(19) 10. வோஹாரகதா²

347. பு³த்³த⁴ஸ்ஸ ப⁴க³வதோ வோஹாரோ லோகுத்தரோதி? ஆமந்தா. லோகுத்தரே ஸோதே படிஹஞ்ஞதி நோ லோகியே, லோகுத்தரேன விஞ்ஞாணேன படிவிஜானந்தி நோ லோகியேன, ஸாவகா படிவிஜானந்தி நோ புது²ஜ்ஜனாதி? ந ஹேவம் வத்தப்³பே³…பே….

நனு பு³த்³த⁴ஸ்ஸ ப⁴க³வதோ வோஹாரோ லோகியே ஸோதே படிஹஞ்ஞதீதி? ஆமந்தா. ஹஞ்சி பு³த்³த⁴ஸ்ஸ ப⁴க³வதோ வோஹாரோ லோகியே ஸோதே படிஹஞ்ஞதி, நோ ச வத ரே வத்தப்³பே³ – ‘‘பு³த்³த⁴ஸ்ஸ ப⁴க³வதோ வோஹாரோ லோகுத்தரோ’’தி.

நனு பு³த்³த⁴ஸ்ஸ ப⁴க³வதோ வோஹாரம் லோகியேன விஞ்ஞாணேன படிவிஜானந்தீதி? ஆமந்தா. ஹஞ்சி பு³த்³த⁴ஸ்ஸ ப⁴க³வதோ வோஹாரம் லோகியேன விஞ்ஞாணேன படிவிஜானந்தி, நோ ச வத ரே வத்தப்³பே³ – ‘‘பு³த்³த⁴ஸ்ஸ ப⁴க³வதோ வோஹாரோ லோகுத்தரோ’’தி.

நனு பு³த்³த⁴ஸ்ஸ ப⁴க³வதோ வோஹாரம் புது²ஜ்ஜனா படிவிஜானந்தீதி? ஆமந்தா. ஹஞ்சி பு³த்³த⁴ஸ்ஸ ப⁴க³வதோ வோஹாரம் புது²ஜ்ஜனா படிவிஜானந்தி, நோ ச வத ரே வத்தப்³பே³ – ‘‘பு³த்³த⁴ஸ்ஸ ப⁴க³வதோ வோஹாரோ லோகுத்தரோ’’தி.

348. பு³த்³த⁴ஸ்ஸ ப⁴க³வதோ வோஹாரோ லோகுத்தரோதி? ஆமந்தா. மக்³கோ³ ப²லம் நிப்³பா³னம், ஸோதாபத்திமக்³கோ³ ஸோதாபத்திப²லம், ஸகதா³கா³மிமக்³கோ³ ஸகதா³கா³மிப²லம், அனாகா³மிமக்³கோ³ அனாகா³மிப²லம், அரஹத்தமக்³கோ³ அரஹத்தப²லம், ஸதிபட்டா²னம் ஸம்மப்பதா⁴னம் இத்³தி⁴பாதோ³ இந்த்³ரியம் ப³லம் போ³ஜ்ஜ²ங்கோ³தி? ந ஹேவம் வத்தப்³பே³…பே….

பு³த்³த⁴ஸ்ஸ ப⁴க³வதோ வோஹாரோ லோகுத்தரோதி? ஆமந்தா. அத்தி² கேசி பு³த்³த⁴ஸ்ஸ ப⁴க³வதோ வோஹாரம் ஸுணந்தீதி? ஆமந்தா. லோகுத்தரோ த⁴ம்மோ ஸோதவிஞ்ஞேய்யோ, ஸோதஸ்மிம் படிஹஞ்ஞதி, ஸோதஸ்ஸ ஆபாத²ம் ஆக³ச்ச²தீதி? ந ஹேவம் வத்தப்³பே³…பே….

