5. பஞ்சமவக்³கோ³

(43) 1. விமுத்திகதா²

418. விமுத்திஞாணம் விமுத்தந்தி? ஆமந்தா. யம் கிஞ்சி விமுத்திஞாணம் ஸப்³ப³ம் தம் விமுத்தந்தி? ந ஹேவம் வத்தப்³பே³…பே…. விமுத்திஞாணம் விமுத்தந்தி? ஆமந்தா. பச்சவேக்க²ணஞாணம் விமுத்தந்தி? ந ஹேவம் வத்தப்³பே³…பே….

விமுத்திஞாணம் விமுத்தந்தி? ஆமந்தா. கோ³த்ரபு⁴னோ புக்³க³லஸ்ஸ விமுத்திஞாணம் விமுத்தந்தி? ந ஹேவம் வத்தப்³பே³…பே… ஸோதாபத்திப²லஸச்சி²கிரியாய படிபன்னஸ்ஸ புக்³க³லஸ்ஸ விமுத்திஞாணம் விமுத்தந்தி? ஆமந்தா. ஸோதாபன்னஸ்ஸ ஞாணம், ஸோதாபத்திப²லம் பத்தஸ்ஸ படிலத்³த⁴ஸ்ஸ அதி⁴க³தஸ்ஸ ஸச்சி²கதஸ்ஸ ஞாணந்தி? ந ஹேவம் வத்தப்³பே³…பே… ஸகதா³கா³மிப²லஸச்சி²கிரியாய படிபன்னஸ்ஸ புக்³க³லஸ்ஸ விமுத்திஞாணம் விமுத்தந்தி? ஆமந்தா. ஸகதா³கா³மிஸ்ஸ ஞாணம், ஸகதா³கா³மிப²லம் பத்தஸ்ஸ படிலத்³த⁴ஸ்ஸ அதி⁴க³தஸ்ஸ ஸச்சி²கதஸ்ஸ ஞாணந்தி? ந ஹேவம் வத்தப்³பே³…பே… அனாகா³மிப²லஸச்சி²கிரியாய படிபன்னஸ்ஸ புக்³க³லஸ்ஸ விமுத்திஞாணம் விமுத்தந்தி? ஆமந்தா. அனாகா³மிஸ்ஸ ஞாணம், அனாகா³மிப²லம் பத்தஸ்ஸ படிலத்³த⁴ஸ்ஸ அதி⁴க³தஸ்ஸ ஸச்சி²கதஸ்ஸ ஞாணந்தி? ந ஹேவம் வத்தப்³பே³…பே… அரஹத்தஸச்சி²கிரியாய படிபன்னஸ்ஸ புக்³க³லஸ்ஸ விமுத்திஞாணம் விமுத்தந்தி? ஆமந்தா. அரஹதோ ஞாணம், அரஹத்தம் பத்தஸ்ஸ படிலத்³த⁴ஸ்ஸ அதி⁴க³தஸ்ஸ ஸச்சி²கதஸ்ஸ ஞாணந்தி? ந ஹேவம் வத்தப்³பே³…பே….

419. ஸோதாபத்திப²லஸமங்கி³ஸ்ஸ புக்³க³லஸ்ஸ விமுத்திஞாணம் விமுத்தந்தி? ஆமந்தா. ஸோதாபத்திப²லஸச்சி²கிரியாய படிபன்னஸ்ஸ புக்³க³லஸ்ஸ விமுத்திஞாணம் விமுத்தந்தி? ந ஹேவம் வத்தப்³பே³…பே… ஸகதா³கா³மிப²லஸமங்கி³ஸ்ஸ புக்³க³லஸ்ஸ விமுத்திஞாணம் விமுத்தந்தி? ஆமந்தா. ஸகதா³கா³மிப²லஸச்சி²கிரியாய படிபன்னஸ்ஸ புக்³க³லஸ்ஸ விமுத்திஞாணம் விமுத்தந்தி? ந ஹேவம் வத்தப்³பே³…பே… அனாகா³மிப²லஸமங்கி³ஸ்ஸ புக்³க³லஸ்ஸ விமுத்திஞாணம் விமுத்தந்தி? ஆமந்தா. அனாகா³மிப²லஸச்சி²கிரியாய படிபன்னஸ்ஸ புக்³க³லஸ்ஸ விமுத்திஞாணம் விமுத்தந்தி? ந ஹேவம் வத்தப்³பே³…பே… அரஹத்தப²லஸமங்கி³ஸ்ஸ புக்³க³லஸ்ஸ விமுத்திஞாணம் விமுத்தந்தி? ஆமந்தா. அரஹத்தஸச்சி²கிரியாய படிபன்னஸ்ஸ புக்³க³லஸ்ஸ விமுத்திஞாணம் விமுத்தந்தி? ந ஹேவம் வத்தப்³பே³…பே….

