4. சதுத்த²வக்³கோ³

(33) 1. கி³ஹிஸ்ஸ அரஹாதிகதா²

387. கி³ஹிஸ்ஸ அரஹாதி? ஆமந்தா. அத்தி² அரஹதோ கி³ஹிஸம்யோஜனந்தி? ந ஹேவம் வத்தப்³பே³…பே… நத்தி² அரஹதோ கி³ஹிஸம்யோஜனந்தி? ஆமந்தா. ஹஞ்சி நத்தி² அரஹதோ கி³ஹிஸம்யோஜனம், நோ ச வத ரே வத்தப்³பே³ – ‘‘கி³ஹிஸ்ஸ அரஹா’’தி.

கி³ஹிஸ்ஸ அரஹாதி? ஆமந்தா. நனு அரஹதோ கி³ஹிஸம்யோஜனம் பஹீனம் உச்சி²ன்னமூலம் தாலாவத்து²கதம் அனபா⁴வங்கதம் ஆயதிம் அனுப்பாத³த⁴ம்மந்தி? ஆமந்தா. ஹஞ்சி அரஹதோ கி³ஹிஸம்யோஜனம் பஹீனம் உச்சி²ன்னமூலம் தாலாவத்து²கதம் அனபா⁴வங்கதம் ஆயதிம் அனுப்பாத³த⁴ம்மம், நோ ச வத ரே வத்தப்³பே³ – ‘‘கி³ஹிஸ்ஸ அரஹா’’தி.

கி³ஹிஸ்ஸ அரஹாதி? ஆமந்தா. அத்தி² கோசி கி³ஹீ கி³ஹிஸம்யோஜனம் அப்பஹாய தி³ட்டே²வ த⁴ம்மே து³க்க²ஸ்ஸந்தகரோதி [ம. நி. 2.186]? நத்தி². ஹஞ்சி நத்தி² கோசி கி³ஹீ கி³ஹிஸம்யோஜனம் அப்பஹாய தி³ட்டே²வ த⁴ம்மே து³க்க²ஸ்ஸந்தகரோ, நோ ச வத ரே வத்தப்³பே³ – ‘‘கி³ஹிஸ்ஸ அரஹா’’தி.

கி³ஹிஸ்ஸ அரஹாதி? ஆமந்தா. நனு வச்ச²கோ³த்தோ பரிப்³பா³ஜகோ ப⁴க³வந்தம் ஏதத³வோச – ‘‘அத்தி² நு கோ², போ⁴ கோ³தம, கோசி கி³ஹீ கி³ஹிஸம்யோஜனம் அப்பஹாய காயஸ்ஸ பே⁴தா³ து³க்க²ஸ்ஸந்தகரோ’’தி? ‘‘நத்தி² கோ², வச்ச², கோசி கி³ஹீ கி³ஹிஸம்யோஜனம் அப்பஹாய காயஸ்ஸ பே⁴தா³ து³க்க²ஸ்ஸந்தகரோ’’தி. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘கி³ஹிஸ்ஸ அரஹா’’தி.

கி³ஹிஸ்ஸ அரஹாதி? ஆமந்தா. அரஹா மேது²னம் த⁴ம்மம் படிஸேவேய்ய, மேது²னம் உப்பாதே³ய்ய, புத்தஸம்பா³த⁴ஸயனம் அஜ்ஜா²வஸேய்ய, காஸிகசந்த³னம் பச்சனுப⁴வேய்ய, மாலாக³ந்த⁴விலேபனம் தா⁴ரேய்ய, ஜாதரூபரஜதம் ஸாதி³யேய்ய, அஜேளகம் படிக்³க³ண்ஹேய்ய, குக்குடஸூகரம் படிக்³க³ண்ஹேய்ய, ஹத்தி²க³வஸ்ஸவளவம் படிக்³க³ண்ஹேய்ய, தித்திரவட்டகமோரகபிஞ்ஜரம் [… கபிஞ்ஜலம் (ஸ்யா. கம். பீ.)] படிக்³க³ண்ஹேய்ய, சித்தவண்ட³வாலமோளிம் [பீதவண்டவாலமோளிகம் (ஸ்யா. கம். பீ.)] தா⁴ரேய்ய, ஓதா³தானி வத்தா²னி தீ³க⁴த³ஸானி தா⁴ரேய்ய, யாவஜீவம் அகா³ரியபூ⁴தோ அஸ்ஸாதி? ந ஹேவம் வத்தப்³பே³…பே….

ந வத்தப்³ப³ம் – ‘‘கி³ஹிஸ்ஸ அரஹா’’தி? ஆமந்தா. நனு யஸோ குலபுத்தோ, உத்தியோ க³ஹபதி, ஸேது மாணவோ, கி³ஹிப்³யஞ்ஜனேன அரஹத்தம் பத்தோதி? ஆமந்தா. ஹஞ்சி யஸோ குலபுத்தோ, உத்தியோ க³ஹபதி, ஸேது மாணவோ, கி³ஹிப்³யஞ்ஜனேன அரஹத்தம் பத்தோ, தேன வத ரே வத்தப்³பே³ – ‘‘கி³ஹிஸ்ஸ அரஹா’’தி.

கி³ஹிஸ்ஸ அரஹாதிகதா² நிட்டி²தா.

4. சதுத்த²வக்³கோ³

(34) 2. உபபத்திகதா²

388. ஸஹ உபபத்தியா அரஹாதி? ஆமந்தா. ஸஹ உபபத்தியா ஸோதாபன்னோ ஹோதீதி? ந ஹேவம் வத்தப்³பே³…பே….

ஸஹ உபபத்தியா அரஹாதி? ஆமந்தா. ஸஹ உபபத்தியா ஸகதா³கா³மீ ஹோதீதி? ந ஹேவம் வத்தப்³பே³…பே….

ஸஹ உபபத்தியா அரஹாதி? ஆமந்தா. ஸஹ உபபத்தியா அனாகா³மீ ஹோதீதி? ந ஹேவம் வத்தப்³பே³…பே….

ஸஹ உபபத்தியா ஸோதாபன்னோ ந ஹோதீதி? ஆமந்தா. ஹஞ்சி ஸஹ உபபத்தியா ஸோதாபன்னோ ந ஹோதி, நோ ச வத ரே வத்தப்³பே³ – ‘‘ஸஹ உபபத்தியா அரஹா’’தி.

ஸஹ உபபத்தியா ஸகதா³கா³மீ ந ஹோதீதி? ஆமந்தா. ஹஞ்சி ஸஹ உபபத்தியா ஸகதா³கா³மீ ந ஹோதி, நோ ச வத ரே வத்தப்³பே³ – ‘‘ஸஹ உபபத்தியா அரஹா’’தி.

ஸஹ உபபத்தியா அனாகா³மீ ந ஹோதீதி? ஆமந்தா. ஹஞ்சி ஸஹ உபபத்தியா அனாகா³மீ ந ஹோதி, நோ ச வத ரே வத்தப்³பே³ – ‘‘ஸஹ உபபத்தியா அரஹா’’தி.

389. ஸஹ உபபத்தியா அரஹாதி? ஆமந்தா. ஸாரிபுத்தோ தே²ரோ ஸஹ உபபத்தியா அரஹாதி? ந ஹேவம் வத்தப்³பே³. மஹாமோக்³க³ல்லானோ தே²ரோ …பே… மஹாகஸ்ஸபோ தே²ரோ…பே… மஹாகச்சானோ தே²ரோ…பே… மஹாகோட்டி²கோ தே²ரோ…பே… மஹாபந்த²கோ தே²ரோ ஸஹ உபபத்தியா அரஹாதி? ந ஹேவம் வத்தப்³பே³…பே….

ஸாரிபுத்தோ தே²ரோ ந ஸஹ உபபத்தியா அரஹாதி? ஆமந்தா. ஹஞ்சி ஸாரிபுத்தோ தே²ரோ ந ஸஹ உபபத்தியா அரஹா, நோ ச வத ரே வத்தப்³பே³ – ‘‘ஸஹ உபபத்தியா அரஹா’’தி.

மஹாமோக்³க³ல்லானோ தே²ரோ…பே… மஹாகஸ்ஸபோ தே²ரோ…பே… மஹாகச்சானோ தே²ரோ…பே… மஹாகோட்டி²கோ தே²ரோ…பே… மஹாபந்த²கோ தே²ரோ ந ஸஹ உபபத்தியா அரஹாதி? ஆமந்தா. ஹஞ்சி மஹாபந்த²கோ தே²ரோ ந ஸஹ உபபத்தியா அரஹா, நோ ச வத ரே வத்தப்³பே³ – ‘‘ஸஹ உபபத்தியா அரஹா’’தி.

