11. ஸமாதி⁴னித்³தே³ஸோ

ஆஹாரேபடிக்கூலபா⁴வனா

294. இதா³னி ஆருப்பானந்தரம் ஏகா ஸஞ்ஞாதி ஏவம் உத்³தி³ட்டா²ய ஆஹாரே படிக்கூலஸஞ்ஞாய பா⁴வனானித்³தே³ஸோ அனுப்பத்தோ. தத்த² ஆஹரதீதி ஆஹாரோ. ஸோ சதுப்³பி³தோ⁴ கப³ளீகாராஹாரோ, ப²ஸ்ஸாஹாரோ, மனோஸஞ்சேதனாஹாரோ, விஞ்ஞாணாஹாரோதி.

கோ பனேத்த² கிமாஹரதீதி? கப³ளீகாராஹாரோ ஓஜட்ட²மகம் ரூபம் ஆஹரதி. ப²ஸ்ஸாஹாரோ திஸ்ஸோ வேத³னா ஆஹரதி. மனோஸஞ்சேதனாஹாரோ தீஸு ப⁴வேஸு படிஸந்தி⁴ம் ஆஹரதி. விஞ்ஞாணாஹாரோ படிஸந்தி⁴க்க²ணே நாமரூபம் ஆஹரதி.

தேஸு கப³ளீகாராஹாரே நிகந்திப⁴யம். ப²ஸ்ஸாஹாரே உபக³மனப⁴யம். மனோஸஞ்சேதனாஹாரே உபபத்திப⁴யம். விஞ்ஞாணாஹாரே படிஸந்தி⁴ப⁴யம். ஏவம் ஸப்படிப⁴யேஸு ச தேஸு கப³ளீகாராஹாரோ புத்தமம்ஸூபமேன (ஸம். நி. 2.63) தீ³பேதப்³போ³. ப²ஸ்ஸாஹாரோ நிச்சம்மகா³வூபமேன (ஸம். நி. 2.63). மனோஸஞ்சேதனாஹாரோ அங்கா³ரகாஸூபமேன (ஸம். நி. 2.63). விஞ்ஞாணாஹாரோ ஸத்திஸதூபமேனாதி (ஸம். நி. 2.63). இமேஸு பன சதூஸு ஆஹாரேஸு அஸிதபீதகா²யிதஸாயிதப்பபே⁴தோ³ கப³ளீகாரோ ஆஹாரோவ இமஸ்மிம் அத்தே² ஆஹாரோதி அதி⁴ப்பேதோ. தஸ்மிம் ஆஹாரே படிக்கூலாகாரக்³க³ஹணவஸேன உப்பன்னா ஸஞ்ஞா ஆஹாரே படிக்கூலஸஞ்ஞா.

தம் ஆஹாரே படிக்கூலஸஞ்ஞம் பா⁴வேதுகாமேன கம்மட்டா²னம் உக்³க³ஹேத்வா உக்³க³ஹதோ ஏகபத³ம்பி அவிரஜ்ஜ²ந்தேன ரஹோக³தேன படிஸல்லீனேன அஸிதபீதகா²யிதஸாயிதப்பபே⁴தே³ கப³ளீகாராஹாரே த³ஸஹாகாரேஹி படிக்கூலதா பச்சவேக்கி²தப்³பா³. ஸேய்யதி²த³ம், க³மனதோ, பரியேஸனதோ, பரிபோ⁴க³தோ, ஆஸயதோ, நிதா⁴னதோ, அபரிபக்கதோ, பரிபக்கதோ, ப²லதோ, நிஸ்ஸந்த³தோ, ஸம்மக்க²னதோதி.

295. தத்த² க³மனதோதி ஏவம் மஹானுபா⁴வே நாம ஸாஸனே பப்³ப³ஜிதேன ஸகலரத்திம் பு³த்³த⁴வசனஸஜ்ஜா²யம் வா ஸமணத⁴ம்மம் வா கத்வா காலஸ்ஸேவ வுட்டா²ய சேதியங்க³ணபோ³தி⁴யங்க³ணவத்தம் கத்வா பானீயம் பரிபோ⁴ஜனீயம் உபட்ட²பேத்வா பரிவேணம் ஸம்மஜ்ஜித்வா ஸரீரம் படிஜக்³கி³த்வா ஆஸனமாரூய்ஹ வீஸதிம்ஸ வாரே கம்மட்டா²னம் மனஸிகரித்வா உட்டா²ய பத்தசீவரம் க³ஹேத்வா நிஜனஸம்பா³தா⁴னி பவிவேகஸுகா²னி சா²யூத³கஸம்பன்னானி ஸுசீனி ஸீதலானி ரமணீயபூ⁴மிபா⁴கா³னி தபோவனானி பஹாய அரியம் விவேகரதிம் அனபேக்கி²த்வா ஸுஸானாபி⁴முகே²ன ஸிங்கா³லேன விய ஆஹாரத்தா²ய கா³மாபி⁴முகே²ன க³ந்தப்³ப³ம்.

ஏவம் க³ச்ச²தா ச மஞ்சம்ஹா வா பீட²ம்ஹா வா ஓதரணதோ பட்டா²ய பாத³ரஜக⁴ரகோ³லிகவச்சாதி³ஸம்பரிகிண்ணம் பச்சத்த²ரணம் அக்கமிதப்³ப³ம் ஹோதி. ததோ அப்பேகதா³ மூஸிகஜதுகவச்சாதீ³ஹி உபஹதத்தா அந்தோக³ப்³ப⁴தோ படிக்கூலதரம் பமுக²ம் த³ட்ட²ப்³ப³ம் ஹோதி. ததோ உலூகபாராவதாதி³வச்சஸம்மக்கி²தத்தா உபரிமதலதோ படிக்கூலதரம் ஹேட்டி²மதலம். ததோ கதா³சி கதா³சி வாதேரிதேஹி புராணதிணபண்ணேஹி கி³லானஸாமணேரானம் முத்தகரீஸகே²ளஸிங்கா⁴ணிகாஹி வஸ்ஸகாலே உத³கசிக்க²ல்லாதீ³ஹி ச ஸம்கிலிட்ட²த்தா ஹேட்டி²மதலதோ படிக்கூலதரம் பரிவேணம். பரிவேணதோ படிக்கூலதரா விஹாரரச்சா² த³ட்ட²ப்³பா³ ஹோதி.

அனுபுப்³பே³ன பன போ³தி⁴ஞ்ச சேதியஞ்ச வந்தி³த்வா விதக்கமாளகே டி²தேன முத்தராஸிஸதி³ஸம் சேதியம் மோரபிஞ்ச²கலாபமனோஹரம் போ³தி⁴ம் தே³வவிமானஸம்பத்திஸஸ்ஸிரீகம் ஸேனாஸனஞ்ச அனபலோகேத்வா ஏவரூபம் நாம ரமணீயம் பதே³ஸம் பிட்டி²தோ கத்வா ஆஹாரஹேது க³ந்தப்³ப³ம் ப⁴விஸ்ஸதீதி பக்கமித்வா கா³மமக்³க³ம் படிபன்னேன கா²ணுகண்டகமக்³கோ³பி உத³கவேக³பி⁴ன்னவிஸமமக்³கோ³பி த³ட்ட²ப்³போ³ ஹோதி.

ததோ க³ண்ட³ம் படிச்சா²தே³ந்தேன விய நிவாஸனம் நிவாஸேத்வா வணசோளகம் ப³ந்த⁴ந்தேன விய காயப³ந்த⁴னம் ப³ந்தி⁴த்வா அட்டி²ஸங்கா⁴தம் படிச்சா²தே³ந்தேன விய சீவரம் பாருபித்வா பே⁴ஸஜ்ஜகபாலம் நீஹரந்தேன விய பத்தம் நீஹரித்வா கா³மத்³வாரஸமீபம் பாபுணந்தேன ஹத்தி²குணபஅஸ்ஸகுணபகோ³குணபமஹிம்ஸகுணபமனுஸ்ஸகுணபஅஹிகுணபகுக்குரகுணபானிபி த³ட்ட²ப்³பா³னி ப⁴வந்தி. ந கேவலஞ்ச த³ட்ட²ப்³பா³னி, க³ந்தோ⁴பி நேஸம் கா⁴னம் படிஹனமானோ அதி⁴வாஸேதப்³போ³ ஹோதி. ததோ கா³மத்³வாரே ட²த்வா சண்ட³ஹத்தி²அஸ்ஸாதி³பரிஸ்ஸயபரிவஜ்ஜனத்த²ம் கா³மரச்சா² ஓலோகேதப்³பா³ ஹோந்தி.

இச்சேதம் பச்சத்த²ரணாதி³அனேககுணபபரியோஸானம் படிக்கூலம் ஆஹாரஹேது அக்கமிதப்³ப³ஞ்ச த³ட்ட²ப்³ப³ஞ்ச கா⁴யிதப்³ப³ஞ்ச ஹோதி. அஹோ வத போ⁴ படிக்கூலோ ஆஹாரோதி ஏவம் க³மனதோ படிக்கூலதா பச்சவேக்கி²தப்³பா³.

296. கத²ம் பரியேஸனதோ? ஏவம் க³மனபடிக்கூலம் அதி⁴வாஸேத்வாபி கா³மம் பவிட்டே²ன ஸங்கா⁴டிபாருதேன கபணமனுஸ்ஸேன விய கபாலஹத்தே²ன க⁴ரபடிபாடியா கா³மவீதீ²ஸு சரிதப்³ப³ம் ஹோதி. யத்த² வஸ்ஸகாலே அக்கந்தஅக்கந்தட்டா²னே யாவ பிண்டி³கமம்ஸாபி உத³கசிக்க²ல்லே பாதா³ பவிஸந்தி, ஏகேன ஹத்தே²ன பத்தம் க³ஹேதப்³ப³ம் ஹோதி, ஏகேன சீவரம் உக்கி²பிதப்³ப³ம். கி³ம்ஹகாலே வாதவேகே³ன ஸமுட்டி²தேஹி பம்ஸுதிணரஜேஹி ஓகிண்ணஸரீரேன சரிதப்³ப³ம். தம் தம் கே³ஹத்³வாரம் பத்வா மச்ச²தோ⁴வனமம்ஸதோ⁴வனதண்டு³லதோ⁴வனகே²ளஸிங்கா⁴ணிகஸுனக²ஸூகரவச்சாதீ³ஹி ஸம்மிஸ்ஸானி கிமிகுலாகுலானி நீலமக்கி²கபரிகிண்ணானி ஓளிக³ல்லானி சேவ சந்த³னிகட்டா²னானி ச த³ட்ட²ப்³பா³னி ஹோந்தி அக்கமிதப்³பா³னிபி. யதோ தா மக்கி²கா உட்ட²ஹித்வா ஸங்கா⁴டியம்பி பத்தேபி ஸீஸேபி நிலீயந்தி.

க⁴ரம் பவிட்ட²ஸ்ஸாபி கேசி தே³ந்தி, கேசி ந தே³ந்தி. த³த³மானாபி ஏகச்சே ஹிய்யோ பக்கப⁴த்தம்பி புராணக²ஜ்ஜகம்பி பூதிகும்மாஸபூபாதீ³னிபி த³த³ந்தி. அத³த³மானாபி கேசிதே³வ ‘‘அதிச்ச²த², ப⁴ந்தே’’தி வத³ந்தி, கேசி பன அபஸ்ஸமானா விய துண்ஹீ ஹோந்தி, கேசி அஞ்ஞேன முக²ம் கரோந்தி, கேசி ‘‘க³ச்ச², ரே முண்ட³கா’’திஆதீ³ஹி ப²ருஸவாசாஹி ஸமுதா³சரந்தி. ஏவம் கபணமனுஸ்ஸேன விய கா³மே பிண்டா³ய சரித்வா நிக்க²மிதப்³ப³ந்தி.

இச்சேதம் கா³மப்பவேஸனதோ பட்டா²ய யாவ நிக்க²மனா உத³கசிக்க²ல்லாதி³படிக்கூலம் ஆஹாரஹேது அக்கமிதப்³ப³ஞ்சேவ த³ட்ட²ப்³ப³ஞ்ச அதி⁴வாஸேதப்³ப³ஞ்ச ஹோதி. அஹோ வத போ⁴ படிக்கூலோ ஆஹாரோதி ஏவம் பரியேஸனதோ படிக்கூலதா பச்சவேக்கி²தப்³பா³.

297. கத²ம் பரிபோ⁴க³தோ? ஏவம் பரியிட்டா²ஹாரேன பன ப³ஹிகா³மே பா²ஸுகட்டா²னே ஸுக²னிஸின்னேன யாவ தத்த² ஹத்த²ம் ந ஓதாரேதி, தாவ ததா²ரூபம் க³ருட்டா²னியம் பி⁴க்கு²ம் வா லஜ்ஜிமனுஸ்ஸம் வா தி³ஸ்வா நிமந்தேதும்பி ஸக்கா ஹோதி. பு⁴ஞ்ஜிதுகாமதாய பனேத்த² ஹத்தே² ஓதாரிதமத்தே ‘‘க³ண்ஹதா²’’தி வத³ந்தேன லஜ்ஜிதப்³ப³ம் ஹோதி. ஹத்த²ம் பன ஓதாரேத்வா மத்³த³ந்தஸ்ஸ பஞ்சங்கு³லிஅனுஸாரேன ஸேதோ³ பக்³க⁴ரமானோ ஸுக்க²த²த்³த⁴ப⁴த்தம்பி தேமேந்தோ முது³ம் கரோதி.

அத² தஸ்மிம் பரிமத்³த³னமத்தேனாபி ஸம்பி⁴ன்னஸோபே⁴ ஆலோபம் கத்வா முகே² ட²பிதே ஹேட்டி²மத³ந்தா உது³க்க²லகிச்சம் ஸாதே⁴ந்தி, உபரிமா முஸலகிச்சம், ஜிவ்ஹா ஹத்த²கிச்சம். தம் தத்த² ஸுவானதோ³ணியம் ஸுவானபிண்ட³மிவ த³ந்தமுஸலேஹி கோட்டேத்வா ஜிவ்ஹாய ஸம்பரிவத்தியமானம் ஜிவ்ஹாக்³கே³ தனுபஸன்னகே²ளோ மக்கே²தி, வேமஜ்ஜ²தோ பட்டா²ய ப³ஹலகே²ளோ மக்கே²தி, த³ந்தகட்டே²ன அஸம்பத்தட்டா²னே த³ந்தகூ³த²கோ மக்கே²தி. ஸோ ஏவம் விசுண்ணிதமக்கி²தோ தங்க²ணஞ்ஞேவ அந்தரஹிதவண்ணக³ந்த⁴ஸங்கா²ரவிஸேஸோ ஸுவானதோ³ணியம் டி²தஸுவானவமது² விய பரமஜேகு³ச்ச²பா⁴வம் உபக³ச்ச²தி. ஏவரூபோபி ஸமானோ சக்கு²ஸ்ஸ ஆபாத²ம் அதீதத்தா அஜ்ஜோ²ஹரிதப்³போ³ ஹோதீதி ஏவம் பரிபோ⁴க³தோ படிக்கூலதா பச்சவேக்கி²தப்³பா³.

