10. பஞ்ஞத்தானுயோகோ³

61. ரூபதா⁴துயா ரூபீ புக்³க³லோதி? ஆமந்தா. காமதா⁴துயா காமீ புக்³க³லோதி? ந ஹேவம் வத்தப்³பே³…பே….

62. ரூபதா⁴துயா ரூபினோ ஸத்தாதி? ஆமந்தா. காமதா⁴துயா காமினோ ஸத்தாதி? ந ஹேவம் வத்தப்³பே³…பே….

63. அரூபதா⁴துயா அரூபீ புக்³க³லோதி? ஆமந்தா. காமதா⁴துயா காமீ புக்³க³லோதி? ந ஹேவம் வத்தப்³பே³…பே….

64. அரூபதா⁴துயா அரூபினோ ஸத்தாதி? ஆமந்தா. காமதா⁴துயா காமினோ ஸத்தாதி? ந ஹேவம் வத்தப்³பே³…பே….

65. ரூபதா⁴துயா ரூபீ புக்³க³லோ அரூபதா⁴துயா அரூபீ புக்³க³லோ, அத்தி² ச கோசி ரூபதா⁴துயா சுதோ அரூபதா⁴தும் உபபஜ்ஜதீதி? ஆமந்தா. ரூபீ புக்³க³லோ உபச்சி²ன்னோ, அரூபீ புக்³க³லோ ஜாதோதி? ந ஹேவம் வத்தப்³பே³…பே….

66. ரூபதா⁴துயா ரூபினோ ஸத்தா அரூபதா⁴துயா அரூபினோ ஸத்தா, அத்தி² ச கோசி ரூபதா⁴துயா சுதோ அரூபதா⁴தும் உபபஜ்ஜதீதி? ஆமந்தா. ரூபீ ஸத்தோ உபச்சி²ன்னோ, அரூபீ ஸத்தோ ஜாதோதி? ந ஹேவம் வத்தப்³பே³…பே….

67. காயோதி வா ஸரீரந்தி வா, ஸரீரந்தி வா காயோதி வா, காயம் அப்பியம் கரித்வா ஏஸேஸே ஏகட்டே² ஸமே ஸமபா⁴கே³ தஜ்ஜாதேதி? ஆமந்தா. புக்³க³லோதி வா ஜீவோதி வா, ஜீவோதி வா புக்³க³லோதி வா, புக்³க³லம் அப்பியம் கரித்வா ஏஸேஸே ஏகட்டே² ஸமே ஸமபா⁴கே³ தஜ்ஜாதேதி? ஆமந்தா. அஞ்ஞோ காயோ, அஞ்ஞோ புக்³க³லோதி? ஆமந்தா. அஞ்ஞம் ஜீவம், அஞ்ஞம் ஸரீரந்தி? ந ஹேவம் வத்தப்³பே³.

ஆஜானாஹி நிக்³க³ஹம். ஹஞ்சி காயோதி வா ஸரீரந்தி வா, ஸரீரந்தி வா காயோதி வா, காயம் அப்பியம் கரித்வா ஏஸேஸே ஏகட்டே² ஸமே ஸமபா⁴கே³ தஜ்ஜாதே, புக்³க³லோதி வா ஜீவோதி வா, ஜீவோதி வா புக்³க³லோதி வா, புக்³க³லம் அப்பியம் கரித்வா ஏஸேஸே ஏகட்டே² ஸமே ஸமபா⁴கே³ தஜ்ஜாதே, அஞ்ஞோ காயோ அஞ்ஞோ புக்³க³லோ; தேன வத ரே வத்தப்³பே³ – ‘‘அஞ்ஞம் ஜீவம் அஞ்ஞம் ஸரீர’’ந்தி. யம் தத்த² வதே³ஸி – ‘‘வத்தப்³பே³ கோ² – ‘காயோதி வா ஸரீரந்தி வா, ஸரீரந்தி வா காயோதி வா, காயம் அப்பியம் கரித்வா ஏஸேஸே ஏகட்டே² ஸமே ஸமபா⁴கே³ தஜ்ஜாதே, புக்³க³லோதி வா ஜீவோதி வா, ஜீவோதி வா புக்³க³லோதி வா, புக்³க³லம் அப்பியம் கரித்வா ஏஸேஸே ஏகட்டே² ஸமே ஸமபா⁴கே³ தஜ்ஜாதே, அஞ்ஞோ காயோ அஞ்ஞோ புக்³க³லோ,’ நோ ச வத்தப்³பே³ – ‘அஞ்ஞம் ஜீவம் அஞ்ஞம் ஸரீர’’’ந்தி மிச்சா².

