15. பன்னரஸமவக்³கோ³

(154) 10. அஸஞ்ஞஸத்துபிககதா²

735. ஸஞ்ஞாவேத³யிதனிரோத⁴ஸமாபத்தி அஸஞ்ஞஸத்துபிகாதி? ஆமந்தா. அத்தி² ஸஞ்ஞாவேத³யிதனிரோத⁴ம் ஸமாபன்னஸ்ஸ அலோபோ⁴ குஸலமூலம், அதோ³ஸோ குஸலமூலம், அமோஹோ குஸலமூலம், ஸத்³தா⁴ வீரியம் ஸதி ஸமாதி⁴ பஞ்ஞாதி? ந ஹேவம் வத்தப்³பே³…பே… நத்தி² ஸஞ்ஞாவேத³யிதனிரோத⁴ம் ஸமாபன்னஸ்ஸ அலோபோ⁴ குஸலமூலம், அதோ³ஸோ குஸலமூலம்…பே… பஞ்ஞாதி? ஆமந்தா. ஹஞ்சி நத்தி² ஸஞ்ஞாவேத³யிதனிரோத⁴ம் ஸமாபன்னஸ்ஸ அலோபோ⁴ குஸலமூலம், அதோ³ஸோ குஸலமூலம், அமோஹோ குஸலமூலம், ஸத்³தா⁴ வீரியம் ஸதி ஸமாதி⁴ பஞ்ஞா, நோ ச வத ரே வத்தப்³பே³ – ‘‘ஸஞ்ஞாவேத³யிதனிரோத⁴ஸமாபத்தி அஸஞ்ஞஸத்துபிகா’’தி.

ஸஞ்ஞாவேத³யிதனிரோத⁴ஸமாபத்தி அஸஞ்ஞஸத்துபிகாதி? ஆமந்தா. அத்தி² ஸஞ்ஞாவேத³யிதனிரோத⁴ம் ஸமாபன்னஸ்ஸ ப²ஸ்ஸோ வேத³னா ஸஞ்ஞா சேதனா சித்தந்தி? ந ஹேவம் வத்தப்³பே³…பே… நத்தி² ஸஞ்ஞாவேத³யிதனிரோத⁴ம் ஸமாபன்னஸ்ஸ ப²ஸ்ஸோ வேத³னா ஸஞ்ஞா சேதனா சித்தந்தி? ஆமந்தா. அப²ஸ்ஸகஸ்ஸ மக்³க³பா⁴வனா…பே… அசித்தகஸ்ஸ மக்³க³பா⁴வனாதி? ந ஹேவம் வத்தப்³பே³…பே… நனு ஸப²ஸ்ஸகஸ்ஸ மக்³க³பா⁴வனா…பே… ஸசித்தகஸ்ஸ மக்³க³பா⁴வனாதி? ஆமந்தா. ஹஞ்சி ஸப²ஸ்ஸகஸ்ஸ மக்³க³பா⁴வனா…பே… ஸசித்தகஸ்ஸ மக்³க³பா⁴வனா, நோ ச வத ரே வத்தப்³பே³ – ‘‘ஸஞ்ஞாவேத³யிதனிரோத⁴ஸமாபத்தி அஸஞ்ஞஸத்துபிகா’’தி.

ஸஞ்ஞாவேத³யிதனிரோத⁴ஸமாபத்தி அஸஞ்ஞஸத்துபிகாதி? ஆமந்தா. யே கேசி ஸஞ்ஞாவேத³யிதனிரோத⁴ம் ஸமாபஜ்ஜந்தி, ஸப்³பே³ தே அஸஞ்ஞஸத்துபிகாதி? ந ஹேவம் வத்தப்³பே³…பே….

736. ந வத்தப்³ப³ம் – ‘‘ஸஞ்ஞாவேத³யிதனிரோத⁴ஸமாபத்தி அஸஞ்ஞஸத்துபிகா’’தி? ஆமந்தா. நனு இதா⁴பி அஸஞ்ஞீ தத்ராபி அஸஞ்ஞீதி? ஆமந்தா. ஹஞ்சி இதா⁴பி அஸஞ்ஞீ தத்ராபி அஸஞ்ஞீ, தேன வத ரே வத்தப்³பே³ – ‘‘ஸஞ்ஞாவேத³யிதனிரோத⁴ஸமாபத்தி அஸஞ்ஞஸத்துபிகா’’தி.

அஸஞ்ஞஸத்துபிககதா² நிட்டி²தா.