10. த³ஸமவக்³கோ³

(95) 1. நிரோத⁴கதா²

571. உபபத்தேஸியே பஞ்சக்க²ந்தே⁴ அனிருத்³தே⁴ கிரியா பஞ்சக்க²ந்தா⁴ உப்பஜ்ஜந்தீதி? ஆமந்தா. த³ஸன்னம் க²ந்தா⁴னம் ஸமோதா⁴னம் ஹோதி, த³ஸ க²ந்தா⁴ ஸம்முகீ²பா⁴வம் ஆக³ச்ச²ந்தீதி? ந ஹேவம் வத்தப்³பே³…பே… த³ஸன்னம் க²ந்தா⁴னம் ஸமோதா⁴னம் ஹோதி, த³ஸ க²ந்தா⁴ ஸம்முகீ²பா⁴வம் ஆக³ச்ச²ந்தீதி? ஆமந்தா. த்³வின்னம் ப²ஸ்ஸானம்…பே… த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே….

உபபத்தேஸியே பஞ்சக்க²ந்தே⁴ அனிருத்³தே⁴ கிரியா சத்தாரோ க²ந்தா⁴ உப்பஜ்ஜந்தீதி? ஆமந்தா. நவன்னம் க²ந்தா⁴னம் ஸமோதா⁴னம் ஹோதி, நவ க²ந்தா⁴ ஸம்முகீ²பா⁴வம் ஆக³ச்ச²ந்தீதி? ந ஹேவம் வத்தப்³பே³…பே… நவன்னம் க²ந்தா⁴னம் ஸமோதா⁴னம் ஹோதி, நவ க²ந்தா⁴ ஸம்முகீ²பா⁴வம் ஆக³ச்ச²ந்தீதி? ஆமந்தா. த்³வின்னம் ப²ஸ்ஸானம்…பே… த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே….

உபபத்தேஸியே பஞ்சக்க²ந்தே⁴ அனிருத்³தே⁴ கிரியாஞாணம் உப்பஜ்ஜதீதி? ஆமந்தா. ச²ன்னம் க²ந்தா⁴னம் ஸமோதா⁴னம் ஹோதி, ச² க²ந்தா⁴ ஸம்முகீ²பா⁴வம் ஆக³ச்ச²ந்தீதி? ந ஹேவம் வத்தப்³பே³…பே… ச²ன்னம் க²ந்தா⁴னம் ஸமோதா⁴னம் ஹோதி, ச² க²ந்தா⁴ ஸம்முகீ²பா⁴வம் ஆக³ச்ச²ந்தீதி? ஆமந்தா. த்³வின்னம் ப²ஸ்ஸானம்…பே… த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே….

572. உபபத்தேஸியே பஞ்சக்க²ந்தே⁴ நிருத்³தே⁴ மக்³கோ³ உப்பஜ்ஜதீதி? ஆமந்தா. மதோ மக்³க³ம் பா⁴வேதி, காலங்கதோ மக்³க³ம் பா⁴வேதீதி? ந ஹேவம் வத்தப்³பே³…பே….

நிரோத⁴கதா² நிட்டி²தா.

10. த³ஸமவக்³கோ³

(96) 2. ரூபம் மக்³கோ³திகதா²

573. மக்³க³ஸமங்கி³ஸ்ஸ ரூபம் மக்³கோ³தி? ஆமந்தா. ஸாரம்மணம், அத்தி² தஸ்ஸ ஆவட்டனா ஆபோ⁴கோ³ ஸமன்னாஹாரோ மனஸிகாரோ சேதனா பத்த²னா பணிதீ⁴தி? ந ஹேவம் வத்தப்³பே³…பே… நனு அனாரம்மணம், நத்தி² தஸ்ஸ ஆவட்டனா…பே… பணிதீ⁴தி? ஆமந்தா. ஹஞ்சி அனாரம்மணம், நத்தி² தஸ்ஸ ஆவட்டனா…பே… பணிதி⁴; நோ ச வத ரே வத்தப்³பே³ – ‘‘மக்³க³ஸமங்கி³ஸ்ஸ ரூபம் மக்³கோ³’’தி.

ஸம்மாவாசா மக்³கோ³தி? ஆமந்தா. ஸாரம்மணா, அத்தி² தாய ஆவட்டனா…பே… பணிதீ⁴தி? ந ஹேவம் வத்தப்³பே³…பே… நனு அனாரம்மணா, நத்தி² தாய ஆவட்டனா…பே… பணிதீ⁴தி? ஆமந்தா. ஹஞ்சி அனாரம்மணா, நத்தி² தாய ஆவட்டனா…பே… பணிதி⁴; நோ ச வத ரே வத்தப்³பே³ – ‘‘ஸம்மாவாசா மக்³கோ³’’தி.

ஸம்மாகம்மந்தோ …பே… ஸம்மாஆஜீவோ மக்³கோ³தி? ஆமந்தா. ஸாரம்மணோ, அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே… நனு அனாரம்மணோ, நத்தி² தஸ்ஸ ஆவட்டனா…பே… பணிதீ⁴தி? ஆமந்தா. ஹஞ்சி அனாரம்மணோ, நத்தி² தஸ்ஸ ஆவட்டனா…பே… பணிதி⁴; நோ ச வத ரே வத்தப்³பே³ – ‘‘ஸம்மாஆஜீவோ மக்³கோ³’’தி.

574. ஸம்மாதி³ட்டி² மக்³கோ³, ஸா ச ஸாரம்மணா, அத்தி² தாய ஆவட்டனா…பே… பணிதீ⁴தி? ஆமந்தா. ஸம்மாவாசா மக்³கோ³, ஸா ச ஸாரம்மணா, அத்தி² தாய ஆவட்டனா…பே… பணிதீ⁴தி? ந ஹேவம் வத்தப்³பே³ …பே… ஸம்மாதி³ட்டி² மக்³கோ³, ஸா ச ஸாரம்மணா, அத்தி² தாய ஆவட்டனா…பே… பணிதீ⁴தி? ஆமந்தா. ஸம்மாகம்மந்தோ…பே… ஸம்மாஆஜீவோ மக்³கோ³, ஸோ ச ஸாரம்மணோ, அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே… ஸம்மாஸங்கப்போ…பே… ஸம்மாவாயாமோ…பே… ஸம்மாஸதி…பே….

ஸம்மாஸமாதி⁴ மக்³கோ³, ஸோ ச ஸாரம்மணோ, அத்தி² தஸ்ஸ ஆவட்டனா…பே… பணிதீ⁴தி? ஆமந்தா. ஸம்மாவாசா மக்³கோ³, ஸா ச ஸாரம்மணா, அத்தி² தாய ஆவட்டனா…பே… பணிதீ⁴தி? ந ஹேவம் வத்தப்³பே³…பே… ஸம்மாஸமாதி⁴ மக்³கோ³, ஸோ ச ஸாரம்மணோ, அத்தி² தஸ்ஸ ஆவட்டனா…பே… பணிதீ⁴தி? ஆமந்தா. ஸம்மாகம்மந்தோ…பே… ஸம்மாஆஜீவோ மக்³கோ³, ஸோ ச ஸாரம்மணோ, அத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே….