நனு லோகுத்தரோ த⁴ம்மோ ந ஸோதவிஞ்ஞேய்யோ, ந ஸோதஸ்மிம் படிஹஞ்ஞதி, ந ஸோதஸ்ஸ ஆபாத²ம் ஆக³ச்ச²தீதி? ஆமந்தா. ஹஞ்சி லோகுத்தரோ த⁴ம்மோ ந ஸோதவிஞ்ஞேய்யோ, ந ஸோதஸ்மிம் படிஹஞ்ஞதி, ந ஸோதஸ்ஸ ஆபாத²ம் ஆக³ச்ச²தி, நோ ச வத ரே வத்தப்³பே³ – ‘‘பு³த்³த⁴ஸ்ஸ ப⁴க³வதோ வோஹாரோ லோகுத்தரோ’’தி.

349. பு³த்³த⁴ஸ்ஸ ப⁴க³வதோ வோஹாரோ லோகுத்தரோதி? ஆமந்தா. அத்தி² கேசி பு³த்³த⁴ஸ்ஸ ப⁴க³வதோ வோஹாரே ரஜ்ஜேய்யுந்தி? ஆமந்தா. லோகுத்தரோ த⁴ம்மோ ராக³ட்டா²னியோ ரஜனீயோ கமனீயோ மத³னீயோ ப³ந்த⁴னீயோ முச்ச²னீயோதி? ந ஹேவம் வத்தப்³பே³…பே….

நனு லோகுத்தரோ த⁴ம்மோ ந ராக³ட்டா²னியோ ந ரஜனீயோ ந கமனீயோ ந மத³னீயோ ந ப³ந்த⁴னீயோ ந முச்ச²னீயோதி? ஆமந்தா. ஹஞ்சி லோகுத்தரோ த⁴ம்மோ ந ராக³ட்டா²னியோ ந ரஜனீயோ ந கமனீயோ ந மத³னீயோ ந ப³ந்த⁴னீயோ ந முச்ச²னீயோ, நோ ச வத ரே வத்தப்³பே³ – ‘‘பு³த்³த⁴ஸ்ஸ ப⁴க³வதோ வோஹாரோ லோகுத்தரோ’’தி.

பு³த்³த⁴ஸ்ஸ ப⁴க³வதோ வோஹாரோ லோகுத்தரோதி? ஆமந்தா. அத்தி² கேசி பு³த்³த⁴ஸ்ஸ ப⁴க³வதோ வோஹாரே து³ஸ்ஸேய்யுந்தி? ஆமந்தா. லோகுத்தரோ த⁴ம்மோ தோ³ஸட்டா²னியோ கோபட்டா²னியோ படிக⁴ட்டா²னியோதி? ந ஹேவம் வத்தப்³பே³…பே….

நனு லோகுத்தரோ த⁴ம்மோ ந தோ³ஸட்டா²னியோ ந கோபட்டா²னியோ ந படிக⁴ட்டா²னியோதி? ஆமந்தா. ஹஞ்சி லோகுத்தரோ த⁴ம்மோ ந தோ³ஸட்டா²னியோ ந கோபட்டா²னியோ ந படிக⁴ட்டா²னியோ, நோ ச வத ரே வத்தப்³பே³ – ‘‘பு³த்³த⁴ஸ்ஸ ப⁴க³வதோ வோஹாரோ லோகுத்தரோ’’தி.

பு³த்³த⁴ஸ்ஸ ப⁴க³வதோ வோஹாரோ லோகுத்தரோதி? ஆமந்தா. அத்தி² கேசி பு³த்³த⁴ஸ்ஸ ப⁴க³வதோ வோஹாரே முய்ஹேய்யுந்தி? ஆமந்தா. லோகுத்தரோ த⁴ம்மோ மோஹட்டா²னியோ அஞ்ஞாணகரணோ அசக்கு²கரணோ பஞ்ஞானிரோதி⁴கோ விகா⁴தபக்கி²கோ அனிப்³பா³னஸம்வத்தனிகோதி? ந ஹேவம் வத்தப்³பே³…பே….

