9. நபும்ஸகலிங்க³னாமிகபத³மாலா

அத² புப்³பா³சரியமதம் புரேசரம் கத்வா நிக்³க³ஹீதந்தனபும்ஸகலிங்கா³னம் ‘‘பூ⁴தம்’’இச்சாதி³கஸ்ஸ பகதிரூபஸ்ஸ நாமிகபத³மாலம் வக்கா²ம –

சித்தம், சித்தானி. சித்தம், சித்தானி. சித்தேன, சித்தேஹி, சித்தேபி⁴. சித்தஸ்ஸ, சித்தானம். சித்தா, சித்தஸ்மா, சித்தம்ஹா, சித்தேஹி, சித்தேபி⁴. சித்தஸ்ஸ, சித்தானம். சித்தே, சித்தஸ்மிம், சித்தம்ஹி, சித்தேஸு. போ⁴ சித்த, போ⁴ சித்தா, ப⁴வந்தோ சித்தானி. யமகமஹாதே²ரமதம்.

ஏத்த² கிஞ்சாபி ‘‘சித்தா’’தி பச்சத்தப³ஹுவசனம் ‘‘சித்தே’’தி உபயோக³ப³ஹுவசனஞ்ச அனாக³தம், ததா²பி தத்த² தத்த² அஞ்ஞேஸம்பி தாதி³ஸானம் நிக்³க³ஹீதந்தனபும்ஸகரூபானம் த³ஸ்ஸனதோ விப⁴ங்க³பாளியஞ்ச ‘‘ச² சித்தா அப்³யாகதா’’திஆதி³த³ஸ்ஸனதோ க³ஹேதப்³ப³மேவ, தஸ்மா ‘‘சித்தம், சித்தானி, சித்தா. சித்தம், சித்தானி, சித்தே’’தி கமோ வேதி³தப்³போ³. நிக்³க³ஹீதந்தானஞ்ஹி நபும்ஸகலிங்கா³னம் கத்த²சி ஓகாரந்தபுல்லிங்கா³னம் விய பச்சத்தோபயோக³ப³ஹுவசனானி ப⁴வந்தி. தானி ச புல்லிங்கே³ன வா ஸலிங்கே³ன வா அலிங்கே³ன வா ஸத்³தி⁴ம் ஸமானாதி⁴கரணானி ஹுத்வா கேவலானி வா பாவசனே ஸஞ்சரந்தி. அத்ர ‘‘சத்தாரோ ஸதிபட்டா²னா. சத்தாரோ ஸம்மப்பதா⁴னா. ஸப்³பே³ மாலா உபேந்திமம். யஸ்ஸ ஏதே த⁴னா அத்தி². சத்தாரோ மஹாபூ⁴தா. தீணிந்த்³ரியா. த்³வே இந்த்³ரியா. த³ஸிந்த்³ரியா. த்³வே மஹாபூ⁴தே நிஸ்ஸாய த்³வே மஹாபூ⁴தா, பஞ்ச விஞ்ஞாணா, சதுரோ அங்கே³ அதி⁴ட்டா²ய, ஸேமி வம்மிகமத்த²கே, ரூபா ஸத்³தா³ ரஸா க³ந்தா⁴. ரூபே ச ஸத்³தே³ ச அதோ² ரஸே ச. சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி ஏவமாத³யோ அனேகஸதா பாளிப்பதே³ஸா த³ட்ட²ப்³பா³.

ஏத்த² பன ‘‘ஸதிபட்டா²னா’’திஆதீ³னி பதா³னி லிங்க³விபல்லாஸவஸேன வுத்தானீதி ந க³ஹேதப்³பா³னி ஸதிபட்டா²னஸத்³தா³தீ³னம் பட²மேகவசனட்டா²னே ஓகாரந்தபுல்லிங்க³பா⁴வேன டி²தபா⁴வஸ்ஸ அத³ஸ்ஸனதோ. ‘‘சத்தாரோ’’திஆதீ³னியேவ பன பதா³னி லிங்க³விபல்லாஸவஸேன வுத்தானீதி க³ஹேதப்³பா³னி நியோகா³ நிக்³க³ஹீதந்தேஹி நபும்ஸகலிங்கே³ஹி ஸதிபட்டா²னஸத்³தா³தீ³ஹி ஸத்³தி⁴ம் தேஸம் ஸமானாதி⁴கரணபா⁴வஸ்ஸ த³ஸ்ஸனதோதி.

