(13) 4. பரவிதாரணகதா²

322. அத்தி² அரஹதோ பரவிதாரணாதி? ஆமந்தா. அரஹா பரனேய்யோ பரபத்தியோ பரபச்சயோ பரபடிப³த்³த⁴பூ⁴, ந ஜானாதி ந பஸ்ஸதி ஸம்மூள்ஹோ அஸம்பஜானோதி? ந ஹேவம் வத்தப்³பே³…பே….

நனு அரஹா ந பரனேய்யோ ந பரபத்தியோ ந பரபச்சயோ ந பரபடிப³த்³த⁴பூ⁴ ஜானாதி பஸ்ஸதி அஸம்மூள்ஹோ ஸம்பஜானோதி? ஆமந்தா. ஹஞ்சி அரஹா ந பரனேய்யோ ந பரபத்தியோ ந பரபச்சயோ ந பரபடிப³த்³த⁴பூ⁴, ஜானாதி பஸ்ஸதி அஸம்மூள்ஹோ ஸம்பஜானோ, நோ ச வத ரே வத்தப்³பே³ – ‘‘அத்தி² அரஹதோ பரவிதாரணா’’தி.

அத்தி² புது²ஜ்ஜனஸ்ஸ பரவிதாரணா, ஸோ ச பரனேய்யோ பரபத்தியோ பரபச்சயோ பரபடிப³த்³த⁴பூ⁴, ந ஜானாதி ந பஸ்ஸதி ஸம்மூள்ஹோ அஸம்பஜானோதி? ஆமந்தா. அத்தி² அரஹதோ பரவிதாரணா, ஸோ ச பரனேய்யோ பரபத்தியோ பரபச்சயோ பரபடிப³த்³த⁴பூ⁴, ந ஜானாதி ந பஸ்ஸதி ஸம்மூள்ஹோ அஸம்பஜானோதி? ந ஹேவம் வத்தப்³பே³…பே….

அத்தி² அரஹதோ பரவிதாரணா, ஸோ ச ந பரனேய்யோ ந பரபத்தியோ ந பரபச்சயோ ந பரபடிப³த்³த⁴பூ⁴, ஜானாதி பஸ்ஸதி அஸம்மூள்ஹோ ஸம்பஜானோதி? ஆமந்தா. அத்தி² புது²ஜ்ஜனஸ்ஸ பரவிதாரணா, ஸோ ச ந பரனேய்யோ ந பரபத்தியோ ந பரபச்சயோ ந பரபடிப³த்³த⁴பூ⁴, ஜானாதி பஸ்ஸதி அஸம்மூள்ஹோ ஸம்பஜானோதி? ந ஹேவம் வத்தப்³பே³…பே….

அத்தி² அரஹதோ பரவிதாரணாதி? ஆமந்தா. அத்தி² அரஹதோ ஸத்த²ரி பரவிதாரணா, த⁴ம்மே பரவிதாரணா, ஸங்கே⁴ பரவிதாரணா, ஸிக்கா²ய பரவிதாரணா, புப்³ப³ந்தே பரவிதாரணா, அபரந்தே பரவிதாரணா, புப்³ப³ந்தாபரந்தே பரவிதாரணா, இத³ப்பச்சயதாபடிச்சஸமுப்பன்னேஸு த⁴ம்மேஸு பரவிதாரணாதி? ந ஹேவம் வத்தப்³பே³…பே….

நத்தி² அரஹதோ ஸத்த²ரி பரவிதாரணா, த⁴ம்மே பரவிதாரணா…பே… இத³பச்சயதாபடிச்சஸமுப்பன்னேஸு த⁴ம்மேஸு பரவிதாரணாதி? ஆமந்தா. ஹஞ்சி நத்தி² அரஹதோ ஸத்த²ரி பரவிதாரணா, த⁴ம்மே பரவிதாரணா…பே… இத³ப்பச்சயதாபடிச்சஸமுப்பன்னேஸு த⁴ம்மேஸு பரவிதாரணா, நோ ச வத ரே வத்தப்³பே³ – ‘‘அத்தி² அரஹதோ பரவிதாரணா’’தி.