390. ஸஹ உபபத்தியா அரஹாதி? ஆமந்தா. உபபத்தேஸியேன சித்தேன அரஹத்தம் ஸச்சி²கரோதி லோகியேன ஸாஸவேன…பே… ஸம்கிலேஸியேனாதி? ந ஹேவம் வத்தப்³பே³…பே….

ஸஹ உபபத்தியா அரஹாதி? ஆமந்தா. உபபத்தேஸியம் சித்தம் நிய்யானிகம் க²யகா³மீ போ³த⁴கா³மீ அபசயகா³மீ அனாஸவம்…பே… அஸம்கிலேஸியந்தி? ந ஹேவம் வத்தப்³பே³…பே….

நனு உபபத்தேஸியம் சித்தம் அனிய்யானிகம் ந க²யகா³மி ந போ³த⁴கா³மி ந அபசயகா³மி ஸாஸவம்…பே… ஸம்கிலேஸியந்தி? ஆமந்தா. ஹஞ்சி உபபத்தேஸியம் சித்தம் அனிய்யானிகம் ந க²யகா³மி ந போ³த⁴கா³மி ந அபசயகா³மி ஸாஸவம்…பே… ஸம்கிலேஸியம், நோ ச வத ரே வத்தப்³பே³ – ‘‘ஸஹ உபபத்தியா அரஹா’’தி.

ஸஹ உபபத்தியா அரஹாதி? ஆமந்தா. உபபத்தேஸியேன சித்தேன ராக³ம் பஜஹதி, தோ³ஸம் பஜஹதி, மோஹம் பஜஹதி, அனோத்தப்பம் பஜஹதீதி? ந ஹேவம் வத்தப்³பே³…பே….

ஸஹ உபபத்தியா அரஹாதி? ஆமந்தா. உபபத்தேஸியம் சித்தம் மக்³கோ³… ஸதிபட்டா²னம்…பே… ஸம்மப்பதா⁴னம்… இத்³தி⁴பாதோ³… இந்த்³ரியம்… ப³லம்… போ³ஜ்ஜ²ங்கோ³தி? ந ஹேவம் வத்தப்³பே³…பே….

ஸஹ உபபத்தியா அரஹாதி? ஆமந்தா. உபபத்தேஸியேன சித்தேன து³க்க²ம் பரிஜானாதி, ஸமுத³யம் பஜஹதி, நிரோத⁴ம் ஸச்சி²கரோதி, மக்³க³ம் பா⁴வேதீதி? ந ஹேவம் வத்தப்³பே³ …பே… ஸஹ உபபத்தியா அரஹாதி? ஆமந்தா. சுதிசித்தம் மக்³க³சித்தம் உபபத்தேஸியம் சித்தம் ப²லசித்தந்தி? ந ஹேவம் வத்தப்³பே³…பே….

உபபத்திகதா² நிட்டி²தா.

4. சதுத்த²வக்³கோ³

(35) 3. அனாஸவகதா²

391. அரஹதோ ஸப்³பே³ த⁴ம்மா அனாஸவாதி? ஆமந்தா. மக்³கோ³ ப²லம் நிப்³பா³னம், ஸோதாபத்திமக்³கோ³ ஸோதாபத்திப²லம், ஸகதா³கா³மிமக்³கோ³ ஸகதா³கா³மிப²லம், அனாகா³மிமக்³கோ³ அனாகா³மிப²லம், அரஹத்தமக்³கோ³ அரஹத்தப²லம், ஸதிபட்டா²னம் ஸம்மப்பதா⁴னம் இத்³தி⁴பாதோ³ இந்த்³ரியம் ப³லம் போ³ஜ்ஜ²ங்கோ³தி? ந ஹேவம் வத்தப்³பே³…பே….

அரஹதோ ஸப்³பே³ த⁴ம்மா அனாஸவாதி? ஆமந்தா. அரஹதோ சக்கு²ம் அனாஸவந்தி? ந ஹேவம் வத்தப்³பே³…பே…. அரஹதோ சக்கு²ம் அனாஸவந்தி? ஆமந்தா. மக்³கோ³ ப²லம் நிப்³பா³னம், ஸோதாபத்திமக்³கோ³ ஸோதாபத்திப²லம்…பே… போ³ஜ்ஜ²ங்கோ³தி? ந ஹேவம் வத்தப்³பே³…பே….

அரஹதோ ஸோதம்…பே… அரஹதோ கா⁴னம்… அரஹதோ ஜிவ்ஹா… அரஹதோ காயோ அனாஸவோதி? ந ஹேவம் வத்தப்³பே³ …பே… அரஹதோ காயோ அனாஸவோதி? ஆமந்தா. மக்³கோ³ ப²லம் நிப்³பா³னம், ஸோதாபத்திமக்³கோ³ ஸோதாபத்திப²லம்…பே… போ³ஜ்ஜ²ங்கோ³தி? ந ஹேவம் வத்தப்³பே³…பே….

அரஹதோ காயோ அனாஸவோதி? ஆமந்தா. அரஹதோ காயோ பக்³க³ஹனிக்³க³ஹுபகோ³ சே²த³னபே⁴த³னுபகோ³ காகேஹி கி³ஜ்ஜே²ஹி குலலேஹி ஸாதா⁴ரணோதி? ஆமந்தா. அனாஸவோ த⁴ம்மோ பக்³க³ஹனிக்³க³ஹுபகோ³ சே²த³னபே⁴த³னுபகோ³ காகேஹி கி³ஜ்ஜே²ஹி குலலேஹி ஸாதா⁴ரணோதி? ந ஹேவம் வத்தப்³பே³ …பே….

அரஹதோ காயே விஸம் கமேய்ய, ஸத்த²ம் கமேய்ய, அக்³கி³ கமேய்யாதி? ஆமந்தா. அனாஸவே த⁴ம்மே விஸம் கமேய்ய, ஸத்த²ம் கமேய்ய, அக்³கி³ கமேய்யாதி? ந ஹேவம் வத்தப்³பே³…பே….

லப்³பா⁴ அரஹதோ காயோ அத்³து³ப³ந்த⁴னேன ப³ந்தி⁴தும், ரஜ்ஜுப³ந்த⁴னேன ப³ந்தி⁴தும், ஸங்க²லிகப³ந்த⁴னேன ப³ந்தி⁴தும், கா³மப³ந்த⁴னேன ப³ந்தி⁴தும், நிக³மப³ந்த⁴னேன ப³ந்தி⁴தும், நக³ரப³ந்த⁴னேன ப³ந்தி⁴தும், ஜனபத³ப³ந்த⁴னேன ப³ந்தி⁴தும், கண்ட²பஞ்சமேஹி ப³ந்த⁴னேஹி ப³ந்தி⁴துந்தி? ஆமந்தா. லப்³பா⁴ அனாஸவோ த⁴ம்மோ அத்³து³ப³ந்த⁴னேன ப³ந்தி⁴தும், ரஜ்ஜுப³ந்த⁴னேன ப³ந்தி⁴தும், ஸங்க²லிகப³ந்த⁴னேன ப³ந்தி⁴தும், கா³மனிக³மனக³ரஜனபத³ப³ந்த⁴னேன ப³ந்தி⁴தும், கண்ட²பஞ்சமேஹி ப³ந்த⁴னேஹி ப³ந்தி⁴துந்தி? ந ஹேவம் வத்தப்³பே³…பே….

392. யதி³ அரஹா புது²ஜ்ஜனஸ்ஸ சீவரம் தே³தி, அனாஸவம் ஹுத்வா ஸாஸவம் ஹோதீதி? ந ஹேவம் வத்தப்³பே³…பே… அனாஸவம் ஹுத்வா ஸாஸவம் ஹோதீதி? ஆமந்தா. தஞ்ஞேவ அனாஸவம் தம் ஸாஸவந்தி? ந ஹேவம் வத்தப்³பே³…பே… தஞ்ஞேவ அனாஸவம் தம் ஸாஸவந்தி? ஆமந்தா. மக்³கோ³ அனாஸவோ ஹுத்வா ஸாஸவோ ஹோதீதி? ந ஹேவம் வத்தப்³பே³…பே… ப²லம்… ஸதிபட்டா²னம்… ஸம்மப்பதா⁴னம்… இத்³தி⁴பாதோ³… இந்த்³ரியம்… ப³லம்… போ³ஜ்ஜ²ங்கோ³ அனாஸவோ ஹுத்வா ஸாஸவோ ஹோதீதி? ந ஹேவம் வத்தப்³பே³…பே….

