5. ஸேஸகஸிணனித்³தே³ஸவண்ணனா

ஆபோகஸிணகதா²வண்ணனா

91. யதா²வித்தா²ரிதஸ்ஸ அத்த²ஸ்ஸ அதிதே³ஸோபி வித்தா²ரட்டா²னேயேவ திட்ட²தீதி ஆஹ ‘‘வித்தா²ரகதா² ஹோதீ’’தி. ஆபோகஸிணந்தி ஆபோகஸிணஜ்ஜா²னம், ஆபோகஸிணகம்மட்டா²னம் வா. ஸப்³ப³ம் வித்தா²ரேதப்³ப³ந்தி பத²வீகஸிணகம்மட்டா²னே வுத்தனயேன வித்தா²ரேதப்³ப³ம். ஏத்தகம்பீதி ‘‘கதே வா அகதே வாதி ஸப்³ப³ம் வித்தா²ரேதப்³ப³’’ந்தி ஏத்தகம்பி அவத்வா. ஸாமுத்³தி³கேன லோணுத³கேன ப⁴ரிதோ ஜலாஸயோ லோணீ. நீலாதி³வண்ணஸங்கரபரிஹரணத்த²ம் ‘‘ஸுத்³த⁴வத்தே²ன க³ஹித’’ந்தி வுத்தம். அஞ்ஞந்தி பூ⁴மிம் ஸம்பத்தம். ததா²ரூபந்தி யாதி³ஸம் ஆகாஸஜம் உத³கம், தாதி³ஸம். தேனாஹ ‘‘விப்பஸன்னம் அனாவில’’ந்தி, யம் பன உத³கந்தி ஸம்ப³ந்தோ⁴. ‘‘ந வண்ணோ பச்சவேக்கி²தப்³போ³’’திஆதீ³ஸு யம் வத்தப்³ப³ம், தம் பத²வீகஸிணகதா²யம் வுத்தமேவ. லக்க²ணம் பன இத⁴ பக்³க⁴ரணலக்க²ணம் வேதி³தப்³ப³ம்.

வுத்தனயேனேவாதி பத²வீகஸிணபா⁴வனாயம் வுத்தனயேனேவ. தரங்கு³ட்டா²னாதி³, பே²ணமிஸ்ஸதாதி³ ச இத⁴ கஸிணதோ³ஸோ. ஸோதி யோகா³வசரோ. தஸ்ஸாதி படிபா⁴க³னிமித்தஸ்ஸ.

தேஜோகஸிணகதா²வண்ணனா

92. ஸினித்³தா⁴னி ஸினேஹவந்தானி. ஸாரதா³ரூனி ந பே²க்³கு³தா³ரூனி. ஜாலாய சிரட்டி²தத்த²ம் ஸினித்³த⁴ஸாரதா³ருக்³க³ஹணம். க⁴டிகம் க⁴டிகம் கத்வாதி க²ந்த⁴ஸோ கரித்வா. ஆலிம்பேத்வாதி ஜாலேத்வா. க⁴னஜாலாயாதி அவிரளவஸேன பவத்தஅக்³கி³ஜாலாயம்.

பதனஸதி³ஸந்தி பதமானஸதி³ஸம். அகதே க³ண்ஹந்தஸ்ஸாதி வுத்தனயேன யதா² கஸிணமண்ட³லம் பஞ்ஞாயதி, ஏவம் அனபி⁴ஸங்க²தே கேவலே தேஜஸ்மிம் நிமித்தம் க³ண்ஹந்தஸ்ஸ.

