2. து³தியவக்³கோ³

(18) 9. அனுபுப்³பா³பி⁴ஸமயகதா²

339. அனுபுப்³பா³பி⁴ஸமயோதி? ஆமந்தா. அனுபுப்³பே³ன ஸோதாபத்திமக்³க³ம் பா⁴வேதீதி? ந ஹேவம் வத்தப்³பே³. அனுபுப்³பே³ன ஸோதாபத்திமக்³க³ம் பா⁴வேதீதி? ஆமந்தா. அனுபுப்³பே³ன ஸோதாபத்திப²லம் ஸச்சி²கரோதீதி? ந ஹேவம் வத்தப்³பே³.

அனுபுப்³பா³பி⁴ஸமயோதி? ஆமந்தா. அனுபுப்³பே³ன ஸகதா³கா³மிமக்³க³ம் பா⁴வேதீதி? ந ஹேவம் வத்தப்³பே³. அனுபுப்³பே³ன ஸகதா³கா³மிமக்³க³ம் பா⁴வேதீதி? ஆமந்தா. அனுபுப்³பே³ன ஸகதா³கா³மிப²லம் ஸச்சி²கரோதீதி? ந ஹேவம் வத்தப்³பே³.

அனுபுப்³பா³பி⁴ஸமயோதி? ஆமந்தா. அனுபுப்³பே³ன அனாகா³மிமக்³க³ம் பா⁴வேதீதி? ந ஹேவம் வத்தப்³பே³. அனுபுப்³பே³ன அனாகா³மிமக்³க³ம் பா⁴வேதீதி? ஆமந்தா. அனுபுப்³பே³ன அனாகா³மிப²லம் ஸச்சி²கரோதீதி? ந ஹேவம் வத்தப்³பே³.

அனுபுப்³பா³பி⁴ஸமயோதி? ஆமந்தா. அனுபுப்³பே³ன அரஹத்தமக்³க³ம் பா⁴வேதீதி? ந ஹேவம் வத்தப்³பே³. அனுபுப்³பே³ன அரஹத்தமக்³க³ம் பா⁴வேதீதி? ஆமந்தா. அனுபுப்³பே³ன அரஹத்தப²லம் ஸச்சி²கரோதீதி? ந ஹேவம் வத்தப்³பே³.

340. ஸோதாபத்திப²லஸச்சி²கிரியாய படிபன்னோ புக்³க³லோ து³க்க²த³ஸ்ஸனேன கிம் ஜஹதீதி? ஸக்காயதி³ட்டி²ம், விசிகிச்ச²ம், ஸீலப்³ப³தபராமாஸம், ததே³கட்டே² ச கிலேஸே சதுபா⁴க³ம் ஜஹதீதி. சதுபா⁴க³ம் ஸோதாபன்னோ, சதுபா⁴க³ம் ந ஸோதாபன்னோ, சதுபா⁴க³ம் ஸோதாபத்திப²லப்பத்தோ படிலத்³தோ⁴ அதி⁴க³தோ ஸச்சி²கதோ உபஸம்பஜ்ஜ விஹரதி, காயேன பு²ஸித்வா விஹரதி, சதுபா⁴க³ம் ந காயேன பு²ஸித்வா விஹரதி, சதுபா⁴க³ம் ஸத்தக்க²த்துபரமோ கோலங்கோலோ ஏகபீ³ஜீ பு³த்³தே⁴ அவேச்சப்பஸாதே³ன ஸமன்னாக³தோ, த⁴ம்மே…பே… ஸங்கே⁴…பே… அரியகந்தேஹி ஸீலேஹி ஸமன்னாக³தோ சதுபா⁴க³ம் ந அரியகந்தேஹி ஸீலேஹி ஸமன்னாக³தோதி? ந ஹேவம் வத்தப்³பே³.

