13. தேரஸமவக்³கோ³

(126) 1. கப்பட்ட²கதா²

654. கப்பட்டோ² கப்பம் திட்டே²ய்யாதி? ஆமந்தா. கப்போ ச ஸண்டா²தி பு³த்³தோ⁴ ச லோகே உப்பஜ்ஜதீதி? ந ஹேவம் வத்தப்³பே³…பே…. கப்பட்டோ² கப்பம் திட்டே²ய்யாதி? ஆமந்தா. கப்போ ச ஸண்டா²தி ஸங்கோ⁴ ச பி⁴ஜ்ஜதீதி? ந ஹேவம் வத்தப்³பே³…பே… கப்பட்டோ² கப்பம் திட்டே²ய்யாதி? ஆமந்தா. கப்போ ச ஸண்டா²தி கப்பட்டோ² ச கப்பட்டி²யம் கம்மம் கரோதீதி? ந ஹேவம் வத்தப்³பே³…பே… கப்பட்டோ² கப்பம் திட்டே²ய்யாதி? ஆமந்தா. கப்போ ச ஸண்டா²தி கப்பட்டோ² ச புக்³க³லோ காலம் கரோதீதி? ந ஹேவம் வத்தப்³பே³…பே….

655. கப்பட்டோ² கப்பம் திட்டே²ய்யாதி? ஆமந்தா. அதீதம் கப்பம் திட்டே²ய்ய, அனாக³தம் கப்பம் திட்டே²ய்யாதி? ந ஹேவம் வத்தப்³பே³…பே… கப்பட்டோ² கப்பம் திட்டே²ய்யாதி? ஆமந்தா. த்³வே கப்பே திட்டே²ய்ய… தயோ கப்பே திட்டே²ய்ய… சத்தாரோ கப்பே திட்டே²ய்யாதி? ந ஹேவம் வத்தப்³பே³…பே….

656. கப்பட்டோ² கப்பம் திட்டே²ய்யாதி? ஆமந்தா. கப்பட்டோ² கப்பே ட³ய்ஹந்தே கத்த² க³ச்ச²தீதி? அஞ்ஞம் லோகதா⁴தும் க³ச்ச²தீதி. மதோ க³ச்ச²தி, வேஹாஸம் க³ச்ச²தீதி? மதோ க³ச்ச²தீதி. கப்பட்டி²யம் கம்மம் அபராபரியவேபக்கந்தி? ந ஹேவம் வத்தப்³பே³…பே… [வேஹாஸம் க³ச்ச²தீதி (?) அயம் ஹி பரவாதி³ஸ்ஸ படிஞ்ஞாயேவ, கதா². 621-623 நவமபந்தியம் விய] வேஹாஸம் க³ச்ச²தீதி? ஆமந்தா [வேஹாஸம் க³ச்ச²தீதி (?) அயம் ஹி பரவாதி³ஸ்ஸ படிஞ்ஞாயேவ, கதா². 621-623 நவமபந்தியம் விய]. கப்பட்டோ² இத்³தி⁴மாதி? ந ஹேவம் வத்தப்³பே³…பே… கப்பட்டோ² இத்³தி⁴மாதி? ஆமந்தா. கப்பட்டே²ன ச²ந்தி³த்³தி⁴பாதோ³ பா⁴விதோ வீரியித்³தி⁴பாதோ³ பா⁴விதோ சித்தித்³தி⁴பாதோ³ பா⁴விதோ வீமம்ஸித்³தி⁴பாதோ³ பா⁴விதோதி? ந ஹேவம் வத்தப்³பே³…பே….

657. ந வத்தப்³ப³ம் – ‘‘கப்பட்டோ² கப்பம் திட்டே²ய்யா’’தி? ஆமந்தா. நனு வுத்தம் ப⁴க³வதா –

‘‘ஆபாயிகோ நேரயிகோ, கப்பட்டோ² ஸங்க⁴பே⁴த³கோ;

வக்³க³ரதோ அத⁴ம்மட்டோ², யோக³க்கே²மா பத⁴ம்ஸதி;

ஸங்க⁴ம் ஸமக்³க³ம் பே⁴த்வான [பி⁴ந்தி³த்வா (ஸீ. க.)], கப்பம் நிரயம்ஹி பச்சதீ’’தி [சூளவ. 354; அ. நி. 10.39; இதிவு. 18].

அத்தே²வ ஸுத்தந்தோதி? ஆமந்தா. தேன ஹி கப்பட்டோ² கப்பம் திட்டே²ய்யாதி.

கப்பட்ட²கதா² நிட்டி²தா.

