13. நேஸஜ்ஜிகங்க³கதா²வண்ணனா

36. ஸேய்யந்தி இரியாபத²லக்க²ணம் ஸேய்யம். தப்படிக்கே²பேனேவ ஹி தத³த்தா² ‘‘மஞ்சோ பி⁴ஸீ’’தி ஏவமாதி³கா (சூளவ. 321, 322) ஸேய்யா படிக்கி²த்தா ஏவ ஹோந்தி. ‘‘நேஸஜ்ஜிகோ’’தி ச ஸயனம் படிக்கி²பித்வா நிஸஜ்ஜாய ஏவ விஹரிதும் ஸீலமஸ்ஸாதி இமஸ்ஸ அத்த²ஸ்ஸ இத⁴ அதி⁴ப்பேதத்தா ஸேய்யா ஏவேத்த² படியோகி³னீ, ந இதரே ததா² அனிட்ட²த்தா, அஸம்ப⁴வதோ ச. கோஸஜ்ஜபக்கி²யோ ஹி இரியாபதோ² இத⁴ படியோகி³பா⁴வேன இச்சி²தோ, ந இதரே. ந ச ஸக்கா டா²னக³மனேஹி வினா நிஸஜ்ஜாய ஏவ யாபேதும் ததா² பவத்தேதுந்தி ஸேய்யாவேத்த² படியோகி³னீ. தேனாஹ ‘‘தேன பனா’’திஆதி³. சங்கமிதப்³ப³ம் ந ‘‘நேஸஜ்ஜிகோ அஹ’’ந்தி ஸப்³ப³ரத்திம் நிஸீதி³தப்³ப³ம். இரியாபத²ந்தரானுக்³க³ஹிதோ ஹி காயோ மனஸிகாரக்க²மோ ஹோதி.

சத்தாரோ பாதா³, பிட்டி²அபஸ்ஸயோ சாதி இமேஹி பஞ்சஹி அங்கே³ஹி பஞ்சங்கோ³. சதூஹி அட்டனீஹி, பிட்டி²அபஸ்ஸயேன ச பஞ்சங்கோ³தி அபரே. உபோ⁴ஸு பஸ்ஸேஸு பிட்டி²பஸ்ஸே ச யதா²ஸுக²ம் அபஸ்ஸாய விஹரதோ நேஸஜ்ஜிகஸ்ஸ ‘‘அனேஸஜ்ஜிகதோ கோ விஸேஸோ’’தி கா³ஹம் நிவாரேதும் அப⁴யத்தே²ரோ நித³ஸ்ஸிதோ ‘‘தே²ரோ அனாகா³மீ ஹுத்வா பரினிப்³பா³யீ’’தி.

உபச்சே²தீ³யதி ஏதேனாதி உபச்சே²த³னந்தி வினிப³ந்து⁴பச்சே²த³ஸ்ஸ ஸாத⁴கதமபா⁴வோ த³ட்ட²ப்³போ³. ஸப்³ப³கம்மட்டா²னானுயோக³ஸப்பாயதா அலீனானுத்³த⁴ச்சபக்கி²கத்தா நிஸஜ்ஜாய. ததோ ஏவ பாஸாதி³கஇரியாபத²தா. வீரியாரம்பா⁴னுகூலதா வீரியஸமதாயோஜனஸ்ஸ அனுச்ச²விகதா. ததோ ஏவ ஸம்மாபடிபத்தியா அனுப்³ரூஹனதா. பணிதா⁴யாதி ட²பேத்வா. தனுந்தி உபரிமகாயம். விகம்பேதீதி சாலேதி, இச்சா²விகா⁴தம் கரோதீதி அதி⁴ப்பாயோ. வதந்தி து⁴தங்க³ம்.

இதி நேஸஜ்ஜிகங்க³கதா²வண்ணனா.