ஸமுத³யத³ஸ்ஸனேன…பே… நிரோத⁴த³ஸ்ஸனேன…பே… மக்³க³த³ஸ்ஸனேன கிம் ஜஹதீதி? ஸக்காயதி³ட்டி²ம், விசிகிச்ச²ம், ஸீலப்³ப³தபராமாஸம், ததே³கட்டே² ச கிலேஸே சதுபா⁴க³ம் ஜஹதீதி. சதுபா⁴க³ம் ஸோதாபன்னோ, சதுபா⁴க³ம் ந ஸோதாபன்னோ, சதுபா⁴க³ம் ஸோதாபத்திப²லப்பத்தோ படிலத்³தோ⁴ அதி⁴க³தோ ஸச்சி²கதோ உபஸம்பஜ்ஜ விஹரதி, காயேன பு²ஸித்வா விஹரதி, சதுபா⁴க³ம் ந காயேன பு²ஸித்வா விஹரதி, சதுபா⁴க³ம் ஸத்தக்க²த்துபரமோ கோலங்கோலோ ஏகபீ³ஜீ பு³த்³தே⁴ அவேச்சப்பஸாதே³ன ஸமன்னாக³தோ, த⁴ம்மே…பே… ஸங்கே⁴…பே… அரியகந்தேஹி ஸீலேஹி ஸமன்னாக³தோ, சதுபா⁴க³ம் ந அரியகந்தேஹி ஸீலேஹி ஸமன்னாக³தோதி? ந ஹேவம் வத்தப்³பே³…பே….

341. ஸகதா³கா³மிப²லஸச்சி²கிரியாய படிபன்னோ புக்³க³லோ து³க்க²த³ஸ்ஸனேன கிம் ஜஹதீதி? ஓளாரிகம் காமராக³ம், ஓளாரிகம் ப்³யாபாத³ம், ததே³கட்டே² ச கிலேஸே சதுபா⁴க³ம் ஜஹதீதி. சதுபா⁴க³ம் ஸகதா³கா³மீ, சதுபா⁴க³ம் ந ஸகதா³கா³மீ, சதுபா⁴க³ம் ஸகதா³கா³மிப²லப்பத்தோ படிலத்³தோ⁴ அதி⁴க³தோ ஸச்சி²கதோ உபஸம்பஜ்ஜ விஹரதி, காயேன பு²ஸித்வா விஹரதி, சதுபா⁴க³ம் ந காயேன பு²ஸித்வா விஹரதீதி? ந ஹேவம் வத்தப்³பே³…பே… ஸமுத³யத³ஸ்ஸனேன…பே… நிரோத⁴த³ஸ்ஸனேன…பே… மக்³க³த³ஸ்ஸனேன கிம் ஜஹதீதி? ஓளாரிகம் காமராக³ம், ஓளாரிகம் ப்³யாபாத³ம், ததே³கட்டே² ச கிலேஸே சதுபா⁴க³ம் ஜஹதீதி. சதுபா⁴க³ம் ஸகதா³கா³மீ, சதுபா⁴க³ம் ந ஸகதா³கா³மீ, சதுபா⁴க³ம் ஸகதா³கா³மிப²லப்பத்தோ படிலத்³தோ⁴ அதி⁴க³தோ ஸச்சி²கதோ உபஸம்பஜ்ஜ விஹரதி, காயேன பு²ஸித்வா விஹரதி, சதுபா⁴க³ம் ந காயேன பு²ஸித்வா விஹரதீதி? ந ஹேவம் வத்தப்³பே³…பே….

342. அனாகா³மிப²லஸச்சி²கிரியாய படிபன்னோ புக்³க³லோ து³க்க²த³ஸ்ஸனேன கிம் ஜஹதீதி? அணுஸஹக³தம் காமராக³ம், அணுஸஹக³தம் ப்³யாபாத³ம், ததே³கட்டே² ச கிலேஸே சதுபா⁴க³ம் ஜஹதீதி. சதுபா⁴க³ம் அனாகா³மீ, சதுபா⁴க³ம் ந அனாகா³மீ, சதுபா⁴க³ம் அனாகா³மிப²லப்பத்தோ படிலத்³தோ⁴ அதி⁴க³தோ ஸச்சி²கதோ உபஸம்பஜ்ஜ விஹரதி, காயேன பு²ஸித்வா விஹரதி, சதுபா⁴க³ம் ந காயேன பு²ஸித்வா விஹரதி, சதுபா⁴க³ம் அந்தராபரினிப்³பா³யீ…பே… உபஹச்சபரினிப்³பா³யீ… அஸங்கா²ரபரினிப்³பா³யீ… ஸஸங்கா²ரபரினிப்³பா³யீ… உத்³த⁴ம்ஸோதோ அகனிட்ட²கா³மீ, சதுபா⁴க³ம் ந உத்³த⁴ம்ஸோதோ ந அகனிட்ட²கா³மீதி? ந ஹேவம் வத்தப்³பே³…பே….