13. தேரஸமவக்³கோ³

(127) 2. குஸலபடிலாப⁴கதா²

658. கப்பட்டோ² குஸலம் சித்தம் ந படிலபே⁴ய்யாதி? ஆமந்தா. கப்பட்டோ² தா³னம் த³தே³ய்யாதி? ஆமந்தா. ஹஞ்சி கப்பட்டோ² தா³னம் த³தே³ய்ய, நோ ச வத ரே வத்தப்³பே³ – ‘‘கப்பட்டோ² குஸலம் சித்தம் ந படிலபே⁴ய்யா’’தி.

கப்பட்டோ² குஸலம் சித்தம் ந படிலபே⁴ய்யாதி? ஆமந்தா. கப்பட்டோ² சீவரம் த³தே³ய்ய…பே… பிண்ட³பாதம் த³தே³ய்ய…பே… ஸேனாஸனம் த³தே³ய்ய…பே… கி³லானபச்சயபே⁴ஸஜ்ஜபரிக்கா²ரம் த³தே³ய்ய … கா²த³னீயம் த³தே³ய்ய… போ⁴ஜனீயம் த³தே³ய்ய… பானீயம் த³தே³ய்ய… சேதியம் வந்தே³ய்ய… சேதியே மாலம் ஆரோபேய்ய… க³ந்த⁴ம் ஆரோபேய்ய… விலேபனம் ஆரோபேய்ய…பே… சேதியம் அபி⁴த³க்கி²ணம் [பத³க்கி²ணம் (பீ.)] கரேய்யாதி? ஆமந்தா. ஹஞ்சி கப்பட்டோ² சேதியம் அபி⁴த³க்கி²ணம் கரேய்ய, நோ ச வத ரே வத்தப்³பே³ – ‘‘கப்பட்டோ² குஸலம் சித்தம் ந படிலபே⁴ய்யா’’தி…பே….

659. கப்பட்டோ² குஸலம் சித்தம் படிலபே⁴ய்யாதி? ஆமந்தா. ததோ வுட்டா²னம் குஸலம் சித்தம் படிலபே⁴ய்யாதி? ஆமந்தா. ரூபாவசரம்…பே… அரூபாவசரம்…பே… லோகுத்தரம் குஸலம் சித்தம் படிலபே⁴ய்யாதி? ந ஹேவம் வத்தப்³பே³…பே….

குஸலபடிலாப⁴கதா² நிட்டி²தா.

13. தேரஸமவக்³கோ³

(128) 3. அனந்தராபயுத்தகதா²

660. அனந்தராபயுத்தோ புக்³க³லோ ஸம்மத்தனியாமம் ஓக்கமேய்யாதி? ஆமந்தா. மிச்ச²த்தனியாமஞ்ச ஸம்மத்தனியாமஞ்ச உபோ⁴ ஓக்கமேய்யாதி? ந ஹேவம் வத்தப்³பே³…பே… அனந்தராபயுத்தோ புக்³க³லோ ஸம்மத்தனியாமம் ஓக்கமேய்யாதி? ஆமந்தா. நனு தம் கம்மம் பயுத்தம் குக்குச்சம் உப்பாதி³தம் விப்படிஸாரியம் ஜனிதந்தி? ஆமந்தா. ஹஞ்சி தம் கம்மம் பயுத்தம் குக்குச்சம் உப்பாதி³தம் விப்படிஸாரியம் ஜனிதம், நோ ச வத ரே வத்தப்³பே³ – ‘‘அனந்தராபயுத்தோ புக்³க³லோ ஸம்மத்தனியாமம் ஓக்கமேய்யா’’தி.

661. அனந்தராபயுத்தோ புக்³க³லோ அப⁴ப்³போ³ ஸம்மத்தனியாமம் ஓக்கமிதுந்தி? ஆமந்தா. மாதா ஜீவிதா வோரோபிதா… பிதா ஜீவிதா வோரோபிதோ… அரஹா ஜீவிதா வோரோபிதோ… து³ட்டே²ன சித்தேன ததா²க³தஸ்ஸ லோஹிதம் உப்பாதி³தம்… ஸங்கோ⁴ பி⁴ன்னோதி? ந ஹேவம் வத்தப்³பே³…பே….

அனந்தராபயுத்தோ புக்³க³லோ தம் கம்மம் படிஸம்ஹரித்வா குக்குச்சம் படிவினோதே³த்வா விப்படிஸாரியம் படிவினேத்வா [படிவினோதே³த்வா (ஸீ. பீ. க.)] அப⁴ப்³போ³ ஸம்மத்தனியாமம் ஓக்கமிதுந்தி? ஆமந்தா. மாதா ஜீவிதா வோரோபிதா… பிதா ஜீவிதா வோரோபிதோ…பே… ஸங்கோ⁴ பி⁴ன்னோதி? ந ஹேவம் வத்தப்³பே³…பே….