கேசேத்த² வதே³ய்யும் – நனு ‘‘ஸதிபட்டா²னோ த⁴ம்மோ, சித்தோ த⁴ம்மோ, சித்தா த⁴ம்மா’’திஆதி³ப்பயோக³த³ஸ்ஸனதோ ஸதிபட்டா²னஸத்³தா³தீ³னம் ஓகாரந்தபுல்லிங்க³பா⁴வோ லப்³ப⁴தி. ஏவம் ஸந்தே கஸ்மா தும்ஹேஹி ‘‘ஸதிபட்டா²னஸத்³தா³தீ³னம் பட²மேகவசனட்டா²னே ஓகாரந்தபுல்லிங்க³பா⁴வேன டி²தபா⁴வஸ்ஸ அத³ஸ்ஸனதோ’’தி வுத்தம், கஸ்மா ச ஏகந்ததோ ஸதிபட்டா²னஸத்³தா³தீ³னம் நிக்³க³ஹீதந்தனபும்ஸகலிங்க³தா அனுமதா, நனு ‘‘ஸதிபட்டா²னோ த⁴ம்மோ, சித்தோ த⁴ம்மோ, சித்தா த⁴ம்மா’’திஆதி³த³ஸ்ஸனதோ ‘‘சத்தாரோ ஸதிபட்டா²னா’’திஆதீ³ஸுபி ‘‘ஸதிபட்டா²னஸத்³தா³த³யோ லிங்க³விபல்லாஸவஸேன வுத்தா’’தி வத்தப்³பா³தி? ந வத்தப்³பா³, கஸ்மாதி சே? ‘‘ஸதிபட்டா²னோ த⁴ம்மோ, சித்தோ த⁴ம்மோ, சித்தா த⁴ம்மா’’திஆதீ³ஸுபி ஸதிபட்டா²னசித்தஸத்³தா³தீ³னம் லிங்க³விபல்லாஸவஸேன அனிச்சி²தப்³ப³தோ. தத்த² ஹி புல்லிங்கே³ன த⁴ம்மஸத்³தே³ன யோஜேதும் த⁴ம்மிஸ்ஸரோ ப⁴க³வா த⁴ம்மாபேக்க²ம் கத்வா ‘‘ஸதிபட்டா²னோ, சித்தோ, சித்தா’’தி ச அபா⁴ஸி. கேவலா ஹி ஸதிபட்டா²ன சித்தஸத்³தா³த³யோ ஓகாரந்தபுல்லிங்க³பா⁴வேன கத்த²சிபி யோஜிதா ந ஸந்தி, நிக்³க³ஹீதந்தனபும்ஸகபா⁴வேன பன யோஜிதா ஸந்தி.

ததா² ஹி ‘‘சித்தோ க³ஹபதீ’’தி ஏத்தா²பி புல்லிங்க³க³ஹபதிஸத்³த³ம் அபேக்கி²த்வா விஞ்ஞாணே பவத்தம் சித்தனாமம் பண்ணத்திவஸேன புக்³க³லே ஆரோபேத்வா புக்³க³லவாசகம் கத்வா ‘‘சித்தோ’’தி வுத்தம். யதி³ பன விஞ்ஞாணஸங்கா²தம் சித்தமதி⁴ப்பேதம் ஸியா, ‘‘சித்த’’மிச்சேவ வுச்சேய்ய. தஸ்மா ‘‘சித்தோ க³ஹபதி, சித்தா இத்தீ²’’திஆதீ³ஸு லிங்க³விபல்லாஸோ ந இச்சி²தப்³போ³ ஸாபேக்க²த்தா சித்தஸத்³தா³தீ³னம். யதா² ச ஏத்த², ஏவம் ‘‘ஸதிபட்டா²னோ த⁴ம்மோ, சித்தோ த⁴ம்மோ, சித்தா த⁴ம்மா’’திஆதீ³ஸுபி லிங்க³விபல்லாஸோ ந இச்சி²தப்³போ³. ‘‘சத்தாரோ ஸதிபட்டா²னா’’திஆதீ³ஸு பன ஸதிபட்டா²னஸத்³தா³தீ³னம் அபேக்கி²தப்³பா³னி பதா³னி ந ஸந்தி, யேஹி தே புல்லிங்கா³னி ஸியும், தஸ்மா ‘‘சத்தாரோ’’திஆதீ³னியேவ பதா³னி பரிவத்தேத்வா ‘‘சத்தாரி, ஸப்³பா³னி, ஏதானீ’’தி நபும்ஸகலிங்க³வஸேன க³ஹேத்வா ‘‘ஸதிபட்டா²னா, ஸம்மப்பதா⁴னா’’திஆதீ³ஹி பதே³ஹி யோஜேதப்³பா³னி. ஈதி³ஸேஸு டா²னேஸு கேசி அட்ட²கதா²சரியா நிகாரலோபம் இச்ச²ந்தி ‘‘யா புப்³பே³ போ³தி⁴ஸத்தானம், பல்லங்கவரமாபு⁴ஜே, நிமித்தானி பதி³ஸ்ஸந்தீ’’தி ஏத்த² விய. அத³ஸ்ஸனஞ்ஹி லோபோ, தஸ்மா ‘‘சத்தாரி ஸதிபட்டா²னானி, சத்தாரி ஸம்மப்பதா⁴னானி, ஸப்³பா³னி மாலானீ’திஆதி³கா யோஜனா காதப்³பா³.

கேசி பன ‘‘ஸப்³பே³ மாலா உபேந்தி ம’’ந்தி ஏத்த² மாலாஸத்³த³ம் இத்தி²லிங்க³ந்தி மஞ்ஞித்வா புல்லிங்க³பூ⁴தம் ஸப்³பே³ஸத்³த³ம் இத்தி²லிங்க³வஸேன பரிவத்தேத்வா ‘‘ஸப்³பா³ மாலா’’தி அத்த²ம் கதே²ந்தி. தம் கிஞ்சாபி யுத்ததரம் விய தி³ஸ்ஸதி, ததா²பி ந க³ஹேதப்³ப³ம். ந ஹி ஸோ ப⁴க³வா லிங்க³ம் நஞ்ஞாஸி, ந ச ‘‘ஸப்³பா³ மாலா உபேந்தி ம’’ந்தி த்³வே பதா³னி இத்தி²லிங்கா³னி கத்வா வத்தும் ந ஸக்கி². யோ ஏவம் விஸதி³ஸலிங்கா³னி பதா³னி உச்சாரேஸி. ஜானந்தோயேவ பன ப⁴க³வா வத்தும் ஸக்கோந்தோயேவ ச ‘‘ஸப்³பே³ மாலா உபேந்தி ம’’ந்தி விஸதி³ஸலிங்கா³னி பதா³னி உச்சாரேஸி, தஸ்மா புல்லிங்க³பூ⁴தம் ஸப்³பே³ஸத்³த³ம் ‘‘ஸப்³பா³னீ’’தி நபும்ஸகலிங்க³வஸேன பரிவத்தேத்வா விப⁴ங்க³பாளியம் ‘‘தீணிந்த்³ரியா’’தி பத³ம் விய லுத்தநிகாரேன நபும்ஸகலிங்கே³ன மாலாஸத்³தே³ன யோஜேத்வா ‘‘ஸப்³பா³னி மாலானீ’’தி அத்தோ² க³ஹேதப்³போ³ கத்த²சி ‘‘யஸ்ஸ ஏதே த⁴னா அத்தீ²’’தி ஏத்த² விய. ஏத்த² ஹி யஸ்ஸ ஏதானி த⁴னானீதி அத்தோ². இத³ம்பேத்த² ஸல்லக்கி²தப்³ப³ம். மாலாஸத்³தோ³ த்³விலிங்கோ³ இத்தி²னபும்ஸகவஸேன. திட்ட²து தஸ்ஸித்தி²லிங்க³த்தம் ஸுவிஞ்ஞேய்யத்தா, நபும்ஸகத்தே பன தீணி மாலானி. ‘‘மாலேஹி ச க³ந்தே⁴ஹி ச ப⁴க³வதோ ஸரீரம் பூஜேந்தீ’’திஆத³யோ நபும்ஸகப்பயோகா³னிபி ப³ஹூ ஸந்தி³ஸ்ஸந்தீதி.