420. ஸோதாபத்திப²லஸமங்கி³ஸ்ஸ புக்³க³லஸ்ஸ விமுத்திஞாணம் விமுத்தம் தஞ்ச ப²லம் பத்தஸ்ஸ ஞாணந்தி? ஆமந்தா. ஸோதாபத்திப²லஸச்சி²கிரியாய படிபன்னஸ்ஸ புக்³க³லஸ்ஸ விமுத்திஞாணம் விமுத்தம் தஞ்ச ப²லம் பத்தஸ்ஸ ஞாணந்தி? ந ஹேவம் வத்தப்³பே³…பே… ஸகதா³கா³மிப²லஸமங்கி³ஸ்ஸ புக்³க³லஸ்ஸ விமுத்திஞாணம் விமுத்தம் தஞ்ச ப²லம் பத்தஸ்ஸ ஞாணந்தி? ஆமந்தா. ஸகதா³கா³மிப²லஸச்சி²கிரியாய படிபன்னஸ்ஸ புக்³க³லஸ்ஸ விமுத்திஞாணம் விமுத்தம் தஞ்ச ப²லம் பத்தஸ்ஸ ஞாணந்தி? ந ஹேவம் வத்தப்³பே³…பே… அனாகா³மிப²லஸமங்கி³ஸ்ஸ புக்³க³லஸ்ஸ விமுத்திஞாணம் விமுத்தம் தஞ்ச ப²லம் பத்தஸ்ஸ ஞாணந்தி? ஆமந்தா. அனாகா³மிப²லஸச்சி²கிரியாய படிபன்னஸ்ஸ புக்³க³லஸ்ஸ விமுத்திஞாணம் விமுத்தம் தஞ்ச ப²லம் பத்தஸ்ஸ ஞாணந்தி? ந ஹேவம் வத்தப்³பே³…பே… அரஹத்தப²லஸமங்கி³ஸ்ஸ புக்³க³லஸ்ஸ விமுத்திஞாணம் விமுத்தம் தஞ்ச ப²லம் பத்தஸ்ஸ ஞாணந்தி? ஆமந்தா. அரஹத்தஸச்சி²கிரியாய படிபன்னஸ்ஸ புக்³க³லஸ்ஸ விமுத்திஞாணம் விமுத்தம் தஞ்ச ப²லம் பத்தஸ்ஸ ஞாணந்தி? ந ஹேவம் வத்தப்³பே³…பே….

விமுத்திகதா² நிட்டி²தா.

5. பஞ்சமவக்³கோ³

(44) 2. அஸேக²ஞாணகதா²

421. ஸேக²ஸ்ஸ அஸேக²ம் ஞாணம் அத்தீ²தி? ஆமந்தா. ஸேகோ² அஸேக²ம் த⁴ம்மம் ஜானாதி பஸ்ஸதி, தி³ட்ட²ம் விதி³தம் ஸச்சி²கதம் உபஸம்பஜ்ஜ விஹரதி, காயேன பு²ஸித்வா விஹரதீதி? ந ஹேவம் வத்தப்³பே³…பே… நனு ஸேகோ² அஸேக²ம் த⁴ம்மம் ந ஜானாதி ந பஸ்ஸதி, அதி³ட்ட²ம் அவிதி³தம் அஸச்சி²கதம் ந உபஸம்பஜ்ஜ விஹரதி, ந காயேன பு²ஸித்வா விஹரதீதி? ஆமந்தா. ஹஞ்சி ஸேகோ² அஸேக²ம் த⁴ம்மம் ந ஜானாதி ந பஸ்ஸதி, அதி³ட்ட²ம் அவிதி³தம் அஸச்சி²கதம் ந உபஸம்பஜ்ஜ விஹரதி, ந காயேன பு²ஸித்வா விஹரதி, நோ ச வத ரே வத்தப்³பே³ – ‘‘ஸேக²ஸ்ஸ அஸேக²ம் ஞாணம் அத்தீ²’’தி.

அஸேக²ஸ்ஸ அஸேக²ம் ஞாணம் அத்தி², அஸேகோ² அஸேக²ம் த⁴ம்மம் ஜானாதி பஸ்ஸதி, தி³ட்ட²ம் விதி³தம் ஸச்சி²கதம் உபஸம்பஜ்ஜ விஹரதி, காயேன பு²ஸித்வா விஹரதீதி? ஆமந்தா. ஸேக²ஸ்ஸ அஸேக²ம் ஞாணம் அத்தி², ஸேகோ² அஸேக²ம் த⁴ம்மம் ஜானாதி பஸ்ஸதி, தி³ட்ட²ம் விதி³தம் ஸச்சி²கதம் உபஸம்பஜ்ஜ விஹரதி, காயேன பு²ஸித்வா விஹரதீதி? ந ஹேவம் வத்தப்³பே³…பே….

422. ஸேக²ஸ்ஸ அஸேக²ம் ஞாணம் அத்தி², ஸேகோ² அஸேக²ம் த⁴ம்மம் ந ஜானாதி ந பஸ்ஸதி, அதி³ட்ட²ம் அவிதி³தம் அஸச்சி²கதம் ந உபஸம்பஜ்ஜ விஹரதி, ந காயேன பு²ஸித்வா விஹரதீதி? ஆமந்தா. அஸேக²ஸ்ஸ அஸேக²ம் ஞாணம் அத்தி², அஸேகோ² அஸேக²ம் த⁴ம்மம் ந ஜானாதி ந பஸ்ஸதி, அதி³ட்ட²ம் அவிதி³தம் அஸச்சி²கதம் ந உபஸம்பஜ்ஜ விஹரதி, ந காயேன பு²ஸித்வா விஹரதீதி? ந ஹேவம் வத்தப்³பே³…பே….

ஸேக²ஸ்ஸ அஸேக²ம் ஞாணம் அத்தீ²தி? ஆமந்தா. கோ³த்ரபு⁴னோ புக்³க³லஸ்ஸ ஸோதாபத்திமக்³கே³ ஞாணம் அத்தீ²தி? ந ஹேவம் வத்தப்³பே³…பே… ஸோதாபத்திப²லஸச்சி²கிரியாய படிபன்னஸ்ஸ புக்³க³லஸ்ஸ ஸோதாபத்திப²லே ஞாணம் அத்தீ²தி? ந ஹேவம் வத்தப்³பே³…பே… ஸகதா³கா³மிப²ல… அனாகா³மிப²ல… அரஹத்தஸச்சி²கிரியாய படிபன்னஸ்ஸ புக்³க³லஸ்ஸ அரஹத்தே ஞாணம் அத்தீ²தி? ந ஹேவம் வத்தப்³பே³…பே….