298. கத²ம் ஆஸயதோ? ஏவம் பரிபோ⁴க³ம் உபக³தோ ச பனேஸ அந்தோ பவிஸமானோ யஸ்மா பு³த்³த⁴பச்சேகபு³த்³தா⁴னம்பி ரஞ்ஞோபி சக்கவத்திஸ்ஸ பித்தஸேம்ஹபுப்³ப³லோஹிதாஸயேஸு சதூஸு அஞ்ஞதரோ ஆஸயோ ஹோதியேவ. மந்த³புஞ்ஞானம் பன சத்தாரோ ஆஸயா ஹோந்தி. தஸ்மா யஸ்ஸ பித்தாஸயோ அதி⁴கோ ஹோதி, தஸ்ஸ ப³ஹலமது⁴கதேலமக்கி²தோ விய பரமஜேகு³ச்சோ² ஹோதி. யஸ்ஸ ஸேம்ஹாஸயோ அதி⁴கோ ஹோதி, தஸ்ஸ நாக³ப³லபண்ணரஸமக்கி²தோ விய. யஸ்ஸ புப்³பா³ஸயோ அதி⁴கோ ஹோதி, தஸ்ஸ பூதிதக்கமக்கி²தோ விய. யஸ்ஸ லோஹிதாஸயோ அதி⁴கோ ஹோதி, தஸ்ஸ ரஜனமக்கி²தோ விய பரமஜேகு³ச்சோ² ஹோதீதி ஏவம் ஆஸயதோ படிக்கூலதா பச்சவேக்கி²தப்³பா³.

299. கத²ம் நிதா⁴னதோ? ஸோ இமேஸு சதூஸு ஆஸயேஸு அஞ்ஞதரேன ஆஸயேன மக்கி²தோ அந்தோஉத³ரம் பவிஸித்வா நேவ ஸுவண்ணபா⁴ஜனே ந மணிரஜதாதி³பா⁴ஜனேஸு நிதா⁴னம் க³ச்ச²தி. ஸசே பன த³ஸவஸ்ஸிகேன அஜ்ஜோ²ஹரியதி த³ஸ வஸ்ஸானி அதோ⁴தவச்சகூபஸதி³ஸே ஓகாஸே பதிட்ட²ஹதி. ஸசே வீஸ, திம்ஸ, சத்தாலீஸ, பஞ்ஞாஸ, ஸட்டி², ஸத்ததி, அஸீதி, நவுதிவஸ்ஸிகேன, ஸசே வஸ்ஸஸதிகேன அஜ்ஜோ²ஹரியதி. வஸ்ஸஸதம் அதோ⁴தவச்சகூபஸதி³ஸே ஓகாஸே பதிட்ட²ஹதீதி ஏவம் நிதா⁴னதோ படிக்கூலதா பச்சவேக்கி²தப்³பா³.

300. கத²ம் அபரிபக்கதோ? ஸோ பனாயமாஹாரோ ஏவரூபே ஓகாஸே நிதா⁴னமுபக³தோ யாவ அபரிபக்கோ ஹோதி, தாவ தஸ்மிஞ்ஞேவ யதா²வுத்தப்பகாரே பரமந்த⁴காரதிமிஸே நானாகுணபக³ந்த⁴வாஸிதபவனவிசரிதே அதிது³க்³க³ந்த⁴ஜேகு³ச்சே² பதே³ஸே யதா² நாம நிதா³கே⁴ அகாலமேகே⁴ன அபி⁴வுட்ட²ம்ஹி சண்டா³லகா³மத்³வாரஆவாடே பதிதானி திணபண்ணகிலஞ்ஜக²ண்ட³அஹிகுக்குரமனுஸ்ஸகுணபாதீ³னி ஸூரியாதபேன ஸந்தத்தானி பே²ணபுப்பு²ளகாசிதானி திட்ட²ந்தி, ஏவமேவ தம்தி³வஸம்பி ஹிய்யோபி ததோ புரிமே தி³வஸேபி அஜ்ஜோ²ஹதோ ஸப்³போ³ ஏகதோ ஹுத்வா ஸேம்ஹபடலபரியோனத்³தோ⁴ காயக்³கி³ஸந்தாபகுதி²தகுத²னஸஞ்ஜாதபே²ணபுப்பு²ளகாசிதோ பரமஜேகு³ச்ச²பா⁴வம் உபக³ந்த்வா திட்ட²தீதி ஏவம் அபரிபக்கதோ படிக்கூலதா பச்சவேக்கி²தப்³பா³.

301. கத²ம் பரிபக்கதோ? ஸோ தத்தகாயக்³கி³னா பரிபக்கோ ஸமானோ ந ஸுவண்ணரஜதாதி³தா⁴துயோ விய ஸுவண்ணரஜதாதி³பா⁴வம் உபக³ச்ச²தி. பே²ணபுப்பு²ளகே பன முஞ்சந்தோ ஸண்ஹகரணியம் பிஸித்வா நாளிகே பக்கி²த்தபண்டு³மத்திகா விய கரீஸபா⁴வம் உபக³ந்த்வா பக்காஸயம், முத்தபா⁴வம் உபக³ந்த்வா முத்தவத்தி²ஞ்ச பூரேதீதி ஏவம் பரிபக்கதோ படிக்கூலதா பச்சவேக்கி²தப்³பா³.

302. கத²ம் ப²லதோ? ஸம்மா பரிபச்சமானோ ச பனாயம் கேஸலோமனக²த³ந்தாதீ³னி நானாகுணபானி நிப்பா²தே³தி அஸம்மாபரிபச்சமானோ த³த்³து³கண்டு³கச்சு²குட்ட²கிலாஸஸோஸகாஸாதிஸாரப்பபு⁴தீனி ரோக³ஸதானி, இத³மஸ்ஸ ப²லந்தி ஏவம் ப²லதோ படிக்கூலதா பச்சவேக்கி²தப்³பா³.

303. கத²ம் நிஸ்ஸந்த³தோ? அஜ்ஜோ²ஹரியமானோ சேஸ ஏகேன த்³வாரேன பவிஸித்வா நிஸ்ஸந்த³மானோ அக்கி²ம்ஹா அக்கி²கூ³த²கோ கண்ணம்ஹா கண்ணகூ³த²கோதிஆதி³னா பகாரேன அனேகேஹி த்³வாரேஹி நிஸ்ஸந்த³தி. அஜ்ஜோ²ஹரணஸமயே சேஸ மஹாபரிவாரேனாபி அஜ்ஜோ²ஹரியதி. நிஸ்ஸந்த³னஸமயே பன உச்சாரபஸ்ஸாவாதி³பா⁴வம் உபக³தோ ஏககேனேவ நீஹரியதி. பட²மதி³வஸே ச நம் பரிபு⁴ஞ்ஜந்தோ ஹட்ட²பஹட்டோ²பி ஹோதி உத³க்³கு³த³க்³கோ³ பீதிஸோமனஸ்ஸஜாதோ. து³தியதி³வஸே நிஸ்ஸந்தே³ந்தோ பிஹிதனாஸிகோ ஹோதி விகுணிதமுகோ² ஜேகு³ச்சீ² மங்குபூ⁴தோ. பட²மதி³வஸே ச நம் ரத்தோ கி³த்³தோ⁴ க³தி⁴தோ முச்சி²தோபி அஜ்ஜோ²ஹரித்வா து³தியதி³வஸே ஏகரத்திவாஸேன விரத்தோ அட்டீயமானோ ஹராயமானோ ஜிகு³ச்ச²மானோ நீஹரதி. தேனாஹு போராணா –

‘‘அன்னம் பானம் கா²த³னீயம், போ⁴ஜனஞ்ச மஹாரஹம்;

ஏகத்³வாரேன பவிஸித்வா, நவத்³வாரேஹி ஸந்த³தி.

‘‘அன்னம் பானம் கா²த³னீயம், போ⁴ஜனஞ்ச மஹாரஹம்;

பு⁴ஞ்ஜதி ஸபரிவாரோ, நிக்கா²மேந்தோ நிலீயதி.

‘‘அன்னம் பானம் கா²த³னீயம், போ⁴ஜனஞ்ச மஹாரஹம்;

பு⁴ஞ்ஜதி அபி⁴னந்த³ந்தோ, நிக்கா²மேந்தோ ஜிகு³ச்ச²தி.

‘‘அன்னம் பானம் கா²த³னீயம், போ⁴ஜனஞ்ச மஹாரஹம்;

ஏகரத்திபரிவாஸா, ஸப்³ப³ம் ப⁴வதி பூதிக’’ந்தி.

ஏவம் நிஸ்ஸந்த³தோ படிக்கூலதா பச்சவேக்கி²தப்³பா³.

304. கத²ம் ஸம்மக்க²னதோ? பரிபோ⁴க³காலேபி சேஸ ஹத்த²ஓட்ட²ஜிவ்ஹாதாலூனி ஸம்மக்கே²தி. தானி தேன ஸம்மக்கி²தத்தா படிக்கூலானி ஹோந்தி, யானி தோ⁴தானிபி க³ந்த⁴ஹரணத்த²ம் புனப்புனம் தோ⁴விதப்³பா³னி ஹோந்தி. பரிபு⁴த்தோ ஸமானோ யதா² நாம ஓத³னே பச்சமானே து²ஸகணகுண்ட³காதீ³னி உத்தரித்வா உக்க²லிமுக²வட்டிபிதா⁴னியோ மக்க²ந்தி, ஏவமேவ ஸகலஸரீரானுக³தேன காயக்³கி³னா பே²ணுத்³தே³ஹகம் பச்சித்வா உத்தரமானோ த³ந்தே த³ந்தமலபா⁴வேன ஸம்மக்கே²தி. ஜிவ்ஹாதாலுப்பபு⁴தீனி கே²ளஸேம்ஹாதி³பா⁴வேன, அக்கி²கண்ணனாஸஅதோ⁴மக்³கா³தி³கே அக்கி²கூ³த²ககண்ணகூ³த²கஸிங்கா⁴ணிகாமுத்தகரீஸாதி³பா⁴வேன ஸம்மக்கே²தி. யேன ஸம்மக்கி²தானி இமானி த்³வாரானி தி³வஸே தி³வஸே தோ⁴வியமானானிபி நேவ ஸுசீனி, ந மனோரமானி ஹோந்தி. யேஸு ஏகச்சம் தோ⁴வித்வா ஹத்தோ² புன உத³கேன தோ⁴விதப்³போ³ ஹோதி. ஏகச்சம் தோ⁴வித்வா த்³வத்திக்க²த்தும் கோ³மயேனபி மத்திகாயபி க³ந்த⁴சுண்ணேனபி தோ⁴வதோ பாடிகுல்யதா விக³ச்ச²தீதி ஏவம் ஸம்மக்க²னதோ படிக்கூலதா பச்சவேக்கி²தப்³பா³.

305. தஸ்ஸேவம் த³ஸஹாகாரேஹி படிக்கூலதம் பச்சவேக்க²தோ தக்காஹதம் விதக்காஹதம் கரோந்தஸ்ஸ படிக்கூலாகாரவஸேன கப³ளீகாராஹாரோ பாகடோ ஹோதி. ஸோ தம் நிமித்தம் புனப்புனம் ஆஸேவதி பா⁴வேதி ப³ஹுலீகரோதி. தஸ்ஸேவம் கரோதோ நீவரணானி விக்க²ம்ப⁴ந்தி. கப³ளீகாராஹாரஸ்ஸ ஸபா⁴வத⁴ம்மதாய க³ம்பீ⁴ரத்தா அப்பனம் அப்பத்தேன உபசாரஸமாதி⁴னா சித்தம் ஸமாதி⁴யதி. படிக்கூலாகாரக்³க³ஹணவஸேன பனேத்த² ஸஞ்ஞா பாகடா ஹோதி. தஸ்மா இமம் கம்மட்டா²னம் ஆஹாரே படிக்கூலஸஞ்ஞா இச்சேவ ஸங்க²ம் க³ச்ச²தி.

இமஞ்ச பன ஆஹாரே படிக்கூலஸஞ்ஞம் அனுயுத்தஸ்ஸ பி⁴க்கு²னோ ரஸதண்ஹாய சித்தம் பதிலீயதி பதிகுடதி பதிவட்டதி. ஸோ கந்தாரனித்த²ரணத்தி²கோ விய புத்தமம்ஸம் விக³தமதோ³ ஆஹாரம் ஆஹாரேதி யாவதே³வ து³க்க²ஸ்ஸ நித்த²ரணத்தா²ய. அத²ஸ்ஸ அப்பகஸிரேனேவ கப³ளீகாராஹாரபரிஞ்ஞாமுகே²ன பஞ்சகாமகு³ணிகோ ராகோ³ பரிஞ்ஞம் க³ச்ச²தி. ஸோ பஞ்சகாமகு³ணபரிஞ்ஞாமுகே²ன ரூபக்க²ந்த⁴ம் பரிஜானாதி. அபரிபக்காதி³படிக்கூலபா⁴வவஸேன சஸ்ஸ காயக³தாஸதிபா⁴வனாபி பாரிபூரிம் க³ச்ச²தி, அஸுப⁴ஸஞ்ஞாய அனுலோமபடிபத³ம் படிபன்னோ ஹோதி. இமம் பன படிபத்திம் நிஸ்ஸாய தி³ட்டே²வ த⁴ம்மே அமதபரியோஸானதம் அனபி⁴ஸம்பு⁴ணந்தோ ஸுக³திபராயனோ ஹோதீதி.

அயம் ஆஹாரே படிக்கூலஸஞ்ஞாபா⁴வனாய வித்தா²ரகதா².

சதுதா⁴துவவத்தா²னபா⁴வனா

306. இதா³னி ஆஹாரே படிக்கூலஸஞ்ஞானந்தரம் ஏகம் வவத்தா²னந்தி ஏவம் உத்³தி³ட்ட²ஸ்ஸ சதுதா⁴துவவத்தா²னஸ்ஸ பா⁴வனானித்³தே³ஸோ அனுப்பத்தோ. தத்த² வவத்தா²னந்தி ஸபா⁴வூபலக்க²ணவஸேன ஸன்னிட்டா²னம், சதுன்னம் தா⁴தூனம் வவத்தா²னம் சதுதா⁴துவவத்தா²னம். தா⁴துமனஸிகாரோ, தா⁴துகம்மட்டா²னம், சதுதா⁴துவவத்தா²னந்தி அத்த²தோ ஏகம். தயித³ம் த்³விதா⁴ ஆக³தம் ஸங்கே²பதோ ச வித்தா²ரதோ ச. ஸங்கே²பதோ மஹாஸதிபட்டா²னே ஆக³தம். வித்தா²ரதோ மஹாஹத்தி²பதூ³பமே ராஹுலோவாதே³ தா⁴துவிப⁴ங்கே³ ச. தஞ்ஹி –

‘‘ஸேய்யதா²பி, பி⁴க்க²வே, த³க்கோ² கோ³கா⁴தகோ வா கோ³கா⁴தகந்தேவாஸீ வா கா³விம் வதி⁴த்வா சதுமஹாபதே² பி³லஸோ விப⁴ஜித்வா நிஸின்னோ அஸ்ஸ, ஏவமேவ கோ², பி⁴க்க²வே, பி⁴க்கு² இமமேவ காயம் யதா²டி²தம் யதா²பணிஹிதம் தா⁴துஸோ பச்சவேக்க²தி, அத்தி² இமஸ்மிம் காயே பத²வீதா⁴து ஆபோதா⁴து தேஜோதா⁴து வாயோதா⁴தூ’’தி –

ஏவம் திக்க²பஞ்ஞஸ்ஸ தா⁴துகம்மட்டா²னிகஸ்ஸ வஸேன மஹாஸதிபட்டா²னே (தீ³. நி. 2.378) ஸங்கே²பதோ ஆக³தம்.

