6. ச²ட்ட²வக்³கோ³

(53) 1. நியாமகதா²

445. நியாமோ அஸங்க²தோதி? ஆமந்தா. நிப்³பா³னம் தாணம் லேணம் ஸரணம் பராயனம் அச்சுதம் அமதந்தி? ந ஹேவம் வத்தப்³பே³…பே….

நியாமோ அஸங்க²தோ, நிப்³பா³னம் அஸங்க²தந்தி? ஆமந்தா. த்³வே அஸங்க²தானீதி? ந ஹேவம் வத்தப்³பே³…பே….

த்³வே அஸங்க²தானீதி? ஆமந்தா. த்³வே தாணானி த்³வே லேணானி த்³வே ஸரணானி த்³வே பராயனானி த்³வே அச்சுதானி த்³வே அமதானி த்³வே நிப்³பா³னானீதி? ந ஹேவம் வத்தப்³பே³…பே….

த்³வே நிப்³பா³னானீதி? ஆமந்தா. அத்தி² த்³வின்னம் நிப்³பா³னானம் உச்சனீசதா ஹீனபணீததா உக்கம்ஸாவகம்ஸோ ஸீமா வா பே⁴தோ³ வா ராஜி வா அந்தரிகா வாதி? ந ஹேவம் வத்தப்³பே³…பே….

நியாமோ அஸங்க²தோதி? ஆமந்தா. அத்தி² கேசி நியாமம் ஓக்கமந்தி படிலப⁴ந்தி உப்பாதே³ந்தி ஸமுப்பாதே³ந்தி உட்டா²பேந்தி ஸமுட்டா²பேந்தி நிப்³ப³த்தேந்தி அபி⁴னிப்³ப³த்தேந்தி ஜனேந்தி ஸஞ்ஜனேந்தீதி? ஆமந்தா. அத்தி² கேசி அஸங்க²தம் ஓக்கமந்தி படிலப⁴ந்தி உப்பாதே³ந்தி ஸமுப்பாதே³ந்தி உட்டா²பேந்தி ஸமுட்டா²பேந்தி நிப்³ப³த்தேந்தி அபி⁴னிப்³ப³த்தேந்தி ஜனேந்தி ஸஞ்ஜனேந்தீதி? ந ஹேவம் வத்தப்³பே³…பே….

446. நியாமோ அஸங்க²தோதி? ஆமந்தா. மக்³கோ³ அஸங்க²தோதி? ந ஹேவம் வத்தப்³பே³…பே….

மக்³கோ³ ஸங்க²தோதி? ஆமந்தா. நியாமோ ஸங்க²தோதி? ந ஹேவம் வத்தப்³பே³…பே….

ஸோதாபத்தினியாமோ அஸங்க²தோதி? ஆமந்தா. ஸோதாபத்திமக்³கோ³ அஸங்க²தோதி? ந ஹேவம் வத்தப்³பே³…பே….

ஸோதாபத்திமக்³கோ³ ஸங்க²தோதி? ஆமந்தா. ஸோதாபத்தினியாமோ ஸங்க²தோதி? ந ஹேவம் வத்தப்³பே³…பே….

ஸகதா³கா³மினியாமோ…பே… அனாகா³மினியாமோ…பே… அரஹத்தனியாமோ அஸங்க²தோதி? ஆமந்தா. அரஹத்தமக்³கோ³ அஸங்க²தோதி? ந ஹேவம் வத்தப்³பே³ …பே… அரஹத்தமக்³கோ³ ஸங்க²தோதி? ஆமந்தா. அரஹத்தனியாமோ ஸங்க²தோதி? ந ஹேவம் வத்தப்³பே³…பே….

ஸோதாபத்தினியாமோ அஸங்க²தோ…பே… அரஹத்தனியாமோ அஸங்க²தோ, நிப்³பா³னம் அஸங்க²தந்தி? ஆமந்தா. பஞ்ச அஸங்க²தானீதி? ந ஹேவம் வத்தப்³பே³…பே… பஞ்ச அஸங்க²தானீதி? ஆமந்தா. பஞ்ச தாணானி…பே… அந்தரிகா வாதி? ந ஹேவம் வத்தப்³பே³…பே….

நியாமோ அஸங்க²தோதி? ஆமந்தா. மிச்ச²த்தனியாமோ அஸங்க²தோதி? ந ஹேவம் வத்தப்³பே³…பே… மிச்ச²த்தனியாமோ ஸங்க²தோதி? ஆமந்தா. ஸம்மத்தனியாமோ ஸங்க²தோதி? ந ஹேவம் வத்தப்³பே³…பே….

447. ந வத்தப்³ப³ம் – ‘‘நியாமோ அஸங்க²தோ’’தி? ஆமந்தா. நியாமே உப்பஜ்ஜ நிருத்³தே⁴ அனியதோ ஹோதீதி? ந ஹேவம் வத்தப்³பே³…பே…. தேன ஹி நியாமோ அஸங்க²தோதி. மிச்ச²த்தனியாமே உப்பஜ்ஜ நிருத்³தே⁴ அனியதோ ஹோதீதி? ந ஹேவம் வத்தப்³பே³…பே… தேன ஹி மிச்ச²த்தனியாமோ அஸங்க²தோதி.

நியாமகதா² நிட்டி²தா.