423. ந வத்தப்³ப³ம் – ‘‘ஸேக²ஸ்ஸ அஸேக²ம் ஞாணம் அத்தீ²’’தி? ஆமந்தா. நனு ஆயஸ்மா ஆனந்தோ³ ஸேகோ² – ‘‘ப⁴க³வா உளாரோ’’தி ஜானாதி, ‘‘ஸாரிபுத்தோ தே²ரோ, மஹாமோக்³க³ல்லானோ தே²ரோ உளாரோ’’தி ஜானாதீதி? ஆமந்தா. ஹஞ்சி ஆயஸ்மா ஆனந்தோ³ ஸேகோ² – ‘‘ப⁴க³வா உளாரோ’’தி ஜானாதி, ‘‘ஸாரிபுத்தோ தே²ரோ, மஹாமோக்³க³ல்லானோ தே²ரோ உளாரோ’’தி ஜானாதி, தேன வத ரே வத்தப்³பே³ – ‘‘ஸேக²ஸ்ஸ அஸேக²ம் ஞாணம் அத்தீ²’’தி.

அஸேக²ஞாணகதா² நிட்டி²தா.

5. பஞ்சமவக்³கோ³

(45) 3. விபரீதகதா²

424. பத²வீகஸிணம் ஸமாபத்திம் [பத²வீகஸிணஸமாபத்திம் (ஸீ. க.)] ஸமாபன்னஸ்ஸ விபரீதே ஞாணந்தி? ஆமந்தா. அனிச்சே நிச்சந்தி விபரியேஸோதி? ந ஹேவம் வத்தப்³பே³…பே… து³க்கே² ஸுக²ந்தி…பே… அனத்தனி அத்தாதி…பே… அஸுபே⁴ ஸுப⁴ந்தி விபரியேஸோதி? ந ஹேவம் வத்தப்³பே³…பே….

பத²வீகஸிணம் ஸமாபத்திம் ஸமாபன்னஸ்ஸ விபரீதே ஞாணந்தி? ஆமந்தா. அகுஸலந்தி? ந ஹேவம் வத்தப்³பே³…பே… நனு குஸலந்தி? ஆமந்தா. ஹஞ்சி குஸலம், நோ ச வத ரே வத்தப்³பே³ – ‘‘பத²வீகஸிணம் ஸமாபத்திம் ஸமாபன்னஸ்ஸ விபரீதே ஞாண’’ந்தி.

அனிச்சே நிச்சந்தி விபரியேஸோ, ஸோ ச அகுஸலோதி? ஆமந்தா. பத²வீகஸிணம் ஸமாபத்திம் ஸமாபன்னஸ்ஸ விபரீதே ஞாணம், தஞ்ச அகுஸலந்தி? ந ஹேவம் வத்தப்³பே³…பே… து³க்கே² ஸுக²ந்தி…பே… அனத்தனி அத்தாதி…பே… அஸுபே⁴ ஸுப⁴ந்தி விபரியேஸோ, ஸோ ச அகுஸலோதி? ஆமந்தா. பத²வீகஸிணம் ஸமாபத்திம் ஸமாபன்னஸ்ஸ விபரீதே ஞாணம், தஞ்ச அகுஸலந்தி? ந ஹேவம் வத்தப்³பே³…பே….

425. பத²வீகஸிணம் ஸமாபத்திம் ஸமாபன்னஸ்ஸ விபரீதே ஞாணம், தஞ்ச அகுஸலந்தி? ஆமந்தா. அனிச்சே நிச்சந்தி விபரியேஸோ, ஸோ ச குஸலோதி? ந ஹேவம் வத்தப்³பே³…பே… பத²வீகஸிணம் ஸமாபத்திம் ஸமாபன்னஸ்ஸ விபரீதே ஞாணம், தஞ்ச அகுஸலந்தி? ஆமந்தா. து³க்கே² ஸுக²ந்தி…பே… அனத்தனி அத்தாதி…பே… அஸுபே⁴ ஸுப⁴ந்தி விபரியேஸோ, ஸோ ச குஸலோதி? ந ஹேவம் வத்தப்³பே³…பே….

426. பத²வீகஸிணம் ஸமாபத்திம் ஸமாபன்னஸ்ஸ விபரீதே ஞாணந்தி? ஆமந்தா. அரஹா பத²வீகஸிணம் ஸமாபத்திம் ஸமாபஜ்ஜேய்யாதி? ஆமந்தா. ஹஞ்சி அரஹா பத²வீகஸிணம் ஸமாபத்திம் ஸமாபஜ்ஜேய்ய, நோ ச வத ரே வத்தப்³பே³ – ‘‘பத²வீகஸிணம் ஸமாபத்திம் ஸமாபன்னஸ்ஸ விபரீதே ஞாண’’ந்தி.

பத²வீகஸிணம் ஸமாபத்திம் ஸமாபன்னஸ்ஸ விபரீதே ஞாணம், அரஹா பத²வீகஸிணம் ஸமாபத்திம் ஸமாபஜ்ஜேய்யாதி? ஆமந்தா. அத்தி² அரஹதோ விபரியேஸோதி? ந ஹேவம் வத்தப்³பே³…பே….

அத்தி² அரஹதோ விபரியேஸோதி? ஆமந்தா. அத்தி² அரஹதோ ஸஞ்ஞாவிபரியேஸோ சித்தவிபரியேஸோ தி³ட்டி²விபரியேஸோதி? ந ஹேவம் வத்தப்³பே³…பே….

நத்தி² அரஹதோ ஸஞ்ஞாவிபரியேஸோ சித்தவிபரியேஸோ தி³ட்டி²விபரியேஸோதி? ஆமந்தா. ஹஞ்சி நத்தி² அரஹதோ ஸஞ்ஞாவிபரியேஸோ சித்தவிபரியேஸோ தி³ட்டி²விபரியேஸோ, நோ ச வத ரே வத்தப்³பே³ – ‘‘அத்தி² அரஹதோ விபரியேஸோ’’தி.