வாயோகஸிணகதா²வண்ணனா

93. வுத்தஞ்ஹேதந்தி ஏத்த² ஹி-ஸத்³தோ³ ஹேதுஅத்தோ², யஸ்மாதி அத்தோ². தஸ்ஸ ‘‘தஸ்மா’’தி இமினா ஸம்ப³ந்தோ⁴. உச்ச²க்³க³ந்தி உச்சு²கே²த்தே யதா²டி²தானம் அக்³க³ம். ஏரிதந்தி வாதேன சலிதம். ஸமேரிதந்தி ஸப்³ப³ஸோ சலிதம். தஸ்மாதி யஸ்மா ‘‘வாயோகஸிணம்…பே… உபலக்கே²தீ’’தி ஏவம் வுத்தம் அட்ட²கதா²யம், தஸ்மா. ஸமஸீஸட்டி²தந்தி உபரி பத்தானம் வஸேன ஸமஸீஸம் ஹுத்வா டி²தம். வேளும் வா ருக்க²ம் வாதி ஏத்தா²பி ‘‘ஸமஸீஸம் டி²தம் க⁴னபத்தவேளும் வா க⁴னபத்தருக்க²ம் வா’’தி ஆனேத்வா யோஜேதப்³ப³ம். ஏகங்கு³லாதி³ப்பமாணேஸு கேஸேஸு ரஸ்ஸபா⁴வதோ, தீ³க⁴தரேஸு ஓலம்ப³னதோ, விரளேஸு அனுப்பவேஸதோ வாதப்பஹாரோ ந பஞ்ஞாயதீதி சதுரங்கு³லப்பமாணக்³க³ஹணம், க⁴னக்³க³ஹணஞ்ச கதம். ஏதஸ்மிம் டா²னே பஹரதீதி ஸதிம் ட²பேத்வாதி உச்ச²க்³கா³தீ³னம் பசலனாகாரக்³க³ஹணமுகே²ன தேஸம் பஹாரகே வாதஸங்கா⁴தே ஸதிம் உபட்ட²பேத்வா. தத்த² ஸதிம் ட²பேத்வாதி தஸ்மிம் காயபதே³ஸஸ்ஸ ஸங்க⁴ட்டனவஸேன பவத்தே வாயுபிண்டே³ ஸங்க⁴ட்டனாகாரக்³க³ஹணமுகே²ன ஸதிம் உபட்ட²பேத்வா. ‘‘உஸுமவட்டிஸதி³ஸ’’ந்தி ஏதேன புரிமகஸிணஸ்ஸ விய இமஸ்ஸாபி நிமித்தஸ்ஸ ஸம்விக்³க³ஹதம் த³ஸ்ஸேதி. ‘‘நிச்சல’’ந்தி இமினா நிச்சலபா⁴வோயேவ உக்³க³ஹனிமித்ததோ இமஸ்ஸ விஸேஸோதி படிபா⁴க³னிமித்தஸ்ஸாபி உஸுமவட்டிஸதி³ஸதாவ விபா⁴விதா ஹோதி.

நீலகஸிணகதா²வண்ணனா

94. அஞ்ஜனராஜிவட்டாதி³ வண்ணதா⁴துயா வா. ததா²ரூபம் மாலாக³ச்ச²ந்தி அவிரளவிகஸிதனீலவண்ணபுப்ப²ஸஞ்ச²ன்னம் புப்ப²க³ச்ச²ம். இதரேனாதி அகதாதி⁴காரேன. கி³ரிகண்ணிகக்³க³ஹனேன நீலம் கி³ரிகண்ணிகமாஹ. கரண்ட³படலம் ஸமுக்³க³பிதா⁴னம். பத்தேஹியேவாதி நீலுப்பலாதீ³னம் கேஸரவண்டானி அபனேத்வா கேவலேஹி பத்தேஹியேவ. பூரேதப்³ப³ந்தி நீலவண்ணம் வத்த²ம் க³ஹேத்வா ப⁴ண்டி³கம் விய ப³ந்தி⁴த்வா யதா² நீலமண்ட³லம் ஹுத்வா பஞ்ஞாயதி, ததா² சங்கோடகம் வா கரண்ட³படலம் வா பூரேதப்³ப³ம். முக²வட்டியம் வா அஸ்ஸாதி அஸ்ஸ சங்கோடகஸ்ஸ, கரண்ட³படலஸ்ஸ வா முக²வட்டியம் ப³ந்தி⁴தப்³ப³ம். மணிதாலவண்டம் இந்த³னீலமணிமயம் தாலவண்டம்.

