(10) 1. பரூபஹாரகதா²

307. அத்தி² அரஹதோ அஸுசி ஸுக்கவிஸ்ஸட்டீ²தி? ஆமந்தா. அத்தி² அரஹதோ ராகோ³ காமராகோ³ காமராக³பரியுட்டா²னம் காமராக³ஸம்யோஜனம் காமோகோ⁴ காமயோகோ³ காமச்ச²ந்த³னீவரணந்தி? ந ஹேவம் வத்தப்³பே³…பே….

நத்தி² அரஹதோ ராகோ³ காமராகோ³ காமராக³பரியுட்டா²னம் காமராக³ஸம்யோஜனம் காமோகோ⁴ காமயோகோ³ காமச்ச²ந்த³னீவரணந்தி? ஆமந்தா. ஹஞ்சி நத்தி² அரஹதோ ராகோ³ காமராகோ³ காமராக³பரியுட்டா²னம் காமராக³ஸம்யோஜனம் காமோகோ⁴ காமயோகோ³ காமச்ச²ந்த³னீவரணம், நோ ச வத ரே வத்தப்³பே³ – ‘‘அத்தி² அரஹதோ அஸுசி ஸுக்கவிஸ்ஸட்டீ²’’தி.

அத்தி² புது²ஜ்ஜனஸ்ஸ அஸுசி ஸுக்கவிஸ்ஸட்டி², அத்தி² தஸ்ஸ ராகோ³ காமராகோ³ காமராக³பரியுட்டா²னம் காமராக³ஸம்யோஜனம் காமோகோ⁴ காமயோகோ³ காமச்ச²ந்த³னீவரணந்தி? ஆமந்தா. அத்தி² அரஹதோ அஸுசி ஸுக்கவிஸ்ஸட்டி², அத்தி² தஸ்ஸ ராகோ³ காமராகோ³ காமராக³பரியுட்டா²னம்…பே… காமச்ச²ந்த³னீவரணந்தி? ந ஹேவம் வத்தப்³பே³…பே….

அத்தி² அரஹதோ அஸுசி ஸுக்கவிஸ்ஸட்டி², நத்தி² தஸ்ஸ ராகோ³ காமராகோ³ காமராக³பரியுட்டா²னம்…பே… காமச்ச²ந்த³னீவரணந்தி? ஆமந்தா. அத்தி² புது²ஜ்ஜனஸ்ஸ அஸுசி ஸுக்கவிஸ்ஸட்டி², நத்தி² தஸ்ஸ ராகோ³ காமராகோ³ காமராக³பரியுட்டா²னம்…பே… காமச்ச²ந்த³னீவரணந்தி? ந ஹேவம் வத்தப்³பே³…பே….

அத்தி² அரஹதோ அஸுசி ஸுக்கவிஸ்ஸட்டீ²தி? ஆமந்தா. கேனட்டே²னாதி? ஹந்த³ ஹி மாரகாயிகா தே³வதா அரஹதோ அஸுசிம் ஸுக்கவிஸ்ஸட்டி²ம் உபஸம்ஹரந்தீதி.

மாரகாயிகா தே³வதா அரஹதோ அஸுசிம் ஸுக்கவிஸ்ஸட்டி²ம் உபஸம்ஹரந்தீதி? ஆமந்தா. அத்தி² மாரகாயிகானம் தே³வதானம் அஸுசி ஸுக்கவிஸ்ஸட்டீ²தி? ந ஹேவம் வத்தப்³பே³…பே….

நத்தி² மாரகாயிகானம் தே³வதானம் அஸுசி ஸுக்கவிஸ்ஸட்டீ²தி? ஆமந்தா. ஹஞ்சி நத்தி² மாரகாயிகானம் தே³வதானம் அஸுசி ஸுக்கவிஸ்ஸட்டி², நோ ச வத ரே வத்தப்³பே³ – ‘‘மாரகாயிகா தே³வதா அரஹதோ அஸுசிம் ஸுக்கவிஸ்ஸட்டி²ம் உபஸம்ஹரந்தீ’’தி.