427. ந வத்தப்³ப³ம் – பத²வீகஸிணம் ஸமாபத்திம் ஸமாபன்னஸ்ஸ விபரீதே ஞாணந்தி? ஆமந்தா. பத²வீகஸிணம் ஸமாபத்திம் ஸமாபஜ்ஜந்தஸ்ஸ ஸப்³பே³வ பத²வீதி? ந ஹேவம் வத்தப்³பே³. தேன ஹி பத²வீகஸிணம் ஸமாபத்திம் ஸமாபன்னஸ்ஸ விபரீதே ஞாணந்தி.

பத²வீகஸிணம் ஸமாபத்திம் ஸமாபன்னஸ்ஸ விபரீதே ஞாணந்தி? ஆமந்தா. நனு பத²வீ அத்தி², அத்தி² ச கோசி பத²விம் பத²விதோ ஸமாபஜ்ஜதீதி? ஆமந்தா. ஹஞ்சி பத²வீ அத்தி², அத்தி² ச கோசி பத²விம் பத²விதோ ஸமாபஜ்ஜதி, நோ ச வத ரே வத்தப்³பே³ – ‘‘பத²வீகஸிணம் ஸமாபத்திம் ஸமாபன்னஸ்ஸ விபரீதே ஞாண’’ந்தி.

பத²வீ அத்தி², பத²விம் பத²விதோ ஸமாபஜ்ஜந்தஸ்ஸ விபரீதம் ஹோதீதி? ஆமந்தா. நிப்³பா³னம் அத்தி², நிப்³பா³னம் நிப்³பா³னதோ ஸமாபஜ்ஜந்தஸ்ஸ விபரீதம் ஹோதீதி? ந ஹேவம் வத்தப்³பே³…பே… தேன ஹி ந வத்தப்³ப³ம் – ‘‘பத²வீகஸிணம் ஸமாபத்திம் ஸமாபன்னஸ்ஸ விபரீதே ஞாண’’ந்தி.

விபரீதகதா² நிட்டி²தா.

5. பஞ்சமவக்³கோ³

(46) 4. நியாமகதா²

428. அனியதஸ்ஸ நியாமக³மனாய அத்தி² ஞாணந்தி? ஆமந்தா. நியதஸ்ஸ அனியாமக³மனாய அத்தி² ஞாணந்தி? ந ஹேவம் வத்தப்³பே³…பே….

நியதஸ்ஸ அனியாமக³மனாய நத்தி² ஞாணந்தி? ஆமந்தா. அனியதஸ்ஸ நியாமக³மனாய நத்தி² ஞாணந்தி? ந ஹேவம் வத்தப்³பே³…பே….

அனியதஸ்ஸ நியாமக³மனாய அத்தி² ஞாணந்தி? ஆமந்தா. நியதஸ்ஸ நியாமக³மனாய அத்தி² ஞாணந்தி? ந ஹேவம் வத்தப்³பே³…பே….

நியதஸ்ஸ நியாமக³மனாய நத்தி² ஞாணந்தி? ஆமந்தா. அனியதஸ்ஸ நியாமக³மனாய நத்தி² ஞாணந்தி? ந ஹேவம் வத்தப்³பே³…பே….

அனியதஸ்ஸ நியாமக³மனாய அத்தி² ஞாணந்தி? ஆமந்தா. அனியதஸ்ஸ அனியாமக³மனாய அத்தி² ஞாணந்தி? ந ஹேவம் வத்தப்³பே³…பே….

அனியதஸ்ஸ அனியாமக³மனாய நத்தி² ஞாணந்தி? ஆமந்தா. அனியதஸ்ஸ நியாமக³மனாய நத்தி² ஞாணந்தி? ந ஹேவம் வத்தப்³பே³…பே….

429. அனியதஸ்ஸ நியாமக³மனாய அத்தி² ஞாணந்தி? ஆமந்தா. அனியதஸ்ஸ நியாமக³மனாய அத்தி² நியாமோதி? ந ஹேவம் வத்தப்³பே³…பே….

அனியதஸ்ஸ நியாமக³மனாய அத்தி² ஞாணந்தி? ஆமந்தா. அனியதஸ்ஸ நியாமக³மனாய அத்தி² ஸதிபட்டா²னா… ஸம்மப்பதா⁴னா… இத்³தி⁴பாதா³… இந்த்³ரியா… ப³லா… போ³ஜ்ஜ²ங்கா³தி? ந ஹேவம் வத்தப்³பே³…பே….

அனியதஸ்ஸ நியாமக³மனாய நத்தி² நியாமோதி? ஆமந்தா. ஹஞ்சி அனியதஸ்ஸ நியாமக³மனாய நத்தி² நியாமோ, நோ வத ரே வத்தப்³பே³ – ‘‘அனியதஸ்ஸ நியாமக³மனாய அத்தி² ஞாண’’ந்தி.

அனியதஸ்ஸ நியாமக³மனாய நத்தி² ஸதிபட்டா²னா…பே… போ³ஜ்ஜ²ங்கா³தி? ஆமந்தா. ஹஞ்சி அனியதஸ்ஸ நியாமக³மனாய நத்தி² போ³ஜ்ஜ²ங்கா³, நோ வத ரே வத்தப்³பே³ – ‘‘அனியதஸ்ஸ நியாமக³மனாய அத்தி² ஞாண’’ந்தி.

430. அனியதஸ்ஸ நியாமக³மனாய அத்தி² ஞாணந்தி? ஆமந்தா. கோ³த்ரபு⁴னோ புக்³க³லஸ்ஸ ஸோதாபத்திமக்³கே³ ஞாணம் அத்தீ²தி? ந ஹேவம் வத்தப்³பே³…பே… ஸோதாபத்திப²லஸச்சி²கிரியாய படிபன்னஸ்ஸ புக்³க³லஸ்ஸ ஸோதாபத்திப²லே ஞாணம் அத்தீ²தி? ந ஹேவம் வத்தப்³பே³ …பே… அரஹத்தஸச்சி²கிரியாய படிபன்னஸ்ஸ புக்³க³லஸ்ஸ அரஹத்தே ஞாணம் அத்தீ²தி? ந ஹேவம் வத்தப்³பே³…பே….

