14. சுத்³த³ஸமவக்³கோ³

(143) 8. அப்³யாகதகதா²

706. தி³ட்டி²க³தம் அப்³யாகதந்தி? ஆமந்தா. விபாகாப்³யாகதம் கிரியாப்³யாகதம் ரூபம் நிப்³பா³னம் சக்கா²யதனம்…பே… போ²ட்ட²ப்³பா³யதனந்தி? ந ஹேவம் வத்தப்³பே³…பே… தி³ட்டி²க³தம் அப்³யாகதந்தி? ஆமந்தா. தி³ட்டி²க³தஸம்பயுத்தோ ப²ஸ்ஸோ அப்³யாகதோதி? ந ஹேவம் வத்தப்³பே³…பே… தி³ட்டி²க³தம் அப்³யாகதந்தி? ஆமந்தா. தி³ட்டி²க³தஸம்பயுத்தா வேத³னா…பே… ஸஞ்ஞா…பே… சேதனா…பே… சித்தம் அப்³யாகதந்தி? ந ஹேவம் வத்தப்³பே³…பே….

தி³ட்டி²க³தஸம்பயுத்தோ ப²ஸ்ஸோ அகுஸலோதி? ஆமந்தா. தி³ட்டி²க³தம் அகுஸலந்தி? ந ஹேவம் வத்தப்³பே³…பே… தி³ட்டி²க³தஸம்பயுத்தா வேத³னா ஸஞ்ஞா சேதனா சித்தம் அகுஸலந்தி? ஆமந்தா. தி³ட்டி²க³தம் அகுஸலந்தி? ந ஹேவம் வத்தப்³பே³…பே….

707. தி³ட்டி²க³தம் அப்³யாகதந்தி? ஆமந்தா. அப²லம் அவிபாகந்தி? ந ஹேவம் வத்தப்³பே³…பே… நனு ஸப²லம் ஸவிபாகந்தி? ஆமந்தா. ஹஞ்சி ஸப²லம் ஸவிபாகம், நோ ச வத ரே வத்தப்³பே³ – ‘‘தி³ட்டி²க³தம் அப்³யாகத’’ந்தி.

தி³ட்டி²க³தம் அப்³யாகதந்தி? ஆமந்தா. நனு மிச்சா²தி³ட்டி²பரமானி வஜ்ஜானி [அங்கு³த்தரனிகாயே] வுத்தானி ப⁴க³வதாதி? ஆமந்தா. ஹஞ்சி மிச்சா²தி³ட்டி²பரமானி வஜ்ஜானி வுத்தானி ப⁴க³வதா, நோ ச வத ரே வத்தப்³பே³ – ‘‘தி³ட்டி²க³தம் அப்³யாகத’’ந்தி.

தி³ட்டி²க³தம் அப்³யாகதந்தி? ஆமந்தா. நனு வுத்தம் ப⁴க³வதா – ‘‘மிச்சா²தி³ட்டி² கோ², வச்ச², அகுஸலா [அகுஸலம் (ம. நி. 2.194)], ஸம்மாதி³ட்டி² குஸலா’’ [குஸலம் (ம. நி. 2.104)] தி [ம. நி. 2.194]! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘தி³ட்டி²க³தம் அப்³யாகத’’ந்தி.

தி³ட்டி²க³தம் அப்³யாகதந்தி? ஆமந்தா. நனு வுத்தம் ப⁴க³வதா – ‘‘மிச்சா²தி³ட்டி²ஸ்ஸ கோ² அஹம், புண்ண, த்³வின்னம் க³தீனம் அஞ்ஞதரம் க³திம் வதா³மி – நிரயம் வா திரச்சா²னயோனிம் வா’’தி [ம. நி. 2.79]! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘தி³ட்டி²க³தம் அப்³யாகத’’ந்தி.

708. ந வத்தப்³ப³ம் – ‘‘தி³ட்டி²க³தம் அப்³யாகத’’ந்தி? ஆமந்தா. நனு வுத்தம் ப⁴க³வதா – ‘‘‘ஸஸ்ஸதோ லோகோ’தி கோ², வச்ச², அப்³யாகதமேதம், ‘அஸஸ்ஸதோ லோகோ’தி கோ², வச்ச², அப்³யாகதமேதம், ‘அந்தவா லோகோ’தி கோ², வச்ச², அப்³யாகதமேதம், ‘அனந்தவா லோகோ’தி கோ², வச்ச²…பே… ‘தம் ஜீவம் தம் ஸரீர’ந்தி கோ², வச்ச²…பே… ‘அஞ்ஞம் ஜீவம் அஞ்ஞம் ஸரீர’ந்தி கோ², வச்ச²…பே… ‘ஹோதி ததா²க³தோ பரம் மரணா’தி கோ², வச்ச²…பே… ‘ந ஹோதி ததா²க³தோ பரம் மரணா’தி கோ², வச்ச²…பே… ‘ஹோதி ச ந ச ஹோதி ததா²க³தோ பரம் மரணா’தி கோ², வச்ச²…பே… ‘நேவ ஹோதி ந ந ஹோதி ததா²க³தோ பரம் மரணா’தி கோ², வச்ச², அப்³யாகதமேத’’ந்தி [ஸம். நி. 4.416, தோ²கம் பன விஸதி³ஸம்]! அத்தே²வ ஸுத்தந்தோதி? ஆமந்தா. தேன ஹி தி³ட்டி²க³தம் அப்³யாகதந்தி.

தி³ட்டி²க³தம் அப்³யாகதந்தி? ஆமந்தா. நனு வுத்தம் ப⁴க³வதா – ‘‘மிச்சா²தி³ட்டி²கஸ்ஸ, பி⁴க்க²வே, புரிஸபுக்³க³லஸ்ஸ யஞ்சேவ காயகம்மம் யதா²தி³ட்டி²ஸமத்தம் ஸமாதி³ன்னம், யஞ்ச வசீகம்மம்…பே… யஞ்ச மனோகம்மம், யா ச சேதனா, யா ச பத்த²னா, யோ ச பணிதி⁴, யே ச ஸங்கா²ரா, ஸப்³பே³ தே த⁴ம்மா அனிட்டா²ய அகந்தாய அமனாபாய அஹிதாய து³க்கா²ய ஸம்வத்தந்தீ’’தி [அ. நி. 1.306]! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘தி³ட்டி²க³தம் அப்³யாகத’’ந்தி.

அப்³யாகதகதா² நிட்டி²தா.