யதி³ அரஹா புது²ஜ்ஜனஸ்ஸ பிண்ட³பாதம் தே³தி, ஸேனாஸனம் தே³தி, கி³லானபச்சயபே⁴ஸஜ்ஜபரிக்கா²ரம் தே³தி, அனாஸவோ ஹுத்வா ஸாஸவோ ஹோதீதி? ந ஹேவம் வத்தப்³பே³…பே… அனாஸவோ ஹுத்வா ஸாஸவோ ஹோதீதி? ஆமந்தா. தஞ்ஞேவ அனாஸவம் தம் ஸாஸவந்தி? ந ஹேவம் வத்தப்³பே³…பே… தஞ்ஞேவ அனாஸவம் தம் ஸாஸவந்தி? ஆமந்தா. மக்³கோ³ அனாஸவோ ஹுத்வா ஸாஸவோ ஹோதீதி? ந ஹேவம் வத்தப்³பே³…பே… ப²லம்… ஸதிபட்டா²னம்… ஸம்மப்பதா⁴னம்… இத்³தி⁴பாதோ³… இந்த்³ரியம்… ப³லம்… போ³ஜ்ஜ²ங்கோ³ அனாஸவோ ஹுத்வா ஸாஸவோ ஹோதீதி? ந ஹேவம் வத்தப்³பே³…பே….

யதி³ புது²ஜ்ஜனோ அரஹதோ சீவரம் தே³தி, ஸாஸவம் ஹுத்வா அனாஸவம் ஹோதீதி? ந ஹேவம் வத்தப்³பே³…பே… ஸாஸவம் ஹுத்வா அனாஸவம் ஹோதீதி? ஆமந்தா. தஞ்ஞேவ ஸாஸவம் தம் அனாஸவந்தி? ந ஹேவம் வத்தப்³பே³…பே… தஞ்ஞேவ ஸாஸவம் தம் அனாஸவந்தி? ஆமந்தா. ராகோ³ ஸாஸவோ ஹுத்வா அனாஸவோ ஹோதீதி? ந ஹேவம் வத்தப்³பே³…பே… தோ³ஸோ…பே… மோஹோ…பே… அனோத்தப்பம் ஸாஸவம் ஹுத்வா அனாஸவம் ஹோதீதி? ந ஹேவம் வத்தப்³பே³…பே….

யதி³ புது²ஜ்ஜனோ அரஹதோ பிண்ட³பாதம் தே³தி, ஸேனாஸனம் தே³தி, கி³லானபச்சயபே⁴ஸஜ்ஜபரிக்கா²ரம் தே³தி, ஸாஸவோ ஹுத்வா அனாஸவோ ஹோதீதி? ந ஹேவம் வத்தப்³பே³…பே… ஸாஸவோ ஹுத்வா அனாஸவோ ஹோதீதி? ஆமந்தா. தஞ்ஞேவ ஸாஸவம் தம் அனாஸவந்தி? ந ஹேவம் வத்தப்³பே³…பே… தஞ்ஞேவ ஸாஸவம் தம் அனாஸவந்தி? ஆமந்தா. ராகோ³ ஸாஸவோ ஹுத்வா அனாஸவோ ஹோதீதி? ந ஹேவம் வத்தப்³பே³…பே… தோ³ஸோ…பே… மோஹோ…பே… அனோத்தப்பம் ஸாஸவம் ஹுத்வா அனாஸவம் ஹோதீதி? ந ஹேவம் வத்தப்³பே³…பே….

ந வத்தப்³ப³ம் – ‘‘அரஹதோ ஸப்³பே³ த⁴ம்மா அனாஸவா’’தி? ஆமந்தா. நனு அரஹா அனாஸவோதி? ஆமந்தா. ஹஞ்சி அரஹா அனாஸவோ, தேன வத ரே வத்தப்³பே³ – ‘‘அரஹதோ ஸப்³பே³ த⁴ம்மா அனாஸவா’’தி.

அனாஸவகதா² நிட்டி²தா.

4. சதுத்த²வக்³கோ³

(36) 4. ஸமன்னாக³தகதா²

393. அரஹா சதூஹி ப²லேஹி ஸமன்னாக³தோதி? ஆமந்தா. அரஹா சதூஹி ப²ஸ்ஸேஹி சதூஹி வேத³னாஹி சதூஹி ஸஞ்ஞாஹி சதூஹி சேதனாஹி சதூஹி சித்தேஹி சதூஹி ஸத்³தா⁴ஹி சதூஹி வீரியேஹி சதூஹி ஸதீஹி சதூஹி ஸமாதீ⁴ஹி சதூஹி பஞ்ஞாஹி ஸமன்னாக³தோதி? ந ஹேவம் வத்தப்³பே³…பே….

அனாகா³மீ தீஹி ப²லேஹி ஸமன்னாக³தோதி? ஆமந்தா. அனாகா³மீ தீஹி ப²ஸ்ஸேஹி…பே… தீஹி பஞ்ஞாஹி ஸமன்னாக³தோதி? ந ஹேவம் வத்தப்³பே³…பே….

ஸகதா³கா³மீ த்³வீஹி ப²லேஹி ஸமன்னாக³தோதி? ஆமந்தா. ஸகதா³கா³மீ த்³வீஹி ப²ஸ்ஸேஹி…பே… த்³வீஹி பஞ்ஞாஹி ஸமன்னாக³தோதி? ந ஹேவம் வத்தப்³பே³…பே….

அரஹா ஸோதாபத்திப²லேன ஸமன்னாக³தோதி? ஆமந்தா. அரஹா ஸோதாபன்னோ ஸத்தக்க²த்துபரமோ, கோலங்கோலோ, ஏகபீ³ஜீதி? ந ஹேவம் வத்தப்³பே³…பே… அரஹா ஸகதா³கா³மிப²லேன ஸமன்னாக³தோதி? ஆமந்தா. அரஹா ஸகதா³கா³மீதி? ந ஹேவம் வத்தப்³பே³ …பே… அரஹா அனாகா³மிப²லேன ஸமன்னாக³தோதி? ஆமந்தா. அரஹா அனாகா³மீ, அந்தராபரினிப்³பா³யீ, உபஹச்சபரினிப்³பா³யீ, அஸங்கா²ரபரினிப்³பா³யீ, ஸஸங்கா²ரபரினிப்³பா³யீ, உத்³த⁴ம்ஸோதோ அகனிட்ட²கா³மீதி? ந ஹேவம் வத்தப்³பே³…பே….

அனாகா³மீ ஸோதாபத்திப²லேன ஸமன்னாக³தோதி? ஆமந்தா. அனாகா³மீ ஸோதாபன்னோ ஸத்தக்க²த்துபரமோ, கோலங்கோலோ, ஏகபீ³ஜீதி? ந ஹேவம் வத்தப்³பே³ …பே… அனாகா³மீ ஸகதா³கா³மிப²லேன ஸமன்னாக³தோதி? ஆமந்தா. அனாகா³மீ ஸகதா³கா³மீதி? ந ஹேவம் வத்தப்³பே³…பே….

ஸகதா³கா³மீ ஸோதாபத்திப²லேன ஸமன்னாக³தோதி? ஆமந்தா. ஸகதா³கா³மீ ஸோதாபன்னோ ஸத்தக்க²த்துபரமோ, கோலங்கோலோ, ஏகபீ³ஜீதி? ந ஹேவம் வத்தப்³பே³…பே….

394. ஸோதாபத்திப²லேன ஸமன்னாக³தோ ‘‘ஸோதாபன்னோ’’தி வத்தப்³போ³தி? ஆமந்தா. அரஹா ஸோதாபத்திப²லேன ஸமன்னாக³தோதி? ஆமந்தா. ஸ்வேவ அரஹா, ஸோ ஸோதாபன்னோதி? ந ஹேவம் வத்தப்³பே³…பே….

ஸகதா³கா³மிப²லேன ஸமன்னாக³தோ ‘‘ஸகதா³கா³மீ’’தி வத்தப்³போ³தி? ஆமந்தா. அரஹா ஸகதா³கா³மிப²லேன ஸமன்னாக³தோதி? ஆமந்தா. ஸ்வேவ அரஹா, ஸோ ஸகதா³கா³மீதி? ந ஹேவம் வத்தப்³பே³…பே….

அனாகா³மிப²லேன ஸமன்னாக³தோ ‘‘அனாகா³மீ’’தி வத்தப்³போ³தி? ஆமந்தா. அரஹா அனாகா³மிப²லேன ஸமன்னாக³தோதி? ஆமந்தா. ஸ்வேவ அரஹா, ஸோ அனாகா³மீதி? ந ஹேவம் வத்தப்³பே³…பே….

