(21) 1. ப³லகதா²

354. ததா²க³தப³லம் ஸாவகஸாதா⁴ரணந்தி? ஆமந்தா. ததா²க³தப³லம் ஸாவகப³லம், ஸாவகப³லம் ததா²க³தப³லந்தி? ந ஹேவம் வத்தப்³பே³…பே….

ததா²க³தப³லம் ஸாவகஸாதா⁴ரணந்தி? ஆமந்தா. தஞ்ஞேவ ததா²க³தப³லம் தம் ஸாவகப³லம், தஞ்ஞேவ ஸாவகப³லம் தம் ததா²க³தப³லந்தி? ந ஹேவம் வத்தப்³பே³…பே….

ததா²க³தப³லம் ஸாவகஸாதா⁴ரணந்தி? ஆமந்தா. யாதி³ஸம் ததா²க³தப³லம் தாதி³ஸம் ஸாவகப³லம், யாதி³ஸம் ஸாவகப³லம் தாதி³ஸம் ததா²க³தப³லந்தி? ந ஹேவம் வத்தப்³பே³…பே….

ததா²க³தப³லம் ஸாவகஸாதா⁴ரணந்தி? ஆமந்தா. யாதி³ஸோ ததா²க³தஸ்ஸ புப்³ப³யோகோ³ புப்³ப³சரியா த⁴ம்மக்கா²னம் த⁴ம்மதே³ஸனா தாதி³ஸோ ஸாவகஸ்ஸ புப்³ப³யோகோ³ புப்³ப³சரியா த⁴ம்மக்கா²னம் த⁴ம்மதே³ஸனாதி? ந ஹேவம் வத்தப்³பே³…பே….

ததா²க³தப³லம் ஸாவகஸாதா⁴ரணந்தி? ஆமந்தா. ததா²க³தோ ஜினோ ஸத்தா² ஸம்மாஸம்பு³த்³தோ⁴ ஸப்³ப³ஞ்ஞூ ஸப்³ப³த³ஸ்ஸாவீ த⁴ம்மஸ்ஸாமீ த⁴ம்மப்படிஸரணோதி? ஆமந்தா. ஸாவகோ ஜினோ ஸத்தா² ஸம்மாஸம்பு³த்³தோ⁴ ஸப்³ப³ஞ்ஞூ ஸப்³ப³த³ஸ்ஸாவீ த⁴ம்மஸ்ஸாமீ த⁴ம்மப்படிஸரணோதி? ந ஹேவம் வத்தப்³பே³…பே….

ததா²க³தப³லம் ஸாவகஸாதா⁴ரணந்தி? ஆமந்தா. ததா²க³தோ அனுப்பன்னஸ்ஸ மக்³க³ஸ்ஸ உப்பாதே³தா அஸஞ்ஜாதஸ்ஸ மக்³க³ஸ்ஸ ஸஞ்ஜனேதா அனக்கா²தஸ்ஸ மக்³க³ஸ்ஸ அக்கா²தா மக்³க³ஞ்ஞூ மக்³க³விதூ³ மக்³க³கோவிதோ³தி? ஆமந்தா. ஸாவகோ அனுப்பன்னஸ்ஸ மக்³க³ஸ்ஸ உப்பாதே³தா அஸஞ்ஜாதஸ்ஸ மக்³க³ஸ்ஸ ஸஞ்ஜனேதா அனக்கா²தஸ்ஸ மக்³க³ஸ்ஸ அக்கா²தா மக்³க³ஞ்ஞூ மக்³க³விதூ³ மக்³க³கோவிதோ³தி? ந ஹேவம் வத்தப்³பே³…பே….

இந்த்³ரியபரோபரியத்தம் யதா²பூ⁴தம் ஞாணம் ததா²க³தப³லம் ஸாவகஸாதா⁴ரணந்தி? ஆமந்தா. ஸாவகோ ஸப்³ப³ஞ்ஞூ ஸப்³ப³த³ஸ்ஸாவீதி? ந ஹேவம் வத்தப்³பே³…பே….

355. ஸாவகோ டா²னாடா²னம் ஜானாதீதி? ஆமந்தா. ஹஞ்சி ஸாவகோ டா²னாடா²னம் ஜானாதி, தேன வத ரே வத்தப்³பே³ – ‘‘டா²னாடா²னம் யதா²பூ⁴தம் ஞாணம் ததா²க³தப³லம் ஸாவகஸாதா⁴ரண’’ந்தி.