யதி³ பன போ⁴ மாலஸத்³தோ³ இத்தி²னபும்ஸகவஸேன த்³விலிங்கோ³, ‘‘ஸப்³பே³ மாலா உபேந்தி ம’’ந்தி ஏத்த² மாலாஸத்³த³ஸ்ஸ இத்தி²லிங்க³பா⁴வபரிகப்பனே கோ தோ³ஸோ அத்தீ²தி? அத்தே²வ இத்தி²லிங்க³ஸத்³த³ஸ்ஸ புல்லிங்க³பூ⁴தேன ஸப்³ப³னாமிகபதே³ன ஸத்³தி⁴ம் ஸமானாதி⁴கரணபா⁴வஸ்ஸாபா⁴வதோ, நபும்ஸகலிங்க³ஸ்ஸ பன புல்லிங்க³பூ⁴தேன ஸப்³ப³னாமிகபதே³ன ஸத்³தி⁴ம் ஸமானாதி⁴கரணபா⁴வஸ்ஸ உபலப்³ப⁴னதோ. தேனேவ ச ‘‘ஏதே த⁴னா’’திஆத³யோ பயோகா³ பாவசனே ப³ஹுதா⁴ தி³ட்டா². ஏத்தா²பி பன வதே³ய்யும் ‘‘த⁴னாதிஆதீ³னி விபல்லாஸவஸேன புல்லிங்கா³னியேவ ‘‘ஏதே’’திஆதீ³ஹி ஸமானாதி⁴கரணபதே³ஹி யோஜிதத்தா’’தி. ந, நபும்ஸகானியேவேதானி. யதி³ ஹி ‘‘த⁴னா’’திஆதீ³னி புல்லிங்கா³னி ஸியும், கத்த²சி பச்சத்தேகவசனட்டா²னே ‘‘ஏஸோ’’திஆதீ³ஹி ஓகாரந்தஸமானாதி⁴கரணபதே³ஹி யோஜிதா ஓகாரந்தத⁴னஸத்³தா³த³யோ ஸியும். ததா²ரூபானம் அபா⁴வதோ பன ‘‘த⁴னா இந்த்³ரியா விஞ்ஞாணா’’திஆத³யோ ஸத்³தா³ நபும்ஸகலிங்கா³னியேவ ஹோந்தி. அயம் நயோ பச்சத்தப³ஹுவசனட்டா²னேயேவ லப்³ப⁴தி. நபும்ஸகலிங்கா³னி ஹி விஸதா³காரானி புல்லிங்க³ரூபானி விய ஹுத்வா புல்லிங்கே³ஹிபி ஸத்³தி⁴ம் சரந்தி, நபும்ஸகா விய புரிஸவேஸதா⁴ரினோ புரிஸேஹீதி நிட்ட²மேத்தா²வக³ந்தப்³ப³ம்.

அதா²பி தே புப்³பே³ வுத்தவசனம் புன பரிவத்தேத்வா ஏவம் வதே³ய்யும் ‘‘சித்தோ க³ஹபதி, சித்தா இத்தீ²’’திஆதீ³ஸு சித்தம் ஏதஸ்ஸ அத்தீ²தி சித்தோ, சித்தம் ஏதிஸ்ஸா அத்தீ²தி சித்தா யதா² ‘‘ஸத்³தோ⁴, ஸத்³தா⁴’’தி ஏவம் அஸ்ஸத்தீ²தி அத்த²வஸேன க³ஹேதப்³ப³தோ லிங்க³விபல்லாஸோ நிச்சி²தப்³போ³, ‘‘ஸதிபட்டா²னோ த⁴ம்மோ, சித்தோ த⁴ம்மோ, சித்தா த⁴ம்மா’’திஆதீ³னி பன ஏவரூபஸ்ஸ அத்த²ஸ்ஸ அக்³க³ஹேதப்³ப³தோ ‘‘ஸதிபட்டா²னம் த⁴ம்மோ, சித்தம் த⁴ம்மோ, சித்தானி த⁴ம்மா’’தி வத்தப்³பே³ லிங்க³விபல்லாஸேன ‘‘ஸதிபட்டா²னோ த⁴ம்மோ, சித்தோ த⁴ம்மோ, சித்தா த⁴ம்மா’’திஆதி³ வுத்தந்தி லிங்க³விபல்லாஸோ இச்சி²தப்³போ³’’தி? தன்ன, ‘‘சித்தோ க³ஹபதீ’’திஆதீ³ஸு பன ‘‘ஸதிபட்டா²னோ த⁴ம்மோ’’திஆதீ³ஸு ச சித்தஸதிபட்டா²னஸத்³தா³தீ³னம் க³ஹபதி த⁴ம்மாதீ³னம் அபேக்க²னவஸேன நிச்சம் புல்லிங்க³பா⁴வஸ்ஸ இச்சி²தத்தா.