ஸம்மாவாசா மக்³கோ³, ஸா ச அனாரம்மணா, நத்தி² தாய ஆவட்டனா…பே… பணிதீ⁴தி? ஆமந்தா. ஸம்மாதி³ட்டி² மக்³கோ³, ஸா ச அனாரம்மணா, நத்தி² தாய ஆவட்டனா…பே… பணிதீ⁴தி? ந ஹேவம் வத்தப்³பே³…பே… ஸம்மாவாசா மக்³கோ³, ஸா ச அனாரம்மணா, நத்தி² தாய ஆவட்டனா…பே… பணிதீ⁴தி? ஆமந்தா. ஸம்மாஸங்கப்போ…பே… ஸம்மாவாயாமோ… ஸம்மாஸதி … ஸம்மாஸமாதி⁴ மக்³கோ³, ஸோ ச அனாரம்மணோ, நத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே….

ஸம்மாகம்மந்தோ …பே… ஸம்மாஆஜீவோ மக்³கோ³, ஸோ ச அனாரம்மணோ, நத்தி² தஸ்ஸ ஆவட்டனா…பே… பணிதீ⁴தி? ஆமந்தா. ஸம்மாதி³ட்டி²… ஸம்மாஸங்கப்போ… ஸம்மாவாயாமோ… ஸம்மாஸதி…பே… ஸம்மாஸமாதி⁴ மக்³கோ³, ஸோ ச அனாரம்மணோ, நத்தி² தஸ்ஸ ஆவட்டனா…பே… பணிதீ⁴தி? ந ஹேவம் வத்தப்³பே³…பே….

575. ந வத்தப்³ப³ம் – ‘‘மக்³க³ஸமங்கி³ஸ்ஸ ரூபம் மக்³கோ³’’தி? ஆமந்தா. நனு ஸம்மாவாசா ஸம்மாகம்மந்தோ ஸம்மாஆஜீவோ மக்³கோ³தி? ஆமந்தா. ஹஞ்சி ஸம்மாவாசா ஸம்மாகம்மந்தோ ஸம்மாஆஜீவோ மக்³கோ³, தேன வத ரே வத்தப்³பே³ – ‘‘மக்³க³ஸமங்கி³ஸ்ஸ ரூபம் மக்³கோ³’’தி.

ரூபம் மக்³கோ³திகதா² நிட்டி²தா.

10. த³ஸமவக்³கோ³

(97) 3. பஞ்சவிஞ்ஞாணஸமங்கி³ஸ்ஸ மக்³க³கதா²

576. பஞ்சவிஞ்ஞாணஸமங்கி³ஸ்ஸ அத்தி² மக்³க³பா⁴வனாதி? ஆமந்தா. நனு பஞ்சவிஞ்ஞாணா உப்பன்னவத்து²கா உப்பன்னாரம்மணாதி? ஆமந்தா. ஹஞ்சி பஞ்சவிஞ்ஞாணா உப்பன்னவத்து²கா உப்பன்னாரம்மணா, நோ ச வத ரே வத்தப்³பே³ – ‘‘பஞ்சவிஞ்ஞாணஸமங்கி³ஸ்ஸ அத்தி² மக்³க³பா⁴வனா’’தி.

நனு பஞ்சவிஞ்ஞாணா புரேஜாதவத்து²கா புரேஜாதாரம்மணா அஜ்ஜ²த்திகவத்து²கா பா³ஹிராரம்மணா அஸம்பி⁴ன்னவத்து²கா அஸம்பி⁴ன்னாரம்மணா நானாவத்து²கா நானாரம்மணா ந அஞ்ஞமஞ்ஞஸ்ஸ கோ³சரவிஸயம் பச்சனுபோ⁴ந்தி, ந அஸமன்னாஹாரா உப்பஜ்ஜந்தி, ந அமனஸிகாரா உப்பஜ்ஜந்தி, ந அப்³போ³கிண்ணா உப்பஜ்ஜந்தி, ந அபுப்³ப³ம் அசரிமம் உப்பஜ்ஜந்தி, ந அஞ்ஞமஞ்ஞஸ்ஸ ஸமனந்தரா உப்பஜ்ஜந்தி, நனு பஞ்சவிஞ்ஞாணா அனாபோ⁴கா³தி? ஆமந்தா. ஹஞ்சி பஞ்சவிஞ்ஞாணா அனாபோ⁴கா³, நோ ச வத ரே வத்தப்³பே³ – ‘‘பஞ்சவிஞ்ஞாணஸமங்கி³ஸ்ஸ அத்தி² மக்³க³பா⁴வனா’’தி.

577. சக்கு²விஞ்ஞாணஸமங்கி³ஸ்ஸ அத்தி² மக்³க³பா⁴வனாதி? ஆமந்தா. சக்கு²விஞ்ஞாணம் ஸுஞ்ஞதம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே… சக்கு²விஞ்ஞாணம் ஸுஞ்ஞதம் ஆரப்³ப⁴ உப்பஜ்ஜதீதி? ஆமந்தா. சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாணந்தி? ந ஹேவம் வத்தப்³பே³…பே… சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாணந்தி? ஆமந்தா. ‘‘சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? நத்தி². ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? ஆமந்தா. ஹஞ்சி ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோ, நோ ச வத ரே வத்தப்³பே³ – ‘‘சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாண’’ந்தி.

578. சக்கு²விஞ்ஞாணஸமங்கி³ஸ்ஸ அத்தி² மக்³க³பா⁴வனாதி? ஆமந்தா. சக்கு²விஞ்ஞாணம் அதீதானாக³தம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே… சக்கு²விஞ்ஞாணஸமங்கி³ஸ்ஸ அத்தி² மக்³க³பா⁴வனாதி? ஆமந்தா. சக்கு²விஞ்ஞாணம் ப²ஸ்ஸம் ஆரப்³ப⁴…பே… வேத³னம் ஆரப்³ப⁴… ஸஞ்ஞம் ஆரப்³ப⁴ … சேதனம் ஆரப்³ப⁴… சித்தம் ஆரப்³ப⁴… சக்கு²ம் ஆரப்³ப⁴… காயம் ஆரப்³ப⁴…பே… ஸத்³த³ம் ஆரப்³ப⁴…பே… போ²ட்ட²ப்³ப³ம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே….

மனோவிஞ்ஞாணஸமங்கி³ஸ்ஸ அத்தி² மக்³க³பா⁴வனா, மனோவிஞ்ஞாணம் ஸுஞ்ஞதம் ஆரப்³ப⁴ உப்பஜ்ஜதீதி? ஆமந்தா. சக்கு²விஞ்ஞாணஸமங்கி³ஸ்ஸ அத்தி² மக்³க³பா⁴வனா, சக்கு²விஞ்ஞாணம் ஸுஞ்ஞதம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே… மனோவிஞ்ஞாணஸமங்கி³ஸ்ஸ அத்தி² மக்³க³பா⁴வனா, மனோவிஞ்ஞாணம் அதீதானாக³தம் ஆரப்³ப⁴ உப்பஜ்ஜதீதி? ஆமந்தா. சக்கு²விஞ்ஞாணஸமங்கி³ஸ்ஸ அத்தி² மக்³க³பா⁴வனா, சக்கு²விஞ்ஞாணம் அதீதானாக³தம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே… மனோவிஞ்ஞாணஸமங்கி³ஸ்ஸ அத்தி² மக்³க³பா⁴வனா, மனோவிஞ்ஞாணம் ப²ஸ்ஸம் ஆரப்³ப⁴… வேத³னம் ஆரப்³ப⁴…பே… போ²ட்ட²ப்³ப³ம் ஆரப்³ப⁴ உப்பஜ்ஜதீதி? ஆமந்தா. சக்கு²விஞ்ஞாணஸமங்கி³ஸ்ஸ அத்தி² மக்³க³பா⁴வனா, சக்கு²விஞ்ஞாணம் ப²ஸ்ஸம் ஆரப்³ப⁴… வேத³னம் ஆரப்³ப⁴…பே… போ²ட்ட²ப்³ப³ம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே….

