14. சுத்³த³ஸமவக்³கோ³

(138) 3. அனந்தரபச்சயகதா²

693. சக்கு²விஞ்ஞாணஸ்ஸ அனந்தரா ஸோதவிஞ்ஞாணம் உப்பஜ்ஜதீதி? ஆமந்தா. யா சக்கு²விஞ்ஞாணஸ்ஸ உப்பாதா³ய ஆவட்டனா…பே… பணிதி⁴, ஸாவ ஸோதவிஞ்ஞாணஸ்ஸ உப்பாதா³ய ஆவட்டனா…பே… பணிதீ⁴தி? ந ஹேவம் வத்தப்³பே³…பே….

சக்கு²விஞ்ஞாணஸ்ஸ அனந்தரா ஸோதவிஞ்ஞாணம் உப்பஜ்ஜதி, ந வத்தப்³ப³ம் – ‘‘யா சக்கு²விஞ்ஞாணஸ்ஸ உப்பாதா³ய ஆவட்டனா…பே… பணிதி⁴, ஸாவ ஸோதவிஞ்ஞாணஸ்ஸ உப்பாதா³ய ஆவட்டனா…பே… பணிதீ⁴தி? ஆமந்தா. ஸோதவிஞ்ஞாணம் அனாவட்டேந்தஸ்ஸ உப்பஜ்ஜதி…பே… அப்பணித³ஹந்தஸ்ஸ உப்பஜ்ஜதீதி? ந ஹேவம் வத்தப்³பே³…பே…. நனு ஸோதவிஞ்ஞாணம் ஆவட்டேந்தஸ்ஸ உப்பஜ்ஜதி…பே… பணித³ஹந்தஸ்ஸ உப்பஜ்ஜதீதி, ஆமந்தா. ஹஞ்சி ஸோதவிஞ்ஞாணம் ஆவட்டேந்தஸ்ஸ உப்பஜ்ஜதி…பே… பணித³ஹந்தஸ்ஸ உப்பஜ்ஜதி, நோ ச வத ரே வத்தப்³பே³ – ‘‘சக்கு²விஞ்ஞாணஸ்ஸ அனந்தரா ஸோதவிஞ்ஞாணம் உப்பஜ்ஜதீ’’தி.

694. சக்கு²விஞ்ஞாணஸ்ஸ அனந்தரா ஸோதவிஞ்ஞாணம் உப்பஜ்ஜதீதி? ஆமந்தா. சக்கு²விஞ்ஞாணம் ரூபனிமித்தம் மனஸிகரோதோ உப்பஜ்ஜதீதி? ஆமந்தா. ஸோதவிஞ்ஞாணம் ரூபனிமித்தம் மனஸிகரோதோ உப்பஜ்ஜதீதி? ந ஹேவம் வத்தப்³பே³…பே….

சக்கு²விஞ்ஞாணம் ரூபாரம்மணஞ்ஞேவ ந அஞ்ஞாரம்மணந்தி? ஆமந்தா. ஸோதவிஞ்ஞாணம் ரூபாரம்மணஞ்ஞேவ ந அஞ்ஞாரம்மணந்தி? ந ஹேவம் வத்தப்³பே³…பே….

சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணந்தி? ஆமந்தா. சக்கு²ஞ்ச படிச்ச ரூபே ச உப்பஜ்ஜதி ஸோதவிஞ்ஞாணந்தி? ந ஹேவம் வத்தப்³பே³…பே….

சக்கு²ஞ்ச படிச்ச ரூபே ச உப்பஜ்ஜதி ஸோதவிஞ்ஞாணந்தி? ஆமந்தா. ‘‘சக்கு²ஞ்ச படிச்ச ரூபே ச உப்பஜ்ஜதி ஸோதவிஞ்ஞாண’’ந்தி – அத்தே²வ ஸுத்தந்தோதி? நத்தி². ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? ஆமந்தா. ஹஞ்சி ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோ, நோ ச வத ரே வத்தப்³பே³ – ‘‘சக்கு²ஞ்ச படிச்ச ரூபே ச உப்பஜ்ஜதி ஸோதவிஞ்ஞாண’’ந்தி.

சக்கு²விஞ்ஞாணஸ்ஸ அனந்தரா ஸோதவிஞ்ஞாணம் உப்பஜ்ஜதீதி? ஆமந்தா. தஞ்ஞேவ சக்கு²விஞ்ஞாணம் தம் ஸோதவிஞ்ஞாணந்தி? ந ஹேவம் வத்தப்³பே³…பே….

