(75) 3. காமகு³ணகதா²

510. பஞ்சேவ காமகு³ணா காமதா⁴தூதி? ஆமந்தா. நனு அத்தி² தப்படிஸஞ்ஞுத்தோ ச²ந்தோ³தி? ஆமந்தா. ஹஞ்சி அத்தி² தப்படிஸஞ்ஞுத்தோ ச²ந்தோ³, நோ ச வத ரே வத்தப்³பே³ – ‘‘பஞ்சேவ காமகு³ணா காமதா⁴தூ’’தி. நனு அத்தி² தப்படிஸஞ்ஞுத்தோ ராகோ³ தப்படிஸஞ்ஞுத்தோ ச²ந்தோ³ தப்படிஸஞ்ஞுத்தோ ச²ந்த³ராகோ³ தப்படிஸஞ்ஞுத்தோ ஸங்கப்போ தப்படிஸஞ்ஞுத்தோ ராகோ³ தப்படிஸஞ்ஞுத்தோ ஸங்கப்பராகோ³ தப்படிஸஞ்ஞுத்தா பீதி தப்படிஸஞ்ஞுத்தம் ஸோமனஸ்ஸம் தப்படிஸஞ்ஞுத்தம் பீதிஸோமனஸ்ஸந்தி? ஆமந்தா. ஹஞ்சி அத்தி² தப்படிஸஞ்ஞுத்தம் பீதிஸோமனஸ்ஸம், நோ ச வத ரே வத்தப்³பே³ – ‘‘பஞ்சேவ காமகு³ணா காமதா⁴தூ’’தி.

பஞ்சேவ காமகு³ணா காமதா⁴தூதி? ஆமந்தா. மனுஸ்ஸானம் சக்கு² ந காமதா⁴தூதி? ந ஹேவம் வத்தப்³பே³…பே… மனுஸ்ஸானம் ஸோதம்…பே… மனுஸ்ஸானம் கா⁴னம்…பே… மனுஸ்ஸானம் ஜிவ்ஹா…பே… மனுஸ்ஸானம் காயோ…பே… மனுஸ்ஸானம் மனோ ந காமதா⁴தூதி? ந ஹேவம் வத்தப்³பே³…பே….

மனுஸ்ஸானம் மனோ ந காமதா⁴தூதி? ஆமந்தா. நனு வுத்தம் ப⁴க³வதா –

‘‘பஞ்ச காமகு³ணா லோகே, மனோச்ச²ட்டா² பவேதி³தா;

ஏத்த² ச²ந்த³ம் விராஜேத்வா, ஏவம் து³க்கா² பமுச்சதீ’’தி [ஸு. நி. 173; ஸம். நி. 1.30].

அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘மனுஸ்ஸானம் மனோ ந காமதா⁴தூ’’தி.

511. பஞ்சேவ காமகு³ணா காமதா⁴தூதி? ஆமந்தா. காமகு³ணா ப⁴வோ க³தி ஸத்தாவாஸோ ஸம்ஸாரோ யோனி விஞ்ஞாணட்டி²தி அத்தபா⁴வபடிலாபோ⁴தி? ந ஹேவம் வத்தப்³பே³…பே… அத்தி² காமகு³ணூபக³ம் கம்மந்தி? ந ஹேவம் வத்தப்³பே³…பே… அத்தி² காமகு³ணூபகா³ ஸத்தாதி? ந ஹேவம் வத்தப்³பே³…பே… காமகு³ணே ஸத்தா ஜாயந்தி ஜீயந்தி மீயந்தி சவந்தி உபபஜ்ஜந்தீதி? ந ஹேவம் வத்தப்³பே³…பே… காமகு³ணே அத்தி² ரூபம் வேத³னா ஸஞ்ஞா ஸங்கா²ரா விஞ்ஞாணந்தி? ந ஹேவம் வத்தப்³பே³…பே… காமகு³ணா பஞ்சவோகாரப⁴வோதி? ந ஹேவம் வத்தப்³பே³…பே… காமகு³ணே ஸம்மாஸம்பு³த்³தா⁴ உப்பஜ்ஜந்தி, பச்சேகஸம்பு³த்³தா⁴ உப்பஜ்ஜந்தி, ஸாவகயுக³ம் உப்பஜ்ஜதீதி? ந ஹேவம் வத்தப்³பே³…பே….