579. ந வத்தப்³ப³ம் – ‘‘பஞ்சவிஞ்ஞாணஸமங்கி³ஸ்ஸ அத்தி² மக்³க³பா⁴வனா’’தி? ஆமந்தா. நனு வுத்தம் ப⁴க³வதா – ‘‘இத⁴, பி⁴க்க²வே, பி⁴க்கு² சக்கு²னா ரூபம் தி³ஸ்வா ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ…பே… ஸோதேன ஸத்³த³ம் ஸுத்வா…பே… கா⁴னேன க³ந்த⁴ம் கா⁴யித்வா…பே… ஜிவ்ஹாய ரஸம் ஸாயித்வா…பே… காயேன போ²ட்ட²ப்³ப³ம் பு²ஸித்வா ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ’’தி! [ம. நி. 1.349; அ. நி. 4.37] அத்தே²வ ஸுத்தந்தோதி? ஆமந்தா. தேன ஹி பஞ்சவிஞ்ஞாணஸமங்கி³ஸ்ஸ அத்தி² மக்³க³பா⁴வனாதி.

பஞ்சவிஞ்ஞாணஸமங்கி³ஸ்ஸ மக்³க³கதா² நிட்டி²தா.

10. த³ஸமவக்³கோ³

(98) 4. பஞ்சவிஞ்ஞாணா குஸலாபி அகுஸலாபீதிகதா²

580. பஞ்சவிஞ்ஞாணா குஸலாபி அகுஸலாபீதி? ஆமந்தா. நனு பஞ்சவிஞ்ஞாணா உப்பன்னவத்து²கா உப்பன்னாரம்மணாதி? ஆமந்தா. ஹஞ்சி பஞ்சவிஞ்ஞாணா உப்பன்னவத்து²கா உப்பன்னாரம்மணா, நோ ச வத ரே வத்தப்³பே³ – ‘‘பஞ்சவிஞ்ஞாணா குஸலாபி அகுஸலாபீ’’தி. நனு பஞ்சவிஞ்ஞாணா புரேஜாதவத்து²கா புரேஜாதாரம்மணா அஜ்ஜ²த்திகவத்து²கா பா³ஹிராரம்மணா அஸம்பி⁴ன்னவத்து²கா அஸம்பி⁴ன்னாரம்மணா நானாவத்து²கா நானாரம்மணா ந அஞ்ஞமஞ்ஞஸ்ஸ கோ³சரவிஸயம் பச்சனுபோ⁴ந்தி, ந அஸமன்னாஹாரா உப்பஜ்ஜந்தி, ந அமனஸிகாரா உப்பஜ்ஜந்தி, ந அப்³போ³கிண்ணா உப்பஜ்ஜந்தி, ந அபுப்³ப³ம் அசரிமம் உப்பஜ்ஜந்தி, ந அஞ்ஞமஞ்ஞஸ்ஸ ஸமனந்தரா உப்பஜ்ஜந்தி, நனு பஞ்சவிஞ்ஞாணா அனாபோ⁴கா³தி? ஆமந்தா. ஹஞ்சி பஞ்சவிஞ்ஞாணா அனாபோ⁴கா³, நோ ச வத ரே வத்தப்³பே³ – ‘‘பஞ்சவிஞ்ஞாணா குஸலாபி அகுஸலாபீ’’தி.

581. சக்கு²விஞ்ஞாணம் குஸலந்தி? ஆமந்தா. சக்கு²விஞ்ஞாணம் ஸுஞ்ஞதம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே… சக்கு²விஞ்ஞாணம் ஸுஞ்ஞதம் ஆரப்³ப⁴ உப்பஜ்ஜதீதி? ஆமந்தா. சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாணந்தி? ந ஹேவம் வத்தப்³பே³. சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாணந்தி? ஆமந்தா. சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? நத்தி². ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? ஆமந்தா. ஹஞ்சி ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோ, நோ ச வத ரே வத்தப்³பே³ – ‘‘சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாண’’ந்தி.

582. சக்கு²விஞ்ஞாணம் குஸலம்பி அகுஸலம்பீதி? ஆமந்தா. சக்கு²விஞ்ஞாணம் அதீதானாக³தம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே…. சக்கு²விஞ்ஞாணம் குஸலம்பி அகுஸலம்பீதி? ஆமந்தா. சக்கு²விஞ்ஞாணம் ப²ஸ்ஸம் ஆரப்³ப⁴…பே… சித்தம் ஆரப்³ப⁴… சக்கு²ம் ஆரப்³ப⁴…பே… காயம் ஆரப்³ப⁴… ஸத்³த³ம் ஆரப்³ப⁴…பே… போ²ட்ட²ப்³ப³ம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே….

மனோவிஞ்ஞாணம் குஸலம்பி அகுஸலம்பி, மனோவிஞ்ஞாணம் ஸுஞ்ஞதம் ஆரப்³ப⁴ உப்பஜ்ஜதீதி? ஆமந்தா. சக்கு²விஞ்ஞாணம் குஸலம்பி அகுஸலம்பி, சக்கு²விஞ்ஞாணம் ஸுஞ்ஞதம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே… மனோவிஞ்ஞாணம் குஸலம்பி அகுஸலம்பி, மனோவிஞ்ஞாணம் அதீதானாக³தம் ஆரப்³ப⁴ உப்பஜ்ஜதீதி? ஆமந்தா. சக்கு²விஞ்ஞாணம் குஸலம்பி அகுஸலம்பி, சக்கு²விஞ்ஞாணம் அதீதானாக³தம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே… மனோவிஞ்ஞாணம் குஸலம்பி அகுஸலம்பி, மனோவிஞ்ஞாணம் ப²ஸ்ஸம் ஆரப்³ப⁴…பே… சித்தம் ஆரப்³ப⁴…பே… காயம் ஆரப்³ப⁴ … ஸத்³த³ம் ஆரப்³ப⁴ …பே… போ²ட்ட²ப்³ப³ம் ஆரப்³ப⁴ உப்பஜ்ஜதீதி? ஆமந்தா. சக்கு²விஞ்ஞாணம் குஸலம்பி அகுஸலம்பி, சக்கு²விஞ்ஞாணம் ப²ஸ்ஸம் ஆரப்³ப⁴…பே… போ²ட்ட²ப்³ப³ம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே….