6. ச²ட்ட²வக்³கோ³

(54) 2. படிச்சஸமுப்பாத³கதா²

448. படிச்சஸமுப்பாதோ³ அஸங்க²தோதி? ஆமந்தா. நிப்³பா³னம் தாணம் லேணம் ஸரணம் பராயனம் அச்சுதம் அமதந்தி? ந ஹேவம் வத்தப்³பே³…பே… படிச்சஸமுப்பாதோ³ அஸங்க²தோ, நிப்³பா³னம் அஸங்க²தந்தி? ஆமந்தா. த்³வே அஸங்க²தானீதி? ந ஹேவம் வத்தப்³பே³…பே… த்³வே அஸங்க²தானீதி? ஆமந்தா. த்³வே தாணானி த்³வே லேணானி த்³வே ஸரணானி த்³வே பராயனானி த்³வே அச்சுதானி த்³வே அமதானி த்³வே நிப்³பா³னானீதி? ந ஹேவம் வத்தப்³பே³…பே… த்³வே நிப்³பா³னானீதி? ஆமந்தா. அத்தி² த்³வின்னம் நிப்³பா³னானம் உச்சனீசதா ஹீனபணீததா உக்கம்ஸாவகம்ஸோ ஸீமா வா பே⁴தோ³ வா ராஜி வா அந்தரிகா வாதி? ந ஹேவம் வத்தப்³பே³…பே….

449. படிச்சஸமுப்பாதோ³ அஸங்க²தோதி? ஆமந்தா. அவிஜ்ஜா அஸங்க²தாதி? ந ஹேவம் வத்தப்³பே³…பே… அவிஜ்ஜா ஸங்க²தாதி? ஆமந்தா. படிச்சஸமுப்பாதோ³ ஸங்க²தோதி? ந ஹேவம் வத்தப்³பே³…பே… படிச்சஸமுப்பாதோ³ அஸங்க²தோதி? ஆமந்தா. அவிஜ்ஜாபச்சயா ஸங்கா²ரா அஸங்க²தாதி? ந ஹேவம் வத்தப்³பே³…பே… அவிஜ்ஜாபச்சயா ஸங்கா²ரா ஸங்க²தாதி? ஆமந்தா. படிச்சஸமுப்பாதோ³ ஸங்க²தோதி? ந ஹேவம் வத்தப்³பே³…பே… படிச்சஸமுப்பாதோ³ அஸங்க²தோதி? ஆமந்தா. ஸங்கா²ரபச்சயா விஞ்ஞாணம் அஸங்க²தந்தி? ந ஹேவம் வத்தப்³பே³…பே… ஸங்கா²ரபச்சயா விஞ்ஞாணம் ஸங்க²தந்தி? ஆமந்தா. படிச்சஸமுப்பாதோ³ ஸங்க²தோதி? ந ஹேவம் வத்தப்³பே³…பே… படிச்சஸமுப்பாதோ³ அஸங்க²தோதி? ஆமந்தா. விஞ்ஞாணபச்சயா நாமரூபம் அஸங்க²தந்தி? ந ஹேவம் வத்தப்³பே³…பே… விஞ்ஞாணபச்சயா நாமரூபம் ஸங்க²தந்தி? ஆமந்தா. படிச்சஸமுப்பாதோ³ ஸங்க²தோதி? ந ஹேவம் வத்தப்³பே³…பே… படிச்சஸமுப்பாதோ³ அஸங்க²தோதி? ஆமந்தா. ஜாதிபச்சயா ஜராமரணம் அஸங்க²தந்தி? ந ஹேவம் வத்தப்³பே³…பே… ஜாதிபச்சயா ஜராமரணம் ஸங்க²தந்தி? ஆமந்தா. படிச்சஸமுப்பாதோ³ ஸங்க²தோதி? ந ஹேவம் வத்தப்³பே³…பே….

450. ந வத்தப்³ப³ம் – ‘‘படிச்சஸமுப்பாதோ³ அஸங்க²தோ’’தி? ஆமந்தா. நனு வுத்தம் ப⁴க³வதா – ‘‘ஜாதிபச்சயா, பி⁴க்க²வே, ஜராமரணம். உப்பாதா³ வா ததா²க³தானம் அனுப்பாதா³ வா ததா²க³தானம் டி²தாவ ஸா தா⁴து த⁴ம்மட்டி²ததா த⁴ம்மனியாமதா இத³ப்பச்சயதா. தம் ததா²க³தோ அபி⁴ஸம்பு³ஜ்ஜ²தி அபி⁴ஸமேதி. அபி⁴ஸம்பு³ஜ்ஜி²த்வா அபி⁴ஸமேத்வா ஆசிக்க²தி தே³ஸேதி பஞ்ஞாபேதி பட்ட²பேதி விவரதி விப⁴ஜதி உத்தானிம் கரோதி. ‘பஸ்ஸதா²’தி சாஹ – ஜாதிபச்சயா, பி⁴க்க²வே, ஜராமரணம். ப⁴வபச்சயா, பி⁴க்க²வே, ஜாதி…பே… அவிஜ்ஜாபச்சயா, பி⁴க்க²வே, ஸங்கா²ரா. உப்பாதா³ வா ததா²க³தானம் அனுப்பாதா³ வா ததா²க³தானம் டி²தாவ ஸா தா⁴து…பே… ‘பஸ்ஸதா²’தி சாஹ – அவிஜ்ஜாபச்சயா, பி⁴க்க²வே, ஸங்கா²ரா. இதி கோ², பி⁴க்க²வே, யா தத்ர தத²தா அவிதத²தா அனஞ்ஞத²தா இத³ப்பச்சயதா – அயம் வுச்சதி, பி⁴க்க²வே, படிச்சஸமுப்பாதோ³’’தி [ஸம். நி. 2.20]. அத்தே²வ ஸுத்தந்தோதி? ஆமந்தா. தேன ஹி படிச்சஸமுப்பாதோ³ அஸங்க²தோதி.