தஸ்ஸத்தோ² – யதா² சே²கோ கோ³கா⁴தகோ வா தஸ்ஸேவ வா ப⁴த்தவேதனப⁴தோ அந்தேவாஸிகோ கா³விம் வதி⁴த்வா வினிவிஜ்ஜி²த்வா சதஸ்ஸோ தி³ஸா க³தானம் மஹாபதா²னம் வேமஜ்ஜ²ட்டா²னஸங்கா²தே சதுமஹாபதே² கோட்டா²ஸம் கத்வா நிஸின்னோ அஸ்ஸ, ஏவமேவ பி⁴க்கு² சதுன்னம் இரியாபதா²னம் யேன கேனசி ஆகாரேன டி²தத்தா யதா²டி²தம். யதா²டி²தத்தாவ யதா²பணிஹிதம் காயம் அத்தி² இமஸ்மிம் காயே பத²வீதா⁴து…பே… வாயோதா⁴தூதி ஏவம் தா⁴துஸோ பச்சவேக்க²தி.

கிம் வுத்தம் ஹோதி? யதா² கோ³கா⁴தகஸ்ஸ கா³விம் போஸேந்தஸ்ஸபி ஆகா⁴தனம் ஆஹரந்தஸ்ஸபி ஆஹரித்வா தத்த² ப³ந்தி⁴த்வா ட²பேந்தஸ்ஸபி வத⁴ந்தஸ்ஸபி வதி⁴தம் மதம் பஸ்ஸந்தஸ்ஸபி தாவதே³வ கா³வீதிஸஞ்ஞா ந அந்தரதா⁴யதி, யாவ நம் பதா³லேத்வா பி³லஸோ ந விப⁴ஜதி. விப⁴ஜித்வா நிஸின்னஸ்ஸ பன கா³வீஸஞ்ஞா அந்தரதா⁴யதி, மம்ஸஸஞ்ஞா பவத்ததி. நாஸ்ஸ ஏவம் ஹோதி ‘‘அஹம் கா³விம் விக்கிணாமி, இமே கா³விம் ஹரந்தீ’’தி. அத² க்²வஸ்ஸ ‘‘அஹம் மம்ஸம் விக்கிணாமி, இமேபி மம்ஸம் ஹரந்தி’’ச்சேவ ஹோதி, ஏவமேவ இமஸ்ஸாபி பி⁴க்கு²னோ புப்³பே³ பா³லபுது²ஜ்ஜனகாலே கி³ஹிபூ⁴தஸ்ஸபி பப்³ப³ஜிதஸ்ஸபி தாவதே³வ ஸத்தோதி வா போஸோதி வா புக்³க³லோதி வா ஸஞ்ஞா ந அந்தரதா⁴யதி, யாவ இமமேவ காயம் யதா²டி²தம் யதா²பணிஹிதம் க⁴னவினிப்³போ⁴க³ம் கத்வா தா⁴துஸோ ந பச்சவேக்க²தி. தா⁴துஸோ பச்சவேக்க²தோ பன ஸத்தஸஞ்ஞா அந்தரதா⁴யதி, தா⁴துவஸேனேவ சித்தம் ஸந்திட்ட²தி. தேனாஹ ப⁴க³வா ‘‘ஸேய்யதா²பி, பி⁴க்க²வே, த³க்கோ² கோ³கா⁴தகோ வா…பே… நிஸின்னோ அஸ்ஸ, ஏவமேவ கோ², பி⁴க்க²வே, பி⁴க்கு²…பே… வாயோதா⁴தூ’’தி.

307. மஹாஹத்தி²பதூ³பமே (ம. நி. 1.300 ஆத³யோ) பன – ‘‘கதமா சாவுஸோ, அஜ்ஜ²த்திகா பத²வீதா⁴து? யம் அஜ்ஜ²த்தம் பச்சத்தம் கக்க²ளம் க²ரிக³தம் உபாதி³ன்னம். ஸேய்யதி²த³ம், கேஸா லோமா…பே… உத³ரியம் கரீஸம், யம் வா பனஞ்ஞம்பி கிஞ்சி அஜ்ஜ²த்தம் பச்சத்தம் கக்க²ளம் க²ரிக³தம் உபாதி³ன்னம், அயம் வுச்சதி, ஆவுஸோ, அஜ்ஜ²த்திகா பத²வீதா⁴தூ’’தி ச,

‘‘கதமா சாவுஸோ, அஜ்ஜ²த்திகா ஆபோதா⁴து? யம் அஜ்ஜ²த்தம் பச்சத்தம் ஆபோ ஆபோக³தம் உபாதி³ன்னம். ஸேய்யதி²த³ம், பித்தம்…பே… முத்தம், யம் வா பனஞ்ஞம்பி கிஞ்சி அஜ்ஜ²த்தம் பச்சத்தம் ஆபோ ஆபோக³தம் உபாதி³ன்னம், அயம் வுச்சதாவுஸோ, அஜ்ஜ²த்திகா ஆபோதா⁴தூ’’தி ச,

‘‘கதமா சாவுஸோ, அஜ்ஜ²த்திகா தேஜோதா⁴து? யம் அஜ்ஜ²த்தம் பச்சத்தம் தேஜோ தேஜோக³தம் உபாதி³ன்னம். ஸேய்யதி²த³ம், யேன ச ஸந்தப்பதி, யேன ச ஜீரீயதி, யேன ச பரிட³ய்ஹதி, யேன ச அஸிதபீதகா²யிதஸாயிதம் ஸம்மா பரிணாமம் க³ச்ச²தி, யம் வா பனஞ்ஞம்பி கிஞ்சி அஜ்ஜ²த்தம் பச்சத்தம் தேஜோ தேஜோக³தம் உபாதி³ன்னம், அயம் வுச்சதாவுஸோ, அஜ்ஜ²த்திகா தேஜோதா⁴தூ’’தி ச,

‘‘கதமா சாவுஸோ, அஜ்ஜ²த்திகா வாயோதா⁴து? யம் அஜ்ஜ²த்தம் பச்சத்தம் வாயோ வாயோக³தம் உபாதி³ன்னம். ஸேய்யதி²த³ம், உத்³த⁴ங்க³மா வாதா, அதோ⁴க³மா வாதா, குச்சி²ஸயா வாதா, கோட்டா²ஸயா வாதா, அங்க³மங்கா³னுஸாரினோ வாதா, அஸ்ஸாஸோ பஸ்ஸாஸோ இதி வா, யம் வா பனஞ்ஞம்பி கிஞ்சி அஜ்ஜ²த்தம் பச்சத்தம் வாயோ வாயோக³தம் உபாதி³ன்னம், அயம் வுச்சதாவுஸோ, அஜ்ஜ²த்திகா வாயோதா⁴தூ’’தி ச –

ஏவம் நாதிதிக்க²பஞ்ஞஸ்ஸ தா⁴துகம்மட்டா²னிகஸ்ஸ வஸேன வித்தா²ரதோ ஆக³தம். யதா² சேத்த², ஏவம் ராஹுலோவாத³தா⁴துவிப⁴ங்கே³ஸுபி.

தத்ராயம் அனுத்தானபத³வண்ணனா, அஜ்ஜ²த்தம் பச்சத்தந்தி இத³ம் தாவ உப⁴யம்பி நியகஸ்ஸ அதி⁴வசனம். நியகம் நாம அத்தனி ஜாதம் ஸஸந்தானபரியாபன்னந்தி அத்தோ². தயித³ம் யதா² லோகே இத்தீ²ஸு கதா² அதி⁴த்தீ²தி வுச்சதி, ஏவம் அத்தனி பவத்தத்தா அஜ்ஜ²த்தம், அத்தானம் படிச்ச படிச்ச பவத்தத்தா பச்சத்தந்திபி வுச்சதி. கக்க²ளந்தி த²த்³த⁴ம். க²ரிக³தந்தி ப²ருஸம். தத்த² பட²மம் லக்க²ணவசனம், து³தியம் ஆகாரவசனம், கக்க²ளலக்க²ணா ஹி பத²வீதா⁴து, ஸா ப²ருஸாகாரா ஹோதி, தஸ்மா க²ரிக³தந்தி வுத்தா. உபாதி³ன்னந்தி த³ள்ஹம் ஆதி³ன்னம், அஹம் மமந்தி ஏவம் த³ள்ஹம் ஆதி³ன்னம், க³ஹிதம் பராமட்ட²ந்தி அத்தோ². ஸேய்யதி²த³ந்தி நிபாதோ. தஸ்ஸ தம் கதமந்தி சேதி அத்தோ². ததோ தம் த³ஸ்ஸேந்தோ ‘‘கேஸா லோமா’’திஆதி³மாஹ. ஏத்த² ச மத்த²லுங்க³ம் பக்கி²பித்வா வீஸதியா ஆகாரேஹி பத²வீதா⁴து நித்³தி³ட்டா²தி வேதி³தப்³பா³. யம் வா பனஞ்ஞம்பி கிஞ்சீதி அவஸேஸேஸு தீஸு கோட்டா²ஸேஸு பத²வீதா⁴து ஸங்க³ஹிதா.

விஸ்ஸந்த³னபா⁴வேன தம் தம் டா²னம் அப்போதீதி ஆபோ. கம்மஸமுட்டா²னாதி³வஸேன நானாவிதே⁴ஸு ஆபேஸு க³தந்தி ஆபோக³தம். கிம் தம்? ஆபோதா⁴துயா ஆப³ந்த⁴னலக்க²ணம்.

தேஜனவஸேன தேஜோ, வுத்தனயேனேவ தேஜேஸு க³தந்தி தேஜோக³தம். கிம் தம்? உண்ஹத்தலக்க²ணம். யேன சாதி யேன தேஜோதா⁴துக³தேன குபிதேன அயம் காயோ ஸந்தப்பதி, ஏகாஹிகஜராதி³பா⁴வேன உஸுமஜாதோ ஹோதி. யேன ச ஜீரீயதீதி யேன அயம் காயோ ஜீரதி, இந்த்³ரியவேகல்லதம் ப³லபரிக்க²யம் வலிபலிதாதி³பா⁴வஞ்ச பாபுணாதி. யேன ச பரிட³ய்ஹதீதி யேன குபிதேன அயம் காயோ ட³ய்ஹதி. ஸோ ச புக்³க³லோ ‘‘ட³ய்ஹாமி ட³ய்ஹாமீ’’தி கந்த³ந்தோ ஸததோ⁴தஸப்பிகோ³ஸீஸசந்த³னாதி³லேபஞ்சேவ தாலவண்டவாதஞ்ச பச்சாஸீஸதி. யேன ச அஸிதபீதகா²யிதஸாயிதம் ஸம்மா பரிணாமம் க³ச்ச²தீதி யேனேதம் அஸிதம் வா ஓத³னாதி³ பீதம் வா பானகாதி³ கா²யிதம் வா பிட்ட²க²ஜ்ஜகாதி³ ஸாயிதம் வா அம்ப³பக்கமது⁴பா²ணிதாதி³ ஸம்மா பரிபாகம் க³ச்ச²தி, ரஸாதி³பா⁴வேன விவேகம் க³ச்ச²தீதி அத்தோ². ஏத்த² ச புரிமா தயோ தேஜோதா⁴துஸமுட்டா²னா. பச்சி²மோ கம்மஸமுட்டா²னோவ.

வாயனவஸேன வாயோ, வுத்தனயேனேவ வாயேஸு க³தந்தி வாயோக³தம். கிம் தம்? வித்த²ம்ப⁴னலக்க²ணம். உத்³த⁴ங்க³மா வாதாதி உக்³கா³ரஹிக்காதி³பவத்தகா உத்³த⁴ம் ஆரோஹணவாதா. அதோ⁴க³மா வாதாதி உச்சாரபஸ்ஸாவாதி³னீஹரணகா அதோ⁴ ஓரோஹணவாதா. குச்சி²ஸயா வாதாதி அந்தானம் ப³ஹிவாதா. கோட்டா²ஸயா வாதாதி அந்தானம் அந்தோவாதா. அங்க³மங்கா³னுஸாரினோ வாதாதி த⁴மனிஜாலானுஸாரேன ஸகலஸரீரே அங்க³மங்கா³னி அனுஸடா ஸமிஞ்ஜனபஸாரணாதி³னிப்³ப³த்தகா வாதா. அஸ்ஸாஸோதி அந்தோபவிஸனனாஸிகவாதோ. பஸ்ஸாஸோதி ப³ஹினிக்க²மனனாஸிகவாதோ. ஏத்த² ச புரிமா பஞ்ச சதுஸமுட்டா²னா. அஸ்ஸாஸபஸ்ஸாஸா சித்தஸமுட்டா²னாவ. ஸப்³ப³த்த² யம் வா பனஞ்ஞம்பி கிஞ்சீதி இமினா பதே³ன அவஸேஸகோட்டா²ஸேஸு ஆபோதா⁴துஆத³யோ ஸங்க³ஹிதா.

இதி வீஸதியா ஆகாரேஹி பத²வீதா⁴து, த்³வாத³ஸஹி ஆபோதா⁴து, சதூஹி தேஜோதா⁴து, ச²ஹி வாயோதா⁴தூதி த்³வாசத்தாலீஸாய ஆகாரேஹி சதஸ்ஸோ தா⁴துயோ வித்தா²ரிதா ஹோந்தீதி அயம் தாவேத்த² பாளிவண்ணனா.

308. பா⁴வனானயே பனேத்த² திக்க²பஞ்ஞஸ்ஸ பி⁴க்கு²னோ கேஸா பத²வீதா⁴து, லோமா பத²வீதா⁴தூதி ஏவம் வித்தா²ரதோ தா⁴துபரிக்³க³ஹோ பபஞ்சதோ உபட்டா²தி. யம் த²த்³த⁴லக்க²ணம், அயம் பத²வீதா⁴து. யம் ஆப³ந்த⁴னலக்க²ணம், அயம் ஆபோதா⁴து. யம் பரிபாசனலக்க²ணம், அயம் தேஜோதா⁴து. யம் வித்த²ம்ப⁴னலக்க²ணம், அயம் வாயோதா⁴தூதி ஏவம் மனஸிகரோதோ பனஸ்ஸ கம்மட்டா²னம் பாகடம் ஹோதி. நாதிதிக்க²பஞ்ஞஸ்ஸ பன ஏவம் மனஸிகரோதோ அந்த⁴காரம் அவிபூ⁴தம் ஹோதி. புரிமனயேன வித்தா²ரதோ மனஸிகரோந்தஸ்ஸ பாகடம் ஹோதி.