583. ந வத்தப்³ப³ம் – ‘‘பஞ்சவிஞ்ஞாணா குஸலாபி அகுஸலாபீ’’தி? ஆமந்தா. நனு வுத்தம் ப⁴க³வதா – ‘‘இத⁴, பி⁴க்க²வே, பி⁴க்கு² சக்கு²னா ரூபம் தி³ஸ்வா நிமித்தக்³கா³ஹீ ஹோதி…பே… ந நிமித்தக்³கா³ஹீ ஹோதி…பே… ஸோதேன ஸத்³த³ம் ஸுத்வா…பே… காயேன போ²ட்ட²ப்³ப³ம் பு²ஸித்வா நிமித்தக்³கா³ஹீ ஹோதி…பே… ந நிமித்தக்³கா³ஹீ ஹோதீ’’தி! அத்தே²வ ஸுத்தந்தோதி? ஆமந்தா. தேன ஹி பஞ்சவிஞ்ஞாணா குஸலாபி அகுஸலாபீதி.

பஞ்சவிஞ்ஞாணா குஸலாபி அகுஸலாபீதிகதா² நிட்டி²தா.

10. த³ஸமவக்³கோ³

(99) 5. ஸாபோ⁴கா³திகதா²

584. பஞ்சவிஞ்ஞாணா ஸாபோ⁴கா³தி? ஆமந்தா. நனு பஞ்சவிஞ்ஞாணா உப்பன்னவத்து²கா உப்பன்னாரம்மணாதி? ஆமந்தா. ஹஞ்சி பஞ்சவிஞ்ஞாணா உப்பன்னவத்து²கா உப்பன்னாரம்மணா, நோ ச வத ரே வத்தப்³பே³ – ‘‘பஞ்சவிஞ்ஞாணா ஸாபோ⁴கா³’’தி. நனு பஞ்சவிஞ்ஞாணா புரேஜாதவத்து²கா புரேஜாதாரம்மணா அஜ்ஜ²த்திகவத்து²கா பா³ஹிராரம்மணா அஸம்பி⁴ன்னவத்து²கா அஸம்பி⁴ன்னாரம்மணா நானாவத்து²கா நானாரம்மணா ந அஞ்ஞமஞ்ஞஸ்ஸ கோ³சரவிஸயம் பச்சனுபோ⁴ந்தி, ந அஸமன்னாஹாரா உப்பஜ்ஜந்தி, ந அமனஸிகாரா உப்பஜ்ஜந்தி, ந அப்³போ³கிண்ணா உப்பஜ்ஜந்தி, ந அபுப்³ப³ம் அசரிமம் உப்பஜ்ஜந்தி, நனு பஞ்சவிஞ்ஞாணா ந அஞ்ஞமஞ்ஞஸ்ஸ ஸமனந்தரா உப்பஜ்ஜந்தீதி? ஆமந்தா. ஹஞ்சி பஞ்சவிஞ்ஞாணா ந அஞ்ஞமஞ்ஞஸ்ஸ ஸமனந்தரா உப்பஜ்ஜந்தி, நோ ச வத ரே வத்தப்³பே³ – ‘‘பஞ்சவிஞ்ஞாணா ஸாபோ⁴கா³’’தி.

585. சக்கு²விஞ்ஞாணம் ஸாபோ⁴க³ந்தி? ஆமந்தா. சக்கு²விஞ்ஞாணம் ஸுஞ்ஞதம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே… சக்கு²விஞ்ஞாணம் ஸுஞ்ஞதம் ஆரப்³ப⁴ உப்பஜ்ஜதீதி? ஆமந்தா. சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாணந்தி? ந ஹேவம் வத்தப்³பே³…பே… சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாணந்தி? ஆமந்தா. ‘‘சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? நத்தி²…பே… ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? ஆமந்தா. ஹஞ்சி ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோ, நோ ச வத ரே வத்தப்³பே³ – ‘‘சக்கு²ஞ்ச படிச்ச ஸுஞ்ஞதஞ்ச உப்பஜ்ஜதி சக்கு²விஞ்ஞாண’’ந்தி.

சக்கு²விஞ்ஞாணம் ஸாபோ⁴க³ந்தி? ஆமந்தா. சக்கு²விஞ்ஞாணம் அதீதானாக³தம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே… சக்கு²விஞ்ஞாணம் ஸாபோ⁴க³ந்தி? ஆமந்தா. சக்கு²விஞ்ஞாணம் ப²ஸ்ஸம் ஆரப்³ப⁴…பே… போ²ட்ட²ப்³ப³ம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே… மனோவிஞ்ஞாணம் ஸாபோ⁴க³ம், மனோவிஞ்ஞாணம் ஸுஞ்ஞதம் ஆரப்³ப⁴ உப்பஜ்ஜதீதி? ஆமந்தா. சக்கு²விஞ்ஞாணம் ஸாபோ⁴க³ம், சக்கு²விஞ்ஞாணம் ஸுஞ்ஞதம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே… மனோவிஞ்ஞாணம் ஸாபோ⁴க³ம், மனோவிஞ்ஞாணம் அதீதானாக³தம் ஆரப்³ப⁴ உப்பஜ்ஜதீதி? ஆமந்தா. சக்கு²விஞ்ஞாணம் ஸாபோ⁴க³ம், சக்கு²விஞ்ஞாணம் அதீதானாக³தம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே… மனோவிஞ்ஞாணம் ஸாபோ⁴க³ம், மனோவிஞ்ஞாணம் ப²ஸ்ஸம் ஆரப்³ப⁴…பே… போ²ட்ட²ப்³ப³ம் ஆரப்³ப⁴ உப்பஜ்ஜதீதி? ஆமந்தா. சக்கு²விஞ்ஞாணம் ஸாபோ⁴க³ம், சக்கு²விஞ்ஞாணம் ப²ஸ்ஸம் ஆரப்³ப⁴…பே… போ²ட்ட²ப்³ப³ம் ஆரப்³ப⁴ உப்பஜ்ஜதீதி? ந ஹேவம் வத்தப்³பே³…பே….

586. ந வத்தப்³ப³ம் – ‘‘பஞ்சவிஞ்ஞாணா ஸாபோ⁴கா³’’தி? ஆமந்தா. நனு வுத்தம் ப⁴க³வதா – ‘‘இத⁴, பி⁴க்க²வே, பி⁴க்கு² சக்கு²னா ரூபம் தி³ஸ்வா நிமித்தக்³கா³ஹீ ஹோதி…பே… ந நிமித்தக்³கா³ஹீ ஹோதி…பே… காயேன போ²ட்ட²ப்³ப³ம் பு²ஸித்வா நிமித்தக்³கா³ஹீ ஹோதி…பே… ந நிமித்தக்³கா³ஹீ ஹோதீ’’தி! அத்தே²வ ஸுத்தந்தோதி? ஆமந்தா. தேன ஹி பஞ்சவிஞ்ஞாணா ஸாபோ⁴கா³தி…பே….

ஸாபோ⁴கா³திகதா² நிட்டி²தா.