451. அவிஜ்ஜாபச்சயா ஸங்கா²ராதி யா தத்த² த⁴ம்மட்டி²ததா த⁴ம்மனியாமதா அஸங்க²தா, நிப்³பா³னம் அஸங்க²தந்தி? ஆமந்தா. த்³வே அஸங்க²தானீதி? ந ஹேவம் வத்தப்³பே³…பே… த்³வே அஸங்க²தானீதி? ஆமந்தா. த்³வே தாணானி…பே… அந்தரிகா வாதி? ந ஹேவம் வத்தப்³பே³…பே….

அவிஜ்ஜாபச்சயா ஸங்கா²ராதி யா தத்த² த⁴ம்மட்டி²ததா த⁴ம்மனியாமதா அஸங்க²தா, ஸங்கா²ரபச்சயா விஞ்ஞாணந்தி யா தத்த² த⁴ம்மட்டி²ததா த⁴ம்மனியாமதா அஸங்க²தா, நிப்³பா³னம் அஸங்க²தந்தி? ஆமந்தா. தீணி அஸங்க²தானீதி? ந ஹேவம் வத்தப்³பே³…பே…. தீணி அஸங்க²தானீதி? ஆமந்தா. தீணி தாணானி…பே… அந்தரிகா வாதி? ந ஹேவம் வத்தப்³பே³…பே….

அவிஜ்ஜாபச்சயா ஸங்கா²ராதி யா தத்த² த⁴ம்மட்டி²ததா த⁴ம்மனியாமதா அஸங்க²தா, ஸங்கா²ரபச்சயா விஞ்ஞாணந்தி யா தத்த² த⁴ம்மட்டி²ததா த⁴ம்மனியாமதா அஸங்க²தா…பே… ஜாதிபச்சயா ஜராமரணந்தி யா தத்த² த⁴ம்மட்டி²ததா த⁴ம்மனியாமதா அஸங்க²தா, நிப்³பா³னம் அஸங்க²தந்தி? ஆமந்தா. த்³வாத³ஸ அஸங்க²தானீதி? ந ஹேவம் வத்தப்³பே³…பே… த்³வாத³ஸ அஸங்க²தானீதி? ஆமந்தா. த்³வாத³ஸ தாணானி த்³வாத³ஸ லேணானி…பே… அந்தரிகா வாதி? ந ஹேவம் வத்தப்³பே³…பே….

படிச்சஸமுப்பாத³கதா² நிட்டி²தா.

6. ச²ட்ட²வக்³கோ³

(55) 3. ஸச்சகதா²

452. சத்தாரி ஸச்சானி அஸங்க²தானீதி? ஆமந்தா. சத்தாரி தாணானி சத்தாரி லேணானி சத்தாரி ஸரணானி சத்தாரி பராயனானி சத்தாரி அச்சுதானி சத்தாரி அமதானி சத்தாரி நிப்³பா³னானீதி? ந ஹேவம் வத்தப்³பே³…பே… சத்தாரி நிப்³பா³னானீதி? ஆமந்தா. அத்தி² சதுன்னம் நிப்³பா³னானம் உச்சனீசதா ஹீனபணீததா உக்கம்ஸாவகம்ஸோ ஸீமா வா பே⁴தோ³ வா ராஜி வா அந்தரிகா வாதி? ந ஹேவம் வத்தப்³பே³…பே….

து³க்க²ஸச்சம் அஸங்க²தந்தி? ஆமந்தா. து³க்க²ம் அஸங்க²தந்தி? ந ஹேவம் வத்தப்³பே³…பே… து³க்க²ஸச்சம் அஸங்க²தந்தி? ஆமந்தா. காயிகம் து³க்க²ம் சேதஸிகம் து³க்க²ம் ஸோகபரிதே³வது³க்க²தோ³மனஸ்ஸஉபாயாஸா அஸங்க²தாதி? ந ஹேவம் வத்தப்³பே³…பே… ஸமுத³யஸச்சம் அஸங்க²தந்தி? ஆமந்தா. ஸமுத³யோ அஸங்க²தோதி? ந ஹேவம் வத்தப்³பே³…பே… ஸமுத³யஸச்சம் அஸங்க²தந்தி? ஆமந்தா. காமதண்ஹா ப⁴வதண்ஹா விப⁴வதண்ஹா அஸங்க²தாதி? ந ஹேவம் வத்தப்³பே³…பே… மக்³க³ஸச்சம் அஸங்க²தந்தி? ஆமந்தா. மக்³கோ³ அஸங்க²தோதி? ந ஹேவம் வத்தப்³பே³…பே… மக்³க³ஸச்சம் அஸங்க²தந்தி? ஆமந்தா. ஸம்மாதி³ட்டி²…பே… ஸம்மாஸமாதி⁴ அஸங்க²தோதி? ந ஹேவம் வத்தப்³பே³…பே….

து³க்க²ம் ஸங்க²தந்தி? ஆமந்தா. து³க்க²ஸச்சம் ஸங்க²தந்தி? ந ஹேவம் வத்தப்³பே³…பே… காயிகம் து³க்க²ம் சேதஸிகம் து³க்க²ம் ஸோகபரிதே³வது³க்க²தோ³மனஸ்ஸஉபாயாஸா ஸங்க²தாதி? ஆமந்தா. து³க்க²ஸச்சம் ஸங்க²தந்தி? ந ஹேவம் வத்தப்³பே³…பே… ஸமுத³யோ ஸங்க²தோதி? ஆமந்தா. ஸமுத³யஸச்சம் ஸங்க²தந்தி? ந ஹேவம் வத்தப்³பே³…பே… காமதண்ஹா ப⁴வதண்ஹா விப⁴வதண்ஹா ஸங்க²தாதி? ஆமந்தா. ஸமுத³யஸச்சம் ஸங்க²தந்தி? ந ஹேவம் வத்தப்³பே³…பே… மக்³கோ³ ஸங்க²தோதி? ஆமந்தா. மக்³க³ஸச்சம் ஸங்க²தந்தி? ந ஹேவம் வத்தப்³பே³…பே… ஸம்மாதி³ட்டி²…பே… ஸம்மாஸமாதி⁴ ஸங்க²தோதி? ஆமந்தா. மக்³க³ஸச்சம் ஸங்க²தந்தி? ந ஹேவம் வத்தப்³பே³…பே….

