1. வாத³யுத்திபரிஹானி

239. பரிஹாயதி அரஹா அரஹத்தாதி? ஆமந்தா. ஸப்³ப³த்த² அரஹா அரஹத்தா பரிஹாயதீதி? ந ஹேவம் வத்தப்³பே³…பே… ஸப்³ப³த்த² அரஹா அரஹத்தா பரிஹாயதீதி? ஆமந்தா. ஸப்³ப³த்த² அரஹதோ பரிஹானீதி? ந ஹேவம் வத்தப்³பே³…பே….

பரிஹாயதி அரஹா அரஹத்தாதி? ஆமந்தா. ஸப்³ப³தா³ அரஹா அரஹத்தா பரிஹாயதீதி? ந ஹேவம் வத்தப்³பே³…பே… ஸப்³ப³தா³ அரஹா அரஹத்தா பரிஹாயதீதி? ஆமந்தா. ஸப்³ப³தா³ அரஹதோ பரிஹானீதி? ந ஹேவம் வத்தப்³பே³…பே….

பரிஹாயதி அரஹா அரஹத்தாதி? ஆமந்தா. ஸப்³பே³வ அரஹந்தோ அரஹத்தா பரிஹாயந்தீதி? ந ஹேவம் வத்தப்³பே³…பே… ஸப்³பே³வ அரஹந்தோ அரஹத்தா பரிஹாயந்தீதி? ஆமந்தா. ஸப்³பே³ஸம்யேவ அரஹந்தானம் பரிஹானீதி? ந ஹேவம் வத்தப்³பே³…பே….

பரிஹாயதி அரஹா அரஹத்தாதி? ஆமந்தா. அரஹா அரஹத்தா பரிஹாயமானோ சதூஹி ப²லேஹி பரிஹாயதீதி? ந ஹேவம் வத்தப்³பே³…பே….

சதூஹி ஸதஸஹஸ்ஸேஹி ஸேட்டீ² ஸேட்டி²த்தம் காரேந்தோ ஸதஸஹஸ்ஸே பரிஹீனே ஸேட்டி²த்தா பரிஹீனோ ஹோதீதி? ஆமந்தா. ஸப்³ப³ஸாபதேய்யா பரிஹீனோ ஹோதீதி? ந ஹேவம் வத்தப்³பே³…பே….

சதூஹி ஸதஸஹஸ்ஸேஹி ஸேட்டீ² ஸேட்டி²த்தம் காரேந்தோ ஸதஸஹஸ்ஸே பரிஹீனே ப⁴ப்³போ³ ஸப்³ப³ஸாபதேய்யா பரிஹாயிதுந்தி? ஆமந்தா. அரஹா அரஹத்தா பரிஹாயமானோ ப⁴ப்³போ³ சதூஹி ப²லேஹி பரிஹாயிதுந்தி? ந ஹேவம் வத்தப்³பே³…பே….