431. ந வத்தப்³ப³ம் – ‘‘அனியதஸ்ஸ நியாமக³மனாய அத்தி² ஞாண’’ந்தி? ஆமந்தா. நனு ப⁴க³வா ஜானாதி – ‘‘அயம் புக்³க³லோ ஸம்மத்தனியாமம் ஓக்கமிஸ்ஸதி, ப⁴ப்³போ³ அயம் புக்³க³லோ த⁴ம்மம் அபி⁴ஸமேது’’ந்தி? ஆமந்தா. ஹஞ்சி ப⁴க³வா ஜானாதி – ‘‘அயம் புக்³க³லோ ஸம்மத்தனியாமம் ஓக்கமிஸ்ஸதி, ப⁴ப்³போ³ அயம் புக்³க³லோ த⁴ம்மம் அபி⁴ஸமேதும்,’’ தேன வத ரே வத்தப்³பே³ – ‘‘அனியதஸ்ஸ நியாமக³மனாய அத்தி² ஞாண’’ந்தி.

நியாமகதா² நிட்டி²தா.

5. பஞ்சமவக்³கோ³

(47) 5. படிஸம்பி⁴தா³கதா²

432. ஸப்³ப³ம் ஞாணம் படிஸம்பி⁴தா³தி? ஆமந்தா. ஸம்முதிஞாணம் படிஸம்பி⁴தா³தி? ந ஹேவம் வத்தப்³பே³…பே… ஸம்முதிஞாணம் படிஸம்பி⁴தா³தி? ஆமந்தா. யே கேசி ஸம்முதிம் ஜானந்தி, ஸப்³பே³ தே படிஸம்பி⁴தா³பத்தாதி? ந ஹேவம் வத்தப்³பே³…பே… ஸப்³ப³ம் ஞாணம் படிஸம்பி⁴தா³தி? ஆமந்தா. சேதோபரியாயே ஞாணம் படிஸம்பி⁴தா³தி? ந ஹேவம் வத்தப்³பே³…பே… சேதோபரியாயே ஞாணம் படிஸம்பி⁴தா³தி? ஆமந்தா. யே கேசி பரசித்தம் ஜானந்தி, ஸப்³பே³ தே படிஸம்பி⁴தா³பத்தாதி? ந ஹேவம் வத்தப்³பே³…பே….

ஸப்³ப³ம் ஞாணம் படிஸம்பி⁴தா³தி? ஆமந்தா. ஸப்³பா³ பஞ்ஞா படிஸம்பி⁴தா³தி? ந ஹேவம் வத்தப்³பே³…பே… ஸப்³பா³ பஞ்ஞா படிஸம்பி⁴தா³தி? ஆமந்தா. பத²வீகஸிணம் ஸமாபத்திம் ஸமாபன்னஸ்ஸ அத்தி² பஞ்ஞா, ஸா பஞ்ஞா படிஸம்பி⁴தா³தி? ந ஹேவம் வத்தப்³பே³…பே… ஆபோகஸிணம்…பே… தேஜோகஸிணம்…பே… வாயோகஸிணம்…பே… நீலகஸிணம்…பே… பீதகஸிணம்…பே… லோஹிதகஸிணம்…பே… ஓதா³தகஸிணம்…பே… ஆகாஸானஞ்சாயதனம்…பே… விஞ்ஞாணஞ்சாயதனம்…பே… ஆகிஞ்சஞ்ஞாயதனம்…பே… நேவஸஞ்ஞானாஸஞ்ஞாயதனம் ஸமாபன்னஸ்ஸ…பே… தா³னம் த³த³ந்தஸ்ஸ…பே… சீவரம் த³த³ந்தஸ்ஸ…பே… பிண்ட³பாதம் த³த³ந்தஸ்ஸ…பே… ஸேனாஸனம் த³த³ந்தஸ்ஸ…பே… கி³லானபச்சயபே⁴ஸஜ்ஜபரிக்கா²ரம் த³த³ந்தஸ்ஸ அத்தி² பஞ்ஞா, ஸா பஞ்ஞா படிஸம்பி⁴தா³தி? ந ஹேவம் வத்தப்³பே³…பே….

433. ந வத்தப்³ப³ம் – ‘‘ஸப்³ப³ம் ஞாணம் படிஸம்பி⁴தா³’’தி? ஆமந்தா. அத்தி² லோகுத்தரா பஞ்ஞா, ஸா பஞ்ஞா ந படிஸம்பி⁴தா³தி? ந ஹேவம் வத்தப்³பே³…பே… தேன ஹி ஸப்³ப³ம் ஞாணம் படிஸம்பி⁴தா³தி.

படிஸம்பி⁴தா³கதா² நிட்டி²தா.

5. பஞ்சமவக்³கோ³

(48) 6. ஸம்முதிஞாணகதா²

434. ந வத்தப்³ப³ம் – ‘‘ஸம்முதிஞாணம் ஸச்சாரம்மணஞ்ஞேவ ந அஞ்ஞாரம்மண’’ந்தி? ஆமந்தா. நனு பத²வீகஸிணம் ஸமாபத்திம் ஸமாபன்னஸ்ஸ அத்தி² ஞாணம், பத²வீகஸிணஞ்ச ஸம்முதிஸச்சம்ஹீதி? ஆமந்தா. ஹஞ்சி பத²வீகஸிணம் ஸமாபத்திம் ஸமாபன்னஸ்ஸ அத்தி² ஞாணம், பத²வீகஸிணஞ்ச ஸம்முதிஸச்சம்ஹி, தேன வத ரே வத்தப்³பே³ – ‘‘ஸம்முதிஞாணம் ஸச்சாரம்மணஞ்ஞேவ ந அஞ்ஞாரம்மண’’ந்தி.