மாரகாயிகா தே³வதா அரஹதோ அஸுசிம் ஸுக்கவிஸ்ஸட்டி²ம் உபஸம்ஹரந்தீதி? ஆமந்தா. மாரகாயிகா தே³வதா அத்தனோ அஸுசிம் ஸுக்கவிஸ்ஸட்டி²ம் உபஸம்ஹரந்தி, அஞ்ஞேஸம் அஸுசிம் ஸுக்கவிஸ்ஸட்டி²ம் உபஸம்ஹரந்தி, தஸ்ஸ அஸுசிம் ஸுக்கவிஸ்ஸட்டி²ம் உபஸம்ஹரந்தீதி? ந ஹேவம் வத்தப்³பே³…பே….

மாரகாயிகா தே³வதா நேவ அத்தனோ ந அஞ்ஞேஸம் ந தஸ்ஸ அஸுசிம் ஸுக்கவிஸ்ஸட்டி²ம் உபஸம்ஹரந்தீதி? ஆமந்தா. ஹஞ்சி மாரகாயிகா தே³வதா நேவ அத்தனோ ந அஞ்ஞேஸம் ந தஸ்ஸ அஸுசிம் ஸுக்கவிஸ்ஸட்டி²ம் உபஸம்ஹரந்தி, நோ ச வத ரே வத்தப்³பே³ – ‘‘மாரகாயிகா தே³வதா அரஹதோ அஸுசிம் ஸுக்கவிஸ்ஸட்டி²ம் உபஸம்ஹரந்தீ’’தி.

மாரகாயிகா தே³வதா அரஹதோ அஸுசிம் ஸுக்கவிஸ்ஸட்டி²ம் உபஸம்ஹரந்தீதி? ஆமந்தா. லோமகூபேஹி உபஸம்ஹரந்தீதி? ந ஹேவம் வத்தப்³பே³…பே….

308. மாரகாயிகா தே³வதா அரஹதோ அஸுசிம் ஸுக்கவிஸ்ஸட்டி²ம் உபஸம்ஹரந்தீதி? ஆமந்தா. கிம் காரணாதி? ஹந்த³ ஹி விமதிம் கா³ஹயிஸ்ஸாமாதி. அத்தி² அரஹதோ விமதீதி? ந ஹேவம் வத்தப்³பே³…பே….

அத்தி² அரஹதோ விமதீதி? ஆமந்தா. அத்தி² அரஹதோ ஸத்த²ரி விமதி, த⁴ம்மே விமதி, ஸங்கே⁴ விமதி, ஸிக்கா²ய விமதி, புப்³ப³ந்தே விமதி, அபரந்தே விமதி, புப்³ப³ந்தாபரந்தே விமதி, இத³ப்பச்சயதாபடிச்சஸமுப்பன்னேஸு த⁴ம்மேஸு விமதீதி? ந ஹேவம் வத்தப்³பே³…பே….

நத்தி² அரஹதோ ஸத்த²ரி விமதி, த⁴ம்மே விமதி, ஸங்கே⁴ விமதி, ஸிக்கா²ய விமதி, புப்³ப³ந்தே விமதி, அபரந்தே விமதி, புப்³ப³ந்தாபரந்தே விமதி, இத³ப்பச்சயதாபடிச்சஸமுப்பன்னேஸு த⁴ம்மேஸு விமதீதி? ஆமந்தா. ஹஞ்சி நத்தி² அரஹதோ ஸத்த²ரி விமதி…பே… இத³ப்பச்சயதாபடிச்சஸமுப்பன்னேஸு த⁴ம்மேஸு விமதி, நோ ச வத ரே வத்தப்³பே³ – ‘‘அத்தி² அரஹதோ விமதீ’’தி.

அத்தி² புது²ஜ்ஜனஸ்ஸ விமதி, அத்தி² தஸ்ஸ ஸத்த²ரி விமதி…பே… இத³ப்பச்சயதாபடிச்சஸமுப்பன்னேஸு த⁴ம்மேஸு விமதீதி? ஆமந்தா. அத்தி² அரஹதோ விமதி, அத்தி² தஸ்ஸ ஸத்த²ரி விமதி…பே… இத³ப்பச்சயதாபடிச்சஸமுப்பன்னேஸு த⁴ம்மேஸு விமதீதி? ந ஹேவம் வத்தப்³பே³…பே….

அத்தி² அரஹதோ விமதி, நத்தி² தஸ்ஸ ஸத்த²ரி விமதி…பே… இத³ப்பச்சயதாபடிச்சஸமுப்பன்னேஸு த⁴ம்மேஸு விமதீதி? ஆமந்தா. அத்தி² புது²ஜ்ஜனஸ்ஸ விமதி, நத்தி² தஸ்ஸ ஸத்த²ரி விமதி…பே… இத³ப்பச்சயதாபடிச்சஸமுப்பன்னேஸு த⁴ம்மேஸு விமதீதி? ந ஹேவம் வத்தப்³பே³…பே….