ஸமுத³யத³ஸ்ஸனேன…பே… நிரோத⁴த³ஸ்ஸனேன…பே… மக்³க³த³ஸ்ஸனேன கிம் ஜஹதீதி? அணுஸஹக³தம் காமராக³ம், அணுஸஹக³தம் ப்³யாபாத³ம், ததே³கட்டே² ச கிலேஸே சதுபா⁴க³ம் ஜஹதீதி. சதுபா⁴க³ம் அனாகா³மீ, சதுபா⁴க³ம் ந அனாகா³மீ, சதுபா⁴க³ம் அனாகா³மிப²லப்பத்தோ படிலத்³தோ⁴ அதி⁴க³தோ ஸச்சி²கதோ உபஸம்பஜ்ஜ விஹரதி, காயேன பு²ஸித்வா விஹரதி, சதுபா⁴க³ம் ந காயேன பு²ஸித்வா விஹரதி, சதுபா⁴க³ம் அந்தராபரினிப்³பா³யீ…பே… உபஹச்சபரினிப்³பா³யீ… அஸங்கா²ரபரினிப்³பா³யீ… ஸஸங்கா²ரபரினிப்³பா³யீ… உத்³த⁴ம்ஸோதோ அகனிட்ட²கா³மீ, சதுபா⁴க³ம் ந உத்³த⁴ம்ஸோதோ அகனிட்ட²கா³மீதி? ந ஹேவம் வத்தப்³பே³…பே….

343. அரஹத்தஸச்சி²கிரியாய படிபன்னோ புக்³க³லோ து³க்க²த³ஸ்ஸனேன கிம் ஜஹதீதி? ரூபராக³ம், அரூபராக³ம், மானம், உத்³த⁴ச்சம், அவிஜ்ஜம், ததே³கட்டே² ச கிலேஸே சதுபா⁴க³ம் ஜஹதீதி. சதுபா⁴க³ம் அரஹா, சதுபா⁴க³ம் ந அரஹா, சதுபா⁴க³ம் அரஹத்தப்பத்தோ படிலத்³தோ⁴ அதி⁴க³தோ ஸச்சி²கதோ உபஸம்பஜ்ஜ விஹரதி, காயேன பு²ஸித்வா விஹரதி, சதுபா⁴க³ம் ந காயேன பு²ஸித்வா விஹரதி, சதுபா⁴க³ம் வீதராகோ³…பே… வீததோ³ஸோ… வீதமோஹோ…பே… கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸம்யோஜனோ ஸம்மத³ஞ்ஞாவிமுத்தோ உக்கி²த்தபலிகோ⁴ ஸங்கிண்ணபரிகோ² அப்³பூ³ள்ஹேஸிகோ நிரக்³க³ளோ அரியோ பன்னத்³த⁴ஜோ பன்னபா⁴ரோ விஸஞ்ஞுத்தோ ஸுவிஜிதவிஜயோ, து³க்க²ம் தஸ்ஸ பரிஞ்ஞாதம், ஸமுத³யோ பஹீனோ, நிரோதோ⁴ ஸச்சி²கதோ, மக்³கோ³ பா⁴விதோ, அபி⁴ஞ்ஞேய்யம் அபி⁴ஞ்ஞாதம், பரிஞ்ஞேய்யம் பரிஞ்ஞாதம், பஹாதப்³ப³ம் பஹீனம், பா⁴வேதப்³ப³ம் பா⁴விதம்…பே… ஸச்சி²காதப்³ப³ம் ஸச்சி²கதம், சதுபா⁴க³ம் ஸச்சி²காதப்³ப³ம் ந ஸச்சி²கதந்தி? ந ஹேவம் வத்தப்³பே³…பே….

