(16) 7. சித்தட்டி²திகதா²

335. ஏகம் சித்தம் தி³வஸம் திட்ட²தீதி? ஆமந்தா. உபட்³ட⁴தி³வஸோ உப்பாத³க்க²ணோ, உபட்³ட⁴தி³வஸோ வயக்க²ணோதி? ந ஹேவம் வத்தப்³பே³.

ஏகம் சித்தம் த்³வே தி³வஸே திட்ட²தீதி? ஆமந்தா. தி³வஸோ உப்பாத³க்க²ணோ, தி³வஸோ வயக்க²ணோதி? ந ஹேவம் வத்தப்³பே³.

ஏகம் சித்தம் சத்தாரோ தி³வஸே திட்ட²தி… அட்ட² தி³வஸே திட்ட²தி… த³ஸ தி³வஸே திட்ட²தி… வீஸதி தி³வஸே திட்ட²தி… மாஸம் திட்ட²தி… த்³வே மாஸே திட்ட²தி… சத்தாரோ மாஸே திட்ட²தி… அட்ட² மாஸே திட்ட²தி… த³ஸ மாஸே திட்ட²தி… ஸம்வச்ச²ரம் திட்ட²தி… த்³வே வஸ்ஸானி திட்ட²தி… சத்தாரி வஸ்ஸானி திட்ட²தி… அட்ட² வஸ்ஸானி திட்ட²தி… த³ஸ வஸ்ஸானி திட்ட²தி… வீஸதி வஸ்ஸானி திட்ட²தி… திம்ஸ வஸ்ஸானி திட்ட²தி… சத்தாரீஸ வஸ்ஸானி திட்ட²தி… பஞ்ஞாஸ வஸ்ஸானி திட்ட²தி… வஸ்ஸஸதம் திட்ட²தி… த்³வே வஸ்ஸஸதானி திட்ட²தி… சத்தாரி வஸ்ஸஸதானி திட்ட²தி… பஞ்ச வஸ்ஸஸதானி திட்ட²தி… வஸ்ஸஸஹஸ்ஸம் திட்ட²தி… த்³வே வஸ்ஸஸஹஸ்ஸானி திட்ட²தி… சத்தாரி வஸ்ஸஸஹஸ்ஸானி திட்ட²தி… அட்ட² வஸ்ஸஸஹஸ்ஸானி திட்ட²தி… ஸோளஸ வஸ்ஸஸஹஸ்ஸானி திட்ட²தி… கப்பம் திட்ட²தி… த்³வே கப்பே திட்ட²தி… சத்தாரோ கப்பே திட்ட²தி… அட்ட² கப்பே திட்ட²தி… ஸோளஸ கப்பே திட்ட²தி… பா³த்திம்ஸ கப்பே திட்ட²தி… சதுஸட்டி² கப்பே திட்ட²தி… பஞ்ச கப்பஸதானி திட்ட²தி… கப்பஸஹஸ்ஸானி திட்ட²தி… த்³வே கப்பஸஹஸ்ஸானி திட்ட²தி… சத்தாரி கப்பஸஹஸ்ஸானி திட்ட²தி… அட்ட² கப்பஸஹஸ்ஸானி திட்ட²தி… ஸோளஸ கப்பஸஹஸ்ஸானி திட்ட²தி… வீஸதி கப்பஸஹஸ்ஸானி திட்ட²தி… சத்தாரீஸ கப்பஸஹஸ்ஸானி திட்ட²தி… ஸட்டி² கப்பஸஹஸ்ஸானி திட்ட²தி… சதுராஸீதி கப்பஸஹஸ்ஸானி திட்ட²தீதி? ஆமந்தா. த்³வேசத்தாரீஸ கப்பஸஹஸ்ஸானி உப்பாத³க்க²ணோ, த்³வேசத்தாரீஸ கப்பஸஹஸ்ஸானி வயக்க²ணோதி? ந ஹேவம் வத்தப்³பே³.

ஏகம் சித்தம் தி³வஸம் திட்ட²தீதி? ஆமந்தா. அத்த²ஞ்ஞே த⁴ம்மா ஏகாஹம் ப³ஹும்பி உப்பஜ்ஜித்வா நிருஜ்ஜ²ந்தீதி? ஆமந்தா. தே த⁴ம்மா சித்தேன லஹுபரிவத்தாதி? ந ஹேவம் வத்தப்³பே³.

தே த⁴ம்மா சித்தேன லஹுபரிவத்தாதி? ஆமந்தா. நனு வுத்தம் ப⁴க³வதா – ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி ஏவம் லஹுபரிவத்தம் யத²யித³ம் சித்தம். யாவஞ்சித³ம், பி⁴க்க²வே, உபமாபி ந ஸுகரா யாவ லஹுபரிவத்தம் சித்த’’ந்தி [அ. நி. 1.48]. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘தே த⁴ம்மா சித்தேன லஹுபரிவத்தா’’தி.