ததா² ஹி ஏகந்தனபும்ஸகலிங்கோ³பி புஞ்ஞஸத்³தோ³ அபி⁴ஸங்கா²ராபேக்க²னவஸேன ‘‘புஞ்ஞோ அபி⁴ஸங்கா²ரோ’’தி புல்லிங்கோ³ ஜாதோ, ததா² ஏகந்தனபும்ஸகலிங்கா³பி பது³ம மங்க³லஸத்³தா³த³யோ அஞ்ஞஸ்ஸத்த²ஸ்ஸாபேக்க²னவஸேன ‘‘பது³மோ ப⁴க³வா, பது³மா தே³வீ, மங்க³லோ ப⁴க³வா, மங்க³லா இத்தீ²’’தி ச புமித்தி²லிங்கா³ ஜாதா. ஏகந்தபுல்லிங்கா³பி ஹத்தி²விஸேஸவாசகா காலாவக க³ங்கே³ய்யஸத்³தா³த³யோ குலாபேக்க²னவஸேன ‘‘காலாவகஞ்ச க³ங்கே³ய்ய’’ந்திஆதி³னா நபும்ஸகலிங்கா³ ஜாதா. தத³பேக்க²னவஸேன ஹி அட்ட²கதா²யம் ‘‘காலாவகோ ச க³ங்கே³ய்யோ’’திஆதி³ புல்லிங்க³னித்³தே³ஸோ தி³ஸ்ஸதி. ஏவம் தம்தத³த்தா²னமபேக்க²னவஸேன தம்தம்பகதிலிங்க³ம் நாஸேத்வா அபரம் லிங்க³ம் பதிட்டா²பேத்வா நித்³தே³ஸோ தி³ஸ்ஸதி, ந ச தானி ஸப்³பா³னிபி லிங்கா³னி தத்³தி⁴தவஸேன அஞ்ஞலிங்கா³னி ஜாதானி, அத² கோ² க³ஹபதித⁴ம்மாதீ³னம் அபேக்க²னவஸேனேவ அஞ்ஞலிங்கா³னி ஜாதானி, தஸ்மா ‘‘பேதானி போ⁴தி புத்தானி, கா²த³மானா துவம் புரே. ஸிவிபுத்தானி சவ்ஹய. ஏவம் த⁴ம்மானி ஸுத்வான, விப்பஸீத³ந்தி பண்டி³தா’’திஆதீ³ஸுயேவ லிங்க³விபல்லாஸோ இச்சி²தப்³போ³ அனஞ்ஞாபேக்க²கத்தா வுத்தத⁴ம்மஸத்³தா³தீ³னம், ந பன ‘‘சித்தோ க³ஹபதி, சித்தா இத்தீ², ஸதிபட்டா²னோ த⁴ம்மோ, சித்தோ த⁴ம்மோ, சித்தா த⁴ம்மா’’திஆதீ³ஸு சித்தஸத்³தா³தீ³னம் விபல்லாஸோ இச்சி²தப்³போ³ க³ஹபதி த⁴ம்மாதீ³னம் அபேக்க²கத்தா தேஸந்தி நிட்ட²மேத்தா²வக³ந்தப்³ப³ம், இத³ஞ்ச ஏகச்சானம் ஸம்மோஹட்டா²னம், தஸ்மா ஸத்³த⁴ம்மட்டி²தியா அயம் நீதி ஸத்³தா⁴ஸம்பன்னேஹி குலபுத்தேஹி ஸாது⁴கம் மனஸி காதப்³பா³.

ப³த³ரதித்த²விஹாரவாஸீ ஆசரியத⁴ம்மபாலோ பன ‘‘அபரிமாணா பதா³ அபரிமாணா அக்க²ரா அபரிமாணா ப்³யஞ்ஜனாதி பாளிப்பதே³ஸே ‘பதா³ அக்க²ரா ப்³யஞ்ஜனா’தி லிங்க³விபல்லாஸோ கதோதி த³ட்ட²ப்³ப³’’ந்தி ஆஹ. ஏத்தா²பி மயம் ‘‘பதா³’’தி இத³ம் ‘‘இந்த்³ரியா ரூபா’’திஆதீ³னி விய நபும்ஸகலிங்க³மேவாதி வதா³ம ஓகாரந்தவஸேன பட²மேகவசனந்தபா⁴வாபா⁴வதோ, இதரத்³வயம் பன நபும்ஸகலிங்க³ந்திபி புல்லிங்க³ந்திபி க³ஹேதப்³ப³ம் நிக்³க³ஹீதந்தோகாரந்தவஸேன பட²மேகவசனந்தபா⁴வஸ்ஸூபலப்³ப⁴னதோ. ததா² ஹி ‘‘புத்தானி லதானி பப்³ப³தானி த⁴ம்மானீ’’திஆதீ³னம்யேவ லிங்க³விபல்லாஸானி இச்சி²தப்³பா³னி நிக்³க³ஹீதந்தவஸேன பட²மேகவசனந்ததாய அனுபலத்³தி⁴தோ, தேஸஞ்சோகாரந்தாகாரந்தவஸேன பட²மேகவசனந்ததாத³ஸ்ஸனதோ. ‘‘ஜராத⁴ம்மம் மா ஜீரீ’’தி இத³ம் பன அஞ்ஞபத³த்த²வஸேன நபும்ஸகம் ஜாதந்தி த³ட்ட²ப்³ப³ம்.