அனந்தராபயுத்தோ புக்³க³லோ தம் கம்மம் படிஸம்ஹரித்வா குக்குச்சம் படிவினோதே³த்வா விப்படிஸாரியம் படிவினேத்வா அப⁴ப்³போ³ ஸம்மத்தனியாமம் ஓக்கமிதுந்தி? ஆமந்தா. நனு தம் கம்மம் படிஸம்ஹடம் குக்குச்சம் படிவினோதி³தம் விப்படிஸாரியம் படிவினீதந்தி? ஆமந்தா. ஹஞ்சி தம் கம்மம் படிஸம்ஹடம் குக்குச்சம் படிவினோதி³தம் விப்படிஸாரியம் படிவினீதம், நோ ச வத ரே வத்தப்³பே³ – ‘‘அனந்தராபயுத்தோ புக்³க³லோ தம் கம்மம் படிஸம்ஹரித்வா குக்குச்சம் படிவினோதே³த்வா விப்படிஸாரியம் படிவினேத்வா அப⁴ப்³போ³ ஸம்மத்தனியாமம் ஓக்கமிது’’ந்தி.

662. அனந்தராபயுத்தோ புக்³க³லோ ஸம்மத்தனியாமம் ஓக்கமேய்யாதி? ஆமந்தா. நனு தம் கம்மம் பயுத்தோ ஆஸீதி? ஆமந்தா. ஹஞ்சி தம் கம்மம் பயுத்தோ ஆஸி, நோ ச வத ரே வத்தப்³பே³ – ‘‘அனந்தராபயுத்தோ புக்³க³லோ ஸம்மத்தனியாமம் ஓக்கமேய்யா’’தி.

அனந்தராபயுத்தகதா² நிட்டி²தா.

13. தேரஸமவக்³கோ³

(129) 4. நியதஸ்ஸ நியாமகதா²

663. நியதோ நியாமம் ஓக்கமதீதி? ஆமந்தா. மிச்ச²த்தனியதோ ஸம்மத்தனியாமம் ஓக்கமதி, ஸம்மத்தனியதோ மிச்ச²த்தனியாமம் ஓக்கமதீதி? ந ஹேவம் வத்தப்³பே³…பே….

நியதோ நியாமம் ஓக்கமதீதி? ஆமந்தா. புப்³பே³ மக்³க³ம் பா⁴வேத்வா பச்சா² நியாமம் ஓக்கமதீதி? ந ஹேவம் வத்தப்³பே³…பே… புப்³பே³ ஸோதாபத்திமக்³க³ம் பா⁴வேத்வா பச்சா² ஸோதாபத்தினியாமம் ஓக்கமதீதி? ந ஹேவம் வத்தப்³பே³…பே… புப்³பே³ ஸகதா³கா³மி…பே… அனாகா³மி…பே… அரஹத்தமக்³க³ம் பா⁴வேத்வா பச்சா² அரஹத்தனியாமம் ஓக்கமதீதி? ந ஹேவம் வத்தப்³பே³…பே….

புப்³பே³ ஸதிபட்டா²னம்…பே… ஸம்மப்பதா⁴னம்… இத்³தி⁴பாத³ம்… இந்த்³ரியம்… ப³லம்… போ³ஜ்ஜ²ங்க³ம் பா⁴வேத்வா பச்சா² நியாமம் ஓக்கமதீதி? ந ஹேவம் வத்தப்³பே³…பே….

664. ந வத்தப்³ப³ம் – ‘‘நியதோ நியாமம் ஓக்கமதீ’’தி? ஆமந்தா. ப⁴ப்³போ³ போ³தி⁴ஸத்தோ தாய ஜாதியா த⁴ம்மம் நாபி⁴ஸமேதுந்தி? ந ஹேவம் வத்தப்³பே³. தேன ஹி நியதோ நியாமம் ஓக்கமதீதி.

நியதஸ்ஸ நியாமகதா² நிட்டி²தா.

13. தேரஸமவக்³கோ³

(130) 5. நிவுதகதா²

665. நிவுதோ நீவரணம் ஜஹதீதி? ஆமந்தா. ரத்தோ ராக³ம் ஜஹதி, து³ட்டோ² தோ³ஸம் ஜஹதி, மூள்ஹோ மோஹம் ஜஹதி, கிலிட்டோ² கிலேஸே ஜஹதீதி? ந ஹேவம் வத்தப்³பே³…பே… ராகே³ன ராக³ம் ஜஹதி, தோ³ஸேன தோ³ஸம் ஜஹதி, மோஹேன மோஹம் ஜஹதி, கிலேஸேஹி கிலேஸே ஜஹதீதி? ந ஹேவம் வத்தப்³பே³…பே….