தே த⁴ம்மா சித்தேன லஹுபரிவத்தாதி? ஆமந்தா. நனு வுத்தம் ப⁴க³வதா – ‘‘ஸேய்யதா²பி, பி⁴க்க²வே, மக்கடோ அரஞ்ஞே பவனே சரமானோ ஸாக²ம் க³ண்ஹதி, தம் முஞ்சித்வா அஞ்ஞம் க³ண்ஹதி, தம் முஞ்சித்வா அஞ்ஞம் க³ண்ஹதி; ஏவமேவ கோ², பி⁴க்க²வே, யமித³ம் [யதி³த³ம் (ப³ஹூஸு)] வுச்சதி சித்தம் இதிபி மனோ இதிபி விஞ்ஞாணம் இதிபி தம் ரத்தியா ச தி³வஸஸ்ஸ ச அஞ்ஞதே³வ உப்பஜ்ஜதி அஞ்ஞம் நிருஜ்ஜ²தீ’’தி [ஸம். நி. 2.61]. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘தே த⁴ம்மா சித்தேன லஹுபரிவத்தா’’தி.

336. ஏகம் சித்தம் தி³வஸம் திட்ட²தீதி? ஆமந்தா. சக்கு²விஞ்ஞாணம் தி³வஸம் திட்ட²தீதி? ந ஹேவம் வத்தப்³பே³. ஸோதவிஞ்ஞாணம்…பே… கா⁴னவிஞ்ஞாணம்… ஜிவ்ஹாவிஞ்ஞாணம்… காயவிஞ்ஞாணம்… அகுஸலம் சித்தம்… ராக³ஸஹக³தம்… தோ³ஸஸஹக³தம்… மோஹஸஹக³தம்… மானஸஹக³தம்… தி³ட்டி²ஸஹக³தம்… விசிகிச்சா²ஸஹக³தம்… தி²னஸஹக³தம்… உத்³த⁴ச்சஸஹக³தம்… அஹிரிகஸஹக³தம்… அனோத்தப்பஸஹக³தம் சித்தம் தி³வஸம் திட்ட²தீதி? ந ஹேவம் வத்தப்³பே³…பே….

ஏகம் சித்தம் தி³வஸம் திட்ட²தீதி? ஆமந்தா. யேனேவ சித்தேன சக்கு²னா ரூபம் பஸ்ஸதி, தேனேவ சித்தேன ஸோதேன ஸத்³த³ம் ஸுணாதி…பே… கா⁴னேன க³ந்த⁴ம் கா⁴யதி… ஜிவ்ஹாய ரஸம் ஸாயதி… காயேன போ²ட்ட²ப்³ப³ம் பு²ஸதி… மனஸா த⁴ம்மம் விஜானாதி…பே… யேனேவ சித்தேன மனஸா த⁴ம்மம் விஜானாதி, தேனேவ சித்தேன சக்கு²னா ரூபம் பஸ்ஸதி…பே… ஸோதேன ஸத்³த³ம் ஸுணாதி… கா⁴னேன க³ந்த⁴ம் கா⁴யதி… ஜிவ்ஹாய ரஸம் ஸாயதி…பே… காயேன போ²ட்ட²ப்³ப³ம் பு²ஸதீதி? ந ஹேவம் வத்தப்³பே³…பே….

ஏகம் சித்தம் தி³வஸம் திட்ட²தீதி? ஆமந்தா. யேனேவ சித்தேன அபி⁴க்கமதி, தேனேவ சித்தேன படிக்கமதி; யேனேவ சித்தேன படிக்கமதி, தேனேவ சித்தேன அபி⁴க்கமதி; யேனேவ சித்தேன ஆலோகேதி, தேனேவ சித்தேன விலோகேதி; யேனேவ சித்தேன விலோகேதி, தேனேவ சித்தேன ஆலோகேதி; யேனேவ சித்தேன ஸமிஞ்ஜேதி, தேனேவ சித்தேன பஸாரேதி; யேனேவ சித்தேன பஸாரேதி, தேனேவ சித்தேன ஸமிஞ்ஜேதீதி? ந ஹேவம் வத்தப்³பே³…பே….

337. ஆகாஸானஞ்சாயதனூபகா³னம் தே³வானம் ஏகம் சித்தம் யாவதாயுகம் திட்ட²தீதி? ஆமந்தா. மனுஸ்ஸானம் ஏகம் சித்தம் யாவதாயுகம் திட்ட²தீதி? ந ஹேவம் வத்தப்³பே³.

