(90) 7. விதக்கானுபதிதகதா²

562. ஸப்³ப³ம் சித்தம் விதக்கானுபதிதந்தி? ஆமந்தா. ஸப்³ப³ம் சித்தம் விசாரானுபதிதம் பீதானுபதிதம் ஸுகா²னுபதிதம் து³க்கா²னுபதிதம் ஸோமனஸ்ஸானுபதிதம் தோ³மனஸ்ஸானுபதிதம் உபேக்கா²னுபதிதம் ஸத்³தா⁴னுபதிதம் வீரியானுபதிதம் ஸதானுபதிதம் ஸமாதா⁴னுபதிதம் பஞ்ஞானுபதிதம் ராகா³னுபதிதம் தோ³ஸானுபதிதம்…பே… அனோத்தப்பானுபதிதந்தி? ந ஹேவம் வத்தப்³பே³…பே….

ஸப்³ப³ம் சித்தம் விதக்கானுபதிதந்தி? ஆமந்தா. நனு அத்தி² அவிதக்கோ விசாரமத்தோ ஸமாதீ⁴தி? ஆமந்தா. ஹஞ்சி அத்தி² அவிதக்கோ விசாரமத்தோ ஸமாதி⁴, நோ ச வத ரே வத்தப்³பே³ – ‘‘ஸப்³ப³ம் சித்தம் விதக்கானுபதித’’ந்தி.

ஸப்³ப³ம் சித்தம் விதக்கானுபதிதந்தி? ஆமந்தா. நனு அத்தி² அவிதக்கோ அவிசாரோ ஸமாதீ⁴தி? ஆமந்தா. ஹஞ்சி அத்தி² அவிதக்கோ அவிசாரோ ஸமாதி⁴, நோ ச வத ரே வத்தப்³பே³ – ‘‘ஸப்³ப³ம் சித்தம் விதக்கானுபதித’’ந்தி. ஸப்³ப³ம் சித்தம் விதக்கானுபதிதந்தி? ஆமந்தா. நனு தயோ ஸமாதீ⁴ வுத்தா ப⁴க³வதா – ஸவிதக்கோ ஸவிசாரோ ஸமாதி⁴, அவிதக்கோ விசாரமத்தோ ஸமாதி⁴, அவிதக்கோ அவிசாரோ ஸமாதீ⁴தி [தீ³. நி. 3.305, 353]? ஆமந்தா. ஹஞ்சி தயோ ஸமாதீ⁴ வுத்தா ப⁴க³வதா – ஸவிதக்கோ ஸவிசாரோ ஸமாதி⁴, அவிதக்கோ விசாரமத்தோ ஸமாதி⁴, அவிதக்கோ அவிசாரோ ஸமாதி⁴, நோ ச வத ரே வத்தப்³பே³ – ‘‘ஸப்³ப³ம் சித்தம் விதக்கானுபதித’’ந்தி.

விதக்கானுபதிதகதா² நிட்டி²தா.