ந வத்தப்³ப³ம் – ‘‘ஸம்முதிஞாணம் ஸச்சாரம்மணஞ்ஞேவ ந அஞ்ஞாரம்மண’’ந்தி? ஆமந்தா…பே… நனு ஆபோகஸிணம்…பே… தேஜோகஸிணம்…பே… கி³லானபச்சயபே⁴ஸஜ்ஜபரிக்கா²ரம் த³த³ந்தஸ்ஸ அத்தி² ஞாணம், கி³லானபச்சயபே⁴ஸஜ்ஜபரிக்கா²ரோ ச ஸம்முதிஸச்சம்ஹீதி? ஆமந்தா. ஹஞ்சி கி³லானபச்சயபே⁴ஸஜ்ஜபரிக்கா²ரம் த³த³ந்தஸ்ஸ அத்தி² ஞாணம், கி³லானபச்சயபே⁴ஸஜ்ஜபரிக்கா²ரோ ச ஸம்முதிஸச்சம்ஹி, தேன வத ரே வத்தப்³பே³ – ‘‘ஸம்முதிஞாணம் ஸச்சாரம்மணஞ்ஞேவ ந அஞ்ஞாரம்மண’’ந்தி.

435. ஸம்முதிஞாணம் ஸச்சாரம்மணஞ்ஞேவ ந அஞ்ஞாரம்மணந்தி? ஆமந்தா. தேன ஞாணேன து³க்க²ம் பரிஜானாதி, ஸமுத³யம் பஜஹதி, நிரோத⁴ம் ஸச்சி²கரோதி, மக்³க³ம் பா⁴வேதீதி? ந ஹேவம் வத்தப்³பே³…பே….

ஸம்முதிஞாணகதா² நிட்டி²தா.

5. பஞ்சமவக்³கோ³

(49) 7. சித்தாரம்மணகதா²

436. சேதோபரியாயே ஞாணம் சித்தாரம்மணஞ்ஞேவ ந அஞ்ஞாரம்மணந்தி? ஆமந்தா. நனு அத்தி² கோசி ‘‘ஸராக³ம் சித்தம் ஸராக³ம் சித்த’’ந்தி பஜானாதீதி? ஆமந்தா. ஹஞ்சி அத்தி² கோசி ‘‘ஸராக³ம் சித்தம் ஸராக³ம் சித்த’’ந்தி பஜானாதி, நோ ச வத ரே வத்தப்³பே³ – ‘‘சேதோபரியாயே ஞாணம் சித்தாரம்மணஞ்ஞேவ ந அஞ்ஞாரம்மண’’ந்தி.

நனு அத்தி² கோசி வீதராக³ம் சித்தம்…பே… ஸதோ³ஸம் சித்தம்… வீததோ³ஸம் சித்தம்… ஸமோஹம் சித்தம்… வீதமோஹம் சித்தம்… ஸம்கி²த்தம் சித்தம்… விக்கி²த்தம் சித்தம்… மஹக்³க³தம் சித்தம்… அமஹக்³க³தம் சித்தம்… ஸஉத்தரம் சித்தம்… அனுத்தரம் சித்தம்… ஸமாஹிதம் சித்தம்… அஸமாஹிதம் சித்தம்… விமுத்தம் சித்தம்…பே… அவிமுத்தம் சித்தம் ‘‘அவிமுத்தம் சித்த’’ந்தி பஜானாதீதி? ஆமந்தா. ஹஞ்சி அத்தி² கோசி ‘‘அவிமுத்தம் சித்தம் அவிமுத்தம் சித்த’’ந்தி பஜானாதி, நோ ச வத ரே வத்தப்³பே³ – ‘‘சேதோபரியாயே ஞாணம் சித்தாரம்மணஞ்ஞேவ ந அஞ்ஞாரம்மண’’ந்தி.

437. ப²ஸ்ஸாரம்மணே ஞாணம் வத்தப்³ப³ம் – ‘‘சேதோபரியாயே ஞாண’’ந்தி? ஆமந்தா. ஹஞ்சி ப²ஸ்ஸாரம்மணே ஞாணம் வத்தப்³ப³ம் சேதோபரியாயே ஞாணம், நோ ச வத ரே வத்தப்³பே³ – ‘‘சேதோபரியாயே ஞாணம் சித்தாரம்மணஞ்ஞேவ ந அஞ்ஞாரம்மண’’ந்தி. வேத³னாரம்மணே ஞாணம்…பே… ஸஞ்ஞாரம்மணே ஞாணம்… சேதனாரம்மணே ஞாணம்… சித்தாரம்மணே ஞாணம்… ஸத்³தா⁴ரம்மணே ஞாணம்… வீரியாரம்மணே ஞாணம்… ஸதாரம்மணே ஞாணம்… ஸமாதா⁴ரம்மணே ஞாணம்… பஞ்ஞாரம்மணே ஞாணம்… ராகா³ரம்மணே ஞாணம் … தோ³ஸாரம்மணே ஞாணம்… மோஹாரம்மணே ஞாணம்…பே… அனோத்தப்பாரம்மணே ஞாணம் வத்தப்³ப³ம் – ‘‘சேதோபரியாயே ஞாண’’ந்தி? ஆமந்தா. ஹஞ்சி அனோத்தப்பாரம்மணே ஞாணம் வத்தப்³ப³ம் சேதோபரியாயே ஞாணம், நோ ச வத ரே வத்தப்³பே³ – ‘‘சேதோபரியாயே ஞாணம் சித்தாரம்மணஞ்ஞேவ ந அஞ்ஞாரம்மண’’ந்தி.