695. ஸோதவிஞ்ஞாணஸ்ஸ அனந்தரா கா⁴னவிஞ்ஞாணம் உப்பஜ்ஜதி…பே… கா⁴னவிஞ்ஞாணஸ்ஸ அனந்தரா ஜிவ்ஹாவிஞ்ஞாணம் உப்பஜ்ஜதி…பே… ஜிவ்ஹாவிஞ்ஞாணஸ்ஸ அனந்தரா காயவிஞ்ஞாணம் உப்பஜ்ஜதீதி? ஆமந்தா. யா ஜிவ்ஹாவிஞ்ஞாணஸ்ஸ உப்பாதா³ய ஆவட்டனா…பே… பணிதி⁴, ஸாவ காயவிஞ்ஞாணஸ்ஸ உப்பாதா³ய ஆவட்டனா…பே… பணிதீ⁴தி? ந ஹேவம் வத்தப்³பே³…பே… ஜிவ்ஹாவிஞ்ஞாணஸ்ஸ அனந்தரா காயவிஞ்ஞாணம் உப்பஜ்ஜதி, ந வத்தப்³ப³ம் – ‘‘யா ஜிவ்ஹாவிஞ்ஞாணஸ்ஸ உப்பாதா³ய ஆவட்டனா…பே… பணிதி⁴, ஸாவ காயவிஞ்ஞாணஸ்ஸ உப்பாதா³ய ஆவட்டனா…பே… பணிதீ⁴’’தி? ஆமந்தா. காயவிஞ்ஞாணம் அனாவட்டேந்தஸ்ஸ உப்பஜ்ஜதி…பே… அப்பணித³ஹந்தஸ்ஸ உப்பஜ்ஜதீதி? ந ஹேவம் வத்தப்³பே³…பே… நனு காயவிஞ்ஞாணம் ஆவட்டேந்தஸ்ஸ உப்பஜ்ஜதி…பே… பணித³ஹந்தஸ்ஸ உப்பஜ்ஜதீதி? ஆமந்தா. ஹஞ்சி காயவிஞ்ஞாணம் ஆவட்டேந்தஸ்ஸ உப்பஜ்ஜதி…பே… பணித³ஹந்தஸ்ஸ உப்பஜ்ஜதி, நோ ச வத ரே வத்தப்³பே³ – ‘‘ஜிவ்ஹாவிஞ்ஞாணஸ்ஸ அனந்தரா காயவிஞ்ஞாணம் உப்பஜ்ஜதீ’’தி.

696. ஜிவ்ஹாவிஞ்ஞாணஸ்ஸ அனந்தரா காயவிஞ்ஞாணம் உப்பஜ்ஜதீதி? ஆமந்தா. ஜிவ்ஹாவிஞ்ஞாணம் ரஸனிமித்தம் மனஸிகரோதோ உப்பஜ்ஜதீதி? ஆமந்தா. காயவிஞ்ஞாணம் ரஸனிமித்தம் மனஸிகரோதோ உப்பஜ்ஜதீதி? ந ஹேவம் வத்தப்³பே³…பே….

ஜிவ்ஹாவிஞ்ஞாணம் ரஸாரம்மணஞ்ஞேவ ந அஞ்ஞாரம்மணந்தி? ஆமந்தா. காயவிஞ்ஞாணம் ரஸாரம்மணஞ்ஞேவ ந அஞ்ஞாரம்மணந்தி? ந ஹேவம் வத்தப்³பே³…பே….

ஜிவ்ஹஞ்ச படிச்ச ரஸே ச உப்பஜ்ஜதி ஜிவ்ஹாவிஞ்ஞாணந்தி? ஆமந்தா. ஜிவ்ஹஞ்ச படிச்ச ரஸே ச உப்பஜ்ஜதி காயவிஞ்ஞாணந்தி? ந ஹேவம் வத்தப்³பே³…பே….

ஜிவ்ஹஞ்ச படிச்ச ரஸே ச உப்பஜ்ஜதி காயவிஞ்ஞாணந்தி? ஆமந்தா. ‘‘ஜிவ்ஹஞ்ச படிச்ச ரஸே ச உப்பஜ்ஜதி காயவிஞ்ஞாண’’ந்தி – அத்தே²வ ஸுத்தந்தோதி? நத்தி². ‘‘ஜிவ்ஹஞ்ச படிச்ச ரஸே ச உப்பஜ்ஜதி ஜிவ்ஹாவிஞ்ஞாண’’ந்தி – அத்தே²வ ஸுத்தந்தோதி? ஆமந்தா. ஹஞ்சி ‘‘ஜிவ்ஹஞ்ச படிச்ச ரஸே ச உப்பஜ்ஜதி ஜிவ்ஹாவிஞ்ஞாண’’ந்தி – அத்தே²வ ஸுத்தந்தோதி, நோ ச வத ரே வத்தப்³பே³ – ‘‘ஜிவ்ஹஞ்ச படிச்ச ரஸே ச உப்பஜ்ஜதி காயவிஞ்ஞாண’’ந்தி.

ஜிவ்ஹாவிஞ்ஞாணஸ்ஸ அனந்தரா காயவிஞ்ஞாணம் உப்பஜ்ஜதீதி? ஆமந்தா. தஞ்ஞேவ ஜிவ்ஹாவிஞ்ஞாணம் தம் காயவிஞ்ஞாணந்தி? ந ஹேவம் வத்தப்³பே³…பே….

697. ந வத்தப்³ப³ம் – ‘‘பஞ்சவிஞ்ஞாணா அஞ்ஞமஞ்ஞஸ்ஸ ஸமனந்தரா உப்பஜ்ஜந்தீ’’தி? ஆமந்தா. நனு அத்தி² கோசி நச்சதி கா³யதி வாதே³தி, ரூபஞ்ச பஸ்ஸதி, ஸத்³த³ஞ்ச ஸுணாதி, க³ந்த⁴ஞ்ச கா⁴யதி, ரஸஞ்ச ஸாயதி, போ²ட்ட²ப்³ப³ஞ்ச பு²ஸதீதி? ஆமந்தா. ஹஞ்சி அத்தி² கோசி நச்சதி கா³யதி வாதே³தி, ரூபஞ்ச பஸ்ஸதி, ஸத்³த³ஞ்ச ஸுணாதி, க³ந்த⁴ஞ்ச கா⁴யதி, ரஸஞ்ச ஸாயதி, போ²ட்ட²ப்³ப³ஞ்ச பு²ஸதி, தேன வத ரே வத்தப்³பே³ – ‘‘பஞ்சவிஞ்ஞாணா அஞ்ஞமஞ்ஞஸ்ஸ ஸமனந்தரா உப்பஜ்ஜந்தீ’’தி.

அனந்தரபச்சயகதா² நிட்டி²தா.