9. நவமவக்³கோ³

(87) 4. அனுஸயா அனாரம்மணகதா²

554. அனுஸயா அனாரம்மணாதி? ஆமந்தா. ரூபம் நிப்³பா³னம் சக்கா²யதனம்…பே… போ²ட்ட²ப்³பா³யதனந்தி? ந ஹேவம் வத்தப்³பே³…பே….

காமராகா³னுஸயோ அனாரம்மணோதி? ஆமந்தா. காமராகோ³ காமராக³பரியுட்டா²னம் காமராக³ஸம்யோஜனம் காமோகோ⁴ காமயோகோ³ காமச்ச²ந்த³னீவரணம் அனாரம்மணந்தி? ந ஹேவம் வத்தப்³பே³…பே… காமராகோ³ காமராக³பரியுட்டா²னம் காமராக³ஸம்யோஜனம் காமோகோ⁴ காமயோகோ³ காமச்ச²ந்த³னீவரணம் ஸாரம்மணந்தி? ஆமந்தா. காமராகா³னுஸயோ ஸாரம்மணோதி? ந ஹேவம் வத்தப்³பே³…பே….

காமராகா³னுஸயோ அனாரம்மணோதி? ஆமந்தா. கதமக்க²ந்த⁴பரியாபன்னோதி? ஸங்கா²ரக்க²ந்த⁴பரியாபன்னோதி. ஸங்கா²ரக்க²ந்தோ⁴ அனாரம்மணோதி? ந ஹேவம் வத்தப்³பே³…பே… ஸங்கா²ரக்க²ந்தோ⁴ அனாரம்மணோதி? ஆமந்தா. வேத³னாக்க²ந்தோ⁴ ஸஞ்ஞாக்க²ந்தோ⁴ விஞ்ஞாணக்க²ந்தோ⁴ அனாரம்மணோதி? ந ஹேவம் வத்தப்³பே³…பே….

காமராகா³னுஸயோ ஸங்கா²ரக்க²ந்த⁴பரியாபன்னோ அனாரம்மணோதி? ஆமந்தா. காமராகோ³ ஸங்கா²ரக்க²ந்த⁴பரியாபன்னோ அனாரம்மணோதி? ந ஹேவம் வத்தப்³பே³…பே… காமராகோ³ ஸங்கா²ரக்க²ந்த⁴பரியாபன்னோ ஸாரம்மணோதி? ஆமந்தா. காமராகா³னுஸயோ ஸங்கா²ரக்க²ந்த⁴பரியாபன்னோ ஸாரம்மணோதி? ந ஹேவம் வத்தப்³பே³…பே….

காமராகா³னுஸயோ ஸங்கா²ரக்க²ந்த⁴பரியாபன்னோ அனாரம்மணோ, காமராகோ³ ஸங்கா²ரக்க²ந்த⁴பரியாபன்னோ ஸாரம்மணோதி? ஆமந்தா. ஸங்கா²ரக்க²ந்தோ⁴ ஏகதே³ஸோ ஸாரம்மணோ ஏகதே³ஸோ அனாரம்மணோதி? ந ஹேவம் வத்தப்³பே³…பே… ஸங்கா²ரக்க²ந்தோ⁴ ஏகதே³ஸோ ஸாரம்மணோ ஏகதே³ஸோ அனாரம்மணோதி? ஆமந்தா. வேத³னாக்க²ந்தோ⁴ ஸஞ்ஞாக்க²ந்தோ⁴ விஞ்ஞாணக்க²ந்தோ⁴ ஏகதே³ஸோ ஸாரம்மணோ ஏகதே³ஸோ அனாரம்மணோதி? ந ஹேவம் வத்தப்³பே³…பே….