ஸாவகோ அதீதானாக³தபச்சுப்பன்னானம் கம்மஸமாதா³னானம் டா²னஸோ ஹேதுஸோ விபாகம் ஜானாதீதி? ஆமந்தா. ஹஞ்சி ஸாவகோ அதீதானாக³தபச்சுப்பன்னானம் கம்மஸமாதா³னானம் டா²னஸோ ஹேதுஸோ விபாகம் ஜானாதி, தேன வத ரே வத்தப்³பே³ – ‘‘அதீதானாக³தபச்சுப்பன்னானம் கம்மஸமாதா³னானம் டா²னஸோ ஹேதுஸோ விபாகம் யதா²பூ⁴தம் ஞாணம் ததா²க³தப³லம் ஸாவகஸாதா⁴ரண’’ந்தி.

ஸாவகோ ஸப்³ப³த்த²கா³மினிம் படிபத³ம் ஜானாதீதி? ஆமந்தா. ஹஞ்சி ஸாவகோ ஸப்³ப³த்த²கா³மினிம் படிபத³ம் ஜானாதி, தேன வத ரே வத்தப்³பே³ – ‘‘ஸப்³ப³த்த²கா³மினிம் படிபத³ம் யதா²பூ⁴தம் ஞாணம் ததா²க³தப³லம் ஸாவகஸாதா⁴ரண’’ந்தி.

ஸாவகோ அனேகதா⁴தும் நானாதா⁴தும் லோகம் ஜானாதீதி? ஆமந்தா. ஹஞ்சி ஸாவகோ அனேகதா⁴தும் நானாதா⁴தும் லோகம் ஜானாதி, தேன வத ரே வத்தப்³பே³ – ‘‘அனேகதா⁴தும் நானாதா⁴தும் லோகம் யதா²பூ⁴தம் ஞாணம் ததா²க³தப³லம் ஸாவகஸாதா⁴ரண’’ந்தி.

ஸாவகோ ஸத்தானம் நானாதி⁴முத்திகதம் ஜானாதீதி? ஆமந்தா. ஹஞ்சி ஸாவகோ ஸத்தானம் நானாதி⁴முத்திகதம் ஜானாதி, தேன வத ரே வத்தப்³பே³ – ‘‘ஸத்தானம் நானாதி⁴முத்திகதம் யதா²பூ⁴தம் ஞாணம் ததா²க³தப³லம் ஸாவகஸாதா⁴ரண’’ந்தி.

ஸாவகோ ஜா²னவிமோக்க²ஸமாதி⁴ஸமாபத்தீனம் ஸம்கிலேஸம் வோதா³னம் வுட்டா²னம் ஜானாதீதி? ஆமந்தா. ஹஞ்சி ஸாவகோ ஜா²னவிமோக்க²ஸமாதி⁴ஸமாபத்தீனம் ஸம்கிலேஸம் வோதா³னம் வுட்டா²னம் ஜானாதி, தேன வத ரே வத்தப்³பே³ – ‘‘ஜா²னவிமோக்க²ஸமாதி⁴ஸமாபத்தீனம் ஸம்கிலேஸம் வோதா³னம் வுட்டா²னம் யதா²பூ⁴தம் ஞாணம் ததா²க³தப³லம் ஸாவகஸாதா⁴ரண’’ந்தி.

ஸாவகோ புப்³பே³னிவாஸானுஸ்ஸதிம் ஜானாதீதி? ஆமந்தா. ஹஞ்சி ஸாவகோ புப்³பே³னிவாஸானுஸ்ஸதிம் ஜானாதி, தேன வத ரே வத்தப்³பே³ – ‘‘புப்³பே³னிவாஸானுஸ்ஸதி யதா²பூ⁴தம் ஞாணம் ததா²க³தப³லம் ஸாவகஸாதா⁴ரண’’ந்தி.

ஸாவகோ ஸத்தானம் சுதூபபாதம் ஜானாதீதி? ஆமந்தா. ஹஞ்சி ஸாவகோ ஸத்தானம் சுதூபபாதம் ஜானாதி, தேன வத ரே வத்தப்³பே³ – ‘‘ஸத்தானம் சுதூபபாதம் யதா²பூ⁴தம் ஞாணம் ததா²க³தப³லம் ஸாவகஸாதா⁴ரண’’ந்தி.

