6. அஸுப⁴கம்மட்டா²னனித்³தே³ஸோ

உத்³து⁴மாதகாதி³பத³த்த²வண்ணனா

102. கஸிணானந்தரமுத்³தி³ட்டே²ஸு பன உத்³து⁴மாதகம், வினீலகம், விபுப்³ப³கம், விச்சி²த்³த³கம், விக்கா²யிதகம், விக்கி²த்தகம், ஹதவிக்கி²த்தகம், லோஹிதகம், புளவகம், அட்டி²கந்தி த³ஸஸு அவிஞ்ஞாணகாஸுபே⁴ஸு ப⁴ஸ்தா விய வாயுனா உத்³த⁴ம் ஜீவிதபரியாதா³னா யதா²னுக்கமம் ஸமுக்³க³தேன ஸூனபா⁴வேன உத்³து⁴மாதத்தா உத்³து⁴மாதம், உத்³து⁴மாதமேவ உத்³து⁴மாதகம். படிக்கூலத்தா வா குச்சி²தம் உத்³து⁴மாதந்தி உத்³து⁴மாதகம். ததா²ரூபஸ்ஸ ச²வஸரீரஸ்ஸேதம் அதி⁴வசனம்.

வினீலம் வுச்சதி விபரிபி⁴ன்னனீலவண்ணம், வினீலமேவ வினீலகம். படிக்கூலத்தா வா குச்சி²தம் வினீலந்தி வினீலகம். மம்ஸுஸ்ஸத³ட்டா²னேஸு ரத்தவண்ணஸ்ஸ புப்³ப³ஸன்னிசயட்டா²னேஸு ஸேதவண்ணஸ்ஸ யேபு⁴ய்யேன ச நீலவண்ணஸ்ஸ நீலட்டா²னே நீலஸாடகபாருதஸ்ஸேவ ச²வஸரீரஸ்ஸேதமதி⁴வசனம்.

பரிபி⁴ன்னட்டா²னேஸு விஸ்ஸந்த³மானம் புப்³ப³ம் விபுப்³ப³ம், விபுப்³ப³மேவ விபுப்³ப³கம். படிக்கூலத்தா வா குச்சி²தம் விபுப்³ப³ந்தி விபுப்³ப³கம். ததா²ரூபஸ்ஸ ச²வஸரீரஸ்ஸேதமதி⁴வசனம்.

விச்சி²த்³த³ம் வுச்சதி த்³விதா⁴ சி²ந்த³னேன அபதா⁴ரிதம், விச்சி²த்³த³மேவ விச்சி²த்³த³கம். படிக்கூலத்தா வா குச்சி²தம் விச்சி²த்³த³ந்தி விச்சி²த்³த³கம். வேமஜ்ஜே² சி²ன்னஸ்ஸ ச²வஸரீரஸ்ஸேதமதி⁴வசனம்.

இதோ ச ஏத்தோ ச விவிதா⁴காரேன ஸோணஸிங்கா³லாதீ³ஹி கா²தி³தந்தி விக்கா²யிதம், விக்கா²யிதமேவ விக்கா²யிதகம். படிக்கூலத்தா வா குச்சி²தம் விக்கா²யிதந்தி விக்கா²யிதகம். ததா²ரூபஸ்ஸ ச²வஸரீரஸ்ஸேதமதி⁴வசனம்.

விவித⁴ம் கி²த்தம் விக்கி²த்தம், விக்கி²த்தமேவ விக்கி²த்தகம். படிக்கூலத்தா வா குச்சி²தம் விக்கி²த்தந்தி விக்கி²த்தகம். அஞ்ஞேன ஹத்த²ம் அஞ்ஞேன பாத³ம் அஞ்ஞேன ஸீஸந்தி ஏவம் ததோ ததோ கி²த்தஸ்ஸ ச²வஸரீரஸ்ஸேதமதி⁴வசனம்.

ஹதஞ்ச தம் புரிமனயேனேவ விக்கி²த்தகஞ்சாதி ஹதவிக்கி²த்தகம். காகபதா³காரேன அங்க³பச்சங்கே³ஸு ஸத்தே²ன ஹனித்வா வுத்தனயேன விக்கி²த்தஸ்ஸ ச²வஸரீரஸ்ஸேதமதி⁴வசனம்.

லோஹிதம் கிரதி விக்கி²பதி இதோ சிதோ ச பக்³க⁴ரதீதி லோஹிதகம். பக்³க⁴ரிதலோஹிதமக்கி²தஸ்ஸ ச²வஸரீரஸ்ஸேதமதி⁴வசனம்.

புளவா வுச்சந்தி கிமயோ, புளவே கிரதீதி புளவகம். கிமிபரிபுண்ணஸ்ஸ ச²வஸரீரஸ்ஸேதமதி⁴வசனம்.

அட்டி²யேவ அட்டி²கம். படிக்கூலத்தா வா குச்சி²தம் அட்டீ²தி அட்டி²கம். அட்டி²ஸங்க²லிகாயபி ஏகட்டி²கஸ்ஸபேதமதி⁴வசனம். இமானி ச பன உத்³து⁴மாதகாதீ³னி நிஸ்ஸாய உப்பன்னனிமித்தானம்பி நிமித்தேஸு படிலத்³த⁴ஜ்ஜா²னானம்பேதானேவ நாமானி.

உத்³து⁴மாதககம்மட்டா²னம்

103. தத்த² உத்³து⁴மாதகஸரீரே உத்³து⁴மாதகனிமித்தம் உப்பாதே³த்வா உத்³து⁴மாதகஸங்கா²தம் ஜா²னம் பா⁴வேதுகாமேன யோகி³னா பத²வீகஸிணே வுத்தனயேனேவ வுத்தப்பகாரம் ஆசரியம் உபஸங்கமித்வா கம்மட்டா²னம் உக்³க³ஹேதப்³ப³ம். தேனஸ்ஸ கம்மட்டா²னம் கதே²ந்தேன அஸுப⁴னிமித்தத்தா²ய க³மனவிதா⁴னம், ஸமந்தா நிமித்துபலக்க²ணம், ஏகாத³ஸவிதே⁴ன நிமித்தக்³கா³ஹோ, க³தாக³தமக்³க³பச்சவேக்க²ணந்தி ஏவம் அப்பனாவிதா⁴னபரியோஸானம் ஸப்³ப³ம் கதே²தப்³ப³ம். தேனாபி ஸப்³ப³ம் ஸாது⁴கம் உக்³க³ஹேத்வா புப்³பே³ வுத்தப்பகாரம் ஸேனாஸனம் உபக³ந்த்வா உத்³து⁴மாதகனிமித்தம் பரியேஸந்தேன விஹாதப்³ப³ம்.

104. ஏவம் விஹரந்தேன ச அஸுகஸ்மிம் நாம கா³மத்³வாரே வா அடவிமுகே² வா பந்தே² வா பப்³ப³தபாதே³ வா ருக்க²மூலே வா ஸுஸானே வா உத்³து⁴மாதகஸரீரம் நிக்கி²த்தந்தி கதே²ந்தானம் வசனம் ஸுத்வாபி ந தாவதே³வ அதித்தே²ன பக்க²ந்த³ந்தேன விய க³ந்தப்³ப³ம். கஸ்மா? அஸுப⁴ம் ஹி நாமேதம் வாளமிகா³தி⁴ட்டி²தம்பி அமனுஸ்ஸாதி⁴ட்டி²தம்பி ஹோதி. தத்ரஸ்ஸ ஜீவிதந்தராயோபி ஸியா. க³மனமக்³கோ³ வா பனேத்த² கா³மத்³வாரேன வா நஹானதித்தே²ன வா கேதா³ரகோடியா வா ஹோதி. தத்த² விஸபா⁴க³ரூபம் ஆபாத²மாக³ச்ச²தி, ததே³வ வா ஸரீரம் விஸபா⁴க³ம் ஹோதி. புரிஸஸ்ஸ ஹி இத்தி²ஸரீரம் இத்தி²யா ச புரிஸஸரீரம் விஸபா⁴க³ம், ததே³தம் அது⁴னாமதம் ஸுப⁴தோபி உபட்டா²தி, தேனஸ்ஸ ப்³ரஹ்மசரியந்தராயோபி ஸியா. ஸசே பன ‘‘நயித³ம் மாதி³ஸஸ்ஸ பா⁴ரிய’’ந்தி அத்தானம் தக்கயதி, ஏவம் தக்கயமானேன க³ந்தப்³ப³ம்.

105. க³ச்ச²ந்தேன ச ஸங்க⁴த்தே²ரஸ்ஸ வா அஞ்ஞதரஸ்ஸ வா அபி⁴ஞ்ஞாதஸ்ஸ பி⁴க்கு²னோ கதே²த்வா க³ந்தப்³ப³ம். கஸ்மா? ஸசே ஹிஸ்ஸ ஸுஸானே அமனுஸ்ஸஸீஹப்³யக்³கா⁴தீ³னம் ரூபஸத்³தா³தி³அனிட்டா²ரம்மணாபி⁴பூ⁴தஸ்ஸ அங்க³பச்சங்கா³னி வா பவேதே⁴ந்தி, பு⁴த்தம் வா ந பரிஸண்டா²தி, அஞ்ஞோ வா ஆபா³தோ⁴ ஹோதி. அத²ஸ்ஸ ஸோ விஹாரே பத்தசீவரம் ஸுரக்கி²தம் கரிஸ்ஸதி. த³ஹரே வா ஸாமணேரே வா பஹிணித்வா தம் பி⁴க்கு²ம் படிஜக்³கி³ஸ்ஸதி. அபிச ஸுஸானம் நாம நிராஸங்கட்டா²னந்தி மஞ்ஞமானா கதகம்மாபி அகதகம்மாபி சோரா ஸமோஸரந்தி. தே மனுஸ்ஸேஹி அனுப³த்³தா⁴ பி⁴க்கு²ஸ்ஸ ஸமீபே ப⁴ண்ட³கம் ச²ட்³டே³த்வாபி பலாயந்தி. மனுஸ்ஸா ‘‘ஸஹோட்³ட⁴ம் சோரம் அத்³த³ஸாமா’’தி பி⁴க்கு²ம் க³ஹேத்வா விஹேடே²ந்தி. அத²ஸ்ஸ ஸோ ‘‘மா இமம் விஹேட²யித்த², மமாயம் கதே²த்வா இமினா நாம கம்மேன க³தோ’’தி தே மனுஸ்ஸே ஸஞ்ஞாபேத்வா ஸோத்தி²பா⁴வம் கரிஸ்ஸதி. அயம் ஆனிஸம்ஸோ கதே²த்வா க³மனே. தஸ்மா வுத்தப்பகாரஸ்ஸ பி⁴க்கு²னோ கதே²த்வா அஸுப⁴னிமித்தத³ஸ்ஸனே ஸஞ்ஜாதாபி⁴லாஸேன யதா²னாம க²த்தியோ அபி⁴ஸேகட்டா²னம், யஜமானோ யஞ்ஞஸாலம், அத⁴னோ வா பன நிதி⁴ட்டா²னம் பீதிஸோமனஸ்ஸஜாதோ க³ச்ச²தி, ஏவம் பீதிஸோமனஸ்ஸம் உப்பாதே³த்வா அட்ட²கதா²ஸு வுத்தேன விதி⁴னா க³ந்தப்³ப³ம். வுத்தஞ்ஹேதம் –