அத்தி² புது²ஜ்ஜனஸ்ஸ பரவிதாரணா, அத்தி² தஸ்ஸ ஸத்த²ரி பரவிதாரணா, த⁴ம்மே பரவிதாரணா…பே… இத³ப்பச்சயதாபடிச்சஸமுப்பன்னேஸு த⁴ம்மேஸு பரவிதாரணாதி? ஆமந்தா. அத்தி² அரஹதோ பரவிதாரணா, அத்தி² தஸ்ஸ ஸத்த²ரி பரவிதாரணா, த⁴ம்மே பரவிதாரணா…பே… இத³ப்பச்சயதாபடிச்சஸமுப்பன்னேஸு த⁴ம்மேஸு பரவிதாரணாதி? ந ஹேவம் வத்தப்³பே³…பே….

அத்தி² அரஹதோ பரவிதாரணா, நத்தி² தஸ்ஸ ஸத்த²ரி பரவிதாரணா, த⁴ம்மே பரவிதாரணா…பே… இத³ப்பச்சயதாபடிச்சஸமுப்பன்னேஸு த⁴ம்மேஸு பரவிதாரணாதி? ஆமந்தா. அத்தி² புது²ஜ்ஜனஸ்ஸ பரவிதாரணா, நத்தி² தஸ்ஸ ஸத்த²ரி பரவிதாரணா, த⁴ம்மே பரவிதாரணா…பே… இத³ப்பச்சயதாபடிச்சஸமுப்பன்னேஸு த⁴ம்மேஸு பரவிதாரணாதி? ந ஹேவம் வத்தப்³பே³…பே….

323. அத்தி² அரஹதோ பரவிதாரணாதி? ஆமந்தா. நனு அரஹதோ ராகோ³ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிம் அனுப்பாத³த⁴ம்மோதி? ஆமந்தா. ஹஞ்சி அரஹதோ ராகோ³ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிம் அனுப்பாத³த⁴ம்மோ, நோ ச வத ரே வத்தப்³பே³ – ‘‘அத்தி² அரஹதோ பரவிதாரணா’’தி.

அத்தி² அரஹதோ பரவிதாரணாதி? ஆமந்தா. நனு அரஹதோ தோ³ஸோ பஹீனோ…பே… மோஹோ பஹீனோ…பே… அனோத்தப்பம் பஹீனம் உச்சி²ன்னமூலம் தாலாவத்து²கதம் அனபா⁴வங்கதம் ஆயதிம் அனுப்பாத³த⁴ம்மம்…பே… ராக³ப்பஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதா…பே… தோ³ஸப்பஹானாய…பே… அனோத்தப்பபஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதா…பே… நனு அரஹா வீதராகோ³ வீததோ³ஸோ வீதமோஹோ…பே… ஸச்சி²காதப்³ப³ம் ஸச்சி²கதந்தி? ஆமந்தா. ஹஞ்சி அரஹா வீதராகோ³ வீததோ³ஸோ வீதமோஹோ ஸச்சி²காதப்³ப³ம் ஸச்சி²கதம், நோ ச வத ரே வத்தப்³பே³ – ‘‘அத்தி² அரஹதோ பரவிதாரணா’’தி.

324. அத்தி² அரஹதோ பரவிதாரணாதி? ஸத⁴ம்மகுஸலஸ்ஸ அரஹதோ அத்தி² பரவிதாரணா, பரத⁴ம்மகுஸலஸ்ஸ அரஹதோ நத்தி² பரவிதாரணாதி. ஸத⁴ம்மகுஸலஸ்ஸ அரஹதோ அத்தி² பரவிதாரணாதி? ஆமந்தா. பரத⁴ம்மகுஸலஸ்ஸ அரஹதோ அத்தி² பரவிதாரணாதி? ந ஹேவம் வத்தப்³பே³…பே….

பரத⁴ம்மகுஸலஸ்ஸ அரஹதோ நத்தி² பரவிதாரணாதி? ஆமந்தா. ஸத⁴ம்மகுஸலஸ்ஸ அரஹதோ நத்தி² பரவிதாரணாதி? ந ஹேவம் வத்தப்³பே³…பே….

ஸத⁴ம்மகுஸலஸ்ஸ அரஹதோ ராகோ³ பஹீனோ, அத்தி² தஸ்ஸ பரவிதாரணாதி? ஆமந்தா. பரத⁴ம்மகுஸலஸ்ஸ அரஹதோ ராகோ³ பஹீனோ, அத்தி² தஸ்ஸ பரவிதாரணாதி? ந ஹேவம் வத்தப்³பே³.