நனு ததா²க³தஸ்ஸாபி ஆஸவா கீ²ணா ஸாவகஸ்ஸாபி ஆஸவா கீ²ணாதி? ஆமந்தா. அத்தி² கிஞ்சி நானாகரணம் ததா²க³தஸ்ஸ வா ஸாவகஸ்ஸ வா ஆஸவக்க²யேன வா ஆஸவக்க²யம் விமுத்தியா வா விமுத்தீதி? நத்தி². ஹஞ்சி நத்தி² கிஞ்சி நானாகரணம் ததா²க³தஸ்ஸ வா ஸாவகஸ்ஸ வா ஆஸவக்க²யேன வா ஆஸவக்க²யம் விமுத்தியா வா விமுத்தி, தேன வத ரே வத்தப்³பே³ – ‘‘ஆஸவானம் க²யே யதா²பூ⁴தம் ஞாணம் ததா²க³தப³லம் ஸாவகஸாதா⁴ரண’’ந்தி.

356. ஆஸவானம் க²யே யதா²பூ⁴தம் ஞாணம் ததா²க³தப³லம் ஸாவகஸாதா⁴ரணந்தி? ஆமந்தா. டா²னாடா²னே யதா²பூ⁴தம் ஞாணம் ததா²க³தப³லம் ஸாவகஸாதா⁴ரணந்தி? ந ஹேவம் வத்தப்³பே³…பே….

ஆஸவானம் க²யே யதா²பூ⁴தம் ஞாணம் ததா²க³தப³லம் ஸாவகஸாதா⁴ரணந்தி? ஆமந்தா. ஸத்தானம் சுதூபபாதே யதா²பூ⁴தம் ஞாணம் ததா²க³தப³லம் ஸாவகஸாதா⁴ரணந்தி? ந ஹேவம் வத்தப்³பே³…பே….

டா²னாடா²னே யதா²பூ⁴தம் ஞாணம் ததா²க³தப³லம் ஸாவகஅஸாதா⁴ரணந்தி? ஆமந்தா. ஆஸவானம் க²யே யதா²பூ⁴தம் ஞாணம் ததா²க³தப³லம் ஸாவகஅஸாதா⁴ரணந்தி? ந ஹேவம் வத்தப்³பே³…பே….

ஸத்தானம் சுதூபபாதே யதா²பூ⁴தம் ஞாணம் ததா²க³தப³லம் ஸாவகஅஸாதா⁴ரணந்தி? ஆமந்தா. ஆஸவானம் க²யே யதா²பூ⁴தம் ஞாணம் ததா²க³தப³லம் ஸாவகஅஸாதா⁴ரணந்தி? ந ஹேவம் வத்தப்³பே³…பே….

இந்த்³ரியபரோபரியத்தம் யதா²பூ⁴தம் ஞாணம் ததா²க³தப³லம் ஸாவகஅஸாதா⁴ரணந்தி? ஆமந்தா. டா²னாடா²னே யதா²பூ⁴தம் ஞாணம் ததா²க³தப³லம் ஸாவகஅஸாதா⁴ரணந்தி? ந ஹேவம் வத்தப்³பே³ [அயமேத்த² ஸாதா⁴ரணபக்க²ம் ஸந்தா⁴ய படிக்கே²போ (டீகா ஓலோகேதப்³பா³)] …பே….

இந்த்³ரியபரோபரியத்தம் யதா²பூ⁴தம் ஞாணம் ததா²க³தப³லம் ஸாவகஅஸாதா⁴ரணந்தி? ஆமந்தா…பே…. ஆஸவானம் க²யே யதா²பூ⁴தம் ஞாணம் ததா²க³தப³லம் ஸாவகஅஸாதா⁴ரணந்தி? ந ஹேவம் வத்தப்³பே³…பே….

டா²னாடா²னே யதா²பூ⁴தம் ஞாணம் ததா²க³தப³லம் ஸாவகஸாதா⁴ரணந்தி? ஆமந்தா. இந்த்³ரியபரோபரியத்தம் யதா²பூ⁴தம் ஞாணம் ததா²க³தப³லம் ஸாவகஸாதா⁴ரணந்தி? ந ஹேவம் வத்தப்³பே³…பே….

ஆஸவானம் க²யே யதா²பூ⁴தம் ஞாணம் ததா²க³தப³லம் ஸாவகஸாதா⁴ரணந்தி? ஆமந்தா. இந்த்³ரியபரோபரியத்தம் யதா²பூ⁴தம் ஞாணம் ததா²க³தப³லம் ஸாவகஸாதா⁴ரணந்தி? ந ஹேவம் வத்தப்³பே³…பே….

ப³லகதா² நிட்டி²தா.