ஸமுத³யத³ஸ்ஸனேன … நிரோத⁴த³ஸ்ஸனேன… மக்³க³த³ஸ்ஸனேன கிம் ஜஹதீதி? ரூபராக³ம், அரூபராக³ம், மானம், உத்³த⁴ச்சம், அவிஜ்ஜம், ததே³கட்டே² ச கிலேஸே சதுபா⁴க³ம் ஜஹதீதி. சதுபா⁴க³ம் அரஹா, சதுபா⁴க³ம் ந அரஹா, சதுபா⁴க³ம் அரஹத்தப்பத்தோ படிலத்³தோ⁴ அதி⁴க³தோ ஸச்சி²கதோ உபஸம்பஜ்ஜ விஹரதி, காயேன பு²ஸித்வா விஹரதி, சதுபா⁴க³ம் ந காயேன பு²ஸித்வா விஹரதி, சதுபா⁴க³ம் வீதராகோ³… வீததோ³ஸோ… வீதமோஹோ… கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸம்யோஜனோ ஸம்மத³ஞ்ஞாவிமுத்தோ உக்கி²த்தபலிகோ⁴ ஸங்கிண்ணபரிகோ² அப்³பூ³ள்ஹேஸிகோ நிரக்³க³ளோ அரியோ பன்னத்³த⁴ஜோ பன்னபா⁴ரோ விஸஞ்ஞுத்தோ ஸுவிஜிதவிஜயோ, து³க்க²ம் தஸ்ஸ பரிஞ்ஞாதம், ஸமுத³யோ பஹீனோ, நிரோதோ⁴ ஸச்சி²கதோ, மக்³கோ³ பா⁴விதோ, அபி⁴ஞ்ஞேய்யம் அபி⁴ஞ்ஞாதம், பரிஞ்ஞேய்யம் பரிஞ்ஞாதம், பஹாதப்³ப³ம் பஹீனம், பா⁴வேதப்³ப³ம் பா⁴விதம்…பே… ஸச்சி²காதப்³ப³ம் ஸச்சி²கதம், சதுபா⁴க³ம் ஸச்சி²காதப்³ப³ம் ந ஸச்சி²கதந்தி? ந ஹேவம் வத்தப்³பே³…பே….

344. ஸோதாபத்திப²லஸச்சி²கிரியாய படிபன்னோ புக்³க³லோ து³க்க²ம் த³க்க²ந்தோ படிபன்னகோதி வத்தப்³போ³தி? ஆமந்தா. து³க்கே² தி³ட்டே² ப²லே டி²தோதி வத்தப்³போ³தி? ந ஹேவம் வத்தப்³பே³. ஸமுத³யம் த³க்க²ந்தோ…பே… நிரோத⁴ம் த³க்க²ந்தோ படிபன்னகோதி வத்தப்³போ³தி? ஆமந்தா. நிரோதே⁴ தி³ட்டே² ப²லே டி²தோதி வத்தப்³போ³தி? ந ஹேவம் வத்தப்³பே³.

ஸோதாபத்திப²லஸச்சி²கிரியாய படிபன்னோ புக்³க³லோ மக்³க³ம் த³க்க²ந்தோ படிபன்னகோதி வத்தப்³போ³, மக்³கே³ தி³ட்டே² ப²லே டி²தோதி வத்தப்³போ³தி? ஆமந்தா. து³க்க²ம் த³க்க²ந்தோ படிபன்னகோதி வத்தப்³போ³, து³க்கே² தி³ட்டே² ப²லே டி²தோதி வத்தப்³போ³தி? ந ஹேவம் வத்தப்³பே³…பே… மக்³க³ம் த³க்க²ந்தோ படிபன்னகோதி வத்தப்³போ³, மக்³கே³ தி³ட்டே² ப²லே டி²தோதி வத்தப்³போ³தி? ஆமந்தா. ஸமுத³யம் த³க்க²ந்தோ…பே… நிரோத⁴ம் த³க்க²ந்தோ படிபன்னகோதி வத்தப்³போ³, நிரோதே⁴ தி³ட்டே² ப²லே டி²தோதி வத்தப்³போ³தி? ந ஹேவம் வத்தப்³பே³…பே….

