(136) 1. குஸலாகுஸலபடிஸந்த³ஹனகதா²

686. அகுஸலமூலம் படிஸந்த³ஹதி குஸலமூலந்தி? ஆமந்தா. யா அகுஸலஸ்ஸ உப்பாதா³ய ஆவட்டனா…பே… பணிதி⁴, ஸாவ குஸலஸ்ஸ உப்பாதா³ய ஆவட்டனா…பே… பணிதீ⁴தி? ந ஹேவம் வத்தப்³பே³…பே….

அகுஸலமூலம் படிஸந்த³ஹதி குஸலமூலம், ந வத்தப்³ப³ம் – ‘‘யா அகுஸலஸ்ஸ உப்பாதா³ய ஆவட்டனா…பே… பணிதி⁴, ஸாவ குஸலஸ்ஸ உப்பாதா³ய ஆவட்டனா…பே… பணிதீ⁴’’தி? ஆமந்தா. குஸலம் அனாவட்டேந்தஸ்ஸ [அனாவட்டந்தஸ்ஸ (ஸீ. பீ. க.), அனாவஜ்ஜந்தஸ்ஸ (ஸ்யா. கம்.)] உப்பஜ்ஜதி …பே… அப்பணித³ஹந்தஸ்ஸ உப்பஜ்ஜதீதி? ந ஹேவம் வத்தப்³பே³…பே… நனு குஸலம் ஆவட்டேந்தஸ்ஸ உப்பஜ்ஜதி…பே… பணித³ஹந்தஸ்ஸ உப்பஜ்ஜதீதி? ஆமந்தா. ஹஞ்சி குஸலம் ஆவட்டேந்தஸ்ஸ உப்பஜ்ஜதி…பே… பணித³ஹந்தஸ்ஸ உப்பஜ்ஜதி, நோ ச வத ரே வத்தப்³பே³ – ‘‘அகுஸலமூலம் படிஸந்த³ஹதி குஸலமூல’’ந்தி.

687. அகுஸலமூலம் படிஸந்த³ஹதி குஸலமூலந்தி? ஆமந்தா. அகுஸலமூலம் அயோனிஸோ மனஸிகரோதோ உப்பஜ்ஜதீதி? ஆமந்தா. குஸலம் அயோனிஸோ மனஸிகரோதோ உப்பஜ்ஜதீதி? ந ஹேவம் வத்தப்³பே³…பே… நனு குஸலம் யோனிஸோ மனஸிகரோதோ உப்பஜ்ஜதீதி? ஆமந்தா. ஹஞ்சி குஸலம் யோனிஸோ மனஸிகரோதோ உப்பஜ்ஜதி, நோ ச வத ரே வத்தப்³பே³ – ‘‘அகுஸலமூலம் படிஸந்த³ஹதி குஸலமூல’’ந்தி.

அகுஸலமூலம் படிஸந்த³ஹதி குஸலமூலந்தி? ஆமந்தா. காமஸஞ்ஞாய அனந்தரா நேக்க²ம்மஸஞ்ஞா உப்பஜ்ஜதி, ப்³யாபாத³ஸஞ்ஞாய அனந்தரா அப்³யாபாத³ஸஞ்ஞா உப்பஜ்ஜதி, விஹிம்ஸாஸஞ்ஞாய அனந்தரா அவிஹிம்ஸாஸஞ்ஞா உப்பஜ்ஜதி, ப்³யாபாத³ஸ்ஸ அனந்தரா மேத்தா உப்பஜ்ஜதி, விஹிம்ஸாய அனந்தரா கருணா உப்பஜ்ஜதி, அரதியா அனந்தரா முதி³தா உப்பஜ்ஜதி, படிக⁴ஸ்ஸ அனந்தரா உபேக்கா² உப்பஜ்ஜதீதி? ந ஹேவம் வத்தப்³பே³…பே….

688. குஸலமூலம் படிஸந்த³ஹதி அகுஸலமூலந்தி? ஆமந்தா. யா குஸலஸ்ஸ உப்பாதா³ய ஆவட்டனா…பே… பணிதி⁴, ஸாவ அகுஸலஸ்ஸ உப்பாதா³ய ஆவட்டனா…பே… பணிதீ⁴தி? ந ஹேவம் வத்தப்³பே³…பே….