ஸோதாபத்திப²லேன ஸமன்னாக³தோ ‘‘ஸோதாபன்னோ’’தி வத்தப்³போ³தி? ஆமந்தா. அனாகா³மீ ஸோதாபத்திப²லேன ஸமன்னாக³தோதி? ஆமந்தா. ஸ்வேவ அனாகா³மீ, ஸோ ஸோதாபன்னோதி? ந ஹேவம் வத்தப்³பே³…பே….

ஸகதா³கா³மிப²லேன ஸமன்னாக³தோ ‘‘ஸகதா³கா³மீ’’தி வத்தப்³போ³தி? ஆமந்தா. அனாகா³மீ ஸகதா³கா³மிப²லேன ஸமன்னாக³தோதி? ஆமந்தா. ஸ்வேவ அனாகா³மீ, ஸோ ஸகதா³கா³மீதி? ந ஹேவம் வத்தப்³பே³…பே….

ஸோதாபத்திப²லேன ஸமன்னாக³தோ ‘‘ஸோதாபன்னோ’’தி வத்தப்³போ³தி? ஆமந்தா. ஸகதா³கா³மீ ஸோதாபத்திப²லேன ஸமன்னாக³தோதி? ஆமந்தா. ஸ்வேவ ஸகதா³கா³மீ, ஸோ ஸோதாபன்னோதி? ந ஹேவம் வத்தப்³பே³…பே….

395. அரஹா ஸோதாபத்திப²லேன ஸமன்னாக³தோதி? ஆமந்தா. நனு அரஹா ஸோதாபத்திப²லம் வீதிவத்தோதி? ஆமந்தா. ஹஞ்சி அரஹா ஸோதாபத்திப²லம் வீதிவத்தோ, நோ ச வத ரே வத்தப்³பே³ – ‘‘அரஹா ஸோதாபத்திப²லேன ஸமன்னாக³தோ’’தி.

அரஹா ஸோதாபத்திப²லம் வீதிவத்தோ தேன ஸமன்னாக³தோதி? ஆமந்தா. அரஹா ஸோதாபத்திமக்³க³ம் வீதிவத்தோ, ஸக்காயதி³ட்டி²ம் விசிகிச்ச²ம் ஸீலப்³ப³தபராமாஸம், அபாயக³மனீயம் ராக³ம், அபாயக³மனீயம் தோ³ஸம், அபாயக³மனீயம் மோஹம் வீதிவத்தோ தேன ஸமன்னாக³தோதி? ந ஹேவம் வத்தப்³பே³…பே….

அரஹா ஸகதா³கா³மிப²லேன ஸமன்னாக³தோதி? ஆமந்தா. நனு அரஹா ஸகதா³கா³மிப²லம் வீதிவத்தோதி? ஆமந்தா. ஹஞ்சி அரஹா ஸகதா³கா³மிப²லம் வீதிவத்தோ, நோ ச வத ரே வத்தப்³பே³ – ‘‘அரஹா ஸகதா³கா³மிப²லேன ஸமன்னாக³தோ’’தி.

அரஹா ஸகதா³கா³மிப²லம் வீதிவத்தோ தேன ஸமன்னாக³தோதி? ஆமந்தா. அரஹா ஸகதா³கா³மிமக்³க³ம் வீதிவத்தோ, ஓளாரிகம் காமராக³ம், ஓளாரிகம் ப்³யாபாத³ம் வீதிவத்தோ தேன ஸமன்னாக³தோதி? ந ஹேவம் வத்தப்³பே³…பே….

அரஹா அனாகா³மிப²லேன ஸமன்னாக³தோதி? ஆமந்தா. நனு அரஹா அனாகா³மிப²லம் வீதிவத்தோதி? ஆமந்தா. ஹஞ்சி அரஹா அனாகா³மிப²லம் வீதிவத்தோ, நோ ச வத ரே வத்தப்³பே³ – ‘‘அரஹா அனாகா³மிப²லேன ஸமன்னாக³தோ’’தி.

அரஹா அனாகா³மிப²லம் வீதிவத்தோ தேன ஸமன்னாக³தோதி? ஆமந்தா. அரஹா அனாகா³மிமக்³க³ம் வீதிவத்தோ, அணுஸஹக³தம் காமராக³ம், அணுஸஹக³தம் ப்³யாபாத³ம் வீதிவத்தோ தேன ஸமன்னாக³தோதி? ந ஹேவம் வத்தப்³பே³…பே….

அனாகா³மீ ஸோதாபத்திப²லேன ஸமன்னாக³தோதி? ஆமந்தா. நனு அனாகா³மீ ஸோதாபத்திப²லம் வீதிவத்தோதி? ஆமந்தா. ஹஞ்சி அனாகா³மீ ஸோதாபத்திப²லம் வீதிவத்தோ, நோ ச வத ரே வத்தப்³பே³ – ‘‘அனாகா³மீ ஸோதாபத்திப²லேன ஸமன்னாக³தோ’’தி.

அனாகா³மீ ஸோதாபத்திப²லம் வீதிவத்தோ தேன ஸமன்னாக³தோதி? ஆமந்தா. அனாகா³மீ ஸோதாபத்திமக்³க³ம் வீதிவத்தோ, ஸக்காயதி³ட்டி²ம்…பே… அபாயக³மனீயம் மோஹம் வீதிவத்தோ தேன ஸமன்னாக³தோதி? ந ஹேவம் வத்தப்³பே³…பே….

அனாகா³மீ ஸகதா³கா³மிப²லேன ஸமன்னாக³தோதி? ஆமந்தா. நனு அனாகா³மீ ஸகதா³கா³மிப²லம் வீதிவத்தோதி? ஆமந்தா. ஹஞ்சி அனாகா³மீ ஸகதா³கா³மிப²லம் வீதிவத்தோ, நோ ச வத ரே வத்தப்³பே³ – ‘‘அனாகா³மீ ஸகதா³கா³மிப²லேன ஸமன்னாக³தோ’’தி.

அனாகா³மீ ஸகதா³கா³மிப²லம் வீதிவத்தோ தேன ஸமன்னாக³தோதி? ஆமந்தா. அனாகா³மீ ஸகதா³கா³மிமக்³க³ம் வீதிவத்தோ, ஓளாரிகம் காமராக³ம், ஓளாரிகம் ப்³யாபாத³ம் வீதிவத்தோ தேன ஸமன்னாக³தோதி? ந ஹேவம் வத்தப்³பே³…பே….

ஸகதா³கா³மீ ஸோதாபத்திப²லேன ஸமன்னாக³தோதி? ஆமந்தா. நனு ஸகதா³கா³மீ ஸோதாபத்திப²லம் வீதிவத்தோதி? ஆமந்தா. ஹஞ்சி ஸகதா³கா³மீ ஸோதாபத்திப²லம் வீதிவத்தோ, நோ ச வத ரே வத்தப்³பே³ – ‘‘ஸகதா³கா³மீ ஸோதாபத்திப²லேன ஸமன்னாக³தோ’’தி.

ஸகதா³கா³மீ ஸோதாபத்திப²லம் வீதிவத்தோ தேன ஸமன்னாக³தோதி? ஆமந்தா. ஸகதா³கா³மீ ஸோதாபத்திமக்³க³ம் வீதிவத்தோ, ஸக்காயதி³ட்டி²ம்…பே… அபாயக³மனீயம் மோஹம் வீதிவத்தோ தேன ஸமன்னாக³தோதி? ந ஹேவம் வத்தப்³பே³…பே….

396. ந வத்தப்³ப³ம் – ‘‘அரஹா சதூஹி ப²லேஹி ஸமன்னாக³தோ’’தி? ஆமந்தா. நனு அரஹதா சத்தாரி ப²லானி படிலத்³தா⁴னி, தேஹி ச அபரிஹீனோதி? ஆமந்தா. ஹஞ்சி அரஹதா சத்தாரி ப²லானி படிலத்³தா⁴னி தேஹி ச அபரிஹீனோ, தேன வத ரே வத்தப்³பே³ – ‘‘அரஹா சதூஹி ப²லேஹி ஸமன்னாக³தோ’’தி.

