(12) 3. கங்கா²கதா²

318. அத்தி² அரஹதோ கங்கா²தி? ஆமந்தா. அத்தி² அரஹதோ விசிகிச்சா² விசிகிச்சா²பரியுட்டா²னம் விசிகிச்சா²ஸம்யோஜனம் விசிகிச்சா²னீவரணந்தி? ந ஹேவம் வத்தப்³பே³…பே….

நத்தி² அரஹதோ விசிகிச்சா² விசிகிச்சா²பரியுட்டா²னம் விசிகிச்சா²ஸம்யோஜனம் விசிகிச்சா²னீவரணந்தி? ஆமந்தா. ஹஞ்சி நத்தி² அரஹதோ விசிகிச்சா² விசிகிச்சா²பரியுட்டா²னம் விசிகிச்சா²ஸம்யோஜனம் விசிகிச்சா²னீவரணம், நோ ச வத ரே வத்தப்³பே³ – ‘‘அத்தி² அரஹதோ கங்கா²’’தி.

அத்தி² புது²ஜ்ஜனஸ்ஸ கங்கா², அத்தி² தஸ்ஸ விசிகிச்சா² விசிகிச்சா²பரியுட்டா²னம் விசிகிச்சா²ஸம்யோஜனம் விசிகிச்சா²னீவரணந்தி? ஆமந்தா. அத்தி² அரஹதோ கங்கா², அத்தி² தஸ்ஸ விசிகிச்சா² விசிகிச்சா²பரியுட்டா²னம் விசிகிச்சா²ஸம்யோஜனம் விசிகிச்சா²னீவரணந்தி? ந ஹேவம் வத்தப்³பே³…பே….

அத்தி² அரஹதோ கங்கா², நத்தி² தஸ்ஸ விசிகிச்சா² விசிகிச்சா²பரியுட்டா²னம் விசிகிச்சா²ஸம்யோஜனம் விசிகிச்சா²னீவரணந்தி? ஆமந்தா. அத்தி² புது²ஜ்ஜனஸ்ஸ கங்கா², நத்தி² தஸ்ஸ விசிகிச்சா² விசிகிச்சா²பரியுட்டா²னம் விசிகிச்சா²ஸம்யோஜனம் விசிகிச்சா²னீவரணந்தி? ந ஹேவம் வத்தப்³பே³…பே….

அத்தி² அரஹதோ கங்கா²தி? ஆமந்தா. அத்தி² அரஹதோ ஸத்த²ரி கங்கா², த⁴ம்மே கங்கா², ஸங்கே⁴ கங்கா², ஸிக்கா²ய கங்கா², புப்³ப³ந்தே கங்கா², அபரந்தே கங்கா², புப்³ப³ந்தாபரந்தே கங்கா², இத³ப்பச்சயதாபடிச்சஸமுப்பன்னேஸு த⁴ம்மேஸு கங்கா²தி? ந ஹேவம் வத்தப்³பே³.

நத்தி² அரஹதோ ஸத்த²ரி கங்கா², த⁴ம்மே கங்கா²…பே… இத³ப்பச்சயதாபடிச்சஸமுப்பன்னேஸு த⁴ம்மேஸு கங்கா²தி? ஆமந்தா. ஹஞ்சி நத்தி² அரஹதோ ஸத்த²ரி கங்கா², த⁴ம்மே கங்கா²…பே… இத³ப்பச்சயதாபடிச்சஸமுப்பன்னேஸு த⁴ம்மேஸு கங்கா², நோ ச வத ரே வத்தப்³பே³ – ‘‘அத்தி² அரஹதோ கங்கா²’’தி.

அத்தி² புது²ஜ்ஜனஸ்ஸ கங்கா², அத்தி² தஸ்ஸ ஸத்த²ரி கங்கா², த⁴ம்மே கங்கா²…பே… இத³ப்பச்சயதாபடிச்சஸமுப்பன்னேஸு த⁴ம்மேஸு கங்கா²தி? ஆமந்தா. அத்தி² அரஹதோ கங்கா², அத்தி² தஸ்ஸ ஸத்த²ரி கங்கா², த⁴ம்மே கங்கா²…பே… இத³ப்பச்சயதாபடிச்சஸமுப்பன்னேஸு த⁴ம்மேஸு கங்கா²தி? ந ஹேவம் வத்தப்³பே³.