ப²ஸ்ஸாரம்மணே ஞாணம் ந வத்தப்³ப³ம் – ‘‘சேதோபரியாயே ஞாண’’ந்தி? ஆமந்தா. ப²ஸ்ஸபரியாயே ஞாணந்தி? ந ஹேவம் வத்தப்³பே³…பே… வேத³னாரம்மணே ஞாணம்…பே… ஸஞ்ஞாரம்மணே ஞாணம்…பே… அனோத்தப்பாரம்மணே ஞாணம் ந வத்தப்³ப³ம் – ‘‘சேதோபரியாயே ஞாண’’ந்தி? ஆமந்தா. அனோத்தப்பபரியாயே ஞாணந்தி? ந ஹேவம் வத்தப்³பே³…பே….

438. ந வத்தப்³ப³ம் – ‘‘சேதோபரியாயே ஞாணம் சித்தாரம்மணஞ்ஞேவ ந அஞ்ஞாரம்மண’’ந்தி? ஆமந்தா. நனு சேதோபரியாயே ஞாணந்தி? ஆமந்தா. ஹஞ்சி சேதோபரியாயே ஞாணம், தேன வத ரே வத்தப்³பே³ – ‘‘சேதோபரியாயே ஞாணம் சித்தாரம்மணஞ்ஞேவ ந அஞ்ஞாரம்மண’’ந்தி.

சித்தாரம்மணகதா² நிட்டி²தா.

5. பஞ்சமவக்³கோ³

(50) 8. அனாக³தஞாணகதா²

439. அனாக³தே ஞாணம் அத்தீ²தி? ஆமந்தா. அனாக³தம் மூலதோ ஜானாதி, ஹேதுதோ ஜானாதி, நிதா³னதோ ஜானாதி, ஸம்ப⁴வதோ ஜானாதி, பப⁴வதோ ஜானாதி, ஸமுட்டா²னதோ ஜானாதி, ஆஹாரதோ ஜானாதி, ஆரம்மணதோ ஜானாதி, பச்சயதோ ஜானாதி, ஸமுத³யதோ ஜானாதீதி? ந ஹேவம் வத்தப்³பே³…பே….

அனாக³தே ஞாணம் அத்தீ²தி? ஆமந்தா. அனாக³தம் ஹேதுபச்சயதம் ஜானாதி, ஆரம்மணபச்சயதம் ஜானாதி, அதி⁴பதிபச்சயதம் ஜானாதி, அனந்தரபச்சயதம் ஜானாதி, ஸமனந்தரபச்சயதம் ஜானாதீதி? ந ஹேவம் வத்தப்³பே³…பே….

அனாக³தே ஞாணம் அத்தீ²தி? ஆமந்தா. கோ³த்ரபு⁴னோ புக்³க³லஸ்ஸ ஸோதாபத்திமக்³கே³ ஞாணம் அத்தீ²தி? ந ஹேவம் வத்தப்³பே³…பே…. ஸோதாபத்திப²லஸச்சி²கிரியாய படிபன்னஸ்ஸ புக்³க³லஸ்ஸ ஸோதாபத்திப²லே ஞாணம் அத்தீ²தி? ந ஹேவம் வத்தப்³பே³…பே….

ஸகதா³கா³மி…பே… அனாகா³மி …பே… அரஹத்தஸச்சி²கிரியாய படிபன்னஸ்ஸ புக்³க³லஸ்ஸ அரஹத்தே ஞாணம் அத்தீ²தி? ந ஹேவம் வத்தப்³பே³…பே….

440. ந வத்தப்³ப³ம் – ‘‘அனாக³தே ஞாணம் அத்தீ²’’தி? ஆமந்தா. நனு வுத்தம் ப⁴க³வதா – ‘‘பாடலிபுத்தஸ்ஸ கோ², ஆனந்த³, தயோ அந்தராயா ப⁴விஸ்ஸந்தி – அக்³கி³தோ வா உத³கதோ வா மிது²பே⁴தா³ வா’’தி [மஹாவ. 286; தீ³. நி. 2.152; உதா³. 76]! அத்தே²வ ஸுத்தந்தோதி? ஆமந்தா. தேன ஹி அனாக³தே ஞாணம் அத்தீ²தி.

அனாக³தஞாணகதா² நிட்டி²தா.

5. பஞ்சமவக்³கோ³

(51) 9. படுப்பன்னகதா²

441. படுப்பன்னே [பச்சுப்பன்னே (ஸீ. ஸ்யா.)] ஞாணம் அத்தீ²தி? ஆமந்தா. தேன ஞாணேன தம் ஞாணம் ஜானாதீதி? ந ஹேவம் வத்தப்³பே³…பே… தேன ஞாணேன தம் ஞாணம் ஜானாதீதி? ஆமந்தா. தேன ஞாணேன தம் ஞாணம் ‘‘ஞாண’’ந்தி ஜானாதீதி? ந ஹேவம் வத்தப்³பே³…பே… தேன ஞாணேன தம் ஞாணம் ‘‘ஞாண’’ந்தி ஜானாதீதி? ஆமந்தா. தம் ஞாணம் தஸ்ஸ ஞாணஸ்ஸ ஆரம்மணந்தி? ந ஹேவம் வத்தப்³பே³…பே….