ந வத்தப்³ப³ம் – ‘‘அனாகா³மீ தீஹி ப²லேஹி ஸமன்னாக³தோ’’தி? ஆமந்தா. நனு அனாகா³மினா தீணி ப²லானி படிலத்³தா⁴னி, தேஹி ச அபரிஹீனோதி? ஆமந்தா. ஹஞ்சி அனாகா³மினா தீணி ப²லானி படிலத்³தா⁴னி தேஹி ச அபரிஹீனோ, தேன வத ரே வத்தப்³பே³ – ‘‘அனாகா³மீ தீஹி ப²லேஹி ஸமன்னாக³தோ’’தி.

ந வத்தப்³ப³ம் – ‘‘ஸகதா³கா³மீ த்³வீஹி ப²லேஹி ஸமன்னாக³தோ’’தி? ஆமந்தா. நனு ஸகதா³கா³மினா த்³வே ப²லானி படிலத்³தா⁴னி, தேஹி ச அபரிஹீனோதி? ஆமந்தா. ஹஞ்சி ஸகதா³கா³மினா த்³வே ப²லானி படிலத்³தா⁴னி தேஹி ச அபரிஹீனோ, தேன வத ரே வத்தப்³பே³ – ‘‘ஸகதா³கா³மீ த்³வீஹி ப²லேஹி ஸமன்னாக³தோ’’தி.

அரஹதா சத்தாரி ப²லானி படிலத்³தா⁴னி தேஹி ச அபரிஹீனோதி, அரஹா சதூஹி ப²லேஹி ஸமன்னாக³தோதி? ஆமந்தா. அரஹதா சத்தாரோ மக்³கா³ படிலத்³தா⁴ தேஹி ச அபரிஹீனோதி, அரஹா சதூஹி மக்³கே³ஹி ஸமன்னாக³தோதி? ந ஹேவம் வத்தப்³பே³…பே….

அனாகா³மினா தீணி ப²லானி படிலத்³தா⁴னி தேஹி ச அபரிஹீனோதி, அனாகா³மீ தீஹி ப²லேஹி ஸமன்னாக³தோதி? ஆமந்தா. அனாகா³மினா தயோ மக்³கா³ படிலத்³தா⁴ தேஹி ச அபரிஹீனோதி, அனாகா³மீ தீஹி மக்³கே³ஹி ஸமன்னாக³தோதி? ந ஹேவம் வத்தப்³பே³…பே….

ஸகதா³கா³மினா த்³வே ப²லானி படிலத்³தா⁴னி தேஹி ச அபரிஹீனோதி, ஸகதா³கா³மீ த்³வீஹி ப²லேஹி ஸமன்னாக³தோதி? ஆமந்தா. ஸகதா³கா³மினா த்³வே மக்³கா³ படிலத்³தா⁴, தேஹி ச அபரிஹீனோதி, ஸகதா³கா³மீ த்³வீஹி மக்³கே³ஹி ஸமன்னாக³தோதி? ந ஹேவம் வத்தப்³பே³…பே….

ஸமன்னாக³தகதா² நிட்டி²தா.

4. சதுத்த²வக்³கோ³

(37) 5. உபேக்கா²ஸமன்னாக³தகதா²

397. அரஹா ச²ஹி உபேக்கா²ஹி ஸமன்னாக³தோதி? ஆமந்தா. அரஹா ச²ஹி ப²ஸ்ஸேஹி, ச²ஹி வேத³னாஹி, ச²ஹி ஸஞ்ஞாஹி…பே… ச²ஹி பஞ்ஞாஹி ஸமன்னாக³தோதி? ந ஹேவம் வத்தப்³பே³…பே….

அரஹா ச²ஹி உபேக்கா²ஹி ஸமன்னாக³தோதி? ஆமந்தா. அரஹா சக்கு²னா ரூபம் பஸ்ஸந்தோ ஸோதேன ஸத்³த³ம் ஸுணாதி, கா⁴னேன க³ந்த⁴ம் கா⁴யதி, ஜிவ்ஹாய ரஸம் ஸாயதி, காயேன போ²ட்ட²ப்³ப³ம் பு²ஸதி, மனஸா த⁴ம்மம் விஜானாதி…பே… மனஸா த⁴ம்மம் விஜானந்தோ சக்கு²னா ரூபம் பஸ்ஸதி, ஸோதேன ஸத்³த³ம் ஸுணாதி, கா⁴னேன க³ந்த⁴ம் கா⁴யதி, ஜிவ்ஹாய ரஸம் ஸாயதி, காயேன போ²ட்ட²ப்³ப³ம் பு²ஸதீதி? ந ஹேவம் வத்தப்³பே³…பே….

அரஹா ச²ஹி உபேக்கா²ஹி ஸமன்னாக³தோதி? ஆமந்தா. ஸததம் ஸமிதம் அப்³போ³கிண்ணம் ச²ஹி உபேக்கா²ஹி ஸமன்னாக³தோ ஸமோஹிதோ [ஸமாஹிதோ (ஸ்யா.)], ச² உபேக்கா²யோ பச்சுபட்டி²தாதி? ந ஹேவம் வத்தப்³பே³…பே….

ந வத்தப்³ப³ம் – ‘‘அரஹா ச²ஹி உபேக்கா²ஹி ஸமன்னாக³தோ’’தி? ஆமந்தா. நனு அரஹா ச²ளங்கு³பேக்கோ²தி? ஆமந்தா. ஹஞ்சி அரஹா ச²ளங்கு³பேக்கோ², தேன வத ரே வத்தப்³பே³ – ‘‘அரஹா ச²ஹி உபேக்கா²ஹி ஸமன்னாக³தோ’’தி…பே….

உபேக்கா²ஸமன்னாக³தகதா² நிட்டி²தா.

4. சதுத்த²வக்³கோ³

(38) 6. போ³தி⁴யா பு³த்³தோ⁴திகதா²

398. போ³தி⁴யா பு³த்³தோ⁴தி? ஆமந்தா. போ³தி⁴யா நிருத்³தா⁴ய விக³தாய படிபஸ்ஸத்³தா⁴ய அபு³த்³தோ⁴ ஹோதீதி? ந ஹேவம் வத்தப்³பே³…பே….

போ³தி⁴யா பு³த்³தோ⁴தி? ஆமந்தா. அதீதாய போ³தி⁴யா பு³த்³தோ⁴தி? ந ஹேவம் வத்தப்³பே³…பே… அதீதாய போ³தி⁴யா பு³த்³தோ⁴தி? ஆமந்தா. தாய போ³தி⁴யா போ³தி⁴கரணீயம் கரோதீதி? ந ஹேவம் வத்தப்³பே³…பே….

தாய போ³தி⁴யா போ³தி⁴கரணீயம் கரோதீதி? ஆமந்தா. தாய போ³தி⁴யா து³க்க²ம் பரிஜானாதி, ஸமுத³யம் பஜஹதி, நிரோத⁴ம் ஸச்சி²கரோதி, மக்³க³ம் பா⁴வேதீதி? ந ஹேவம் வத்தப்³பே³…பே….

போ³தி⁴யா பு³த்³தோ⁴தி? ஆமந்தா. அனாக³தாய போ³தி⁴யா பு³த்³தோ⁴தி? ந ஹேவம் வத்தப்³பே³…பே….

அனாக³தாய போ³தி⁴யா பு³த்³தோ⁴தி? ஆமந்தா. தாய போ³தி⁴யா போ³தி⁴கரணீயம் கரோதீதி? ந ஹேவம் வத்தப்³பே³…பே….

தாய போ³தி⁴யா போ³தி⁴கரணீயம் கரோதீதி? ஆமந்தா. தாய போ³தி⁴யா து³க்க²ம் பரிஜானாதி…பே… மக்³க³ம் பா⁴வேதீதி? ந ஹேவம் வத்தப்³பே³…பே….

பச்சுப்பன்னாய போ³தி⁴யா பு³த்³தோ⁴, தாய போ³தி⁴யா போ³தி⁴கரணீயம் கரோதீதி? ஆமந்தா. அதீதாய போ³தி⁴யா பு³த்³தோ⁴, தாய போ³தி⁴யா போ³தி⁴கரணீயம் கரோதீதி? ந ஹேவம் வத்தப்³பே³…பே….

பச்சுப்பன்னாய போ³தி⁴யா பு³த்³தோ⁴, தாய போ³தி⁴யா து³க்க²ம் பரிஜானாதி, ஸமுத³யம் பஜஹதி, நிரோத⁴ம் ஸச்சி²கரோதி, மக்³க³ம் பா⁴வேதீதி? ஆமந்தா. அதீதாய போ³தி⁴யா பு³த்³தோ⁴, தாய போ³தி⁴யா து³க்க²ம் பரிஜானாதி…பே… மக்³க³ம் பா⁴வேதீதி? ந ஹேவம் வத்தப்³பே³…பே….