453. நிரோத⁴ஸச்சம் அஸங்க²தம், நிரோதோ⁴ அஸங்க²தோதி? ஆமந்தா. து³க்க²ஸச்சம் அஸங்க²தம், து³க்க²ம் அஸங்க²தந்தி? ந ஹேவம் வத்தப்³பே³…பே… நிரோத⁴ஸச்சம் அஸங்க²தம், நிரோதோ⁴ அஸங்க²தோதி? ஆமந்தா. ஸமுத³யஸச்சம் அஸங்க²தம், ஸமுத³யோ அஸங்க²தோதி? ந ஹேவம் வத்தப்³பே³…பே… நிரோத⁴ஸச்சம் அஸங்க²தம், நிரோதோ⁴ அஸங்க²தோதி? ஆமந்தா. மக்³க³ஸச்சம் அஸங்க²தம், மக்³கோ³ அஸங்க²தோதி? ந ஹேவம் வத்தப்³பே³…பே….

து³க்க²ஸச்சம் அஸங்க²தம், து³க்க²ம் ஸங்க²தந்தி? ஆமந்தா. நிரோத⁴ஸச்சம் அஸங்க²தம், நிரோதோ⁴ ஸங்க²தோதி? ந ஹேவம் வத்தப்³பே³…பே… ஸமுத³யஸச்சம் அஸங்க²தம், ஸமுத³யோ ஸங்க²தோதி? ஆமந்தா. நிரோத⁴ஸச்சம் அஸங்க²தம், நிரோதோ⁴ ஸங்க²தோதி? ந ஹேவம் வத்தப்³பே³…பே… மக்³க³ஸச்சம் அஸங்க²தம், மக்³கோ³ ஸங்க²தோதி? ஆமந்தா. நிரோத⁴ஸச்சம் அஸங்க²தம், நிரோதோ⁴ ஸங்க²தோதி? ந ஹேவம் வத்தப்³பே³…பே….

454. ந வத்தப்³ப³ம் – ‘‘சத்தாரி ஸச்சானி அஸங்க²தானீ’’தி? ஆமந்தா. நனு வுத்தம் ப⁴க³வதா – ‘‘சத்தாரிமானி, பி⁴க்க²வே, ததா²னி அவிததா²னி அனஞ்ஞதா²னி! கதமானி சத்தாரி? ‘இத³ம் து³க்க²’ந்தி, பி⁴க்க²வே, தத²மேதம் அவிதத²மேதம் அனஞ்ஞத²மேதம்…பே… ‘அயம் து³க்க²ஸமுத³யோ’தி…பே… ‘அயம் து³க்க²னிரோதோ⁴’தி…பே… ‘அயம் து³க்க²னிரோத⁴கா³மினீ படிபதா³’தி தத²மேதம் அவிதத²மேதம் அனஞ்ஞத²மேதம். இமானி கோ², பி⁴க்க²வே, சத்தாரி ததா²னி அவிததா²னி அனஞ்ஞதா²னீ’’தி [ஸம். நி. 5.1090]. அத்தே²வ ஸுத்தந்தோதி? ஆமந்தா. தேன ஹி சத்தாரி ஸச்சானி அஸங்க²தானீதி.

ஸச்சகதா² நிட்டி²தா.

6. ச²ட்ட²வக்³கோ³

(56) 4. ஆருப்பகதா²

455. ஆகாஸானஞ்சாயதனம் அஸங்க²தந்தி? ஆமந்தா. நிப்³பா³னம் தாணம் லேணம் ஸரணம் பராயனம் அச்சுதம் அமதந்தி? ந ஹேவம் வத்தப்³பே³…பே… ஆகாஸானஞ்சாயதனம் அஸங்க²தம், நிப்³பா³னம் அஸங்க²தந்தி? ஆமந்தா. த்³வே அஸங்க²தானீதி? ந ஹேவம் வத்தப்³பே³…பே… த்³வே அஸங்க²தானீதி? ஆமந்தா. த்³வே தாணானி…பே… அந்தரிகா வாதி? ந ஹேவம் வத்தப்³பே³…பே….

ஆகாஸானஞ்சாயதனம் அஸங்க²தந்தி? ஆமந்தா. ஆகாஸானஞ்சாயதனம் ப⁴வோ க³தி ஸத்தாவாஸோ ஸம்ஸாரோ யோனி விஞ்ஞாணட்டி²தி அத்தபா⁴வபடிலாபோ⁴தி? ஆமந்தா. அஸங்க²தம் ப⁴வோ க³தி ஸத்தாவாஸோ ஸம்ஸாரோ யோனி விஞ்ஞாணட்டி²தி அத்தபா⁴வபடிலாபோ⁴தி? ந ஹேவம் வத்தப்³பே³…பே….

அத்தி² ஆகாஸானஞ்சாயதனூபக³ம் கம்மந்தி? ஆமந்தா. அத்தி² அஸங்க²தூபக³ம் கம்மந்தி? ந ஹேவம் வத்தப்³பே³…பே… அத்தி² ஆகாஸானஞ்சாயதனூபகா³ ஸத்தாதி? ஆமந்தா. அத்தி² அஸங்க²தூபகா³ ஸத்தாதி? ந ஹேவம் வத்தப்³பே³…பே….