ராகோ³ சித்தஸம்பயுத்தோ, மக்³கோ³ சித்தஸம்பயுத்தோதி? ஆமந்தா. த்³வின்னம் ப²ஸ்ஸானம்…பே… த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே… ராகோ³ அகுஸலோ, மக்³கோ³ குஸலோதி? ஆமந்தா. குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வம் ஆக³ச்ச²ந்தீதி? ந ஹேவம் வத்தப்³பே³…பே….

666. குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வம் ஆக³ச்ச²ந்தீதி? ஆமந்தா. நனு வுத்தம் ப⁴க³வதா – ‘‘சத்தாரிமானி, பி⁴க்க²வே, ஸுவிதூ³ரவிதூ³ரானி! கதமானி சத்தாரி? நப⁴ஞ்ச, பி⁴க்க²வே, பத²வீ ச – இத³ம் பட²மம் ஸுவிதூ³ரவிதூ³ரம்…பே… தஸ்மா ஸதம் த⁴ம்மோ அஸப்³பி⁴ ஆரகா’’தி. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘குஸலாகுஸலா…பே… ஸம்முகீ²பா⁴வம் ஆக³ச்ச²ந்தீ’’தி.

நிவுதோ நீவரணம் ஜஹதீதி? ஆமந்தா. நனு வுத்தம் ப⁴க³வதா – ‘‘ஸோ ஏவம் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஆஸவானம் க²யஞாணாய சித்தம் அபி⁴னின்னாமேதீ’’தி! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘நிவுதோ நீவரணம் ஜஹதீ’’தி…பே….

667. ந வத்தப்³ப³ம் – ‘‘நிவுதோ நீவரணம் ஜஹதீ’’தி? ஆமந்தா. நனு வுத்தம் ப⁴க³வதா – ‘‘தஸ்ஸ ஏவம் ஜானதோ ஏவம் பஸ்ஸதோ காமாஸவாபி சித்தம் விமுச்சதி…பே… அவிஜ்ஜாஸவாபி சித்தம் விமுச்சதீ’’தி! அத்தே²வ ஸுத்தந்தோதி? ஆமந்தா. தேன ஹி நிவுதோ நீவரணம் ஜஹதீதி.

நிவுதகதா² நிட்டி²தா.

13. தேரஸமவக்³கோ³

(131) 6. ஸம்முகீ²பூ⁴தகதா²

668. ஸம்முகீ²பூ⁴தோ ஸம்யோஜனம் ஜஹதீதி? ஆமந்தா. ரத்தோ ராக³ம் ஜஹதி, து³ட்டோ² தோ³ஸம் ஜஹதி, மூள்ஹோ மோஹம் ஜஹதி, கிலிட்டோ² கிலேஸே ஜஹதீதி? ந ஹேவம் வத்தப்³பே³…பே… ராகே³ன ராக³ம் ஜஹதி, தோ³ஸேன தோ³ஸம் ஜஹதி, மோஹேன மோஹம் ஜஹதி, கிலேஸேஹி கிலேஸே ஜஹதீதி? ந ஹேவம் வத்தப்³பே³…பே….

ராகோ³ சித்தஸம்பயுத்தோ, மக்³கோ³ சித்தஸம்பயுத்தோதி? ஆமந்தா. த்³வின்னம் ப²ஸ்ஸானம்…பே… த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே… ராகோ³ அகுஸலோ, மக்³கோ³ குஸலோதி? ஆமந்தா. குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வம் ஆக³ச்ச²ந்தீதி? ந ஹேவம் வத்தப்³பே³…பே….

669. குஸலாகுஸலா…பே… ஸம்முகீ²பா⁴வம் ஆக³ச்ச²ந்தீதி? ஆமந்தா. நனு வுத்தம் ப⁴க³வதா – ‘‘சத்தாரிமானி, பி⁴க்க²வே, ஸுவிதூ³ரவிதூ³ரானி! கதமானி சத்தாரி? நப⁴ஞ்ச, பி⁴க்க²வே, பத²வீ ச – இத³ம் பட²மம் ஸுவிதூ³ரவிதூ³ரம்…பே… தஸ்மா ஸதம் த⁴ம்மோ அஸப்³பி⁴ ஆரகா’’தி. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘குஸலாகுஸலா…பே… ஸம்முகீ²பா⁴வம் ஆக³ச்ச²ந்தீ’’தி.

ஸம்முகீ²பூ⁴தோ ஸம்யோஜனம் ஜஹதீதி? ஆமந்தா. நனு வுத்தம் ப⁴க³வதா – ‘‘ஸோ ஏவம் ஸமாஹிதே சித்தே…பே… ஆஸவானம் க²யஞாணாய சித்தம் அபி⁴னின்னாமேதீ’’தி! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘ஸம்முகீ²பூ⁴தோ ஸம்யோஜனம் ஜஹதீ’’தி.