பச்சுப்பன்னாய போ³தி⁴யா பு³த்³தோ⁴, தாய போ³தி⁴யா போ³தி⁴கரணீயம் கரோதீதி? ஆமந்தா. அனாக³தாய போ³தி⁴யா பு³த்³தோ⁴, தாய போ³தி⁴யா போ³தி⁴கரணீயம் கரோதீதி? ந ஹேவம் வத்தப்³பே³…பே….

பச்சுப்பன்னாய போ³தி⁴யா பு³த்³தோ⁴, தாய போ³தி⁴யா து³க்க²ம் பரிஜானாதி…பே… மக்³க³ம் பா⁴வேதீதி? ஆமந்தா. அனாக³தாய போ³தி⁴யா பு³த்³தோ⁴, தாய போ³தி⁴யா து³க்க²ம் பரிஜானாதி…பே… மக்³க³ம் பா⁴வேதீதி? ந ஹேவம் வத்தப்³பே³…பே….

அதீதாய போ³தி⁴யா பு³த்³தோ⁴, ந ச தாய போ³தி⁴யா போ³தி⁴கரணீயம் கரோதீதி? ஆமந்தா. பச்சுப்பன்னாய போ³தி⁴யா பு³த்³தோ⁴, ந ச தாய போ³தி⁴யா போ³தி⁴கரணீயம் கரோதீதி? ந ஹேவம் வத்தப்³பே³…பே….

அதீதாய போ³தி⁴யா பு³த்³தோ⁴, ந ச தாய போ³தி⁴யா து³க்க²ம் பரிஜானாதி…பே… மக்³க³ம் பா⁴வேதீதி? ஆமந்தா. பச்சுப்பன்னாய போ³தி⁴யா பு³த்³தோ⁴, ந ச தாய போ³தி⁴யா து³க்க²ம் பரிஜானாதி…பே… மக்³க³ம் பா⁴வேதீதி? ந ஹேவம் வத்தப்³பே³…பே….

அனாக³தாய போ³தி⁴யா பு³த்³தோ⁴, ந ச தாய போ³தி⁴யா போ³தி⁴கரணீயம் கரோதீதி? ஆமந்தா. பச்சுப்பன்னாய போ³தி⁴யா பு³த்³தோ⁴, ந ச தாய போ³தி⁴யா போ³தி⁴கரணீயம் கரோதீதி? ந ஹேவம் வத்தப்³பே³…பே….

அனாக³தாய போ³தி⁴யா பு³த்³தோ⁴, ந ச தாய போ³தி⁴யா து³க்க²ம் பரிஜானாதி…பே… மக்³க³ம் பா⁴வேதீதி? ஆமந்தா. பச்சுப்பன்னாய போ³தி⁴யா பு³த்³தோ⁴, ந ச தாய போ³தி⁴யா து³க்க²ம் பரிஜானாதி…பே… மக்³க³ம் பா⁴வேதீதி? ந ஹேவம் வத்தப்³பே³…பே….

399. அதீதாய போ³தி⁴யா பு³த்³தோ⁴, அனாக³தாய போ³தி⁴யா பு³த்³தோ⁴, பச்சுப்பன்னாய போ³தி⁴யா பு³த்³தோ⁴தி? ஆமந்தா. தீஹி போ³தீ⁴ஹி பு³த்³தோ⁴தி? ந ஹேவம் வத்தப்³பே³…பே….

தீஹி போ³தீ⁴ஹி பு³த்³தோ⁴தி? ஆமந்தா. ஸததம் ஸமிதம் அப்³போ³கிண்ணம் தீஹி போ³தீ⁴ஹி ஸமன்னாக³தோ ஸமோஹிதோ, திஸ்ஸோ போ³தி⁴யோ பச்சுபட்டி²தாதி? ந ஹேவம் வத்தப்³பே³…பே….

ந வத்தப்³ப³ம் – ‘‘போ³தி⁴யா பு³த்³தோ⁴’’தி? ஆமந்தா. நனு போ³தி⁴படிலாபா⁴ பு³த்³தோ⁴தி? ஆமந்தா. ஹஞ்சி போ³தி⁴படிலாபா⁴ பு³த்³தோ⁴, தேன வத ரே வத்தப்³பே³ – ‘‘போ³தி⁴யா பு³த்³தோ⁴’’தி.

போ³தி⁴படிலாபா⁴ பு³த்³தோ⁴தி, போ³தி⁴யா பு³த்³தோ⁴தி? ஆமந்தா. போ³தி⁴படிலாபா⁴ போ³தீ⁴தி? ந ஹேவம் வத்தப்³பே³…பே….

போ³தி⁴யா பு³த்³தோ⁴திகதா² நிட்டி²தா.

4. சதுத்த²வக்³கோ³

(39) 7. லக்க²ணகதா²

400. லக்க²ணஸமன்னாக³தோ போ³தி⁴ஸத்தோதி? ஆமந்தா. பதே³ஸலக்க²ணேஹி ஸமன்னாக³தோ பதே³ஸபோ³தி⁴ஸத்தோதி? ந ஹேவம் வத்தப்³பே³…பே….

லக்க²ணஸமன்னாக³தோ போ³தி⁴ஸத்தோதி? ஆமந்தா. திபா⁴க³லக்க²ணேஹி ஸமன்னாக³தோ திபா⁴க³போ³தி⁴ஸத்தோதி? ந ஹேவம் வத்தப்³பே³…பே….

லக்க²ணஸமன்னாக³தோ போ³தி⁴ஸத்தோதி? ஆமந்தா. உபட்³ட⁴லக்க²ணேஹி ஸமன்னாக³தோ உபட்³ட⁴போ³தி⁴ஸத்தோதி? ந ஹேவம் வத்தப்³பே³…பே….

லக்க²ணஸமன்னாக³தோ போ³தி⁴ஸத்தோதி? ஆமந்தா. சக்கவத்திஸத்தோ லக்க²ணஸமன்னாக³தோ, சக்கவத்திஸத்தோ போ³தி⁴ஸத்தோதி? ந ஹேவம் வத்தப்³பே³…பே….

சக்கவத்திஸத்தோ லக்க²ணஸமன்னாக³தோ, சக்கவத்திஸத்தோ போ³தி⁴ஸத்தோதி? ஆமந்தா. யாதி³ஸோ போ³தி⁴ஸத்தஸ்ஸ புப்³ப³யோகோ³ புப்³ப³சரியா த⁴ம்மக்கா²னம் த⁴ம்மதே³ஸனா, தாதி³ஸோ சக்கவத்திஸத்தஸ்ஸ புப்³ப³யோகோ³ புப்³ப³சரியா த⁴ம்மக்கா²னம் த⁴ம்மதே³ஸனாதி? ந ஹேவம் வத்தப்³பே³…பே….

401. யதா² போ³தி⁴ஸத்தஸ்ஸ ஜாயமானஸ்ஸ தே³வா பட²மம் படிக்³க³ண்ஹந்தி பச்சா² மனுஸ்ஸா [தீ³. நி. 2.27; ம. நி. 3.205 வுத்தம் தி³ஸ்ஸாய புச்ச²தி], ஏவமேவம் சக்கவத்திஸத்தஸ்ஸ ஜாயமானஸ்ஸ தே³வா பட²மம் படிக்³க³ண்ஹந்தி பச்சா² மனுஸ்ஸாதி? ந ஹேவம் வத்தப்³பே³…பே….

யதா² போ³தி⁴ஸத்தஸ்ஸ ஜாயமானஸ்ஸ சத்தாரோ நம் தே³வபுத்தா படிக்³க³ஹேத்வா மாது புரதோ ட²பேந்தி – ‘‘அத்தமனா, தே³வி, ஹோஹி! மஹேஸக்கோ² தே புத்தோ உப்பன்னோ’’தி, ஏவமேவம் சக்கவத்திஸத்தஸ்ஸ ஜாயமானஸ்ஸ சத்தாரோ நம் தே³வபுத்தா படிக்³க³ஹேத்வா மாது புரதோ ட²பேந்தி – ‘‘அத்தமனா, தே³வி, ஹோஹி! மஹேஸக்கோ² தே புத்தோ உப்பன்னோ’’தி? ந ஹேவம் வத்தப்³பே³…பே….