து⁴தங்க³பகிண்ணககதா²வண்ணனா

37. ஸேக்க²புது²ஜ்ஜனானம் வஸேன ஸியா குஸலானி, கீ²ணாஸவானம் வஸேன ஸியா அப்³யாகதானி. தத்த² ஸேக்க²புது²ஜ்ஜனா படிபத்திபூரணத்த²ம், கீ²ணாஸவா பா²ஸுவிஹாரத்த²ம் து⁴தங்கா³னி பரிஹரந்தி. அகுஸலம்பி து⁴தங்க³ந்தி அகுஸலசித்தேனாபி து⁴தங்க³ஸேவனா அத்தீ²தி அதி⁴ப்பாயோ. தம் ந யுத்தம், யேன அகுஸலசித்தேன பப்³ப³ஜிதஸ்ஸ ஆரஞ்ஞிகத்தம், தம் து⁴தங்க³ம் நாம ந ஹோதி. கஸ்மா? லக்க²ணாபா⁴வதோ. யம் ஹித³ம் கிலேஸானம் து⁴னனதோ து⁴தஸ்ஸ புக்³க³லஸ்ஸ, ஞாணஸ்ஸ, சேதனாய வா அங்க³த்தம், ந தம் அகுஸலத⁴ம்மேஸு ஸம்ப⁴வதி. தஸ்மா அரஞ்ஞவாஸாதி³மத்தேன ஆரஞ்ஞிகாத³யோ தாவ ஹோந்து, ஆரஞ்ஞிகங்கா³தீ³னி பன ந ஹோந்தீதி இமமத்த²ம் த³ஸ்ஸேதும் ‘‘ந மய’’ந்திஆதி³ வுத்தம். தத்த² இமானீதி து⁴தங்கா³னி. வுத்தம் ஹேட்டா² வசனத்த²னித்³தே³ஸே. ந ச அகுஸலேன கோசி து⁴தோ நாம ஹோதி, கிலேஸானம் து⁴னனட்டே²னாதி அதி⁴ப்பாயோ. யஸ்ஸ பி⁴க்கு²னோ ஏதானி ஸமாதா³னானி அங்கா³னி, ஏதேன பட²மேனாபி அத்த²விகப்பேன ‘‘நத்தி² அகுஸலம் து⁴தங்க³’’ந்தி த³ஸ்ஸேதி. ந ச அகுஸலம் கிஞ்சி து⁴னாதீதி அகுஸலம் கிஞ்சி பாபம் ந ச து⁴னாதி ஏவ அப்படிபக்க²தோ. யேஸம் ஸமாதா³னானம் தம் அகுஸலம் ஞாணம் விய அங்க³ந்தி கத்வா தானி து⁴தங்கா³னீதி வுச்சேய்யும். இமினா து³தியேனாபி அத்த²விகப்பேன ‘‘நத்தி² அகுஸலம் து⁴தங்க³’’ந்தி த³ஸ்ஸேதி. நாபி அகுஸலந்திஆதி³ ததியஅத்த²விகப்பவஸேன யோஜனா. தஸ்மாதிஆதி³ வுத்தஸ்ஸேவத்த²ஸ்ஸ நிக³மனம்.

யேஸந்தி அப⁴யகி³ரிவாஸிகே ஸந்தா⁴யாஹ. தே ஹி து⁴தங்க³ம் நாம பஞ்ஞத்தீதி வத³ந்தி. ததா² ஸதி தஸ்ஸ பரமத்த²தோ அவிஜ்ஜமானத்தா கிலேஸானம் து⁴னனட்டோ²பி ந ஸியா, ஸமாதா³தப்³ப³தா சாதி தேஸம் வசனம் பாளியா விருஜ்ஜ²தீதி த³ஸ்ஸேதும் ‘‘குஸலத்திகவினிமுத்த’’ந்திஆதி³ வுத்தம். தஸ்மாதி யஸ்மா பஞ்ஞத்திபக்கே² ஏதே தோ³ஸா து³ன்னிவாரா, தஸ்மா தம் தேஸம் வசனம் ந க³ஹேதப்³ப³ம், வுத்தனயோ சேதனாபக்கோ²யேவ க³ஹேதப்³போ³தி அத்தோ². யஸ்மா ஏதே து⁴தகு³ணா குஸலத்திகே பட²மததியபத³ஸங்க³ஹிதா, தஸ்மா ஸியா ஸுகா²ய வேத³னாய ஸம்பயுத்தா, ஸியா அது³க்க²மஸுகா²ய வேத³னாய ஸம்பயுத்தா, ஸியா விபாகத⁴ம்மத⁴ம்மா, ஸியா நேவவிபாகனவிபாகத⁴ம்மத⁴ம்மா, ஸியா அனுபாதி³ன்னுபாதா³னியா, ஸியா அஸம்கிலிட்ட²ஸம்கிலேஸிகாதி ஏவம் ஸேஸதிகது³கபதே³ஹிபி நேஸம் யதா²ரஹம் ஸங்க³ஹோ விபா⁴வேதப்³போ³.

