1. பம்ஸுகூலிகங்க³கதா²

24. இதா³னி ஏகேகஸ்ஸ ஸமாதா³னவிதா⁴னப்பபே⁴த³பே⁴தா³னிஸம்ஸே வண்ணயிஸ்ஸாம. பம்ஸுகூலிகங்க³ம் தாவ ‘‘க³ஹபதிதா³னசீவரம் படிக்கி²பாமி, பம்ஸுகூலிகங்க³ம் ஸமாதி³யாமீ’’தி இமேஸு த்³வீஸு வசனேஸு அஞ்ஞதரேன ஸமாதி³ன்னம் ஹோதி. இத³ம் தாவேத்த² ஸமாதா³னம்.

ஏவம் ஸமாதி³ன்னது⁴தங்கே³ன பன தேன ஸோஸானிகம், பாபணிகம், ரதி²யசோளம், ஸங்காரசோளம், ஸோத்தி²யம், ந்ஹானசோளம், தித்த²சோளம், க³தபச்சாக³தம், அக்³கி³ட³ட்³ட⁴ம், கோ³கா²யிதம், உபசிகாகா²யிதம், உந்தூ³ரகா²யிதம், அந்தச்சி²ன்னம், த³ஸாச்சி²ன்னம், த⁴ஜாஹடம், தூ²பசீவரம், ஸமணசீவரம், ஆபி⁴ஸேகிகம், இத்³தி⁴மயம், பந்தி²கம், வாதாஹடம், தே³வத³த்தியம், ஸாமுத்³தி³யந்திஏதேஸு அஞ்ஞதரம் சீவரம் க³ஹேத்வா பா²லேத்வா து³ப்³ப³லட்டா²னம் பஹாய தி²ரட்டா²னானி தோ⁴வித்வா சீவரம் கத்வா போராணம் க³ஹபதிசீவரம் அபனேத்வா பரிபு⁴ஞ்ஜிதப்³ப³ம்.

தத்த² ஸோஸானிகந்தி ஸுஸானே பதிதகம். பாபணிகந்தி ஆபணத்³வாரே பதிதகம். ரதி²யசோளந்தி புஞ்ஞத்தி²கேஹி வாதபானந்தரேன ரதி²காய ச²ட்³டி³தசோளகம். ஸங்காரசோளந்தி ஸங்காரட்டா²னே ச²ட்³டி³தசோளகம். ஸோத்தி²யந்தி க³ப்³ப⁴மலம் புஞ்சி²த்வா ச²ட்³டி³தவத்த²ம். திஸ்ஸாமச்சமாதா கிர ஸதக்³க⁴னகேன வத்தே²ன க³ப்³ப⁴மலம் புஞ்சா²பேத்வா பம்ஸுகூலிகா க³ண்ஹிஸ்ஸந்தீதி தாலவேளிமக்³கே³ ச²ட்³டா³பேஸி. பி⁴க்கூ² ஜிண்ணகட்டா²னத்த²மேவ க³ண்ஹந்தி. ந்ஹானசோளந்தி யம் பூ⁴தவேஜ்ஜேஹி ஸஸீஸம் ந்ஹாபிதா காளகண்ணிசோளந்தி ச²ட்³டே³த்வா க³ச்ச²ந்தி.

தித்த²சோளந்தி ந்ஹானதித்தே² ச²ட்³டி³தபிலோதிகா. க³தபச்சாக³தந்தி யம் மனுஸ்ஸா ஸுஸானம் க³ந்த்வா பச்சாக³தா ந்ஹத்வா ச²ட்³டே³ந்தி. அக்³கி³ட³ட்³ட⁴ந்தி அக்³கி³னா ட³ட்³ட⁴ப்பதே³ஸம். தஞ்ஹி மனுஸ்ஸா ச²ட்³டே³ந்தி. கோ³கா²யிதாதீ³நி பாகடானேவ. தாதி³ஸானிபி ஹி மனுஸ்ஸா ச²ட்³டே³ந்தி. த⁴ஜாஹடந்தி நாவம் ஆரோஹந்தா த⁴ஜம் ப³ந்தி⁴த்வா ஆரூஹந்தி. தம் தேஸம் த³ஸ்ஸனாதிக்கமே க³ஹேதும் வட்டதி. யம்பி யுத்³த⁴பூ⁴மியம் த⁴ஜம் ப³ந்தி⁴த்வா ட²பிதம், தம் த்³வின்னம்பி ஸேனானம் க³தகாலே க³ஹேதும் வட்டதி.

தூ²பசீவரந்தி வம்மிகம் பரிக்கி²பித்வா ப³லிகம்மம் கதம். ஸமணசீவரந்தி பி⁴க்கு²ஸந்தகம். ஆபி⁴ஸேகிகந்தி ரஞ்ஞோ அபி⁴ஸேகட்டா²னே ச²ட்³டி³தசீவரம். இத்³தி⁴மயந்தி ஏஹிபி⁴க்கு²சீவரம். பந்தி²கந்தி அந்தராமக்³கே³ பதிதகம். யம் பன ஸாமிகானம் ஸதிஸம்மோஸேன பதிதம், தம் தோ²கம் ரக்கி²த்வா க³ஹேதப்³ப³ம். வாதாஹடந்தி வாதேன பஹரித்வா தூ³ரே பாதிதம், தம் பன ஸாமிகே அபஸ்ஸந்தேன க³ஹேதும் வட்டதி. தே³வத³த்தியந்தி அனுருத்³த⁴த்தே²ரஸ்ஸ விய தே³வதாஹி தி³ன்னகம். ஸாமுத்³தி³யந்தி ஸமுத்³த³வீசீஹி த²லே உஸ்ஸாரிதம்.