யதா² போ³தி⁴ஸத்தஸ்ஸ ஜாயமானஸ்ஸ த்³வே உத³கஸ்ஸ தா⁴ரா அந்தலிக்கா² பாதுப⁴வந்தி – ஏகா ஸீதஸ்ஸ, ஏகா உண்ஹஸ்ஸ – யேன போ³தி⁴ஸத்தஸ்ஸ உத³ககிச்சம் கரோந்தி மாது ச, ஏவமேவம் சக்கவத்திஸத்தஸ்ஸ ஜாயமானஸ்ஸ த்³வே உத³கஸ்ஸ தா⁴ரா அந்தலிக்கா² பாதுப⁴வந்தி – ஏகா ஸீதஸ்ஸ, ஏகா உண்ஹஸ்ஸ – யேன சக்கவத்திஸத்தஸ்ஸ உத³ககிச்சம் கரோந்தி மாது சாதி? ந ஹேவம் வத்தப்³பே³…பே….

யதா² ஸம்பதிஜாதோ போ³தி⁴ஸத்தோ ஸமேஹி பாதே³ஹி பதிட்ட²ஹித்வா உத்தரேன அபி⁴முகோ² ஸத்தபத³வீதிஹாரேன க³ச்ச²தி ஸேதம்ஹி ச²த்தே அனுதா⁴ரியமானே, ஸப்³பா³ ச தி³ஸா விலோகேதி, ஆஸபி⁴ஞ்ச வாசம் பா⁴ஸதி – ‘‘அக்³கோ³ஹமஸ்மி லோகஸ்ஸ, ஜேட்டோ²ஹமஸ்மி லோகஸ்ஸ, ஸேட்டோ²ஹமஸ்மி லோகஸ்ஸ, அயமந்திமா ஜாதி, நத்தி² தா³னி புனப்³ப⁴வோ’’தி, ஏவமேவம் ஸம்பதிஜாதோ சக்கவத்திஸத்தோ ஸமேஹி பாதே³ஹி பதிட்ட²ஹித்வா உத்தரேன அபி⁴முகோ² ஸத்தபத³வீதிஹாரேன க³ச்ச²தி ஸேதம்ஹி ச²த்தே அனுதா⁴ரியமானே, ஸப்³பா³ ச தி³ஸா விலோகேதி, ஆஸபி⁴ஞ்ச வாசம் பா⁴ஸதி – ‘‘அக்³கோ³ஹமஸ்மி லோகஸ்ஸ, ஜேட்டோ²ஹமஸ்மி லோகஸ்ஸ, ஸேட்டோ²ஹமஸ்மி லோகஸ்ஸ, அயமந்திமா ஜாதி, நத்தி² தா³னி புனப்³ப⁴வோ’’தி? ந ஹேவம் வத்தப்³பே³…பே….

யதா² போ³தி⁴ஸத்தஸ்ஸ ஜாயமானஸ்ஸ மஹதோ ஆலோகஸ்ஸ மஹதோ ஓபா⁴ஸஸ்ஸ மஹதோ பூ⁴மிசாலஸ்ஸ பாதுபா⁴வோ ஹோதி, ஏவமேவம் சக்கவத்திஸத்தஸ்ஸ ஜாயமானஸ்ஸ மஹதோ ஆலோகஸ்ஸ மஹதோ ஓபா⁴ஸஸ்ஸ மஹதோ பூ⁴மிசாலஸ்ஸ பாதுபா⁴வோ ஹோதீதி? ந ஹேவம் வத்தப்³பே³…பே….

யதா² போ³தி⁴ஸத்தஸ்ஸ பகதிகாயோ ஸமந்தா ப்³யாமம் ஓபா⁴ஸதி, ஏவமேவம் சக்கவத்திஸத்தஸ்ஸ பகதிகாயோ ஸமந்தா ப்³யாமம் ஓபா⁴ஸதீதி? ந ஹேவம் வத்தப்³பே³…பே….

யதா² போ³தி⁴ஸத்தோ மஹாஸுபினம் பஸ்ஸதி, ஏவமேவம் சக்கவத்திஸத்தோ மஹாஸுபினம் பஸ்ஸதீதி? ந ஹேவம் வத்தப்³பே³…பே….

402. ந வத்தப்³ப³ம் – ‘‘லக்க²ணஸமன்னாக³தோ போ³தி⁴ஸத்தோ’’தி? ஆமந்தா. நனு வுத்தம் ப⁴க³வதா – ‘‘த்³வத்திம்ஸிமானி, பி⁴க்க²வே, மஹாபுரிஸஸ்ஸ மஹாபுரிஸலக்க²ணானி, யேஹி ஸமன்னாக³தஸ்ஸ மஹாபுரிஸஸ்ஸ த்³வேவ க³தியோ ப⁴வந்தி அனஞ்ஞா [ந அஞ்ஞா (க.)]! ஸசே அகா³ரம் அஜ்ஜா²வஸதி, ராஜா ஹோதி சக்கவத்தீ த⁴ம்மிகோ த⁴ம்மராஜா சாதுரந்தோ விஜிதாவீ ஜனபத³த்தா²வரியப்பத்தோ ஸத்தரதனஸமன்னாக³தோ. தஸ்ஸிமானி ஸத்த ரதனானி ப⁴வந்தி, ஸேய்யதி²த³ம் – சக்கரதனம், ஹத்தி²ரதனம், அஸ்ஸரதனம், மணிரதனம், இத்தி²ரதனம், க³ஹபதிரதனம், பரிணாயகரதனமேவ ஸத்தமம். பரோஸஹஸ்ஸம் கோ² பனஸ்ஸ புத்தா ப⁴வந்தி ஸூரா வீரங்க³ரூபா பரஸேனப்பமத்³த³னா. ஸோ இமம் பத²விம் ஸாக³ரபரியந்தம் அத³ண்டே³ன அஸத்தே²ன த⁴ம்மேன அபி⁴விஜிய அஜ்ஜா²வஸதி. ஸசே கோ² பன அகா³ரஸ்மா அனகா³ரியம் பப்³ப³ஜதி, அரஹம் ஹோதி ஸம்மாஸம்பு³த்³தோ⁴ லோகே விவட்டச்ச²தோ³’’தி [தீ³. நி. 3.200]. அத்தே²வ ஸுத்தந்தோதி? ஆமந்தா. தேன ஹி லக்க²ணஸமன்னாக³தோ போ³தி⁴ஸத்தோதி.

லக்க²ணகதா² நிட்டி²தா.

4. சதுத்த²வக்³கோ³

(40) 8. நியாமோக்கந்திகதா²

403. போ³தி⁴ஸத்தோ கஸ்ஸபஸ்ஸ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோதி [ம. நி. 2.282 க⁴டிகாரஸுத்தம் நிஸ்ஸாய புச்ச²தி]? ஆமந்தா. போ³தி⁴ஸத்தோ கஸ்ஸபஸ்ஸ ப⁴க³வதோ ஸாவகோதி? ந ஹேவம் வத்தப்³பே³…பே….

போ³தி⁴ஸத்தோ கஸ்ஸபஸ்ஸ ப⁴க³வதோ ஸாவகோதி? ஆமந்தா. ஸாவகோ ஹுத்வா பு³த்³தோ⁴ ஹோதீதி? ந ஹேவம் வத்தப்³பே³…பே….

ஸாவகோ ஹுத்வா பு³த்³தோ⁴ ஹோதீதி? ஆமந்தா. அனுஸ்ஸவியோதி? ந ஹேவம் வத்தப்³பே³…பே….

அனுஸ்ஸவியோதி? ஆமந்தா. நனு ப⁴க³வா ஸயம்பூ⁴தி? ஆமந்தா. ஹஞ்சி ப⁴க³வா ஸயம்பூ⁴, நோ ச வத ரே வத்தப்³பே³ – ‘‘அனுஸ்ஸவியோ’’தி.

போ³தி⁴ஸத்தோ கஸ்ஸபஸ்ஸ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோதி? ஆமந்தா. ப⁴க³வதா போ³தி⁴யா மூலே தீணேவ ஸாமஞ்ஞப²லானி அபி⁴ஸம்பு³த்³தா⁴னீதி? ந ஹேவம் வத்தப்³பே³…பே….

நனு ப⁴க³வதா போ³தி⁴யா மூலே சத்தாரி ஸாமஞ்ஞப²லானி அபி⁴ஸம்பு³த்³தா⁴னீதி? ஆமந்தா. ஹஞ்சி ப⁴க³வதா போ³தி⁴யா மூலே சத்தாரி ஸாமஞ்ஞப²லானி அபி⁴ஸம்பு³த்³தா⁴னி, நோ ச வத ரே வத்தப்³பே³ – ‘‘போ³தி⁴ஸத்தோ கஸ்ஸபஸ்ஸ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோ’’தி.