அத்தி² அரஹதோ அஸுசி ஸுக்கவிஸ்ஸட்டீ²தி? ஆமந்தா. அரஹதோ அஸுசி ஸுக்கவிஸ்ஸட்டி² கிஸ்ஸ நிஸ்ஸந்தோ³தி? அஸிதபீதகா²யிதஸாயிதஸ்ஸ நிஸ்ஸந்தோ³தி. அரஹதோ அஸுசி ஸுக்கவிஸ்ஸட்டி² அஸிதபீதகா²யிதஸாயிதஸ்ஸ நிஸ்ஸந்தோ³தி? ஆமந்தா. யே கேசி அஸந்தி பிவந்தி கா²த³ந்தி ஸாயந்தி, ஸப்³பே³ஸம்யேவ அத்தி² அஸுசி ஸுக்கவிஸ்ஸட்டீ²தி? ந ஹேவம் வத்தப்³பே³…பே….

யே கேசி அஸந்தி பிவந்தி கா²த³ந்தி ஸாயந்தி, ஸப்³பே³ஸம்யேவ அத்தி² அஸுசி ஸுக்கவிஸ்ஸட்டீ²தி? ஆமந்தா. தா³ரகா அஸந்தி பிவந்தி கா²த³ந்தி ஸாயந்தி, அத்தி² தா³ரகானம் அஸுசி ஸுக்கவிஸ்ஸட்டீ²தி? ந ஹேவம் வத்தப்³பே³.

பண்ட³கா அஸந்தி பிவந்தி கா²த³ந்தி ஸாயந்தி, அத்தி² பண்ட³கானம் அஸுசி ஸுக்கவிஸ்ஸட்டீ²தி? ந ஹேவம் வத்தப்³பே³…பே….

தே³வா அஸந்தி பிவந்தி கா²த³ந்தி ஸாயந்தி, அத்தி² தே³வதானம் அஸுசி ஸுக்கவிஸ்ஸட்டீ²தி? ந ஹேவம் வத்தப்³பே³…பே….

309. அரஹதோ அஸுசி ஸுக்கவிஸ்ஸட்டி² அஸிதபீதகா²யிதஸாயிதஸ்ஸ நிஸ்ஸந்தோ³தி? ஆமந்தா. அத்தி² தஸ்ஸ ஆஸயோதி? ந ஹேவம் வத்தப்³பே³…பே….

அரஹதோ உச்சாரபஸ்ஸாவோ அஸிதபீதகா²யிதஸாயிதஸ்ஸ நிஸ்ஸந்தோ³, அத்தி² தஸ்ஸ ஆஸயோதி? ஆமந்தா. அரஹதோ அஸுசி ஸுக்கவிஸ்ஸட்டி² அஸிதபீதகா²யிதஸாயிதஸ்ஸ நிஸ்ஸந்தோ³, அத்தி² தஸ்ஸ ஆஸயோதி? ந ஹேவம் வத்தப்³பே³…பே….

அரஹதோ அஸுசி ஸுக்கவிஸ்ஸட்டி² அஸிதபீதகா²யிதஸாயிதஸ்ஸ நிஸ்ஸந்தோ³, நத்தி² தஸ்ஸ ஆஸயோதி? ஆமந்தா. அரஹதோ உச்சாரபஸ்ஸாவோ அஸிதபீதகா²யிதஸாயிதஸ்ஸ நிஸ்ஸந்தோ³, நத்தி² தஸ்ஸ ஆஸயோதி? ந ஹேவம் வத்தப்³பே³…பே….

310. அத்தி² அரஹதோ அஸுசி ஸுக்கவிஸ்ஸட்டீ²தி? ஆமந்தா. அரஹா மேது²னம் த⁴ம்மம் படிஸேவேய்ய, மேது²னம் உப்பாதே³ய்ய [மேது²னம் த⁴ம்மம் உப்பாதே³ய்ய (ஸீ. ஸ்யா.)], புத்தஸம்பா³த⁴ஸயனம் அஜ்ஜா²வஸேய்ய, காஸிகசந்த³னம் பச்சனுப⁴வேய்ய, மாலாக³ந்த⁴விலேபனம் தா⁴ரேய்ய, ஜாதரூபரஜதம் ஸாதி³யேய்யாதி? ந ஹேவம் வத்தப்³பே³.

