²ஸ்ஸூபசயோ; அஞ்ஞா வேத³னா, அஞ்ஞோ வேத³னூபசயோ; அஞ்ஞா ஸஞ்ஞா, அஞ்ஞோ ஸஞ்ஞூபசயோ; அஞ்ஞா சேதனா, அஞ்ஞோ சேதனூபசயோ; அஞ்ஞம் சித்தம், அஞ்ஞோ சித்தூபசயோ; அஞ்ஞா ஸத்³தா⁴, அஞ்ஞோ ஸத்³தூ⁴பசயோ; அஞ்ஞம் வீரியம், அஞ்ஞோ வீரியூபசயோ; அஞ்ஞா ஸதி, அஞ்ஞோ ஸதூபசயோ; அஞ்ஞோ ஸமாதி⁴, அஞ்ஞோ ஸமாதூ⁴பசயோ; அஞ்ஞா பஞ்ஞா, அஞ்ஞோ பஞ்ஞூபசயோ; அஞ்ஞோ ராகோ³, அஞ்ஞோ ராகூ³பசயோ…பே… அஞ்ஞம் அனோத்தப்பம், அஞ்ஞோ அனோத்தப்பூபசயோதி? ந ஹேவம் வத்தப்³பே³…பே….

738. அஞ்ஞம் கம்மம், அஞ்ஞோ கம்மூபசயோதி? ஆமந்தா. கம்மூபசயோ கம்மேன ஸஹஜாதோதி? ந ஹேவம் வத்தப்³பே³…பே….

கம்மூபசயோ கம்மேன ஸஹஜாதோதி, ஆமந்தா. குஸலேன கம்மேன ஸஹஜாதோ கம்மூபசயோ குஸலோதி, ந ஹேவம் வத்தப்³பே³…பே….

குஸலேன கம்மேன ஸஹஜாதோ கம்மூபசயோ குஸலோதி? ஆமந்தா. ஸுகா²ய வேத³னாய ஸம்பயுத்தேன கம்மேன ஸஹஜாதோ கம்மூபசயோ ஸுகா²ய வேத³னாய ஸம்பயுத்தோதி? ந ஹேவம் வத்தப்³பே³…பே… து³க்கா²ய வேத³னாய…பே… அது³க்க²மஸுகா²ய வேத³னாய ஸம்பயுத்தேன கம்மேன ஸஹஜாதோ கம்மூபசயோ அது³க்க²மஸுகா²ய வேத³னாய ஸம்பயுத்தோதி? ந ஹேவம் வத்தப்³பே³…பே….

739. கம்மூபசயோ கம்மேன ஸஹஜாதோதி? ஆமந்தா. அகுஸலேன கம்மேன ஸஹஜாதோ கம்மூபசயோ அகுஸலோதி? ந ஹேவம் வத்தப்³பே³…பே….

அகுஸலேன கம்மேன ஸஹஜாதோ கம்மூபசயோ அகுஸலோதி? ஆமந்தா. ஸுகா²ய வேத³னாய ஸம்பயுத்தேன கம்மேன ஸஹஜாதோ கம்மூபசயோ ஸுகா²ய வேத³னாய ஸம்பயுத்தோதி? ந ஹேவம் வத்தப்³பே³…பே… து³க்கா²ய வேத³னாய…பே… அது³க்க²மஸுகா²ய வேத³னாய ஸம்பயுத்தேன கம்மேன ஸஹஜாதோ கம்மூபசயோ அது³க்க²மஸுகா²ய வேத³னாய ஸம்பயுத்தோதி? ந ஹேவம் வத்தப்³பே³…பே….

740. கம்மம் சித்தேன ஸஹஜாதம், கம்மம் ஸாரம்மணந்தி? ஆமந்தா. கம்மூபசயோ சித்தேன ஸஹஜாதோ, கம்மூபசயோ ஸாரம்மணோதி? ந ஹேவம் வத்தப்³பே³…பே… கம்மூபசயோ சித்தேன ஸஹஜாதோ, கம்மூபசயோ அனாரம்மணோதி? ஆமந்தா. கம்மம் சித்தேன ஸஹஜாதம், கம்மம் அனாரம்மணந்தி? ந ஹேவம் வத்தப்³பே³…பே….

கம்மம் சித்தேன ஸஹஜாதம், சித்தம் பி⁴ஜ்ஜமானம் கம்மம் பி⁴ஜ்ஜதீதி? ஆமந்தா. கம்மூபசயோ சித்தேன ஸஹஜாதோ, சித்தம் பி⁴ஜ்ஜமானம் கம்மூபசயோ பி⁴ஜ்ஜதீதி? ந ஹேவம் வத்தப்³பே³…பே….

கம்மூபசயோ சித்தேன ஸஹஜாதோ, சித்தம் பி⁴ஜ்ஜமானம் கம்மூபசயோ ந பி⁴ஜ்ஜதீதி? ஆமந்தா. கம்மம் சித்தேன ஸஹஜாதம், சித்தம் பி⁴ஜ்ஜமானம் கம்மம் ந பி⁴ஜ்ஜதீதி? ந ஹேவம் வத்தப்³பே³…பே….