ஸத⁴ம்மகுஸலஸ்ஸ அரஹதோ தோ³ஸோ பஹீனோ…பே… மோஹோ பஹீனோ…பே… அனோத்தப்பம் பஹீனம் …பே… ராக³ப்பஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதா…பே… தோ³ஸப்பஹானாய…பே… அனோத்தப்பபஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதா…பே… ஸத⁴ம்மகுஸலோ அரஹா வீதராகோ³ வீததோ³ஸோ வீதமோஹோ…பே… ஸச்சி²காதப்³ப³ம் ஸச்சி²கதம், அத்தி² தஸ்ஸ பரவிதாரணாதி? ஆமந்தா. பரத⁴ம்மகுஸலோ அரஹா வீதராகோ³ வீததோ³ஸோ வீதமோஹோ…பே… ஸச்சி²காதப்³ப³ம் ஸச்சி²கதம், அத்தி² தஸ்ஸ பரவிதாரணாதி? ந ஹேவம் வத்தப்³பே³…பே….

பரத⁴ம்மகுஸலஸ்ஸ அரஹதோ ராகோ³ பஹீனோ, நத்தி² தஸ்ஸ பரவிதாரணாதி? ஆமந்தா. ஸத⁴ம்மகுஸலஸ்ஸ அரஹதோ ராகோ³ பஹீனோ, நத்தி² தஸ்ஸ பரவிதாரணாதி? ந ஹேவம் வத்தப்³பே³.

பரத⁴ம்மகுஸலஸ்ஸ அரஹதோ தோ³ஸோ பஹீனோ, மோஹோ பஹீனோ…பே… அனோத்தப்பம் பஹீனம்…பே… ராக³ப்பஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதா…பே… தோ³ஸப்பஹானாய…பே… அனோத்தப்பபஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதா…பே… பரத⁴ம்மகுஸலோ அரஹா வீதராகோ³ வீததோ³ஸோ வீதமோஹோ…பே… ஸச்சி²காதப்³ப³ம் ஸச்சி²கதம், நத்தி² தஸ்ஸ பரவிதாரணாதி? ஆமந்தா. ஸத⁴ம்மகுஸலோ அரஹா வீதராகோ³ வீததோ³ஸோ வீதமோஹோ…பே… ஸச்சி²காதப்³ப³ம் ஸச்சி²கதம், நத்தி² தஸ்ஸ பரவிதாரணாதி? ந ஹேவம் வத்தப்³பே³…பே….

325. அத்தி² அரஹதோ பரவிதாரணாதி? ஆமந்தா. நனு வுத்தம் ப⁴க³வதா – ‘‘ஜானதோஹம், பி⁴க்க²வே, பஸ்ஸதோ ஆஸவானம் க²யம் வதா³மி, நோ அஜானதோ நோ அபஸ்ஸதோ! கிஞ்ச, பி⁴க்க²வே, ஜானதோ கிம் பஸ்ஸதோ ஆஸவானம் க²யோ ஹோதி? ‘இதி ரூபம்’…பே… ‘இதி விஞ்ஞாணஸ்ஸ அத்த²ங்க³மோ’தி – ஏவம் கோ², பி⁴க்க²வே, ஜானதோ ஏவம் பஸ்ஸதோ ஆஸவானம் க²யோ ஹோதீ’’தி. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அத்தி² அரஹதோ பரவிதாரணா’’தி.

அத்தி² அரஹதோ பரவிதாரணாதி? ஆமந்தா. நனு வுத்தம் ப⁴க³வதா – ‘‘ஜானதோஹம், பி⁴க்க²வே, பஸ்ஸதோ ஆஸவானம் க²யம் வதா³மி, நோ அஜானதோ நோ அபஸ்ஸதோ! கிஞ்ச, பி⁴க்க²வே, ஜானதோ கிம் பஸ்ஸதோ ஆஸவானம் க²யோ ஹோதி? ‘இத³ம் து³க்க²’ந்தி – பி⁴க்க²வே, ஜானதோ பஸ்ஸதோ ஆஸவானம் க²யோ ஹோதி, ‘அயம் து³க்க²ஸமுத³யோ’தி…பே… ‘அயம் து³க்க²னிரோதோ⁴’தி…பே… ‘அயம் து³க்க²னிரோத⁴கா³மினீ படிபதா³’தி – ஜானதோ பஸ்ஸதோ ஆஸவானம் க²யோ ஹோதி. ஏவம் கோ², பி⁴க்க²வே, ஜானதோ ஏவம் பஸ்ஸதோ ஆஸவானம் க²யோ ஹோதீ’’தி. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அத்தி² அரஹதோ பரவிதாரணா’’தி.