555. படிகா⁴னுஸயோ மானானுஸயோ தி³ட்டா²னுஸயோ விசிகிச்சா²னுஸயோ ப⁴வராகா³னுஸயோ அவிஜ்ஜானுஸயோ அனாரம்மணோதி? ஆமந்தா. அவிஜ்ஜா அவிஜ்ஜோகோ⁴ அவிஜ்ஜாயோகோ³ அவிஜ்ஜானுஸயோ அவிஜ்ஜாபரியுட்டா²னம் அவிஜ்ஜாஸம்யோஜனம் அவிஜ்ஜானீவரணம் அனாரம்மணந்தி? ந ஹேவம் வத்தப்³பே³…பே… அவிஜ்ஜா அவிஜ்ஜோகோ⁴…பே… அவிஜ்ஜானீவரணம் ஸாரம்மணந்தி? ஆமந்தா. அவிஜ்ஜானுஸயோ ஸாரம்மணோதி? ந ஹேவம் வத்தப்³பே³…பே….

அவிஜ்ஜானுஸயோ அனாரம்மணோதி? ஆமந்தா. கதமக்க²ந்த⁴பரியாபன்னோதி? ஸங்கா²ரக்க²ந்த⁴பரியாபன்னோதி. ஸங்கா²ரக்க²ந்தோ⁴ அனாரம்மணோதி? ந ஹேவம் வத்தப்³பே³…பே… ஸங்கா²ரக்க²ந்தோ⁴ அனாரம்மணோதி? ஆமந்தா. வேத³னாக்க²ந்தோ⁴ ஸஞ்ஞாக்க²ந்தோ⁴ விஞ்ஞாணக்க²ந்தோ⁴ அனாரம்மணோதி? ந ஹேவம் வத்தப்³பே³…பே….

அவிஜ்ஜானுஸயோ ஸங்கா²ரக்க²ந்த⁴பரியாபன்னோ அனாரம்மணோதி? ஆமந்தா. அவிஜ்ஜா ஸங்கா²ரக்க²ந்த⁴பரியாபன்னா அனாரம்மணாதி? ந ஹேவம் வத்தப்³பே³…பே… அவிஜ்ஜா ஸங்கா²ரக்க²ந்த⁴பரியாபன்னா ஸாரம்மணாதி? ஆமந்தா. அவிஜ்ஜானுஸயோ ஸங்கா²ரக்க²ந்த⁴பரியாபன்னோ ஸாரம்மணோதி? ந ஹேவம் வத்தப்³பே³…பே….

அவிஜ்ஜானுஸயோ ஸங்கா²ரக்க²ந்த⁴பரியாபன்னோ அனாரம்மணோ, அவிஜ்ஜா ஸங்கா²ரக்க²ந்த⁴பரியாபன்னா ஸாரம்மணாதி? ஆமந்தா. ஸங்கா²ரக்க²ந்தோ⁴ ஏகதே³ஸோ ஸாரம்மணோ ஏகதே³ஸோ அனாரம்மணோதி? ந ஹேவம் வத்தப்³பே³…பே… ஸங்கா²ரக்க²ந்தோ⁴ ஏகதே³ஸோ ஸாரம்மணோ ஏகதே³ஸோ அனாரம்மணோதி? ஆமந்தா. வேத³னாக்க²ந்தோ⁴ ஸஞ்ஞாக்க²ந்தோ⁴ விஞ்ஞாணக்க²ந்தோ⁴ ஏகதே³ஸோ ஸாரம்மணோ ஏகதே³ஸோ அனாரம்மணோதி? ந ஹேவம் வத்தப்³பே³…பே….

556. ந வத்தப்³ப³ம் – ‘‘அனுஸயா அனாரம்மணா’’தி? ஆமந்தா. புது²ஜ்ஜனோ குஸலாப்³யாகதே சித்தே வத்தமானே ஸானுஸயோதி வத்தப்³போ³தி? ஆமந்தா. அத்தி² தேஸம் அனுஸயானம் ஆரம்மணந்தி? ந ஹேவம் வத்தப்³பே³…பே… தேன ஹி அனுஸயா அனாரம்மணாதி. புது²ஜ்ஜனோ குஸலாப்³யாகதே சித்தே வத்தமானே ஸராகோ³தி வத்தப்³போ³தி? ஆமந்தா. அத்தி² தஸ்ஸ ராக³ஸ்ஸ ஆரம்மணந்தி? ந ஹேவம் வத்தப்³பே³…பே…. தேன ஹி ராகோ³ அனாரம்மணோதி.

அனுஸயா அனாரம்மணாதிகதா² நிட்டி²தா.