2. மிக³லுத்³த³கஸ்ஸ வத்து²ம்ஹி அயமானுபுப்³பி³கதா²

இதோ கிர ஏக திம்ஸதிமே கப்பே ஸிகீ²னாம ஸம்மாஸம்பு³த்³தோ⁴ ஸமதிம்ஸ பாரமியோ பூரேத்வா பரமாதிஸம்போ³தி⁴ம் பத்வா ஸதே³வகம் லோகம் ஸம்ஸாரகந்தாரா உத்தாரேந்தோ த⁴ம்மரதனவஸ்ஸம் வஸ்ஸாபேந்தோ த⁴ம்மபே⁴ரிம்பஹரந்தோ த⁴ம்மகேதும் உஸ்ஸாபேந்தோ ஏகஸ்மிம் ஸமயே விவேக மனுப்³ரூஹந்தோ அரஞ்ஞாயதனம் பாவிஸி, பவிஸித்வா சபன ஸுபுப்பி²தனாக³புன்னாகா³தி³னானாதருஸண்ட³மண்டி³தே ஸுபு²ல்லஸுமனமாலதிப்பபு⁴தினானாலதாகுலே அனேகவித⁴தி³பத³சதுப்பத³ஸங்க⁴னிஸேவிதே ரமணீயே ஸீதலஸிலாதலே சதுக்³கு³ணம் ஸங்கா⁴டிம்பஞ்ஞபேத்வா நிஸீதி³ ச²ப்³ப³ண்ணரம்ஸீஹி தி³ஸம் பூரயந்தோ, ததா³ தத்த² தே³வப்³ரஹ்மனாக³ஸுபண்ணாத³யோ ஸன்னிபதித்வா தி³ப்³ப³மயேஹி க³ந்த⁴மாலாதீ³ஹி ப⁴க³வந்தம் பூஜயமானா தோ²மயமானா நமஸ்ஸமானா அட்ட²ம்ஸு, தஸ்மிம் பனஸமாக³மே ப⁴க³வா மது⁴ரஸ்ஸரம் நிச்சா²ரேந்தோ ப்³ரஹ்மகோ⁴ஸேன சதுஸச்சபடிஸம்யுத்தம் த⁴ம்மம் தே³ஸேதி அமதவஸ்ஸம் வஸ்ஸாபேந்தோவிய. ததா³ ஏகோ மிக³லுத்³த³கோ வனம் பவிட்டோ² மிக³ஸூகரே ஹந்த்வா மம்ஸம் கா²த³ந்தோ தம் டா²னம் பத்வா அத்³த³ஸ ப⁴க³வந்தம் த⁴ம்மம் தே³ஸேந்தம். தி³ஸ்வா ஏகமந்தம் டி²தோ த⁴ம்மம் ஸுத்வா சித்தம் பஸாதே³த்வா ததோ சுதோ தே³வலோகே நிப்³ப³த்தித்வா ச²ஸு காமஸக்³கே³ஸு மனுஸ்ஸேஸுச அபராபரம் இஸ்ஸரியம் அனுப⁴வந்தோ இமஸ்மிம் பு³த்³து⁴ப்பாதே³ ஸாவத்தி²யம் குலகே³ஹே நிப்³ப³த்தித்வா விஞ்ஞுதம் பத்தோ ப⁴க³வதோ ஸாஸனே பப்³ப³ஜித்வா ஏகதி³வஸம் த⁴ம்மம் தே³ஸேந்தஸ்ஸ ப⁴க³வதோ சதுஸச்சபதி ஸம்யுத்தம் த⁴ம்மகத²ம் ஸுத்வா சதுபடிஸம்பி⁴தா³ஹி அரஹத்தம் பத்வா ஏகதி³வஸம் பி⁴க்கு²ஸங்க⁴மஜ்ஜ²க³தோ அத்தனோ கதகம்மப்பகாஸனேன பீதிவாசமுதா³ஹரி.

1. ஏ க திம் ஸே இதோ கப்பே,

லோகே உப்பஜ்ஜி நாயகோ;

பத்திம்ஸ லக்க²ணாதிண்ணோ,

ஸம்பு³த்³தோ⁴ ஸ ஸிகீ²வ்ஹயோ.

2. ஜலந்தோ தீ³பருக்கோ²வ, ஸூரியோவ நப⁴ முக்³க³தோ;

மேருராஜாவ ஸம்பு³த்³தோ⁴, ஜனேஸக்³கோ³ பதாபவா.

3. பூரேத்வா த⁴ம்மனாவாயம், ஸ நாதோ² ஸகலம் பஜம்;

பதிட்ட²பேந்தோ ஸம்ஸார, கந்தாரா ஸந்திபூ⁴மியம்.

4. த⁴ம்மகேதும் ஸமுஸ்ஸேந்தோ, ஹனந்தோ த⁴ம்மது³ந்து³பி⁴ம்;

ஸத்தே து³க்கா² பமோசேந்தோ, வஸீ தத்த² ஜினோ வஸீ.

5. ஏகஸ்மிம் ஸமயே நாதோ²,

லோகபஜ்ஜோதகோ ஜினோ;

விவேககாமோ ஸம்பு³த்³தோ⁴,

ஸுரம்மம் கானனம் க³தோ.