தம் ஞாணம் தஸ்ஸ ஞாணஸ்ஸ ஆரம்மணந்தி? ஆமந்தா. தேன ப²ஸ்ஸேன தம் ப²ஸ்ஸம் பு²ஸதி, தாய வேத³னாய தம் வேத³னம் வேதே³தி, தாய ஸஞ்ஞாய தம் ஸஞ்ஞம் ஸஞ்ஜானாதி, தாய சேதனாய தம் சேதனம் சேதேதி, தேன சித்தேன தம் சித்தம் சிந்தேதி, தேன விதக்கேன தம் விதக்கம் விதக்கேதி, தேன விசாரேன தம் விசாரம் விசாரேதி, தாய பீதியா தம் பீதிம் பியாயதி, தாய ஸதியா தம் ஸதிம் ஸரதி, தாய பஞ்ஞாய தம் பஞ்ஞம் பஜானாதி, தேன க²க்³கே³ன தம் க²க்³க³ம் சி²ந்த³தி, தேன ப²ரஸுனா தம் ப²ரஸும் தச்ச²தி, தாய குதா⁴ரியா தம் குதா⁴ரிம் தச்ச²தி, தாய வாஸியா தம் வாஸிம் தச்ச²தி, தாய ஸூசியா தம் ஸூசிம் ஸிப்³பே³தி, தேன அங்கு³லக்³கே³ன தம் அங்கு³லக்³க³ம் பராமஸதி, தேன நாஸிகக்³கே³ன தம் நாஸிகக்³க³ம் பராமஸதி, தேன மத்த²கேன தம் மத்த²கம் பராமஸதி, தேன கூ³தே²ன தம் கூ³த²ம் தோ⁴வதி, தேன முத்தேன தம் முத்தம் தோ⁴வதி, தேன கே²ளேன தம் கே²ளம் தோ⁴வதி, தேன புப்³பே³ன தம் புப்³ப³ம் தோ⁴வதி, தேன லோஹிதேன தம் லோஹிதம் தோ⁴வதீதி? ந ஹேவம் வத்தப்³பே³ …பே….

442. ந வத்தப்³ப³ம் – ‘‘படுப்பன்னே ஞாணம் அத்தீ²’’தி? ஆமந்தா. நனு ஸப்³ப³ஸங்கா²ரே அனிச்சதோ தி³ட்டே² தம்பி ஞாணம் அனிச்சதோ தி³ட்ட²ம் ஹோதீதி? ஆமந்தா. ஹஞ்சி ஸப்³ப³ஸங்கா²ரே அனிச்சதோ தி³ட்டே² தம்பி ஞாணம் அனிச்சதோ தி³ட்ட²ம் ஹோதி, தேன வத ரே வத்தப்³பே³ – ‘‘படுப்பன்னே ஞாணம் அத்தீ²’’தி.

படுப்பன்னஞாணகதா² [பச்சுப்பன்னகதா² (ஸீ.)] நிட்டி²தா.

5. பஞ்சமவக்³கோ³

(52) 10. ப²லஞாணகதா²

443. ஸாவகஸ்ஸ ப²லே ஞாணம் அத்தீ²தி? ஆமந்தா. ஸாவகோ ப²லஸ்ஸ கதம் பஞ்ஞாபேதீதி? ந ஹேவம் வத்தப்³ப³…பே….

ஸாவகஸ்ஸ ப²லே ஞாணம் அத்தீ²தி? ஆமந்தா. அத்தி² ஸாவகஸ்ஸ ப²லபரோபரியத்தி இந்த்³ரியபரோபரியத்தி புக்³க³லபரோபரியத்தீதி? ந ஹேவம் வத்தப்³பே³…பே….

ஸாவகஸ்ஸ ப²லே ஞாணம் அத்தீ²தி? ஆமந்தா. அத்தி² ஸாவகஸ்ஸ க²ந்த⁴பஞ்ஞத்தி ஆயதனபஞ்ஞத்தி தா⁴துபஞ்ஞத்தி ஸச்சபஞ்ஞத்தி இந்த்³ரியபஞ்ஞத்தி புக்³க³லபஞ்ஞத்தீதி? ந ஹேவம் வத்தப்³பே³…பே….

ஸாவகஸ்ஸ ப²லே ஞாணம் அத்தீ²தி? ஆமந்தா. ஸாவகோ ஜினோ ஸத்தா² ஸம்மாஸம்பு³த்³தோ⁴ ஸப்³ப³ஞ்ஞூ ஸப்³ப³த³ஸ்ஸாவீ த⁴ம்மஸ்ஸாமீ த⁴ம்மப்படிஸரணோதி? ந ஹேவம் வத்தப்³பே³…பே….

ஸாவகஸ்ஸ ப²லே ஞாணம் அத்தீ²தி? ஆமந்தா. ஸாவகோ அனுப்பன்னஸ்ஸ மக்³க³ஸ்ஸ உப்பாதே³தா அஸஞ்ஜாதஸ்ஸ மக்³க³ஸ்ஸ ஸஞ்ஜனேதா அனக்கா²தஸ்ஸ மக்³க³ஸ்ஸ அக்கா²தா மக்³க³ஞ்ஞூ மக்³க³விதூ³ மக்³க³கோவிதோ³தி? ந ஹேவம் வத்தப்³பே³…பே….

444. ந வத்தப்³ப³ம் – ‘‘ஸாவகஸ்ஸ ப²லே ஞாணம் அத்தீ²’’தி? ஆமந்தா. ஸாவகோ அஞ்ஞாணீதி? ந ஹேவம் வத்தப்³பே³…பே… தேன ஹி ஸாவகஸ்ஸ ப²லே ஞாணம் அத்தீ²தி…பே….

ப²லஞாணகதா² நிட்டி²தா.

பஞ்சமவக்³கோ³.

தஸ்ஸுத்³தா³னம் –

விமுத்திஞாணம் விமுத்தம், ஸேக²ஸ்ஸ அஸேக²ம் ஞாணம், விபரீதே ஞாணம், அனியதஸ்ஸ நியாமக³மனாய அத்தி² ஞாணம், ஸப்³ப³ம் ஞாணம் படிஸம்பி⁴தா³தி, ஸம்முதிஞாணம், சேதோபரியாயே ஞாணம், அனாக³தே ஞாணம், படுப்பன்னே ஞாணம், ஸாவகஸ்ஸ ப²லே ஞாணந்தி.

மஹாபண்ணாஸகோ.

தஸ்ஸாபி உத்³தா³னம் –

ஸத்துபலத்³தி⁴ம், உபஹரதோ, ப³லம், கி³ஹிஸ்ஸ அரஹா ச, விமுத்திபஞ்சமந்தி.