ஸோதாபத்திப²லஸச்சி²கிரியாய படிபன்னோ புக்³க³லோ து³க்க²ம் த³க்க²ந்தோ படிபன்னகோதி வத்தப்³போ³, து³க்கே² தி³ட்டே² ந வத்தப்³ப³ம் – ‘‘ப²லே டி²தோதி வத்தப்³போ³’’தி? ஆமந்தா. மக்³க³ம் த³க்க²ந்தோ படிபன்னகோதி வத்தப்³போ³, மக்³கே³ தி³ட்டே² ந வத்தப்³ப³ம் – ‘‘ப²லே டி²தோதி வத்தப்³போ³’’தி? ந ஹேவம் வத்தப்³பே³…பே… ஸமுத³யம் த³க்க²ந்தோ… நிரோத⁴ம் த³க்க²ந்தோ படிபன்னகோதி வத்தப்³போ³, நிரோதே⁴ தி³ட்டே² ந வத்தப்³ப³ம் – ‘‘ப²லே டி²தோதி வத்தப்³போ³’’தி? ஆமந்தா. மக்³க³ம் த³க்க²ந்தோ ‘‘படிபன்னகோ’’தி வத்தப்³போ³, மக்³கே³ தி³ட்டே² ந வத்தப்³ப³ம் – ‘‘ப²லே டி²தோதி வத்தப்³போ³’’தி? ந ஹேவம் வத்தப்³பே³…பே….

[ஸகவாதீ³புச்சா²லக்க²ணம்] ஸோதாபத்திப²லஸச்சி²கிரியாய படிபன்னோ புக்³க³லோ து³க்க²ம் த³க்க²ந்தோ படிபன்னகோதி வத்தப்³போ³, து³க்கே² தி³ட்டே² ந வத்தப்³ப³ம் – ‘‘ப²லே டி²தோதி வத்தப்³போ³’’தி? ஆமந்தா. நிரத்தி²யம் து³க்க²த³ஸ்ஸனந்தி? ந ஹேவம் வத்தப்³பே³…பே… ஸமுத³யம் த³க்க²ந்தோ…பே… நிரோத⁴ம் த³க்க²ந்தோ படிபன்னகோதி வத்தப்³போ³, நிரோதே⁴ தி³ட்டே² ந வத்தப்³ப³ம் – ‘‘ப²லே டி²தோதி வத்தப்³போ³’’தி? ஆமந்தா. நிரத்தி²யம் நிரோத⁴த³ஸ்ஸனந்தி? ந ஹேவம் வத்தப்³பே³…பே….

345. [பரவாதீ³புச்சா²லக்க²ணம்] து³க்கே² தி³ட்டே² சத்தாரி ஸச்சானி தி³ட்டா²னி ஹோந்தீதி? ஆமந்தா. து³க்க²ஸச்சம் சத்தாரி ஸச்சானீதி? ந ஹேவம் வத்தப்³பே³…பே….

[ஸகவாதீ³புச்சா²லக்க²ணம்] ரூபக்க²ந்தே⁴ அனிச்சதோ தி³ட்டே² பஞ்சக்க²ந்தா⁴ அனிச்சதோ தி³ட்டா² ஹோந்தீதி? ஆமந்தா. ரூபக்க²ந்தோ⁴ பஞ்சக்க²ந்தா⁴தி? ந ஹேவம் வத்தப்³பே³…பே….

