3. ஸுத்தஸாத⁴னபரிஹானி

265. பரிஹாயதி அரஹா அரஹத்தாதி? ஆமந்தா. நனு வுத்தம் ப⁴க³வதா –

‘‘உச்சாவசா ஹி படிபதா³ [படிபாதா³ (அட்ட².)], ஸமணேன பகாஸிதா;

ந பாரம் தி³கு³ணம் யந்தி, நயித³ம் ஏககு³ணம் முத’’ந்தி [ஸு. நி. 719 ஸுத்தனிபாதே].

அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘பரிஹாயதி அரஹா அரஹத்தா’’தி.

பரிஹாயதி அரஹா அரஹத்தாதி? ஆமந்தா. அத்தி² சி²ன்னஸ்ஸ சே²தி³யந்தி? ந ஹேவம் வத்தப்³பே³.

அத்தி² சி²ன்னஸ்ஸ சே²தி³யந்தி? ஆமந்தா. நனு வுத்தம் ப⁴க³வதா –

‘‘வீததண்ஹோ அனாதா³னோ, கிச்சம் யஸ்ஸ ந விஜ்ஜதி;

சி²ன்னஸ்ஸ சே²தி³யம் நத்தி², ஓக⁴பாஸோ ஸமூஹதோ’’தி.

அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அத்தி² சி²ன்னஸ்ஸ சே²தி³ய’’ந்தி.

266. பரிஹாயதி அரஹா அரஹத்தாதி? ஆமந்தா. அத்தி² கதஸ்ஸ பதிசயோதி? ந ஹேவம் வத்தப்³பே³.

அத்தி² கதஸ்ஸ பதிசயோதி? ஆமந்தா. நனு வுத்தம் ப⁴க³வதா –

‘‘தஸ்ஸ ஸம்மா விமுத்தஸ்ஸ, ஸந்தசித்தஸ்ஸ பி⁴க்கு²னோ;

கதஸ்ஸ பதிசயோ நத்தி², கரணீயம் ந விஜ்ஜதி.

‘‘ஸேலோ யதா² ஏகக்³க⁴னோ, வாதேன ந ஸமீரதி;

ஏவம் ரூபா ரஸா ஸத்³தா³, க³ந்தா⁴ ப²ஸ்ஸா ச கேவலா.

‘‘இட்டா² த⁴ம்மா அனிட்டா² ச, நப்பவேதே⁴ந்தி தாதி³னோ;

டி²தம் சித்தம் விப்பமுத்தம், வயம் சஸ்ஸானுபஸ்ஸதீ’’தி [மஹாவ. 244; அ. நி. 6.55].

அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அத்தி² கதஸ்ஸ பதிசயோ’’தி.

267. ந வத்தப்³ப³ம் – ‘‘பரிஹாயதி அரஹா அரஹத்தா’’தி? ஆமந்தா. நனு வுத்தம் ப⁴க³வதா – ‘‘பஞ்சிமே, பி⁴க்க²வே, த⁴ம்மா ஸமயவிமுத்தஸ்ஸ பி⁴க்கு²னோ பரிஹானாய ஸம்வத்தந்தி. கதமே பஞ்ச? கம்மாராமதா, ப⁴ஸ்ஸாராமதா, நித்³தா³ராமதா, ஸங்க³ணிகாராமதா, யதா²விமுத்தம் சித்தம் ந பச்சவேக்க²தி. இமே கோ², பி⁴க்க²வே, பஞ்ச த⁴ம்மா ஸமயவிமுத்தஸ்ஸ பி⁴க்கு²னோ பரிஹானாய ஸம்வத்தந்தீ’’தி [அ. நி. 5.149]. அத்தே²வ ஸுத்தந்தோதி? ஆமந்தா. தேன ஹி பரிஹாயதி அரஹா அரஹத்தாதி.

அத்தி² அரஹதோ கம்மாராமதாதி? ந ஹேவம் வத்தப்³பே³.

அத்தி² அரஹதோ கம்மாராமதாதி? ஆமந்தா. அத்தி² அரஹதோ ராகோ³ காமராகோ³ காமராக³பரியுட்டா²னம் காமராக³ஸம்யோஜனம் காமோகோ⁴ காமயோகோ³ காமச்ச²ந்த³னீவரணந்தி? ந ஹேவம் வத்தப்³பே³.

அத்தி² அரஹதோ ப⁴ஸ்ஸாராமதா, அத்தி² அரஹதோ நித்³தா³ராமதா, அத்தி² அரஹதோ ஸங்க³ணிகாராமதாதி? ந ஹேவம் வத்தப்³பே³.

அத்தி² அரஹதோ ஸங்க³ணிகாராமதாதி? ஆமந்தா. அத்தி² அரஹதோ ராகோ³ காமராகோ³ காமராக³பரியுட்டா²னம் காமராக³ஸம்யோஜனம் காமோகோ⁴ காமயோகோ³ காமச்ச²ந்த³னீவரணந்தி? ந ஹேவம் வத்தப்³பே³.