பீதகஸிணகதா²வண்ணனா

95. பீதகஸிணே மாலாக³ச்ச²ந்தி இக்கடாதி³மாலாக³ச்ச²ம். ஹரிதாலம், மனோஸிலா வா தா⁴து. பத்தங்க³புப்பே²ஹீதி பத்தங்க³னாமிகா பீதவண்ணபுப்பா² ஏகா க³ச்ச²ஜாதி, தஸ்ஸ புப்பே²ஹி. ஆஸனபூஜந்தி சேதியங்க³ணே கதம் ஆஸனபூஜம். கணிகாரபுப்பா²தி³னாதி ஆதி³-ஸத்³தே³ன ஆகுலிகிங்கிராதபுப்பா²தீ³னம் ஸங்க³ஹோ த³ட்ட²ப்³போ³.

லோஹிதகஸிணகதா²வண்ணனா

96. லோஹிதமணி லோஹிதங்க³மணிஆதி³. லோஹிததா⁴து கே³ருகஜாதிஹிங்கு³லிகாதி³.

ஓதா³தகஸிணகதா²வண்ணனா

97. ஓதா³தகஸிணே மாலாக³ச்ச²ந்தி நந்தி³யாவத்தாதி³மாலாக³ச்ச²ம். தா⁴து கக்கடிமுத்தஸேதிகாதி³.

ஆலோககஸிணகதா²வண்ணனா

98. ததா² அஸக்கோந்தேனாதி யதா² ஸூரியாலோகாதி³வஸேன ஓபா⁴ஸனிமித்துப்பாத³னம் வுத்தம், தஸ்ஸ ஓபா⁴ஸமண்ட³லஸ்ஸ ந சிரட்டி²திதாய ததா² நிமித்துப்பாத³னம் காதும் அஸக்கோந்தேன. க⁴டமுகே²ன நிக்³க³ச்ச²னகஓபா⁴ஸஸ்ஸ மஹந்தபா⁴வதோ ‘‘க⁴டமுக²ம் பித³ஹித்வா’’தி வுத்தம். பி⁴த்திமுக²ந்தி பி⁴த்திஅபி⁴முக²ம். உட்டி²தமண்ட³லஸதி³ஸந்தி பி⁴த்திஆதீ³ஸு உட்டி²தபாகதிகஆலோகமண்ட³லஸதி³ஸம். க⁴னவிப்பஸன்னம் ஆலோகபுஞ்ஜஸதி³ஸந்தி ப⁴க³வதோ ப்³யாமப்பபா⁴ விய ப³ஹலோ, விப்பஸன்னோ ச ஹுத்வா புஞ்ஜபூ⁴தோ ஆலோகோ அத்தி² சே, தம்ஸதி³ஸோதி அத்தோ².

பரிச்சி²ன்னாகாஸகஸிணகதா²வண்ணனா

99. சி²த்³த³ஸதி³ஸமேவ ஹோதீதி யேஹி பி⁴த்திபரியந்தாதீ³ஹி பரிச்சி²ன்னம், தம் சி²த்³த³ம், தம்ஸதி³ஸம், தேனவாகாரேன உக்³க³ஹனிமித்தம் உபட்டா²தீதி அத்தோ². ‘‘வட்³டி⁴யமானம்பி ந வட்³ட⁴தீ’’தி உக்³க³ஹனிமித்தஸ்ஸ அவட்³ட⁴னீயதம் த³ஸ்ஸேதும் வுத்தம். ஸப்³ப³ம்பி ஹி உக்³க³ஹனிமித்தம் வட்³டி⁴யமானம் ந வட்³ட⁴தியேவ. ஸதிபி ச வட்³டே⁴துகாமதாயம் வட்³ட⁴னா ந ஸம்ப⁴வதி பா⁴வனாய பரிது³ப்³ப³லத்தா. பா⁴வனாவஸேன ஹி நிமித்தவட்³ட⁴னா. படிபா⁴க³னிமித்தம் பன தஸ்மிம் உப்பன்னே பா⁴வனா தி²ராதி கத்வா ‘‘வட்³டி⁴யமானம் வட்³ட⁴தீ’’தி வுத்தம்.