ஆகாஸானஞ்சாயதனே ஸத்தா ஜாயந்தி ஜீயந்தி மீயந்தி சவந்தி உபபஜ்ஜந்தீதி? ஆமந்தா. அஸங்க²தே ஸத்தா ஜாயந்தி ஜீயந்தி மீயந்தி சவந்தி உபபஜ்ஜந்தீதி? ந ஹேவம் வத்தப்³பே³…பே… ஆகாஸானஞ்சாயதனே அத்தி² வேத³னா ஸஞ்ஞா ஸங்கா²ரா விஞ்ஞாணந்தி? ஆமந்தா. அஸங்க²தே அத்தி² வேத³னா ஸஞ்ஞா ஸங்கா²ரா விஞ்ஞாணந்தி? ந ஹேவம் வத்தப்³பே³…பே… ஆகாஸானஞ்சாயதனம் சதுவோகாரப⁴வோதி? ஆமந்தா. அஸங்க²தம் சதுவோகாரப⁴வோதி? ந ஹேவம் வத்தப்³பே³…பே….

456. ந வத்தப்³ப³ம் – ‘‘சத்தாரோ ஆருப்பா அஸங்க²தா’’தி? ஆமந்தா. நனு சத்தாரோ ஆருப்பா அனேஜா வுத்தா ப⁴க³வதாதி? ஆமந்தா. ஹஞ்சி சத்தாரோ ஆருப்பா அனேஜா வுத்தா ப⁴க³வதா, தேன வத ரே வத்தப்³பே³ ‘‘சத்தாரோ ஆருப்பா அஸங்க²தா’’தி.

ஆருப்பகதா² நிட்டி²தா.

6. ச²ட்ட²வக்³கோ³

(57) 5. நிரோத⁴ஸமாபத்திகதா²

457. நிரோத⁴ஸமாபத்தி அஸங்க²தாதி? ஆமந்தா. நிப்³பா³னம் தாணம் லேணம் ஸரணம் பராயனம் அச்சுதம் அமதந்தி? ந ஹேவம் வத்தப்³பே³…பே… நிரோத⁴ஸமாபத்தி அஸங்க²தா, நிப்³பா³னம் அஸங்க²தந்தி? ஆமந்தா. த்³வே அஸங்க²தானீதி? ந ஹேவம் வத்தப்³பே³…பே… த்³வே அஸங்க²தானீதி? ஆமந்தா. த்³வே தாணானி…பே… அந்தரிகா வாதி? ந ஹேவம் வத்தப்³பே³…பே….

நிரோத⁴ஸமாபத்தி அஸங்க²தாதி? ஆமந்தா. அத்தி² கேசி நிரோத⁴ம் ஸமாபஜ்ஜந்தி படிலப⁴ந்தி உப்பாதே³ந்தி ஸமுப்பாதே³ந்தி உட்ட²பேந்தி ஸமுட்ட²பேந்தி நிப்³ப³த்தேந்தி அபி⁴னிப்³ப³த்தேந்தி ஜனேந்தி ஸஞ்ஜனேந்தீதி? ஆமந்தா. அத்தி² கேசி அஸங்க²தம் ஸமாபஜ்ஜந்தி படிலப⁴ந்தி உப்பாதே³ந்தி ஸமுப்பாதே³ந்தி உட்ட²பேந்தி ஸமுட்ட²பேந்தி நிப்³ப³த்தேந்தி அபி⁴னிப்³ப³த்தேந்தி ஜனேந்தி ஸஞ்ஜனேந்தீதி? ந ஹேவம் வத்தப்³பே³…பே….

458. நிரோதா⁴ வோதா³னம் வுட்டா²னம் பஞ்ஞாயதீதி? ஆமந்தா. அஸங்க²தா வோதா³னம் வுட்டா²னம் பஞ்ஞாயதீதி? ந ஹேவம் வத்தப்³பே³…பே… நிரோத⁴ம் ஸமாபஜ்ஜந்தஸ்ஸ பட²மம் நிருஜ்ஜ²தி வசீஸங்கா²ரோ, ததோ காயஸங்கா²ரோ, ததோ சித்தஸங்கா²ரோதி? ஆமந்தா. அஸங்க²தம் ஸமாபஜ்ஜந்தஸ்ஸ பட²மம் நிருஜ்ஜ²தி வசீஸங்கா²ரோ, ததோ காயஸங்கா²ரோ, ததோ சித்தஸங்கா²ரோதி? ந ஹேவம் வத்தப்³பே³…பே… நிரோதா⁴ வுட்ட²ஹந்தஸ்ஸ பட²மம் உப்பஜ்ஜதி சித்தஸங்கா²ரோ, ததோ காயஸங்கா²ரோ, ததோ வசீஸங்கா²ரோதி? ஆமந்தா. அஸங்க²தா வுட்ட²ஹந்தஸ்ஸ பட²மம் உப்பஜ்ஜதி சித்தஸங்கா²ரோ, ததோ காயஸங்கா²ரோ, ததோ வசீஸங்கா²ரோதி? ந ஹேவம் வத்தப்³பே³…பே….

நிரோதா⁴ வுட்டி²தம் தயோ ப²ஸ்ஸா பு²ஸந்தி – ஸுஞ்ஞதோ ப²ஸ்ஸோ, அனிமித்தோ ப²ஸ்ஸோ, அப்பணிஹிதோ ப²ஸ்ஸோதி? ஆமந்தா. அஸங்க²தா வுட்டி²தம் தயோ ப²ஸ்ஸா பு²ஸந்தி – ஸுஞ்ஞதோ ப²ஸ்ஸோ, அனிமித்தோ ப²ஸ்ஸோ, அப்பணிஹிதோ ப²ஸ்ஸோதி? ந ஹேவம் வத்தப்³பே³…பே….