‘‘உத்³து⁴மாதகம் அஸுப⁴னிமித்தம் உக்³க³ண்ஹந்தோ ஏகோ அது³தியோ க³ச்ச²தி உபட்டி²தாய ஸதியா அஸம்முட்டா²ய அந்தோக³தேஹி இந்த்³ரியேஹி அப³ஹிக³தேன மானஸேன க³தாக³தமக்³க³ம் பச்சவேக்க²மானோ. யஸ்மிம் பதே³ஸே உத்³து⁴மாதகம் அஸுப⁴னிமித்தம் நிக்கி²த்தம் ஹோதி, தஸ்மிம் பதே³ஸே பாஸாணம் வா வம்மிகம் வா ருக்க²ம் வா க³ச்ச²ம் வா லதம் வா ஸனிமித்தம் கரோதி, ஸாரம்மணம் கரோதி. ஸனிமித்தம் கத்வா ஸாரம்மணம் கத்வா உத்³து⁴மாதகம் அஸுப⁴னிமித்தம் ஸபா⁴வபா⁴வதோ உபலக்கே²தி, வண்ணதோபி லிங்க³தோபி ஸண்டா²னதோபி தி³ஸதோபி ஓகாஸதோபி பரிச்சே²த³தோபி ஸந்தி⁴தோ விவரதோ நின்னதோ த²லதோ ஸமந்ததோ. ஸோ தம் நிமித்தம் ஸுக்³க³ஹிதம் கரோதி, ஸூபதா⁴ரிதம் உபதா⁴ரேதி, ஸுவவத்தி²தம் வவத்த²பேதி. ஸோ தம் நிமித்தம் ஸுக்³க³ஹிதம் கத்வா ஸூபதா⁴ரிதம் உபதா⁴ரேத்வா ஸுவவத்தி²தம் வவத்த²பேத்வா ஏகோ அது³தியோ க³ச்ச²தி உபட்டி²தாய ஸதியா அஸம்முட்டா²ய அந்தோக³தேஹி இந்த்³ரியேஹி அப³ஹிக³தேன மானஸேன க³தாக³தமக்³க³ம் பச்சவேக்க²மானோ. ஸோ சங்கமந்தோபி தப்³பா⁴கி³யஞ்ஞேவ சங்கமம் அதி⁴ட்டா²தி. நிஸீத³ந்தோபி தப்³பா⁴கி³யஞ்ஞேவ ஆஸனம் பஞ்ஞபேதி.

‘‘ஸமந்தா நிமித்துபலக்க²ணா கிமத்தி²யா கிமானிஸம்ஸாதி? ஸமந்தா நிமித்துபலக்க²ணா அஸம்மோஹத்தா² அஸம்மோஹானிஸம்ஸா. ஏகாத³ஸவிதே⁴ன நிமித்தக்³கா³ஹோ கிமத்தி²யோ கிமானிஸம்ஸோதி? ஏகாத³ஸவிதே⁴ன நிமித்தக்³கா³ஹோ உபனிப³ந்த⁴னத்தோ² உபனிப³ந்த⁴னானிஸம்ஸோ. க³தாக³தமக்³க³பச்சவேக்க²ணா கிமத்தி²யா கிமானிஸம்ஸாதி? க³தாக³தமக்³க³பச்சவேக்க²ணா வீதி²ஸம்படிபாத³னத்தா² வீதி²ஸம்படிபாத³னானிஸம்ஸா.

‘‘ஸோ ஆனிஸம்ஸத³ஸ்ஸாவீ ரதனஸஞ்ஞீ ஹுத்வா சித்தீகாரம் உபட்ட²பேத்வா ஸம்பியாயமானோ தஸ்மிம் ஆரம்மணே சித்தம் உபனிப³ந்த⁴தி ‘அத்³தா⁴ இமாய படிபதா³ய ஜராமரணம்ஹா பரிமுச்சிஸ்ஸாமீ’தி. ஸோ விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி. தஸ்ஸாதி⁴க³தம் ஹோதி ரூபாவசரம் பட²மம் ஜா²னம் தி³ப்³போ³ ச விஹாரோ பா⁴வனாமயஞ்ச புஞ்ஞகிரியவத்து²’’ந்தி.

106. தஸ்மா யோ சித்தஸஞ்ஞத்தத்தா²ய ஸிவதி²கத³ஸ்ஸனம் க³ச்ச²தி, ஸோ க⁴ண்டி³ம் பஹரித்வா க³ணம் ஸன்னிபாதேத்வாபி க³ச்ச²து. கம்மட்டா²னஸீஸேன பன க³ச்ச²ந்தேன ஏககேன அது³தியேன மூலகம்மட்டா²னம் அவிஸ்ஸஜ்ஜேத்வா தம் மனஸிகரோந்தேனேவ ஸுஸானே ஸோணாதி³பரிஸ்ஸயவினோத³னத்த²ம் கத்தரத³ண்ட³ம் வா யட்டி²ம் வா க³ஹேத்வா, ஸூபட்டி²த பா⁴வஸம்பாத³னேன அஸம்முட்ட²ம் ஸதிம் கத்வா, மனச்ச²ட்டா²னஞ்ச இந்த்³ரியானம் அந்தோக³தபா⁴வஸம்பாத³னதோ அப³ஹிக³தமனேன ஹுத்வா க³ந்தப்³ப³ம்.

விஹாரதோ நிக்க²மந்தேனேவ அஸுகதி³ஸாய அஸுகத்³வாரேன நிக்க²ந்தோம்ஹீதி த்³வாரம் ஸல்லக்கே²தப்³ப³ம். ததோ யேன மக்³கே³ன க³ச்ச²தி, ஸோ மக்³கோ³ வவத்த²பேதப்³போ³, அயம் மக்³கோ³ பாசினதி³ஸாபி⁴முகோ² வா க³ச்ச²தி, பச்சி²மஉத்தரத³க்கி²ணதி³ஸாபி⁴முகோ² வா விதி³ஸாபி⁴முகோ²வாதி. இமஸ்மிம் பன டா²னே வாமதோ க³ச்ச²தி, இமஸ்மிம் டா²னே த³க்கி²ணதோ, இமஸ்மிம் சஸ்ஸ டா²னே பாஸாணோ, இமஸ்மிம் வம்மிகோ, இமஸ்மிம் ருக்கோ², இமஸ்மிம் க³ச்சோ², இமஸ்மிம் லதாதி. ஏவம் க³மனமக்³க³ம் வவத்த²பேந்தேன நிமித்தட்டா²னம் க³ந்தப்³ப³ம். நோ ச கோ² படிவாதம். படிவாதம் க³ச்ச²ந்தஸ்ஸ ஹி குணபக³ந்தோ⁴ கா⁴னம் பஹரித்வா மத்த²லுங்க³ம் வா ஸங்கோ²பே⁴ய்ய, ஆஹாரம் வா ச²ட்³டா³பேய்ய, விப்படிஸாரம் வா ஜனேய்ய ‘‘ஈதி³ஸம் நாம குணபட்டா²னம் ஆக³தோம்ஹீ’’தி. தஸ்மா படிவாதம் வஜ்ஜேத்வா அனுவாதம் க³ந்தப்³ப³ம். ஸசே அனுவாதமக்³கே³ன ந ஸக்கா ஹோதி க³ந்தும், அந்தரா பப்³ப³தோ வா பபாதோ வா பாஸாணோ வா வதி வா கண்டகட்டா²னம் வா உத³கம் வா சிக்க²ல்லம் வா ஹோதி, சீவரகண்ணேன நாஸம் பித³ஹித்வா க³ந்தப்³ப³ம். இத³மஸ்ஸ க³மனவத்தம்.

107. ஏவம் க³தேன பன ந தாவ அஸுப⁴னிமித்தம் ஓலோகேதப்³ப³ம். தி³ஸா வவத்த²பேதப்³பா³. ஏகஸ்மிம் ஹி தி³ஸாபா⁴கே³ டி²தஸ்ஸ ஆரம்மணஞ்ச ந விபூ⁴தம் ஹுத்வா கா²யதி, சித்தஞ்ச ந கம்மனியம் ஹோதி. தஸ்மா தம் வஜ்ஜேத்வா யத்த² டி²தஸ்ஸ ஆரம்மணஞ்ச விபூ⁴தம் ஹுத்வா கா²யதி, சித்தஞ்ச கம்மனியம் ஹோதி, தத்த² டா²தப்³ப³ம். படிவாதானுவாதஞ்ச பஹாதப்³ப³ம். படிவாதே டி²தஸ்ஸ ஹி குணபக³ந்தே⁴ன உப்³பா³ள்ஹஸ்ஸ சித்தம் விதா⁴வதி. அனுவாதே டி²தஸ்ஸ ஸசே தத்த² அதி⁴வத்தா² அமனுஸ்ஸா ஹோந்தி, தே குஜ்ஜி²த்வா அனத்த²ம் கரோந்தி. தஸ்மா ஈஸகம் உக்கம்ம நாதிஅனுவாதே டா²தப்³ப³ம். ஏவம் திட்ட²மானேனாபி நாதிதூ³ரே நாச்சாஸன்னே நானுபாத³ம் நானுஸீஸம் டா²தப்³ப³ம். அதிதூ³ரே டி²தஸ்ஸ ஹி ஆரம்மணம் அவிபூ⁴தம் ஹோதி. அச்சாஸன்னே ப⁴யமுப்பஜ்ஜதி. அனுபாத³ம் வா அனுஸீஸம் வா டி²தஸ்ஸ ஸப்³ப³ம் அஸுப⁴ம் ஸமம் ந பஞ்ஞாயதி. தஸ்மா நாதிதூ³ரே நாச்சாஸன்னே ஓலோகேந்தஸ்ஸ பா²ஸுகட்டா²னே ஸரீரவேமஜ்ஜ²பா⁴கே³ டா²தப்³ப³ம்.