கிஞ்சாபி பாளியம் ‘‘பத²வீகஸிணாதீ³னி ரூபஜா²னாரம்மணானி அட்டே²வ கஸிணானி ஸரூபதோ ஆக³தானி, ஓதா³தகஸிணே பன ஆலோககஸிணம், ஆகாஸகஸிணே ச பரிச்சி²ன்னாகாஸகஸிணம் அந்தோக³த⁴ம் கத்வா தே³ஸனா கதா’’தி அதி⁴ப்பாயேனாஹ ‘‘இதி கஸிணானி த³ஸப³லோ, த³ஸ யானி அவோசா’’தி. பகிண்ணககதா²பி விஞ்ஞேய்யாதி புப்³பே³ விய அஸாதா⁴ரணம் தஸ்மிம் தஸ்மிம் கஸிணே படினியதமேவ அத்த²ம் அக்³க³ஹேத்வா அஸாதா⁴ரணதோ, ஸாதா⁴ரணதோ ச தத்த² தத்த² பகிண்ணகம் விஸடம் அத்த²ம் க³ஹேத்வா பவத்தா பகிண்ணககதா²பி விஜானிதப்³பா³.

பகிண்ணககதா²வண்ணனா

100. ஆதி³பா⁴வோதி ஏத்த² ஆதி³-ஸத்³தே³ன யஸ்ஸ கஸ்ஸசி பத²வீபக்கி²யஸ்ஸ வத்து²னோ நிம்மானாதி³ம் ஸங்க³ண்ஹாதி. டா²னனிஸஜ்ஜாதி³கப்பனம் வாதி ஏத்தா²பி ‘‘ஆகாஸே வா உத³கே வா’’தி ஆனேத்வா ஸம்ப³ந்தி⁴தப்³ப³ம். பரித்தஅப்பமாணனயேனாதி நீலாதி³வண்ணம் அனாமஸித்வா பரித்தஅப்பமாணனயேனேவ. ஏவமாதீ³னீதி ஆதி³-ஸத்³தே³ன ஸரீரதோ உத³கதா⁴ரானிம்மானாதி³ம் ஸங்க³ண்ஹாதி.

யதே³வ ஸோ இச்ச²தி தஸ்ஸ ட³ஹனஸமத்த²தாதி ப³ஹூஸு கப்பாஸபிசுஸாரதா³ருஆதீ³ஸு ஏகஜ்ஜ²ம் ராஸிபூ⁴தேஸு டி²தேஸு யம் யதே³வ இச்ச²தி, தஸ்ஸ தஸ்ஸேவ ட³ஹனஸமத்த²தா. இத⁴ ஆதி³-ஸத்³தே³ன அந்த⁴காரவித⁴மனாதி³ம் ஸங்க³ண்ஹாதி.

வாயுக³தியா க³மனம் வாயுக³திக³மனம், அதிஸீக⁴க³மனம். இத⁴ ஆதி³-ஸத்³தே³ன யதி³ச்சி²ததே³ஸந்தரம் பாபுணனாதி³ம் ஸங்க³ண்ஹாதி.

ஸுவண்ணந்தி அதி⁴முச்சனா ஸுவண்ணபா⁴வாதி⁴ட்டா²னம் ஸேய்யதா²பி ஆயஸ்மா பிலிந்த³வச்சோ² (பாரா. 619-620) திணண்டு³பக³பாஸாதா³தீ³னம். வுத்தனயேனாதி ஸுவண்ணது³ப்³ப³ண்ணனயேன.

வண்ணகஸிணேஸு தத்த² தத்த² ஆதி³-ஸத்³தே³ன நீலோபா⁴ஸனிம்மானாதீ³னம் ஸங்க³ஹோ த³ட்ட²ப்³போ³. பத²வீபப்³ப³தாதீ³தி ஆதி³-ஸத்³தே³ன ஸமுத்³தா³தீ³னம் ஸங்க³ஹோ த³ட்ட²ப்³போ³.

ஸப்³பா³னேவ த³ஸபி கஸிணானி. இமம் பபே⁴த³ம் லப⁴ந்தீதி இமம் வட்³ட⁴னாதி³விஸேஸம் பாபுணந்தி. ஏகோதி ஏகச்சோ. ஸஞ்ஜானாதீதி பா⁴வனாபஞ்ஞாய ஸஞ்ஜானாதி. ஆதி³-ஸத்³தே³ன ‘‘ஆபோகஸிண’’ந்திஆதி³பாளிம் ஸங்க³ண்ஹாதி.