காமம் ஸப்³போ³பி அரஹா து⁴தகிலேஸோ, இத⁴ பன து⁴தங்க³ஸேவனாமுகே²ன கிலேஸே விது⁴னித்வா டி²தோ கீ²ணாஸவோ ‘‘து⁴தகிலேஸோ புக்³க³லோ’’தி அதி⁴ப்பேதோ. ததா² ஸப்³போ³பி அரியமக்³கோ³ நிப்பரியாயேன கிலேஸது⁴னனோ த⁴ம்மோ, விஸேஸதோ அக்³க³மக்³கோ³. பரியாயேன பன விபஸ்ஸனாஞாணாதி³. ஹேட்டி²மபரிச்சே²தே³ன து⁴தங்க³சேதனாஸம்பயுத்தஞாணம் த³ட்ட²ப்³ப³ம். ஏவம் து⁴தம் த³ஸ்ஸேத்வா து⁴தவாதே³ த³ஸ்ஸேதப்³பே³ யஸ்மா து⁴தவாத³பே⁴தே³ன து⁴தோ விய து⁴தபே⁴தே³ன து⁴தவாதோ³பி து³விதோ⁴, தஸ்மா தேஸம், தது³ப⁴யபடிக்கே²பஸ்ஸ ச வஸேன சதுக்கமேத்த² ஸம்ப⁴வதீதி தம் த³ஸ்ஸேதும் ‘‘அத்தி² து⁴தோ’’திஆதி³ வுத்தம்.