108. ஏவம் டி²தேன ‘‘தஸ்மிம் பதே³ஸே பாஸாணம் வா…பே… லதம் வா ஸனிமித்தம் கரோதீ’’தி ஏவம் வுத்தானி ஸமந்தா நிமித்தானி உபலக்கே²தப்³பா³னி. தத்ரித³ம் உபலக்க²ணவிதா⁴னம், ஸசே தஸ்ஸ நிமித்தஸ்ஸ ஸமந்தா சக்கு²பதே² பாஸாணோ ஹோதி, ஸோ ‘‘அயம் பாஸாணோ உச்சோ வா நீசோ வா கு²த்³த³கோ வா மஹந்தோ வா தம்போ³ வா காளோ வா ஸேதோ வா தீ³கோ⁴ வா பரிமண்ட³லோ வா’’தி வவத்த²பேதப்³போ³. ததோ ‘‘இமஸ்மிம் நாம ஓகாஸே அயம் பாஸாணோ இத³ம் அஸுப⁴னிமித்தம், இத³ம் அஸுப⁴னிமித்தம் அயம் பாஸாணோ’’தி ஸல்லக்கே²தப்³ப³ம். ஸசே வம்மிகோ ஹோதி, ஸோபி ‘‘உச்சோ வா நீசோ வா கு²த்³த³கோ வா மஹந்தோ வா தம்போ³ வா காளோ வா ஸேதோ வா தீ³கோ⁴ வா பரிமண்ட³லோ வா’’தி வவத்த²பேதப்³போ³. ததோ ‘‘இமஸ்மிம் நாம ஓகாஸே அயம் வம்மிகோ இத³ம் அஸுப⁴னிமித்த’’ந்தி ஸல்லக்கே²தப்³ப³ம். ஸசே ருக்கோ² ஹோதி, ஸோபி ‘‘அஸ்ஸத்தோ² வா நிக்³ரோதோ⁴ வா கச்ச²கோ வா கபீதனோ வா உச்சோ வா நீசோ வா கு²த்³த³கோ வா மஹந்தோ வா தம்போ³ வா காளோ வா ஸேதோ வா’’தி வவத்த²பேதப்³போ³. ததோ ‘‘இமஸ்மிம் நாம ஓகாஸே அயம் ருக்கோ² இத³ம் அஸுப⁴னிமித்த’’ந்தி ஸல்லக்கே²தப்³ப³ம். ஸசே க³ச்சோ² ஹோதி, ஸோபி ‘‘ஸிந்தி³வா கரமந்தோ³ வா கணவீரோ வா குரண்ட³கோ வா உச்சோ வா நீசோ வா கு²த்³த³கோ வா மஹந்தோ வா’’தி வவத்த²பேதப்³போ³. ததோ ‘‘இமஸ்மிம் நாம ஓகாஸே அயம் க³ச்சோ² இத³ம் அஸுப⁴னிமித்த’’ந்தி ஸல்லக்கே²தப்³ப³ம். ஸசே லதா ஹோதி, ஸாபி ‘‘லாபு³ வா கும்ப⁴ண்டீ³ வா ஸாமா வா காளவல்லி வா பூதிலதா வா’’தி வவத்த²பேதப்³பா³. ததோ ‘‘இமஸ்மிம் நாம ஓகாஸே அயம் லதா இத³ம் அஸுப⁴னிமித்தம், இத³ம் அஸுப⁴னிமித்தம் அயம் லதா’’தி ஸல்லக்கே²தப்³ப³ம்.

109. யம் பன வுத்தம் ஸனிமித்தம் கரோதி ஸாரம்மணம் கரோதீதி, தம் இதே⁴வ அந்தோக³த⁴ம். புனப்புனம் வவத்த²பேந்தோ ஹி ஸனிமித்தம் கரோதி நாம. அயம் பாஸாணோ இத³ம் அஸுப⁴னிமித்தம், இத³ம் அஸுப⁴னிமித்தம் அயம் பாஸாணோதி ஏவம் த்³வே த்³வே ஸமாஸேத்வா ஸமாஸேத்வா வவத்த²பேந்தோ ஸாரம்மணம் கரோதி நாம.

ஏவம் ஸனிமித்தம் ஸாரம்மணஞ்ச கத்வா பன ஸபா⁴வபா⁴வதோ வவத்த²பேதீதி வுத்தத்தா ய்வாஸ்ஸ ஸபா⁴வபா⁴வோ அனஞ்ஞஸாதா⁴ரணோ அத்தனியோ உத்³து⁴மாதகபா⁴வோ, தேன மனஸிகாதப்³ப³ம். வணிதம் உத்³து⁴மாதகந்தி ஏவம் ஸபா⁴வேன ஸரஸேன வவத்த²பேதப்³ப³ந்தி அத்தோ².

110. ஏவம் வவத்த²பேத்வா வண்ணதோபி லிங்க³தோபி ஸண்டா²னதோபி தி³ஸதோபி ஓகாஸதோபி பரிச்சே²த³தோபீதி ச²ப்³பி³தே⁴ன நிமித்தம் க³ஹேதப்³ப³ம். கத²ம்? தேன ஹி யோகி³னா இத³ம் ஸரீரம் காளஸ்ஸ வா ஓதா³தஸ்ஸ வா மங்கு³ரச்ச²வினோ வாதி வண்ணதோ வவத்த²பேதப்³ப³ம். லிங்க³தோ பன இத்தி²லிங்க³ம் வா புரிஸலிங்க³ம் வாதி அவவத்த²பேத்வா பட²மவயே வா மஜ்ஜி²மவயே வா பச்சி²மவயே வா டி²தஸ்ஸ இத³ம் ஸரீரந்தி வவத்த²பேதப்³ப³ம். ஸண்டா²னதோ உத்³து⁴மாதகஸ்ஸ ஸண்டா²னவஸேனேவ இத³மஸ்ஸ ஸீஸஸண்டா²னம், இத³ம் கீ³வாஸண்டா²னம், இத³ம் ஹத்த²ஸண்டா²னம், இத³ம் உத³ரஸண்டா²னம், இத³ம் நாபி⁴ஸண்டா²னம், இத³ம் கடிஸண்டா²னம், இத³ம் ஊருஸண்டா²னம், இத³ம் ஜங்கா⁴ஸண்டா²னம், இத³ம் பாத³ஸண்டா²னந்தி வவத்த²பேதப்³ப³ம். தி³ஸதோ பன இமஸ்மிம் ஸரீரே த்³வே தி³ஸா நாபி⁴யா அதோ⁴ ஹேட்டி²மதி³ஸா உத்³த⁴ம் உபரிமதி³ஸாதி வவத்த²பேதப்³ப³ம். அத² வா அஹம் இமிஸ்ஸா தி³ஸாய டி²தோ அஸுப⁴னிமித்தம் இமிஸ்ஸாதி வவத்த²பேதப்³ப³ம். ஓகாஸதோ பன இமஸ்மிம் நாம ஓகாஸே ஹத்தா², இமஸ்மிம் பாதா³, இமஸ்மிம் ஸீஸம், இமஸ்மிம் மஜ்ஜி²மகாயோ டி²தோதி வவத்த²பேதப்³ப³ம். அத² வா அஹம் இமஸ்மிம் ஓகாஸே டி²தோ அஸுப⁴னிமித்தம் இமஸ்மிந்தி வவத்த²பேதப்³ப³ம். பரிச்சே²த³தோ இத³ம் ஸரீரம் அதோ⁴ பாத³தலேன உபரி கேஸமத்த²கேன திரியம் தசேன பரிச்சி²ன்னம், யதா²பரிச்சி²ன்னே ச டா²னே த்³வத்திம்ஸகுணபப⁴ரிதமேவாதி வவத்த²பேதப்³ப³ம். அத² வா அயமஸ்ஸ ஹத்த²பரிச்சே²தோ³, அயம் பாத³பரிச்சே²தோ³, அயம் ஸீஸபரிச்சே²தோ³, அயம் மஜ்ஜி²மகாயபரிச்சே²தோ³தி வவத்த²பேதப்³ப³ம். யத்தகம் வா பன டா²னம் க³ண்ஹதி, தத்தகமேவ இத³ம் ஈதி³ஸம் உத்³து⁴மாதகந்தி பரிச்சி²ந்தி³தப்³ப³ம். புரிஸஸ்ஸ பன இத்தி²ஸரீரம் இத்தி²யா வா புரிஸஸரீரம் ந வட்டதி. விஸபா⁴கே³ ஸரீரே ஆரம்மணம் ந உபட்டா²தி, விப்ப²ந்த³னஸ்ஸேவ பச்சயோ ஹோதி. ‘‘உக்³கா⁴டிதாபி ஹி இத்தீ² புரிஸஸ்ஸ சித்தம் பரியாதா³ய திட்ட²தீ’’தி (அ. நி. 5.55) மஜ்ஜி²மட்ட²கதா²யம் வுத்தம். தஸ்மா ஸபா⁴க³ஸரீரேயேவ ஏவம் ச²ப்³பி³தே⁴ன நிமித்தம் க³ண்ஹிதப்³ப³ம்.

111. யோ பன புரிமபு³த்³தா⁴னம் ஸந்திகே ஆஸேவிதகம்மட்டா²னோ பரிஹதது⁴தங்கோ³ பரிமத்³தி³தமஹாபூ⁴தோ பரிக்³க³ஹிதஸங்கா²ரோ வவத்தா²பிதனாமரூபோ உக்³கா⁴டிதஸத்தஸஞ்ஞோ கதஸமணத⁴ம்மோ வாஸிதவாஸனோ பா⁴விதபா⁴வனோ ஸபீ³ஜோ ஞாணுத்தரோ அப்பகிலேஸோ குலபுத்தோ, தஸ்ஸ ஓலோகிதோலோகிதட்டா²னேயேவ படிபா⁴க³னிமித்தம் உபட்டா²தி. நோ சே ஏவம் உபட்டா²தி, அதே²வம் ச²ப்³பி³தே⁴ன நிமித்தம் க³ண்ஹதோ உபட்டா²தி. யஸ்ஸ பன ஏவம்பி ந உபட்டா²தி, தேன ஸந்தி⁴தோ விவரதோ நின்னதோ த²லதோ ஸமந்ததோதி புனபி பஞ்சவிதே⁴ன நிமித்தம் க³ஹேதப்³ப³ம்.