உபரிக³க³னதலாபி⁴முக²ம் ‘‘பத²வீகஸிணமேகோ ஸஞ்ஜானாதீ’’தி பாளிபதா³னி ஆனேத்வா ஸம்ப³ந்தி⁴தப்³ப³ம். தஞ்ச கோ² வட்³ட⁴னவஸேன. தேனாஹ ‘‘ஏகச்சோ ஹி உத்³த⁴மேவ கஸிணம் வட்³டே⁴தீ’’தி. ஹேட்டா²பூ⁴மிதலாபி⁴முக²ந்திஆதீ³ஸுபி ஏஸேவ நயோ. புப்³பே³ வட்³ட⁴னகாலே பயோஜனம் அனபேக்கி²த்வா வட்³டே⁴ந்தானம் வஸேன வுத்தத்தா இதா³னி ‘‘தேன தேன வா காரணேன ஏவம் பஸாரேதீ’’தி ஆஹ, கஸிணம் வட்³டே⁴தீதி அத்தோ². யதா² கிந்தி ஆஹ ‘‘ஆலோகமிவ தி³ப்³ப³சக்கு²னா ரூபத³ஸ்ஸனகாமோ’’தி. உத்³த⁴ஞ்சே ரூபம் த³ட்டு²காமோ உத்³த⁴ம் ஆலோகம் பஸாரேதி, அதோ⁴ சே ரூபம் த³ட்டு²காமோ அதோ⁴ ஆலோகம் பஸாரேதி, ஸமந்ததோ சே ரூபம் த³ட்டு²காமோ ஸமந்ததோ ஆலோகம் பஸாரேதி, ஏவமயம் கஸிணந்தி அத்தோ².

ஏகஸ்ஸாதி பத²வீகஸிணாதீ³ஸு ஏகேகஸ்ஸ. அஞ்ஞபா⁴வானுபக³மனத்த²ந்தி அஞ்ஞகஸிணபா⁴வானுபக³மனதீ³பனத்த²ம், ந அஞ்ஞம் பத²வீஆதி³. ந ஹி உத³கேன டி²தட்டா²னே ஸஸம்பா⁴ரபத²வீ அத்தி². அஞ்ஞோ கஸிணஸம்பே⁴தோ³தி ஆபோகஸிணாதி³னா ஸங்கரோ. ஸப்³ப³த்தா²தி ஸப்³பே³ஸு ஆபோகஸிணாதீ³ஸு ஸேஸகஸிணேஸு. ஏகதே³ஸே அட்ட²த்வா அனவஸேஸேன ப²ரணப்பமாணஸ்ஸ அக்³க³ஹணதோ ப²ரணம் அப்பமாணம். தேனேவ ஹி நேஸம் கஸிணஸமஞ்ஞா. ததா² சாஹ ‘‘தஞ்ஹீ’’திஆதி³. தத்த² சேதஸா ப²ரந்தோதி பா⁴வனாசித்தேன ஆலம்ப³னம் கரோந்தோ. பா⁴வனாசித்தஞ்ஹி கஸிணம் பரித்தம் வா விபுலம் வா ஏகக்க²ணே ஸகலமேவ மனஸி கரோதி, ந ஏகதே³ஸந்தி.

101. ஆனந்தரியகம்மஸமங்கி³னோதி பஞ்சஸு ஆனந்தரியகம்மேஸு யேன கேனசி ஸமன்னாக³தா. நியதமிச்சா²தி³ட்டி²காதி அஹேதுகதி³ட்டி² அகிரியதி³ட்டி² நத்தி²கதி³ட்டீ²தி தீஸு மிச்சா²தி³ட்டீ²ஸு யாய காயசி நியதாய மிச்சா²தி³ட்டி²யா ஸமன்னாக³தா. உப⁴தோப்³யஞ்ஜனகபண்ட³காதி உப⁴தோப்³யஞ்ஜனகா, பண்ட³கா ச. காமஞ்சேதே அஹேதுகபடிஸந்தி⁴கத்தா விபாகாவரணேன ஸமன்னாக³தா ஹோந்தி, ததா²பி திப்³ப³கிலேஸத்தா கிலேஸாவரணேன ஸமன்னாக³தா வுத்தா. அஹேதுகத்³விஹேதுகபடிஸந்தி⁴காதி அஹேதுகபடிஸந்தி⁴கா, த்³விஹேதுகபடிஸந்தி⁴கா ச. து³ஹேதுகபடிஸந்தி⁴கானம்பி ஹி அரியமக்³க³படிவேதோ⁴, ஜா²னபடிலாபோ⁴ ச நத்தி², தஸ்மா தேபி விபாகாவரணேன ஸமன்னாக³தா ஏவ.