10. த³ஸமவக்³கோ³

(100) 6. த்³வீஹிஸீலேஹிகதா²

587. மக்³க³ஸமங்கீ³ த்³வீஹி ஸீலேஹி ஸமன்னாக³தோதி? ஆமந்தா. மக்³க³ஸமங்கீ³ த்³வீஹி ப²ஸ்ஸேஹி த்³வீஹி வேத³னாஹி த்³வீஹி ஸஞ்ஞாஹி த்³வீஹி சேதனாஹி த்³வீஹி சித்தேஹி த்³வீஹி ஸத்³தா⁴ஹி த்³வீஹி வீரியேஹி த்³வீஹி ஸதீஹி த்³வீஹி ஸமாதீ⁴ஹி த்³வீஹி பஞ்ஞாஹி ஸமன்னாக³தோதி? ந ஹேவம் வத்தப்³பே³…பே….

மக்³க³ஸமங்கீ³ லோகியேன ஸீலேன ஸமன்னாக³தோதி? ஆமந்தா. மக்³க³ஸமங்கீ³ லோகியேன ப²ஸ்ஸேன லோகியாய வேத³னாய லோகியாய பஞ்ஞாய லோகியாய சேதனாய லோகியேன சித்தேன லோகியாய ஸத்³தா⁴ய லோகியேன வீரியேன லோகியாய ஸதியா லோகியேன ஸமாதி⁴னா லோகியாய பஞ்ஞாய ஸமன்னாக³தோதி? ந ஹேவம் வத்தப்³பே³…பே….

மக்³க³ஸமங்கீ³ லோகியேன ச லோகுத்தரேன ச ஸீலேன ஸமன்னாக³தோதி? ஆமந்தா. மக்³க³ஸமங்கீ³ லோகியேன ச லோகுத்தரேன ச ப²ஸ்ஸேன ஸமன்னாக³தோ…பே… லோகியாய ச லோகுத்தராய ச பஞ்ஞாய ஸமன்னாக³தோதி? ந ஹேவம் வத்தப்³பே³…பே… மக்³க³ஸமங்கீ³ லோகியேன ஸீலேன ஸமன்னாக³தோதி? ஆமந்தா. மக்³க³ஸமங்கீ³ புது²ஜ்ஜனோதி? ந ஹேவம் வத்தப்³பே³…பே….

588. மக்³க³ஸமங்கீ³ லோகியாய ஸம்மாவாசாய ஸமன்னாக³தோதி? ஆமந்தா. மக்³க³ஸமங்கீ³ லோகியாய ஸம்மாதி³ட்டி²யா ஸமன்னாக³தோதி? ந ஹேவம் வத்தப்³பே³…பே… மக்³க³ஸமங்கீ³ லோகியாய ஸம்மாவாசாய ஸமன்னாக³தோதி? ஆமந்தா. மக்³க³ஸமங்கீ³ லோகியேன ஸம்மாஸங்கப்பேன…பே… லோகியேன ஸம்மாவாயாமேன…பே… லோகியாய ஸம்மாஸதியா…பே… லோகியேன ஸம்மாஸமாதி⁴னா ஸமன்னாக³தோதி? ந ஹேவம் வத்தப்³பே³…பே… மக்³க³ஸமங்கீ³ லோகியேன ஸம்மாகம்மந்தேன…பே… லோகியேன ஸம்மாஆஜீவேன ஸமன்னாக³தோதி? ஆமந்தா. மக்³க³ஸமங்கீ³ லோகியாய ஸம்மாதி³ட்டி²யா…பே… லோகியேன ஸம்மாஸமாதி⁴னா ஸமன்னாக³தோதி? ந ஹேவம் வத்தப்³பே³…பே….

மக்³க³ஸமங்கீ³ லோகியாய ச லோகுத்தராய ச ஸம்மாவாசாய ஸமன்னாக³தோதி? ஆமந்தா. மக்³க³ஸமங்கீ³ லோகியாய ச லோகுத்தராய ச ஸம்மாதி³ட்டி²யா ஸமன்னாக³தோதி? ந ஹேவம் வத்தப்³பே³…பே… மக்³க³ஸமங்கீ³ லோகியாய ச லோகுத்தராய ச ஸம்மாவாசாய ஸமன்னாக³தோதி? ஆமந்தா. மக்³க³ஸமங்கீ³ லோகியேன ச லோகுத்தரேன ச ஸம்மாஸங்கப்பேன…பே… லோகியேன ச லோகுத்தரேன ச ஸம்மாவாயாமேன …பே… லோகியாய ச லோகுத்தராய ச ஸம்மாஸதியா…பே… லோகியேன ச லோகுத்தரேன ச ஸம்மாஸமாதி⁴னா ஸமன்னாக³தோதி? ந ஹேவம் வத்தப்³பே³…பே….

மக்³க³ஸமங்கீ³ லோகியேன ச லோகுத்தரேன ச ஸம்மாகம்மந்தேன…பே… ஸம்மாஆஜீவேன ஸமன்னாக³தோதி? ஆமந்தா. மக்³க³ஸமங்கீ³ லோகியாய ச லோகுத்தராய ச ஸம்மாதி³ட்டி²யா ஸமன்னாக³தோதி? ந ஹேவம் வத்தப்³பே³…பே… மக்³க³ஸமங்கீ³ லோகியேன ச லோகுத்தரேன ச ஸம்மாஆஜீவேன ஸமன்னாக³தோதி? ஆமந்தா. மக்³க³ஸமங்கீ³ லோகியேன ச லோகுத்தரேன ச ஸம்மாஸங்கப்பேன…பே… லோகியேன ச லோகுத்தரேன ச ஸம்மாஸமாதி⁴னா ஸமன்னாக³தோதி? ந ஹேவம் வத்தப்³பே³…பே….

589. ந வத்தப்³ப³ம் – ‘‘மக்³க³ஸமங்கீ³ த்³வீஹி ஸீலேஹி ஸமன்னாக³தோ’’தி? ஆமந்தா. லோகியே ஸீலே நிருத்³தே⁴ மக்³கோ³ உப்பஜ்ஜதீதி? ஆமந்தா. து³ஸ்ஸீலோ க²ண்ட³ஸீலோ சி²ன்னஸீலோ மக்³க³ம் பா⁴வேதீதி? ந ஹேவம் வத்தப்³பே³ …பே… தேன ஹி மக்³க³ஸமங்கீ³ த்³வீஹி ஸீலேஹி ஸமன்னாக³தோதி.

த்³வீஹிஸீலேஹிகதா² நிட்டி²தா.

10. த³ஸமவக்³கோ³

(101) 7. ஸீலம் அசேதஸிகந்திகதா²

590. ஸீலம் அசேதஸிகந்தி? ஆமந்தா. ரூபம்…பே… நிப்³பா³னம்…பே… சக்கா²யதனம் …பே… காயாயதனம்… ரூபாயதனம்…பே… போ²ட்ட²ப்³பா³யதனந்தி? ந ஹேவம் வத்தப்³பே³…பே… ஸீலம் அசேதஸிகந்தி? ஆமந்தா. ப²ஸ்ஸோ அசேதஸிகோதி? ந ஹேவம் வத்தப்³பே³ …பே… ஸீலம் அசேதஸிகந்தி? ஆமந்தா. வேத³னா…பே… ஸஞ்ஞா…பே… சேதனா…பே… ஸத்³தா⁴…பே… வீரியம்…பே… ஸதி…பே… ஸமாதி⁴…பே… பஞ்ஞா அசேதஸிகாதி? ந ஹேவம் வத்தப்³பே³…பே….