அத்தி² அரஹதோ கங்கா², நத்தி² தஸ்ஸ ஸத்த²ரி கங்கா², த⁴ம்மே கங்கா²…பே… இத³ப்பச்சயதாபடிச்சஸமுப்பன்னேஸு த⁴ம்மேஸு கங்கா²தி? ஆமந்தா. அத்தி² புது²ஜ்ஜனஸ்ஸ கங்கா², நத்தி² தஸ்ஸ ஸத்த²ரி கங்கா², த⁴ம்மே கங்கா²…பே… இத³ப்பச்சயதாபடிச்சஸமுப்பன்னேஸு த⁴ம்மேஸு கங்கா²தி? ந ஹேவம் வத்தப்³பே³.

319. அத்தி² அரஹதோ கங்கா²தி? ஆமந்தா. நனு அரஹதோ ராகோ³ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிம் அனுப்பாத³த⁴ம்மோதி? ஆமந்தா. ஹஞ்சி அரஹதோ ராகோ³ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிம் அனுப்பாத³த⁴ம்மோ, நோ ச வத ரே வத்தப்³பே³ – ‘‘அத்தி² அரஹதோ கங்கா²’’தி.

அத்தி² அரஹதோ கங்கா²தி? ஆமந்தா. நனு அரஹதோ தோ³ஸோ பஹீனோ…பே… மோஹோ பஹீனோ…பே… அனோத்தப்பம் பஹீனம்…பே… ராக³ப்பஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதா…பே… தோ³ஸப்பஹானாய…பே… அனோத்தப்பபஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதா; நனு அரஹா வீதராகோ³ வீததோ³ஸோ வீதமோஹோ…பே… ஸச்சி²காதப்³ப³ம் ஸச்சி²கதந்தி? ஆமந்தா. ஹஞ்சி அரஹா வீதராகோ³ வீததோ³ஸோ வீதமோஹோ…பே… ஸச்சி²காதப்³ப³ம் ஸச்சி²கதம், நோ ச வத ரே வத்தப்³பே³ – ‘‘அத்தி² அரஹதோ கங்கா²’’தி.

320. அத்தி² அரஹதோ கங்கா²தி? ஸத⁴ம்மகுஸலஸ்ஸ அரஹதோ அத்தி² கங்கா², பரத⁴ம்மகுஸலஸ்ஸ அரஹதோ நத்தி² கங்கா²தி. ஸத⁴ம்மகுஸலஸ்ஸ அரஹதோ அத்தி² கங்கா²தி? ஆமந்தா. பரத⁴ம்மகுஸலஸ்ஸ அரஹதோ அத்தி² கங்கா²தி? ந ஹேவம் வத்தப்³பே³…பே….

பரத⁴ம்மகுஸலஸ்ஸ அரஹதோ நத்தி² கங்கா²தி? ஆமந்தா. ஸத⁴ம்மகுஸலஸ்ஸ அரஹதோ நத்தி² கங்கா²தி? ந ஹேவம் வத்தப்³பே³…பே….

ஸத⁴ம்மகுஸலஸ்ஸ அரஹதோ ராகோ³ பஹீனோ, அத்தி² தஸ்ஸ கங்கா²தி? ஆமந்தா. பரத⁴ம்மகுஸலஸ்ஸ அரஹதோ ராகோ³ பஹீனோ, அத்தி² தஸ்ஸ கங்கா²தி? ந ஹேவம் வத்தப்³பே³…பே….

ஸத⁴ம்மகுஸலஸ்ஸ அரஹதோ தோ³ஸோ பஹீனோ…பே… மோஹோ பஹீனோ…பே… அனோத்தப்பம் பஹீனம்…பே… ராக³ப்பஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதா…பே… தோ³ஸப்பஹானாய…பே… மோஹப்பஹானாய…பே… அனோத்தப்பபஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதா…பே… ஸத⁴ம்மகுஸலோ அரஹா வீதராகோ³ வீததோ³ஸோ வீதமோஹோ …பே… ஸச்சி²காதப்³ப³ம் ஸச்சி²கதம், அத்தி² தஸ்ஸ கங்கா²தி? ஆமந்தா. பரத⁴ம்மகுஸலோ அரஹா வீதராகோ³ வீததோ³ஸோ வீதமோஹோ…பே… ஸச்சி²காதப்³ப³ம் ஸச்சி²கதம், அத்தி² தஸ்ஸ கங்கா²தி? ந ஹேவம் வத்தப்³பே³…பே… பரத⁴ம்மகுஸலஸ்ஸ அரஹதோ ராகோ³ பஹீனோ, நத்தி² தஸ்ஸ கங்கா²தி? ஆமந்தா. ஸத⁴ம்மகுஸலஸ்ஸ அரஹதோ ராகோ³ பஹீனோ, நத்தி² தஸ்ஸ கங்கா²தி? ந ஹேவம் வத்தப்³பே³…பே….

