10. அப்³போ⁴காஸிகங்க³கதா²

33. அப்³போ⁴காஸிகங்க³ம்பி ‘‘ச²ன்னஞ்ச ருக்க²மூலஞ்ச படிக்கி²பாமி, அப்³போ⁴காஸிகங்க³ம் ஸமாதி³யாமீ’’தி இமேஸம் அஞ்ஞதரவசனேன ஸமாதி³ன்னம் ஹோதி.

தஸ்ஸ பன அப்³போ⁴காஸிகஸ்ஸ த⁴ம்மஸ்ஸவனாய வா உபோஸத²த்தா²ய வா உபோஸதா²கா³ரம் பவிஸிதும் வட்டதி. ஸசே பவிட்ட²ஸ்ஸ தே³வோ வஸ்ஸதி, தே³வே வஸ்ஸமானே அனிக்க²மித்வா வஸ்ஸூபரமே நிக்க²மிதப்³ப³ம். போ⁴ஜனஸாலம் வா அக்³கி³ஸாலம் வா பவிஸித்வா வத்தம் காதும், போ⁴ஜனஸாலாய தே²ரே பி⁴க்கூ² ப⁴த்தேன ஆபுச்சி²தும், உத்³தி³ஸந்தேன வா உத்³தி³ஸாபேந்தேன வா ச²ன்னம் பவிஸிதும், ப³ஹி து³ன்னிக்கி²த்தானி மஞ்சபீடா²தீ³னி அந்தோ பவேஸேதுஞ்ச வட்டதி. ஸசே மக்³க³ம் க³ச்ச²ந்தேன வுட்³ட⁴தரானம் பரிக்கா²ரோ க³ஹிதோ ஹோதி, தே³வே வஸ்ஸந்தே மக்³க³மஜ்ஜே² டி²தம் ஸாலம் பவிஸிதும் வட்டதி. ஸசே ந கிஞ்சி க³ஹிதம் ஹோதி, ஸாலாய ட²ஸ்ஸாமீதி வேகே³ன க³ந்தும் ந வட்டதி. பகதிக³தியா க³ந்த்வா பவிட்டே²ன பன யாவ வஸ்ஸூபரமா ட²த்வா க³ந்தப்³ப³ந்தி இத³மஸ்ஸ விதா⁴னம். ருக்க²மூலிகஸ்ஸாபி ஏஸேவ நயோ.

பபே⁴த³தோ பன அயம்பி திவிதோ⁴ ஹோதி. தத்த² உக்கட்ட²ஸ்ஸ ருக்க²ம் வா பப்³ப³தம் வா கே³ஹம் வா உபனிஸ்ஸாய வஸிதும் ந வட்டதி. அப்³போ⁴காஸேயேவ சீவரகுடிம் கத்வா வஸிதப்³ப³ம். மஜ்ஜி²மஸ்ஸ ருக்க²பப்³ப³தகே³ஹானி உபனிஸ்ஸாய அந்தோ அப்பவிஸித்வா வஸிதும் வட்டதி. முது³கஸ்ஸ அச்ச²ன்னமரியாத³ம் பப்³பா⁴ரம்பி ஸாகா²மண்ட³போபி பீட²படோபி கே²த்தரக்க²காதீ³ஹி ச²ட்³டி³தா தத்ரட்ட²ககுடிகாபி வட்டதீதி.

இமேஸம் பன திண்ணம்பி வாஸத்தா²ய ச²ன்னம் வா ருக்க²மூலம் வா பவிட்ட²க்க²ணே து⁴தங்க³ம் பி⁴ஜ்ஜதி. ஜானித்வா தத்த² அருணம் உட்டா²பிதமத்தேதி அங்கு³த்தரபா⁴ணகா. அயமேத்த² பே⁴தோ³.

அயம் பனானிஸம்ஸோ, ஆவாஸபலிபோ³து⁴பச்சே²தோ³, தி²னமித்³த⁴பனூத³னம், ‘‘மிகா³ விய அஸங்க³சாரினோ, அனிகேதா விஹரந்தி பி⁴க்க²வோ’’தி (ஸம். நி. 1.224) பஸம்ஸாய அனுரூபதா, நிஸ்ஸங்க³தா, சாதுத்³தி³ஸதா, அப்பிச்ச²தாதீ³னம் அனுலோமவுத்திதாதி.

அனகா³ரியபா⁴வஸ்ஸ, அனுரூபே அது³ல்லபே⁴;

தாராமணிவிதானம்ஹி, சந்த³தீ³பப்பபா⁴ஸிதே.

அப்³போ⁴காஸே வஸம் பி⁴க்கு², மிக³பூ⁴தேன சேதஸா;

தி²னமித்³த⁴ம் வினோதே³த்வா, பா⁴வனாராமதம் ஸிதோ.

பவிவேகரஸஸ்ஸாத³ம், நசிரஸ்ஸேவ விந்த³தி;

யஸ்மா தஸ்மா ஹி ஸப்பஞ்ஞோ, அப்³போ⁴காஸரதோ ஸியாதி.

அயம் அப்³போ⁴காஸிகங்கே³ ஸமாதா³னவிதா⁴னப்பபே⁴த³பே⁴தா³னிஸம்ஸவண்ணனா.