670. ந வத்தப்³ப³ம் – ‘‘ஸம்முகீ²பூ⁴தோ ஸம்யோஜனம் ஜஹதீ’’தி? ஆமந்தா. நனு வுத்தம் ப⁴க³வதா – ‘‘தஸ்ஸ ஏவம் ஜானதோ ஏவம் பஸ்ஸதோ காமாஸவாபி சித்தம் விமுச்சதி…பே… அவிஜ்ஜாஸவாபி சித்தம் விமுச்சதீ’’தி! அத்தே²வ ஸுத்தந்தோதி? ஆமந்தா. தேன ஹி ஸம்முகீ²பூ⁴தோ ஸம்யோஜனம் ஜஹதீதி.

ஸம்முகீ²பூ⁴தகதா² நிட்டி²தா.

13. தேரஸமவக்³கோ³

(132) 7. ஸமாபன்னோ அஸ்ஸாதே³திகதா²

671. ஸமாபன்னோ அஸ்ஸாதே³தி, ஜா²னனிகந்தி ஜா²னாரம்மணாதி? ஆமந்தா. தம் ஜா²னம் தஸ்ஸ ஜா²னஸ்ஸ ஆரம்மணந்தி? ந ஹேவம் வத்தப்³பே³…பே… தம் ஜா²னம் தஸ்ஸ ஜா²னஸ்ஸ ஆரம்மணந்தி? ஆமந்தா. தேன ப²ஸ்ஸேன தம் ப²ஸ்ஸம் பு²ஸதி, தாய வேத³னாய தம் வேத³னம் வேதே³தி, தாய ஸஞ்ஞாய தம் ஸஞ்ஞம் ஸஞ்ஜானாதி, தாய சேதனாய தம் சேதனம் சேதேதி, தேன சித்தேன தம் சித்தம் சிந்தேதி, தேன விதக்கேன தம் விதக்கம் விதக்கேதி, தேன விசாரேன தம் விசாரம் விசாரேதி, தாய பீதியா தம் பீதி பியாயதி, தாய ஸதியா தம் ஸதிம் ஸரதி, தாய பஞ்ஞாய தம் பஞ்ஞம் பஜானாதீதி? ந ஹேவம் வத்தப்³பே³…பே….

ஜா²னனிகந்தி சித்தஸம்பயுத்தா, ஜா²னம் சித்தஸம்பயுத்தந்தி? ஆமந்தா. த்³வின்னம் ப²ஸ்ஸானம்…பே… த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே….

ஜா²னனிகந்தி அகுஸலம், ஜா²னம் குஸலந்தி? ஆமந்தா. குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வம் ஆக³ச்ச²ந்தீதி? ந ஹேவம் வத்தப்³பே³…பே….

672. குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வம் ஆக³ச்ச²ந்தீதி? ஆமந்தா. நனு வுத்தம் ப⁴க³வதா – ‘‘சத்தாரிமானி, பி⁴க்க²வே, ஸுவிதூ³ரவிதூ³ரானி! கதமானி சத்தாரி? நப⁴ஞ்ச, பி⁴க்க²வே, பத²வீ ச – இத³ம் பட²மம் ஸுவிதூ³ரவிதூ³ரம்…பே… தஸ்மா ஸதம் த⁴ம்மோ அஸப்³பி⁴ ஆரகா’’தி. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வம் ஆக³ச்ச²ந்தீ’’தி.

673. ந வத்தப்³ப³ம் – ‘‘ஸமாபன்னோ அஸ்ஸாதே³தி, ஜா²னனிகந்தி ஜா²னாரம்மணா’’தி? ஆமந்தா. நனு வுத்தம் ப⁴க³வதா – ‘‘இத⁴, பி⁴க்க²வே, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி பட²மம் ஜா²னம் உபஸம்பஜ்ஜ விஹரதி, ஸோ தம் அஸ்ஸாதே³தி தம் நிகாமேதி தேன ச வித்திம் ஆபஜ்ஜதி; விதக்கவிசாரானம் வூபஸமா…பே… து³தியம் ஜா²னம்…பே… ததியம் ஜா²னம்…பே… சதுத்த²ம் ஜா²னம் உபஸம்பஜ்ஜ விஹரதி, ஸோ தம் அஸ்ஸாதே³தி தம் நிகாமேதி தேன ச வித்திம் ஆபஜ்ஜதீ’’தி [அ. நி. 4.123]! அத்தே²வ ஸுத்தந்தோதி? ஆமந்தா. தேன ஹி ஸமாபன்னோ அஸ்ஸாதே³தி, ஜா²னனிகந்தி ஜா²னாரம்மணாதி.

ஸமாபன்னோ அஸ்ஸாதே³திகதா² நிட்டி²தா.