741. கம்மம்ஹி கம்மூபசயோதி? ஆமந்தா. தஞ்ஞேவ கம்மம் ஸோ கம்மூபசயோதி? ந ஹேவம் வத்தப்³பே³…பே….

கம்மம்ஹி கம்மூபசயோ, கம்மூபசயதோ விபாகோ நிப்³ப³த்ததீதி? ஆமந்தா. தஞ்ஞேவ கம்மம், ஸோ கம்மூபசயோ, ஸோ கம்மவிபாகோதி? ந ஹேவம் வத்தப்³பே³…பே….

கம்மம்ஹி கம்மூபசயோ, கம்மூபசயதோ விபாகோ நிப்³ப³த்ததி, விபாகோ ஸாரம்மணோதி? ஆமந்தா. கம்மூபசயோ ஸாரம்மணோதி? ந ஹேவம் வத்தப்³பே³…பே… கம்மூபசயோ அனாரம்மணோதி? ஆமந்தா. விபாகோ அனாரம்மணோதி? ந ஹேவம் வத்தப்³பே³…பே….

742. அஞ்ஞம் கம்மம் அஞ்ஞோ கம்மூபசயோதி, ஆமந்தா. நனு வுத்தம் ப⁴க³வதா – ‘‘இத⁴, புண்ண, ஏகச்சோ ஸப்³யாப³ஜ்ஜ²ம்பி அப்³யாப³ஜ்ஜ²ம்பி [ஸப்³யாபஜ்ஜ²ம்பி அப்³யாபஜ்ஜ²ம்பி (க.) ம. நி. 2.81 பஸ்ஸிதப்³ப³ம்] காயஸங்கா²ரம் அபி⁴ஸங்க²ரோதி, ஸப்³யாப³ஜ்ஜ²ம்பி அப்³யாப³ஜ்ஜ²ம்பி வசீஸங்கா²ரம்…பே… மனோஸங்கா²ரம் அபி⁴ஸங்க²ரோதி, ஸோ ஸப்³யாப³ஜ்ஜ²ம்பி அப்³யாப³ஜ்ஜ²ம்பி காயஸங்கா²ரம் அபி⁴ஸங்க²ரித்வா, ஸப்³யாப³ஜ்ஜ²ம்பி அப்³யாப³ஜ்ஜ²ம்பி வசீஸங்கா²ரம்…பே… மனோஸங்கா²ரம் அபி⁴ஸங்க²ரித்வா ஸப்³யாப³ஜ்ஜ²ம்பி அப்³யாப³ஜ்ஜ²ம்பி லோகம் உபபஜ்ஜதி. தமேனம் ஸப்³யாப³ஜ்ஜ²ம்பி அப்³யாப³ஜ்ஜ²ம்பி லோகம் உபபன்னம் ஸமானம் ஸப்³யாப³ஜ்ஜா²பி அப்³யாப³ஜ்ஜா²பி ப²ஸ்ஸா பு²ஸந்தி. ஸோ ஸப்³யாப³ஜ்ஜே²ஹிபி அப்³யாப³ஜ்ஜே²ஹிபி ப²ஸ்ஸேஹி பு²ட்டோ² ஸமானோ ஸப்³யாப³ஜ்ஜ²ம்பி அப்³யாப³ஜ்ஜ²ம்பி வேத³னம் வேதே³தி வோகிண்ணஸுக²து³க்க²ம், ஸேய்யதா²பி மனுஸ்ஸா ஏகச்சே ச தே³வா ஏகச்சே ச வினிபாதிகா. இதி கோ², புண்ண, பூ⁴தா பூ⁴தஸ்ஸ உபபத்தி ஹோதி, யம் கரோதி தேன உபபஜ்ஜதி, உபபன்னமேதம் ப²ஸ்ஸா பு²ஸந்தி. ஏவம்பாஹம், புண்ண, ‘கம்மதா³யாதா³ ஸத்தா’தி வதா³மீ’’தி [ம. நி. 2.81]. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அஞ்ஞம் கம்மம், அஞ்ஞோ கம்மூபசயோ’’தி.

கம்மூபசயகதா² நிட்டி²தா.

பன்னரஸமவக்³கோ³.

தஸ்ஸுத்³தா³னம் –

பச்சயதா வவத்தி²தா, படிச்சஸமுப்பாதோ³, அத்³தா⁴, க²ணோ லயோ முஹுத்தம், சத்தாரோ ஆஸவா அனாஸவா, லோகுத்தரானம் த⁴ம்மானம் ஜராமரணம் லோகுத்தரா, ஸஞ்ஞாவேத³யிதனிரோத⁴ஸமாபத்தி லோகுத்தரா, ஸஞ்ஞாவேத³யிதனிரோத⁴ஸமாபத்தி லோகியா, ஸஞ்ஞாவேத³யிதனிரோத⁴ம் ஸமாபன்னோ காலம் கரேய்ய, ஸ்வேவ மக்³கோ³ அஸஞ்ஞஸத்துபபத்தியா, அஞ்ஞம் கம்மம் அஞ்ஞோ கம்மூபசயோதி.

ததியோ பண்ணாஸகோ.

தஸ்ஸுத்³தா³னம் –

அனுஸயா, ஸம்வரோ, கப்போ, மூலஞ்ச வவத்தி²தாதி.