ப²ஸ்ஸோ சேதஸிகோதி? ஆமந்தா. ஸீலம் சேதஸிகந்தி? ந ஹேவம் வத்தப்³பே³…பே… வேத³னா…பே… ஸஞ்ஞா…பே… சேதனா…பே… ஸத்³தா⁴…பே… வீரியம்…பே… ஸதி…பே… ஸமாதி⁴…பே… பஞ்ஞா சேதஸிகாதி? ஆமந்தா. ஸீலம் சேதஸிகந்தி? ந ஹேவம் வத்தப்³பே³…பே….

591. ஸீலம் அசேதஸிகந்தி? ஆமந்தா. அனிட்ட²ப²லந்தி? ந ஹேவம் வத்தப்³பே³…பே… நனு இட்ட²ப²லந்தி? ஆமந்தா. ஹஞ்சி இட்ட²ப²லம், நோ ச வத ரே வத்தப்³பே³ – ‘‘ஸீலம் அசேதஸிக’’ந்தி.

ஸத்³தா⁴ இட்ட²ப²லா, ஸத்³தா⁴ சேதஸிகாதி? ஆமந்தா. ஸீலம் இட்ட²ப²லம், ஸீலம் சேதஸிகந்தி? ந ஹேவம் வத்தப்³பே³…பே… வீரியம்…பே… ஸதி…பே… ஸமாதி⁴…பே… பஞ்ஞா இட்ட²ப²லா, பஞ்ஞா சேதஸிகாதி? ஆமந்தா. ஸீலம் இட்ட²ப²லம், ஸீலம் சேதஸிகந்தி? ந ஹேவம் வத்தப்³பே³…பே….

ஸீலம் இட்ட²ப²லம், ஸீலம் அசேதஸிகந்தி? ஆமந்தா. ஸத்³தா⁴ இட்ட²ப²லா, ஸத்³தா⁴ அசேதஸிகாதி? ந ஹேவம் வத்தப்³பே³…பே… ஸீலம் இட்ட²ப²லம், ஸீலம் அசேதஸிகந்தி? ஆமந்தா. வீரியம்…பே… ஸதி…பே… ஸமாதி⁴…பே… பஞ்ஞா இட்ட²ப²லா, பஞ்ஞா அசேதஸிகாதி? ந ஹேவம் வத்தப்³பே³…பே….

592. ஸீலம் அசேதஸிகந்தி? ஆமந்தா. அப²லம் அவிபாகந்தி? ந ஹேவம் வத்தப்³பே³…பே… நனு ஸப²லம் ஸவிபாகந்தி? ஆமந்தா. ஹஞ்சி ஸப²லம் ஸவிபாகம், நோ ச வத ரே வத்தப்³பே³ – ‘‘ஸீலம் அசேதஸிக’’ந்தி…பே….

சக்கா²யதனம் அசேதஸிகம் அவிபாகந்தி? ஆமந்தா. ஸீலம் அசேதஸிகம் அவிபாகந்தி? ந ஹேவம் வத்தப்³பே³…பே… ஸோதாயதனம்…பே… காயாயதனம் …பே… ரூபாயதனம்…பே… போ²ட்ட²ப்³பா³யதனம் அசேதஸிகம் அவிபாகந்தி? ஆமந்தா. ஸீலம் அசேதஸிகம் அவிபாகந்தி? ந ஹேவம் வத்தப்³பே³…பே….

ஸீலம் அசேதஸிகம் ஸவிபாகந்தி? ஆமந்தா. சக்கா²யதனம் அசேதஸிகம் ஸவிபாகந்தி? ந ஹேவம் வத்தப்³பே³…பே… ஸீலம் அசேதஸிகம் ஸவிபாகந்தி? ஆமந்தா. ஸோதாயதனம்…பே… காயாயதனம்… ரூபாயதனம்…பே… போ²ட்ட²ப்³பா³யதனம் அசேதஸிகம் ஸவிபாகந்தி? ந ஹேவம் வத்தப்³பே³…பே….

593. ஸம்மாவாசா அசேதஸிகாதி? ஆமந்தா. ஸம்மாதி³ட்டி² அசேதஸிகாதி? ந ஹேவம் வத்தப்³பே³…பே… ஸம்மாவாசா அசேதஸிகாதி? ஆமந்தா. ஸம்மாஸங்கப்போ…பே… ஸம்மாவாயாமோ…பே… ஸம்மாஸதி…பே… ஸம்மாஸமாதி⁴ அசேதஸிகோதி? ந ஹேவம் வத்தப்³பே³…பே… ஸம்மாகம்மந்தோ…பே… ஸம்மாஆஜீவோ அசேதஸிகோதி? ஆமந்தா. ஸம்மாதி³ட்டி² அசேதஸிகாதி? ந ஹேவம் வத்தப்³பே³…பே… ஸம்மாஆஜீவோ அசேதஸிகோதி? ஆமந்தா. ஸம்மாஸங்கப்போ… ஸம்மாவாயாமோ… ஸம்மாஸதி… ஸம்மாஸமாதி⁴ அசேதஸிகோதி? ந ஹேவம் வத்தப்³பே³…பே….

ஸம்மாதி³ட்டி² சேதஸிகாதி? ஆமந்தா. ஸம்மாவாசா சேதஸிகாதி? ந ஹேவம் வத்தப்³பே³…பே… ஸம்மாதி³ட்டி² சேதஸிகாதி? ஆமந்தா. ஸம்மாகம்மந்தோ…பே… ஸம்மாஆஜீவோ சேதஸிகோதி? ந ஹேவம் வத்தப்³பே³…பே… ஸம்மாஸங்கப்போ…பே… ஸம்மாவாயாமோ…பே… ஸம்மாஸதி…பே… ஸம்மாஸமாதி⁴ சேதஸிகோதி? ஆமந்தா. ஸம்மாவாசா சேதஸிகாதி? ந ஹேவம் வத்தப்³பே³…பே… ஸம்மாஸமாதி⁴ சேதஸிகோதி? ஆமந்தா. ஸம்மாகம்மந்தோ…பே… ஸம்மாஆஜீவோ சேதஸிகோதி? ந ஹேவம் வத்தப்³பே³…பே….

594. ந வத்தப்³ப³ம் – ‘‘ஸீலம் அசேதஸிக’’ந்தி? ஆமந்தா. ஸீலே உப்பஜ்ஜித்வா நிருத்³தே⁴ து³ஸ்ஸீலோ ஹோதீதி? ந ஹேவம் வத்தப்³பே³. தேன ஹி ஸீலம் அசேதஸிகந்தி.

ஸீலம் அசேதஸிகந்திகதா² நிட்டி²தா.

10. த³ஸமவக்³கோ³

(102) 8. ஸீலம் ந சித்தானுபரிவத்தீதிகதா²

595. ஸீலம் ந சித்தானுபரிவத்தீதி? ஆமந்தா. ரூபம்… நிப்³பா³னம்… சக்கா²யதனம்…பே… போ²ட்ட²ப்³பா³யதனந்தி? ந ஹேவம் வத்தப்³பே³…பே… ஸீலம் ந சித்தானுபரிவத்தீதி? ஆமந்தா. ப²ஸ்ஸோ ந சித்தானுபரிவத்தீதி? ந ஹேவம் வத்தப்³பே³…பே… ஸீலம் ந சித்தானுபரிவத்தீதி? ஆமந்தா. வேத³னா…பே… ஸஞ்ஞா… சேதனா… ஸத்³தா⁴… வீரியம்… ஸதி… ஸமாதி⁴…பே… பஞ்ஞா ந சித்தானுபரிவத்தீதி? ந ஹேவம் வத்தப்³பே³…பே….