குஸலமூலம் படிஸந்த³ஹதி அகுஸலமூலம், ந வத்தப்³ப³ம் – ‘‘யா குஸலஸ்ஸ உப்பாதா³ய ஆவட்டனா…பே… பணிதி⁴, ஸாவ அகுஸலஸ்ஸ உப்பாதா³ய ஆவட்டனா…பே… பணிதீ⁴’’தி? ஆமந்தா. அகுஸலம் அனாவட்டேந்தஸ்ஸ உப்பஜ்ஜதி…பே… அப்பணித³ஹந்தஸ்ஸ உப்பஜ்ஜதீதி? ந ஹேவம் வத்தப்³பே³…பே… நனு அகுஸலம் ஆவட்டேந்தஸ்ஸ உப்பஜ்ஜதி…பே… பணித³ஹந்தஸ்ஸ உப்பஜ்ஜதீதி? ஆமந்தா. ஹஞ்சி அகுஸலம் ஆவட்டேந்தஸ்ஸ உப்பஜ்ஜதி…பே… பணித³ஹந்தஸ்ஸ உப்பஜ்ஜதி, நோ ச வத ரே வத்தப்³பே³ – ‘‘குஸலமூலம் படிஸந்த³ஹதி அகுஸலமூல’’ந்தி.

689. குஸலமூலம் படிஸந்த³ஹதி அகுஸலமூலந்தி? ஆமந்தா. குஸலம் யோனிஸோ மனஸிகரோதோ உப்பஜ்ஜதீதி? ஆமந்தா. அகுஸலம் யோனிஸோ மனஸிகரோதோ உப்பஜ்ஜதீதி? ந ஹேவம் வத்தப்³பே³…பே… நனு அகுஸலம் அயோனிஸோ மனஸிகரோதோ உப்பஜ்ஜதீதி? ஆமந்தா. ஹஞ்சி அகுஸலம் அயோனிஸோ மனஸிகரோதோ உப்பஜ்ஜதி, நோ ச வத ரே வத்தப்³பே³ – ‘‘குஸலமூலம் படிஸந்த³ஹதி அகுஸலமூல’’ந்தி.

குஸலமூலம் படிஸந்த³ஹதி அகுஸலமூலந்தி? ஆமந்தா. நேக்க²ம்மஸஞ்ஞாய அனந்தரா காமஸஞ்ஞா உப்பஜ்ஜதி, அப்³யாபாத³ஸஞ்ஞாய அனந்தரா ப்³யாபாத³ஸஞ்ஞா உப்பஜ்ஜதி, அவிஹிம்ஸாஸஞ்ஞாய அனந்தரா விஹிம்ஸாஸஞ்ஞா உப்பஜ்ஜதி, மேத்தாய அனந்தரா ப்³யாபாதோ³ உப்பஜ்ஜதி, கருணாய அனந்தரா விஹிம்ஸா உப்பஜ்ஜதி, முதி³தாய அனந்தரா அரதி உப்பஜ்ஜதி, உபேக்கா²ய அனந்தரா படிக⁴ம் உப்பஜ்ஜதீதி? ந ஹேவம் வத்தப்³பே³…பே….

690. ந வத்தப்³ப³ம் – ‘‘அகுஸலமூலம் படிஸந்த³ஹதி குஸலமூலம், குஸலமூலம் படிஸந்த³ஹதி அகுஸலமூல’’ந்தி? ஆமந்தா. நனு யஸ்மிம்யேவ வத்து²ஸ்மிம் ரஜ்ஜதி தஸ்மிஞ்ஞேவ வத்து²ஸ்மிம் விரஜ்ஜதி, யஸ்மிம்யேவ வத்து²ஸ்மிம் விரஜ்ஜதி தஸ்மிஞ்ஞேவ வத்து²ஸ்மிம் ரஜ்ஜதீதி? ஆமந்தா. ஹஞ்சி யஸ்மிஞ்ஞேவ வத்து²ஸ்மிம் ரஜ்ஜதி தஸ்மிஞ்ஞேவ வத்து²ஸ்மிம் விரஜ்ஜதி, யஸ்மிஞ்ஞேவ வத்து²ஸ்மிம் விரஜ்ஜதி தஸ்மிஞ்ஞேவ வத்து²ஸ்மிம் ரஜ்ஜதி, தேன வத ரே வத்தப்³பே³ – ‘‘அகுஸலமூலம் படிஸந்த³ஹதி குஸலமூலம், குஸலமூலம் படிஸந்த³ஹதி அகுஸலமூல’’ந்தி.

குஸலாகுஸலபடிஸந்த³ஹனகதா² நிட்டி²தா.