காமதா⁴து ப⁴வோ க³தி ஸத்தாவாஸோ ஸம்ஸாரோ யோனி விஞ்ஞாணட்டி²தி அத்தபா⁴வபடிலாபோ⁴தி? ஆமந்தா. காமகு³ணா ப⁴வோ க³தி ஸத்தாவாஸோ ஸம்ஸாரோ யோனி விஞ்ஞாணட்டி²தி அத்தபா⁴வபடிலாபோ⁴தி? ந ஹேவம் வத்தப்³பே³…பே… அத்தி² காமதா⁴தூபக³ம் கம்மந்தி? ஆமந்தா. அத்தி² காமகு³ணூபக³ம் கம்மந்தி? ந ஹேவம் வத்தப்³பே³…பே… அத்தி² காமதா⁴தூபகா³ ஸத்தாதி? ஆமந்தா. அத்தி² காமகு³ணூபகா³ ஸத்தாதி? ந ஹேவம் வத்தப்³பே³…பே….

காமதா⁴துயா ஸத்தா ஜாயந்தி ஜீயந்தி மீயந்தி சவந்தி உபபஜ்ஜந்தீதி? ஆமந்தா. காமகு³ணே ஸத்தா ஜாயந்தி ஜீயந்தி மீயந்தி சவந்தி உபபஜ்ஜந்தீதி? ந ஹேவம் வத்தப்³பே³ …பே… காமதா⁴துயா அத்தி² ரூபம் வேத³னா ஸஞ்ஞா ஸங்கா²ரா விஞ்ஞாணந்தி? ஆமந்தா. காமகு³ணே அத்தி² ரூபம் வேத³னா ஸஞ்ஞா ஸங்கா²ரா விஞ்ஞாணந்தி? ந ஹேவம் வத்தப்³பே³…பே… காமதா⁴து பஞ்சவோகாரப⁴வோதி? ஆமந்தா. காமகு³ணா பஞ்சவோகாரப⁴வோதி? ந ஹேவம் வத்தப்³பே³…பே… காமதா⁴துயா ஸம்மாஸம்பு³த்³தா⁴ உப்பஜ்ஜந்தி, பச்சேகஸபு³த்³தா⁴ உப்பஜ்ஜந்தி, ஸாவகயுக³ம் உப்பஜ்ஜதீதி? ஆமந்தா. காமகு³ணே ஸம்மாஸம்பு³த்³தா⁴ உப்பஜ்ஜந்தி, பச்சேகஸம்பு³த்³தா⁴ உப்பஜ்ஜந்தி, ஸாவகயுக³ம் உப்பஜ்ஜதீதி? ந ஹேவம் வத்தப்³பே³…பே….

512. ந வத்தப்³ப³ம் – ‘‘பஞ்சேவ காமகு³ணா காமதா⁴தூ’’தி? ஆமந்தா. நனு வுத்தம் ப⁴க³வதா – ‘‘பஞ்சிமே, பி⁴க்க²வே, காமகு³ணா! கதமே பஞ்ச? சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா, ஸோதவிஞ்ஞேய்யா ஸத்³தா³…பே… கா⁴னவிஞ்ஞேய்யா க³ந்தா⁴…பே… ஜிவ்ஹாவிஞ்ஞேய்யா ரஸா…பே… காயவிஞ்ஞேய்யா போ²ட்ட²ப்³பா³ இட்டா² கந்தா மனாபா பியரூபா காமூபஸம்ஹிதா ரஜனீயா – இமே கோ², பி⁴க்க²வே, பஞ்ச காமகு³ணா’’தி. அத்தே²வ ஸுத்தந்தோதி? ஆமந்தா. தேன ஹி பஞ்சேவ காமகு³ணா காமதா⁴தூதி.

காமகு³ணகதா² நிட்டி²தா.