ப²ஸ்ஸோ சித்தானுபரிவத்தீதி? ஆமந்தா. ஸீலம் சித்தானுபரிவத்தீதி? ந ஹேவம் வத்தப்³பே³…பே… வேத³னா…பே… ஸஞ்ஞா… சேதனா … ஸத்³தா⁴… வீரியம்… ஸதி… ஸமாதி⁴…பே… பஞ்ஞா சித்தானுபரிவத்தீதி? ஆமந்தா. ஸீலம் சித்தானுபரிவத்தீதி? ந ஹேவம் வத்தப்³பே³…பே….

596. ஸம்மாவாசா ந சித்தானுபரிவத்தீதி? ஆமந்தா. ஸம்மாதி³ட்டி² ந சித்தானுபரிவத்தீதி? ந ஹேவம் வத்தப்³பே³…பே… ஸம்மாவாசா ந சித்தானுபரிவத்தீதி? ஆமந்தா. ஸம்மாஸங்கப்போ… ஸம்மாவாயாமோ… ஸம்மாஸதி…பே… ஸம்மாஸமாதி⁴ ந சித்தானுபரிவத்தீதி? ந ஹேவம் வத்தப்³பே³…பே….

ஸம்மாகம்மந்தோ…பே… ஸம்மாஆஜீவோ ந சித்தானுபரிவத்தீதி? ஆமந்தா. ஸம்மாதி³ட்டி² ந சித்தானுபரிவத்தீதி? ந ஹேவம் வத்தப்³பே³…பே… ஸம்மாஆஜீவோ ந சித்தானுபரிவத்தீதி? ஆமந்தா. ஸம்மாஸங்கப்போ… ஸம்மாவாயாமோ… ஸம்மாஸதி…பே… ஸம்மாஸமாதி⁴ ந சித்தானுபரிவத்தீதி? ந ஹேவம் வத்தப்³பே³…பே….

ஸம்மாதி³ட்டி² சித்தானுபரிவத்தீதி? ஆமந்தா. ஸம்மாவாசா சித்தானுபரிவத்தீதி? ந ஹேவம் வத்தப்³பே³…பே… ஸம்மாதி³ட்டி² சித்தானுபரிவத்தீதி? ஆமந்தா. ஸம்மாகம்மந்தோ…பே… ஸம்மாஆஜீவோ சித்தானுபரிவத்தீதி? ந ஹேவம் வத்தப்³பே³…பே….

ஸம்மாஸங்கப்போ … ஸம்மாவாயாமோ… ஸம்மாஸதி…பே… ஸம்மாஸமாதி⁴ சித்தானுபரிவத்தீதி? ஆமந்தா. ஸம்மாவாசா சித்தானுபரிவத்தீதி? ந ஹேவம் வத்தப்³பே³…பே… ஸம்மாஸமாதி⁴ சித்தானுபரிவத்தீதி? ஆமந்தா. ஸம்மாகம்மந்தோ…பே… ஸம்மாஆஜீவோ சித்தானுபரிவத்தீதி? ந ஹேவம் வத்தப்³பே³…பே….

597. ந வத்தப்³ப³ம் – ‘‘ஸீலம் ந சித்தானுபரிவத்தீ’’தி? ஆமந்தா. ஸீலே உப்பஜ்ஜித்வா நிருத்³தே⁴ து³ஸ்ஸீலோ ஹோதீதி? ந ஹேவம் வத்தப்³பே³. தேன ஹி ஸீலம் ந சித்தானுபரிவத்தீதி.

ஸீலம் ந சித்தானுபரிவத்தீதிகதா² நிட்டி²தா.

10. த³ஸமவக்³கோ³

(103) 9. ஸமாதா³னஹேதுகதா²

598. ஸமாதா³னஹேதுகம் ஸீலம் வட்³ட⁴தீதி? ஆமந்தா. ஸமாதா³னஹேதுகோ ப²ஸ்ஸோ வட்³ட⁴தி, வேத³னா வட்³ட⁴தி, ஸஞ்ஞா வட்³ட⁴தி, சேதனா வட்³ட⁴தி, சித்தம் வட்³ட⁴தி, ஸத்³தா⁴ வட்³ட⁴தி, வீரியம் வட்³ட⁴தி, ஸதி வட்³ட⁴தி, ஸமாதி⁴ வட்³ட⁴தி, பஞ்ஞா வட்³ட⁴தீதி? ந ஹேவம் வத்தப்³பே³…பே….

ஸமாதா³னஹேதுகம் ஸீலம் வட்³ட⁴தீதி? ஆமந்தா. லதா விய வட்³ட⁴தி, மாலுவா விய வட்³ட⁴தி, ருக்கோ² விய வட்³ட⁴தி, திணம் விய வட்³ட⁴தி, முஞ்ஜபுஞ்ஜோ விய வட்³ட⁴தீதி? ந ஹேவம் வத்தப்³பே³…பே….

599. ஸமாதா³னஹேதுகம் ஸீலம் வட்³ட⁴தீதி? ஆமந்தா. ஸீலம் ஸமாதி³யித்வா காமவிதக்கம் விதக்கேந்தஸ்ஸ ப்³யாபாத³விதக்கம் விதக்கேந்தஸ்ஸ விஹிம்ஸாவிதக்கம் விதக்கேந்தஸ்ஸ ஸீலம் வட்³ட⁴தீதி? ஆமந்தா. த்³வின்னம் ப²ஸ்ஸானம்…பே… த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே… த்³வின்னம் ப²ஸ்ஸானம்…பே… த்³வின்னம் சித்தானம் ஸமோதா⁴னம் ஹோதீதி? ஆமந்தா. குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வம் ஆக³ச்ச²ந்தீதி? ந ஹேவம் வத்தப்³பே³…பே….

குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வம் ஆக³ச்ச²ந்தீதி? ஆமந்தா. நனு வுத்தம் ப⁴க³வதா – ‘‘சத்தாரிமானி, பி⁴க்க²வே, ஸுவிதூ³ரவிதூ³ரானி! கதமானி சத்தாரி? நப⁴ஞ்ச, பி⁴க்க²வே, பத²வீ ச – இத³ம் பட²மம் ஸுவிதூ³ரவிதூ³ரம்…பே… தஸ்மா ஸதம் த⁴ம்மோ அஸப்³பி⁴ ஆரகா’’தி. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வம் ஆக³ச்ச²ந்தீ’’தி.

600. ந வத்தப்³ப³ம் – ‘‘ஸமாதா³னஹேதுகம் ஸீலம் வட்³ட⁴தீ’’தி? ஆமந்தா. நனு வுத்தம் ப⁴க³வதா – ‘‘ஆராமரோபா வனரோபா…பே… த⁴ம்மட்டா² ஸீலஸம்பன்னா தே ஜனா ஸக்³க³கா³மினோ’’தி. அத்தே²வ ஸுத்தந்தோதி? ஆமந்தா. தேன ஹி ஸமாதா³னஹேதுகம் ஸீலம் வட்³ட⁴தீதி.