கத²ம்? யதா² த்³வீஸு பி⁴க்கூ²ஸு ப³ஹுபேய்யாலம் தந்திம் ஸஜ்ஜா²யந்தேஸு திக்க²பஞ்ஞோ பி⁴க்கு² ஸகிம் வா த்³விக்க²த்தும் வா பேய்யாலமுக²ம் வித்தா²ரேத்வா ததோ பரம் உப⁴தோகோடிவஸேனேவ ஸஜ்ஜா²யம் கரோந்தோ க³ச்ச²தி. தத்ர நாதிதிக்க²பஞ்ஞோ ஏவம் வத்தா ஹோதி ‘‘கிம் ஸஜ்ஜா²யோ நாமேஸ ஓட்ட²பரியாஹதமத்தம் காதும் ந தே³தி, ஏவம் ஸஜ்ஜா²யே கரியமானே கதா³ தந்தி பகு³ணா ப⁴விஸ்ஸதீ’’தி. ஸோ ஆக³தாக³தம் பேய்யாலமுக²ம் வித்தா²ரேத்வாவ ஸஜ்ஜா²யம் கரோதி. தமேனம் இதரோ ஏவமாஹ – ‘‘கிம் ஸஜ்ஜா²யோ நாமேஸ பரியோஸானம் க³ந்தும் ந தே³தி, ஏவம் ஸஜ்ஜா²யே கரியமானே கதா³ தந்தி பரியோஸானம் க³மிஸ்ஸதீ’’தி. ஏவமேவ திக்க²பஞ்ஞஸ்ஸ கேஸாதி³வஸேன வித்தா²ரதோ தா⁴துபரிக்³க³ஹோ பபஞ்சதோ உபட்டா²தி. யம் த²த்³த⁴லக்க²ணம், அயம் பத²வீதா⁴தூதிஆதி³னா நயேன ஸங்கே²பதோ மனஸிகரோதோ கம்மட்டா²னம் பாகடம் ஹோதி. இதரஸ்ஸ ததா² மனஸிகரோதோ அந்த⁴காரம் அவிபூ⁴தம் ஹோதி. கேஸாதி³வஸேன வித்தா²ரதோ மனஸிகரோந்தஸ்ஸ பாகடம் ஹோதி.

தஸ்மா இமம் கம்மட்டா²னம் பா⁴வேதுகாமேன திக்க²பஞ்ஞேன தாவ ரஹோக³தேன படிஸல்லீனேன ஸகலம்பி அத்தனோ ரூபகாயம் ஆவஜ்ஜேத்வா யோ இமஸ்மிம் காயே த²த்³த⁴பா⁴வோ வா க²ரபா⁴வோ வா, அயம் பத²வீதா⁴து. யோ ஆப³ந்த⁴னபா⁴வோ வா த்³ரவபா⁴வோ வா, அயம் ஆபோதா⁴து. யோ பரிபாசனபா⁴வோ வா உண்ஹபா⁴வோ வா, அயம் தேஜோதா⁴து. யோ வித்த²ம்ப⁴னபா⁴வோ வா ஸமுதீ³ரணபா⁴வோ வா, அயம் வாயோதா⁴தூதி ஏவம் ஸம்கி²த்தேன தா⁴துயோ பரிக்³க³ஹேத்வா புனப்புனம் பத²வீதா⁴து ஆபோதா⁴தூதி தா⁴துமத்ததோ நிஸ்ஸத்ததோ நிஜ்ஜீவதோ ஆவஜ்ஜிதப்³ப³ம் மனஸிகாதப்³ப³ம் பச்சவேக்கி²தப்³ப³ம். தஸ்ஸேவம் வாயமமானஸ்ஸ நசிரேனேவ தா⁴துப்பபே⁴தா³வபா⁴ஸனபஞ்ஞாபரிக்³க³ஹிதோ ஸபா⁴வத⁴ம்மாரம்மணத்தா அப்பனம் அப்பத்தோ உபசாரமத்தோ ஸமாதி⁴ உப்பஜ்ஜதி.

அத² வா பன யே இமே சதுன்னம் மஹாபூ⁴தானம் நிஸ்ஸத்தபா⁴வத³ஸ்ஸனத்த²ம் த⁴ம்மஸேனாபதினா ‘‘அட்டி²ஞ்ச படிச்ச ந்ஹாருஞ்ச படிச்ச மம்ஸஞ்ச படிச்ச சம்மஞ்ச படிச்ச ஆகாஸோ பரிவாரிதோ ரூபந்த்வேவ ஸங்க²ம் க³ச்ச²தீ’’தி (ம. நி. 1.306) சத்தாரோ கோட்டா²ஸா வுத்தா. தேஸு தம் தம் அந்தரானுஸாரினா ஞாணஹத்தே²ன வினிப்³பு⁴ஜித்வா வினிப்³பு⁴ஜித்வா யோ ஏதேஸு த²த்³த⁴பா⁴வோ வா க²ரபா⁴வோ வா, அயம் பத²வீதா⁴தூதி புரிமனயேனேவ தா⁴துயோ பரிக்³க³ஹேத்வா புனப்புனம் பத²வீதா⁴து ஆபோதா⁴தூதி தா⁴துமத்ததோ நிஸ்ஸத்ததோ நிஜ்ஜீவதோ ஆவஜ்ஜிதப்³ப³ம் மனஸிகாதப்³ப³ம் பச்சவேக்கி²தப்³ப³ம். தஸ்ஸேவம் வாயமமானஸ்ஸ நசிரேனேவ தா⁴துப்பபே⁴தா³வபா⁴ஸனபஞ்ஞாபரிக்³க³ஹிதோ ஸபா⁴வத⁴ம்மாரம்மணத்தா அப்பனம் அப்பத்தோ உபசாரமத்தோ ஸமாதி⁴ உப்பஜ்ஜதி. அயம் ஸங்கே²பதோ ஆக³தே சதுதா⁴துவவத்தா²னே பா⁴வனானயோ.

309. வித்தா²ரதோ ஆக³தே பன ஏவம் வேதி³தப்³போ³. இத³ம் கம்மட்டா²னம் பா⁴வேதுகாமேன ஹி நாதிதிக்க²பஞ்ஞேன யோகி³னா ஆசரியஸந்திகே த்³வாசத்தாலீஸாய ஆகாரேஹி வித்தா²ரதோ தா⁴துயோ உக்³க³ண்ஹித்வா வுத்தப்பகாரே ஸேனாஸனே விஹரந்தேன கதஸப்³ப³கிச்சேன ரஹோக³தேன படிஸல்லீனேன ஸஸம்பா⁴ரஸங்கே²பதோ, ஸஸம்பா⁴ரவிப⁴த்திதோ, ஸலக்க²ணஸங்கே²பதோ, ஸலக்க²ணவிப⁴த்திதோதி ஏவம் சதூஹாகாரேஹி கம்மட்டா²னம் பா⁴வேதப்³ப³ம்.

தத்த² கத²ம் ஸஸம்பா⁴ரஸங்கே²பதோ பா⁴வேதி? இத⁴ பி⁴க்கு² வீஸதியா கோட்டா²ஸேஸு த²த்³தா⁴காரம் பத²வீதா⁴தூதி வவத்த²பேதி. த்³வாத³ஸஸு கோட்டா²ஸேஸு யூஸக³தம் உத³கஸங்கா²தம் ஆப³ந்த⁴னாகாரம் ஆபோதா⁴தூதி வவத்த²பேதி. சதூஸு கோட்டா²ஸேஸு பரிபாசனகம் தேஜம் தேஜோதா⁴தூதி வவத்த²பேதி. ச²ஸு கோட்டா²ஸேஸு வித்த²ம்ப⁴னாகாரம் வாயோதா⁴தூதி வவத்த²பேதி. தஸ்ஸேவம் வவத்தா²பயதோயேவ தா⁴துயோ பாகடா ஹோந்தி. தா புனப்புனம் ஆவஜ்ஜதோ மனஸிகரோதோ வுத்தனயேனேவ உபசாரஸமாதி⁴ உப்பஜ்ஜதி.

310. யஸ்ஸ பன ஏவம் பா⁴வயதோ கம்மட்டா²னம் ந இஜ்ஜ²தி, தேன ஸஸம்பா⁴ரவிப⁴த்திதோ பா⁴வேதப்³ப³ம். கத²ம்? தேன ஹி பி⁴க்கு²னா யம் தம் காயக³தாஸதிகம்மட்டா²னனித்³தே³ஸே ஸத்ததா⁴ உக்³க³ஹகோஸல்லம் த³ஸதா⁴ மனஸிகாரகோஸல்லஞ்ச வுத்தம். த்³வத்திம்ஸாகாரே தாவ தம் ஸப்³ப³ம் அபரிஹாபேத்வா தசபஞ்சகாதீ³னம் அனுலோமபடிலோமதோ வசஸா ஸஜ்ஜா²யம் ஆதி³ம்கத்வா ஸப்³ப³ம் தத்த² வுத்தவிதா⁴னம் காதப்³ப³ம். அயமேவ ஹி விஸேஸோ, தத்த² வண்ணஸண்டா²னதி³ஸோகாஸபரிச்சே²த³வஸேன கேஸாத³யோ மனஸிகரித்வாபி படிக்கூலவஸேன சித்தம் ட²பேதப்³ப³ம், இத⁴ தா⁴துவஸேன. தஸ்மா வண்ணாதி³வஸேன பஞ்சதா⁴ பஞ்சதா⁴ கேஸாத³யோ மனஸிகரித்வா அவஸானே ஏவம் மனஸிகாரோ பவத்தேதப்³போ³.

311. இமே கேஸா நாம ஸீஸகடாஹபலிவேட²னசம்மே ஜாதா. தத்த² யதா²வம்மிகமத்த²கே ஜாதேஸு குண்ட²திணேஸு ந வம்மிகமத்த²கோ ஜானாதி மயி குண்ட²திணானி ஜாதானீதி, நபி குண்ட²திணானி ஜானந்தி மயம் வம்மிகமத்த²கே ஜாதானீதி, ஏவமேவ ந ஸீஸகடாஹபலிவேட²னசம்மம் ஜானாதி மயி கேஸா ஜாதாதி, நபி கேஸா ஜானந்தி மயம் ஸீஸகடாஹவேட²னசம்மே ஜாதாதி, அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி கேஸா நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

312. லோமா ஸரீரவேட²னசம்மே ஜாதா. தத்த² யதா² ஸுஞ்ஞகா³மட்டா²னே ஜாதேஸு த³ப்³ப³திணகேஸு ந ஸுஞ்ஞகா³மட்டா²னம் ஜானாதி மயி த³ப்³ப³திணகானி ஜாதானீதி, நபி த³ப்³ப³திணகானி ஜானந்தி மயம் ஸுஞ்ஞகா³மட்டா²னே ஜாதானீதி, ஏவமேவ ந ஸரீரவேட²னசம்மம் ஜானாதி மயி லோமா ஜாதாதி. நபி லோமா ஜானந்தி மயம் ஸரீரவேட²னசம்மே ஜாதாதி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி லோமா நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

313. நகா² அங்கு³லீனம் அக்³கே³ஸு ஜாதா. தத்த² யதா² குமாரகேஸு த³ண்ட³கேஹி மது⁴கட்டி²கே விஜ்ஜி²த்வா கீளந்தேஸு ந த³ண்ட³கா ஜானந்தி அம்ஹேஸு மது⁴கட்டி²கா ட²பிதாதி, நபி மது⁴கட்டி²கா ஜானந்தி மயம் த³ண்ட³கேஸு ட²பிதாதி, ஏவமேவ ந அங்கு³லியோ ஜானந்தி அம்ஹாகம் அக்³கே³ஸு நகா² ஜாதாதி. நபி நகா² ஜானந்தி மயம் அங்கு³லீனம் அக்³கே³ஸு ஜாதாதி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி நகா² நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

314. த³ந்தா ஹனுகட்டி²கேஸு ஜாதா. தத்த² யதா² வட்³ட⁴கீஹி பாஸாணஉது³க்க²லகேஸு கேனசிதே³வ ஸிலேஸஜாதேன ப³ந்தி⁴த்வா ட²பிதத²ம்பே⁴ஸு ந உது³க்க²லா ஜானந்தி அம்ஹேஸு த²ம்பா⁴ டி²தாதி. நபி த²ம்பா⁴ ஜானந்தி மயம் உது³க்க²லேஸு டி²தாதி, ஏவமேவ ந ஹனுகட்டீ²னி ஜானந்தி அம்ஹேஸு த³ந்தா ஜாதாதி. நபி த³ந்தா ஜானந்தி மயம் ஹனுகட்டீ²ஸு ஜாதாதி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி த³ந்தா நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

315. தசோ ஸகலஸரீரம் பரியோனந்தி⁴த்வா டி²தோ. தத்த² யதா² அல்லகோ³சம்மபரியோனத்³தா⁴ய மஹாவீணாய ந மஹாவீணா ஜானாதி அஹம் அல்லகோ³சம்மேன பரியோனத்³தா⁴தி. நபி அல்லகோ³சம்மம் ஜானாதி மயா மஹாவீணா பரியோனத்³தா⁴தி, ஏவமேவ ந ஸரீரம் ஜானாதி அஹம் தசேன பரியோனத்³த⁴ந்தி. நபி தசோ ஜானாதி மயா ஸரீரம் பரியோனத்³த⁴ந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி தசோ நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

316. மம்ஸம் அட்டி²ஸங்கா⁴டம் அனுலிம்பித்வா டி²தம். தத்த² யதா² மஹாமத்திகலித்தாய பி⁴த்தியா ந பி⁴த்தி ஜானாதி அஹம் மஹாமத்திகாய லித்தாதி. நபி மஹாமத்திகா ஜானாதி மயா பி⁴த்தி லித்தாதி, ஏவமேவ ந அட்டி²ஸங்கா⁴டோ ஜானாதி அஹம் நவபேஸிஸதப்பபே⁴தே³ன மம்ஸேன லித்தோதி. நபி மம்ஸம் ஜானாதி மயா அட்டி²ஸங்கா⁴டோ லித்தோதி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி மம்ஸம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

317. ந்ஹாரு ஸரீரப்³ப⁴ந்தரே அட்டீ²னி ஆப³ந்த⁴மானா டி²தா. தத்த² யதா² வல்லீஹி வினத்³தே⁴ஸு குட்டதா³ரூஸு ந குட்டதா³ரூனி ஜானந்தி மயம் வல்லீஹி வினத்³தா⁴னீதி. நபி வல்லியோ ஜானந்தி அம்ஹேஹி குட்டதா³ரூனி வினத்³தா⁴னீதி, ஏவமேவ ந அட்டீ²னி ஜானந்தி மயம் ந்ஹாரூஹி ஆப³த்³தா⁴னீதி. நபி ந்ஹாரூ ஜானந்தி அம்ஹேஹி அட்டீ²னி ஆப³த்³தா⁴னீதி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி ந்ஹாரு நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

318. அட்டீ²ஸு பண்ஹிகட்டி² கோ³ப்ப²கட்டி²ம் உக்கி²பித்வா டி²தம். கோ³ப்ப²கட்டி² ஜங்க⁴ட்டி²ம் உக்கி²பித்வா டி²தம். ஜங்க⁴ட்டி² ஊருட்டி²ம் உக்கி²பித்வா டி²தம். ஊருட்டி² கடிட்டி²ம் உக்கி²பித்வா டி²தம். கடிட்டி² பிட்டி²கண்டகம் உக்கி²பித்வா டி²தம், பிட்டி²கண்டகோ கீ³வட்டி²ம் உக்கி²பித்வா டி²தோ. கீ³வட்டி² ஸீஸட்டி²ம் உக்கி²பித்வா டி²தம். ஸீஸட்டி² கீ³வட்டி²கே பதிட்டி²தம். கீ³வட்டி² பிட்டி²கண்டகே பதிட்டி²தம். பிட்டி²கண்டகோ கடிட்டி²ம்ஹி பதிட்டி²தோ. கடிட்டி² ஊருட்டி²கே பதிட்டி²தம். ஊருட்டி² ஜங்க⁴ட்டி²கே பதிட்டி²தம். ஜங்க⁴ட்டி² கோ³ப்ப²கட்டி²கே பதிட்டி²தம். கோ³ப்ப²கட்டி² பண்ஹிகட்டி²கே பதிட்டி²தம்.

