(68) 6. இதோதி³ன்னகதா²

488. இதோ தி³ன்னேன தத்த² யாபேந்தீதி? ஆமந்தா. இதோ சீவரம் தே³ந்தி தம் சீவரம் தத்த² பரிபு⁴ஞ்ஜந்தீதி? ந ஹேவம் வத்தப்³பே³…பே… இதோ பிண்ட³பாதம் தே³ந்தி, இதோ ஸேனாஸனம் தே³ந்தி, இதோ கி³லானபச்சயபே⁴ஸஜ்ஜபரிக்கா²ரம் தே³ந்தி, இதோ கா²த³னீயம் தே³ந்தி, இதோ போ⁴ஜனீயம் தே³ந்தி, இதோ பானீயம் தே³ந்தி; தம் பானீயம் தத்த² பரிபு⁴ஞ்ஜந்தீதி? ந ஹேவம் வத்தப்³பே³…பே….

இதோ தி³ன்னேன தத்த² யாபேந்தீதி? ஆமந்தா. அஞ்ஞோ அஞ்ஞஸ்ஸ காரகோ பரகதம் ஸுக²து³க்க²ம் அஞ்ஞோ கரோதி, அஞ்ஞோ படிஸம்வேதே³தீதி? ந ஹேவம் வத்தப்³பே³…பே….

489. ந வத்தப்³ப³ம் – ‘‘இதோ தி³ன்னேன தத்த² யாபேந்தீ’’தி? ஆமந்தா. நனு பேதா அத்தனோ அத்தா²ய தா³னம் தே³ந்தம் அனுமோதே³ந்தி, சித்தம் பஸாதே³ந்தி, பீதிம் உப்பாதே³ந்தி, ஸோமனஸ்ஸம் படிலப⁴ந்தீதி? ஆமந்தா. ஹஞ்சி பேதா அத்தனோ அத்தா²ய தா³னம் தே³ந்தம் அனுமோதே³ந்தி, சித்தம் பஸாதே³ந்தி, பீதிம் உப்பாதே³ந்தி, ஸோமனஸ்ஸம் படிலப⁴ந்தி; தேன வத ரே வத்தப்³பே³ – ‘‘இதோ தி³ன்னேன தத்த² யாபேந்தீ’’தி.

490. ந வத்தப்³ப³ம் – ‘‘இதோ தி³ன்னேன தத்த² யாபேந்தீ’’தி? ஆமந்தா. நனு வுத்தம் ப⁴க³வதா –

‘‘உன்னமே உத³கம் வுட்ட²ம், யதா²னின்னம் பவத்ததி;

ஏவமேவ இதோ தி³ன்னம், பேதானம் உபகப்பதி.

‘‘யதா² வாரிவஹா பூரா, பரிபூரேந்தி ஸாக³ரம்;

ஏவமேவ இதோ தி³ன்னம், பேதானம் உபகப்பதி.

‘‘ந ஹி தத்த² கஸீ அத்தி², கோ³ரக்கே²த்த² ந விஜ்ஜதி;

வணிஜ்ஜா தாதி³ஸீ நத்தி², ஹிரஞ்ஞேன கயாகயம் [கயக்கயம் (ஸீ. பீ.)];

இதோ தி³ன்னேன யாபேந்தி, பேதா காலங்கதா தஹி’’ந்தி [கு². பா. 7.6; பே. வ. 19].

அத்தே²வ ஸுத்தந்தோதி? ஆமந்தா. தேன ஹி இதோ தி³ன்னேன தத்த² யாபேந்தீதி.

491. ந வத்தப்³ப³ம் – ‘‘இதோ தி³ன்னேன தத்த² யாபேந்தீ’’தி? ஆமந்தா. நனு வுத்தம் ப⁴க³வதா – ‘‘பஞ்சிமானி, பி⁴க்க²வே, டா²னானி ஸம்பஸ்ஸந்தா மாதாபிதரோ புத்தம் இச்ச²ந்தி குலே ஜாயமானம்! கதமானி பஞ்ச? ப⁴டோ வா நோ ப⁴ரிஸ்ஸதி, கிச்சம் வா நோ கரிஸ்ஸதி, குலவம்ஸோ சிரம் ட²ஸ்ஸதி, தா³யஜ்ஜம் படிபஜ்ஜிஸ்ஸதி, அத² வா பன பேதானம் காலங்கதானம் த³க்கி²ணம் அனுப்பத³ஸ்ஸதி – இமானி கோ², பி⁴க்க²வே, பஞ்ச டா²னானி ஸம்பஸ்ஸந்தா மாதாபிதரோ புத்தம் இச்ச²ந்தி குலே ஜாயமான’’ந்தி.

‘‘பஞ்ச டா²னானி ஸம்பஸ்ஸம், புத்தம் இச்ச²ந்தி பண்டி³தா;

ப⁴டோ வா நோ ப⁴ரிஸ்ஸதி, கிச்சம் வா நோ கரிஸ்ஸதி.

‘‘குலவம்ஸோ சிரம் திட்டே², தா³யஜ்ஜம் படிபஜ்ஜதி;

அத² வா பன பேதானம், த³க்கி²ணம் அனுப்பத³ஸ்ஸதி.

‘‘டா²னானேதானி ஸம்பஸ்ஸம், புத்தம் இச்ச²ந்தி பண்டி³தா;

தஸ்மா ஸந்தோ ஸப்புரிஸா, கதஞ்ஞூ கதவேதி³னோ.

‘‘ப⁴ரந்தி மாதாபிதரோ, புப்³பே³ கதமனுஸ்ஸரம்;

கரோந்தி தேஸம் கிச்சானி, யதா² தம் புப்³ப³காரினம்.

‘‘ஓவாத³காரீ ப⁴டபோஸீ, குலவம்ஸம் அஹாபயம்;

ஸத்³தோ⁴ ஸீலேன ஸம்பன்னோ, புத்தோ ஹோதி பஸம்ஸியோ’’தி [அ. நி. 5.31].

அத்தே²வ ஸுத்தந்தோதி? ஆமந்தா. தேன ஹி இதோ தி³ன்னேன தத்த² யாபேந்தீதி.

இதோ தி³ன்னகதா² நிட்டி²தா.