ஸமாதா³னஹேதுகதா² நிட்டி²தா.

10. த³ஸமவக்³கோ³

(104) 10. விஞ்ஞத்தி ஸீலந்திகதா²

601. விஞ்ஞத்தி ஸீலந்தி? ஆமந்தா. பாணாதிபாதா வேரமணீதி? ந ஹேவம் வத்தப்³பே³…பே… அதி³ன்னாதா³னா வேரமணீதி? ந ஹேவம் வத்தப்³பே³…பே… காமேஸுமிச்சா²சாரா வேரமணீதி? ந ஹேவம் வத்தப்³பே³ …பே… முஸாவாதா³ வேரமணீதி? ந ஹேவம் வத்தப்³பே³…பே… ஸுராமேரயமஜ்ஜபமாத³ட்டா²னா வேரமணீதி? ந ஹேவம் வத்தப்³பே³…பே….

அபி⁴வாத³னம் ஸீலம், பச்சுட்டா²னம் ஸீலம், அஞ்ஜலிகம்மம் ஸீலம், ஸாமீசிகம்மம் ஸீலம், ஆஸனாபி⁴ஹாரோ ஸீலம், ஸேய்யாபி⁴ஹாரோ ஸீலம், பாதோ³த³காபி⁴ஹாரோ ஸீலம், பாத³கத²லிகாபி⁴ஹாரோ ஸீலம், ந்ஹானே பிட்டி²பரிகம்மம் ஸீலந்தி? ஆமந்தா. பாணாதிபாதா வேரமணீதி? ந ஹேவம் வத்தப்³பே³…பே… ஸுராமேரயமஜ்ஜபமாத³ட்டா²னா வேரமணீதி? ந ஹேவம் வத்தப்³பே³…பே….

602. ந வத்தப்³ப³ம் – ‘‘விஞ்ஞத்தி ஸீல’’ந்தி? ஆமந்தா. து³ஸ்ஸில்யந்தி? ந ஹேவம் வத்தப்³பே³…பே… தேன ஹி விஞ்ஞத்தி ஸீலந்தி.

விஞ்ஞத்தி ஸீலந்திகதா² நிட்டி²தா.

10. த³ஸமவக்³கோ³

(105) 11. அவிஞ்ஞத்தி து³ஸ்ஸில்யந்திகதா²

603. அவிஞ்ஞத்தி து³ஸ்ஸில்யந்தி? ஆமந்தா. பாணாதிபாதோதி? ந ஹேவம் வத்தப்³பே³…பே… அதி³ன்னாதா³னந்தி? ந ஹேவம் வத்தப்³பே³…பே… காமேஸுமிச்சா²சாரோதி? ந ஹேவம் வத்தப்³பே³…பே… முஸாவாதோ³தி? ந ஹேவம் வத்தப்³பே³…பே… ஸுராமேரயமஜ்ஜபமாத³ட்டா²னந்தி? ந ஹேவம் வத்தப்³பே³…பே….

பாபகம்மம் ஸமாதி³யித்வா தா³னம் த³த³ந்தஸ்ஸ புஞ்ஞஞ்ச அபுஞ்ஞஞ்ச உபோ⁴ வட்³ட⁴ந்தீதி? ந ஹேவம் வத்தப்³பே³…பே… புஞ்ஞஞ்ச அபுஞ்ஞஞ்ச உபோ⁴ வட்³ட⁴ந்தீதி? ஆமந்தா. த்³வின்னம் ப²ஸ்ஸானம்…பே… த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே… த்³வின்னம் ப²ஸ்ஸானம்…பே… த்³வின்னம் சித்தானம் ஸமோதா⁴னம் ஹோதீதி? ஆமந்தா. குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வம் ஆக³ச்ச²ந்தீதி? ந ஹேவம் வத்தப்³பே³…பே….

குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வம் ஆக³ச்ச²ந்தீதி? ஆமந்தா. நனு வுத்தம் ப⁴க³வதா – ‘‘சத்தாரிமானி, பி⁴க்க²வே, ஸுவிதூ³ரவிதூ³ரானி! கதமானி சத்தாரி? நப⁴ஞ்ச, பி⁴க்க²வே, பத²வீ ச – இத³ம் பட²மம் ஸுவிதூ³ரவிதூ³ரம்…பே… தஸ்மா ஸதம் த⁴ம்மோ அஸப்³பி⁴ ஆரகா’’தி. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘குஸலாகுஸலா ஸாவஜ்ஜானவஜ்ஜா ஹீனபணீதா கண்ஹஸுக்கஸப்படிபா⁴கா³ த⁴ம்மா ஸம்முகீ²பா⁴வம் ஆக³ச்ச²ந்தீ’’தி.

604. ந வத்தப்³ப³ம் – ‘‘அவிஞ்ஞத்தி து³ஸ்ஸில்ய’’ந்தி? ஆமந்தா. நனு பாபகம்மம் ஸமாதி³ன்னோ ஆஸீதி? ஆமந்தா. ஹஞ்சி பாபகம்மம் ஸமாதி³ன்னோ ஆஸி, தேன வத ரே வத்தப்³பே³ – ‘‘அவிஞ்ஞத்தி து³ஸ்ஸில்ய’’ந்தி.

அவிஞ்ஞத்தி து³ஸ்ஸில்யந்திகதா² நிட்டி²தா.

த³ஸமவக்³கோ³.

தஸ்ஸுத்³தா³னம் –

உபபத்தேஸியே பஞ்சக்க²ந்தே⁴ அனிருத்³தே⁴ கிரியா பஞ்சக்க²ந்தா⁴ உப்பஜ்ஜந்தி, மக்³க³ஸமங்கி³ஸ்ஸ ரூபம் மக்³கோ³, பஞ்சவிஞ்ஞாணஸமங்கி³ஸ்ஸ அத்தி² மக்³க³பா⁴வனா, பஞ்சவிஞ்ஞாணா குஸலாபி அகுஸலாபி, பஞ்சவிஞ்ஞாணா ஸாபோ⁴கா³, மக்³க³ஸமங்கீ³ த்³வீஹி ஸீலேஹி ஸமன்னாக³தோ, ஸீலம் அசேதஸிகம், ஸீலம் ந சித்தானுபரிவத்தி, ஸமாதா³னஹேதுகம் ஸீலம் வட்³ட⁴தீதி, விஞ்ஞத்திஸீலம் அவிஞ்ஞத்தி து³ஸ்ஸில்யந்தி.

து³தியோ பண்ணாஸகோ.

தஸ்ஸுத்³தா³னம் –

நியாமஸங்க³ஹக³தானிஸம்ஸதா ச நிரோதோ⁴தி [நியாம ஸங்க³ஹக³தானிஸம்ஸதா அத்தி² பஞ்சவோகாரப⁴வோ நிரோதோ⁴ மக்³க³ஸமங்கி³ஸ்ஸ பஞ்சவோகாரப⁴வோதி (ஸீ. ஸ்யா. க.), நியாம ஸங்க³ஹ க³தானிஸம்ஸதா அத்தி² பஞ்சவோகாரப⁴வோ மக்³க³ஸமங்கி³ஸ்ஸ நோ பஞ்சவோகாரப⁴வோ (பீ.)].