தத்த² யதா² இட்ட²கதா³ருகோ³மயாதி³ஸஞ்சயேஸு ந ஹேட்டி²மா ஹேட்டி²மா ஜானந்தி மயம் உபரிமே உபரிமே உக்கி²பித்வா டி²தாதி. நபி உபரிமா உபரிமா ஜானந்தி மயம் ஹேட்டி²மேஸு ஹேட்டி²மேஸு பதிட்டி²தாதி, ஏவமேவ ந பண்ஹிகட்டி² ஜானாதி அஹம் கோ³ப்ப²கட்டி²ம் உக்கி²பித்வா டி²தந்தி. ந கோ³ப்ப²கட்டி² ஜானாதி அஹம் ஜங்க⁴ட்டி²ம் உக்கி²பித்வா டி²தந்தி. ந ஜங்க⁴ட்டி² ஜானாதி அஹம் ஊருட்டி²ம் உக்கி²பித்வா டி²தந்தி. ந ஊருட்டி² ஜானாதி அஹம் கடிட்டி²ம் உக்கி²பித்வா டி²தந்தி. ந கடிட்டி² ஜானாதி அஹம் பிட்டி²கண்டகம் உக்கி²பித்வா டி²தந்தி. ந பிட்டி²கண்டகோ ஜானாதி அஹம் கீ³வட்டி²ம் உக்கி²பித்வா டி²தந்தி. ந கீ³வட்டி² ஜானாதி அஹம் ஸீஸட்டி²ம் உக்கி²பித்வா டி²தந்தி. ந ஸீஸட்டி² ஜானாதி அஹம் கீ³வட்டி²ம்ஹி பதிட்டி²தந்தி. ந கீ³வட்டி² ஜானாதி அஹம் பிட்டி²கண்டகே பதிட்டி²தந்தி. ந பிட்டி²கண்டகோ ஜானாதி அஹம் கடிட்டி²ம்ஹி பதிட்டி²தோதி. ந கடிட்டி² ஜானாதி அஹம் ஊருட்டி²ம்ஹி பதிட்டி²தந்தி. ந ஊருட்டி² ஜானாதி அஹம் ஜங்க⁴ட்டி²ம்ஹி பதிட்டி²தந்தி. ந ஜங்க⁴ட்டி² ஜானாதி அஹம் கோ³ப்ப²கட்டி²ம்ஹி பதிட்டி²தந்தி. ந கோ³ப்ப²கட்டி² ஜானாதி அஹம் பண்ஹிகட்டி²ம்ஹி பதிட்டி²தந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி அட்டி² நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

319. அட்டி²மிஞ்ஜம் தேஸம் தேஸம் அட்டீ²னம் அப்³ப⁴ந்தரே டி²தம். தத்த² யதா² வேளுபப்³பா³தீ³னம் அந்தோ பக்கி²த்தசி²ன்னவேத்தக்³கா³தீ³ஸு ந வேளுபப்³பா³தீ³னி ஜானந்தி அம்ஹேஸு வேத்தக்³கா³தீ³னி பக்கி²த்தானீதி. நபி வேத்தக்³கா³தீ³னி ஜானந்தி மயம் வேளுபப்³பா³தீ³ஸு டி²தானீதி, ஏவமேவ ந அட்டீ²னி ஜானந்தி அம்ஹாகம் அந்தோ மிஞ்ஜம் டி²தந்தி. நாபி மிஞ்ஜம் ஜானாதி அஹம் அட்டீ²னம் அந்தோ டி²தந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி அட்டி²மிஞ்ஜம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

320. வக்கம் க³லவாடகதோ நிக்க²ந்தேன ஏகமூலேன தோ²கம் க³ந்த்வா த்³விதா⁴ பி⁴ன்னேன தூ²லன்ஹாருனா வினிப³த்³த⁴ம் ஹுத்வா ஹத³யமம்ஸம் பரிக்கி²பித்வா டி²தம். தத்த² யதா² வண்டுபனிப³த்³தே⁴ அம்ப³ப²லத்³வயே ந வண்டம் ஜானாதி மயா அம்ப³ப²லத்³வயம் உபனிப³த்³த⁴ந்தி. நபி அம்ப³ப²லத்³வயம் ஜானாதி அஹம் வண்டேன உபனிப³த்³த⁴ந்தி, ஏவமேவ ந தூ²லன்ஹாரு ஜானாதி மயா வக்கம் உபனிப³த்³த⁴ந்தி. நபி வக்கம் ஜானாதி அஹம் தூ²லன்ஹாருனா உபனிப³த்³த⁴ந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி வக்கம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

321. ஹத³யம் ஸரீரப்³ப⁴ந்தரே உரட்டி²பஞ்ஜரமஜ்ஜ²ம் நிஸ்ஸாய டி²தம். தத்த² யதா² ஜிண்ணஸந்த³மானிகபஞ்ஜரம் நிஸ்ஸாய ட²பிதாய மம்ஸபேஸியா ந ஸந்த³மானிகபஞ்ஜரப்³ப⁴ந்தரம் ஜானாதி மம் நிஸ்ஸாய மம்ஸபேஸி டி²தாதி. நபி மம்ஸபேஸி ஜானாதி அஹம் ஜிண்ணஸந்த³மானிகபஞ்ஜரம் நிஸ்ஸாய டி²தாதி, ஏவமேவ ந உரட்டி²பஞ்ஜரப்³ப⁴ந்தரம் ஜானாதி மம் நிஸ்ஸாய ஹத³யம் டி²தந்தி. நபி ஹத³யம் ஜானாதி அஹம் உரட்டி²பஞ்ஜரம் நிஸ்ஸாய டி²தந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி ஹத³யம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

322. யகனம் அந்தோஸரீரே த்³வின்னம் த²னானமப்³ப⁴ந்தரே த³க்கி²ணபஸ்ஸம் நிஸ்ஸாய டி²தம். தத்த² யதா² உக்க²லிகபாலபஸ்ஸம்ஹி லக்³கே³ யமகமம்ஸபிண்டே³ ந உக்க²லிகபாலபஸ்ஸம் ஜானாதி மயி யமகமம்ஸபிண்டோ³ லக்³கோ³தி. நபி யமகமம்ஸபிண்டோ³ ஜானாதி அஹம் உக்க²லிகபாலபஸ்ஸே லக்³கோ³தி, ஏவமேவ ந த²னானமப்³ப⁴ந்தரே த³க்கி²ணபஸ்ஸம் ஜானாதி மம் நிஸ்ஸாய யகனம் டி²தந்தி. நபி யகனம் ஜானாதி அஹம் த²னானமப்³ப⁴ந்தரே த³க்கி²ணபஸ்ஸம் நிஸ்ஸாய டி²தந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி யகனம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

323. கிலோமகேஸு படிச்ச²ன்னகிலோமகம் ஹத³யஞ்ச வக்கஞ்ச பரிவாரேத்வா டி²தம். அப்படிச்ச²ன்னகிலோமகம் ஸகலஸரீரே சம்மஸ்ஸ ஹேட்ட²தோ மம்ஸம் பரியோனந்தி⁴த்வா டி²தம். தத்த² யதா² பிலோதிகபலிவேடி²தே மம்ஸே ந மம்ஸம் ஜானாதி அஹம் பிலோதிகாய பலிவேடி²தந்தி. நபி பிலோதிகா ஜானாதி மயா மம்ஸம் பலிவேடி²தந்தி, ஏவமேவ ந வக்கஹத³யானி ஸகலஸரீரே ச மம்ஸம் ஜானாதி அஹம் கிலோமகேன படிச்ச²ன்னந்தி. நபி கிலோமகம் ஜானாதி மயா வக்கஹத³யானி ஸகலஸரீரே ச மம்ஸம் படிச்ச²ன்னந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி கிலோமகம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

324. பிஹகம் ஹத³யஸ்ஸ வாமபஸ்ஸே உத³ரபடலஸ்ஸ மத்த²கபஸ்ஸம் நிஸ்ஸாய டி²தம். தத்த² யதா² கோட்ட²மத்த²கபஸ்ஸம் நிஸ்ஸாய டி²தாய கோ³மயபிண்டி³யா ந கோட்ட²மத்த²கபஸ்ஸம் ஜானாதி கோ³மயபிண்டி³ மம் நிஸ்ஸாய டி²தாதி. நபி கோ³மயபிண்டி³ ஜானாதி அஹம் கோட்ட²மத்த²கபஸ்ஸம் நிஸ்ஸாய டி²தாதி, ஏவமேவ ந உத³ரபடலஸ்ஸ மத்த²கபஸ்ஸம் ஜானாதி பிஹகம் மம் நிஸ்ஸாய டி²தந்தி. நபி பிஹகம் ஜானாதி அஹம் உத³ரபடலஸ்ஸ மத்த²கபஸ்ஸம் நிஸ்ஸாய டி²தந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி பிஹகம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

325. பப்பா²ஸம் ஸரீரப்³ப⁴ந்தரே த்³வின்னம் த²னானமந்தரே ஹத³யஞ்ச யகனஞ்ச உபரி சா²தே³த்வா ஓலம்ப³ந்தம் டி²தம். தத்த² யதா² ஜிண்ணகோட்ட²ப்³ப⁴ந்தரே லம்ப³மானே ஸகுணகுலாவகே ந ஜிண்ணகோட்ட²ப்³ப⁴ந்தரம் ஜானாதி மயி ஸகுணகுலாவகோ லம்ப³மானோ டி²தோதி. நபி ஸகுணகுலாவகோ ஜானாதி அஹம் ஜிண்ணகோட்ட²ப்³ப⁴ந்தரே லம்ப³மானோ டி²தோதி, ஏவமேவ ந தம் ஸரீரப்³ப⁴ந்தரம் ஜானாதி மயி பப்பா²ஸம் லம்ப³மானம் டி²தந்தி. நபி பப்பா²ஸம் ஜானாதி அஹம் ஏவரூபே ஸரீரப்³ப⁴ந்தரே லம்ப³மானம் டி²தந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி பப்பா²ஸம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

326. அந்தம் க³லவாடககரீஸமக்³க³பரியந்தே ஸரீரப்³ப⁴ந்தரே டி²தம். தத்த² யதா² லோஹிததோ³ணிகாய ஓபு⁴ஜித்வா ட²பிதே சி²ன்னஸீஸத⁴ம்மனிகளேவரே ந லோஹிததோ³ணி ஜானாதி மயி த⁴ம்மனிகளேவரம் டி²தந்தி. நபி த⁴ம்மனிகளேவரம் ஜானாதி அஹம் லோஹிததோ³ணியா டி²தந்தி, ஏவமேவ ந ஸரீரப்³ப⁴ந்தரம் ஜானாதி மயி அந்தம் டி²தந்தி. நபி அந்தம் ஜானாதி அஹம் ஸரீரப்³ப⁴ந்தரே டி²தந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி அந்தம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

327. அந்தகு³ணம் அந்தந்தரே ஏகவீஸதிஅந்தபோ⁴கே³ ப³ந்தி⁴த்வா டி²தம். தத்த² யதா² பாத³புஞ்ச²னரஜ்ஜுமண்ட³லகம் ஸிப்³பே³த்வா டி²தேஸு ரஜ்ஜுகேஸு ந பாத³புஞ்ச²னரஜ்ஜுமண்ட³லகம் ஜானாதி ரஜ்ஜுகா மம் ஸிப்³பி³த்வா டி²தாதி. நபி ரஜ்ஜுகா ஜானந்தி மயம் பாத³புஞ்ச²னரஜ்ஜுமண்ட³லகம் ஸிப்³பி³த்வா டி²தாதி, ஏவமேவ ந அந்தம் ஜானாதி அந்தகு³ணம் மம் ஆப³ந்தி⁴த்வா டி²தந்தி. நபி அந்தகு³ணம் ஜானாதி அஹம் அந்தம் ஆப³ந்தி⁴த்வா டி²தந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி அந்தகு³ணம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

328. உத³ரியம் உத³ரே டி²தம் அஸிதபீதகா²யிதஸாயிதம். தத்த² யதா² ஸுவானதோ³ணியம் டி²தே ஸுவானவமது²ம்ஹி ந ஸுவானதோ³ணி ஜானாதி மயி ஸுவானவமது² டி²தோதி. நபி ஸுவானவமது² ஜானாதி அஹம் ஸுவானதோ³ணியம் டி²தோதி, ஏவமேவ ந உத³ரம் ஜானாதி மயி உத³ரியம் டி²தந்தி. நபி உத³ரியம் ஜானாதி அஹம் உத³ரே டி²தந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி உத³ரியம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

329. கரீஸம் பக்காஸயஸங்கா²தே அட்ட²ங்கு³லவேளுபப்³ப³ஸதி³ஸே அந்தபரியோஸானே டி²தம். தத்த² யதா² வேளுபப்³பே³ ஓமத்³தி³த்வா பக்கி²த்தாய ஸண்ஹபண்டு³மத்திகாய ந வேளுபப்³ப³ம் ஜானாதி மயி பண்டு³மத்திகா டி²தாதி. நபி பண்டு³மத்திகா ஜானாதி அஹம் வேளுபப்³பே³ டி²தாதி, ஏவமேவ ந பக்காஸயோ ஜானாதி மயி கரீஸம் டி²தந்தி. நபி கரீஸம் ஜானாதி அஹம் பக்காஸயே டி²தந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி கரீஸம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

330. மத்த²லுங்க³ம் ஸீஸகடாஹப்³ப⁴ந்தரே டி²தம். தத்த² யதா² புராணலாபு³கடாஹே பக்கி²த்தாய பிட்ட²பிண்டி³யா ந லாபு³கடாஹம் ஜானாதி மயி பிட்ட²பிண்டி³ டி²தாதி. நபி பிட்ட²பிண்டி³ ஜானாதி அஹம் லாபு³கடாஹே டி²தாதி, ஏவமேவ ந ஸீஸகடாஹப்³ப⁴ந்தரம் ஜானாதி மயி மத்த²லுங்க³ம் டி²தந்தி. நபி மத்த²லுங்க³ம் ஜானாதி அஹம் ஸீஸகடாஹப்³ப⁴ந்தரே டி²தந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி மத்த²லுங்க³ம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.