பூ⁴தம், பூ⁴தானி, பூ⁴தா. பூ⁴தம், பூ⁴தானி, பூ⁴தே. பூ⁴தேன, பூ⁴தேஹி, பூ⁴தேபி⁴. பூ⁴தஸ்ஸ, பூ⁴தானம். பூ⁴தா, பூ⁴தஸ்மா, பூ⁴தம்ஹா, பூ⁴தேஹி, பூ⁴தேபி⁴. பூ⁴தஸ்ஸ, பூ⁴தானம். பூ⁴தே, பூ⁴தஸ்மிம், பூ⁴தம்ஹி, பூ⁴தேஸு. போ⁴ பூ⁴த, ப⁴வந்தோ பூ⁴தானி, ப⁴வந்தோ பூ⁴தா. ஏவம் சித்தநயேன நாமிகபத³மாலா ப⁴வதி.

இமினா நயேன ‘‘மஹாபூ⁴தம் ப⁴வித்தம் பூ⁴னம் ப⁴வன’’மிச்சாதீ³னம் பூ⁴தா⁴துமயானம் நிக்³க³ஹீதந்தபதா³னம் அஞ்ஞேஸஞ்ச ‘‘வத்த’’மிச்சாதீ³னம் நிக்³க³ஹீதந்தபதா³னம் நாமிகபத³மாலா வேதி³தப்³பா³.

வத்தம் ரூபம் ஸோதம் கா⁴னம், து³க்க²ம் புப்ப²ம் ஜா²னம் ஞாணம்;

தா³னம் ஸீலம் புஞ்ஞம் பாபம், வஜ்ஜம் ஸச்சம் யானம் ச²த்தம்.

ஸகடம் கனகம் தக³ரம் நக³ரம், தரணம் சரணம் த⁴ரணம் மரணம்;

நயனம் வத³னம் கரணம் லவனம், வஸனம் பவனம் ப⁴வனம் க³க³னம்.

அமதம் புளினம் மாலம், ஆஸனம் ஸவனம் முக²ம்;

பது³மம் உப்பலம் வஸ்ஸம், லோசனம் ஸாத⁴னம் ஸுக²ம்.

தாணம் மூலம் த⁴னம் கூலம், மங்க³லம் நளினம் ப²லம்;

ஹிரஞ்ஞம் அம்பு³ஜம் த⁴ஞ்ஞம், ஜாலம் லிங்க³ம் பத³ம் ஜலம்.

அங்க³ம் பண்ணம் ஸுஸானம் ஸம், ஆவுத⁴ம் ஹத³யம் வனம்;

ஸோபானம் சீவரம் பாணம், அலாதம் இந்த்³ரியம் குலம்.

லோஹம் கணம் ப³லம் பீட²ம், அண்ட³ம் ஆரம்மணம் புரம்;

அரஞ்ஞம் தீரமஸ்ஸத்த²-மிச்சாதீ³னி ஸமுத்³த⁴ரே.

இமானி சித்தஸத்³தே³ன ஸப்³ப³தா²பி ஸதி³ஸானி, இமானி பன விஸதி³ஸானி. ஸேய்யதி²த³ம் –

‘‘சம்மம் வேஸ்ம’’ந்திஆதீ³னி, ஏகதா⁴யேவ பி⁴ஜ்ஜரே;

‘‘கம்மம் தா²மம் கு³ணவ’’ந்தி-ஆதீ³னி து அனேகதா⁴.

கத²ம்?

சம்மே, சம்மஸ்மிம், சம்மம்ஹி, சம்மனி, வேஸ்மே, வேஸ்மஸ்மிம், வேஸ்மம்ஹி, வேஸ்மனி, க⁴ம்மே, க⁴ம்மஸ்மிம், க⁴ம்மம்ஹி, க⁴ம்மனி. ஏவம் அஞ்ஞானிபி யோஜேதப்³பா³னி.

கம்மம், கம்மானி, கம்மா. கம்மம், கம்மானி, கம்மே. கம்மேன, கம்முனா, கம்மனா, கம்மேஹி, கம்மேபி⁴. கம்மஸ்ஸ, கம்முனோ, கம்மானம். கம்மஸ்மா, கம்மம்ஹா, கம்முனா, கம்மேஹி, கம்மேபி⁴. கம்மஸ்ஸ, கம்முனோ, கம்மானம். கம்மே, கம்மஸ்மிம், கம்மம்ஹி, கம்மனி, கம்மேஸு. போ⁴ கம்ம, ப⁴வந்தோ கம்மானி, ப⁴வந்தோ கம்மா.

தா²மஸத்³த³ஸ்ஸ பன ததியேகவசனட்டா²னாதீ³ஸு ‘‘தா²மேன, தா²முனா, தா²மஸ்ஸ, தா²முனோ’’தி ச, ‘‘தா²மா, தா²மஸ்மா, தா²மம்ஹா, தா²முனா’’தி ச யோஜேதப்³ப³ம்.

