3. ததியவக்³கோ³

(29) 9. யதா²கம்மூபக³தஞாணகதா²

377. யதா²கம்மூபக³தம் ஞாணம் [யதா²கம்மூபக³தஞாணம் (ஸ்யா. கம்.)] தி³ப்³ப³சக்கு²ந்தி? ஆமந்தா. யதா²கம்மூபக³தஞ்ச மனஸி கரோதி, தி³ப்³பே³ன சக்கு²னா ரூபம் பஸ்ஸதீதி? ந ஹேவம் வத்தப்³பே³…பே….

யதா²கம்மூபக³தஞ்ச மனஸி கரோதி, தி³ப்³பே³ன சக்கு²னா ரூபம் பஸ்ஸதீதி? ஆமந்தா. த்³வின்னம் ப²ஸ்ஸானம் த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே….

யதா²கம்மூபக³தம் ஞாணம் தி³ப்³ப³சக்கு²ந்தி? ஆமந்தா. ‘‘இமே வத போ⁴ந்தோ ஸத்தா’’தி ச மனஸி கரோதி, ‘‘காயது³ச்சரிதேன ஸமன்னாக³தா’’தி ச மனஸி கரோதி, ‘‘வசீது³ச்சரிதேன ஸமன்னாக³தா’’தி ச மனஸி கரோதி, ‘‘மனோது³ச்சரிதேன ஸமன்னாக³தா’’தி ச மனஸி கரோதி, ‘‘அரியானம் உபவாத³கா’’தி ச மனஸி கரோதி, ‘‘மிச்சா²தி³ட்டி²கா’’தி ச மனஸி கரோதி, ‘‘மிச்சா²தி³ட்டி²கம்மஸமாதா³னா’’தி ச மனஸி கரோதி, ‘‘தே காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபன்னா’’தி ச மனஸி கரோதி, ‘‘இமே வா பன போ⁴ந்தோ ஸத்தா’’தி ச மனஸி கரோதி, ‘‘காயஸுசரிதேன ஸமன்னாக³தா’’தி ச மனஸி கரோதி, ‘‘வசீஸுசரிதேன ஸமன்னாக³தா’’தி ச மனஸி கரோதி, ‘‘மனோஸுசரிதேன ஸமன்னாக³தா’’தி ச மனஸி கரோதி, ‘‘அரியானம் அனுபவாத³கா’’தி ச மனஸி கரோதி, ‘‘ஸம்மாதி³ட்டி²கா’’தி ச மனஸி கரோதி, ‘‘ஸம்மாதி³ட்டி²கம்மஸம்மாதா³னா’’தி ச மனஸி கரோதி, ‘‘தே காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபன்னா’’தி ச மனஸி கரோதி, தி³ப்³பே³ன சக்கு²னா ரூபம் பஸ்ஸதீதி? ந ஹேவம் வத்தப்³பே³…பே….

‘‘தே காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபன்னா’’தி ச மனஸி கரோதி, தி³ப்³பே³ன சக்கு²னா ரூபம் பஸ்ஸதீதி? ஆமந்தா. த்³வின்னம் ப²ஸ்ஸானம் த்³வின்னம் சித்தானம் ஸமோதா⁴னம் ஹோதீதி? ந ஹேவம் வத்தப்³பே³…பே….

378. யதா²கம்மூபக³தம் ஞாணம் தி³ப்³ப³சக்கு²ந்தி? ஆமந்தா. அத்தி² கோசி அதி³ப்³ப³சக்கு²கோ தி³ப்³ப³சக்கு²ம் அப்படிலத்³தோ⁴ அனதி⁴க³தோ அஸச்சி²கதோ யதா²கம்மூபக³தம் ஜானாதீதி? ஆமந்தா. ஹஞ்சி அத்தி² கோசி அதி³ப்³ப³சக்கு²கோ தி³ப்³ப³சக்கு²ம் அப்படிலத்³தோ⁴ அனதி⁴க³தோ அஸச்சி²கதோ யதா²கம்மூபக³தம் ஜானாதி, நோ ச வத ரே வத்தப்³பே³ – ‘‘யதா²கம்மூபக³தம் ஞாணம் தி³ப்³ப³சக்கு²’’ந்தி.

யதா²கம்மூபக³தம் ஞாணம் தி³ப்³ப³சக்கு²ந்தி? ஆமந்தா. ஆயஸ்மா ஸாரிபுத்தோ யதா²கம்மூபக³தம் ஞாணம் ஜானாதீதி? ஆமந்தா. ஹஞ்சி ஆயஸ்மா ஸாரிபுத்தோ யதா²கம்மூபக³தம் ஞாணம் ஜானாதி, நோ ச வத ரே வத்தப்³பே³ – ‘‘யதா²கம்மூபக³தம் ஞாணம் தி³ப்³ப³சக்கு²’’ந்தி.

யதா²கம்மூபக³தம் ஞாணம் தி³ப்³ப³சக்கு²ந்தி? ஆமந்தா. ஆயஸ்மா ஸாரிபுத்தோ யதா²கம்மூபக³தம் ஞாணம் ஜானாதீதி? ஆமந்தா. அத்தா²யஸ்மதோ ஸாரிபுத்தஸ்ஸ தி³ப்³ப³சக்கு²ந்தி? ந ஹேவம் வத்தப்³பே³…பே….

அத்தா²யஸ்மதோ ஸாரிபுத்தஸ்ஸ தி³ப்³ப³சக்கு²ந்தி? ஆமந்தா. நனு ஆயஸ்மா ஸாரிபுத்தோ ஏதத³வோச –

‘‘நேவ புப்³பே³னிவாஸாய, நபி தி³ப்³ப³ஸ்ஸ சக்கு²னோ;

சேதோபரியாய இத்³தி⁴யா, ஸோததா⁴துவிஸுத்³தி⁴யா;

சுதியா உபபத்தியா, பணிதி⁴ மே ந விஜ்ஜதீ’’தி [தே²ரகா³. 996 தே²ரகா³தா²யம்].

அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘யதா²கம்மூபக³தம் ஞாணம் தி³ப்³ப³சக்கு²’’ந்தி.

யதா²கம்மூபக³தஞாணகதா² நிட்டி²தா.