331. பித்தேஸு அப³த்³த⁴பித்தம் ஜீவிதிந்த்³ரியபடிப³த்³த⁴ம் ஸகலஸரீரம் ப்³யாபேத்வா டி²தம். ப³த்³த⁴பித்தம் பித்தகோஸகே டி²தம். தத்த² யதா² பூவம் ப்³யாபேத்வா டி²தே தேலே ந பூவம் ஜானாதி தேலம் மம் ப்³யாபேத்வா டி²தந்தி. நபி தேலம் ஜானாதி அஹம் பூவம் ப்³யாபேத்வா டி²தந்தி, ஏவமேவ ந ஸரீரம் ஜானாதி அப³த்³த⁴பித்தம் மம் ப்³யாபேத்வா டி²தந்தி. நபி அப³த்³த⁴பித்தம் ஜானாதி அஹம் ஸரீரம் ப்³யாபேத்வா டி²தந்தி. யதா² வஸ்ஸோத³கேன புண்ணே கோஸாதகிகோஸகே ந கோஸாதகிகோஸகோ ஜானாதி மயி வஸ்ஸோத³கம் டி²தந்தி. நபி வஸ்ஸோத³கம் ஜானாதி அஹம் கோஸாதகிகோஸகே டி²தந்தி, ஏவமேவ ந பித்தகோஸகோ ஜானாதி மயி ப³த்³த⁴பித்தம் டி²தந்தி. நபி ப³த்³த⁴பித்தம் ஜானாதி அஹம் பித்தகோஸகே டி²தந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி பித்தம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.

332. ஸேம்ஹம் ஏகபத்த²பூரப்பமாணம் உத³ரபடலே டி²தம். தத்த² யதா² உபரி ஸஞ்ஜாதபே²ணபடலாய சந்த³னிகாய ந சந்த³னிகா ஜானாதி மயி பே²ணபடலம் டி²தந்தி. நபி பே²ணபடலம் ஜானாதி அஹம் சந்த³னிகாய டி²தந்தி, ஏவமேவ ந உத³ரபடலம் ஜானாதி மயி ஸேம்ஹம் டி²தந்தி. நபி ஸேம்ஹம் ஜானாதி அஹம் உத³ரபடலே டி²தந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி ஸேம்ஹம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.

333. புப்³போ³ அனிப³த்³தோ⁴காஸோ யத்த² யத்தே²வ கா²ணுகண்டகப்பஹரணஅக்³கி³ஜாலாதீ³ஹி அபி⁴ஹதே ஸரீரப்பதே³ஸே லோஹிதம் ஸண்ட²ஹித்வா பச்சதி, க³ண்ட³பீளகாத³யோ வா உப்பஜ்ஜந்தி, தத்த² தத்த² திட்ட²தி. தத்த² யதா² ப²ரஸுப்பஹாராதி³வஸேன பக்³க⁴ரிதனிய்யாஸே ருக்கே² ந ருக்க²ஸ்ஸ பஹாராதி³ப்பதே³ஸா ஜானந்தி அம்ஹேஸு நிய்யாஸோ டி²தோதி, நபி நிய்யாஸோ ஜானாதி அஹம் ருக்க²ஸ்ஸ பஹாராதி³ப்பதே³ஸேஸு டி²தோதி, ஏவமேவ ந ஸரீரஸ்ஸ கா²ணுகண்டகாதீ³ஹி அபி⁴ஹதப்பதே³ஸா ஜானந்தி அம்ஹேஸு புப்³போ³ டி²தோதி. நபி புப்³போ³ ஜானாதி அஹம் தேஸு பதே³ஸேஸு டி²தோதி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி புப்³போ³ நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.

334. லோஹிதேஸு ஸம்ஸரணலோஹிதம் பித்தம் விய ஸகலஸரீரம் ப்³யாபேத்வா டி²தம். ஸன்னிசிதலோஹிதம் யகனட்டா²னஸ்ஸ ஹேட்டா²பா⁴க³ம் பூரேத்வா ஏகபத்த²பூரமத்தம் வக்கஹத³யயகனபப்பா²ஸானி தேமேந்தம் டி²தம். தத்த² ஸம்ஸரணலோஹிதே அப³த்³த⁴பித்தஸதி³ஸோவ வினிச்ச²யோ. இதரம் பன யதா² ஜஜ்ஜரகபாலே ஓவட்டே² உத³கே ஹேட்டா² லேட்³டு³க²ண்டா³தீ³னி தேமயமானே ந லேட்³டு³க²ண்டா³தீ³னி ஜானந்தி மயம் உத³கேன தேமியமானாதி. நபி உத³கம் ஜானாதி அஹம் லேட்³டு³க²ண்டா³தீ³னி தேமேமீதி, ஏவமேவ ந யகனஸ்ஸ ஹேட்டா²பா⁴க³ட்டா²னம் வக்காதீ³னி வா ஜானந்தி மயி லோஹிதம் டி²தம் அம்ஹே வா தேமயமானம் டி²தந்தி. நபி லோஹிதம் ஜானாதி அஹம் யகனஸ்ஸ ஹேட்டா²பா⁴க³ம் பூரேத்வா வக்காதீ³னி தேமயமானம் டி²தந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி லோஹிதம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.

335. ஸேதோ³ அக்³கி³ஸந்தாபாதி³காலேஸு கேஸலோமகூபவிவரானி பூரேத்வா திட்ட²தி சேவ பக்³க⁴ரதி ச. தத்த² யதா² உத³கா அப்³பூ³ள்ஹமத்தேஸு பி⁴ஸமுளாலகுமுத³னாளகலாபேஸு ந பி⁴ஸாதி³கலாபவிவரானி ஜானந்தி அம்ஹேஹி உத³கம் பக்³க⁴ரதீதி. நபி பி⁴ஸாதி³கலாபவிவரேஹி பக்³க⁴ரந்தம் உத³கம் ஜானாதி அஹம் பி⁴ஸாதி³கலாபவிவரேஹி பக்³க⁴ராமீதி, ஏவமேவ ந கேஸலோமகூபவிவரானி ஜானந்தி அம்ஹேஹி ஸேதோ³ பக்³க⁴ரதீதி. நபி ஸேதோ³ ஜானாதி அஹம் கேஸலோமகூபவிவரேஹி பக்³க⁴ராமீதி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி ஸேதோ³ நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.

336. மேதோ³ தூ²லஸ்ஸ ஸகலஸரீரம் ப²ரித்வா கிஸஸ்ஸ ஜங்க⁴மம்ஸாதீ³னி நிஸ்ஸாய டி²தோ பத்தி²ன்னஸினேஹோ. தத்த² யதா² ஹலித்³தி³பிலோதிகபடிச்ச²ன்னே மம்ஸபுஞ்ஜே ந மம்ஸபுஞ்ஜோ ஜானாதி மம் நிஸ்ஸாய ஹலித்³தி³பிலோதிகா டி²தாதி. நபி ஹலித்³தி³பிலோதிகா ஜானாதி அஹம் மம்ஸபுஞ்ஜம் நிஸ்ஸாய டி²தாதி, ஏவமேவ ந ஸகலஸரீரே ஜங்கா⁴தீ³ஸு வா மம்ஸம் ஜானாதி மம் நிஸ்ஸாய மேதோ³ டி²தோதி. நபி மேதோ³ ஜானாதி அஹம் ஸகலஸரீரே ஜங்கா⁴தீ³ஸு வா மம்ஸம் நிஸ்ஸாய டி²தோதி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி மேதோ³ நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ பத்தி²ன்னயூஸோ ஆப³ந்த⁴னாகாரோ ஆபோதா⁴தூதி.

337. அஸ்ஸு யதா³ ஸஞ்ஜாயதி ததா³ அக்கி²கூபகே பூரேத்வா திட்ட²தி வா பக்³க⁴ரதி வா. தத்த² யதா² உத³கபுண்ணேஸு தருணதாலட்டி²கூபகேஸு ந தருணதாலட்டி²கூபகா ஜானந்தி அம்ஹேஸு உத³கம் டி²தந்தி. நபி தருணதாலட்டி²கூபகேஸு உத³கம் ஜானாதி அஹம் தருணதாலட்டி²கூபகேஸு டி²தந்தி, ஏவமேவ ந அக்கி²கூபகா ஜானந்தி அம்ஹேஸு அஸ்ஸு டி²தந்தி. நபி அஸ்ஸு ஜானாதி அஹம் அக்கி²கூபகேஸு டி²தந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி அஸ்ஸு நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.

338. வஸா அக்³கி³ஸந்தாபாதி³காலே ஹத்த²தலஹத்த²பிட்டி²பாத³தலபாத³பிட்டி² நாஸாபுடனலாடஅம்ஸகூடேஸு டி²தவிலீனஸ்னேஹோ. தத்த² யதா² பக்கி²த்ததேலே ஆசாமே ந ஆசாமோ ஜானாதி மம் தேலம் அஜ்ஜோ²த்த²ரித்வா டி²தந்தி. நபி தேலம் ஜானாதி அஹம் ஆசாமம் அஜ்ஜோ²த்த²ரித்வா டி²தந்தி, ஏவமேவ ந ஹத்த²தலாதி³ப்பதே³ஸோ ஜானாதி மம் வஸா அஜ்ஜோ²த்த²ரித்வா டி²தாதி. நபி வஸா ஜானாதி அஹம் ஹத்த²தலாதி³ப்பதே³ஸம் அஜ்ஜோ²த்த²ரித்வா டி²தாதி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி வஸா நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.

339. கே²ளோ ததா²ரூபே கே²ளுப்பத்திபச்சயே ஸதி உபோ⁴ஹி கபோலபஸ்ஸேஹி ஓரோஹித்வா ஜிவ்ஹாதலே திட்ட²தி. தத்த² யதா² அப்³போ³ச்சி²ன்னஉத³கனிஸ்ஸந்தே³ நதீ³தீரகூபகே ந கூபதலம் ஜானாதி மயி உத³கம் ஸந்திட்ட²தீதி. நபி உத³கம் ஜானாதி அஹம் கூபதலே ஸந்திட்டா²மீதி, ஏவமேவ ந ஜிவ்ஹாதலம் ஜானாதி மயி உபோ⁴ஹி கபோலபஸ்ஸேஹி ஓரோஹித்வா கே²ளோ டி²தோதி. நபி கே²ளோ ஜானாதி அஹம் உபோ⁴ஹி கபோலபஸ்ஸேஹி ஓரோஹித்வா ஜிவ்ஹாதலே டி²தோதி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி கே²ளோ நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.

340. ஸிங்கா⁴ணிகா யதா³ ஸஞ்ஜாயதி, ததா³ நாஸாபுடே பூரேத்வா திட்ட²தி வா பக்³க⁴ரதி வா. தத்த² யதா² பூதித³தி⁴ப⁴ரிதாய ஸிப்பிகாய ந ஸிப்பிகா ஜானாதி மயி பூதித³தி⁴ டி²தந்தி. நபி பூதித³தி⁴ ஜானாதி அஹம் ஸிப்பிகாய டி²தந்தி, ஏவமேவ ந நாஸாபுடா ஜானந்தி அம்ஹேஸு ஸிங்கா⁴ணிகா டி²தாதி. நபி ஸிங்கா⁴ணிகா ஜானாதி அஹம் நாஸாபுடேஸு டி²தாதி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி ஸிங்கா⁴ணிகா நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.

341. லஸிகா அட்டி²கஸந்தீ⁴னம் அப்³ப⁴ஞ்ஜனகிச்சம் ஸாத⁴யமானா அஸீதிஸதஸந்தீ⁴ஸு டி²தா. தத்த² யதா² தேலப்³ப⁴ஞ்ஜிதே அக்கே² ந அக்கோ² ஜானாதி மம் தேலம் அப்³ப⁴ஞ்ஜித்வா டி²தந்தி. நபி தேலம் ஜானாதி அஹம் அக்க²ம் அப்³ப⁴ஞ்ஜித்வா டி²தந்தி, ஏவமேவ ந அஸீதிஸதஸந்த⁴யோ ஜானந்தி லஸிகா அம்ஹே அப்³ப⁴ஞ்ஜித்வா டி²தாதி. நபி லஸிகா ஜானாதி அஹம் அஸீதிஸதஸந்த⁴யோ அப்³ப⁴ஞ்ஜித்வா டி²தாதி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி லஸிகா நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.

342. முத்தம் வத்தி²ஸ்ஸ அப்³ப⁴ந்தரே டி²தம். தத்த² யதா² சந்த³னிகாய பக்கி²த்தே அமுகே² ரவணக⁴டே ந ரவணக⁴டோ ஜானாதி மயி சந்த³னிகாரஸோ டி²தோதி. நபி சந்த³னிகாரஸோ ஜானாதி அஹம் ரவணக⁴டே டி²தோதி, ஏவமேவ ந வத்தி² ஜானாதி மயி முத்தம் டி²தந்தி. நபி முத்தம் ஜானாதி அஹம் வத்தி²ம்ஹி டி²தந்தி. அஞ்ஞமஞ்ஞம் ஆபோ⁴க³பச்சவேக்க²ணரஹிதா ஏதே த⁴ம்மா. இதி முத்தம் நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.

343. ஏவம் கேஸாதீ³ஸு மனஸிகாரம் பவத்தேத்வா யேன ஸந்தப்பதி, அயம் இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ பரிபாசனாகாரோ தேஜோதா⁴தூதி, யேன ஜீரீயதி, யேன பரிட³ய்ஹதி, யேன அஸிதபீதகா²யிதஸாயிதம் ஸம்மா பரிணாமம் க³ச்ச²தி, அயம் இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ பரிபாசனாகாரோ தேஜோதா⁴தூதி ஏவம் தேஜோகோட்டா²ஸேஸு மனஸிகாரோ பவத்தேதப்³போ³.