அத்தி² அரஹதோ பரவிதாரணாதி? ஆமந்தா. நனு வுத்தம் ப⁴க³வதா – ‘‘ஸப்³ப³ம், பி⁴க்க²வே, அனபி⁴ஜானம் அபரிஜானம் அவிராஜயம் அப்பஜஹம் அப⁴ப்³போ³ து³க்க²க்க²யாய; ஸப்³ப³ஞ்ச கோ², பி⁴க்க²வே, அபி⁴ஜானம் பரிஜானம் விராஜயம் பஜஹம் ப⁴ப்³போ³ து³க்க²க்க²யாயா’’தி! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அத்தி² அரஹதோ பரவிதாரணா’’தி.

அத்தி² அரஹதோ பரவிதாரணாதி? ஆமந்தா. நனு வுத்தம் ப⁴க³வதா – ‘‘ஸஹாவஸ்ஸ த³ஸ்ஸனஸம்பதா³ய…பே… ச²ச்சாபி⁴டா²னானி அப⁴ப்³ப³ காது’’ந்தி. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அத்தி² அரஹதோ பரவிதாரணா’’தி.

அத்தி² அரஹதோ பரவிதாரணாதி? ஆமந்தா. நனு வுத்தம் ப⁴க³வதா – ‘‘யஸ்மிம், பி⁴க்க²வே, ஸமயே அரியஸாவகஸ்ஸ விரஜம் வீதமலம் த⁴ம்மசக்கு²ம் உத³பாதி³ – ‘யம் கிஞ்சி ஸமுத³யத⁴ம்மம், ஸப்³ப³ம் தம் நிரோத⁴த⁴ம்ம’ந்தி, ஸஹ த³ஸ்ஸனுப்பாதா³, பி⁴க்க²வே, அரியஸாவகஸ்ஸ தீணி ஸம்யோஜனானி பஹீயந்தி – ஸக்காயதி³ட்டி², விசிகிச்சா², ஸீலப்³ப³தபராமாஸோ’’தி! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அத்தி² அரஹதோ பரவிதாரணா’’தி.

அத்தி² அரஹதோ பரவிதாரணாதி? ஆமந்தா. நனு வுத்தம் ப⁴க³வதா –

‘‘நாஹம் ஸஹிஸ்ஸாமி [க³மிஸ்ஸாமி (ஸீ. ஸ்யா. க.), ஸமீஹாமி (பீ.)] பமோசனாய,

கத²ங்கதி²ம் தோ⁴தக கஞ்சி [கிஞ்சி (க.)] லோகே;

த⁴ம்மஞ்ச ஸேட்ட²ம் அபி⁴ஜானமானோ,

ஏவம் துவம் ஓக⁴மிமம் தரேஸீ’’தி [ஸு. நி. 1070 ஸுத்தனிபாதே; சூளனி. 33 தோ⁴தகமாணவபுச்சா²னித்³தே³ஸ].

அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அத்தி² அரஹதோ பரவிதாரணா’’தி.

ந வத்தப்³ப³ம் – ‘‘அத்தி² அரஹதோ பரவிதாரணா’’தி? ஆமந்தா. நனு அரஹதோ இத்தி²புரிஸானம் நாமகோ³த்தம் பரே விதாரேய்யும், மக்³கா³மக்³க³ம் பரே விதாரேய்யும், திணகட்ட²வனப்பதீனம் நாமம் பரே விதாரேய்யுந்தி? ஆமந்தா. ஹஞ்சி அரஹதோ இத்தி²புரிஸானம் நாமகோ³த்தம் பரே விதாரேய்யும், மக்³கா³மக்³க³ம் பரே விதாரேய்யும், திணகட்ட²வனப்பதீனம் நாமம் பரே விதாரேய்யும், தேன வத ரே வத்தப்³பே³ – ‘‘அத்தி² அரஹதோ பரவிதாரணா’’தி.

அரஹதோ இத்தி²புரிஸானம் நாமகோ³த்தம் பரே விதாரேய்யும், மக்³கா³மக்³க³ம் பரே விதாரேய்யும், திணகட்ட²வனப்பதீனம் நாமம் பரே விதாரேய்யுந்தி, அத்தி² அரஹதோ பரவிதாரணாதி? ஆமந்தா. அரஹதோ ஸோதாபத்திப²லம் வா ஸகதா³கா³மிப²லம் வா அனாகா³மிப²லம் வா அரஹத்தம் வா பரே விதாரேய்யுந்தி? ந ஹேவம் வத்தப்³பே³…பே….

பரவிதாரணகதா² நிட்டி²தா.