404. போ³தி⁴ஸத்தோ கஸ்ஸபஸ்ஸ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோதி? ஆமந்தா. போ³தி⁴ஸத்தோ து³க்கரகாரியம் அகாஸீதி? ஆமந்தா. த³ஸ்ஸனஸம்பன்னோ புக்³க³லோ து³க்கரகாரியம் கரேய்யாதி? ந ஹேவம் வத்தப்³பே³…பே….

போ³தி⁴ஸத்தோ அபரந்தபம் [அமரம் தபம் (ஸம். நி. 1.137)] அகாஸி, அஞ்ஞம் ஸத்தா²ரம் உத்³தி³ஸீதி? ஆமந்தா. த³ஸ்ஸனஸம்பன்னோ புக்³க³லோ அஞ்ஞம் ஸத்தா²ரம் உத்³தி³ஸேய்யாதி? ந ஹேவம் வத்தப்³பே³…பே….

ஆயஸ்மா ஆனந்தோ³ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோ, ஆயஸ்மா ஆனந்தோ³ ப⁴க³வதோ ஸாவகோதி? ஆமந்தா. போ³தி⁴ஸத்தோ கஸ்ஸபஸ்ஸ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோ, போ³தி⁴ஸத்தோ கஸ்ஸபஸ்ஸ ப⁴க³வதோ ஸாவகோதி? ந ஹேவம் வத்தப்³பே³…பே….

சித்தோ க³ஹபதி ஹத்த²கோ ஆளவகோ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோ, சித்தோ க³ஹபதி ஹத்த²கோ ஆளவகோ ப⁴க³வதோ ஸாவகோதி? ஆமந்தா. போ³தி⁴ஸத்தோ கஸ்ஸபஸ்ஸ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோ, போ³தி⁴ஸத்தோ கஸ்ஸபஸ்ஸ ப⁴க³வதோ ஸாவகோதி? ந ஹேவம் வத்தப்³பே³…பே….

போ³தி⁴ஸத்தோ கஸ்ஸபஸ்ஸ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோ, ந ச கஸ்ஸபஸ்ஸ ப⁴க³வதோ ஸாவகோதி? ஆமந்தா. ஆயஸ்மா ஆனந்தோ³ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோ, ந ச ப⁴க³வதோ ஸாவகோதி? ந ஹேவம் வத்தப்³பே³…பே….

போ³தி⁴ஸத்தோ கஸ்ஸபஸ்ஸ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோ, ந ச கஸ்ஸபஸ்ஸ ப⁴க³வதோ ஸாவகோதி? ஆமந்தா. சித்தோ க³ஹபதி ஹத்த²கோ ஆளவகோ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோ, ந ச ப⁴க³வதோ ஸாவகோதி? ந ஹேவம் வத்தப்³பே³…பே….

போ³தி⁴ஸத்தோ கஸ்ஸபஸ்ஸ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோ, ந ச கஸ்ஸபஸ்ஸ ப⁴க³வதோ ஸாவகோதி? ஆமந்தா. ஸாவகோ ஜாதிம் வீதிவத்தோ அஸாவகோ ஹோதீதி? ந ஹேவம் வத்தப்³பே³…பே….

405. ந வத்தப்³ப³ம் – ‘‘போ³தி⁴ஸத்தோ கஸ்ஸபஸ்ஸ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோ’’தி? ஆமந்தா. நனு வுத்தம் ப⁴க³வதா – ‘‘கஸ்ஸபே அஹம், ஆனந்த³, ப⁴க³வதி ப்³ரஹ்மசரியம் அசரிம் ஆயதிம் ஸம்போ³தா⁴யா’’தி! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘போ³தி⁴ஸத்தோ கஸ்ஸபஸ்ஸ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோ’’தி.

போ³தி⁴ஸத்தோ கஸ்ஸபஸ்ஸ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோதி? ஆமந்தா. நனு வுத்தம் ப⁴க³வதா –

‘‘ஸப்³பா³பி⁴பூ⁴ ஸப்³ப³விதூ³ஹமஸ்மி,

ஸப்³பே³ஸு த⁴ம்மேஸு அனுபலித்தோ;

ஸப்³ப³ஞ்ஜஹோ தண்ஹக்க²யே விமுத்தோ,

ஸயம் அபி⁴ஞ்ஞாய கமுத்³தி³ஸேய்யம்.

‘‘ந மே ஆசரியோ அத்தி², ஸதி³ஸோ மே ந விஜ்ஜதி;

ஸதே³வகஸ்மிம் லோகஸ்மிம், நத்தி² மே படிபுக்³க³லோ.

‘‘அஹஞ்ஹி அரஹா லோகே, அஹம் ஸத்தா² அனுத்தரோ;

ஏகோம்ஹி ஸம்மாஸம்பு³த்³தோ⁴, ஸீதிபூ⁴தோஸ்மி நிப்³பு³தோ.

‘‘த⁴ம்மசக்கம் பவத்தேதும், க³ச்சா²மி காஸினம் புரம்;

அந்தீ⁴பூ⁴தஸ்மிம் [அந்த⁴பூ⁴தஸ்மிம் (ஸீ. ஸ்யா. கம். பீ.)] லோகஸ்மிம், ஆஹஞ்ச²ம் [ஆஹஞ்ஞிம் (க.)] அமதது³ந்து³பி⁴’’ந்தி [து³த்³ரபி⁴ந்தி (க.)].

‘‘யதா² கோ² த்வம், ஆவுஸோ, படிஜானாஸி, அரஹஸி அனந்தஜினோ’’தி?

‘‘மாதி³ஸா வே ஜினா ஹோந்தி, யே பத்தா ஆஸவக்க²யம்;

ஜிதா மே பாபகா த⁴ம்மா, தஸ்மாஹம் உபக ஜினோ’’தி [மஹாவ. 11; ம. நி. 1.285; 2.341].

அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘போ³தி⁴ஸத்தோ கஸ்ஸபஸ்ஸ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோ’’தி.

போ³தி⁴ஸத்தோ கஸ்ஸபஸ்ஸ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோதி? ஆமந்தா. நனு வுத்தம் ப⁴க³வதா – ‘‘‘இத³ம் து³க்க²ம் அரியஸச்ச’ந்தி மே, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³, ஞாணம் உத³பாதி³, பஞ்ஞா உத³பாதி³, விஜ்ஜா உத³பாதி³, ஆலோகோ உத³பாதி³. ‘தம் கோ² பனித³ம் து³க்க²ம் அரியஸச்சம் பரிஞ்ஞேய்ய’ந்தி மே, பி⁴க்க²வே…பே… பரிஞ்ஞாதந்தி மே, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³…பே… ஆலோகோ உத³பாதி³. ‘இத³ம் து³க்க²ஸமுத³யம் அரியஸச்ச’ந்தி மே, பி⁴க்க²வே…பே… ‘தம் கோ² பனித³ம் து³க்க²ஸமுத³யம் [து³க்க²ஸமுத³யோ (ஸ்யா. கம்.)] அரியஸச்சம் பஹாதப்³ப³’ந்தி மே, பி⁴க்க²வே…பே… பஹீனந்தி மே, பி⁴க்க²வே…பே… ‘இத³ம் து³க்க²னிரோத⁴ம் [து³க்க²னிரோதோ⁴ (ஸ்யா. கம்.)] அரியஸச்ச’ந்தி மே, பி⁴க்க²வே…பே… ‘தம் கோ² பனித³ம் து³க்க²னிரோத⁴ம் அரியஸச்சம் ஸச்சி²காதப்³ப³’ந்தி மே, பி⁴க்க²வே…பே… ஸச்சி²கதந்தி மே, பி⁴க்க²வே…பே… ‘இத³ம் து³க்க²னிரோத⁴கா³மினீ படிபதா³ அரியஸச்ச’ந்தி மே, பி⁴க்க²வே…பே… ‘தம் கோ² பனித³ம் து³க்க²னிரோத⁴கா³மினீ படிபதா³ அரியஸச்சம் பா⁴வேதப்³ப³’ந்தி மே, பி⁴க்க²வே…பே… பா⁴விதந்தி மே, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³, ஞாணம் உத³பாதி³, பஞ்ஞா உத³பாதி³, விஜ்ஜா உத³பாதி³, ஆலோகோ உத³பாதீ³’’தி [மஹாவ. 15; ஸம். நி. 5.1081; படி. ம. 2.30]. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘போ³தி⁴ஸத்தோ கஸ்ஸபஸ்ஸ ப⁴க³வதோ பாவசனே ஓக்கந்தனியாமோ சரிதப்³ரஹ்மசரியோ’’தி.