344. ததோ உத்³த⁴ங்க³மே வாதே உத்³த⁴ங்க³மவஸேன பரிக்³க³ஹேத்வா அதோ⁴க³மே அதோ⁴க³மவஸேன, குச்சி²ஸயே குச்சி²ஸயவஸேன, கோட்டா²ஸயே கோட்டா²ஸயவஸேன, அங்க³மங்கா³னுஸாரிம்ஹி அங்க³மங்கா³னுஸாரிவஸேன, அஸ்ஸாஸபஸ்ஸாஸே அஸ்ஸாஸபஸ்ஸாஸவஸேன பரிக்³க³ஹேத்வா உத்³த⁴ங்க³மா வாதா நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ வித்த²ம்ப⁴னாகாரோ வாயோதா⁴தூதி, அதோ⁴க³மா வாதா நாம, குச்சி²ஸயா வாதா நாம, கோட்டா²ஸயா வாதா நாம, அங்க³மங்கா³னுஸாரினோ வாதா நாம, அஸ்ஸாஸபஸ்ஸாஸா வாதா நாம இமஸ்மிம் ஸரீரே பாடியேக்கோ கோட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ வித்த²ம்ப⁴னாகாரோ வாயோதா⁴தூதி ஏவம் வாயோகோட்டா²ஸேஸு மனஸிகாரோ பவத்தேதப்³போ³. தஸ்ஸேவம் பவத்தமனஸிகாரஸ்ஸ தா⁴துயோ பாகடா ஹோந்தி. தா புனப்புனம் ஆவஜ்ஜதோ மனஸிகரோதோ வுத்தனயேனேவ உபசாரஸமாதி⁴ உப்பஜ்ஜதி.

345. யஸ்ஸ பன ஏவம் பா⁴வயதோ கம்மட்டா²னம் ந இஜ்ஜ²தி, தேன ஸலக்க²ணஸங்கே²பதோ பா⁴வேதப்³ப³ம். கத²ம்? வீஸதியா கோட்டா²ஸேஸு த²த்³த⁴லக்க²ணம் பத²வீதா⁴தூதி வவத்த²பேதப்³ப³ம். தத்தே²வ ஆப³ந்த⁴னலக்க²ணம் ஆபோதா⁴தூதி. பரிபாசனலக்க²ணம் தேஜோதா⁴தூதி. வித்த²ம்ப⁴னலக்க²ணம் வாயோதா⁴தூதி.

த்³வாத³ஸஸு கோட்டா²ஸேஸு ஆப³ந்த⁴னலக்க²ணம் ஆபோதா⁴தூதி வவத்த²பேதப்³ப³ம். தத்தே²வ பரிபாசனலக்க²ணம் தேஜோதா⁴தூதி. வித்த²ம்ப⁴னலக்க²ணம் வாயோதா⁴தூதி. த²த்³த⁴லக்க²ணம் பத²வீதா⁴தூதி.

சதூஸு கோட்டா²ஸேஸு பரிபாசனலக்க²ணம் தேஜோதா⁴தூதி வவத்த²பேதப்³ப³ம். தேன அவினிபு⁴த்தம் வித்த²ம்ப⁴னலக்க²ணம் வாயோதா⁴தூதி. த²த்³த⁴லக்க²ணம் பத²வீதா⁴தூதி. ஆப³ந்த⁴னலக்க²ணம் ஆபோதா⁴தூதி.

ச²ஸு கோட்டா²ஸேஸு வித்த²ம்ப⁴னலக்க²ணம் வாயோதா⁴தூதி வவத்த²பேதப்³ப³ம். தத்தே²வ த²த்³த⁴லக்க²ணம் பத²வீதா⁴தூதி. ஆப³ந்த⁴னலக்க²ணம் ஆபோதா⁴தூதி. பரிபாசனலக்க²ணம் தேஜோதா⁴தூதி. தஸ்ஸேவம் வவத்தா²பயதோ தா⁴துயோ பாகடா ஹோந்தி. தா புனப்புனம் ஆவஜ்ஜதோ மனஸிகரோதோ வுத்தனயேனேவ உபசாரஸமாதி⁴ உப்பஜ்ஜதி.

346. யஸ்ஸ பன ஏவம்பி பா⁴வயதோ கம்மட்டா²னம் ந இஜ்ஜ²தி, தேன ஸலக்க²ணவிப⁴த்திதோ பா⁴வேதப்³ப³ம். கத²ம்? புப்³பே³ வுத்தனயேனேவ கேஸாத³யோ பரிக்³க³ஹேத்வா கேஸம்ஹி த²த்³த⁴லக்க²ணம் பத²வீதா⁴தூதி வவத்த²பேதப்³ப³ம். தத்தே²வ ஆப³ந்த⁴னலக்க²ணம் ஆபோதா⁴தூதி. பரிபாசனலக்க²ணம் தேஜோதா⁴தூதி. வித்த²ம்ப⁴னலக்க²ணம் வாயோதா⁴தூதி. ஏவம் ஸப்³ப³கோட்டா²ஸேஸு ஏகேகஸ்மிம் கோட்டா²ஸே சதஸ்ஸோ சதஸ்ஸோ தா⁴துயோ வவத்த²பேதப்³பா³. தஸ்ஸேவம் வவத்தா²பயதோ தா⁴துயோ பாகடா ஹோந்தி. தா புனப்புனம் ஆவஜ்ஜதோ மனஸிகரோதோ வுத்தனயேனேவ உபசாரஸமாதி⁴ உப்பஜ்ஜதி.

அபிச கோ² பன வசனத்த²தோ, கலாபதோ, சுண்ணதோ, லக்க²ணாதி³தோ, ஸமுட்டா²னதோ, நானத்தேகத்ததோ, வினிப்³போ⁴கா³வினிப்³போ⁴க³தோ, ஸபா⁴க³விஸபா⁴க³தோ, அஜ்ஜ²த்திகபா³ஹிரவிஸேஸதோ, ஸங்க³ஹதோ, பச்சயதோ, அஸமன்னாஹாரதோ, பச்சயவிபா⁴க³தோதி இமேஹிபி ஆகாரேஹி தா⁴துயோ மனஸிகாதப்³பா³.

347. தத்த² வசனத்த²தோ மனஸிகரோந்தேன பத்த²டத்தா பத²வீ. அப்போதி ஆபியதி அப்பாயதீதி வா ஆபோ. தேஜதீதி தேஜோ. வாயதீதி வாயோ. அவிஸேஸேன பன ஸலக்க²ணதா⁴ரணதோ து³க்கா²தா³னதோ து³க்கா²தா⁴னதோ ச தா⁴தூதி. ஏவம் விஸேஸஸாமஞ்ஞவஸேன வசனத்த²தோ மனஸிகாதப்³பா³.

348. கலாபதோதி யா அயம் கேஸா லோமாதிஆதி³னா நயேன வீஸதியா ஆகாரேஹி பத²வீதா⁴து, பித்தம் ஸேம்ஹந்தி ச ஆதி³னா நயேன த்³வாத³ஸஹாகாரேஹி ஆபோதா⁴து நித்³தி³ட்டா², தத்த² யஸ்மா –

வண்ணோ க³ந்தோ⁴ ரஸோ ஓஜா, சதஸ்ஸோ சாபி தா⁴துயோ;

அட்ட²த⁴ம்மஸமோதா⁴னா, ஹோதி கேஸாதி ஸம்முதி;

தேஸம்யேவ வினிப்³போ⁴கா³, நத்தி² கேஸாதி ஸம்முதி.

தஸ்மா கேஸாபி அட்ட²த⁴ம்மகலாபமத்தமேவ. ததா² லோமாத³யோதி. யோ பனேத்த² கம்மஸமுட்டா²னோ கோட்டா²ஸோ, ஸோ ஜீவிதிந்த்³ரியேன ச பா⁴வேன ச ஸத்³தி⁴ம் த³ஸத⁴ம்மகலாபோபி ஹோதி. உஸ்ஸத³வஸேன பன பத²வீதா⁴து ஆபோதா⁴தூதி ஸங்க²ம் க³தோ. ஏவம் கலாபதோ மனஸிகாதப்³பா³.

349. சுண்ணதோதி இமஸ்மிம் ஹி ஸரீரே மஜ்ஜி²மேன பமாணேன பரிக்³க³ய்ஹமானா பரமாணுபே⁴த³ஸஞ்சுண்ணா ஸுகு²மரஜபூ⁴தா பத²வீதா⁴து தோ³ணமத்தா ஸியா. ஸா ததோ உபட்³ட⁴ப்பமாணாய ஆபோதா⁴துயா ஸங்க³ஹிதா, தேஜோதா⁴துயா அனுபாலிதா வாயோதா⁴துயா வித்த²ம்பி⁴தா ந விகிரியதி ந வித்³த⁴ம்ஸியதி, அவிகிரியமானா அவித்³த⁴ம்ஸியமானா அனேகவித⁴ம் இத்தி²புரிஸலிங்கா³தி³பா⁴வவிகப்பம் உபக³ச்ச²தி, அணுதூ²லதீ³க⁴ரஸ்ஸதி²ரகதி²னாதி³பா⁴வஞ்ச பகாஸேதி.

யூஸக³தா ஆப³ந்த⁴னாகாரபூ⁴தா பனேத்த² ஆபோதா⁴து பத²வீபதிட்டி²தா தேஜானுபாலிதா வாயோவித்த²ம்பி⁴தா ந பக்³க⁴ரதி ந பரிஸ்ஸவதி, அபக்³க⁴ரமானா அபரிஸ்ஸவமானா பீணிதபீணிதபா⁴வம் த³ஸ்ஸேதி.

அஸிதபீதாதி³பாசகா சேத்த² உஸுமாகாரபூ⁴தா உண்ஹத்தலக்க²ணா தேஜோதா⁴து பத²வீபதிட்டி²தா ஆபோஸங்க³ஹிதா வாயோவித்த²ம்பி⁴தா இமம் காயம் பரிபாசேதி, வண்ணஸம்பத்திஞ்சஸ்ஸ ஆவஹதி. தாய ச பன பரிபாசிதோ அயம் காயோ ந பூதிபா⁴வம் த³ஸ்ஸேதி.

அங்க³மங்கா³னுஸடா சேத்த² ஸமுதீ³ரணவித்த²ம்ப⁴னலக்க²ணா வாயோதா⁴து பத²வீபதிட்டி²தா ஆபோஸங்க³ஹிதா தேஜானுபாலிதா இமம் காயம் வித்த²ம்பே⁴தி. தாய ச பன வித்த²ம்பி⁴தோ அயம் காயோ ந பரிபததி, உஜுகம் ஸண்டா²தி. அபராய வாயோதா⁴துயா ஸமப்³பா⁴ஹதோ க³மனட்டா²னனிஸஜ்ஜாஸயனஇரியாபதே²ஸு விஞ்ஞத்திம் த³ஸ்ஸேதி, ஸமிஞ்ஜேதி, ஸம்பஸாரேதி, ஹத்த²பாத³ம் லாளேதி. ஏவமேதம் இத்தி²புரிஸாதி³பா⁴வேன பா³லஜனவஞ்சனம் மாயாரூபஸதி³ஸம் தா⁴துயந்தம் பவத்ததீதி ஏவம் சுண்ணதோ மனஸிகாதப்³பா³.

350. லக்க²ணாதி³தோதி பத²வீதா⁴து கிம் லக்க²ணா, கிம் ரஸா, கிம் பச்சுபட்டா²னாதி ஏவம் சதஸ்ஸோபி தா⁴துயோ ஆவஜ்ஜேத்வா பத²வீதா⁴து கக்க²ளத்தலக்க²ணா, பதிட்டா²னரஸா, ஸம்படிச்ச²னபச்சுபட்டா²னா. ஆபோதா⁴து பக்³க⁴ரணலக்க²ணா, ப்³ரூஹனரஸா, ஸங்க³ஹபச்சுபட்டா²னா. தேஜோதா⁴து உண்ஹத்தலக்க²ணா, பரிபாசனரஸா, மத்³த³வானுப்பதா³னபச்சுபட்டா²னா. வாயோதா⁴து வித்த²ம்ப⁴னலக்க²ணா, ஸமுதீ³ரணரஸா. அபி⁴னீஹாரபச்சுபட்டா²னாதி ஏவம் லக்க²ணாதி³தோ மனஸிகாதப்³பா³.

351. ஸமுட்டா²னதோதி யே இமே பத²வீதா⁴துஆதீ³னம் வித்தா²ரதோ த³ஸ்ஸனவஸேன கேஸாத³யோ த்³வாசத்தாலீஸ கோட்டா²ஸா த³ஸ்ஸிதா. தேஸு உத³ரியம் கரீஸம் புப்³போ³ முத்தந்தி இமே சத்தாரோ கோட்டா²ஸா உதுஸமுட்டா²னாவ. அஸ்ஸு ஸேதோ³ கே²ளோ ஸிங்கா⁴ணிகாதி இமே சத்தாரோ உதுசித்தஸமுட்டா²னா. அஸிதாதி³பரிபாசகோ தேஜோ கம்மஸமுட்டா²னோவ. அஸ்ஸாஸபஸ்ஸாஸா சித்தஸமுட்டா²னாவ. அவஸேஸா ஸப்³பே³பி சதுஸமுட்டா²னாதி ஏவம் ஸமுட்டா²னதோ மனஸிகாதப்³பா³.

352. நானத்தேகத்ததோதி ஸப்³பா³ஸம்பி தா⁴தூனம் ஸலக்க²ணாதி³தோ நானத்தம். அஞ்ஞானேவ ஹி பத²வீதா⁴துயா லக்க²ணரஸபச்சுபட்டா²னானி. அஞ்ஞானி ஆபோதா⁴துஆதீ³னம். ஏவம் லக்க²ணாதி³வஸேன பன கம்மஸமுட்டா²னாதி³வஸேன ச நானத்தபூ⁴தானம்பி ஏதாஸம் ரூபமஹாபூ⁴ததா⁴துத⁴ம்மஅனிச்சாதி³வஸேன ஏகத்தம் ஹோதி. ஸப்³பா³பி ஹி தா⁴துயோ ருப்பனலக்க²ணம் அனதீதத்தா ரூபானி. மஹந்தபாதுபா⁴வாதீ³ஹி காரணேஹி மஹாபூ⁴தானி.

மஹந்தபாதுபா⁴வாதீ³ஹீதி ஏதா ஹி தா⁴துயோ மஹந்தபாதுபா⁴வதோ, மஹாபூ⁴தஸாமஞ்ஞதோ, மஹாபரிஹாரதோ, மஹாவிகாரதோ, மஹத்தா பூ⁴தத்தா சாதி இமேஹி காரணேஹி மஹாபூ⁴தானீதி வுச்சந்தி.

தத்த² மஹந்தபாதுபா⁴வதோதி ஏதானி ஹி அனுபாதி³ன்னஸந்தானேபி உபாதி³ன்னஸந்தானேபி மஹந்தானி பாதுபூ⁴தானி. தேஸம் அனுபாதி³ன்னஸந்தானே –

து³வே ஸதஸஹஸ்ஸானி, சத்தாரி நஹுதானி ச;

ஏத்தகம் ப³ஹலத்தேன, ஸங்கா²தாயம் வஸுந்த⁴ராதி. –

ஆதி³னா நயேன மஹந்தபாதுபா⁴வதா பு³த்³தா⁴னுஸ்ஸதினித்³தே³ஸே வுத்தாவ.

உபாதி³ன்னஸந்தானேபி மச்ச²கச்ச²பதே³வதா³னவாதி³ஸரீரவஸேன மஹந்தானேவ பாதுபூ⁴தானி. வுத்தஞ்ஹேதம் ‘‘ஸந்தி, பி⁴க்க²வே, மஹாஸமுத்³தே³ யோஜனஸதிகாபி அத்தபா⁴வா’’திஆதி³.