அத்தி² புது²ஜ்ஜனஸ்ஸ அஸுசி ஸுக்கவிஸ்ஸட்டி², புது²ஜ்ஜனோ மேது²னம் த⁴ம்மம் படிஸேவேய்ய, மேது²னம் உப்பாதே³ய்ய, புத்தஸம்பா³த⁴ஸயனம் அஜ்ஜா²வஸேய்ய, காஸிகசந்த³னம் பச்சனுப⁴வேய்ய, மாலாக³ந்த⁴விலேபனம் தா⁴ரேய்ய, ஜாதரூபரஜதம் ஸாதி³யேய்யாதி? ஆமந்தா. அத்தி² அரஹதோ அஸுசி ஸுக்கவிஸ்ஸட்டி², அரஹா மேது²னம் த⁴ம்மம் படிஸேவேய்ய, மேது²னம் உப்பாதே³ய்ய, புத்தஸம்பா³த⁴ஸயனம் அஜ்ஜா²வஸேய்ய, காஸிகசந்த³னம் பச்சனுப⁴வேய்ய, மாலாக³ந்த⁴விலேபனம் தா⁴ரேய்ய, ஜாதரூபரஜதம் ஸாதி³யேய்யாதி? ந ஹேவம் வத்தப்³பே³…பே….

அத்தி² அரஹதோ அஸுசி ஸுக்கவிஸ்ஸட்டி², ந ச அரஹா மேது²னம் த⁴ம்மம் படிஸேவேய்ய, மேது²னம் உப்பாதே³ய்ய, புத்தஸம்பா³த⁴ஸயனம் அஜ்ஜா²வஸேய்ய, காஸிகசந்த³னம் பச்சனுப⁴வேய்ய, மாலாக³ந்த⁴விலேபனம் தா⁴ரேய்ய, ஜாதரூபரஜதம் ஸாதி³யேய்யாதி? ஆமந்தா. அத்தி² புது²ஜ்ஜனஸ்ஸ அஸுசி ஸுக்கவிஸ்ஸட்டி², ந ச புது²ஜ்ஜனோ மேது²னம் த⁴ம்மம் படிஸேவேய்ய, மேது²னம் உப்பாதே³ய்ய, புத்தஸம்பா³த⁴ஸயனம் அஜ்ஜா²வஸேய்ய, காஸிகசந்த³னம் பச்சனுப⁴வேய்ய, மாலாக³ந்த⁴விலேபனம் தா⁴ரேய்ய, ஜாதரூபரஜதம் ஸாதி³யேய்யாதி? ந ஹேவம் வத்தப்³பே³.

அத்தி² அரஹதோ அஸுசி ஸுக்கவிஸ்ஸட்டீ²தி? ஆமந்தா. நனு அரஹதோ ராகோ³ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிம் அனுப்பாத³த⁴ம்மோதி? ஆமந்தா. ஹஞ்சி அரஹதோ ராகோ³ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிம் அனுப்பாத³த⁴ம்மோ, நோ ச வத ரே வத்தப்³பே³ – ‘‘அத்தி² அரஹதோ அஸுசி ஸுக்கவிஸ்ஸட்டீ²’’தி.

அத்தி² அரஹதோ அஸுசி ஸுக்கவிஸ்ஸட்டீ²தி? ஆமந்தா. நனு அரஹதோ தோ³ஸோ பஹீனோ…பே… மோஹோ பஹீனோ… மானோ பஹீனோ… தி³ட்டி² பஹீனா… விசிகிச்சா² பஹீனா… தி²னம் பஹீனம்… உத்³த⁴ச்சம் பஹீனம்… அஹிரிகம் பஹீனம்…பே… அனோத்தப்பம் பஹீனம் உச்சி²ன்னமூலம் தாலாவத்து²கதம் அனபா⁴வங்கதம் ஆயதிம் அனுப்பாத³த⁴ம்மந்தி? ஆமந்தா. ஹஞ்சி அரஹதோ அனோத்தப்பம் பஹீனம் உச்சி²ன்னமூலம் தாலாவத்து²கதம் அனபா⁴வங்கதம் ஆயதிம் அனுப்பாத³த⁴ம்மம், நோ ச வத ரே வத்தப்³பே³ – ‘‘அத்தி² அரஹதோ அஸுசி ஸுக்கவிஸ்ஸட்டீ²’’தி.