112. தத்த² ஸந்தி⁴தோதி அஸீதிஸதஸந்தி⁴தோ. உத்³து⁴மாதகே பன கத²ம் அஸீதிஸதஸந்த⁴யோ வவத்த²பேஸ்ஸதி. தஸ்மானேன தயோ த³க்கி²ணஹத்த²ஸந்தீ⁴, தயோ வாமஹத்த²ஸந்தீ⁴, தயோ த³க்கி²ணபாத³ஸந்தீ⁴, தயோ வாமபாத³ஸந்தீ⁴, ஏகோ கீ³வஸந்தி⁴, ஏகோ கடிஸந்தீ⁴தி ஏவம் சுத்³த³ஸமஹாஸந்தி⁴வஸேன ஸந்தி⁴தோ வவத்த²பேதப்³ப³ம். விவரதோதி விவரம் நாம ஹத்த²ந்தரம் பாத³ந்தரம் உத³ரந்தரம் கண்ணந்தரந்தி ஏவம் விவரதோ வவத்த²பேதப்³ப³ம். அக்கீ²னம்பி நிம்மீலிதபா⁴வோ வா உம்மீலிதபா⁴வோ வா முக²ஸ்ஸ ச பிஹிதபா⁴வோ வா விவடபா⁴வோ வா வவத்த²பேதப்³போ³. நின்னதோதி யம் ஸரீரே நின்னட்டா²னம் அக்கி²கூபோ வா அந்தோமுக²ம் வா க³லவாடகோ வா, தம் வவத்த²பேதப்³ப³ம். அத² வா அஹம் நின்னே டி²தோ ஸரீரம் உன்னதேதி வவத்த²பேதப்³ப³ம். த²லதோதி யம் ஸரீரே உன்னதட்டா²னம் ஜண்ணுகம் வா உரோ வா நலாடம் வா, தம் வவத்த²பேதப்³ப³ம். அத² வா அஹம் த²லே டி²தோ ஸரீரம் நின்னேதி வவத்த²பேதப்³ப³ம். ஸமந்ததோதி ஸப்³ப³ம் ஸரீரம் ஸமந்ததோ வவத்த²பேதப்³ப³ம். ஸகலஸரீரே ஞாணம் சாரேத்வா யம் டா²னம் விபூ⁴தம் ஹுத்வா உபட்டா²தி, தத்த² ‘‘உத்³து⁴மாதகம் உத்³து⁴மாதக’’ந்தி சித்தம் ட²பேதப்³ப³ம். ஸசே ஏவம்பி ந உபட்டா²தி, உத³ரபரியோஸானம் அதிரேகம் உத்³து⁴மாதகம் ஹோதி, தத்த² ‘‘உத்³து⁴மாதகம் உத்³து⁴மாதக’’ந்தி சித்தம் ட²பேதப்³ப³ம்.

113. இதா³னி ‘‘ஸோ தம் நிமித்தம் ஸுக்³க³ஹிதம் கரோதீ’’திஆதீ³ஸு அயம் வினிச்ச²யகதா² –

தேன யோகி³னா தஸ்மிம் ஸரீரே யதா²வுத்தனிமித்தக்³கா³ஹவஸேன ஸுட்டு² நிமித்தம் க³ண்ஹிதப்³ப³ம். ஸதிம் ஸூபட்டி²தம் கத்வா ஆவஜ்ஜிதப்³ப³ம். ஏவம் புனப்புனம் கரோந்தேன ஸாது⁴கம் உபதா⁴ரேதப்³ப³ஞ்சேவ வவத்த²பேதப்³ப³ஞ்ச. ஸரீரதோ நாதிதூ³ரே நாச்சாஸன்னே பதே³ஸே டி²தேன வா நிஸின்னேன வா சக்கு²ம் உம்மீலேத்வா ஓலோகேத்வா நிமித்தம் க³ண்ஹிதப்³ப³ம். ‘‘உத்³து⁴மாதகபடிக்கூலம் உத்³து⁴மாதகபடிக்கூல’’ந்தி ஸதக்க²த்தும் ஸஹஸ்ஸக்க²த்தும் உம்மீலேத்வா ஓலோகேதப்³ப³ம், நிம்மீலேத்வா ஆவஜ்ஜிதப்³ப³ம். ஏவம் புனப்புனம் கரோந்தஸ்ஸ உக்³க³ஹனிமித்தம் ஸுக்³க³ஹிதம் ஹோதி. கதா³ ஸுக்³க³ஹிதம் ஹோதி? யதா³ உம்மீலேத்வா ஓலோகேந்தஸ்ஸ நிம்மீலேத்வா ஆவஜ்ஜேந்தஸ்ஸ ச ஏகஸதி³ஸம் ஹுத்வா ஆபாத²மாக³ச்ச²தி, ததா³ ஸுக்³க³ஹிதம் நாம ஹோதி.

ஸோ தம் நிமித்தம் ஏவம் ஸுக்³க³ஹிதம் கத்வா ஸூபதா⁴ரிதம் உபதா⁴ரேத்வா ஸுவவத்தி²தம் வவத்த²பேத்வா ஸசே தத்தே²வ பா⁴வனாபரியோஸானம் பத்தும் ந ஸக்கோதி, அதா²னேன ஆக³மனகாலே வுத்தனயேனேவ ஏககேன அது³தியேன ததே³வ கம்மட்டா²னம் மனஸிகரோந்தேன ஸூபட்டி²தம் ஸதிம் கத்வா அந்தோக³தேஹி இந்த்³ரியேஹி அப³ஹிக³தேன மானஸேன அத்தனோ ஸேனாஸனமேவ க³ந்தப்³ப³ம்.

ஸுஸானா நிக்க²மந்தேனேவ ச ஆக³மனமக்³கோ³ வவத்த²பேதப்³போ³, யேன மக்³கே³ன நிக்க²ந்தோஸ்மி, அயம் மக்³கோ³ பாசீனதி³ஸாபி⁴முகோ² வா க³ச்ச²தி, பச்சி²மஉத்தரத³க்கி²ணதி³ஸாபி⁴முகோ² வா க³ச்ச²தி, விதி³ஸாபி⁴முகோ² வா க³ச்ச²தி. இமஸ்மிம் பன டா²னே வாமதோ க³ச்ச²தி, இமஸ்மிம் த³க்கி²ணதோ, இமஸ்மிம் சஸ்ஸ டா²னே பாஸாணோ, இமஸ்மிம் வம்மிகோ, இமஸ்மிம் ருக்கோ², இமஸ்மிம் க³ச்சோ², இமஸ்மிம் லதாதி ஏவம் ஆக³மனமக்³க³ம் வவத்த²பேத்வா ஆக³தேன சங்கமந்தேனாபி தப்³பா⁴கி³யோவ சங்கமோ அதி⁴ட்டா²தப்³போ³, அஸுப⁴னிமித்ததி³ஸாபி⁴முகே² பூ⁴மிப்பதே³ஸே சங்கமிதப்³ப³ந்தி அத்தோ². நிஸீத³ந்தேன ஆஸனம்பி தப்³பா⁴கி³யமேவ பஞ்ஞபேதப்³ப³ம். ஸசே பன தஸ்ஸம் தி³ஸாயம் ஸோப்³போ⁴ வா பபாதோ வா ருக்கோ² வா வதி வா கலலம் வா ஹோதி, ந ஸக்கா தம்தி³ஸாபி⁴முகே² பூ⁴மிப்பதே³ஸே சங்கமிதும், ஆஸனம்பி அனோகாஸத்தா ந ஸக்கா பஞ்ஞபேதும். தம் தி³ஸம் அனபலோகேந்தேனாபி ஓகாஸானுரூபே டா²னே சங்கமிதப்³ப³ஞ்சேவ நிஸீதி³தப்³ப³ஞ்ச. சித்தம் பன தம்தி³ஸாபி⁴முக²ம்யேவ காதப்³ப³ம்.

114. இதா³னி ‘‘ஸமந்தா நிமித்துபலக்க²ணா கிமத்தி²யா’’திஆதி³பஞ்ஹானம் ‘‘அஸம்மோஹத்தா²’’திஆதி³விஸ்ஸஜ்ஜனே அயம் அதி⁴ப்பாயோ. யஸ்ஸ ஹி அவேலாயம் உத்³து⁴மாதகனிமித்தட்டா²னம் க³ந்த்வா ஸமந்தா நிமித்துபலக்க²ணம் கத்வா நிமித்தக்³க³ஹணத்த²ம் சக்கு²ம் உம்மீலேத்வா ஓலோகேந்தஸ்ஸேவ தம் மதஸரீரம் உட்ட²ஹித்வா டி²தம் விய அஜ்ஜோ²த்த²ரமானம் விய அனுப³ந்த⁴மானம் விய ச ஹுத்வா உபட்டா²தி, ஸோ தம் பீ³ப⁴ச்ச²ம் பே⁴ரவாரம்மணம் தி³ஸ்வா விக்கி²த்தசித்தோ உம்மத்தகோ விய ஹோதி, ப⁴யம் ச²ம்பி⁴தத்தம் லோமஹம்ஸம் பாபுணாதி. பாளியம் ஹி விப⁴த்தஅட்ட²திம்ஸாரம்மணேஸு அஞ்ஞம் ஏவரூபம் பே⁴ரவாரம்மணம் நாம நத்தி². இமஸ்மிம் ஹி கம்மட்டா²னே ஜா²னவிப்³ப⁴ந்தகோ நாம ஹோதி. கஸ்மா? அதிபே⁴ரவத்தா கம்மட்டா²னஸ்ஸ. தஸ்மா தேன யோகி³னா ஸந்த²ம்பே⁴த்வா ஸதிம் ஸூபட்டி²தம் கத்வா மதஸரீரம் உட்ட²ஹித்வா அனுப³ந்த⁴னகம் நாம நத்தி². ஸசே ஹி ஸோ ‘‘ஏதஸ்ஸ ஸமீபே டி²தோ பாஸாணோ வா லதா வா ஆக³ச்சே²ய்ய, ஸரீரம்பி ஆக³ச்சே²ய்ய. யதா² பன ஸோ பாஸாணோ வா லதா வா நாக³ச்ச²தி, ஏவம் ஸரீரம்பி நாக³ச்ச²தி. அயம் பன துய்ஹம் உபட்டா²னாகாரோ ஸஞ்ஞஜோ ஸஞ்ஞாஸம்ப⁴வோ, கம்மட்டா²னம் தே அஜ்ஜ உபட்டி²தம், மா பா⁴யி பி⁴க்கூ²’’தி தாஸம் வினோதே³த்வா ஹாஸம் உப்பாதே³த்வா தஸ்மிம் நிமித்தே சித்தம் ஸஞ்சராபேதப்³ப³ம். ஏவம் விஸேஸமதி⁴க³ச்ச²தி. இத³மேதம் ஸந்தா⁴ய வுத்தம் ‘‘ஸமந்தா நிமித்துபலக்க²ணா அஸம்மோஹத்தா²’’தி.