தயித³ந்தி நிபாதோ, தஸ்ஸ ‘‘ஸோ அய’’ந்தி அத்தோ². து⁴தத⁴ம்மா நாமாதி து⁴தங்க³ஸேவனாய படிபக்க²பூ⁴தானம் பாபத⁴ம்மானம் து⁴னனவஸேன பவத்தியா ‘‘து⁴தோ’’தி லத்³த⁴னாமாய து⁴தங்க³சேதனாய உபகாரகா த⁴ம்மாதி கத்வா து⁴தத⁴ம்மா நாம. அஸம்பத்தஸம்பத்தேஸு பச்சயேஸு அலுப்³ப⁴னாகாரேன பவத்தனதோ அப்பிச்ச²தா ஸந்துட்டி²தா ச அத்த²தோ அலோபோ⁴. பச்சயகே³தா⁴தி³ஹேதுகானம் லோலதாதீ³னம் ஸம்கிலேஸானம் ஸம்மதே³வ லிக²னதோ சே²த³னதோ க³ணஸங்க³ணிகாதி³பே⁴த³தோ ஸம்ஸக்³க³தோ சித்தஸ்ஸ விவேசனதோ ஸல்லேக²தா பவிவேகதா ச அலோபோ⁴ அமோஹோதி இமேஸு த்³வீஸு த⁴ம்மேஸு அனுபதந்தி தத³ந்தோக³தா⁴ தப்பரியாபன்னா ஹோந்தி, தது³ப⁴யஸ்ஸேவ பவத்திவிஸேஸபா⁴வதோ. இமேஹி குஸலத⁴ம்மேஹி அத்தீ² இத³மத்தீ², யேன ஞாணேன பப்³ப³ஜிதேன நாம பம்ஸுகூலிகங்கா³தீ³ஸு பதிட்டி²தேன ப⁴விதப்³ப³ந்தி யதா²னுஸிட்ட²ம் து⁴தகு³ணே ஸமாதி³யதி சேவ பரிஹரதி ச, தம் ஞாணம் இத³மத்தி²தா. தேனாஹ ‘‘இத³மத்தி²தா ஞாணமேவா’’தி. படிக்கே²பவத்தூ²ஸூதி க³ஹபதிசீவராதீ³ஸு தேஹி தேஹி து⁴தங்கே³ஹி படிக்கி²பிதப்³ப³வத்தூ²ஸு. லோப⁴ந்தி தண்ஹம். தேஸ்வேவ வாதி படிக்கே²பவத்தூ²ஸு ஏவ. ஆதீ³னவபடிச்சா²த³கந்தி ஆரக்க²து³க்க²பராதீ⁴னவுத்திசோரப⁴யாதி³ஆதீ³னவபடிச்சா²த³கம். அனுஞ்ஞாதானந்தி ஸத்தா²ரா நிச்ச²ந்த³ராக³பரிபோ⁴க³வஸேன அனுஞ்ஞாதானம் ஸுக²ஸம்ப²ஸ்ஸஅத்த²ரணபாவுரணாதீ³னம். படிஸேவனமுகே²னாதி படிஸேவனத்³வாரேன, தேன லேஸேனாதி அத்தோ². அதிஸல்லேக²முகே²னாதி அதிவிய ஸல்லேக²படிபத்திமுகே²ன, உக்கட்ட²ஸ்ஸ வத்தனகானம்பி படிக்கி²பனவஸேனாதி அத்தோ².

ஸுகு²மகரணஸன்னிஸ்ஸயோ ராகோ³ து³க்கா²ய படிபத்தியா பதிட்ட²ம் ந லப⁴தீதி ஆஹ ‘‘து³க்கா²படிபத³ஞ்ச நிஸ்ஸாய ராகோ³ வூபஸம்மதீ’’தி. ஸல்லேகோ² நாம ஸம்பஜானஸ்ஸ ஹோதி, ஸதிஸம்பஜஞ்ஞே மோஹோ அபதிட்டோ²வ அப்பமாத³ஸம்ப⁴வதோதி வுத்தம் ‘‘ஸல்லேக²ம் நிஸ்ஸாய அப்பமத்தஸ்ஸ மோஹோ பஹீயதீ’’தி. ஏத்தா²தி ஏதேஸு து⁴தங்கே³ஸு. தத்தா²தி அரஞ்ஞருக்க²மூலேஸு.

ஸீஸங்கா³னீதி ஸீஸபூ⁴தானி அங்கா³னி, பரேஸம்பி கேஸஞ்சி நானந்தரிகதாய, ஸுகரதாய ச ஸங்க³ண்ஹனதோ உத்தமங்கா³னீதி அத்தோ². அஸம்பி⁴ன்னங்கா³னீதி கேஹிசி ஸம்பே⁴த³ரஹிதானி, விஸும்யேவ அங்கா³னீதி வுத்தம் ஹோதி. கம்மட்டா²னம் வட்³ட⁴தி ராக³சரிதஸ்ஸ மோஹசரிதஸ்ஸ தோ³ஸசரிதஸ்ஸாபி, தம் ஏகச்சம் து⁴தங்க³ம் ஸேவந்தஸ்ஸாதி அதி⁴ப்பாயோ. ஹாயதி கம்மட்டா²னம் ஸுகுமாரபா⁴வேனலூக²படிபத்திம் அஸஹந்தஸ்ஸ. வட்³ட⁴தேவ மஹாபுரிஸஜாதிகஸ்ஸாதி அதி⁴ப்பாயோ. ந வட்³ட⁴தி கம்மட்டா²னம் உபனிஸ்ஸயரஹிதஸ்ஸ. ஏகமேவ ஹி து⁴தங்க³ம் யதா² கிலேஸது⁴னனட்டே²ன, ஏவம் சேதனாஸபா⁴வத்தா. தேனாஹ ‘‘ஸமாதா³னசேதனா’’தி.