வந்து மந்து இமந்துபச்சயவதம் பன நிக்³க³ஹீதந்தஸத்³தா³னம் ‘‘கு³ணவம் சித்தம், ருசிமம் புப்ப²ம், பாபிமம் குலம்’’ இச்சாதி³பயோக³வஸேன –

கு³ணவம், கு³ணவந்தானி, கு³ணவந்தா, கு³ணவந்தி. கு³ணவந்தம், கு³ணவந்தானி, கு³ணவந்தே கு³ணவந்தி. கு³ணவதா, கு³ணவந்தேன, கு³ணவந்தேஹி, கு³ணவந்தேபி⁴. கு³ணவதோ, கு³ணவந்தஸ்ஸ, கு³ணவதம், கு³ணவந்தானம். கு³ணவதா, கு³ணவந்தா, கு³ணவந்தஸ்மா, கு³ணவந்தம்ஹா, கு³ணவந்தேஹி, கு³ணவந்தேபி⁴. கு³ணவதோ, கு³ணவந்தஸ்ஸ, கு³ணவதம், கு³ணவந்தானம். கு³ணவதி, கு³ணவந்தே, கு³ணவந்தஸ்மிம், கு³ணவந்தம்ஹி, கு³ணவந்தேஸு. போ⁴ கு³ணவ, ப⁴வந்தோ கு³ணவந்தானி, கு³ணவந்தி.

ஏவம் ‘‘ருசிமம், ருசிமந்தானி, ருசிம’’ந்திஇச்சாதி³னா, ‘‘பாபிமம், பாபிமந்தானி, பாபிம’’ந்தி இச்சாதி³னா ச யோஜேதப்³ப³ம். அபிசேத்த² ‘‘கு³ணவம் ப³லவம் யஸவம் ஸதிமம் க³திமம்’’இச்சாதி³னா பயோகா³ வித்தா²ரேதப்³பா³.

கரோந்தஸத்³த³ஸ்ஸ ‘‘கரோந்தம் சித்தம், கரோந்தம் குல’’ந்தி பயோக³வஸேன –

கரோந்தம், கரோந்தானி, கரோந்தா, கரோந்தி. கரோந்தம், கரோந்தானி, கரோந்தே, கரோந்தி. கரோதா, கரோந்தேன, கரோந்தேஹி, கரோந்தேபி⁴. கரோதோ, கரதோ, கரோந்தஸ்ஸ, கரோந்தானம், கரோதம். கரோதா, கரோந்தா, கரோந்தஸ்மா, கரோந்தம்ஹா, கரோந்தேஹி, கரோந்தேபி⁴. கரோதோ, கரதோ, கரோந்தஸ்ஸ, கரோந்தானம், கரோதம். கரோதி, கரோந்தே, கரோந்தஸ்மிம், கரோந்தம்ஹி, கரோந்தேஸு. போ⁴ கரோந்த, ப⁴வந்தோ, கரோந்தானி, கரோந்தா, கரோந்தீதி யோஜேதப்³ப³ம்.

க³ச்ச²ந்தஸத்³த³ஸ்ஸ து ‘‘க³ச்ச²ந்தம் சித்தம், க³ச்ச²ந்தம் குல’’ந்தி பயோக³வஸேன –

க³ச்ச²ந்தம், க³ச்ச²ந்தானி, க³ச்ச²ந்தா. க³ச்ச²ந்தம், க³ச்ச²ந்தானி, க³ச்ச²ந்தே. க³ச்ச²தா, க³ச்ச²ந்தேன, க³ச்ச²ந்தேஹி, க³ச்ச²ந்தேபி⁴. க³ச்ச²தோ, க³ச்ச²ந்தஸ்ஸ, க³ச்ச²ந்தானம், க³ச்ச²தம். க³ச்ச²தா, க³ச்ச²ந்தா, க³ச்ச²ந்தஸ்மா, க³ச்ச²ந்தம்ஹா, க³ச்ச²ந்தேஹி, க³ச்ச²ந்தேபி⁴. க³ச்ச²தோ, க³ச்ச²ந்தஸ்ஸ, க³ச்ச²ந்தானம், க³ச்ச²தம். க³ச்ச²தி, க³ச்ச²ந்தே, க³ச்ச²ந்தஸ்மிம், க³ச்ச²ந்தம்ஹி, க³ச்ச²ந்தேஸு. போ⁴ க³ச்ச²ம், போ⁴ க³ச்ச²ந்தா, ப⁴வந்தோ க³ச்ச²ந்தானி, க³ச்ச²ந்தாதி யோஜேதப்³ப³ம்.

ஏவம் ‘‘சரந்தம் த³த³ந்தம் திட்ட²ந்தம் சிந்தயந்த’’ந்திஆதீ³ஸுபி நாமிகபத³மாலா யோஜேதப்³பா³.

மஹந்தஸத்³த³ஸ்ஸ பன கோசி பே⁴தோ³, ததா² ஹி ‘‘பா³ராணஸிரஜ்ஜம் நாம மஹா’’தி ஏவம் ‘‘மஹா’’இதி நபும்ஸகபயோக³த³ஸ்ஸனதோ ‘‘மஹந்தம், மஹா, மஹந்தானி, மஹந்தா. மஹந்தம், மஹந்தானி, மஹந்தே. மஹதா’’தி கமோ வேதி³தப்³போ³. ஸப்³பா³னேதானி சித்தஸத்³தே³ன விஸதி³ஸானி.

ஸவினிச்ச²யோயம் நிக்³க³ஹீதந்தனபும்ஸகலிங்கா³னம் பகதிரூபஸ்ஸ நாமிகபத³மாலாவிபா⁴கோ³.

அவண்ணுகாரந்ததாபகதிகம் நிக்³க³ஹீதந்தம்

நபும்ஸகலிங்க³ம் நிட்டி²தம்.