ஏகாத³ஸவிதே⁴ன பன நிமித்தக்³கா³ஹம் ஸம்பாதே³ந்தோ கம்மட்டா²னம் உபனிப³ந்த⁴தி. தஸ்ஸ ஹி சக்கூ²னி உம்மீலேத்வா ஓலோகனபச்சயா உக்³க³ஹனிமித்தம் உப்பஜ்ஜதி. தஸ்மிம் மானஸம் சாரேந்தஸ்ஸ படிபா⁴க³னிமித்தம் உப்பஜ்ஜதி. தத்த² மானஸம் சாரேந்தோ அப்பனம் பாபுணாதி. அப்பனாயம் ட²த்வா விபஸ்ஸனம் வட்³டே⁴ந்தோ அரஹத்தம் ஸச்சி²கரோதி. தேன வுத்தம் ‘‘ஏகாத³ஸவிதே⁴ன நிமித்தக்³கா³ஹோ உபனிப³ந்த⁴னத்தோ²’’தி.

115. க³தாக³தமக்³க³பச்சவேக்க²ணா வீதி²ஸம்படிபாத³னத்தா²தி ஏத்த² பன யா க³தமக்³க³ஸ்ஸ ச ஆக³தமக்³க³ஸ்ஸ ச பச்சவேக்க²ணா வுத்தா, ஸா கம்மட்டா²னவீதி²யா ஸம்படிபாத³னத்தா²தி அத்தோ². ஸசே ஹி இமம் பி⁴க்கு²ம் கம்மட்டா²னம் க³ஹேத்வா ஆக³ச்ச²ந்தம் அந்தராமக்³கே³ கேசி அஜ்ஜ, ப⁴ந்தே, கதிமீதி தி³வஸம் வா புச்ச²ந்தி, பஞ்ஹம் வா புச்ச²ந்தி, படிஸந்தா²ரம் வா கரோந்தி, அஹம் கம்மட்டா²னிகோதி துண்ஹீபூ⁴தேன க³ந்தும் ந வட்டதி. தி³வஸோ கதே²தப்³போ³, பஞ்ஹோ விஸ்ஸஜ்ஜேதப்³போ³. ஸசே ந ஜானாதி, ந ஜானாமீதி வத்தப்³ப³ம். த⁴ம்மிகோ படிஸந்தா²ரோ காதப்³போ³. தஸ்ஸேவம் கரோந்தஸ்ஸ உக்³க³ஹிதம் தருணனிமித்தம் நஸ்ஸதி. தஸ்மிம் நஸ்ஸந்தேபி தி³வஸம் புட்டே²ன கதே²தப்³ப³மேவ. பஞ்ஹம் அஜானந்தேன ந ஜானாமீதி வத்தப்³ப³ம். ஜானந்தேன ஏகதே³ஸேன கதே²தும்பி வட்டதி, படிஸந்தா²ரோபி காதப்³போ³. ஆக³ந்துகம் பன பி⁴க்கு²ம் தி³ஸ்வா ஆக³ந்துகபடிஸந்தா²ரோ காதப்³போ³வ. அவஸேஸானிபி சேதியங்க³ணவத்தபோ³தி⁴யங்க³ணவத்தஉபோஸதா²கா³ரவத்தபோ⁴ஜனஸாலாஜந்தாக⁴ரஆசரியுபஜ்ஜா²யஆக³ந்துகக³மிகவத்தாதீ³னி ஸப்³பா³னி க²ந்த⁴கவத்தானி பூரேதப்³பா³னேவ. தஸ்ஸ தானி பூரேந்தஸ்ஸாபி தம் தருணனிமித்தம் நஸ்ஸதி, புன க³ந்த்வா நிமித்தம் க³ண்ஹிஸ்ஸாமீதி க³ந்துகாமஸ்ஸாபி அமனுஸ்ஸேஹி வா வாளமிகே³ஹி வா அதி⁴ட்டி²தத்தா ஸுஸானம்பி க³ந்தும் ந ஸக்கா ஹோதி, நிமித்தம் வா அந்தரதா⁴யதி. உத்³து⁴மாதகம் ஹி ஏகமேவ வா த்³வே வா தி³வஸே ட²த்வா வினீலகாதி³பா⁴வம் க³ச்ச²தி. ஸப்³ப³கம்மட்டா²னேஸு ஏதேன ஸமம் து³ல்லப⁴ம் கம்மட்டா²னம் நாம நத்தி². தஸ்மா ஏவம் நட்டே² நிமித்தே தேன பி⁴க்கு²னா ரத்திட்டா²னே வா தி³வாடா²னே வா நிஸீதி³த்வா அஹம் இமினா நாம த்³வாரேன விஹாரா நிக்க²மித்வா அஸுகதி³ஸாபி⁴முக²ம் மக்³க³ம் படிபஜ்ஜித்வா அஸுகஸ்மிம் நாம டா²னே வாமம் க³ண்ஹி, அஸுகஸ்மிம் த³க்கி²ணம். தஸ்ஸ அஸுகஸ்மிம் டா²னே பாஸாணோ, அஸுகஸ்மிம் வம்மிகருக்க²க³ச்ச²லதானமஞ்ஞதரம். ஸோஹம் தேன மக்³கே³ன க³ந்த்வா அஸுகஸ்மிம் நாம டா²னே அஸுப⁴ம் அத்³த³ஸம். தத்த² அஸுகதி³ஸாபி⁴முகோ² ட²த்வா ஏவஞ்சேவஞ்ச ஸமந்தா நிமித்தானி ஸல்லக்கே²த்வா ஏவம் அஸுப⁴னிமித்தம் உக்³க³ஹேத்வா அஸுகதி³ஸாய ஸுஸானதோ நிக்க²மித்வா ஏவரூபேன நாம மக்³கே³ன இத³ஞ்சித³ஞ்ச கரோந்தோ ஆக³ந்த்வா இத⁴ நிஸின்னோதி ஏவம் யாவ பல்லங்கம் ஆபு⁴ஜித்வா நிஸின்னட்டா²னம், தாவ க³தாக³தமக்³கோ³ பச்சவேக்கி²தப்³போ³. தஸ்ஸேவம் பச்சவேக்க²தோ தம் நிமித்தம் பாகடம் ஹோதி, புரதோ நிக்கி²த்தம் விய உபட்டா²தி. கம்மட்டா²னம் புரிமாகாரேனேவ வீதி²ம் படிபஜ்ஜதி. தேன வுத்தம் ‘‘க³தாக³தமக்³க³பச்சவேக்க²ணா வீதி²ஸம்படிபாத³னத்தா²’’தி.

116. இதா³னி ஆனிஸம்ஸத³ஸ்ஸாவீ ரதனஸஞ்ஞீ ஹுத்வா சித்தீகாரம் உபட்ட²பேத்வா ஸம்பியாயமானோ தஸ்மிம் ஆரம்மணே சித்தம் உபனிப³ந்த⁴தீதி ஏத்த² உத்³து⁴மாதகபடிக்கூலே மானஸம் சாரேத்வா ஜா²னம் நிப்³ப³த்தேத்வா ஜா²னபத³ட்டா²னம் விபஸ்ஸனம் வட்³டே⁴ந்தோ ‘‘அத்³தா⁴ இமாய படிபதா³ய ஜராமரணம்ஹா பரிமுச்சிஸ்ஸாமீ’’தி ஏவம் ஆனிஸம்ஸத³ஸ்ஸாவினா ப⁴விதப்³ப³ம்.

யதா² பன து³க்³க³தோ புரிஸோ மஹக்³க⁴ம் மணிரதனம் லபி⁴த்வா து³ல்லப⁴ம் வத மே லத்³த⁴ந்தி தஸ்மிம் ரதனஸஞ்ஞீ ஹுத்வா கா³ரவம் ஜனேத்வா விபுலேன பேமேன ஸம்பியாயமானோ தம் ரக்கே²ய்ய, ஏவமேவ ‘‘து³ல்லப⁴ம் மே இத³ம் கம்மட்டா²னம் லத்³த⁴ம் து³க்³க³தஸ்ஸ மஹக்³க⁴மணிரதனஸதி³ஸம். சதுதா⁴துகம்மட்டா²னிகோ ஹி அத்தனோ சத்தாரோ மஹாபூ⁴தே பரிக்³க³ண்ஹாதி, ஆனாபானகம்மட்டா²னிகோ அத்தனோ நாஸிகவாதம் பரிக்³க³ண்ஹாதி, கஸிணகம்மட்டா²னிகோ கஸிணம் கத்வா யதா²ஸுக²ம் பா⁴வேதி, ஏவம் இதரானி கம்மட்டா²னானி ஸுலபா⁴னி. ‘இத³ம் பன ஏகமேவ வா த்³வே வா தி³வஸே திட்ட²தி, ததோ பரம் வினீலகாதி³பா⁴வம் பாபுணாதீ’தி நத்தி² இதோ து³ல்லப⁴தர’’ந்தி தஸ்மிம் ரதனஸஞ்ஞினா ஹுத்வா சித்தீகாரம் உபட்ட²பேத்வா ஸம்பியாயமானேன தம் நிமித்தம் ரக்கி²தப்³ப³ம். ரத்திட்டா²னே ச தி³வாடா²னே ச ‘‘உத்³து⁴மாதகபடிக்கூலம் உத்³து⁴மாதகபடிக்கூல’’ந்தி தத்த² புனப்புனம் சித்தம் உபனிப³ந்தி⁴தப்³ப³ம். புனப்புனம் தம் நிமித்தம் ஆவஜ்ஜிதப்³ப³ம், மனஸிகாதப்³ப³ம். தக்காஹதம் விதக்காஹதம் காதப்³ப³ம்.