நிரோதா⁴ வுட்டி²தஸ்ஸ விவேகனின்னம் சித்தம் ஹோதி விவேகபோணம் விவேகபப்³பா⁴ரந்தி? ஆமந்தா. அஸங்க²தா வுட்டி²தஸ்ஸ விவேகனின்னம் சித்தம் ஹோதி விவேகபோணம் விவேகபப்³பா⁴ரந்தி? ந ஹேவம் வத்தப்³பே³…பே….

459. ந வத்தப்³ப³ம் – ‘‘நிரோத⁴ஸமாபத்தி அஸங்க²தா’’தி? ஆமந்தா. ஸங்க²தாதி? ந ஹேவம் வத்தப்³பே³…பே… தேன ஹி நிரோத⁴ஸமாபத்தி அஸங்க²தாதி.

நிரோத⁴ஸமாபத்திகதா² நிட்டி²தா.

6. ச²ட்ட²வக்³கோ³

(58) 6. ஆகாஸகதா²

460. ஆகாஸோ அஸங்க²தோதி? ஆமந்தா. நிப்³பா³னம் தாணம் லேணம் ஸரணம் பராயனம் அச்சுதம் அமதந்தி? ந ஹேவம் வத்தப்³பே³…பே… ஆகாஸோ அஸங்க²தோ, நிப்³பா³னம் அஸங்க²தந்தி? ஆமந்தா. த்³வே அஸங்க²தானீதி? ந ஹேவம் வத்தப்³பே³…பே…. த்³வே அஸங்க²தானீதி? ஆமந்தா. த்³வே தாணானி…பே… அந்தரிகா வாதி? ந ஹேவம் வத்தப்³பே³…பே….

ஆகாஸோ அஸங்க²தோதி? ஆமந்தா. அத்தி² கேசி அனாகாஸம் ஆகாஸம் கரோந்தீதி? ஆமந்தா. அத்தி² கேசி ஸங்க²தம் அஸங்க²தம் கரோந்தீதி? ந ஹேவம் வத்தப்³பே³…பே… அத்தி² கேசி ஆகாஸம் அனாகாஸம் கரோந்தீதி? ஆமந்தா. அத்தி² கேசி அஸங்க²தம் ஸங்க²தம் கரோந்தீதி? ந ஹேவம் வத்தப்³பே³…பே….

ஆகாஸே பக்கி²னோ க³ச்ச²ந்தி, சந்தி³மஸூரியா க³ச்ச²ந்தி, தாரகரூபானி க³ச்ச²ந்தி, இத்³தி⁴ம் விகுப்³ப³ந்தி, பா³ஹும் சாலேந்தி, பாணிம் சாலேந்தி, லேட்³டு³ம் கி²பந்தி, லகு³ளம் கி²பந்தி, இத்³தி⁴ம் [ஸத்திம் (?)] கி²பந்தி, உஸும் கி²பந்தீதி? ஆமந்தா. அஸங்க²தே பக்கி²னோ க³ச்ச²ந்தி, சந்தி³மஸூரியா க³ச்ச²ந்தி, தாரகரூபானி க³ச்ச²ந்தி, இத்³தி⁴ம் விகுப்³ப³ந்தி, பா³ஹும் சாலேந்தி, பாணிம் சாலேந்தி, லேட்³டு³ம் கி²பந்தி, லகு³ளம் கி²பந்தி, இத்³தி⁴ம் கி²பந்தி, உஸும் கி²பந்தீதி? ந ஹேவம் வத்தப்³பே³…பே….

461. ஆகாஸம் பரிவாரேத்வா க⁴ரானி கரோந்தி கோட்டா²னி கரோந்தீதி? ஆமந்தா. அஸங்க²தம் பரிவாரேத்வா க⁴ரானி கரோந்தி கோட்டா²னி கரோந்தீதி? ந ஹேவம் வத்தப்³பே³…பே….

உத³பானே க²ஞ்ஞமானே அனாகாஸோ ஆகாஸோ ஹோதீதி? ஆமந்தா. ஸங்க²தம் அஸங்க²தம் ஹோதீதி? ந ஹேவம் வத்தப்³பே³…பே….

துச்ச²உத³பானே பூரியமானே, துச்ச²கோட்டே² பூரியமானே, துச்ச²கும்பி⁴யா பூரியமானாய ஆகாஸோ அந்தரதா⁴யதீதி? ஆமந்தா. அஸங்க²தம் அந்தரதா⁴யதீதி? ந ஹேவம் வத்தப்³பே³…பே….

462. ந வத்தப்³ப³ம் – ‘‘ஆகாஸோ அஸங்க²தோ’’தி? ஆமந்தா. ஆகாஸோ ஸங்க²தோதி? ந ஹேவம் வத்தப்³பே³…பே… தேன ஹி ஆகாஸோ அஸங்க²தோதி.

ஆகாஸகதா² நிட்டி²தா.

6. ச²ட்ட²வக்³கோ³

(59) 7. ஆகாஸோ ஸனித³ஸ்ஸனோதிகதா²

463. ஆகாஸோ ஸனித³ஸ்ஸனோதி? ஆமந்தா. ரூபம் ரூபாயதனம் ரூபதா⁴து நீலம் பீதகம் லோஹிதகம் ஓதா³தம் சக்கு²விஞ்ஞேய்யம் சக்கு²ஸ்மிம் படிஹஞ்ஞதி சக்கு²ஸ்ஸ ஆபாத²ம் ஆக³ச்ச²தீதி? ந ஹேவம் வத்தப்³பே³…பே….

ஆகாஸோ ஸனித³ஸ்ஸனோதி? ஆமந்தா. சக்கு²ஞ்ச படிச்ச ஆகாஸஞ்ச உப்பஜ்ஜதி சக்கு²விஞ்ஞாணந்தி? ந ஹேவம் வத்தப்³பே³ …பே….