[ஸகவாதீ³புச்சா²லக்க²ணம்] சக்கா²யதனே அனிச்சதோ தி³ட்டே² த்³வாத³ஸாயதனானி அனிச்சதோ தி³ட்டா²னி ஹோந்தீதி? ஆமந்தா. சக்கா²யதனம் த்³வாத³ஸாயதனானீதி? ந ஹேவம் வத்தப்³பே³…பே….

[ஸகவாதீ³புச்சா²லக்க²ணம்] சக்கு²தா⁴துயா அனிச்சதோ தி³ட்டா²ய அட்டா²ரஸ தா⁴துயோ அனிச்சதோ தி³ட்டா² ஹோந்தீதி? ஆமந்தா. சக்கு²தா⁴து அட்டா²ரஸ தா⁴துயோதி? ந ஹேவம் வத்தப்³பே³…பே….

[ஸகவாதீ³புச்சா²லக்க²ணம்] சக்கு²ந்த்³ரியே அனிச்சதோ தி³ட்டே² பா³வீஸதிந்த்³ரியானி அனிச்சதோ தி³ட்டா²னி ஹோந்தீதி? ஆமந்தா. சக்கு²ந்த்³ரியம் பா³வீஸதிந்த்³ரியானீதி? ந ஹேவம் வத்தப்³பே³…பே….

[ஸகவாதீ³புச்சா²லக்க²ணம்] சதூஹி ஞாணேஹி ஸோதாபத்திப²லம் ஸச்சி²கரோதீதி? ஆமந்தா. சத்தாரி ஸோதாபத்திப²லானீதி? ந ஹேவம் வத்தப்³பே³…பே… அட்ட²ஹி ஞாணேஹி ஸோதாபத்திப²லம் ஸச்சி²கரோதீதி? ஆமந்தா. அட்ட² ஸோதாபத்திப²லானீதி? ந ஹேவம் வத்தப்³பே³…பே… த்³வாத³ஸஹி ஞாணேஹி ஸோதாபத்திப²லம் ஸச்சி²கரோதீதி? ஆமந்தா. த்³வாத³ஸ ஸோதாபத்திப²லானீதி? ந ஹேவம் வத்தப்³பே³…பே… சதுசத்தாரீஸாய ஞாணேஹி ஸோதாபத்திப²லம் ஸச்சி²கரோதீதி? ஆமந்தா. சதுசத்தாரீஸம் ஸோதாபத்திப²லானீதி? ந ஹேவம் வத்தப்³பே³…பே… ஸத்தஸத்ததியா ஞாணேஹி ஸோதாபத்திப²லம் ஸச்சி²கரோதீதி? ஆமந்தா. ஸத்தஸத்ததி ஸோதாபத்திப²லானீதி? ந ஹேவம் வத்தப்³பே³…பே….

346. ந வத்தப்³ப³ம் – ‘‘அனுபுப்³பா³பி⁴ஸமயோ’’தி? ஆமந்தா. நனு வுத்தம் ப⁴க³வதா – ‘‘ஸேய்யதா²பி, பி⁴க்க²வே, மஹாஸமுத்³தோ³ அனுபுப்³ப³னின்னோ அனுபுப்³ப³போணோ அனுபுப்³ப³பப்³பா⁴ரோ, ந ஆயதகேனேவ பபாதோ; ஏவமேவ கோ², பி⁴க்க²வே, இமஸ்மிம் த⁴ம்மவினயே அனுபுப்³ப³ஸிக்கா² அனுபுப்³ப³கிரியா அனுபுப்³ப³படிபதா³, ந ஆயதகேனேவ அஞ்ஞாபடிவேதோ⁴’’தி [சூளவ. 385; அ. நி. 8.20; உதா³. 45 உதா³னே ச]. அத்தே²வ ஸுத்தந்தோதி? ஆமந்தா. தேன ஹி அனுபுப்³பா³பி⁴ஸமயோதி.

ந வத்தப்³ப³ம் – ‘‘அனுபுப்³பா³பி⁴ஸமயோ’’தி? ஆமந்தா. நனு வுத்தம் ப⁴க³வதா –

‘‘அனுபுப்³பே³ன மேதா⁴வீ, தோ²கம் தோ²கம் க²ணே க²ணே;

கம்மாரோ ரஜதஸ்ஸேவ, நித்³த⁴மே மலமத்தனோ’’தி [த⁴. ப. 239 த⁴ம்மபதே³].