இதா³னி தஸ்ஸீலத்த²ஸ்ஸ கதரஸ்ஸஸ்ஸ அத்த²விபா⁴வி இச்சேதஸ்ஸ ஸத்³த³ஸ்ஸ நாமிகபத³மாலம் வக்கா²ம புப்³பா³சரியமதம் புரேசரம் கத்வா –

அட்டி², அட்டீ², அட்டீ²னி. அட்டி²ம், அட்டீ², அட்டீ²னி. அட்டி²னா, அட்டீ²ஹி, அட்டீ²பி⁴. அட்டி²ஸ்ஸ, அட்டி²னோ, அட்டீ²னம். அட்டி²னா, அட்டீ²ஹி, அட்டீ²பி⁴. அட்டி²ஸ்ஸ, அட்டி²னோ, அட்டீ²னம். அட்டி²ஸ்மிம், அட்டி²ம்ஹி, அட்டீ²ஸு. போ⁴ அட்டி², ப⁴வந்தோ அட்டீ², ப⁴வந்தோ அட்டீ²னி. யமகமஹாதே²ரமதம்.

கிஞ்சாபேத்த² நிஸ்ஸக்கவசனட்டா²னே ‘‘அட்டி²ஸ்மா, அட்டி²ம்ஹா’’தி பதா³னி அனாக³தானி, ததா²பி தத்த² தத்த² தம்ஸதி³ஸப்பயோக³த³ஸ்ஸனா க³ஹேதப்³பா³னி. யதா² பன அட்டி²ஸத்³த³ஸ்ஸ, ஏவம் ‘‘ஸத்தி² த³தி⁴ வாரி அக்கி² அச்சி²’’இச்சாதீ³னம்பி ரூபானி ப⁴வந்தி.

அத்த²விபா⁴வி, அத்த²விபா⁴வீ, அத்த²விபா⁴வீனி. அத்த²விபா⁴விம், அத்த²விபா⁴வீ, அத்த²விபா⁴வீனி. அத்த²விபா⁴வினா, அத்த²விபா⁴வீஹி, அத்த²விபா⁴வீபி⁴. அத்த²விபா⁴விஸ்ஸ, அத்த²விபா⁴வினோ, அத்த²விபா⁴வீனம். அத்த²விபா⁴வினா, அத்த²விபா⁴விஸ்மா அத்த²விபா⁴விம்ஹா, அத்த²விபா⁴வீஹி, அத்த²விபா⁴வீபி⁴. அத்த²விபா⁴விஸ்ஸ, அத்த²விபா⁴வினோ, அத்த²விபா⁴வீனம். அத்த²விபா⁴விஸ்மிம், அத்த²விபா⁴விம்ஹி, அத்த²விபா⁴வீஸு. போ⁴ அத்த²விபா⁴வி, ப⁴வந்தோ அத்த²விபா⁴வீ, ப⁴வந்தோ அத்த²விபா⁴வீனி.

ஏவம் ‘‘த⁴ம்மவிபா⁴வி, சித்தானுபரிவத்தி, ஸுக²காரி’’இச்சாதீ³னிபி. தத்த² அட்டி² ஸத்தி²ஆதீ³னி பதா⁴னலிங்கா³னி அனஞ்ஞாபேக்க²கத்தா, அத்த²விபா⁴வி த⁴ம்மவிபா⁴விஆதீ³னி அப்பதா⁴னலிங்கா³னி அஞ்ஞாபேக்க²கத்தா.

ஸவினிச்ச²யோயம் இகாரந்தனபும்ஸகலிங்கா³னம் பகதிரூபஸ்ஸ நாமிகபத³மாலாவிபா⁴கோ³.

இவண்ணந்ததாபகதிகம் இகாரந்தனபும்ஸகலிங்க³ம் நிட்டி²தம்.

இதா³னி கதரஸ்ஸஸ்ஸ கோ³த்ரபு⁴ இச்சேதஸ்ஸ ஸத்³த³ஸ்ஸ நாமிகபத³மாலம் வக்கா²ம புப்³பா³சரியமதம் புரேசரம் கத்வா –

ஆயு, ஆயூ, ஆயூனி. ஆயும், ஆயூ, ஆயூனி. ஆயுனா, ஆயூஹி, ஆயூபி⁴. ஆயுஸ்ஸ, ஆயுனோ, ஆயூனம். ஆயுனா, ஆயூஹி, ஆயூபி⁴. ஆயுஸ்ஸ, ஆயுனோ, ஆயூனம். ஆயுஸ்மிம், ஆயும்ஹி, ஆயூஸு. போ⁴ ஆயு, ப⁴வந்தோ ஆயூ, ப⁴வந்தோ ஆயூனி. யமகமஹாதே²ரமதம்.

கிஞ்சாபேத்த² நிஸ்ஸக்கவசனட்டா²னே ‘‘ஆயுஸ்மா, ஆயும்ஹா’’தி பதா³னி அனாக³தானி, ததா²பி தத்த² தத்த² தம்ஸதி³ஸப்பயோக³த³ஸ்ஸனதோ க³ஹேதப்³பா³னி. ஏத்த² ச ஆயுஸத்³தோ³ பும்னபும்ஸகலிங்கோ³ த³ட்ட²ப்³போ³. ததா² ஹி பாளியம் அட்ட²கதா²ஸு ச தஸ்ஸ த்³விலிங்க³தா தி³ஸ்ஸதி. ‘‘புனராயு ச மே லத்³தோ⁴, ஏவம் ஜானாஹி மாரிஸ. ஆயு சஸ்ஸா பரிக்கீ²ணோ அஹோஸீ’’திஆதீ³ஸு ஹி ஆயுஸத்³தோ³ புல்லிங்கோ³, தப்³ப³ஸேன ‘‘ஆயு, ஆயூ, ஆயவோ’’திஆதி³னா பி⁴க்கு²நயேன யதா²ஸம்ப⁴வம் நாமிகபத³மாலா யோஜேதப்³பா³. ‘‘அக்³க³ம் ஆயு ச வண்ணோ ச. கித்தகம் பனஸ்ஸ ஆயூ’’திஆதீ³ஸு பன நபும்ஸகலிங்கோ³, தப்³ப³ஸேன ‘‘ஆயு, ஆயூ, ஆயூனீ’’தி யோஜிதா.