நனு லோகுத்தரோ த⁴ம்மோ ந மோஹட்டா²னியோ ந அஞ்ஞாணகரணோ ந அசக்கு²கரணோ பஞ்ஞாவுத்³தி⁴கோ அவிகா⁴தபக்கி²கோ நிப்³பா³னஸம்வத்தனிகோதி? ஆமந்தா. ஹஞ்சி லோகுத்தரோ த⁴ம்மோ ந மோஹட்டா²னியோ ந அஞ்ஞாணகரணோ ந அசக்கு²கரணோ பஞ்ஞாவுத்³தி⁴கோ அவிகா⁴தபக்கி²கோ நிப்³பா³னஸம்வத்தனிகோ, நோ ச வத ரே வத்தப்³பே³ – ‘‘பு³த்³த⁴ஸ்ஸ ப⁴க³வதோ வோஹாரோ லோகுத்தரோ’’தி.

350. பு³த்³த⁴ஸ்ஸ ப⁴க³வதோ வோஹாரோ லோகுத்தரோதி? ஆமந்தா. யே கேசி பு³த்³த⁴ஸ்ஸ ப⁴க³வதோ வோஹாரம் ஸுணந்தி, ஸப்³பே³ தே மக்³க³ம் பா⁴வேந்தீதி? ந ஹேவம் வத்தப்³பே³…பே….

யே கேசி பு³த்³த⁴ஸ்ஸ ப⁴க³வதோ வோஹாரம் ஸுணந்தி, ஸப்³பே³ தே மக்³க³ம் பா⁴வேந்தீதி? ஆமந்தா. பா³லபுது²ஜ்ஜனா பு³த்³த⁴ஸ்ஸ ப⁴க³வதோ வோஹாரம் ஸுணந்தி, பா³லபுது²ஜ்ஜனா மக்³க³ம் பா⁴வேந்தீதி? ந ஹேவம் வத்தப்³பே³…பே… மாதுகா⁴தகோ மக்³க³ம் பா⁴வேதி…பே… பிதுகா⁴தகோ… அரஹந்தகா⁴தகோ… ருஹிருப்பாத³கோ… ஸங்க⁴பே⁴த³கோ பு³த்³த⁴ஸ்ஸ ப⁴க³வதோ வோஹாரம் ஸுணாதி, ஸங்க⁴பே⁴த³கோ மக்³க³ம் பா⁴வேதீதி? ந ஹேவம் வத்தப்³பே³…பே….

351. லப்³பா⁴ ஸோவண்ணமயாய லட்டி²யா த⁴ஞ்ஞபுஞ்ஜோபி ஸுவண்ணபுஞ்ஜோபி ஆசிக்கி²துந்தி? ஆமந்தா. ஏவமேவம் ப⁴க³வா லோகுத்தரேன வோஹாரேன லோகியம்பி லோகுத்தரம்பி த⁴ம்மம் வோஹரதீதி.

லப்³பா⁴ ஏலண்டி³யாய லட்டி²யா த⁴ஞ்ஞபுஞ்ஜோபி ஸுவண்ணபுஞ்ஜோபி ஆசிக்கி²துந்தி? ஆமந்தா. ஏவமேவம் ப⁴க³வா லோகியேன வோஹாரேன லோகியம்பி லோகுத்தரம்பி த⁴ம்மம் வோஹரதீதி.

352. பு³த்³த⁴ஸ்ஸ ப⁴க³வதோ வோஹாரோ லோகியம் வோஹரந்தஸ்ஸ லோகியோ ஹோதி, லோகுத்தரம் வோஹரந்தஸ்ஸ லோகுத்தரோ ஹோதீதி? ஆமந்தா. லோகியம் வோஹரந்தஸ்ஸ லோகியே ஸோதே படிஹஞ்ஞதி, லோகுத்தரம் வோஹரந்தஸ்ஸ லோகுத்தரே ஸோதே படிஹஞ்ஞதி; லோகியம் வோஹரந்தஸ்ஸ லோகியேன விஞ்ஞாணேன படிவிஜானந்தி, லோகுத்தரம் வோஹரந்தஸ்ஸ லோகுத்தரேன விஞ்ஞாணேன படிவிஜானந்தி; லோகியம் வோஹரந்தஸ்ஸ புது²ஜ்ஜனா படிவிஜானந்தி, லோகுத்தரம் வோஹரந்தஸ்ஸ ஸாவகா படிவிஜானந்தீதி? ந ஹேவம் வத்தப்³பே³…பே….