13. தேரஸமவக்³கோ³

(133) 8. அஸாதராக³கதா²

674. அத்தி² அஸாதராகோ³தி? ஆமந்தா. து³க்கா²பி⁴னந்தி³னோ ஸத்தா, அத்தி² கேசி து³க்க²ம் பத்தே²ந்தி பிஹேந்தி ஏஸந்தி க³வேஸந்தி பரியேஸந்தி, து³க்க²ம் அஜ்ஜோ²ஸாய திட்ட²ந்தீதி? ந ஹேவம் வத்தப்³பே³…பே… நனு ஸுகா²பி⁴னந்தி³னோ ஸத்தா, அத்தி² கேசி ஸுக²ம் பத்தே²ந்தி பிஹேந்தி ஏஸந்தி க³வேஸந்தி பரியேஸந்தி, ஸுக²ம் அஜ்ஜோ²ஸாய திட்ட²ந்தீதி? ஆமந்தா. ஹஞ்சி ஸுகா²பி⁴னந்தி³னோ ஸத்தா, அத்தி² கேசி ஸுக²ம் பத்தே²ந்தி பிஹேந்தி ஏஸந்தி க³வேஸந்தி பரியேஸந்தி, ஸுக²ம் அஜ்ஜோ²ஸாய திட்ட²ந்தி, நோ ச வத ரே வத்தப்³பே³ – ‘‘அத்தி² அஸாதராகோ³’’தி.

அத்தி² அஸாதராகோ³தி? ஆமந்தா. து³க்கா²ய வேத³னாய ராகா³னுஸயோ அனுஸேதி, ஸுகா²ய வேத³னாய படிகா⁴னுஸயோ அனுஸேதீதி? ந ஹேவம் வத்தப்³பே³…பே… நனு ஸுகா²ய வேத³னாய ராகா³னுஸயோ அனுஸேதி, து³க்கா²ய வேத³னாய படிகா⁴னுஸயோ அனுஸேதீதி? ஆமந்தா. ஹஞ்சி ஸுகா²ய வேத³னாய ராகா³னுஸயோ அனுஸேதி, து³க்கா²ய வேத³னாய படிகா⁴னுஸயோ அனுஸேதி, நோ ச வத ரே வத்தப்³பே³ – ‘‘அத்தி² அஸாதராகோ³’’தி.

675. ந வத்தப்³ப³ம் – ‘‘அத்தி² அஸாதராகோ³’’தி? ஆமந்தா. நனு வுத்தம் ப⁴க³வதா – ‘‘ஸோ ஏவம் அனுரோத⁴விரோத⁴ம் ஸமாபன்னோ யம் கிஞ்சி வேத³னம் வேத³யதி ஸுக²ம் வா து³க்க²ம் வா அது³க்க²மஸுக²ம் வா, ஸோ தம் வேத³னம் அபி⁴னந்த³தி அபி⁴வத³தி அஜ்ஜோ²ஸாய திட்ட²தீ’’தி [ம. நி. 3.409 மஹாதண்ஹாஸங்க²யே]! அத்தே²வ ஸுத்தந்தோதி? ஆமந்தா. தேன ஹி அத்தி² அஸாதராகோ³தி.

அஸாதராக³கதா² நிட்டி²தா.

13. தேரஸமவக்³கோ³

(134) 9. த⁴ம்மதண்ஹா அப்³யாகதாதிகதா²

676. த⁴ம்மதண்ஹா அப்³யாகதாதி? ஆமந்தா. விபாகாப்³யாகதா கிரியாப்³யாகதா ரூபம் நிப்³பா³னம் சக்கா²யதனம்…பே… போ²ட்ட²ப்³பா³யதனந்தி? ந ஹேவம் வத்தப்³பே³…பே….

த⁴ம்மதண்ஹா அப்³யாகதாதி? ஆமந்தா. ரூபதண்ஹா அப்³யாகதாதி? ந ஹேவம் வத்தப்³பே³ …பே… த⁴ம்மதண்ஹா அப்³யாகதாதி? ஆமந்தா. ஸத்³த³தண்ஹா…பே… க³ந்த⁴தண்ஹா…பே… ரஸதண்ஹா…பே… போ²ட்ட²ப்³ப³தண்ஹா அப்³யாகதாதி? ந ஹேவம் வத்தப்³பே³…பே….

ரூபதண்ஹா அகுஸலாதி? ஆமந்தா. த⁴ம்மதண்ஹா அகுஸலாதி? ந ஹேவம் வத்தப்³பே³…பே… ஸத்³த³தண்ஹா…பே… போ²ட்ட²ப்³ப³தண்ஹா அகுஸலாதி? ஆமந்தா. த⁴ம்மதண்ஹா அகுஸலாதி? ந ஹேவம் வத்தப்³பே³…பே….