தேரஸாபி து⁴தங்கா³னி ஸமாதா³ய பரிஹரந்தானம் புக்³க³லானம் வஸேன ‘‘த்³வாசத்தாலீஸ ஹோந்தீ’’தி வத்வா பி⁴க்கூ²னம் தேரஸன்னம்பி பரிஹரணஸ்ஸ ஏகஜ்ஜ²ம்யேவ ஸம்ப⁴வம் த³ஸ்ஸேதும் ‘‘ஸசே ஹீ’’திஆதி³ வுத்தம். தத்த² ‘‘ஏகப்பஹாரேன ஸப்³ப³து⁴தங்கா³னி பரிபு⁴ஞ்ஜிதும் ஸக்கோதீ’’தி வுத்தம். கத²ம் அப்³போ⁴காஸே விஹரந்தஸ்ஸ ருக்க²மூலிகங்க³ம்? ‘‘ச²ன்னம் படிக்கி²பாமி, ருக்க²மூலிகங்க³ம் ஸமாதி³யாமீ’’தி (விஸுத்³தி⁴. 1.32) வசனதோ ச²ன்னே அருணம் உட்டா²பிதமத்தே து⁴தங்க³ம் பி⁴ஜ்ஜதி, ந அப்³போ⁴காஸே, தஸ்மா பே⁴த³ஹேதுனோ அபா⁴வேன தம்பி அரோக³மேவ. ததா² ஸேனாஸனலோலுப்பஸ்ஸ அபா⁴வேன யதா²ஸந்த²திகங்க³ந்தி த³ட்ட²ப்³ப³ம். ஆரஞ்ஞிகங்க³ம் க³ணம்ஹா ஓஹீயனஸிக்கா²பதே³ன (பாசி. 691-692) படிக்கி²த்தம், க²லுபச்சா²ப⁴த்திகங்க³ம் அனதிரித்தபோ⁴ஜனஸிக்கா²பதே³ன (பாசி. 238-240). பவாரிதாய ஹி பி⁴க்கு²னியா அதிரித்தம் கத்வா பு⁴ஞ்ஜிதும் ந லப்³ப⁴தி. கப்பியே ச வத்து²ஸ்மிம் லோலதாபஹானாய து⁴தங்க³ஸமாதா³னம், ந அகப்பியே, ஸிக்கா²பதே³னேவ படிக்கி²த்தத்தா. அட்டே²வ ஹோந்தி பி⁴க்கு²னியா ஸம்கச்சிகசீவராதீ³ஹி ஸத்³தி⁴ம் பஞ்சபி திசீவரஸங்க²மேவ க³ச்ச²ந்தீதி கத்வா. யதா²வுத்தேஸூதி பி⁴க்கூ²னம் வுத்தேஸு தேரஸஸு திசீவராதி⁴ட்டா²னவினயகம்மாபா⁴வதோ ட²பேத்வா தேசீவரிகங்க³ம் த்³வாத³ஸ ஸாமணேரானம். ஸத்தாதி பி⁴க்கு²னீனம் வுத்தேஸு அட்ட²ஸு ஏகம் பஹாய ஸத்த திசீவராதி⁴ட்டா²னவினயகம்மாபா⁴வதோ. ‘‘ட²பேத்வா தேசீவரிகங்க³’’ந்தி ஹி இமம் அனுவத்தமானமேவ கத்வா ‘‘ஸத்த ஸிக்க²மானஸாமணேரீன’’ந்தி வுத்தம். பதிரூபானீதி உபாஸகபா⁴வஸ்ஸ அனுச்ச²விகானி.

து⁴தங்க³னித்³தே³ஸவண்ணனா நிட்டி²தா.

இதி து³தியபரிச்சே²த³வண்ணனா.