கோ³த்ரபு⁴, கோ³த்ரபூ⁴, கோ³த்ரபூ⁴னி. கோ³த்ரபு⁴ம், கோ³த்ரபூ⁴, கோ³த்ரபூ⁴னி. கோ³த்ரபு⁴னா, கோ³த்ரபூ⁴ஹி, கோ³த்ரபூ⁴பி⁴. கோ³த்ரபு⁴ஸ்ஸ, கோ³த்ரபு⁴னோ, கோ³த்ரபூ⁴னம். கோ³த்ரபு⁴னா, கோ³த்ரபு⁴ஸ்மா, கோ³த்ரபு⁴ம்ஹா, கோ³த்ரபூ⁴ஹி, கோ³த்ரபூ⁴பி⁴. கோ³த்ரபு⁴ஸ்ஸ, கோ³த்ரபு⁴னோ, கோ³த்ரபூ⁴னம். கோ³த்ரபு⁴ஸ்மிம், கோ³த்ரபு⁴ம்ஹி, கோ³த்ரபூ⁴ஸு. போ⁴ கோ³த்ரபு⁴, ப⁴வந்தோ கோ³த்ரபூ⁴, ப⁴வந்தோ கோ³த்ரபூ⁴னி. போ⁴ கோ³த்ரபூ⁴, போ⁴ கோ³த்ரபூ⁴னி, ஏவம் ப³ஹுவசனம் வா. அயமம்ஹாகம் மதம், ஏவம் ‘‘சித்தஸஹபு⁴’’இச்சாதீ³னம் பூ⁴தா⁴துமயானம் உகாரந்தஸத்³தா³னம் அஞ்ஞேஸம்பி தம்ஸதி³ஸானம் நாமிகபத³மாலா யோஜேதப்³பா³. புக்³க³லவாசகோ பன ஊகாரந்தோ கோ³த்ரபூ⁴ஸத்³தோ³ புல்லிங்க³பரியாபன்னத்தா ஸப்³ப³ஞ்ஞூநயே பவிட்டோ². தத்ரஞ்ஞே ஸத்³தா³ நாம ‘‘சக்கு² வஸு த⁴னு தா³ரு திபு மது⁴ ஸிங்கு³ ஹிங்கு³ சித்தகு³’’இச்சாத³யோ.

ஸவினிச்ச²யோயம் உகாரந்தனபும்ஸகலிங்கா³னம் பகதிரூபஸ்ஸ நாமிகபத³மாலாவிபா⁴கோ³.

உவண்ணோகாரந்ததாபகதிகம்

உகாரந்தனபும்ஸகலிங்க³ம் நிட்டி²தம்.

ஏவம் நிக்³க³ஹீதந்த இகாரந்த உகாரந்தவஸேன திவிதா⁴னி நபும்ஸகலிங்கா³னி நிரவஸேஸதோ க³ஹிதானேவ ஹோந்தி. தேஸு கேஸஞ்சி நிக்³க³ஹீதந்தானம் க்வசி பச்சத்தேகவசனஸ்ஸ ப³ஹுவசனஸ்ஸ ஏகாராதே³ஸவஸேன பே⁴தோ³ தி³ஸ்ஸதி. ஸேய்யதி²த³ம்? ‘‘ஸுகே² து³க்கே². ஏகூனபஞ்ஞாஸ ஆஜீவகஸதே ஏகூனபஞ்ஞாஸ பரிப்³பா³ஜகஸதே’’இச்சேவமாதி³. நனு போ⁴ ஏவம்விதா⁴னம் ரூபானம் பாளியம் த³ஸ்ஸனதோ ‘‘ஏகாரந்தம்பி நபும்ஸகலிங்க³ம் அத்தீ²’’தி வத்தப்³ப³ந்தி? ந வத்தப்³ப³ம் நிக்³க³ஹீதந்தோக³த⁴ரூபவிஸேஸத்தா தேஸம் ரூபானம். ஆதே³ஸவஸேன ஹி ஸித்³த⁴த்தா விஸும் ஏகாரந்தம் நபும்ஸகலிங்க³ம் நாம நத்தி². தஸ்மா நபும்ஸகலிங்கா³னம் யதா²வுத்தா திவித⁴தாயேவ க³ஹேதப்³பா³தி.

நபும்ஸகானமிச்சேவம், லிங்கா³னம் நயஸாலினீ;

பத³மாலா விப⁴த்தா மே, ஸாஸனத்த²ம் மஹேஸினோ.

யஸ்ஸேஸா பகு³ணா ஸத்³த³-நீதிரேஸா ஸுபா⁴விதா;

ஸாஸனே குலபுத்தானம், ஸரணம் ஸோ பராயணம்.

இதி நவங்கே³ ஸாட்ட²கதே² பிடகத்தயே ப்³யப்பத²க³தீஸு விஞ்ஞூனம்

கோஸல்லத்தா²ய கதே ஸத்³த³னீதிப்பகரணே

நபும்ஸகலிங்கா³னம் பகதிரூபஸ்ஸ நாமிகபத³மாலாவிபா⁴கோ³

நவமோ பரிச்சே²தோ³.