ந வத்தப்³ப³ம் – ‘‘பு³த்³த⁴ஸ்ஸ ப⁴க³வதோ வோஹாரோ லோகியம் வோஹரந்தஸ்ஸ லோகியோ ஹோதி, லோகுத்தரம் வோஹரந்தஸ்ஸ லோகுத்தரோ ஹோதீதி? ஆமந்தா. நனு ப⁴க³வா லோகியம்பி லோகுத்தரம்பி த⁴ம்மம் வோஹரதீதி? ஆமந்தா. ஹஞ்சி ப⁴க³வா லோகியம்பி லோகுத்தரம்பி த⁴ம்மம் வோஹரதி, தேன வத ரே வத்தப்³பே³ – ‘‘பு³த்³த⁴ஸ்ஸ ப⁴க³வதோ வோஹாரோ லோகியம் வோஹரந்தஸ்ஸ லோகியோ ஹோதி, லோகுத்தரம் வோஹரந்தஸ்ஸ லோகுத்தரோ ஹோதீ’’தி.

பு³த்³த⁴ஸ்ஸ ப⁴க³வதோ வோஹாரோ லோகியம் வோஹரந்தஸ்ஸ லோகியோ ஹோதி, லோகுத்தரம் வோஹரந்தஸ்ஸ லோகுத்தரோ ஹோதீதி? ஆமந்தா. மக்³க³ம் வோஹரந்தஸ்ஸ மக்³கோ³ ஹோதி, அமக்³க³ம் வோஹரந்தஸ்ஸ அமக்³கோ³ ஹோதி, ப²லம் வோஹரந்தஸ்ஸ ப²லம் ஹோதி, அப²லம் வோஹரந்தஸ்ஸ அப²லம் ஹோதி, நிப்³பா³னம் வோஹரந்தஸ்ஸ நிப்³பா³னம் ஹோதி, அனிப்³பா³னம் வோஹரந்தஸ்ஸ அனிப்³பா³னம் ஹோதி, ஸங்க²தம் வோஹரந்தஸ்ஸ ஸங்க²தம் ஹோதி, அஸங்க²தம் வோஹரந்தஸ்ஸ அஸங்க²தம் ஹோதி, ரூபம் வோஹரந்தஸ்ஸ ரூபம் ஹோதி, அரூபம் வோஹரந்தஸ்ஸ அரூபம் ஹோதி, வேத³னம் வோஹரந்தஸ்ஸ வேத³னா ஹோதி, அவேத³னம் வோஹரந்தஸ்ஸ அவேத³னா ஹோதி, ஸஞ்ஞம் வோஹரந்தஸ்ஸ ஸஞ்ஞா ஹோதி, அஸஞ்ஞம் வோஹரந்தஸ்ஸ அஸஞ்ஞா ஹோதி, ஸங்கா²ரே வோஹரந்தஸ்ஸ ஸங்கா²ரா ஹோந்தி, அஸங்கா²ரே வோஹரந்தஸ்ஸ அஸங்கா²ரா ஹோந்தி, விஞ்ஞாணம் வோஹரந்தஸ்ஸ விஞ்ஞாணம் ஹோதி, அவிஞ்ஞாணம் வோஹரந்தஸ்ஸ அவிஞ்ஞாணம் ஹோதீதி? ந ஹேவம் வத்தப்³பே³…பே….

வோஹாரகதா² நிட்டி²தா.