சக்கு²ஞ்ச படிச்ச ஆகாஸஞ்ச உப்பஜ்ஜதி சக்கு²விஞ்ஞாணந்தி? ஆமந்தா. ‘‘சக்கு²ஞ்ச படிச்ச ஆகாஸஞ்ச உப்பஜ்ஜதி சக்கு²விஞ்ஞாண’’ந்தி – அத்தே²வ [அத்தி² (?)] ஸுத்தந்தோதி? நத்தி². ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி [ம. நி. 1.400; 3.421; ஸம். நி. 4.60] – அத்தே²வ ஸுத்தந்தோதி? ஆமந்தா. ஹஞ்சி ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோ, நோ ச வத ரே வத்தப்³பே³ – ‘‘சக்கு²ஞ்ச படிச்ச ஆகாஸஞ்ச உப்பஜ்ஜதி சக்கு²விஞ்ஞாண’’ந்தி.

464. ந வத்தப்³ப³ம் – ‘‘ஆகாஸோ ஸனித³ஸ்ஸனோ’’தி? ஆமந்தா. நனு பஸ்ஸதி த்³வின்னம் ருக்கா²னம் அந்தரம், த்³வின்னம் த²ம்பா⁴னம் அந்தரம், தாளச்சி²த்³த³ம் வாதபானச்சி²த்³த³ந்தி? ஆமந்தா. ஹஞ்சி பஸ்ஸதி த்³வின்னம் ருக்கா²னம் அந்தரம், த்³வின்னம் த²ம்பா⁴னம் அந்தரம், தாளச்சி²த்³த³ம் வாதபானச்சி²த்³த³ம், தேன வத ரே வத்தப்³பே³ – ‘‘ஆகாஸோ ஸனித³ஸ்ஸனோ’’தி.

ஆகாஸோ ஸனித³ஸ்ஸனோதிகதா² நிட்டி²தா.

6. ச²ட்ட²வக்³கோ³

(60) 8. பத²வீதா⁴து ஸனித³ஸ்ஸனாதிஆதி³கதா²

465. பத²வீதா⁴து ஸனித³ஸ்ஸனாதி? ஆமந்தா. ரூபம் ரூபாயதனம் ரூபதா⁴து நீலம் பீதகம் லோஹிதகம் ஓதா³தம் சக்கு²விஞ்ஞேய்யம் சக்கு²ஸ்மிம் படிஹஞ்ஞதி சக்கு²ஸ்ஸ ஆபாத²ம் ஆக³ச்ச²தீதி? ந ஹேவம் வத்தப்³பே³…பே….

பத²வீதா⁴து ஸனித³ஸ்ஸனாதி? ஆமந்தா. சக்கு²ஞ்ச படிச்ச பத²வீதா⁴துஞ்ச உப்பஜ்ஜதி சக்கு²விஞ்ஞாணந்தி? ந ஹேவம் வத்தப்³பே³…பே….

சக்கு²ஞ்ச படிச்ச பத²வீதா⁴துஞ்ச உப்பஜ்ஜதி சக்கு²விஞ்ஞாணந்தி? ஆமந்தா. ‘‘சக்கு²ஞ்ச படிச்ச பத²வீதா⁴துஞ்ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? நத்தி². ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? ஆமந்தா. ஹஞ்சி ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோ, நோ ச வத ரே வத்தப்³பே³ – ‘‘சக்கு²ஞ்ச படிச்ச பத²வீதா⁴துஞ்ச உப்பஜ்ஜதி சக்கு²விஞ்ஞாண’’ந்தி.

466. ந வத்தப்³ப³ம் – ‘‘பத²வீதா⁴து ஸனித³ஸ்ஸனா’’தி? ஆமந்தா. நனு பஸ்ஸதி பூ⁴மிம் பாஸாணம் பப்³ப³தந்தி? ஆமந்தா. ஹஞ்சி பஸ்ஸதி [பஸ்ஸஸி (ஸீ. ஸ்யா. க.) ஏவமுபரிபி] பூ⁴மிம் பாஸாணம் பப்³ப³தம், தேன வத ரே வத்தப்³பே³ – ‘‘பத²வீதா⁴து ஸனித³ஸ்ஸனா’’தி…பே….

ந வத்தப்³ப³ம் – ‘‘ஆபோதா⁴து ஸனித³ஸ்ஸனா’’தி? ஆமந்தா. நனு பஸ்ஸதி உத³கந்தி? ஆமந்தா. ஹஞ்சி பஸ்ஸதி உத³கம், தேன வத ரே வத்தப்³பே³ – ‘‘ஆபோதா⁴து ஸனித³ஸ்ஸனாதி…பே….

ந வத்தப்³ப³ம் – தேஜோதா⁴து ஸனித³ஸ்ஸனாதி? ஆமந்தா. நனு பஸ்ஸதி அக்³கி³ம் ஜலந்தந்தி? ஆமந்தா. ஹஞ்சி பஸ்ஸதி அக்³கி³ம் ஜலந்தம், தேன வத ரே வத்தப்³பே³ – ‘‘தேஜோதா⁴து ஸனித³ஸ்ஸனா’’தி…பே….

ந வத்தப்³ப³ம் – ‘‘வாயோதா⁴து ஸனித³ஸ்ஸனா’’தி? ஆமந்தா. நனு பஸ்ஸதி வாதேன ருக்கே² ஸஞ்சாலியமானேதி? ஆமந்தா. ஹஞ்சி பஸ்ஸதி வாதேன ருக்கே² ஸஞ்சாலியமானே, தேன வத ரே வத்தப்³பே³ – ‘‘வாயோதா⁴து ஸனித³ஸ்ஸனா’’தி…பே….