677. த⁴ம்மதண்ஹா அப்³யாகதாதி? ஆமந்தா. நனு தண்ஹா அகுஸலா வுத்தா ப⁴க³வதாதி? ஆமந்தா. ஹஞ்சி தண்ஹா அகுஸலா வுத்தா ப⁴க³வதா, நோ ச வத ரே வத்தப்³பே³ – ‘‘த⁴ம்மதண்ஹா அப்³யாகதா’’தி.

த⁴ம்மதண்ஹா அப்³யாகதாதி? ஆமந்தா. நனு லோபோ⁴ அகுஸலோ வுத்தோ ப⁴க³வதா, த⁴ம்மதண்ஹா லோபோ⁴தி? ஆமந்தா. ஹஞ்சி லோபோ⁴ அகுஸலோ வுத்தோ ப⁴க³வதா, த⁴ம்மதண்ஹா லோபோ⁴, நோ ச வத ரே வத்தப்³பே³ – ‘‘த⁴ம்மதண்ஹா அப்³யாகதா’’தி.

678. த⁴ம்மதண்ஹா லோபோ⁴ அப்³யாகதோதி? ஆமந்தா. ரூபதண்ஹா லோபோ⁴ அப்³யாகதோதி? ந ஹேவம் வத்தப்³பே³…பே… த⁴ம்மதண்ஹா லோபோ⁴ அப்³யாகதோதி? ஆமந்தா. ஸத்³த³தண்ஹா…பே… போ²ட்ட²ப்³ப³தண்ஹா லோபோ⁴ அப்³யாகதோதி? ந ஹேவம் வத்தப்³பே³…பே….

ரூபதண்ஹா லோபோ⁴ அகுஸலோதி? ஆமந்தா. த⁴ம்மதண்ஹா லோபோ⁴ அகுஸலோதி? ந ஹேவம் வத்தப்³பே³…பே… ஸத்³த³தண்ஹா…பே… போ²ட்ட²ப்³ப³தண்ஹா லோபோ⁴ அகுஸலோதி? ஆமந்தா. த⁴ம்மதண்ஹா லோபோ⁴ அகுஸலோதி? ந ஹேவம் வத்தப்³பே³…பே….

679. த⁴ம்மதண்ஹா அப்³யாகதாதி? ஆமந்தா. நனு வுத்தம் ப⁴க³வதா – ‘‘யாயம் தண்ஹா போனோப்³ப⁴விகா நந்தீ³ராக³ஸஹக³தா தத்ரதத்ராபி⁴னந்தி³னீ, ஸேய்யதி²த³ம் – காமதண்ஹா, ப⁴வதண்ஹா, விப⁴வதண்ஹா’’தி [மஹாவ. 14; தீ³. நி. 2.400]! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘த⁴ம்மதண்ஹா அப்³யாகதா’’தி.

680. ந வத்தப்³ப³ம் – ‘‘த⁴ம்மதண்ஹா அப்³யாகதா’’தி? ஆமந்தா. நனு ஸா த⁴ம்மதண்ஹாதி? ஆமந்தா. ஹஞ்சி ஸா த⁴ம்மதண்ஹா, தேன வத ரே வத்தப்³பே³ – ‘‘த⁴ம்மதண்ஹா அப்³யாகதா’’தி.

த⁴ம்மதண்ஹா அப்³யாகதாதிகதா² நிட்டி²தா.

13. தேரஸமவக்³கோ³

(135) 10. த⁴ம்மதண்ஹா ந து³க்க²ஸமுத³யோதிகதா²

681. த⁴ம்மதண்ஹா ந து³க்க²ஸமுத³யோதி? ஆமந்தா. ரூபதண்ஹா ந து³க்க²ஸமுத³யோதி? ந ஹேவம் வத்தப்³பே³…பே… த⁴ம்மதண்ஹா ந து³க்க²ஸமுத³யோதி? ஆமந்தா. ஸத்³த³தண்ஹா…பே… க³ந்த⁴தண்ஹா…பே… ரஸதண்ஹா…பே… போ²ட்ட²ப்³ப³தண்ஹா ந து³க்க²ஸமுத³யோதி? ந ஹேவம் வத்தப்³பே³…பே….

ரூபதண்ஹா து³க்க²ஸமுத³யோதி? ஆமந்தா. த⁴ம்மதண்ஹா து³க்க²ஸமுத³யோதி? ந ஹேவம் வத்தப்³பே³…பே… ஸத்³த³தண்ஹா…பே… க³ந்த⁴தண்ஹா…பே… ரஸதண்ஹா…பே… போ²ட்ட²ப்³ப³தண்ஹா து³க்க²ஸமுத³யோதி? ஆமந்தா. த⁴ம்மதண்ஹா து³க்க²ஸமுத³யோதி? ந ஹேவம் வத்தப்³பே³…பே….