117. தஸ்ஸேவம் கரோதோ படிபா⁴க³னிமித்தம் உப்பஜ்ஜதி. தத்ரித³ம் நிமித்தத்³வயஸ்ஸ நானாகரணம், உக்³க³ஹனிமித்தம் விரூபம் பீ³ப⁴ச்ச²ம் பே⁴ரவத³ஸ்ஸனம் ஹுத்வா உபட்டா²தி. படிபா⁴க³னிமித்தம் பன யாவத³த்த²ம் பு⁴ஞ்ஜித்வா நிபன்னோ தூ²லங்க³பச்சங்க³புரிஸோ விய. தஸ்ஸ படிபா⁴க³னிமித்தபடிலாப⁴ஸமகாலமேவ ப³ஹித்³தா⁴ காமானம் அமனஸிகாரா விக்க²ம்ப⁴னவஸேன காமச்ச²ந்தோ³ பஹீயதி. அனுனயப்பஹானேனேவ சஸ்ஸ லோஹிதப்பஹானேன புப்³போ³ விய ப்³யாபாதோ³பி பஹீயதி. ததா² ஆரத்³த⁴வீரியதாய தி²னமித்³த⁴ம், அவிப்படிஸாரகரஸந்தத⁴ம்மானுயோக³வஸேன உத்³த⁴ச்சகுக்குச்சம், அதி⁴க³தவிஸேஸஸ்ஸ பச்சக்க²தாய படிபத்திதே³ஸகே ஸத்த²ரி படிபத்தியம் படிபத்திப²லே ச விசிகிச்சா² பஹீயதீதி பஞ்ச நீவரணானி பஹீயந்தி. தஸ்மிஞ்ஞேவ ச நிமித்தே சேதஸோ அபி⁴னிரோபனலக்க²ணோ விதக்கோ, நிமித்தானுமஜ்ஜனகிச்சம் ஸாத⁴யமானோ விசாரோ, படிலத்³த⁴விஸேஸாதி⁴க³மபச்சயா பீதி, பீதிமனஸ்ஸ பஸ்ஸத்³தி⁴ஸம்ப⁴வதோ பஸ்ஸத்³தி⁴, தன்னிமித்தம் ஸுக²ம், ஸுகி²தஸ்ஸ சித்தஸமாதி⁴ஸம்ப⁴வதோ ஸுக²னிமித்தா ஏகக்³க³தா சாதி ஜா²னங்கா³னி பாதுப⁴வந்தி. ஏவமஸ்ஸ பட²மஜ்ஜா²னபடிபி³ம்ப³பூ⁴தம் உபசாரஜ்ஜா²னம்பி தங்க²ணஞ்ஞேவ நிப்³ப³த்ததி. இதோ பரம் யாவ பட²மஜ்ஜா²னஸ்ஸ அப்பனா சேவ வஸிப்பத்தி ச, தாவ ஸப்³ப³ம் பத²வீகஸிணே வுத்தனயேனேவ வேதி³தப்³ப³ம்.

வினீலகாதி³கம்மட்டா²னானி

118. இதோ பரேஸு பன வினீலகாதீ³ஸுபி யம் தம் ‘‘உத்³து⁴மாதகம் அஸுப⁴னிமித்தம் உக்³க³ண்ஹந்தோ ஏகோ அது³தியோ க³ச்ச²தி உபட்டி²தாய ஸதியா’’திஆதி³னா நயேன க³மனம் ஆதி³ம் கத்வா லக்க²ணம் வுத்தம், தம் ஸப்³ப³ம் ‘‘வினீலகம் அஸுப⁴னிமித்தம் உக்³க³ண்ஹந்தோ, விபுப்³ப³கம் அஸுப⁴னிமித்தம் உக்³க³ண்ஹந்தோ’’தி ஏவம் தஸ்ஸ தஸ்ஸ வஸேன தத்த² தத்த² உத்³து⁴மாதகபத³மத்தம் பரிவத்தேத்வா வுத்தனயேனேவ ஸவினிச்ச²யாதி⁴ப்பாயம் வேதி³தப்³ப³ம்.

அயம் பன விஸேஸோ – வினீலகே ‘‘வினீலகபடிக்கூலம் வினீலகபடிக்கூல’’ந்தி மனஸிகாரோ பவத்தேதப்³போ³. உக்³க³ஹனிமித்தஞ்சேத்த² கப³ரகப³ரவண்ணம் ஹுத்வா உபட்டா²தி. படிபா⁴க³னிமித்தம் பன உஸ்ஸத³வஸேன உபட்டா²தி.

விபுப்³ப³கே ‘‘விபுப்³ப³கபடிக்கூலம் விபுப்³ப³கபடிக்கூல’’ந்தி மனஸிகாரோ பவத்தேதப்³போ³. உக்³க³ஹனிமித்தம் பனேத்த² பக்³க⁴ரந்தமிவ உபட்டா²தி. படிபா⁴க³னிமித்தம் நிச்சலம் ஸன்னிஸின்னம் ஹுத்வா உபட்டா²தி.

விச்சி²த்³த³கம் யுத்³த⁴மண்ட³லே வா சோராடவியம் வா ஸுஸானே வா யத்த² ராஜானோ சோரே சி²ந்தா³பேந்தி. அரஞ்ஞே வா பன ஸீஹப்³யக்³கே⁴ஹி சி²ன்னபுரிஸட்டா²னே லப்³ப⁴தி. தஸ்மா ததா²ரூபம் டா²னம் க³ந்த்வா ஸசே நானாதி³ஸாயம் பதிதம்பி ஏகாவஜ்ஜனேன ஆபாத²மாக³ச்ச²தி இச்சேதம் குஸலம். நோ சே ஆக³ச்ச²தி, ஸயம் ஹத்தே²ன ந பராமஸிதப்³ப³ம். பராமஸந்தோ ஹி விஸ்ஸாஸம் ஆபஜ்ஜதி. தஸ்மா ஆராமிகேன வா ஸமணுத்³தே³ஸேன வா அஞ்ஞேன வா கேனசி ஏகட்டா²னே காரேதப்³ப³ம். அலப⁴ந்தேன கத்தரயட்டி²யா வா த³ண்ட³கேன வா ஏகங்கு³லந்தரம் கத்வா உபனாமேதப்³ப³ம். ஏவம் உபனாமேத்வா ‘‘விச்சி²த்³த³கபடிக்கூலம் விச்சி²த்³த³கபடிக்கூல’’ந்தி மனஸிகாரோ பவத்தேதப்³போ³. தத்த² உக்³க³ஹனிமித்தம் மஜ்ஜே² சி²த்³த³ம் விய உபட்டா²தி. படிபா⁴க³னிமித்தம் பன பரிபுண்ணம் ஹுத்வா உபட்டா²தி.

விக்கா²யிதகே விக்கா²யிதகபடிக்கூலம் விக்கா²யிதகபடிக்கூலந்தி மனஸிகாரோ பவத்தேதப்³போ³. உக்³க³ஹனிமித்தம் பனேத்த² தஹிம் தஹிம் கா²யிதஸதி³ஸமேவ உபட்டா²தி. படிபா⁴க³னிமித்தம் பரிபுண்ணம்வ ஹுத்வா உபட்டா²தி.

விக்கி²த்தகம்பி விச்சி²த்³த³கே வுத்தனயேனேவ அங்கு³லங்கு³லந்தரம் காரேத்வா வா கத்வா வா ‘‘விக்கி²த்தகபடிக்கூலம் விக்கி²த்தகபடிக்கூல’’ந்தி மனஸிகாரோ பவத்தேதப்³போ³. ஏத்த² உக்³க³ஹனிமித்தம் பாகடந்தரம் ஹுத்வா உபட்டா²தி. படிபா⁴க³னிமித்தம் பன பரிபுண்ணம்வ ஹுத்வா உபட்டா²தி.

ஹதவிக்கி²த்தகம்பி விச்சி²த்³த³கே வுத்தப்பகாரேஸுயேவ டா²னேஸு லப்³ப⁴தி. தஸ்மா தத்த² க³ந்த்வா வுத்தனயேனேவ அங்கு³லங்கு³லந்தரம் காரேத்வா வா கத்வா வா ‘‘ஹதவிக்கி²த்தகபடிக்கூலம் ஹதவிக்கி²த்தகபடிக்கூல’’ந்தி மனஸிகாரோ பவத்தேதப்³போ³. உக்³க³ஹனிமித்தம் பனேத்த² பஞ்ஞாயமானம் பஹாரமுக²ம் விய ஹோதி. படிபா⁴க³னிமித்தம் பரிபுண்ணமேவ ஹுத்வா உபட்டா²தி.

லோஹிதகம் யுத்³த⁴மண்ட³லாதீ³ஸு லத்³த⁴ப்பஹாரானம் ஹத்த²பாதா³தீ³ஸு வா சி²ன்னேஸு பி⁴ன்னக³ண்ட³பீளகாதீ³னம் வா முக²தோ பக்³க⁴ரமானகாலே லப்³ப⁴தி. தஸ்மா தம் தி³ஸ்வா ‘‘லோஹிதகபடிக்கூலம் லோஹிதகபடிக்கூல’’ந்தி மனஸிகாரோ பவத்தேதப்³போ³. ஏத்த² உக்³க³ஹனிமித்தம் வாதப்பஹதா விய ரத்தபடாகா சலமானாகாரம் உபட்டா²தி. படிபா⁴க³னிமித்தம் பன ஸன்னிஸின்னம் ஹுத்வா உபட்டா²தி.

புளவகம் த்³வீஹதீஹச்சயேன குணபஸ்ஸ நவஹி வணமுகே²ஹி கிமிராஸிபக்³க⁴ரணகாலே ஹோதி. அபிச தம் ஸோணஸிங்கா³லமனுஸ்ஸகோ³மஹிம்ஸஹத்தி²அஸ்ஸஅஜக³ராதீ³னம் ஸரீரப்பமாணமேவ ஹுத்வா ஸாலிப⁴த்தராஸி விய திட்ட²தி. தேஸு யத்த² கத்த²சி ‘‘புளவகபடிக்கூலம் புளவகபடிக்கூல’’ந்தி மனஸிகாரோ பவத்தேதப்³போ³. சூளபிண்ட³பாதிகதிஸ்ஸத்தே²ரஸ்ஸ ஹி காளதீ³க⁴வாபியா அந்தோ ஹத்தி²குணபே நிமித்தம் உபட்டா²ஸி. உக்³க³ஹனிமித்தம் பனேத்த² சலமானம் விய உபட்டா²தி. படிபா⁴க³னிமித்தம் ஸாலிப⁴த்தபிண்டோ³ விய ஸன்னிஸின்னம் ஹுத்வா உபட்டா²தி.