அத்தே²வ ஸுத்தந்தோதி? ஆமந்தா. தேன ஹி அனுபுப்³பா³பி⁴ஸமயோதி.

அனுபுப்³பா³பி⁴ஸமயோதி? ஆமந்தா. நன்வாயஸ்மா க³வம்பதி தே²ரோ பி⁴க்கூ² ஏதத³வோச – ‘‘ஸம்முகா² மேதம், ஆவுஸோ, ப⁴க³வதோ ஸுதம் ஸம்முகா² படிக்³க³ஹிதம் – ‘யோ, பி⁴க்க²வே, து³க்க²ம் பஸ்ஸதி து³க்க²ஸமுத³யம்பி ஸோ பஸ்ஸதி, து³க்க²னிரோத⁴ம்பி பஸ்ஸதி, து³க்க²னிரோத⁴கா³மினிம் படிபத³ம்பி பஸ்ஸதி; யோ து³க்க²ஸமுத³யம் பஸ்ஸதி து³க்க²ம்பி ஸோ பஸ்ஸதி, து³க்க²னிரோத⁴ம்பி பஸ்ஸதி, து³க்க²னிரோத⁴கா³மினிம் படிபத³ம்பி பஸ்ஸதி; யோ து³க்க²னிரோத⁴ம் பஸ்ஸதி து³க்க²ம்பி ஸோ பஸ்ஸதி, து³க்க²ஸமுத³யம்பி பஸ்ஸதி, து³க்க²னிரோத⁴கா³மினிம் படிபத³ம்பி பஸ்ஸதி; யோ து³க்க²னிரோத⁴கா³மினிம் படிபத³ம் பஸ்ஸதி து³க்க²ம்பி ஸோ பஸ்ஸதி, து³க்க²ஸமுத³யம்பி பஸ்ஸதி, து³க்க²னிரோத⁴ம்பி பஸ்ஸதீ’’’தி [ஸம். நி. 5.1100]! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அனுபுப்³பா³பி⁴ஸமயோ’’தி.

அனுபுப்³பா³பி⁴ஸமயோதி? ஆமந்தா. நனு வுத்தம் ப⁴க³வதா –

‘‘ஸஹாவஸ்ஸ த³ஸ்ஸனஸம்பதா³ய,

தயஸ்ஸு த⁴ம்மா ஜஹிதா ப⁴வந்தி;

ஸக்காயதி³ட்டீ² விசிகிச்சி²தஞ்ச,

ஸீலப்³ப³தம் வாபி யத³த்தி² கிஞ்சி;

சதூஹபாயேஹி ச விப்பமுத்தோ,

ச²ச்சாபி⁴டா²னானி அப⁴ப்³ப³ காது’’ந்தி.

அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அனுபுப்³பா³பி⁴ஸமயோ’’தி.

அனுபுப்³பா³பி⁴ஸமயோதி? ஆமந்தா. நனு வுத்தம் ப⁴க³வதா – ‘‘யஸ்மிம், பி⁴க்க²வே, ஸமயே அரியஸாவகஸ்ஸ விரஜம் வீதமலம் த⁴ம்மசக்கு²ம் உத³பாதி³ – ‘யம் கிஞ்சி ஸமுத³யத⁴ம்மம் ஸப்³ப³ம் தம் நிரோத⁴த⁴ம்ம’ந்தி, ஸஹ த³ஸ்ஸனுப்பாதா³, பி⁴க்க²வே, அரியஸாவகஸ்ஸ தீணி ஸம்யோஜனானி பஹீயந்தி – ஸக்காயதி³ட்டி², விசிகிச்சா², ஸீலப்³ப³தபராமாஸோ’’தி! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அனுபுப்³பா³பி⁴ஸமயோ’’தி.

அனுபுப்³பா³பி⁴ஸமயகதா² நிட்டி²தா.