268. பரிஹாயதி அரஹா அரஹத்தாதி? ஆமந்தா. அரஹா அரஹத்தா பரிஹாயமானோ கிம் பரியுட்டி²தோ பரிஹாயதீதி? ராக³பரியுட்டி²தோ பரிஹாயதீதி. பரியுட்டா²னம் கிம் படிச்ச உப்பஜ்ஜதீதி? அனுஸயம் படிச்ச உப்பஜ்ஜதீதி. அத்தி² அரஹதோ அனுஸயாதி? ந ஹேவம் வத்தப்³பே³.

அத்தி² அரஹதோ அனுஸயாதி? ஆமந்தா. அத்தி² அரஹதோ காமராகா³னுஸயோ படிகா⁴னுஸயோ மானானுஸயோ தி³ட்டா²னுஸயோ விசிகிச்சா²னுஸயோ ப⁴வராகா³னுஸயோ அவிஜ்ஜானுஸயோதி? ந ஹேவம் வத்தப்³பே³.

தோ³ஸபரியுட்டி²தோ பரிஹாயதீதி…பே… மோஹபரியுட்டி²தோ பரிஹாயதீதி…. பரியுட்டா²னம் கிம் படிச்ச உப்பஜ்ஜதீதி? அனுஸயம் படிச்ச உப்பஜ்ஜதீதி. அத்தி² அரஹதோ அனுஸயாதி? ந ஹேவம் வத்தப்³பே³…பே….

அத்தி² அரஹதோ அனுஸயாதி? ஆமந்தா. அத்தி² அரஹதோ காமராகா³னுஸயோ…பே… அவிஜ்ஜானுஸயோதி? ந ஹேவம் வத்தப்³பே³.

பரிஹாயதி அரஹா அரஹத்தாதி? ஆமந்தா. அரஹதோ அரஹத்தா பரிஹாயமானஸ்ஸ கிம் உபசயம் க³ச்ச²தீதி? ராகோ³ உபசயம் க³ச்ச²தீதி. ஸக்காயதி³ட்டி² உபசயம் க³ச்ச²தீதி, விசிகிச்சா² உபசயம் க³ச்ச²தீதி, ஸீலப்³ப³தபராமாஸோ உபசயம் க³ச்ச²தீதி? ந ஹேவம் வத்தப்³பே³. தோ³ஸோ உபசயம் க³ச்ச²தீதி…பே… மோஹோ உபசயம் க³ச்ச²தீதி, ஸக்காயதி³ட்டி² உபசயம் க³ச்ச²தீதி, விசிகிச்சா² உபசயம் க³ச்ச²தீதி, ஸீலப்³ப³தபராமாஸோ உபசயம் க³ச்ச²தீதி? ந ஹேவம் வத்தப்³பே³.

பரிஹாயதி அரஹா அரஹத்தாதி? ஆமந்தா. அரஹா ஆசினதீதி? ந ஹேவம் வத்தப்³பே³. அரஹா அபசினதீதி? ந ஹேவம் வத்தப்³பே³. அரஹா பஜஹதீதி? ந ஹேவம் வத்தப்³பே³. அரஹா உபாதி³யதீதி? ந ஹேவம் வத்தப்³பே³. அரஹா விஸினேதீதி? ந ஹேவம் வத்தப்³பே³. அரஹா உஸ்ஸினேதீதி? ந ஹேவம் வத்தப்³பே³. அரஹா விதூ⁴பேதீதி? ந ஹேவம் வத்தப்³பே³. அரஹா ஸந்தூ⁴பேதீதி? ந ஹேவம் வத்தப்³பே³.

நனு அரஹா நேவாசினதி ந அபசினதி அபசினித்வா டி²தோதி? ஆமந்தா. ஹஞ்சி அரஹா நேவாசினதி ந அபசினதி அபசினித்வா டி²தோ, நோ ச வத ரே வத்தப்³பே³ – ‘‘பரிஹாயதி அரஹா அரஹத்தா’’தி.

நனு அரஹா நேவ பஜஹதி ந உபாதி³யதி பஜஹித்வா டி²தோதி? ஆமந்தா. ஹஞ்சி அரஹா நேவ பஜஹதி ந உபாதி³யதி பஜஹித்வா டி²தோ, நோ ச வத ரே வத்தப்³பே³ – ‘‘பரிஹாயதி அரஹா அரஹத்தா’’தி.

நனு அரஹா நேவ விஸினேதி ந உஸ்ஸினேதி விஸினித்வா டி²தோதி? ஆமந்தா. ஹஞ்சி அரஹா நேவ விஸினேதி ந உஸ்ஸினேதி விஸினித்வா டி²தோ, நோ ச வத ரே வத்தப்³பே³ – ‘‘பரிஹாயதி அரஹா அரஹத்தா’’தி.

நனு அரஹா நேவ விதூ⁴பேதி ந ஸந்தூ⁴பேதி விதூ⁴பேத்வா டி²தோதி? ஆமந்தா. ஹஞ்சி அரஹா நேவ விதூ⁴பேதி ந ஸந்தூ⁴பேதி விதூ⁴பேத்வா டி²தோ, நோ ச வத ரே வத்தப்³பே³ – ‘‘பரிஹாயதி அரஹா அரஹத்தா’’தி.

பரிஹானிகதா² நிட்டி²தா.