நோ சே பன வத்தப்³பே³ – ‘‘அஞ்ஞம் ஜீவம் அஞ்ஞம் ஸரீர’’ந்தி, நோ ச வத ரே வத்தப்³பே³ – ‘‘காயோதி வா ஸரீரந்தி வா, ஸரீரந்தி வா காயோதி வா, காயம் அப்பியம் கரித்வா ஏஸேஸே ஏகட்டே² ஸமே ஸமபா⁴கே³ தஜ்ஜாதே, புக்³க³லோதி வா ஜீவோதி வா, ஜீவோதி வா புக்³க³லோதி வா, புக்³க³லம் அப்பியம் கரித்வா ஏஸேஸே ஏகட்டே² ஸமே ஸமபா⁴கே³ தஜ்ஜாதே, அஞ்ஞோ காயோ அஞ்ஞோ புக்³க³லோ’’தி. யம் தத்த² வதே³ஸி – ‘‘வத்தப்³பே³ கோ² – ‘காயோதி வா ஸரீரந்தி வா, ஸரீரந்தி வா காயோதி வா, காயம் அப்பியம் கரித்வா ஏஸேஸே ஏகட்டே² ஸமே ஸமபா⁴கே³ தஜ்ஜாதே, புக்³க³லோதி வா ஜீவோதி வா, ஜீவோதி வா புக்³க³லோதி வா, புக்³க³லம் அப்பியம் கரித்வா ஏஸேஸே ஏகட்டே² ஸமே ஸமபா⁴கே³ தஜ்ஜாதே, அஞ்ஞோ காயோ அஞ்ஞோ புக்³க³லோ’, நோ ச வத்தப்³பே³ – ‘அஞ்ஞம் ஜீவம் அஞ்ஞம் ஸரீர’’’ந்தி மிச்சா²…பே….

68. காயோதி வா ஸரீரந்தி வா, ஸரீரந்தி வா காயோதி வா, காயம் அப்பியம் கரித்வா ஏஸேஸே ஏகட்டே² ஸமே ஸமபா⁴கே³ தஜ்ஜாதேதி? ஆமந்தா. வுத்தம் ப⁴க³வதா – ‘‘அத்தி² புக்³க³லோ அத்தஹிதாய படிபன்னோ’’தி? ஆமந்தா. அஞ்ஞோ காயோ அஞ்ஞோ புக்³க³லோதி? ந ஹேவம் வத்தப்³பே³.

ஆஜானாஹி படிகம்மம். ஹஞ்சி காயோதி வா ஸரீரந்தி வா, ஸரீரந்தி வா காயோதி வா, காயம் அப்பியம் கரித்வா ஏஸேஸே ஏகட்டே² ஸமே ஸமபா⁴கே³ தஜ்ஜாதே, வுத்தம் ப⁴க³வதா – ‘‘அத்தி² புக்³க³லோ அத்தஹிதாய படிபன்னோ,’’ தேன வத ரே வத்தப்³பே³ – ‘‘அஞ்ஞோ காயோ அஞ்ஞோ புக்³க³லோ’’தி. யம் தத்த² வதே³ஸி – ‘‘வத்தப்³பே³ கோ² – ‘காயோதி வா ஸரீரந்தி வா, ஸரீரந்தி வா காயோதி வா, காயம் அப்பியம் கரித்வா ஏஸேஸே ஏகட்டே² ஸமே ஸமபா⁴கே³ தஜ்ஜாதே, வுத்தம் ப⁴க³வதா – அத்தி² புக்³க³லோ அத்தஹிதாய படிபன்னோ,’ நோ ச வத்தப்³பே³ – ‘அஞ்ஞோ காயோ அஞ்ஞோ புக்³க³லோ’’’தி மிச்சா².

நோ சே பன வத்தப்³பே³ – ‘‘அஞ்ஞோ காயோ அஞ்ஞோ புக்³க³லோ’’தி, நோ ச வத ரே வத்தப்³பே³ – ‘‘காயோதி வா ஸரீரந்தி வா, ஸரீரந்தி வா காயோதி வா, காயம் அப்பியம் கரித்வா ஏஸேஸே ஏகட்டே² ஸமே ஸமபா⁴கே³ தஜ்ஜாதே, வுத்தம் ப⁴க³வதா – ‘அத்தி² புக்³க³லோ அத்தஹிதாய படிபன்னோ’’’தி. யம் தத்த² வதே³ஸி – ‘‘வத்தப்³பே³ கோ² – ‘காயோதி வா ஸரீரந்தி வா, ஸரீரந்தி வா காயோதி வா, காயம் அப்பியம் கரித்வா ஏஸேஸே ஏகட்டே² ஸமே ஸமபா⁴கே³ தஜ்ஜாதே, வுத்தம் ப⁴க³வதா – அத்தி² புக்³க³லோ அத்தஹிதாய படிபன்னோ,’ நோ ச வத்தப்³பே³ – ‘அஞ்ஞோ காயோ அஞ்ஞோ புக்³க³லோ’’’தி மிச்சா². (ஸம்கி²த்தம்)

பஞ்ஞத்தானுயோகோ³.