311. அத்தி² அரஹதோ அஸுசி ஸுக்கவிஸ்ஸட்டீ²தி? ஆமந்தா. நனு அரஹதோ ராக³ப்பஹானாய மக்³கோ³ பா⁴விதோதி? ஆமந்தா. ஹஞ்சி அரஹதோ ராக³ப்பஹானாய மக்³கோ³ பா⁴விதோ, நோ ச வத ரே வத்தப்³பே³ – ‘‘அத்தி² அரஹதோ அஸுசி ஸுக்கவிஸ்ஸட்டீ²’’தி.

அத்தி² அரஹதோ அஸுசி ஸுக்கவிஸ்ஸட்டீ²தி? ஆமந்தா. நனு அரஹதோ ராக³ப்பஹானாய ஸதிபட்டா²னா பா⁴விதா…பே… ஸம்மப்பதா⁴னா பா⁴விதா… இத்³தி⁴பாதா³ பா⁴விதா… இந்த்³ரியா பா⁴விதா… ப³லா பா⁴விதா…பே… போ³ஜ்ஜ²ங்கா³ பா⁴விதாதி? ஆமந்தா. ஹஞ்சி அரஹதோ ராக³ப்பஹானாய போ³ஜ்ஜ²ங்கா³ பா⁴விதா, நோ ச வத ரே வத்தப்³பே³ – ‘‘அத்தி² அரஹதோ அஸுசி ஸுக்கவிஸ்ஸட்டீ²’’தி.

அத்தி² அரஹதோ அஸுசி ஸுக்கவிஸ்ஸட்டீ²தி? ஆமந்தா. நனு அரஹதோ தோ³ஸப்பஹானாய…பே… மோஹப்பஹானாய…பே… அனோத்தப்பபஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதாதி? ஆமந்தா. ஹஞ்சி அரஹதோ அனோத்தப்பபஹானாய போ³ஜ்ஜ²ங்கா³ பா⁴விதா, நோ ச வத ரே வத்தப்³பே³ – ‘‘அத்தி² அரஹதோ அஸுசி ஸுக்கவிஸ்ஸட்டீ²’’தி.

அத்தி² அரஹதோ அஸுசி ஸுக்கவிஸ்ஸட்டீ²தி? ஆமந்தா. நனு அரஹா வீதராகோ³ வீததோ³ஸோ வீதமோஹோ கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸம்யோஜனோ ஸம்மத³ஞ்ஞாவிமுத்தோ உக்கி²த்தபலிகோ⁴ ஸங்கிண்ணபரிகோ² அப்³பூ³ள்ஹேஸிகோ நிரக்³க³ளோ அரியோ பன்னத்³த⁴ஜோ பன்னபா⁴ரோ விஸஞ்ஞுத்தோ ஸுவிஜிதவிஜயோ, து³க்க²ம் தஸ்ஸ பரிஞ்ஞாதம், ஸமுத³யோ பஹீனோ, நிரோதோ⁴ ஸச்சி²கதோ, மக்³கோ³ பா⁴விதோ, அபி⁴ஞ்ஞேய்யம் அபி⁴ஞ்ஞாதம், பரிஞ்ஞேய்யம் பரிஞ்ஞாதம், பஹாதப்³ப³ம் பஹீனம், பா⁴வேதப்³ப³ம் பா⁴விதம், ஸச்சி²காதப்³ப³ம் ஸச்சி²கதந்தி? ஆமந்தா. ஹஞ்சி அரஹா வீதராகோ³ வீததோ³ஸோ வீதமோஹோ கதகரணீயோ…பே… ஸச்சி²காதப்³ப³ம் ஸச்சி²கதம், நோ ச வத ரே வத்தப்³பே³ – ‘‘அத்தி² அரஹதோ அஸுசி ஸுக்கவிஸ்ஸட்டீ²’’தி.