6. புன்னாக³னாக³பூகா³தி³, நானாபாத³பஸம்குலம்;

லதா லிங்கி³தஸாகா²ஹி, ஸா மோத³குஸுமாயுதம்.

7. குஸுமா மோத³ஸம்மத்த, ச²ப்பதா³லி நிஸேவிதம்;

நானாமிக³ க³ணாகிண்ணம், மயூரக³ண நச்சிதம்.

8. ஸீதலச்சோ²தி³காஸாது⁴, ஸுபதித்த²ஜலாஸயம்;

ஆஸார ஸாரதா⁴ராஹி, நிஜ்ஜ²ராஸத ஸம்குலம்.

9. க³ந்த்வான ஸோ மஹாரஞ்ஞம்,

ஸீதலம் ஸிகதாதலம்;

ஸிலாதலே நிஸின்னோஸி,

விஸ்ஸஜ்ஜேந்தோ ச²ரம்ஸியோ.

10. தே³வா தத்த² ஸமாக³ந்த்வா, பூஜேஸும் த்³விபது³த்தமம்;

தி³ப்³பே³ஹி க³ந்த⁴மாலாஹி, நச்சேஹி துரியேஹிச.

11. தே³வதே³வோ ததா³ தே³வ, ஸங்க⁴மஜ்ஜே² நிஸீதி³ய;

சதுஸச்ச மதே³ஸேஸி, நிச்ச²ரம் மது⁴ரம் கி³ரம்.

12. ததா³ஹம் லுத்³த³கோ ஆஸிம், மிக³ஸூகரமாரகோ;

மிக³மம்ஸேன ஜிவாமி, தேன போஸேமி தா³ரகே [போஸேந்தோபுத்ததா³ரகே இதிகத்த²சி].

13. ததா³ஹம் மிக³வம் யாதோ,

ஸபா³ணோ ஸஸராஸனோ;

அத்³த³ஸம் விரஜம் பு³த்³த⁴ம்,

தே³வஸங்க⁴புரக்க²தம்.

14. சந்த³ம்வ தாரகாகிண்ணம், மேரும்வண்ணவமஜ்ஜ²க³ம்;

விரோசமான மாஸீனம், சதுஸச்சப்பகாஸகம்.

15. ஏகபஸ்ஸே டி²தோ தத்த², அஸ்ஸோஸிம் த⁴ம்மமுத்தமம்;

தத்த² சித்தம் பஸாதே³த்வா, ஸோமனஸ்ஸம் பவேத³யிம்.

16. ஏகதிம்ஸே இதோ கப்பே,

யம் புஞ்ஞம் பஸுதம் மயா;

தேனாஹம் புஞ்ஞகம்மேன,

ஜாதோஸிம் தே³வயோனியம்.

17. ஸம்பத்திமனுபு⁴த்வான, ச²காமக்³கே³ பராபரம்;

தே³வஸங்க⁴பரிப்³பூ³ள்ஹோ, விமானே ரதனாமயே.

18. மனுஸ்ஸேஸுச யம் அக்³க³ம், தஸ்ஸ பா⁴கீ³ ப⁴வாமஹம்;

போ⁴கே³ மே ஊனதா நத்தி², ஸத்³த⁴ம்மஸவணே ப²லம்.

19. இமஸ்மிம் ப⁴த்³த³கே கப்பே,

ஸாவத்திபுரமுத்தமே;

அட்³டே⁴ மஹத்³த⁴னே ஸாலே,

ஜாதோஹம் உதி³தே குலே.

20. மஹதா பரிவாரேன, பத்தோ வுத்³தி⁴ம்ச விஞ்ஞுதம்;

சாரிகம் சரமானோஹம், பத்தோ ஜேதவனம் வரம்.

21. அத்³த³ஸம் ஸஹ ஸிஸ்ஸேஹி, நிஸின்னம் ஸுக³தம் ததா³;

அஸ்ஸோஸிம் மது⁴ரம் த⁴ம்மம், சதுஸச்சப்பகாஸகம்.

22. ஸுத்வான மது⁴ரம் த⁴ம்மம், பப்³ப³ஜித்வான ஸாஸனே;

அ ஜரா மரம் ஸீதிபூ⁴தம், பத்தோ நிப்³பா³ணமுத்தமம்.

23. ஸுதம் ஏகமுஹுத்தம் மே, ததா³ த⁴ம்மம் ஸுதே³ஸிதம்;

தேனம்ஹி சதுராபாயே, ந ஜாதோ ந குதோப⁴யம்.

24. கரமுக்கி²ப்ப வக்கா²மி, கரோதே² ககி³ரம் மம;

மமோ பமம் கரித்வான, த⁴ம்மம் ஸுணாத² ஸாது⁴கந்தி.

ஏவஞ்ச பன வத்வா ஸத்தே த⁴ம்மஸவணே நியோஜேஸீதி.

25. இதி தனுதரகாலம் ஸாது⁴ த⁴ம்மம் ஸுணித்வா,

அதி⁴க³தவிப⁴வானம் ஆனுபா⁴வம் ஸுணித்வா;

ப⁴வவிப⁴வஸுக²ம் போ⁴ பத்த²யந்தா குஸீதம்,

ஜஹத² ஸுணத² த⁴ம்மம் து³ல்லப⁴ம் து³ல்லப⁴ஸ்ஸாதி.

மிக³லுத்³த³கஸ்ஸ வத்து²ம் து³தியம்.