அட்டி²கம் ‘‘ஸேய்யதா²பி பஸ்ஸேய்ய ஸரீரம் ஸிவதி²காய ச²ட்³டி³தம் அட்டி²ஸங்க²லிகம் ஸமம்ஸலோஹிதம் நஹாருஸம்ப³ந்த⁴’’ந்திஆதி³னா (ம. நி. 3.154) நயேன நானப்பகாரதோ வுத்தம். தத்த² யத்த² தம் நிக்கி²த்தம் ஹோதி, தத்த² புரிமனயேனேவ க³ந்த்வா ஸமந்தா பாஸாணாதீ³னம் வஸேன ஸனிமித்தம் ஸாரம்மணம் கத்வா இத³ம் அட்டி²கந்தி ஸபா⁴வபா⁴வதோ உபலக்கே²த்வா வண்ணாதி³வஸேன ஏகாத³ஸஹாகாரேஹி நிமித்தம் உக்³க³ஹேதப்³ப³ம்.

119. தம் பன வண்ணதோ ஸேதந்தி ஓலோகேந்தஸ்ஸ ந உபட்டா²தி, ஓதா³தகஸிணஸம்பே⁴தோ³ ஹோதி. தஸ்மா அட்டி²கந்தி படிக்கூலவஸேனேவ ஓலோகேதப்³ப³ம். லிங்க³ந்தி இத⁴ ஹத்தா²தீ³னம் நாமம். தஸ்மா ஹத்த²பாத³ஸீஸஉரபா³ஹுகடிஊருஜங்கா⁴னம் வஸேன லிங்க³தோ வவத்த²பேதப்³ப³ம். தீ³க⁴ரஸ்ஸவட்டசதுரஸ்ஸகு²த்³த³கமஹந்தவஸேன பன ஸண்டா²னதோ வவத்த²பேதப்³ப³ம். தி³ஸோகாஸா வுத்தனயா ஏவ. தஸ்ஸ தஸ்ஸ அட்டி²னோ பரியந்தவஸேன பரிச்சே²த³தோ வவத்த²பேத்வா யதே³வேத்த² பாகடம் ஹுத்வா உபட்டா²தி, தம் க³ஹேத்வா அப்பனா பாபுணிதப்³பா³. தஸ்ஸ தஸ்ஸ அட்டி²னோ நின்னட்டா²னத²லட்டா²னவஸேன பன நின்னதோ ச த²லதோ ச வவத்த²பேதப்³ப³ம். பதே³ஸவஸேனாபி அஹம் நின்னே டி²தோ, அட்டி² த²லே, அஹம் த²லே, அட்டி² நின்னேதிபி வவத்த²பேதப்³ப³ம். த்³வின்னம் பன அட்டி²கானம் க⁴டிதக⁴டிதட்டா²னவஸேன ஸந்தி⁴தோ வவத்த²பேதப்³ப³ம். அட்டி²கானம்யேவ அந்தரவஸேன விவரதோ வவத்த²பேதப்³ப³ம். ஸப்³ப³த்தே²வ பன ஞாணம் சாரேத்வா இமஸ்மிம் டா²னே இத³மட்டீ²தி ஸமந்ததோ வவத்த²பேதப்³ப³ம். ஏவம்பி நிமித்தே அனுபட்ட²ஹந்தே நலாடட்டி²ம்ஹி சித்தம் ஸண்ட²பேதப்³ப³ம்.

120. யதா² சேத்த², ஏவம் இத³ம் ஏகாத³ஸவிதே⁴ன நிமித்தக்³க³ஹணம் இதோ புரிமேஸு புளவகாதீ³ஸுபி யுஜ்ஜமானவஸேன ஸல்லக்கே²தப்³ப³ம். இத³ஞ்ச பன கம்மட்டா²னம் ஸகலாயபி அட்டி²கஸங்க²லிகாய ஏகஸ்மிம்பி அட்டி²கே ஸம்பஜ்ஜதி. தஸ்மா தேஸு யத்த²கத்த²சி ஏகாத³ஸவிதே⁴ன நிமித்தம் உக்³க³ஹேத்வா ‘‘அட்டி²கபடிக்கூலம் அட்டி²கபடிக்கூல’’ந்தி மனஸிகாரோ பவத்தேதப்³போ³. இத⁴ உக்³க³ஹனிமித்தம்பி படிபா⁴க³னிமித்தம்பி ஏகஸதி³ஸமேவ ஹோதீதி வுத்தம், தம் ஏகஸ்மிம் அட்டி²கே யுத்தம். அட்டி²கஸங்க²லிகாய பன உக்³க³ஹனிமித்தே பஞ்ஞாயமானே விவரதா. படிபா⁴க³னிமித்தே பரிபுண்ணபா⁴வோ யுஜ்ஜதி. ஏகட்டி²கேபி ச உக்³க³ஹனிமித்தேன பீ³ப⁴ச்சே²ன ப⁴யானகேன ப⁴விதப்³ப³ம். படிபா⁴க³னிமித்தேன பீதிஸோமனஸ்ஸஜனகேன, உபசாராவஹத்தா.

இமஸ்மிம் ஹி ஓகாஸே யம் அட்ட²கதா²ஸு வுத்தம், தம் த்³வாரம் த³த்வாவ வுத்தம். ததா² ஹி தத்த² ‘‘சதூஸு ப்³ரஹ்மவிஹாரேஸு த³ஸஸு ச அஸுபே⁴ஸு படிபா⁴க³னிமித்தம் நத்தி². ப்³ரஹ்மவிஹாரேஸு ஹி ஸீமஸம்பே⁴தோ³யேவ நிமித்தம். த³ஸஸு ச அஸுபே⁴ஸு நிப்³பி³கப்பம் கத்வா படிக்கூலபா⁴வேயேவ தி³ட்டே² நிமித்தம் நாம ஹோதீ’’தி வத்வாபி புன அனந்தரமேவ ‘‘து³வித⁴ம் இத⁴ நிமித்தம் உக்³க³ஹனிமித்தம் படிபா⁴க³னிமித்தம். உக்³க³ஹனிமித்தம் விரூபம் பீ³ப⁴ச்ச²ம் ப⁴யானகம் ஹுத்வா உபட்டா²தீ’’திஆதி³ வுத்தம். தஸ்மா யம் விசாரேத்வா அவோசும்ஹ, இத³மேவேத்த² யுத்தம்.

அபிச மஹாதிஸ்ஸத்தே²ரஸ்ஸ த³ந்தட்டி²கமத்தாவலோகனேன ஸகலித்தி²ஸரீரஸ்ஸ அட்டி²ஸங்கா⁴தபா⁴வேன உபட்டா²னாதீ³னி சேத்த² நித³ஸ்ஸனானீதி.

இதி அஸுபா⁴னி ஸுப⁴கு³ணோ, த³ஸஸதலோசனேன து²தகித்தி;

யானி அவோச த³ஸப³லோ, ஏகேகஜ்ஜா²னஹேதுனீதி.

ஏவம் தானி ச தேஸஞ்ச, பா⁴வனானயமிமம் விதி³த்வான;

தேஸ்வேவ அயம் பி⁴ய்யோ, பகிண்ணககதா²பி விஞ்ஞேய்யா.

பகிண்ணககதா²

121. ஏதேஸு ஹி யத்த² கத்த²சி அதி⁴க³தஜ்ஜா²னோ ஸுவிக்க²ம்பி⁴தராக³த்தா வீதராகோ³ விய நில்லோலுப்பசாரோ ஹோதி. ஏவம் ஸந்தேபி ய்வாயம் அஸுப⁴ப்பபே⁴தோ³ வுத்தோ, ஸோ ஸரீரஸபா⁴வப்பத்திவஸேன ச ராக³சரிதபே⁴த³வஸேன சாதி வேதி³தப்³போ³. ச²வஸரீரம் ஹி படிக்கூலபா⁴வம் ஆபஜ்ஜமானம் உத்³து⁴மாதகஸபா⁴வப்பத்தம் வா ஸியா, வினீலகாதீ³னம் வா அஞ்ஞதரஸபா⁴வப்பத்தம். இதி யாதி³ஸம் யாதி³ஸம் ஸக்கா ஹோதி லத்³து⁴ம், தாதி³ஸே தாதி³ஸே உத்³து⁴மாதகபடிக்கூலம் வினீலகபடிக்கூலந்தி ஏவம் நிமித்தம் க³ண்ஹிதப்³ப³மேவாதி ஸரீரஸபா⁴வப்பத்திவஸேன த³ஸதா⁴ அஸுப⁴ப்பபே⁴தோ³ வுத்தோதி வேதி³தப்³போ³.

விஸேஸதோ சேத்த² உத்³து⁴மாதகம் ஸரீரஸண்டா²னவிபத்திப்பகாஸனதோ ஸண்டா²னராகி³னோ ஸப்பாயம். வினீலகம் ச²விராக³விபத்திப்பகாஸனதோ ஸரீரவண்ணராகி³னோ ஸப்பாயம். விபுப்³ப³கம் காயவணபடிப³த்³த⁴ஸ்ஸ து³க்³க³ந்த⁴பா⁴வஸ்ஸ பகாஸனதோ மாலாக³ந்தா⁴தி³வஸேன ஸமுட்டா²பிதஸரீரக³ந்த⁴ராகி³னோ ஸப்பாயம். விச்சி²த்³த³கம் அந்தோஸுஸிரபா⁴வப்பகாஸனதோ ஸரீரே க⁴னபா⁴வராகி³னோ ஸப்பாயம். விக்கா²யிதகம் மம்ஸுபசயஸம்பத்திவினாஸப்பகாஸனதோ த²னாதீ³ஸு ஸரீரப்பதே³ஸேஸு மம்ஸுபசயராகி³னோ ஸப்பாயம். விக்கி²த்தகம் அங்க³பச்சங்கா³னம் விக்கே²பப்பகாஸனதோ அங்க³பச்சங்க³லீலாராகி³னோ ஸப்பாயம். ஹதவிக்கி²த்தகம் ஸரீரஸங்கா⁴தபே⁴த³விகாரப்பகாஸனதோ ஸரீரஸங்கா⁴தஸம்பத்திராகி³னோ ஸப்பாயம். லோஹிதகம் லோஹிதமக்கி²தபடிக்கூலபா⁴வப்பகாஸனதோ அலங்காரஜனிதஸோப⁴ராகி³னோ ஸப்பாயம். புளவகம் காயஸ்ஸ அனேககிமிகுலஸாதா⁴ரணபா⁴வப்பகாஸனதோ காயே மமத்தராகி³னோ ஸப்பாயம். அட்டி²கம் ஸரீரட்டீ²னம் படிக்கூலபா⁴வப்பகாஸனதோ த³ந்தஸம்பத்திராகி³னோ ஸப்பாயந்தி ஏவம் ராக³சரிதபே⁴த³வஸேனாபி த³ஸதா⁴ அஸுப⁴ப்பபே⁴தோ³ வுத்தோதி வேதி³தப்³போ³.