யம் பன ஸங்க⁴ஸ்ஸ தே³மாதி தி³ன்னம், சோளகபி⁴க்கா²ய வா சரமானேஹி லத்³த⁴ம், ந தம் பம்ஸுகூலம். பி⁴க்கு²த³த்தியேபி யம் வஸ்ஸக்³கே³ன கா³ஹேத்வா வா தீ³யதி, ஸேனாஸனசீவரம் வா ஹோதி, ந தம் பம்ஸுகூலம். நோ கா³ஹாபேத்வா தி³ன்னமேவ பம்ஸுகூலம். தத்ரபி யம் தா³யகேஹி பி⁴க்கு²ஸ்ஸ பாத³மூலே நிக்கி²த்தம், தேன பன பி⁴க்கு²னா பம்ஸுகூலிகஸ்ஸ ஹத்தே² ட²பேத்வா தி³ன்னம், தம் ஏகதோஸுத்³தி⁴கம் நாம. யம் பி⁴க்கு²னோ ஹத்தே² ட²பேத்வா தி³ன்னம், தேன பன பாத³மூலே ட²பிதம், தம்பி ஏகதோஸுத்³தி⁴கம். யம் பி⁴க்கு²னோபி பாத³மூலே ட²பிதம், தேனாபி ததே²வ தி³ன்னம், தம் உப⁴தோஸுத்³தி⁴கம். யம் ஹத்தே² ட²பேத்வா லத்³த⁴ம், ஹத்தே²யேவ ட²பிதம், தம் அனுக்கட்ட²சீவரம் நாம. இதி இமம் பம்ஸுகூலபே⁴த³ம் ஞத்வா பம்ஸுகூலிகேன சீவரம் பரிபு⁴ஞ்ஜிதப்³ப³ந்தி இத³மேத்த² விதா⁴னம்.

அயம் பன பபே⁴தோ³, தயோ பம்ஸுகூலிகா உக்கட்டோ² மஜ்ஜி²மோ முதூ³தி. தத்த² ஸோஸானிகம்யேவ க³ண்ஹந்தோ உக்கட்டோ² ஹோதி. பப்³ப³ஜிதா க³ண்ஹிஸ்ஸந்தீதி ட²பிதகம் க³ண்ஹந்தோ மஜ்ஜி²மோ. பாத³மூலே ட²பேத்வா தி³ன்னகம் க³ண்ஹந்தோ முதூ³தி.

தேஸு யஸ்ஸ கஸ்ஸசி அத்தனோ ருசியா கி³ஹிதி³ன்னகம் ஸாதி³தக்க²ணே து⁴தங்க³ம் பி⁴ஜ்ஜதி. அயமேத்த² பே⁴தோ³.

அயம் பனானிஸம்ஸோ, ‘‘பம்ஸுகூலசீவரம் நிஸ்ஸாய பப்³ப³ஜ்ஜா’’தி (மஹாவ. 128) வசனதோ நிஸ்ஸயானுரூபபடிபத்திஸப்³பா⁴வோ, பட²மே அரியவம்ஸே பதிட்டா²னம், ஆரக்க²து³க்கா²பா⁴வோ, அபராயத்தவுத்திதா, சோரப⁴யேன அப⁴யதா, பரிபோ⁴க³தண்ஹாய அபா⁴வோ, ஸமணஸாருப்பபரிக்கா²ரதா, ‘‘அப்பானி சேவ ஸுலபா⁴னி ச தானி ச அனவஜ்ஜானீ’’தி (அ. நி. 4.27; இதிவு. 101) ப⁴க³வதா ஸம்வண்ணிதபச்சயதா, பாஸாதி³கதா, அப்பிச்ச²தாதீ³னம் ப²லனிப்ப²த்தி, ஸம்மாபடிபத்தியா அனுப்³ரூஹனம், பச்சி²மாய ஜனதாய தி³ட்டா²னுக³திஆபாத³னந்தி.

மாரஸேனவிகா⁴தாய, பம்ஸுகூலத⁴ரோ யதி;

ஸன்னத்³த⁴கவசோ யுத்³தே⁴, க²த்தியோ விய ஸோப⁴தி.

பஹாய காஸிகாதீ³னி, வரவத்தா²னி தா⁴ரிதம்;

யம் லோகக³ருனா கோ தம், பம்ஸுகூலம் ந தா⁴ரயே.

தஸ்மா ஹி அத்தனோ பி⁴க்கு², படிஞ்ஞம் ஸமனுஸ்ஸரம்;

யோகா³சாரானுகூலம்ஹி, பம்ஸுகூலே ரதோ ஸியாதி.

அயம் தாவ பம்ஸுகூலிகங்கே³ ஸமாதா³னவிதா⁴னப்பபே⁴த³பே⁴தா³னிஸம்ஸவண்ணனா.