பரத⁴ம்மகுஸலஸ்ஸ அரஹதோ தோ³ஸோ பஹீனோ…பே… மோஹோ பஹீனோ…பே… அனோத்தப்பம் பஹீனம்…பே… ராக³ப்பஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதா…பே… தோ³ஸப்பஹானாய…பே… மோஹப்பஹானாய…பே… அனோத்தப்பபஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதா…பே… பரத⁴ம்மகுஸலோ அரஹா வீதராகோ³ வீததோ³ஸோ வீதமோஹோ…பே… ஸச்சி²காதப்³ப³ம் ஸச்சி²கதம், நத்தி² தஸ்ஸ கங்கா²தி? ஆமந்தா. ஸத⁴ம்மகுஸலோ அரஹா வீதராகோ³ வீததோ³ஸோ வீதமோஹோ…பே… ஸச்சி²காதப்³ப³ம் ஸச்சி²கதம், நத்தி² தஸ்ஸ கங்கா²தி? ந ஹேவம் வத்தப்³பே³…பே….

321. அத்தி² அரஹதோ கங்கா²தி? ஆமந்தா. நனு வுத்தம் ப⁴க³வதா – ‘‘ஜானதோஹம், பி⁴க்க²வே, பஸ்ஸதோ ஆஸவானம் க²யம் வதா³மி, நோ அஜானதோ நோ அபஸ்ஸதோ! கிஞ்ச, பி⁴க்க²வே, ஜானதோ கிம் பஸ்ஸதோ ஆஸவானம் க²யோ ஹோதி? ‘இதி ரூபம்’…பே… ‘இதி விஞ்ஞாணஸ்ஸ அத்த²ங்க³மோ’தி – ஏவம் கோ², பி⁴க்க²வே, ஜானதோ ஏவம் பஸ்ஸதோ ஆஸவானம் க²யோ ஹோதீ’’தி. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அத்தி² அரஹதோ கங்கா²’’தி.

அத்தி² அரஹதோ கங்கா²தி? ஆமந்தா. நனு வுத்தம் ப⁴க³வதா – ‘‘ஜானதோஹம், பி⁴க்க²வே, பஸ்ஸதோ ஆஸவானம் க²யம் வதா³மி, நோ அஜானதோ நோ அபஸ்ஸதோ! கிஞ்ச, பி⁴க்க²வே, ஜானதோ கிம் பஸ்ஸதோ ஆஸவானம் க²யோ ஹோதி? ‘இத³ம் து³க்க²’ந்தி, பி⁴க்க²வே…பே… ‘அயம் து³க்க²னிரோத⁴கா³மினீ படிபதா³’தி ஜானதோ பஸ்ஸதோ ஆஸவானம் க²யோ ஹோதி. ஏவம் கோ², பி⁴க்க²வே, ஜானதோ ஏவம் பஸ்ஸதோ ஆஸவானம் க²யோ ஹோதீ’’தி. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அத்தி² அரஹதோ கங்கா²’’தி.

அத்தி² அரஹதோ கங்கா²தி? ஆமந்தா. நனு வுத்தம் ப⁴க³வதா – ‘‘ஸப்³ப³ம், பி⁴க்க²வே, அனபி⁴ஜானம் அபரிஜானம் அவிராஜயம் அப்பஜஹம் அப⁴ப்³போ³ து³க்க²க்க²யாய; ஸப்³ப³ஞ்ச கோ², பி⁴க்க²வே, அபி⁴ஜானம் பரிஜானம் விராஜயம் பஜஹம் ப⁴ப்³போ³ து³க்க²க்க²யாயா’’தி! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அத்தி² அரஹதோ கங்கா²’’தி.

அத்தி² அரஹதோ கங்கா²தி? ஆமந்தா. நனு வுத்தம் ப⁴க³வதா – ‘‘ஸஹாவஸ்ஸ த³ஸ்ஸனஸம்பதா³ய …பே… ச²ச்சாபி⁴டா²னானி அப⁴ப்³ப³ காது’’ந்தி. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அத்தி² அரஹதோ கங்கா²’’தி.

அத்தி² அரஹதோ கங்கா²தி? ஆமந்தா. நனு வுத்தம் ப⁴க³வதா – ‘‘யஸ்மிம், பி⁴க்க²வே, ஸமயே அரியஸாவகஸ்ஸ விரஜம் வீதமலம் த⁴ம்மசக்கு²ம் உத³பாதி³ – ‘யம் கிஞ்சி ஸமுத³யத⁴ம்மம் ஸப்³ப³ம் தம் நிரோத⁴த⁴ம்ம’ந்தி, ஸஹ த³ஸ்ஸனுப்பாதா³, பி⁴க்க²வே, அரியஸாவகஸ்ஸ தீணி ஸம்யோஜனானி பஹீயந்தி – ஸக்காயதி³ட்டி², விசிகிச்சா², ஸீலப்³ப³தபராமாஸோ’’தி! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அத்தி² அரஹதோ கங்கா²’’தி.