மஹாபூ⁴தஸாமஞ்ஞதோதி ஏதானி ஹி யதா² மாயாகாரோ அமணிம்யேவ உத³கம் மணிம் கத்வா த³ஸ்ஸேதி, அஸுவண்ணம்யேவ லேட்³டு³ம் ஸுவண்ணம் கத்வா த³ஸ்ஸேதி.

யதா² ச ஸயம் நேவ யக்கோ² ந யக்கீ² ஸமானோ யக்க²பா⁴வம்பி யக்கி²பா⁴வம்பி த³ஸ்ஸேதி, ஏவமேவ ஸயம் அனீலானேவ ஹுத்வா நீலம் உபாதா³ரூபம் த³ஸ்ஸேந்தி, அபீதானி அலோஹிதானி அனோதா³தானேவ ஹுத்வா ஓதா³தம் உபாதா³ரூபம் த³ஸ்ஸேந்தீதி மாயாகாரமஹாபூ⁴தஸாமஞ்ஞதோ மஹாபூ⁴தானி.

யதா² ச யக்கா²தீ³னி மஹாபூ⁴தானி யம் க³ண்ஹந்தி, நேவ நேஸம் தஸ்ஸ அந்தோ ந ப³ஹி டா²னம் உபலப்³ப⁴தி, ந ச தம் நிஸ்ஸாய ந திட்ட²ந்தி, ஏவமேவ தானிபி நேவ அஞ்ஞமஞ்ஞஸ்ஸ அந்தோ ந ப³ஹி டி²தானி ஹுத்வா உபலப்³ப⁴ந்தி, ந ச அஞ்ஞமஞ்ஞம் நிஸ்ஸாய ந திட்ட²ந்தீதி அசிந்தேய்யட்டா²னதாய யக்கா²தி³மஹாபூ⁴தஸாமஞ்ஞதோபி மஹாபூ⁴தானி. யதா² ச யக்கி²னீஸங்கா²தானி மஹாபூ⁴தானி மனாபேஹி வண்ணஸண்டா²னவிக்கே²பேஹி அத்தனோ ப⁴யானகபா⁴வம் படிச்சா²தே³த்வா ஸத்தே வஞ்சேந்தி, ஏவமேவ ஏதானிபி இத்தி²புரிஸஸரீராதீ³ஸு மனாபேன ச²விவண்ணேன மனாபேன அத்தனோ அங்க³பச்சங்க³ஸண்டா²னேன மனாபேன ச ஹத்த²பாத³ங்கு³லிப⁴முகவிக்கே²பேன அத்தனோ கக்க²ளத்தாதி³பே⁴த³ம் ஸரஸலக்க²ணம் படிச்சா²தே³த்வா பா³லஜனம் வஞ்சேந்தி, அத்தனோ ஸபா⁴வம் த³ட்டு²ம் ந தே³ந்தீதி வஞ்சகத்தேன யக்கி²னீமஹாபூ⁴தஸாமஞ்ஞதோபி மஹாபூ⁴தானி.

மஹாபரிஹாரதோதி மஹந்தேஹி பச்சயேஹி பரிஹரிதப்³ப³தோ. ஏதானி ஹி தி³வஸே தி³வஸே உபனேதப்³ப³த்தா மஹந்தேஹி கா⁴ஸச்சா²த³னாதீ³ஹி பூ⁴தானி பவத்தானீதி மஹாபூ⁴தானி. மஹாபரிஹாரானி வா பூ⁴தானீதிபி மஹாபூ⁴தானி.

மஹாவிகாரதோதி ஏதானி ஹி அனுபாதி³ன்னானிபி உபாதி³ன்னானிபி மஹாவிகாரானி ஹோந்தி. தத்த² அனுபாதி³ன்னானம் கப்பவுட்டா²னே விகாரமஹத்தம் பாகடம் ஹோதி. உபாதி³ன்னானம் தா⁴துக்கோ²ப⁴காலே. ததா² ஹி –

பூ⁴மிதோ வுட்டி²தா யாவ, ப்³ரஹ்மலோகா விதா⁴வதி;

அச்சி அச்சிமதோ லோகே, ட³ய்ஹமானம்ஹி தேஜஸா.

கோடிஸதஸஹஸ்ஸேகம், சக்கவாளம் விலீயதி;

குபிதேன யதா³ லோகோ, ஸலிலேன வினஸ்ஸதி.

கோடிஸதஸஹஸ்ஸேகம், சக்கவாளம் விகீரதி;

வாயோதா⁴துப்பகோபேன, யதா³ லோகோ வினஸ்ஸதி.

பத்த²த்³தோ⁴ ப⁴வதி காயோ, த³ட்டோ² கட்ட²முகே²ன வா;

பத²வீதா⁴துப்பகோபேன, ஹோதி கட்ட²முகே²வ ஸோ.

பூதியோ ப⁴வதி காயோ, த³ட்டோ² பூதிமுகே²ன வா;

ஆபோதா⁴துப்பகோபேன, ஹோதி பூதிமுகே²வ ஸோ.

ஸந்தத்தோ ப⁴வதி காயோ, த³ட்டோ² அக்³கி³முகே²ன வா;

தேஜோதா⁴துப்பகோபேன, ஹோதி அக்³கி³முகே²வ ஸோ.

ஸஞ்சி²ன்னோ ப⁴வதி காயோ, த³ட்டோ² ஸத்த²முகே²ன வா;

வாயோதா⁴துப்பகோபேன, ஹோதி ஸத்த²முகே²வ ஸோ.

இதி மஹாவிகாரானி பூ⁴தானீதி மஹாபூ⁴தானி.

மஹத்தா பூ⁴தத்தா சாதி ஏதானி ஹி மஹந்தானி மஹதா வாயாமேன பரிக்³க³ஹேதப்³ப³த்தா பூ⁴தானி விஜ்ஜமானத்தாதி மஹத்தா பூ⁴தத்தா ச மஹாபூ⁴தானி.

ஏவம் ஸப்³பா³பேதா தா⁴துயோ மஹந்தபாதுபா⁴வாதீ³ஹி காரணேஹி மஹாபூ⁴தானி.

ஸலக்க²ணதா⁴ரணதோ பன து³க்கா²தா³னதோ ச து³க்கா²தா⁴னதோ ச ஸப்³பா³பி தா⁴துலக்க²ணம் அனதீதத்தா தா⁴துயோ. ஸலக்க²ணதா⁴ரணேன ச அத்தனோ க²ணானுரூபதா⁴ரணேன ச த⁴ம்மா. க²யட்டே²ன அனிச்சா. ப⁴யட்டே²ன து³க்கா². அஸாரகட்டே²ன அனத்தா.

இதி ஸப்³பா³ஸம்பி ரூபமஹாபூ⁴ததா⁴துத⁴ம்மஅனிச்சாதி³வஸேன ஏகத்தந்தி ஏவம் நானத்தேகத்ததோ மனஸிகாதப்³பா³.

353. வினிப்³போ⁴கா³வினிப்³போ⁴க³தோதி ஸஹுப்பன்னாவ ஏதா ஏகேகஸ்மிம் ஸப்³ப³பரியந்திமே ஸுத்³த⁴ட்ட²காதி³கலாபேபி பதே³ஸேன அவினிப்³பு⁴த்தா. லக்க²ணேன பன வினிப்³பு⁴த்தாதி ஏவம் வினிப்³போ⁴கா³வினிப்³போ⁴க³தோ மனஸிகாதப்³பா³.

354. ஸபா⁴க³விஸபா⁴க³தோதி ஏவம் அவினிப்³பு⁴த்தாஸு சாபி ஏதாஸு புரிமா த்³வே க³ருகத்தா ஸபா⁴கா³. ததா² பச்சி²மா லஹுகத்தா. புரிமா பன பச்சி²மாஹி பச்சி²மா ச புரிமாஹி விஸபா⁴கா³தி ஏவம் ஸபா⁴க³விஸபா⁴க³தோ மனஸிகாதப்³பா³.

355. அஜ்ஜ²த்திகபா³ஹிரவிஸேஸதோதி அஜ்ஜ²த்திகா தா⁴துயோ விஞ்ஞாணவத்து²விஞ்ஞத்திஇந்த்³ரியானம் நிஸ்ஸயா ஹோந்தி, ஸஇரியாபதா², சதுஸமுட்டா²னா. பா³ஹிரா வுத்தவிபரீதப்பகாராதி ஏவம் அஜ்ஜ²த்திகபா³ஹிரவிஸேஸதோ மனஸிகாதப்³பா³.

356. ஸங்க³ஹதோதி கம்மஸமுட்டா²னா பத²வீதா⁴து கம்மஸமுட்டா²னாஹி இதராஹி ஏகஸங்க³ஹா ஹோதி ஸமுட்டா²னனானத்தாபா⁴வதோ. ததா² சித்தாதி³ஸமுட்டா²னா சித்தாதி³ஸமுட்டா²னாஹீதி ஏவம் ஸங்க³ஹதோ மனஸிகாதப்³பா³.

357. பச்சயதோதி பத²வீதா⁴து ஆபோஸங்க³ஹிதா தேஜோஅனுபாலிதா வாயோவித்த²ம்பி⁴தா திண்ணம் மஹாபூ⁴தானம் பதிட்டா² ஹுத்வா பச்சயோ ஹோதி. ஆபோதா⁴து பத²வீபதிட்டி²தா தேஜோஅனுபாலிதா வாயோவித்த²ம்பி⁴தா திண்ணம் மஹாபூ⁴தானம் ஆப³ந்த⁴னம் ஹுத்வா பச்சயோ ஹோதி. தேஜோதா⁴து பத²வீபதிட்டி²தா ஆபோஸங்க³ஹிதா வாயோவித்த²ம்பி⁴தா திண்ணம் மஹாபூ⁴தானம் பரிபாசனம் ஹுத்வா பச்சயோ ஹோதி. வாயோதா⁴து பத²வீபதிட்டி²தா ஆபோஸங்க³ஹிதா தேஜோபரிபாசிதா திண்ணம் மஹாபூ⁴தானம் வித்த²ம்ப⁴னம் ஹுத்வா பச்சயோ ஹோதீதி ஏவம் பச்சயதோ மனஸிகாதப்³பா³.

358. அஸமன்னாஹாரதோதி பத²வீதா⁴து சேத்த² ‘‘அஹம் பத²வீதா⁴தூ’’தி வா, ‘‘திண்ணம் மஹாபூ⁴தானம் பதிட்டா² ஹுத்வா பச்சயோ ஹோமீ’’தி வா ந ஜானாதி. இதரானிபி தீணி ‘‘அம்ஹாகம் பத²வீதா⁴து பதிட்டா² ஹுத்வா பச்சயோ ஹோதீ’’தி ந ஜானந்தி. ஏஸ நயோ ஸப்³ப³த்தா²தி ஏவம் அஸமன்னாஹாரதோ மனஸிகாதப்³பா³.

359. பச்சயவிபா⁴க³தோதி தா⁴தூனம் ஹி கம்மம், சித்தம், ஆஹாரோ, உதூதி சத்தாரோ பச்சயா. தத்த² கம்மஸமுட்டா²னானம் கம்மமேவ பச்சயோ ஹோதி, ந சித்தாத³யோ. சித்தாதி³ஸமுட்டா²னானம்பி சித்தாத³யோவ பச்சயா ஹோந்தி, ந இதரே. கம்மஸமுட்டா²னானஞ்ச கம்மம் ஜனகபச்சயோ ஹோதி, ஸேஸானம் பரியாயதோ உபனிஸ்ஸயபச்சயோ ஹோதி. சித்தஸமுட்டா²னானம் சித்தம் ஜனகபச்சயோ ஹோதி, ஸேஸானம் பச்சா²ஜாதபச்சயோ அத்தி²பச்சயோ அவிக³தபச்சயோ ச. ஆஹாரஸமுட்டா²னானம் ஆஹாரோ ஜனகபச்சயோ ஹோதி, ஸேஸானம் ஆஹாரபச்சயோ அத்தி²பச்சயோ அவிக³தபச்சயோ ச. உதுஸமுட்டா²னானம் உது ஜனகபச்சயோ ஹோதி, ஸேஸானம் அத்தி²பச்சயோ அவிக³தபச்சயோ ச. கம்மஸமுட்டா²னம் மஹாபூ⁴தம் கம்மஸமுட்டா²னானம்பி மஹாபூ⁴தானம் பச்சயோ ஹோதி சித்தாதி³ஸமுட்டா²னானம்பி. ததா² சித்தஸமுட்டா²னம், ஆஹாரஸமுட்டா²னம். உதுஸமுட்டா²னம் மஹாபூ⁴தம் உதுஸமுட்டா²னானம்பி மஹாபூ⁴தானம் பச்சயோ ஹோதி கம்மாதி³ஸமுட்டா²னானம்பி.

தத்த² கம்மஸமுட்டா²னா பத²வீதா⁴து கம்மஸமுட்டா²னானம் இதராஸம் ஸஹஜாதஅஞ்ஞமஞ்ஞனிஸ்ஸயஅத்தி²அவிக³தவஸேன சேவ பதிட்டா²வஸேன ச பச்சயோ ஹோதி, ந ஜனகவஸேன. இதரேஸம் திஸந்ததிமஹாபூ⁴தானம் நிஸ்ஸயஅத்தி²அவிக³தவஸேன பச்சயோ ஹோதி, ந பதிட்டா²வஸேன ந ஜனகவஸேன. ஆபோதா⁴து சேத்த² இதராஸம் திண்ணம் ஸஹஜாதாதி³வஸேன சேவ ஆப³ந்த⁴னவஸேன ச பச்சயோ ஹோதி, ந ஜனகவஸேன. இதரேஸம் திஸந்ததிகானம் நிஸ்ஸயஅத்தி²அவிக³தபச்சயவஸேனேவ, ந ஆப³ந்த⁴னவஸேன ந ஜனகவஸேன. தேஜோதா⁴துபேத்த² இதராஸம் திண்ணம் ஸஹஜாதாதி³வஸேன சேவ பரிபாசனவஸேன ச பச்சயோ ஹோதி, ந ஜனகவஸேன. இதரேஸம் திஸந்ததிகானம் நிஸ்ஸயஅத்தி²அவிக³தபச்சயவஸேனேவ, ந பரிபாசனவஸேன, ந ஜனகவஸேன. வாயோதா⁴துபேத்த² இதராஸம் திண்ணம் ஸஹஜாதாதி³வஸேன சேவ வித்த²ம்ப⁴னவஸேன ச பச்சயோ ஹோதி, ந ஜனகவஸேன. இதரேஸம் திஸந்ததிகானம் நிஸ்ஸயஅத்தி²அவிக³தபச்சயவஸேனேவ, ந வித்த²ம்ப⁴னவஸேன, ந ஜனகவஸேன. சித்தஆஹாரஉதுஸமுட்டா²னபத²வீதா⁴துஆதீ³ஸுபி ஏஸேவ நயோ.