பத²வீதா⁴து ஸனித³ஸ்ஸனாதிஆதி³கதா² நிட்டி²தா.

6. ச²ட்ட²வக்³கோ³

(61) 9. சக்கு²ந்த்³ரியம் ஸனித³ஸ்ஸனந்திஆதி³கதா²

467. சக்கு²ந்த்³ரியம் ஸனித³ஸ்ஸனந்தி? ஆமந்தா. ரூபம் ரூபாயதனம் ரூபதா⁴து…பே… சக்கு²ஸ்ஸ ஆபாத²ம் ஆக³ச்ச²தீதி? ந ஹேவம் வத்தப்³பே³…பே….

சக்கு²ந்த்³ரியம் ஸனித³ஸ்ஸனந்தி? ஆமந்தா. சக்கு²ஞ்ச படிச்ச சக்கு²ந்த்³ரியஞ்ச உப்பஜ்ஜதி சக்கு²விஞ்ஞாணந்தி? ந ஹேவம் வத்தப்³பே³…பே….

சக்கு²ஞ்ச படிச்ச சக்கு²ந்த்³ரியஞ்ச உப்பஜ்ஜதி சக்கு²விஞ்ஞாணந்தி? ஆமந்தா. ‘‘சக்கு²ஞ்ச படிச்ச சக்கு²ந்த்³ரியஞ்ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? நத்தி². ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? ஆமந்தா. ஹஞ்சி ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோ, நோ ச வத ரே வத்தப்³பே³ – ‘‘சக்கு²ஞ்ச படிச்ச சக்கு²ந்த்³ரியஞ்ச உப்பஜ்ஜதி சக்கு²விஞ்ஞாண’’ந்தி.

468. ந வத்தப்³ப³ம் – ‘‘பஞ்சிந்த்³ரியானி ஸனித³ஸ்ஸனானீ’’தி? ஆமந்தா. நனு பஸ்ஸதி சக்கு²ம் ஸோதம் கா⁴னம் ஜிவ்ஹம் காயந்தி? ஆமந்தா. ஹஞ்சி பஸ்ஸதி சக்கு²ம் ஸோதம் கா⁴னம் ஜிவ்ஹம் காயம், தேன வத ரே வத்தப்³பே³ – ‘‘பஞ்சிந்த்³ரியானி ஸனித³ஸ்ஸனானீ’’தி…பே….

சக்கு²ந்த்³ரியம் ஸனித³ஸ்ஸனந்திஆதி³கதா² நிட்டி²தா.

6. ச²ட்ட²வக்³கோ³

(62) 10. காயகம்மம் ஸனித³ஸ்ஸனந்திகதா²

469. காயகம்மம் ஸனித³ஸ்ஸனந்தி? ஆமந்தா. ரூபம் ரூபாயதனம் ரூபதா⁴து நீலம் பீதகம் லோஹிதகம் ஓதா³தம் சக்கு²விஞ்ஞேய்யம் சக்கு²ஸ்மிம் படிஹஞ்ஞதி சக்கு²ஸ்ஸ ஆபாத²ம் ஆக³ச்ச²தீதி? ந ஹேவம் வத்தப்³பே³…பே….

காயகம்மம் ஸனித³ஸ்ஸனந்தி? ஆமந்தா. சக்கு²ஞ்ச படிச்ச காயகம்மஞ்ச உப்பஜ்ஜதி சக்கு²விஞ்ஞாணந்தி? ந ஹேவம் வத்தப்³பே³…பே….

சக்கு²ஞ்ச படிச்ச காயகம்மஞ்ச உப்பஜ்ஜதி சக்கு²விஞ்ஞாணந்தி? ஆமந்தா. ‘‘சக்கு²ஞ்ச படிச்ச காயகம்மஞ்ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? நத்தி². ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோதி? ஆமந்தா. ஹஞ்சி ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி – அத்தே²வ ஸுத்தந்தோ, நோ ச வத ரே வத்தப்³பே³ – ‘‘சக்கு²ஞ்ச படிச்ச காயகம்மஞ்ச உப்பஜ்ஜதி சக்கு²விஞ்ஞாண’’ந்தி.

470. ந வத்தப்³ப³ம் – ‘‘காயகம்மம் ஸனித³ஸ்ஸன’’ந்தி? ஆமந்தா. நனு பஸ்ஸதி அபி⁴க்கமந்தம் படிக்கமந்தம் ஆலோகேந்தம் விலோகேந்தம் ஸமிஞ்ஜேந்தம் பஸாரேந்தந்தி? ஆமந்தா. ஹஞ்சி பஸ்ஸதி அபி⁴க்கமந்தம் படிக்கமந்தம் ஆலோகேந்தம் விலோகேந்தம் ஸமிஞ்ஜேந்தம் பஸாரேந்தம், தேன வத ரே வத்தப்³பே³ – ‘‘காயகம்மம் ஸனித³ஸ்ஸன’’ந்தி.

காயகம்மம் ஸனித³ஸ்ஸனந்திகதா² நிட்டி²தா.

ச²ட்ட²வக்³கோ³.

தஸ்ஸுத்³தா³னம் –

நியமோ அஸங்க²தோ, படிச்சஸமுப்பாதோ³ அஸங்க²தோ, சத்தாரி ஸச்சானி அஸங்க²தானி, சத்தாரோ ஆருப்பா அஸங்க²தா, நிரோத⁴ஸமாபத்தி அஸங்க²தா, ஆகாஸோ அஸங்க²தோ, ஆகாஸோ ஸனித³ஸ்ஸனோ, சத்தாரோ மஹாபூ⁴தா, பஞ்சிந்த்³ரியானி, ததே²வ காயகம்மந்தி.