அத்தி² அரஹதோ கங்கா²தி? ஆமந்தா. நனு வுத்தம் ப⁴க³வதா –

‘‘யதா³ ஹவே பாதுப⁴வந்தி த⁴ம்மா,

ஆதாபினோ ஜா²யதோ ப்³ராஹ்மணஸ்ஸ;

அத²ஸ்ஸ கங்கா² வபயந்தி ஸப்³பா³,

யதோ பஜானாதி ஸஹேதுத⁴ம்மந்தி.

‘‘யதா³ ஹவே பாதுப⁴வந்தி த⁴ம்மா,

ஆதாபினோ ஜா²யதோ ப்³ராஹ்மணஸ்ஸ;

அத²ஸ்ஸ கங்கா² வபயந்தி ஸப்³பா³,

யதோ க²யம் பச்சயானம் அவேதீ³தி.

‘‘யதா³ ஹவே பாதுப⁴வந்தி த⁴ம்மா,

ஆதாபினோ ஜா²யதோ ப்³ராஹ்மணஸ்ஸ;

விதூ⁴பயம் திட்ட²தி மாரஸேனம்,

ஸூரியோவ [ஸுரியோவ (ஸீ. ஸ்யா. கம். பீ.)] ஓபா⁴ஸயமந்தலிக்க²ந்தி [மஹாவ. 3; உதா³. 3].

‘‘யா காசி கங்கா² இத⁴ வா ஹுரம் வா,

ஸகவேதி³யா வா பரவேதி³யா வா;

ஜா²யினோ [யே ஜா²யினோ (உதா³னே)] தா பஜஹந்தி ஸப்³பா³,

ஆதாபினோ ப்³ரஹ்மசரியம் சரந்தாதி [உதா³. 47 உதா³னேபி].

‘‘யே கங்கா²ஸமதிக்கந்தா, கங்கா²பூ⁴தேஸு பாணிஸு;

அஸம்ஸயா விஸம்யுத்தா, தேஸு தி³ன்னம் மஹப்ப²லந்தி.

‘‘ஏதாதி³ஸீ த⁴ம்மபகாஸனேத்த²,

ந தத்த² கிம் கங்க²தி கோசி ஸாவகோ;

நித்தி²ண்ணஓக⁴ம் [நிதிண்ணஓக⁴ம் (ஸீ. க.), நித்திண்ணஓக⁴ம் (ஸ்யா. கம்.)] விசிகிச்ச²சி²ன்னம்,

பு³த்³த⁴ம் நமஸ்ஸாம ஜினம் ஜனிந்தா³’’தி [தீ³. நி. 2.354].

அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அத்தி² அரஹதோ கங்கா²’’தி.

ந வத்தப்³ப³ம் – ‘‘அத்தி² அரஹதோ கங்கா²’’தி? ஆமந்தா. நனு அரஹா இத்தி²புரிஸானம் நாமகோ³த்தே கங்கே²ய்ய, மக்³கா³மக்³கே³ கங்கே²ய்ய, திணகட்ட²வனப்பதீனம் நாமே கங்கே²ய்யா’’தி? ஆமந்தா. ஹஞ்சி அரஹா இத்தி²புரிஸானம் நாமகோ³த்தே கங்கே²ய்ய, மக்³கா³மக்³கே³ கங்கே²ய்ய, திணகட்ட²வனப்பதீனம் நாமே கங்கே²ய்ய; தேன வத ரே வத்தப்³பே³ – ‘‘அத்தி² அரஹதோ கங்கா²’’தி.

அரஹா இத்தி²புரிஸானம் நாமகோ³த்தே கங்கே²ய்ய, மக்³கா³மக்³கே³ கங்கே²ய்ய, திணகட்ட²வனப்பதீனம் நாமே கங்கே²ய்யாதி, அத்தி² அரஹதோ கங்கா²தி? ஆமந்தா. அரஹா ஸோதாபத்திப²லே வா ஸகதா³கா³மிப²லே வா அனாகா³மிப²லே வா அரஹத்தே வா கங்கே²ய்யாதி? ந ஹேவம் வத்தப்³பே³…பே….

கங்கா²கதா² நிட்டி²தா.