1. ஸஞ்ஞாபரிபா⁴ஸானித்³தே³ஸ-பட²மபரிச்சே²த³

ரதனத்தயப்பணாம

1. நம’த்து² ஜன ஸந்தான, தம ஸந்தான பே⁴தி³னோ;

த⁴ம்மு’ஜ்ஜலந்த ருசினோ, முனிந்தோ³’தா³த ரோசினோ.

நிமித்த

2. பிங்க³லா’சரியாதீ³ஹி, ச²ந்த³ம் ய முதி³தம் புரா;

ஸுத்³த⁴மாக³தி⁴கானம் தம், ந ஸாதே⁴தி யதி²ச்சி²தம் [ய’தி³ச்சி²தம் யதி’ச்சி²தம் (க.)].

க³ந்த²பரிமாண

3. ததோ மாக³த⁴பா⁴ஸாய, மத்தா,வண்ண,விபே⁴த³னம்;

லக்க்²ய லக்க²ண ஸம்யுத்தம், பஸன்ன’த்த²,பத³,க்கமம்.

அபி⁴தா⁴னாதி³

4. இத³ம் வுத்தோத³யம் நாம, லோகிய’ச்ச²ந்த³னிஸ்ஸிதம்;

ஆரபி⁴ஸ்ஸ’மஹம் தா³னி, தேஸம் ஸுக²விபு³த்³தி⁴யா.

க³ணஸங்கேதஸஞ்ஞா

5. ஸப்³ப³க்³லா ம்னா,’தி³க³லஹூ, ப்⁴யா’,மஜ்ஜ²’ந்த க³ரூ ஜஸா;

மஜ்ஜ²’ந்தலா ர,தே’தே’ட்ட², க³ணா கோ³ க³ரு,லோ லஹு.

க³ணனியம

6. ப⁴,ஜ,ஸா ஸப்³ப³க³,லஹூ, பஞ்சி’மே ஸண்டி²தா க³ணா;

அரியாதி³ம்ஹி விஞ்ஞேய்யா, க³ணோ இத⁴ சது’க்கலோ.

க³ரு,லஹுஸரூப

7. ஸம்யோகா³’தி³ ச, தீ³கோ⁴ ச, நிக்³க³ஹீதபரோ ச, யோ;

க³ரு, வங்கோ, பாத³ந்தோ,வா, ரஸ்ஸோ’ஞ்ஞோ மத்திகோ லு’ஜு.

8. பரே பாதா³தி³ஸம்யோகே³, யோ புப்³போ³ க³ருக’க்க²ரோ;

லஹு ஸ க்வசி விஞ்ஞேய்யோ, தது³தா³ஹரணம் யதா².

9. த³ஸ்ஸனரஸா’நுபா⁴வனே, நிப³த்³த⁴கே³தா⁴ ஜினஸ்ஸ’யம் ஜனதா;

விம்ஹயஜனனீ ஸஞ்ஞத, க்ரியா நு கம் நா’நுரஞ்ஜயதி.

10. விஞ்ஞேய்யா லோகதோ ஸஞ்ஞா, ஸமுத்³தோ³,ஸு,ரஸாதி³னம்;

பாதோ³ஞேய்யோ சதுத்த²ம்’ஸோ, பத³ச்சே²தோ³ யதீ ப⁴வே.

11. ஸம,மட்³ட⁴ஸமம், வுத்தம், விஸமம் சா’பரம் திதா⁴;

ஸமா லக்க²ணதோ பாதா³, சத்தாரோ யஸ்ஸ தம் ஸமம்.

12. யஸ்ஸ’ந்திமேன து³தியோ, ததியேனா’தி³மோ ஸமோ;

த’த³ட்³ட⁴ஸம, மஞ்ஞம் து, பி⁴ன்ன லக்க²ண பாதி³கம்.

13. பாத³’மேகக்க²ரா’ரப்³ப⁴, யாவ ச²ப்³பீ³ஸத’க்க²ரா;

ப⁴வே பாதே³ஹி தம் ச²ந்த³ம், நானானாமோ’தி³தம் ததோ.

14. த³ண்ட³கா சண்ட³வுட்ட்²யா’தி³, பாதே³ஹி ச²ஹி, தீஹி து;

‘கா³தா²’தி ச பரத்தே²’வம், ச²ந்தோ³ ஸஞ்ஞா பகாஸிதா.

15. அனந்தரோ’தி³தம் ச’ஞ்ஞ, மேதம் ஸாமஞ்ஞ நாமதோ;

‘கா³தா²’இச்சேவ நித்³தி³ட்ட²ம், முனிந்த³வசனே பன.

16. விஸேஸனாமதோ கிஞ்சி, க³ஹேத்வா ஸப்³ப³தோ²’சிதம்;

த³ஸ்ஸயிஸ்ஸாம’ஹம் தே’த்த², நாமானா’வி ப⁴விஸ்ஸரே.

இதி வுத்தோத³யே ச²ந்த³ஸி ஸஞ்ஞாபரிபா⁴ஸா நித்³தே³ஸோ நாம

பட²மோ பரிச்சே²தோ³.