312. அத்தி² அரஹதோ அஸுசி ஸுக்கவிஸ்ஸட்டீ²தி? ஸத⁴ம்மகுஸலஸ்ஸ அரஹதோ அத்தி² அஸுசி ஸுக்கவிஸ்ஸட்டி², பரத⁴ம்மகுஸலஸ்ஸ அரஹதோ நத்தி² அஸுசி ஸுக்கவிஸ்ஸட்டீ²தி. ஸத⁴ம்மகுஸலஸ்ஸ அரஹதோ அத்தி² அஸுசி ஸுக்கவிஸ்ஸட்டீ²தி? ஆமந்தா. பரத⁴ம்மகுஸலஸ்ஸ அரஹதோ அத்தி² அஸுசி ஸுக்கவிஸ்ஸட்டீ²தி? ந ஹேவம் வத்தப்³பே³…பே….

பரத⁴ம்மகுஸலஸ்ஸ அரஹதோ நத்தி² அஸுசி ஸுக்கவிஸ்ஸட்டீ²தி? ஆமந்தா. ஸத⁴ம்மகுஸலஸ்ஸ அரஹதோ நத்தி² அஸுசி ஸுக்கவிஸ்ஸட்டீ²தி? ந ஹேவம் வத்தப்³பே³…பே….

ஸத⁴ம்மகுஸலஸ்ஸ அரஹதோ ராகோ³ பஹீனோ, அத்தி² தஸ்ஸ அஸுசி ஸுக்கவிஸ்ஸட்டீ²தி? ஆமந்தா. பரத⁴ம்மகுஸலஸ்ஸ அரஹதோ ராகோ³ பஹீனோ, அத்தி² தஸ்ஸ அஸுசி ஸுக்கவிஸ்ஸட்டீ²தி? ந ஹேவம் வத்தப்³பே³…பே….

ஸத⁴ம்மகுஸலஸ்ஸ அரஹதோ தோ³ஸோ பஹீனோ…பே… மோஹோ பஹீனோ…பே… அனோத்தப்பம் பஹீனம், அத்தி² தஸ்ஸ அஸுசி ஸுக்கவிஸ்ஸட்டீ²தி? ஆமந்தா. பரத⁴ம்மகுஸலஸ்ஸ அரஹதோ அனோத்தப்பம் பஹீனம், அத்தி² தஸ்ஸ அஸுசி ஸுக்கவிஸ்ஸட்டீ²தி? ந ஹேவம் வத்தப்³பே³…பே….

ஸத⁴ம்மகுஸலஸ்ஸ அரஹதோ ராக³ப்பஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதா…பே… தோ³ஸப்பஹானாய…பே… மோஹப்பஹானாய…பே… அனோத்தப்பபஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதா, அத்தி² தஸ்ஸ அஸுசி ஸுக்கவிஸ்ஸட்டீ²தி? ஆமந்தா. பரத⁴ம்மகுஸலஸ்ஸ அரஹதோ அனோத்தப்பபஹானாய போ³ஜ்ஜ²ங்கா³ பா⁴விதா, அத்தி² தஸ்ஸ அஸுசி ஸுக்கவிஸ்ஸட்டீ²தி? ந ஹேவம் வத்தப்³பே³…பே….

ஸத⁴ம்மகுஸலோ அரஹா வீதராகோ³ வீததோ³ஸோ வீதமோஹோ…பே… ஸச்சி²காதப்³ப³ம் ஸச்சி²கதம், அத்தி² தஸ்ஸ அஸுசி ஸுக்கவிஸ்ஸட்டீ²தி? ஆமந்தா. பரத⁴ம்மகுஸலோ அரஹா வீதராகோ³ வீததோ³ஸோ வீதமோஹோ…பே… ஸச்சி²காதப்³ப³ம் ஸச்சி²கதம், அத்தி² தஸ்ஸ அஸுசி ஸுக்கவிஸ்ஸட்டீ²தி? ந ஹேவம் வத்தப்³பே³…பே….

பரத⁴ம்மகுஸலஸ்ஸ அரஹதோ ராகோ³ பஹீனோ, நத்தி² தஸ்ஸ அஸுசி ஸுக்கவிஸ்ஸட்டீ²தி? ஆமந்தா. ஸத⁴ம்மகுஸலஸ்ஸ அரஹதோ ராகோ³ பஹீனோ, நத்தி² தஸ்ஸ அஸுசி ஸுக்கவிஸ்ஸட்டீ²தி? ந ஹேவம் வத்தப்³பே³…பே….