682. த⁴ம்மதண்ஹா ந து³க்க²ஸமுத³யோதி? ஆமந்தா. நனு தண்ஹா து³க்க²ஸமுத³யோ வுத்தோ ப⁴க³வதாதி? ஆமந்தா. ஹஞ்சி தண்ஹா து³க்க²ஸமுத³யோ வுத்தோ ப⁴க³வதா, நோ ச வத ரே வத்தப்³பே³ – ‘‘த⁴ம்மதண்ஹா ந து³க்க²ஸமுத³யோ’’தி. த⁴ம்மதண்ஹா ந து³க்க²ஸமுத³யோதி? ஆமந்தா. நனு லோபோ⁴ து³க்க²ஸமுத³யோ வுத்தோ ப⁴க³வதா, த⁴ம்மதண்ஹா லோபோ⁴தி? ஆமந்தா. ஹஞ்சி லோபோ⁴ து³க்க²ஸமுத³யோ வுத்தோ ப⁴க³வதா, த⁴ம்மதண்ஹா லோபோ⁴, நோ ச வத ரே வத்தப்³பே³ – ‘‘த⁴ம்மதண்ஹா ந து³க்க²ஸமுத³யோ’’தி.

683. த⁴ம்மதண்ஹா லோபோ⁴, ந து³க்க²ஸமுத³யோதி? ஆமந்தா. ரூபதண்ஹா லோபோ⁴, ந து³க்க²ஸமுத³யோதி? ந ஹேவம் வத்தப்³பே³…பே… த⁴ம்மதண்ஹா லோபோ⁴, ந து³க்க²ஸமுத³யோதி? ஆமந்தா. ஸத்³த³தண்ஹா…பே… க³ந்த⁴தண்ஹா…பே… ரஸதண்ஹா…பே… போ²ட்ட²ப்³ப³தண்ஹா லோபோ⁴, ந து³க்க²ஸமுத³யோதி? ந ஹேவம் வத்தப்³பே³…பே….

ரூபதண்ஹா லோபோ⁴ து³க்க²ஸமுத³யோதி? ஆமந்தா. த⁴ம்மதண்ஹா லோபோ⁴ து³க்க²ஸமுத³யோதி? ந ஹேவம் வத்தப்³பே³…பே… ஸத்³த³தண்ஹா…பே… போ²ட்ட²ப்³ப³தண்ஹா லோபோ⁴ து³க்க²ஸமுத³யோதி? ஆமந்தா. த⁴ம்மதண்ஹா லோபோ⁴ து³க்க²ஸமுத³யோதி? ந ஹேவம் வத்தப்³பே³…பே….

684. த⁴ம்மதண்ஹா ந து³க்க²ஸமுத³யோதி? ஆமந்தா. நனு வுத்தம் ப⁴க³வதா – ‘‘யாயம் தண்ஹா போனோப்³ப⁴விகா நந்தீ³ராக³ஸஹக³தா தத்ரதத்ராபி⁴னந்தி³னீ, ஸேய்யதி²த³ம் – காமதண்ஹா, ப⁴வதண்ஹா, விப⁴வதண்ஹா’’தி! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘த⁴ம்மதண்ஹா ந து³க்க²ஸமுத³யோ’’தி.

685. ந வத்தப்³ப³ம் – ‘‘த⁴ம்மதண்ஹா ந து³க்க²ஸமுத³யோ’’தி? ஆமந்தா. நனு ஸா த⁴ம்மதண்ஹாதி? ஆமந்தா. ஹஞ்சி ஸா த⁴ம்மதண்ஹா, தேன வத ரே வத்தப்³பே³ – ‘‘த⁴ம்மதண்ஹா ந து³க்க²ஸமுத³யோ’’தி.

த⁴ம்மதண்ஹா ந து³க்க²ஸமுத³யோதிகதா² நிட்டி²தா.

தேரஸமவக்³கோ³.

தஸ்ஸுத்³தா³னம் –

கப்பட்டோ² கப்பம் திட்டே²ய்ய, கப்பட்டோ² குஸலம் சித்தம் ந படிலபே⁴ய்ய, அனந்தராபயுத்தோ புக்³க³லோ ஸம்மத்தனியாமம் ஓக்கமேய்ய, நியதோ நியாமம் ஓக்கமதி, நிவுதோ நீவரணம் ஜஹதி, ஸம்முகீ²பூ⁴தோ ஸம்யோஜனம் ஜஹதி, ஜா²னனிகந்தி, அஸாதராகோ³, த⁴ம்மதண்ஹா அப்³யாகதா, த⁴ம்மதண்ஹா ந து³க்க²ஸமுத³யோதி.