அபச்சனீகபடிபதா³யந்தி மக்³க³ஸ்ஸ அனுலோமபடிபதா³யம் ஸச்சானுலோமிகாயம் விபஸ்ஸனாயம். அச்ச²ந்தி³காதி ‘‘கத்துகம்யதாச²ந்த³ரஹிதா’’தி ஸம்மோஹவினோத³னியம் வுத்தம், தம்பி நிப்³பா³னாதி⁴க³மத்த²மேவ கத்துகம்யதாச²ந்த³ம் ஸந்தா⁴ய வுத்தந்தி த³ட்ட²ப்³ப³ம். உத்தரகுருகாபி மனுஸ்ஸா மாராத³யோ விய அச்ச²ந்தி³கட்டா²னம் பவிட்டா² நிப்³பு³திச²ந்த³ரஹிதத்தா. து³ப்பஞ்ஞாதி ப⁴வங்க³பஞ்ஞாய பரிஹீனா. ‘‘ப⁴வங்க³பஞ்ஞாய பரிபுண்ணாயபி யஸ்ஸ ப⁴வங்க³ம் லோகுத்தரஸ்ஸ பாத³கம் ந ஹோதி, ஸோபி து³ப்பஞ்ஞோயேவா’’தி ஸம்மோஹவினோத³னியம் வுத்தம். யஸ்மிம் ஹி ப⁴வங்கே³ வத்தமானே தம்ஸந்ததியம் லோகுத்தரம் நிப்³ப³த்ததி, தம் தஸ்ஸ பாத³கம் நாம ஹோதி.

குஸலேஸு த⁴ம்மேஸூதி அனவஜ்ஜத⁴ம்மேஸு, ஸுக²விபாகத⁴ம்மேஸு வா. ஓக்கமிதுந்தி அதி⁴க³ந்தும். கஸிணேயேவாதி கஸிணகம்மட்டா²னேயேவ. ஏதேஸந்தி கம்மாவரணஸமன்னாக³தாதீ³னம். தஸ்மாதி யஸ்மா ஏதே விபாகந்தராயாத³யோ ஏவம் அத்த²ஜானிகரா, அனத்த²ஹேதுபூ⁴தா ச, தஸ்மா. திண்ணமேவ சேத்த² அந்தராயானம் க³ஹணம் இதரஸ்ஸ ஸப்படிகாரத்தா, கம்மந்தராயபக்கி²கத்தா வாதி த³ட்ட²ப்³ப³ம். ஸப்புரிஸூபனிஸ்ஸயாதீ³ஹீதி ஆதி³-ஸத்³தே³ன தஜ்ஜம் யோனிஸோமனஸிகாராதி³ம் ஸங்க³ண்ஹாதி. ஸத்³த⁴ந்தி கம்மப²லஸத்³த⁴ம், ரதனத்தயஸத்³த⁴ஞ்ச. ச²ந்த³ந்தி பா⁴வனானுயோகே³ திப்³ப³கத்துகம்யதாஸங்கா²தம் குஸலச்ச²ந்த³ம். பஞ்ஞந்தி பாரிஹாரியபஞ்ஞம். வட்³டே⁴த்வாதி யதா² பா⁴வனா இஜ்ஜ²தி, ததா² பரிப்³ரூஹேத்வா. யம் பனேத்த² அத்த²தோ ந விப⁴த்தம், தம் ஸுவிஞ்ஞேய்யத்தா, ஹேட்டா² வுத்தனயத்தா ச ந விப⁴த்தம்.

ஸேஸகஸிணனித்³தே³ஸவண்ணனா நிட்டி²தா.

இதி பஞ்சமபரிச்சே²த³வண்ணனா.