பரத⁴ம்மகுஸலஸ்ஸ அரஹதோ தோ³ஸோ பஹீனோ…பே… மோஹோ பஹீனோ…பே… அனோத்தப்பம் பஹீனம், நத்தி² தஸ்ஸ அஸுசி ஸுக்கவிஸ்ஸட்டீ²தி? ஆமந்தா. ஸத⁴ம்மகுஸலஸ்ஸ அரஹதோ அனோத்தப்பம் பஹீனம், நத்தி² தஸ்ஸ அஸுசி ஸுக்கவிஸ்ஸட்டீ²தி? ந ஹேவம் வத்தப்³பே³…பே….

பரத⁴ம்மகுஸலஸ்ஸ அரஹதோ ராக³ப்பஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதா…பே… தோ³ஸப்பஹானாய…பே… மோஹப்பஹானாய…பே… அனோத்தப்பபஹானாய மக்³கோ³ பா⁴விதோ…பே… போ³ஜ்ஜ²ங்கா³ பா⁴விதா, நத்தி² தஸ்ஸ அஸுசி ஸுக்கவிஸ்ஸட்டீ²தி? ஆமந்தா. ஸத⁴ம்மகுஸலஸ்ஸ அரஹதோ அனோத்தப்பபஹானாய போ³ஜ்ஜ²ங்கா³ பா⁴விதா, நத்தி² தஸ்ஸ அஸுசி ஸுக்கவிஸ்ஸட்டீ²தி? ந ஹேவம் வத்தப்³பே³…பே….

பரத⁴ம்மகுஸலோ அரஹா வீதராகோ³ வீததோ³ஸோ வீதமோஹோ…பே… ஸச்சி²காதப்³ப³ம் ஸச்சி²கதம், நத்தி² தஸ்ஸ அஸுசி ஸுக்கவிஸ்ஸட்டீ²தி? ஆமந்தா. ஸத⁴ம்மகுஸலோ அரஹா வீதராகோ³ வீததோ³ஸோ வீதமோஹோ…பே… ஸச்சி²காதப்³ப³ம் ஸச்சி²கதம், நத்தி² தஸ்ஸ அஸுசி ஸுக்கவிஸ்ஸட்டீ²தி? ந ஹேவம் வத்தப்³பே³…பே….

313. அத்தி² அரஹதோ அஸுசி ஸுக்கவிஸ்ஸட்டீ²தி? ஆமந்தா. நனு வுத்தம் ப⁴க³வதா – ‘‘யே தே [யே கேசி (ஸீ.)], பி⁴க்க²வே, பி⁴க்கூ² புது²ஜ்ஜனா ஸீலஸம்பன்னா ஸதா ஸம்பஜானா நித்³த³ம் ஓக்கமந்தி, தேஸம் அஸுசி ந முச்சதி. யேபி தே, பி⁴க்க²வே, பா³ஹிரகா இஸயோ காமேஸு வீதராகா³, தேஸம்பி அஸுசி ந முச்சதி. அட்டா²னமேதம், பி⁴க்க²வே, அனவகாஸோ யம் அரஹதோ அஸுசி முச்சேய்யா’’தி [மஹாவ. 353 அத்த²தோ ஸமானம்; அ. நி. 5.210 பஸ்ஸிதப்³ப³ம்]. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ம் – ‘‘அத்தி² அரஹதோ அஸுசி ஸுக்கவிஸ்ஸட்டீ²’’தி.

ந வத்தப்³ப³ம் – ‘‘அத்தி² அரஹதோ பரூபஹாரோ’’தி? ஆமந்தா. நனு அரஹதோ சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம் பரே உபஸம்ஹரேய்யுந்தி? ஆமந்தா. ஹஞ்சி அரஹதோ சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம் பரே உபஸம்ஹரேய்யும், தேன வத ரே வத்தப்³பே³ – ‘‘அத்தி² அரஹதோ பரூபஹாரோ’’தி.

அரஹதோ சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம் பரே உபஸம்ஹரேய்யுந்தி, அத்தி² அரஹதோ பரூபஹாரோதி? ஆமந்தா. அரஹதோ ஸோதாபத்திப²லம் வா ஸகதா³கா³மிப²லம் வா அனாகா³மிப²லம் வா அரஹத்தம் வா பரே உபஸம்ஹரேய்யுந்தி? ந ஹேவம் வத்தப்³பே³…பே….

பரூபஹாரகதா² நிட்டி²தா.