யஸ்மா பன த³ஸவிதே⁴பி ஏதஸ்மிம் அஸுபே⁴ ஸேய்யதா²பி நாம அபரிஸண்டி²தஜலாய ஸீக⁴ஸோதாய நதி³யா அரித்தப³லேனேவ நாவா திட்ட²தி, வினா அரித்தேன ந ஸக்கா ட²பேதும், ஏவமேவ து³ப்³ப³லத்தா ஆரம்மணஸ்ஸ விதக்கப³லேனேவ சித்தம் ஏகக்³க³ம் ஹுத்வா திட்ட²தி, வினா விதக்கேன ந ஸக்கா ட²பேதும், தஸ்மா பட²மஜ்ஜா²னமேவேத்த² ஹோதி, ந து³தியாதீ³னி.

படிக்கூலேபி ச ஏதஸ்மிம் ஆரம்மணே ‘‘அத்³தா⁴ இமாய படிபதா³ய ஜராமரணம்ஹா பரிமுச்சிஸ்ஸாமீ’’தி ஏவமானிஸம்ஸத³ஸ்ஸாவிதாய சேவ நீவரணஸந்தாபப்பஹானேன ச பீதிஸோமனஸ்ஸம் உப்பஜ்ஜதி, ‘‘ப³ஹும் தா³னி வேதனம் லபி⁴ஸ்ஸாமீ’’தி ஆனிஸம்ஸத³ஸ்ஸாவினோ புப்ப²ச²ட்³ட³கஸ்ஸ கூ³த²ராஸிம்ஹி விய, உஸ்ஸன்னப்³யாதி⁴து³க்க²ஸ்ஸ ரோகி³னோ வமனவிரேசனப்பவத்தியம் விய ச.

122. த³ஸவித⁴ம்பி சேதம் அஸுப⁴ம் லக்க²ணதோ ஏகமேவ ஹோதி. த³ஸவித⁴ஸ்ஸாபி ஹேதஸ்ஸ அஸுசிது³க்³க³ந்த⁴ஜேகு³ச்ச²படிக்கூலபா⁴வோ ஏவ லக்க²ணம். ததே³தம் இமினா லக்க²ணேன ந கேவலம் மதஸரீரே, த³ந்தட்டி²கத³ஸ்ஸாவினோ பன சேதியபப்³ப³தவாஸினோ மஹாதிஸ்ஸத்தே²ரஸ்ஸ விய, ஹத்தி²க்க²ந்த⁴க³தம் ராஜானம் ஓலோகேந்தஸ்ஸ ஸங்க⁴ரக்கி²தத்தே²ரூபட்டா²கஸாமணேரஸ்ஸ விய ச ஜீவமானகஸரீரேபி உபட்டா²தி. யதே²வ ஹி மதஸரீரம், ஏவம் ஜீவமானகம்பி அஸுப⁴மேவ. அஸுப⁴லக்க²ணம் பனேத்த² ஆக³ந்துகேன அலங்காரேன படிச்ச²ன்னத்தா ந பஞ்ஞாயதி. பகதியா பன இத³ம் ஸரீரம் நாம அதிரேகதிஸதஅட்டி²கஸமுஸ்ஸயம் அஸீதிஸதஸந்தி⁴ஸங்க⁴டிதம் நவன்ஹாருஸதனிப³ந்த⁴னம் நவமம்ஸபேஸிஸதானுலித்தம் அல்லசம்மபரியோனத்³த⁴ம் ச²வியா படிச்ச²ன்னம் சி²த்³தா³வசி²த்³த³ம் மேத³கதா²லிகா விய நிச்சுக்³க⁴ரிதபக்³க⁴ரிதம் கிமிஸங்க⁴னிஸேவிதம் ரோகா³னம் ஆயதனம் து³க்க²த⁴ம்மானம் வத்து² பரிபி⁴ன்னபுராணக³ண்டோ³ விய நவஹி வணமுகே²ஹி ஸததவிஸ்ஸந்த³னம். யஸ்ஸ உபோ⁴ஹி அக்கீ²ஹி அக்கி²கூ³த²கோ பக்³க⁴ரதி, கண்ணபி³லேஹி கண்ணகூ³த²கோ, நாஸாபுடேஹி ஸிங்கா⁴ணிகா, முக²தோ ஆஹாரபித்தஸேம்ஹருதி⁴ரானி, அதோ⁴த்³வாரேஹி உச்சாரபஸ்ஸாவா, நவனவுதியா லோமகூபஸஹஸ்ஸேஹி அஸுசிஸேத³யூஸோ பக்³க⁴ரதி. நீலமக்கி²காத³யோ ஸம்பரிவாரேந்தி. யம் த³ந்தகட்ட²முக²தோ⁴வனஸீஸமக்க²னனஹானனிவாஸனபாருபனாதீ³ஹி அப்படிஜக்³கி³த்வா யதா²ஜாதோவ ப²ருஸவிப்பகிண்ணகேஸோ ஹுத்வா கா³மேன கா³மம் விசரந்தோ ராஜாபி புப்ப²ச²ட்³ட³கசண்டா³லாதீ³ஸு அஞ்ஞதரோபி ஸமஸரீரபடிக்கூலதாய நிப்³பி³ஸேஸோ ஹோதி, ஏவம் அஸுசிது³க்³க³ந்த⁴ஜேகு³ச்ச²படிக்கூலதாய ரஞ்ஞோ வா சண்டா³லஸ்ஸ வா ஸரீரே வேமத்தம் நாம நத்தி². த³ந்தகட்ட²முக²தோ⁴வனாதீ³ஹி பனேத்த² த³ந்தமலாதீ³னி பமஜ்ஜித்வா நானாவத்தே²ஹி ஹிரிகோபீனம் படிச்சா²தே³த்வா நானாவண்ணேன ஸுரபி⁴விலேபனேன விலிம்பித்வா புப்பா²ப⁴ரணாதீ³ஹி அலங்கரித்வா ‘‘அஹம் மம’’ந்தி க³ஹேதப்³பா³காரப்பத்தம் கரோந்தி. ததோ இமினா ஆக³ந்துகேன அலங்காரேன படிச்ச²ன்னத்தா தத³ஸ்ஸ யாதா²வஸரஸம் அஸுப⁴லக்க²ணம் அஸஞ்ஜானந்தா புரிஸா இத்தீ²ஸு, இத்தி²யோ ச புரிஸேஸு ரதிம் கரோந்தி. பரமத்த²தோ பனேத்த² ரஜ்ஜிதப்³ப³கயுத்தட்டா²னம் நாம அணுமத்தம்பி நத்தி². ததா² ஹி கேஸலோமனக²த³ந்தகே²ளஸிங்கா⁴ணிகஉச்சாரபஸ்ஸாவாதீ³ஸு ஏககோட்டா²ஸம்பி ஸரீரதோ ப³ஹி பதிதம் ஸத்தா ஹத்தே²ன சு²பிதும்பி ந இச்ச²ந்தி, அட்டீயந்தி ஹராயந்தி ஜிகு³ச்ச²ந்தி. யம் யம் பனேத்த² அவஸேஸம் ஹோதி, தம் தம் ஏவம் படிக்கூலம்பி ஸமானம் அவிஜ்ஜந்த⁴காரபரியோனத்³தா⁴ அத்தஸினேஹராக³ரத்தா ‘‘இட்ட²ம் கந்தம் நிச்சம் ஸுக²ம் அத்தா’’தி க³ண்ஹந்தி. தே ஏவம் க³ண்ஹந்தா அடவியம் கிம்ஸுகருக்க²ம் தி³ஸ்வா ருக்க²தோ அபதிதபுப்ப²ம் ‘‘அயம் மம்ஸபேஸீ’’தி விஹஞ்ஞமானேன ஜரஸிங்கா³லேன ஸமானதம் ஆபஜ்ஜந்தி. தஸ்மா –

யதா²பி புப்பி²தம் தி³ஸ்வா, ஸிங்கா³லோ கிம்ஸுகம் வனே;

மம்ஸருக்கோ² மயா லத்³தோ⁴, இதி க³ந்த்வான வேக³ஸா.

பதிதம் பதிதம் புப்ப²ம், ட³ம்ஸித்வா அதிலோலுபோ;

நயித³ம் மம்ஸம் அது³ம் மம்ஸம், யம் ருக்க²ஸ்மிந்தி க³ண்ஹதி.

கோட்டா²ஸம் பதிதம்யேவ, அஸுப⁴ந்தி ததா² பு³தோ⁴;

அக்³க³ஹேத்வான க³ண்ஹேய்ய, ஸரீரட்ட²ம்பி நம் ததா².

இமஞ்ஹி ஸுப⁴தோ காயம், க³ஹேத்வா தத்த² முச்சி²தா;

பா³லா கரோந்தா பாபானி, து³க்கா² ந பரிமுச்சரே.

தஸ்மா பஸ்ஸேய்ய மேதா⁴வீ, ஜீவதோ வா மதஸ்ஸ வா;

ஸபா⁴வம் பூதிகாயஸ்ஸ, ஸுப⁴பா⁴வேன வஜ்ஜிதம்.

வுத்தஞ்ஹேதம் –

து³க்³க³ந்தோ⁴ அஸுசி காயோ, குணபோ உக்கரூபமோ;

நிந்தி³தோ சக்கு²பூ⁴தேஹி, காயோ பா³லாபி⁴னந்தி³தோ.

அல்லசம்மபடிச்ச²ன்னோ, நவத்³வாரோ மஹாவணோ;

ஸமந்ததோ பக்³க⁴ரதி, அஸுசி பூதிக³ந்தி⁴யோ.

ஸசே இமஸ்ஸ காயஸ்ஸ, அந்தோ பா³ஹிரகோ ஸியா;

த³ண்ட³ம் நூன க³ஹேத்வான, காகே ஸோணே நிவாரயேதி.

தஸ்மா த³ப்³ப³ஜாதிகேன பி⁴க்கு²னா ஜீவமானஸரீரம் வா ஹோது

மதஸரீரம் வா யத்த² யத்த² அஸுபா⁴காரோ பஞ்ஞாயதி, தத்த² தத்தே²வ நிமித்தம் க³ஹேத்வா கம்மட்டா²னம் அப்பனம் பாபேதப்³ப³ந்தி.

இதி ஸாது⁴ஜனபாமோஜ்ஜத்தா²ய கதே விஸுத்³தி⁴மக்³கே³

ஸமாதி⁴பா⁴வனாதி⁴காரே

அஸுப⁴கம்மட்டா²னனித்³தே³ஸோ நாம

ச²ட்டோ² பரிச்சே²தோ³.