ஆகாஸானஞ்சாயதனூபகா³னம் தே³வானம் ஏகம் சித்தம் யாவதாயுகம் திட்ட²தீதி? ஆமந்தா. சாதுமஹாராஜிகானம் தே³வானம்…பே… தாவதிம்ஸானம் தே³வானம்… யாமானம் தே³வானம்… துஸிதானம் தே³வானம்… நிம்மானரதீனம் தே³வானம்… பரனிம்மிதவஸவத்தீனம் தே³வானம்… ப்³ரஹ்மபாரிஸஜ்ஜானம் தே³வானம்… ப்³ரஹ்மபுரோஹிதானம் தே³வானம்… மஹாப்³ரஹ்மானம் தே³வானம்… பரித்தாபா⁴னம் தே³வானம்… அப்பமாணாபா⁴னம் தே³வானம்… ஆப⁴ஸ்ஸரானம் தே³வானம்… பரித்தஸுபா⁴னம் தே³வானம்… அப்பமாணஸுபா⁴னம் தே³வானம்… ஸுப⁴கிண்ஹானம் தே³வானம் … வேஹப்ப²லானம் தே³வானம்… அவிஹானம் தே³வானம்… அதப்பானம் தே³வானம்… ஸுத³ஸ்ஸானம் தே³வானம்… ஸுத³ஸ்ஸீனம் தே³வானம்… அகனிட்டா²னம் தே³வானம் ஏகம் சித்தம் யாவதாயுகம் திட்ட²தீதி? ந ஹேவம் வத்தப்³பே³.

ஆகாஸானஞ்சாயதனூபகா³னம் தே³வானம் வீஸதி கப்பஸஹஸ்ஸானி ஆயுப்பமாணம், ஆகாஸானஞ்சாயதனூபகா³னம் தே³வானம் ஏகம் சித்தம் வீஸதி கப்பஸஹஸ்ஸானி திட்ட²தீதி? ஆமந்தா. மனுஸ்ஸானம் வஸ்ஸஸதம் ஆயுப்பமாணம், மனுஸ்ஸானம் ஏகம் சித்தம் வஸ்ஸஸதம் திட்ட²தீதி? ந ஹேவம் வத்தப்³பே³.

ஆகாஸானஞ்சாயதனூபகா³னம் தே³வானம் வீஸதி கப்பஸஹஸ்ஸானி ஆயுப்பமாணம், ஆகாஸானஞ்சாயதனூபகா³னம் தே³வானம் ஏகம் சித்தம் வீஸதி கப்பஸஹஸ்ஸானி திட்ட²தீதி? ஆமந்தா. சாதுமஹாராஜிகானம் தே³வானம் பஞ்ச வஸ்ஸஸதானி ஆயுப்பமாணம், சாதுமஹாராஜிகானம் தே³வானம் ஏகம் சித்தம் பஞ்ச வஸ்ஸஸதானி திட்ட²தி… வஸ்ஸஸஹஸ்ஸம் திட்ட²தி… த்³வே வஸ்ஸஸஹஸ்ஸானி திட்ட²தி… சத்தாரி வஸ்ஸஸஹஸ்ஸானி திட்ட²தி… அட்ட² வஸ்ஸஸஹஸ்ஸானி திட்ட²தி… ஸோளஸ வஸ்ஸஸஹஸ்ஸானி திட்ட²தி… கப்பஸ்ஸ ததியபா⁴க³ம் திட்ட²தி… உபட்³ட⁴கப்பம் திட்ட²தி… ஏகம் கப்பம் திட்ட²தி… த்³வே கப்பே திட்ட²தி… சத்தாரோ கப்பே திட்ட²தி… அட்ட² கப்பே திட்ட²தி… ஸோளஸ கப்பே திட்ட²தி… பா³த்திம்ஸ கப்பே திட்ட²தி… சதுஸட்டி² கப்பே திட்ட²தி… பஞ்ச கப்பஸதானி திட்ட²தி… கப்பஸஹஸ்ஸம் திட்ட²தி… த்³வே கப்பஸஹஸ்ஸானி திட்ட²தி… சத்தாரி கப்பஸஹஸ்ஸானி திட்ட²தி… அட்ட² கப்பஸஹஸ்ஸானி திட்ட²தி… அகனிட்டா²னம் தே³வானம் ஸோளஸ கப்பஸஹஸ்ஸானி ஆயுப்பமாணம், அகனிட்டா²னம் தே³வானம் ஏகம் சித்தம் ஸோளஸ கப்பஸஹஸ்ஸானி திட்ட²தீதி? ந ஹேவம் வத்தப்³பே³.

ஆகாஸானஞ்சாயதனூபகா³னம் தே³வானம் சித்தம் முஹுத்தம் முஹுத்தம் உப்பஜ்ஜதி முஹுத்தம் முஹுத்தம் நிருஜ்ஜ²தீதி? ஆமந்தா. ஆகாஸானஞ்சாயதனூபகா³ தே³வா முஹுத்தம் முஹுத்தம் சவந்தி முஹுத்தம் முஹுத்தம் உப்பஜ்ஜந்தீதி? ந ஹேவம் வத்தப்³பே³.

ஆகாஸானஞ்சாயதனூபகா³னம் தே³வானம் ஏகம் சித்தம் யாவதாயுகம் திட்ட²தீதி? ஆமந்தா. ஆகாஸானஞ்சாயதனூபகா³ தே³வா யேனேவ சித்தேன உப்பஜ்ஜந்தி, தேனேவ சித்தேன சவந்தீதி? ந ஹேவம் வத்தப்³பே³…பே….

சித்தட்டி²திகதா² நிட்டி²தா.